1, 2. a) ¿Shuj regaloca imamantataj valishca can? b) ¿Jesuspaj causaica imamantataj Dios cushca valishca regalo can?

¿QUIQUINCA ima valishca regalotataj chasquishcangui? Shuj regaloca mana achca cullquita pagashcallamantachu valishca can. Ashtahuanpish canta cushichijpi, can minishticushca regalo cajpimi valishca can.

² Achca regalocunata chasquishpapish, shuj valishca regalotami chasquishcanchij. Jehová Diosca achca regalocunatami cushca, shinapish paipaj Churi Jesucristopaj causaita cushpami shuj valishca regalota gentecunaman cushca (Mateo 20:28-ta rezai). Cai capitulopica chai regalomantami ashtahuan yachashun. Ñucanchijta cushichishcamanta, ñucanchij minishticushca cashcamantami chai regaloca valishca can. Paipaj Churipaj causaita cushpami Jehová Diosca ñucanchijta achcata cˈuyashcata ricuchishca.

3. a) ¿Imapitaj huatashca shina canchij? b) ¿Jesuspaj causai valishca cashcata entendingapajca ima tapuitataj cutichina canchij?

³ Juchapi, huañuipimi huatashca shina canchij. Juchamanta,  huañuimanta quishpichingapajmi Jehová Diosca paipaj Churita cacharca (Efesios 1:7). Bibliapi chashna yachachishcata entendingapajca, Edén huertapi ima tucushcata yuyarishun. ¿Adán juchapi urmashpaca imatataj chingachirca? Cai tapuita cutichishpami Jesuspaj causai imamanta valishca cashcata entendishun.

4. ¿Jucha illaj causaita charishcamantaca Adanca ima shinataj causana carca?

⁴ Adanta rurashpaca Jehová Diosca shuj valishca regalotami curca. Chai regaloca jucha illaj causaimi carca. Adanca jucha illaj cashcamantami ungüicuna illaj, nanaicuna illaj, huiñai huiñaita causana carca. Shinallataj Jehová Dioshuanmi alli apanacuj carca. Bibliapica Adantaca “Diospaj churi” ninmi (Lucas 3:38). Ima shinami shuj cˈuyaj yayaca paipaj churihuan alli apanacun, chashnallatajmi Adanca Dioshuan alli apanacuj carca. Tucuita ruraj Diosca Adanhuan parlanacushpami pai imata ruranata, ima shina causanata huillarca (Génesis 1:28-30; 2:16, 17).

5. ¿Adanca Diosman rijchajmi carca nishpaca Bibliaca imatataj yachachin?

⁵ Adanca Diosman ‘rijchajmi’ carca (Génesis 1:27). Diosman rijchaj nishpaca Diospaj ñahuita charishcataca mana nisha ninchu. Capítulo 1-pi yachashca shinaca, Diosca mana ricuipaj Espiritumi can (Juan 4:24). Diosca aichayuj tulluyuj cuerpotaca mana charinchu. Shinashpaca Adanca cˈuyanapi, cashcata ruranapi, alli yuyaiyuj canapi, imatapish rurai tucunapi, paillataj imatapish agllai tucunapimi Diosman rijchaj carca. Mana shuj máquina layachu carca. Maquinacunaca imata rurana cashcallatami ruran. Shinapish Adanca allita ruranata o mana allita ruranatami agllai tucurca. Diosta cazunata agllashca cashpaca huiñai huiñaitami paraíso Allpapi causanman carca.

6. a) ¿Diosta mana cazushpaca Adanca imatataj chingachirca? b) ¿Adán mana cazushcamantaca ñucanchijpish imataj tucunchij?

 ⁶ Adanca Diosta mana cazushcamantami jucha illaj causaita chingachishpa huañurca (Génesis 3:17-19). Jucha illaj causaitaca mana Adanllachu chingachirca. Bibliapi nishca shinaca: ‘Shuj runallamantami juchaca, cai pachaman yaicurca. Chai juchamantami huañuipish yaicurca’. Chashnami tucuicuna juchapi urmashcamanta ‘huañuica tucui runacunaman shamurca’ (Romanos 5:12). Chaimantami Adanpaj huahua huahuacunapish juchayuj canchij. Adanmi ñucanchijtaca juchaman, huañuiman cˈaturca (Romanos 7:14). Adanpish Evapish paicunapaj munaimantami Jehová Diosta mana cazurca. Chaimantami paicunaca ima esperanzata mana charirca. Shinapish ¿Adanpaj, Evapaj huahua huahuacunaca ima esperanzata charinchijchu?

