1, 2. 1) ¿Kenke tlauel tijpatiita kema mitsmakaj se tlenijki? 2) ¿Kenke san nopa tlaxtlauili tlen toTeotsij temakak tlauel ipati?

¿TLAKE tlamantli tlen tlauel ipati mitsmakatokej? Kema techmakaj se tlenijki tlauel tijpatiitaj pampa uelis patiyo kikojkej, kichiua tlauel ma tiyolpakikaj o pampa techpolouayaya nopa tlamantli.

² Maske mitsmakatokej miak tlamantli, san setsi kena tlauel ipati. Ni tlamantli toTeotsij techmakatok. Maske Jehová techmakatok miak tlamantli, kema temaktilik iKone temakak tlen tlauel ipati (xijpoua Mateo 20:28). Ipan ni tlamachtili tikitasej san nopa tlaxtlauili tlen toTeotsij temakak tlauel ipati, pampa kichiuas tlauel ma tiyolpakikaj uan ma tijpiakaj tlen tlauel techpoloua. Ni kinextia toTeotsij tlauel techiknelia.

3. ¿Tlake nopa tlaxtlauili? ¿Tlake moneki tijkuamachilisej uan kej nopa tijmatisej kenke tlauel ipati nopa tlaxtlauili?

³ Ika nopa tlaxtlauili toTeotsij kinmakixtia maseualmej tlen tlajtlakoli uan mikilistli (Efesios 1:7). Kema tikitasej tlen panok ipan Xochimili Edén tijmatisej  tlake nopa tlaxtlauili. Uan tlaj tijkuamachilisej tlake kipolok Adán kema tlajtlakolchijki, tijmatisej kenke tlauel ipati nopa tlaxtlauili.

4. ¿Kenijkatsa eliyaya Adán inemilis?

⁴ Kema Jehová kichijki Adán, kichijki amo tlajtlakole itlakayo uan itlalnamikilis, yeka Adán amo kema kipiaskia kokolistli, amo ueuejtiaskia yon amo mikiskia. Ya tlauel kuali mouikayaya iuaya Jehová. Biblia kiijtoua Adán eliyaya “ikone toTeko” (Lucas 3:38). Uajka tlauel kuali mouikayayaj, kej se tetaj iuaya ikone tlen tlauel kiiknelia. Jehová kinojnotsayaya Adán katli itstoya ipan Tlaltipaktli, kinauatiyaya ma kichiua tekitl tlen kipaktiyaya uan kiiljuiyaya tlake kinamikiyaya kichiuas (Génesis 1:28-30; 2:16, 17).

5. ¿Kenke kiijtoua Biblia Adán kichijkej “keja [...] itlachialis toTeko”?

⁵ Adán kichijkej “keja [...] itlachialis toTeko” (Génesis 1:27). Ni amo kiijtosneki eliyaya sanse kej toTeotsij. Ipan tlamachtili se tikitakej amo aka ueli kiita Jehová (Juan 4:24). ToTeotsij amo kipia itlakayo kej tojuantij. Uajka kema Biblia kiijtoua Adán kichijtoyaj kej toTeotsij itlachialis, kiijtosneki nojkia kinextiskia kuajkuali tlamantli kej toTeotsij: teikneliskia, tlalnamikiskia, kipiaskia chikaualistli, kichiuaskia tlen xitlauak uan sekinok tlamantli. Nojkia eliskia kej iTata pampa ya kitlapejpeniskia tlen kichiuaskia. Adán amo kichijkej kej tlapialmej, pampa tlapialmej kichiuaj san tlen ipa momajtokej kichiuaj uan Adán amo, ya kitlapejpeniyaya kenijkatsa monejnemiltiskia uan tlaj kichiuaskia tlen kuali o tlen amo kuali. Tlaj kineltokatoskia toTeotsij, itstoskia nochipa ipan Xochimili.

6. ¿Tlake kipolok Adán kema amo kineltokak toTeotsij, uan tlake kinpanoskia ikoneuaj?

⁶ Adán kipanok tlen amo kuali pampa amo tlaneltokak,  yeka toTeotsij kiiljuik mikiskia. Kema tlajtlakolchijki kipolok inemilis tlen amo tlajtlakole uan ayokmo kuali itstoya (Génesis 3:17-19). Uan ikoneuaj nojkia elkej tlajtlakolejkej. Ipan Biblia kiijtoua: “Tlajtlakoli pejki ipan Tlaltipaktli pampa san se tlakatl [Adán] tlajtlakolchijki. Uan pampa pejki tlajtlakoli, nojkia pejki mikistli. Uajka ama mikistli techasi nochi titlakamej, pampa nochi titlajtlakolchijtokej” (Romanos 5:12). Adán techpanoltilik tlajtlakoli, yeka Biblia kiijtoua Adán nojkia kejuak ‘techtemaktilik’ ipan tlajtlakoli uan mikilistli (Romanos 7:14). Uajka, Adán uan Eva ayokmo itstoskiaj pampa amo kinejkej kineltokasej toTeotsij. Uan, ¿tlake kinpanoskia Adán ikoneuaj?

