1-3. Mornna vixim lokanchea monant kosle prosn ietat ani veg-veglle dhorm tanche kitem zobab ditat?

HOZARAMNIM vorsam zalim, lok oslea prosnam vixim chint’ta. Ani he gorjeche prosn zaun asat. Ami konnui asum, ani sonvsarant khoim-i ravum, amkam sogleank hanche zobab zai.

² Jezun dilolea bolidana udexim, sasnachea jivitachi vatt koxi ukti zali hea vixim ami fattlea odheai-ant xiklim. Toxench, fuddarak “moronn anink aschem na”, hem-ui amkam Bible-antlean kollon ailem. (Prokasovnni 21:4) Sod’deak ami soglim mortat. Tea vixim Solomon razan mhunnttlem, “jiveank apunn mortole mhunnon khobor asa”. (Upodexok 9:5) Amkam sogleank chodd vorsam jieunk zai. Torui, melea uprant amchem kitem zatolem, ho prosn amchea monant ietach.

³ Amchim ghorchim vo amche ixtt morta tednam ami khub dukhi zatat. Tea vellar, ‘Tim khoim asat? Tankam dukh bhogchem poddtta kai? Tim amkam rakhtat kai? Ami tankam modot korunk zata kai? Ami kednam-i tankam porot pollounk xoktolim?’ osle prosn ghoddie amchea monant ieunk xoktat. Sonvsarantle dhorm hea  prosnanche veg-veglle zobab ditat. Thodde, borem jivit jielear sorgar, ani vaitt jivit jielear ifernant voitolim mhunn sangtat. Thodde dhorm, lok melea uprant te aplea melolea purvozam borabor ravonk voitat mhunn xikoitat. Ani thodde, melolea munxancho neai zaun te dusreanchea rupan zolmak ietat mhunn sangtat.

4. Meloleam vixim sogle dhorm kitem dakhounk sodhtat?

⁴ Hea soglea dhormanchea xikounnentlean, ek munis melear pasun tache kuddintlem kitem tori jivem urta mhunn te dakhounk sodhtat. Tanchea pormonnem, melea uprantui to munis jieta ani tachean pollounk, aikonk ani chintunk zata mhunn te somzotat. Punn hem koxem zaunk xokta? Amcho mendu cholta mhunn ami aikotat, polloitat ani chintat. Ani ami morta tednam to kam korpacho bond zata. Taka lagon, ami kainch ugddas dovrunk, pollounk vo aikonk xokonant.

5, 6. Meloleam vixim Bible kitem xikoita?

⁵ Jehova amcho rochnnar zal’lean, morta tednam amchem kitem zata tem taka khobor asa. Hea vixim tannem Bible-ant sarkem somzailam. Melolo munis kainch korunk xokona mhunn Bible sangta. Munis morta tednam tachi jinn sompta. Taka lagon, melole pollounk, aikonk ani chintunk xokona. Ami melea uprant, amcho khoinchoch bhag jivo urona. Amchea bhitor morona toslo otmo na. *

⁶ Jiveank apunn mortole mhunn khobor asa, hem sanglea uprant, “meloleank koslich khobor asona” oxem Solomon razan mhunnttlem. Tache vixim anik mahiti ditana tannem, melolim mog korunk xokona  ani ragui dakhounk xokona mhunn sanglem. Patallant vo fonddant “vaur na, zoit na, ginean na, zannvai na, ievzonneom nant” hem-ui tannem somzailem. (Upodexok 9:5, 6, 10 vachat.) Toxench, munis morta tednam “tacheo manddnneo fiskottun geleo” mhunn Stotr 146:4 amkam kolloita. Ami melea uprant, amchea kuddintlem kainch jivem urona. Amchem jivit, eka pettlolea mennvatichea ujea sarkem asa, zo paloilea uprant nanch zata.

