Dul me Abicel

Jo ma Guto Mono Gitye Kwene?

Ngo ma timme i komwa ka wato?

Pingo wan wato?

Pingo ngeyo lok ada i kom to kweyo cwiny?

1-3. Kit lapeny ango ma dano gipenyo i kom to, dok lagam ango ma dini mapat pat gimiyo?

MAGI aye gubedo lapeny ma dano gubedo ka penye kwede pi mwaki alip mapol. Lapeny magi pigi tego. Kadi wan wabedo anga nyo wabedo kwene, lagam me lapeny magi gudowa ki acel acel.

² I dul ma okato-ni, wanyamo kit ma tyer me ginkok pa Yecu Kricito-ni oyabo botwa yo me kwo ma pe tum. Wapwonyo bene ni Baibul otito con pi kare ma “to bene dong bibedo pe” iye. (Niyabo 21:4) I kare-ni, wan ducu wato. Kabaka maryek Solomon owaco ni: “Jo makwo gingeyo ni gibito.” (Latitlok 9:5) Watemme me bedo makwo pi kare malac kit ma nongo twere kwede. Ento kadi bed kit meno, pe wangeyo gin ma timme i komwa ka wato.

³ Ka ngat ma wamaro oto, wakoko. Dok watwero penyo ni: ‘Gin ango ma otimme i komgi? Mono gitye ka deno can? Nyo mono gitye ka gwokowa? Wan watwero konyogi? Tika wabinenogi doki?’ Dini me lobo-ni gimiyo lagam mapat pat i kom lapeny magi. Mukene gipwonyo ni ka ikwo kwo maber, ci ibicito i polo, ento ka ikwo kwo marac, ci ibiwang i mac me kapiny. Dini mukene gipwonyo ni i kare me to, dano gicito i kabedo me cwiny me bedo kacel ki kwarigi. Dok dini mukene pud aye, gipwonyo ni jo muto gicito i  kabedo ma tye i te lobo ci kingolo kop i wigi ka dok kinywalogi odoco i kom mukene.

4. Kit tam ango ma dini mapol gitye kwede i kom to?

⁴ Kit pwony pa dini magi ducu cung i kom tam acel keken​—ni gin mo tye ma bwot ki komwa i kare me to. Dini cokcok ducu me kare macon ki me kare-ni kiwaco ni, wan wamedde ki kwo nakanaka ki kero me neno, winyo lok, ki tam i yo mo olo. Ento mono, man twere nining? Pien kero magi, kacel ki tamwa, ducu gitiyo pi tic pa adamwa. I to, adam juko tic woko. Ngec ma tye i wiwa, ki teko calo me neno gini, pe gimedde ki tic pigi ken-gi i yo mo ma pe kiniang iye. Gin pe gibwot ki i to pa adamwa.

NGO MA TIMME I KOMWA KA WATO?

5, 6. Baibul pwonyo gin ango i kom kit ma jo ma oto gitye kwede?

⁵ Gin ma timme i to pe obedo gin ma Jehovah ma Ocweyo adamwa pe niang iye. En ngeyo lok ma tye ada, dok i Lokke, ma obedo Baibul-li, en tittiwa kit ma jo ma oto gitye kwede. Pwonnye tye atir kamaleng ni: Ka dano oto, en dong bedo pe. To aye obedo olungtuke me kwo. Jo ma guto pe gineno nyo giwinyo lok nyo gitamo tam mo. Pe tye kit dul me kwowa ma bwot ki i to. Wan pe watye ki gin makwo nyo tipo ma pe to. *

⁶ I kare ma Solomon oneno maber ni jo ma kwo gingeyo ni gibito, en ocoyo ni: ‘Jo ma dong guto woko pe gingeyo gin mo.’ En dok omedo lok mukene i kom lok ada menoni jo ma oto pe giromo nyuto mar nyo adage ki dok ni “tic nyo tam nyo ngec nyo ryeko mo dong pe i lyel.” (Latitlok 9:5, 6, 10) I kit yo acel-li, Jabuli 146:4 waco bene ni ka dano oto, ‘tamme ducu ma yam oyubo rwenyo woko liweng.’ Wan wabedo gin ma to dok pe wabwot ki i to pa kom. Kwo ma watye kwede ni obedo calo leb mac laput nyo kandol.  Ka leb mac ma lyel-li oto, pe dok cito ka mo. Nongo dong pe.