7, 8. ¿Tlake kiijtosneki nopa tlaxtlauili?

⁷ Jehová kinmakixtik maseualmej ika nopa tlaxtlauili. ¿Kenijkatsa motekiuia se tlaxtlauili? Motekiuia kema se akajya tlaxtlaua pampa kineki ma kikuepilikaj tlen iaxka o pampa kineki ma kimajkauakaj se akajya katli kiichtektokej. Ipan Biblia nopa tlajtoli tlaxtlauili kiijtosneki ipati se tlamantli tlen kiixtlauayayaj. Yeka, kema se akajya tetlasojsoljuiliyaya monekiyaya tlaxtlauaskia ipati tlen kinamikiyaya.

⁸ Adán kichijki ma tijpolokaj tlen tlauel ipati. ¿Kenijkatsa ueliskia moixtlauaskia tlen Adán kipolok uan kej nopa techmakixtiskiaj tlen tlajtlakoli uan mikilistli? Ma tikitakaj kenijkatsa temakak Jehová nopa tlaxtlauili uan kenijkatsa uelis mitspaleuis.

9. ¿Kenijkatsa monekiyaya eliskia nopa tlaxtlauili?

⁹ Adán kipolok inemilis tlen amo tlajtlakole, yeka se akajya katli tlajtlakole amo ueliskia techkixtilis  tlajtlakoli tlaj motemaktiliskia (Salmo 49:7, 8). Monekiyaya ma motemaktili se akajya tlen amo tlajtlakole uan kej nopa kiixtlauaskia tlen polijki. Ipan Biblia kiijtoua kej nopa kinamikiyaya kichiuaskiaj. Ni tlanauatili kiijtouayaya tlaj se akajya kimiktiskia se maseuali monekiyaya nojkia ma kimiktikaj (Deuteronomio 19:21). Uajka, ¿ajkia kiixtlauaskia nopa nemilistli tlen kipolok Adán? Katli ‘tlaxtlauaskia tlen monekiyaya’ eliskia se akajya tlen nojkia amo tlajtlakole (1 Timoteo 2:6).

10. ¿Kenijkatsa temakak Jehová nopa tlaxtlauili?

¹⁰ ¿Kenijkatsa temakak Jehová nopa tlaxtlauili? Kititlanki ipan Tlaltipaktli se iluikaejketl tlen amo tlajtlakole. Ya amo kititlanki se katli ueli iluikaejketl, kititlanki iyojtsi iKone tlen tlauel kiikneliyaya (xijpoua 1 Juan 4:9 uan 10). IKone kinejki kikajteuas iluikaktli (Filipenses 2:7). Ipan tlamachtili naui tikitakej Jehová kipanoltik iKone inemilis ipan María itlakayo, uan ika itonal kichijki ma tlakati Jesús kej se akajya tlen amo tlajtlakole (Lucas 1:35).

11. ¿Kenijkatsa san setsi tlakatl ueliskia tlaxtlauas uan kej nopa tlauel miakej ma momakixtikaj?

¹¹ ¿Kenijkatsa ueliskia san setsi tlakatl tlaxtlauas uan kej nopa tlauel miakej ma momakixtikaj? ¿Kenke nochi titlajtlakolejkej? Xikilnamiki, kema Adán tlajtlakolchijki kipolok tlen tlauel ipati. Ya kipolok inemilis tlen amo tlajtlakole, yeka san techpanoltilik tlajtlakoli uan mikilistli. Ipan Biblia Jesús kitokaxtiaj “seyok [...] keja Adán”, ya amo tlajtlakole eliyaya uan amo kema tlajtlakolchijki (1 Corintios 15:45). Uajka kema Jesús techmakixtiko kejuak kipatlako Adán. Ya tlauel kuali kineltokak iTata yeka motemaktilik. Kej  nopa kiixtlajki Adán itlajtlakol uan nojkia kichijki ma timotemachikaj ipan tlen toTeotsij kiijtoua kichiuas (Romanos 5:19; 1 Corintios 15:21, 22).