7. Jezun, mornnachi sor konnak keli?

⁷ Jezu Krist pasun, meloleam vixim uloilolo. Ani hem amkam, tacho ixtt Lazar melo tea ghoddnnentlean kolltta. To melo tednam, tannem aplea xisank “amcho ixtt Lazar nhidla” mhunn sanglem. Hea utrantlean, Lazar duent asa, ani to suseg gheunk nhidla oxem xisank dislem. Punn, aplea utrancho orth somzaunk Jezun tankam “Lazar melo” mhunn sanglem. (Juanv 11:11-14 vachat.) Hanga Jezun mornnachi sor nhidek keli. Lazar melolo tednam to sorgar vo ifernant naslo. To ainzam vo purvozam koddenui vochonk na, ani dusreanchea rupanui zolmak ieunk na. To eka sust nhidlolea munxa sarko aslo, taka kainch khobor nasli. Bible-ant anikui zageancher mornnachi sor nhidek kelea. Udharonnak, eka odhikareachea cheddvak jivont kortana Jezun, “cheddum morunk na, tem nhidlam” mhunn sanglem.—Matev 9:24.

8. Munis morcho oso Devacho ud’dhex naslo mhunn ami koxem mhunnonk zata?

⁸ Munis morcho, oso Devacho ud’dhex kednanch naslo. Jehova Devan munxank hea prithumer sasnak ravonk rochlole. Poilea zoddpeak bori  bholaiki diun, tannem tankam sobit bagent dovorlolim mhunn ami xiklim. Jehovak, tanchem sodanch borem zal’lem zai aslem. Khoinchea mogall avoi-bapaik aplim bhurgim zannttim zaun melolim zai? Konnakuch naka. Jehova Devanui aplea bhurgeancho khub mog kel’lo ani tim sodanch hea prithumer khuxal ravlolim taka zai aslim. Munxakulla vixim Bible sangta, “Sasnnak [Jehovan] tanchea kallzan ghatlam.” (Upodexok 3:11; NW) Sasnak jieunchi itsa amchea kallzan ghalun Jehova Devan amkam rochleant. Ani ti itsa purnn zaunk tannem ek manddavoll korun dovorlea.

9. Jehova Devan Adanvak kosli adnea diloli ani ti manop kiteak kotthin naslem?

⁹ Munxancher moronn koxem ailem? Hem zannam zaunk, poilo dadlo ani bail hea prithumer aslim tednam kitem ghoddlem tem polloum-ia. Bible sangta, “Devan zomnintlim tore-torechim, polleunk sobit ani khaunk ruchik, zhaddam kirlo-xim kelim.” (Utpoti 2:9) Hea soglea zhaddanchim follam Adanv ani Even khaunk zatalim. Punn, ek adnea diloli. Jehovan Adanvak sanglolem, “Bhagent aslolea sogllea rukhanchim follam tujean khaum-ietat, punn borea ani vaittachi zannvai ditea rukhachem foll mat khaum noie, kiteak tem khaxi tea disa tum mortoloi.” (Utpoti 2:16, 17) Hea adnea pormonnem cholonk kotthin naslem. Tea bagent anik zaitim zhaddam aslolim zanchim follam Adanv  ani Evechean khaunk zatalim. Hi adnea manloli zalear, tankam dilolea sompurnn jivitak ani her soglea vostunk tim Devachim upkari mhunn dakhoitolim aslim. Toxench, tim sorginchea bapak man ditat ani tachea utra pormonnem cholonk sodhtat, hem-ui dakhounk xoktalim.

10, 11. (a) Poilem zoddpem Devachi adnea koxi moddunk pavlem? (b) Adanv ani Even kel’lem patok itlem vhodd kiteak aslem?

¹⁰ Punn poilea zoddpean Jehovachi adnea moddli.  Sorpa udexim Soitanan Evek vicharlem, “Bhagentlea sogllea zhaddanchim follam khai nakat mhonn Devan tumkam sanglam tem khorem?” Bagentlea zhaddanchim follam khaum-ieta mhunn tinnem sorpak zobab dilo ani fuddem mhunnttlem, thoinchea “rukham modekot ek rukh asa tachea folla vixim Devan sanglam: ‘tumi mornnak sampoddona zaunk, tea rukhachem foll khainakat, nhoi mhonn taka hat porian lainakat.’”—Utpoti 3:1-3.