7, 8. ¿Shuj llaquimanta quishpichingapajca imataj minishtirin?

⁷ Jehová Diosmi gentecunata quishpichisha nirca. ¿Shuj llaquimanta gentecunata quishpichingapajca imataj minishtirin? Ishqui yuyaicunata ricushun: 1) Millai gentecunami shuj huahuata shuhuashpa pacalla charicun. Chai huahuata quishpichingapajca yaya mamaca shuj preciotami pagana can. 2) Bibliapi ricuchishca shinaca maijanta llaquichishca cajpica, chai llaquimantaca cabaltami pagana carca. Por ejemplo: vecinocunapaj chagrata shuj animal dañujpica, chagrapi dañushcatami animalpaj dueñoca cabalta pagana carca.

⁸ Ima shinami ricurcanchij Adanca juchaman, huañuimanmi ñucanchijta cˈaturca. ¿Juchamanta, huañuimanta cabal preciota pagashpa quishpichingapajca Diosca imatataj rurarca? Jehová Dios imata rurashcata, quishpichishcamanta ima bendicioncunata charishcatapish ricushun.

9. ¿Jucha illaj causaita cutin charingapajca imataj minishtirirca?

⁹ Ima shinami ricurcanchij imata dañushca cajpica cabal preciotami pagana carca. Bibliapi yachachishca shinaca justiciata rurangapajca, shuj causaimantaca shujtaj causaihuanmi pagana carca (Deuteronomio 19:21). Adanca jucha illaj causaitami chingachirca. Jucha illaj causaita cutin charingapajca, juchayuj runacunaca mana imata rurai tucunchu (Salmo 49:7, 8). Shinashpaca ¿jucha illaj causaita cutin charingapajca imataj minishtirirca? Jucha illaj causaihuan randishpa quishpichinami minishtirirca (1 Timoteo 2:6).

10. ¿Quishpichingapajca Jehová Diosca imatataj rurarca?

¹⁰ ¿Quishpichingapajca Jehová Diosca imatataj rurarca? Paipaj tucui churicunamantami, ashtahuan cˈuyashca shujlla Churita agllashpa cai Allpaman cacharca (1 Juan 4:9, 10-ta rezai). Churipish cushicushpami jahua pachamanta shamurca (Filipenses 2:7). Capítulo 4-pi ricushca shinaca, Jehová Diosca shuj milagrota rurashpami paipaj Churipaj causaitaca Mariapaj huijsapi churarca. Diospaj espíritu santo Mariata llandushcamantami Jesusca jucha illaj huacharirca (Lucas 1:35).

11. ¿Ima shinataj shujlla jucha illaj runaca achcacunata quishpichi tucun?

¹¹ ¿Ima shinataj shujlla jucha illaj runaca achcacunata quishpichi tucun? Yuyarishun: Adán juchapi urmashcamantami Adanpish paipaj huahua huahuacunapish jucha illaj causaita mana charinchij. Adanmantami juchayuj canchij, huañuipish japin. Shinapish Bibliapica Jesustaca ‘qˈuipa Adán’ ninmi. Paica jucha illajmi carca (1 Corintios 15:45). Jesusmi Adanpaj juchamanta, huañuimantapish ñucanchijta quishpichi tucun. Jesusca Diosta tucuipi cazushpami paipaj jucha illaj causaita  cushpa huañurca. Chashnami Adanpaj juchamanta cabal preciota pagarca. Adanpaj huahua huahuacunamanpish shuj esperanzata curca (Romanos 5:19; 1 Corintios 15:21, 22).

12. ¿Llaquicuna japijpipish Jesusca imatataj ricuchirca?