GIN MA YECU OWACO I KOM TO

7. Yecu otito ni to obedo calo ngo?

⁷ Yecu Kricito oloko pi kit ma jo ma oto gitye kwede. En oloko man i kom Lajaro, dano ma en ngeyo maber ma onongo oto woko. Dong Yecu owaco bot lupwonnyene ni: “Awota Lajaro dong onino oko.” Lupwonnyene gutamo ni Yecu onongo tye ka wacci Lajaro onino woko pi nongo yweyo wek okonye me cang ki i twone-ni. Gin onongo guniang marac. Yecu otito atir ni: “Lajaro dong oto oko.” (Jon 11:11-14, Baibul me leb Lango) Niang maber kany ni, Yecu oporo to ki yweyo dok ki nino. Lajaro onongo pe i polo nyo i mac me kapiny. En onongo pe tye ka rwatte ki lumalaika nyo kwari macon. Pe onongo dong kicok nywale macalo dano mo mukene. En onongo tye ka yweyo i to, kit macalo timme ka dano mo onino adada labongo kit lek mo. Ginacoya mukene bene poro to ki nino. Me laporre, i kare ma kicelo Citefano wa i to, Baibul waco ni en “te nino gire oko.” (Tic pa Lukwena 7:60, Baibul me leb Lango) I kit yo acel-li, lakwena Paulo ocoyo lok i kom jo mukene i karene ma onongo ‘gunino’ i to.​—1 Jo Korint 15:6, Baibul me leb Lango.

8. Wangeyo nining ni onongo pe obedo yub pa Lubanga ni dano omyero guto?

⁸ Onongo mono obedo yub pa Lubanga ma okwongo ni dano omyero oto? Pe wa acel! Jehovah ocweyo dano me bedo matwal i lobo. Kit ma waneno kwede con i buk man, Lubanga oketo dano aryo mukwongo-ni i paradic mo ma mwonya adada. Omiyogi yot kom. Jehovah onongo mito ni  gubed ki jami mabeco keken. Tye lanyodo mo ma lamar ma mito ni lutinone guden can me tiyo ki to? Ngene kene ni pe! Jehovah omaro lutinone dok onongo mito ni gubed ki yomcwiny ma pe gik i wi lobo. Baibul loko i kom dano ni: “[Jehovah] oketo kare ma pe gik i cwinygi.” (Latitlok 3:11, NW) Lubanga ocweyowa ki mitti me kwo pi nakanaka. Dok en oyabo yo pi miti meno me cobbe.

 GIN MA OMIYO DANO TO

9. Jehovah onongo ogengo Adam pe me timo ngo, dok pingo cik man onongo pe tek me aluba?

⁹ Pingo, kono dong dano to? Me nongo lagam-mi, myero wanen jami ma otimme i kare ma onongo tye laco ki dako acel keken i wi lobo. Baibul tito ni: “Dok Rwot Lubanga omiyo yadi gutwi i ngom, kwa yadi ducu mamwonya ma neno ber, ki mabeco me acama.” (Acakki 2:9) Kadi bed kit meno, onongo tye gin acel mo ma kigengo. Jehovah owaco bot Adam ni: “Yadi ducu ma tye i poto, camgi macalo imito; ento yat me ngeyo gin maber ki marac pe icam, pien i nino ma ibicamo iye, en aye ibito iye bene.” (Acakki 2:16, 17) Cik man onongo pe tek me aluba. Yadi mapol mukene onongo tye ma Adam gin ki Kawa gitwero camone. Man omiye kare maber me nyuto pwocgi bot Ngat ma omiyo botgi jami magi ducu, ma kwo ma pe tum bene onongo tye i kine-ni. Bedo ki winy bene onongo binyuto ni giworo twero pa Wongi ma i polo dok ni gimito telane me mar.

10, 11. (a) Dano aryo mukwongo-ni gucako kwero winyo dog Lubanga nining? (b) Pingo bedo labongo winy pa Adam gin ki Kawa-ni obedo lok marac atika?

¹⁰ Ki cwer cwiny madit, dano aryo mukwongo-ni pe guwinyo dog Jehovah. Catan openyo Kawa kun tiyo ki twol ni: “Lubanga mono owacci, ‘Pe wucam yat ducu ma tye i poto-ni’?” Kawa ogamo ni: “Watwero camo nyig yadi ducu ma tye i poto-ni, ento Lubanga ociko ni, ‘Pe wubicamo nyig yat ma tye i dye poto, pe wugud kome bene, wek pe wuto.’”​—Acakki 3:1-3.