12. ¿Tlake kinextik Jesús ika nochi tlen kiijiyouik?

¹² Biblia kiijtoua Jesús tlaijiyouik kema nechka mikiskia. Tlauel kiuijuitejkej uan kilavosminkej ipan se kuauitl, kiampa tlauel tlaijiyouik kema mijki (Juan 19:1, 16-18, 30; xikita ipan sekinok tlamachtili “¿Kinamikiskia ma tijtekiuikaj kuamapeli o cruz?”). ¿Kenke monekiyaya tlauel tlaijiyouis? Teipa tikitasej Satanás kiijtoua tlaj kiyejyekoskia se akajya kichiuaskia ma kitlauelkaua Jehová. Uan Jesús kinextik Satanás san istlakati kema kiijiyouik nochi, uan kinextik se tlakatl tlen amo tlajtlakole katli ueli kitlapejpenia tlake kineki kichiuas, amo kema kitlauelkauas Jehová maske Diablo tlauel kitlaijiyouiltis. ¡Nelnelia tlauel yolpajki toTeotsij kema iKone katli tlauel kiiknelia amo kitlauelkajki! (Proverbios 27:11.)

13. ¿Kenijkatsa temakak toTeotsij nopa tlaxtlauili?

¹³ ¿Kenijkatsa temakak toTeotsij nopa tlaxtlauili? Ipan tonali 14, mestli nisán, xiuitl 33 y.u.J., toTeotsij kikajki ma kimiktikaj iKone. Kej nopa Jesús temaktilik inemilis tlen amo tlajtlakole “san se uelta” (Hebreos 10:10). Kema panotoya eyi tonali, Jehová kiyolkuik kej se iluikaejketl. Uan kema Jesús yajki iluikak, kimaktilito iTata nopa inemilis tlen amo tlajtlakole katli temaktilik kej se tlakajkaualistli tlen ika kinmakixtiskia Adán ikoneuaj (Hebreos 9:24). Jehová kiselik nopa tlakajkaualistli tlen tlauel ipati. Kej nopa Jesús tlaxtlajki uan kinmakixtik maseualmej tlen tlajtlakoli uan mikilistli (xijpoua Romanos 3:23 uan 24).

14, 15. ¿Tlake moneki tijchiuasej uan kej nopa toTeotsij ‘techtlapojpoljuis nochi totlajtlakoljuaj’?

¹⁴ Ika nopa tlaxtlauili uelis tijselisej miak tlateochiualistli maske titlajtlakolejkej. Ma tikitakaj kenijkatsa tlen toTeotsij temakak uelis techpaleuis ipan ni tonali uan teipa.

¹⁵ Uelis techtlapojpoljuisej totlajtlakoljuaj. Pampa titlajtlakolejkej tlauel tijouijmatij tijchiuasej tlen kuali, yeka nochi titlajtlakolchiuaj ika tlen tikijtouaj o ika tlen tijchiuaj. Uan pampa Jesús motemaktilik, toTeotsij uelis ‘techtlapojpoljuis nochi totlajtlakoljuaj’ (Colosenses 1:13, 14). Yeka moneki ma timoyolkuepakaj ika nochi toyolo, uan ma tikiljuikaj Jehová ma techtlapojpoljui ika Jesús inemilis katli temaktilik (xijpoua 1 Juan 1:8 uan 9).

16. ¿Kenke uelis tijtekipanosej toTeotsij ika kuali toyolo o totlalnamikilis, uan kenijkatsa techpaleuis tlaj amo techyolkokos totlalnamikilis?

¹⁶ Amo techyolkokos totlalnamikilis. Kema titlajtlakolchiuaj, totlalnamikilis kichiua ma timoiljuikaj toTeotsij amo kema techtlapojpoljuis uan amo tleno topati. Ika nopa tlaxtlauili Jehová techtlapojpoljuia uan kikaua ma tijtekipanokaj ika kuali toyolo o totlalnamikilis maske titlajtlakolejkej (Hebreos 9:13, 14). Yeka timotemachiaj techtlakakilis kema timomaijtosej (Hebreos 4:14-16). Tlaj totlalnamikilis amo techyolkokos, kuali tijyolmatisej uan kichiuas tlauel ma tiyolpakikaj.

17. ¿Tlake tlateochiualistli uelis tijselisej pampa Jesús temaktilik inemilis?