¹² Bibliaca ima llaquicunata Jesús apashcatami huillan. Jesustaca manchanaita azotishpami shuj caspipi clavashpa, huarcushpa llaquinaita huañuchircacuna (Juan 19:1; Hechos 10:39). ¿Ima nishpataj Jesusca achca llaquicunata aparca? Satanasca llullashpami: llaquicuna japijpica gentecunaca Diosta mana cazungachu nirca. Cai yuyaitaca shujtaj capitulopimi ashtahuan yachashun. Shinapish Jesusca llaquicuna japijpipish tucui shunguhuan Diosta cazushpami Diablo llulla cashcata ricuchirca. Shinallataj allita o mana allita agllai tucuj, jucha illaj gentecunapish Jehová Diosta tucui shunguhuan cazuna cashcatami ricuchirca. ¡Paipaj cˈuyashca Churi tucui shunguhuan paita cazushcata ricushpaca, Jehová Diosca achcatami cushicushca canga! (Proverbios 27:11.)

13. ¿Ñucanchijta quishpichingapajca Jesusca imatataj rurarca?

¹³ ¿Jesuspaj causaica ima shinataj ñucanchijta quishpichin? Judiocunapaj calendariopi, 14 de nisán punllapi huata 33-pimi, Jehová Diosca paipaj jucha illaj Churita huañuchichun saquirca. Chashnami Jesusca ‘shuj cutinlla’ huañushpa huiñai huiñaipaj paipaj causaita curca (Hebreos 10:10). Quimsa punlla qˈuipaca Jehová Diosmi espíritu cuerpota cushpa causachirca. 40 punllacuna qˈuipaca jahua pachapimi Jesusca paipaj Yayapaj ñaupajpi ricurirca. Chaipica huañushpa paipaj jucha illaj causaita cushcatami paipaj Yayaman ricuchirca. Chashnami Adanpaj huahua huahuacunata quishpichingapaj paipaj jucha illaj causaita curca (Hebreos 9:24). Jehová Diosca Jesús pagashca cabal preciotaca chasquircami.  Chashnami Jesuspaj causaica juchamanta, huañuimanta ñucanchijta quishpichin (Romanos 3:23, 24-ta rezai).

14, 15. ¿Juchacunamanta perdonashca cangapajca imatataj rurana canchij?

¹⁴ Jesús huañushcamantaca juchayuj cashpapish sumaj bendicioncunatami chari tucunchij. Jehová paipaj Churita cushcamanta cunan punllacunapi, shamuj punllacunapipish ima bendicioncunata charina cashcata ricushun.

¹⁵ Juchacunamantami perdonashca canchij. Juchayujcuna cashcamantaca allita ruranaca sinchimi can. Tucuicunami ñucanchij rimaicunahuan, ñucanchij ruraicunahuan juchapi urmanchij. Shinapish Jesús huañushcamantami juchamanta “perdonashca canchij” (Colosenses 1:13, 14). Perdonashca cangapajca shungumantami arrepentirina canchij. Shinallataj Jesús huañushcata crishpami, Jehová Diostaca shungumanta perdonahuai nishpa mañana canchij (1 Juan 1:8, 9-ta rezai).

16. a) ¿Imamantataj Jehová Diostaca mana manchashpa adorai tucunchij? b) ¿Jehová Diospaj ñaupajpi alli ricurishpaca ima shinataj sintirinchij?

¹⁶ Diospaj ñaupajpimi alli ricurinchij. Diospaj ñaupajpi mana alli cashcata yuyashpaca esperanza illajmi causashun. Imapaj mana valishcatami yuyashun. Shinapish Jesús huañushcamantami, juchayuj cashpapish Jehová Diospaj ñaupajpi alli ricurishpa paita adorai tucunchij (Hebreos 9:13, 14). Chaimantami mana manchashpa paita mañai tucunchij (Hebreos 4:14-16). Diospaj ñaupajpi alli ricurishcata yachashpaca shungupipish, yuyaipipish, causaipipish cushillami sintirinchij.

17. ¿Jesús huañushcamantaca ima bendicioncunatataj chasquishun?