¹¹ Catan owaco ni: “Pe wubito. Pien Lubanga ngeyo ni, ka wucamo, ci wangwu biyabbe woko, ci wubidoko calo Lubanga, miyo wungeyo gin maber ki marac.” (Acakki 3:4, 5) Catan onongo mito ni Kawa oye ni en ebinongo gin maber ka en ecamo nyig yat ma kigengo-ni. Ki tung bot Catan, Kawa onongo bibedo ki twero me moko gin maber ki gin marac en kikome; en onongo biromo timo gin ma iye mito.  Catan bene odoto Jehovah ni oloko lok goba i kom gin ma bitimme ka kicamo nyig yat-ti. Kawa oye lok pa Catan. Pi meno en opwono nyigge mogo ci ocamo. En dok bene omiyo mogo bot cware, ci cware bene ocamo mogo. Gin pe gutimo man lato wang. Gin onongo gingeyo ni gin gitye ka timo gin ma Lubanga owaco ni pe gitim. Pi camo nyig yat-ti, gin gukwero winyo cik ma yot dok ma rwatte maber akaka. Gin gunyuto cac i kom Wongi ma i polo kacel ki twerone. Cac ma kit meno i kom Lacwecgi ma lamar-ri onongo pe kitwero wekone aweka!

12. Gin ango ma twero konyowa me niang kit ma Jehovah owinyo kwede i kare ma Adam gin ki Kawa gujemo i kome?

 ¹² Me miyo labol-le: In itwero winyo nining ka ipito wodi nyo nyari mo kun igwokke maber ci lacen okwero winyo dogi i yo ma nyuto ni en pe tye ki woro nyo mar i komi? Meno twero keli twon cwer cwiny madit. Kong dong itam, cwer cwiny ma Jehovah myero obed ni owinyo i kare ma Adam gin ki Kawa gujemo i kome.

13. Gin ango ma Jehovah owaco ni bitimme i kom Adam i to, dok man tyen lokke ngo?

¹³ Jehovah onongo dong pe tye ki tyen lok mo me gwoko Adam gin ki Kawa ma pe gubedo luwiny-nyi me bedo matwal. Gin guto, kit macalo en onongo otito ni bitimme i komgi. Kwo pa Adam gin ki Kawa ogik. Gin pe gucito ka mukene macalo tipo. Wangeyo ni tye kit man pi gin ma Jehovah owaco bot Adam i kare ma en okwero bedo ngat ma lawiny. Lubanga owaco ni: “Ibidok i ngom, kit ma con gikwanyi ki iye; in apwa, dok bene ibidok i apwa.” (Acakki 3:19) Lubanga onongo ocweyo Adam ki i kom apwa me ngom. (Acakki 2:7) Ma onongo meno peya otimme, Adam onongo pe. Pi meno, i kare ma Jehovah owaco ni Adam bidok i apwa, En onongo tye ka wacone ni Adam bidok cen calo gin ma pe doki. Adam bibedo pe ki kwo calo apwa ma kicweye ki kome-ni.

14. Pingo wato?

¹⁴ Onongo kono Adam gin ki Kawa gitye makwo wa i kare-ni, ento guto pien cwinygi oyero me kwero winyo dog Lubanga pi meno gubalo. Gin ma omiyo wato aye ni bal pa Adam-mi kacel ki tone okube omako wa wan lutinone ducu. (Jo Roma 5:12) Bal meno tye calo two mo marac atika ma dong tye i remo ma pe tye ngat mo ma bwot ki iye. Adwogine, aye to, ma obedo gin marac atika. To obedo lakwor, ento pe larem. (1 Jo Korint 15:26) Pud dong omyero wabed ki pwoc madit ni Jehovah omiyo ginkok me larowa ki i kom lakwor man ya!