¹⁷ Uelis timotemachisej tiitstosej nochipa ipan Xochimili. Romanos 6:23 kiijtoua: “Intla se tlakatl  tlajtlakolchiua, kipantia mikistli keja itlaxtlauil, pero toTeko Dios techmaka se regalo kema tijneltokaj [...] Jesucristo, uan nopa regalo eltok yolistli yankuik para nochipa”. Ipan tlamachtili eyi tikitakej tlake tlateochiualistli tijselisej ipan Xochimili (Apocalipsis [Revelación] 21:3, 4). Uelis tiitstosej nochipa uan amo tijpiasej kokolistli. Ni uan sekinok tlateochiualistli mochiuas pampa Jesús temaktilik inemilis. Tlaj tijnekij tijselisej moneki tijtlaskamatilisej toTeotsij nopa tlaxtlauili tlen temakak.

18. ¿Kenke moneki ma tijtlaskamatilikaj Jehová nopa tlaxtlauili?

¹⁸ ¿Kenke tlauel moneki ma tijtlaskamatilikaj Jehová nopa tlaxtlauili? Kema techmakaj se tlamantli tlauel tijpatiitaj pampa katli techmakak monejki kitekiuis itomij, ichikaualis o tonali. Ni kichiua ma tiyolpakikaj pampa kej nopa kinextia nelnelia techiknelia. Uajka, kema toTeotsij temaktilik iKone, ya nopa tlen tlauel ipati katli temakak. Ipan Juan 3:16 kiijtoua:  “ToTeko nelia miak kiniknelia nochi tlakamej [...,] yeka kititlanki iKone iyojtsi para mikis ininpampa”. Ika nopa tlaxtlauili Jehová kinextik tlauel techiknelia. Uan Jesús nojkia kej nopa kinextik pampa kinejki motemaktilis (xijpoua Juan 15:13). Uajka, ika nopa tlaxtlauili tijmatij Jehová uan iKone temachtli tlauel techikneliaj (Gálatas 2:20).

19, 20. ¿Kenijkatsa uelis tijtlaskamatilis toTeotsij nopa tlaxtlauili katli temakak?

¹⁹ ¿Kenijkatsa uelis tijtlaskamatilis Jehová nopa tlaxtlauili? Moneki nojua kuali xikixmati pampa ya temakak nopa tlaxtlauili (Juan 17:3). Uelis tijchiuas tlaj timomachtis Biblia ika ni amochtli. Tlaj tikixmatis Jehová, tlauel tikiknelis. Uan mitspaleuis tlauel tijnekis tijchiuas tlen ya kipaktia (1 Juan 5:3).

²⁰ Xitlaneltoka ipan nopa tlaxtlauili. Jesús kiijtok: “Tlaj se tlakatl kineltoka iKone toTeko, yajaya kipia yolistli para nochipa” (Juan 3:36). ¿Kenijkatsa uelis titlaneltokasej ipan Jesús? Amo san ika tlen tikijtosej. Ipan Santiago 2:26 kiijtoua katli “axkichiua tlamantli tlen kuali, ya miktok itlaneltokilis”. Uajka, ika tlen tijchiuaj uan ika tlen tikijtouaj tijnextiaj tlaj nelnelia titlaneltokaj ipan Jesús. Ni tijnextiaj kema tijchiuaj kampeka tijchiuasej kej ya (Juan 13:15).

21, 22. 1) ¿Kenke moneki ma timonechikokaj sejse xiuitl kema moilnamiki toTeko iTlakualis? 2) ¿Tlake tikitasej ipan tlamachtili chikuasej uan chikome?

²¹ Ximonechiko kema moilnamiki toTeko iTlakualis. Ipan youali 14, mestli nisán, xiuitl 33, Jesús kipeualtik kichiua tlen Biblia kitokaxtia “toTeko iTlakualis” (1 Corintios 11:20; Mateo 26:26-28). Nojkia kitokaxtiaj Cristo imikilis. Jesús kipeualtik pampa kiampa kinpaleuik apóstoles uan nochi itokilijkauaj  ma kiilnamikikaj kema motemaktilik kej se tlaxtlauili. Yeka Jesús tlanauatik: “Xijchiuakaj ya ni para inkineskayotisej innechilnamikij” (Lucas 22:19). Kema tikilnamikij Cristo imikilis, techilnamikilia Jehová uan Jesús tlauel techikneliaj pampa temakakej nopa tlaxtlauili. Tlaj sejse xiuitl timonechikosej kema moilnamiki, tijnextisej tijtlaskamatiliaj toTeotsij nopa tlaxtlauili. *

²² Nopa tlaxtlauili tlen Jehová temakak tlauel ipati (2 Corintios 9:14, 15). Ipan tlamachtili chikuasej uan chikome tikitasej kenijkatsa nojkia uelis kinpaleuis katli miktokej.