 ¹⁷ Paraíso Allpapimi huiñai huiñaita causashun. Romanos 6:23-pica: “Juchaca huañuitami cun” ninmi. Ashtahuanpish cai verso tucuripica, Jehová Diosca ñucanchijta cˈuyashcamantami Jesusta cachashpa ‘huiñai causaita’ curca ninmi. Cai libropaj capítulo 3-pica paraíso Allpapi ima bendicioncunata chasquinatami yacharcanchij (Apocalipsis 21:3, 4). Tucui chai bendicioncunatapish, ungüicuna illaj huiñai causaitapish Jesús huañushcamantami chasquishun. Chai bendicioncunata chasquingapajca Jehová Diostami paipaj Churipaj causaita cushcamanta pagui nina canchij.

18. a) ¿Jehová Diosca imamantataj paipaj Churipaj causaita curca? b) ¿Ñucanchijca imatataj rurana canchij?

¹⁸ Paipaj Churipaj causaita cushcamantami Jehová Diostaca pagui nina canchij. Shuj regaloca tiempota, fuerzata, cullquita gastashcamantami valishca can. Chai regalota cˈuyaihuan cujpica cushicushpami chasquinchij. Jehová Diosca paipaj Churipaj causaita cushpami shuj valishca regalota cushca. Juan 3:16-pica: ‘Taita Diosca, cai  pachapi causajcunata yallitaj cˈuyashpami, paipaj shujlla Churita cacharca’ ninmi. Chashnami Jehová Diosca ñucanchijta achcata cˈuyashcata ricuchirca. Jesuspish huañushpaca ñucanchijta achcata cˈuyashcatami ricuchirca (Juan 15:13-ta rezai). Shinashpaca Jehová Diospish, Jesuspish ñucanchijta achcata cˈuyashcatami entendina canchij (Gálatas 2:20).

19, 20. Valishca regalota chasquishcamantaca ¿ima shinataj pagui ni tucungui?

¹⁹ Valishca regalota chasquishcamantaca ¿ima shinataj pagui ni tucungui? Jehová Diostami alli “rijsina” cangui (Juan 17:3, NM). Paita alli rijsingapajca Bibliatami cai librohuan yachana cangui. Jehová Diosta ashtahuan rijsishpaca paitami ashtahuan cˈuyangui. Paita ashtahuan cˈuyashpaca tucuipi cazuna munaitami charingui (1 Juan 5:3).

²⁰ Jesús huañushcatami crina cangui. Bibliapi nishca shinaca Jesuspi ‘crijcunaca huiñai causaitami charinga’ (Juan 3:36). ¿Ima shinataj Jesuspi crishcata ricuchina cangui? Santiago 2:26-pi nishca shinaca, ‘ima rurashcacuna illajlla crijca huañushca’ shinami can. Shinashpaca ñucanchij ruraicunahuan, ñucanchij rimaicunahuan Jesuspaj ejemplota catishpami paita crishcata ricuchinchij (Juan 13:15).

21, 22. a) ¿Jesús Huañushcata Yuyarina Tandanacuimanca imamantataj cada huata rina canchij? b) ¿Capítulo 6 y 7-pica imatataj yachashun?

²¹ Jesús Huañushcata Yuyarina Tandanacuimanmi rina cangui. Judiocunapaj calendariopi, huata 33-pi, 14 de nisán tutapimi, Jesusca shuj micuita rurarca (1 Corintios 11:20; Mateo 26:26-28). Chai micuitaca Jesús Huañushcata Yuyarina Tandanacui nishpami rijsinchij. Jesusca paita catijcunata quishpichingapajmi paipaj jucha illaj  causaita curca. Chaita yuyarichunmi Jesusca chai tandanacuita rurarca. Chai tandanacui qˈuipaca: ‘Caitaca ñucata yuyarishpa ruracunguichijlla’ nishpami mandarca (Lucas 22:19). Chai tandanacuipica Jehová Diospish, Jesuspish ñucanchijta cˈuyashcamanta quishpichishcatami yuyarinchij. Chai tandanacuiman cada huata rishpaca ñucanchijta quishpichishcamanta pagui nishcatami ricuchinchij. *

²² Quishpichingapajca Jehová Diosca shuj valishca regalotami ñucanchijman cushca (2 Corintios 9:14, 15). Chai valishca regaloca huañushca gentecunatapishmi ayudai tucun. Cai yuyaitaca capítulo 6 y 7-pimi yachashun.