 NGEYO LOK ADA I KOM TO KONYO

15. Pingo ngeyo lok ada i kom to kweyo cwiny?

¹⁵ Gin ma Baibul pwonyo i kom kit ma jo muto tye kwede kweyo cwiny. Kit ma waneno kwede, jo ma guto pe giwinyo arem nyo cwer cwiny mo. Pe tye tyen lok mo me bedo ki lworo i komgi, pien pe gitwero wanowa. Pe gimito kony ki botwa, dok pe gitwero konyowa. Pe watwero lok kwedgi, dok gin pe gitwero lok kwedwa. Lutela dini mapol giloko goba ni gitwero konyo jo ma dong guto woko, dok jo ma giye pwony pa lutela ma kit magi gimiyo botgi cente. Ento ngeyo lok ada i kom to konyowa ki i goba pa jo ma pwonyo lakit goba magi.

16. Anga ma ocung inge pwony pa dini mapol, dok i yo mene?

¹⁶ Pol pa dini mono ye pwony ma Baibul pwonyo i kom jo ma oto? Polgi pe giye. Pingo? Pien Catan aye tye ocung inge pwonygi. En tiyo ki dini goba wek dano gubed ki niye ni i nge to pa kom, gibimedde anyim ki kwo macalo cwiny. Man aye obedo goba acel man Catan ribo ki goba mukene me rwenyo dano woko ki i kom Lubanga Jehovah. En timo man nining?

17. Pingo pwony me wang pi nakanaka-ni pe miyo deyo bot Jehovah?

¹⁷ Kit ma kityeko nyuto kwede angec, dini mogo gipwonyo ni ka dano moni okwo kwo marac, en bicito i kabedo me mac ka ma en bibedo iye i can nakanaka inge to. Pwony man pe miyo deyo i kom Lubanga. Jehovah obedo Lubanga ma lamar dok pe weko dano deno can i yo ma kit meno matwal. (1 Jon 4:8) In iwinyo nining ka dano mo opwodo latinne ma pe lawiny ki keto cinge i mac ma lyel? Itwero bedo ki woro i kom dano ma kit meno? I ada, kadi wa ngeyone angeya tika bene ibimito? Pe ibimito matwal! Nen ni ibitamo ni en obedo ngat mo mager marac. Dong, Catan mito ni wan watam ni Jehovah pwodo dano i mac pi nakanaka​—pi mwaki bilion mapol ata!

18. Woro jo ma oto ocung i kom goba mene?

 ¹⁸ Catan bene tiyo ki dini mogo me pwonyo ni inge to, dano gidoko tipo ma jo ma kwo myero guwor dok gimii botgi kwogo. Ma lubbe ki pwony man, tipo pa jo ma guto magi twero doko lurem matek nyo lukwor pa dano. Dano mapol giye goba man. Gin gilworo jo ma oto dok gimiyo kwogo ki deyo botgi. Ki tungcel, Baibul pwonyo ni jo ma oto gitye ka nino dok ni wan omyero wawor Lubanga Jehovah acel me ada, ma Lacwec ki Lami jami ducu.​—Niyabo 4:11.

19. Ngeyo lok ada i kom jo ma oto konyowa me niang pwony mene mukene me Baibul?

¹⁹ Ngeyo lok ada i kom jo ma oto konyi wek pe i ye pwony goba me dini. Konyi bene me niang pwony mukene me Baibul. Me labolle, ka icako niang ni dano pe gimedde ki kwo macalo cwiny, ci pwony i kom kwo ma pe tum i paradic i wi lobo cako doko gin ma tere twero niange.

20. Lapeny ango ma gibineno i dul ma lubo man?

²⁰ I kare ma okato mabor i ngec, Yubu, laco ma kite atir okelo lapeny ni: “Ka dano dong oto, pud dok bibedo kwo?” (Yubu 14:14) Dano ma pe kwo ma tye ka nino i to twero dok kwo? Gin ma Baibul pwonyo i lok man kweyo cwiny atika kit ma dul ma lubo man binyuto kwede.

[Lok ma tye piny]

GIN MA BAIBUL PWONYO

▪ Jo ma oto pe gineno piny nyo giwinyo lok nyo gitamo tam.​—Latitlok 9:5.

▪ Jo ma oto gitye ka yweyo; pe gitye ka deno can.​—Jon 11:11.

▪ Wan wato pien walako bal ki bot Adam.​—Jo Roma 5:12.

[Peny me Kwan]

[Cal ma tye i pot karatac 59]

Leb mac-ci ocito kwene?

[Cal ma tye i pot karatac 60]

Jehovah ocweyo dano ni gukwo i wi lobo matwal

[Cal ma tye i pot karatac 62]

Adam oa ki i kom apwa, dok en odok i apwa