¹¹ Soitanan porot Evek sanglem, “tumi morchim nant; jea disa tumi tem khaxat tea disa tumche dolle ugoddtole ani vaitt-borem vollkhun tumi Apnna bhaxen zatoleat mhonn Dev borem zanno.” (Utpoti 3:4, 5) Even tem foll khalear, tika faideak poddttolem oxem manlolem Soitanak zai aslem. Devachem aikonastana, sarkem kitem ani chukichem kitem hem Even apnnench tharaunk zata, mhunn to tika dakhounk sodhtalo. Tem foll khalear, tancher moronn ietolem mhunn Jehovan fott marlea, oxem-i to sangonk sodhtalo. Soitanan sanglolem tem Evek khorem dislem. Tinnem tem foll khaun aplea ghovakui dilem, ani tannem-i tem khalem. Oxe toren, Adanv ani Even, zannam zaun ek vhodd patok kelem. Devan korum naka mhunn sanglolem tench tim kortalim mhunn tankam khobor asli. Tannim zannam zaun Devachi ek sompi adnea modli. Oxem korun tannim, sorginchea bapak ani tachea odhikarak man diunk naka mhunn dakhoilem. Ani aplea mogall rochnnaracho oso okman kel’lean tankam bhogsonnem naslem.

12. Adanv ani Eve add gelim tednam Jehovak koxem dislem astolem hem ek udharonn diun somzaiat?

¹² Udharonnak, tunvem tujea putak ani dhuvek  mogan vaddoileant. Ani atam tim tujem kainch aikonastana, tuka man dinant ani tuzo mog korinant mhunn dakhoitat zalear, tuka koxem distolem? Tujea kallzak dukh bhogchem na? Toxench, Adanv ani Eve Jehovachea add gelim tednam, taka kitlem vaitt dislem astolem tem chintat.

13. Melea uprant Adanvachem kitem zatolem mhunn Jehovan sanglem, ani tache voilean to kitem dakhounk sodhtalo?

¹³ Adanv ani Even adnea moddli dekhun, Jehova Dev diuncho aslo tem sasnachem jivit tannim hogddailem. Adnea moddlear tancher moronn ietolem mhunn Jehovan tankam adinch sanglolem, ani toxench zalem.  Melea uprant tanchi jinn sompli. Tim ani khoinchea-i zagear jivim uronk na. Oxem ami kiteak mhunnonk zata? Karonn Devan Adanvak sanglolem, “Tum dhul’l ani porot tum dhul’lint vetoloi.” (Utpoti 3:19) Devan Adanvak zomnintlea dhul’lintlo rochlolo. (Utpoti 2:7) Roch’chea adim to khoinch naslo. Adanv porot dhul’lint voitolo mhunn sangon, to khoinch jivo urcho na hem Jehova dakhounk sodhtalo. Dhul’lik jiv asona toso melea uprant Adanvakui jiv naslo.

14. Ami kiteak mortat?

¹⁴ Adanv ani Even Devachem aikololem zalear, tim aiz poriant jivont astolim aslim. Punn tannim patok kelem mhunn tim melim. Ami Adanvachi sonsot zal’lean, tem patok ani moronn amcherui ailem. (Romkarank 5:12 vachat.) Patok ek bhirankull duens ani tantuntlean konnuch salvar zaunk xokona. Tea duensacho porinnam fokot moronn. Bible-a pormonnem moronn amchem dusman zaun asa. (1 Korintkarank 15:26) Hea dusmana thaun amkam salvar korunk Jehovan soddvonnechi manddavoll kelea. Ani haka lagon ami tache khub upkari asat!

15. Meloleam vixim sot zannam zal’lean kiteak buzvonn melltta?

¹⁵ Melolea vixim Bible jem xikoita tantuntlean amkam buzvonn melltta. Ami xikleat tea pormonnem, melolim kosleach dukhant vo trasant asona. Tankam bhieunchi goroz na, karonn tanchean amkam tras korunk zaina. Ami tankam modot korunk xokona, ani tim-ui amkam modot korunk xokona. Tim amche koddem ulounk xokona, ani amcheanui tanche koddem ulounk zaina. Zaite dhormik fuddari, apunn meloleank  modot korunk xokta mhunn sangtat, ani thodde lok tem patieun tankam poixe ditat. Punn oxe ritin fosona zaunk, melolea vixim sot zannam zal’lean amkam khub modot zata.

16. Zaitea dhormanchea xikounne fattlean konn asa, ani tea dhormank uzar korun to lokank koso fottoita?

¹⁶ Bible melolea vixim jem xikoita, tench tumcho-i dhorm xikoita? Choddxe dhorm toxem korinant. Kiteak zait? Karonn tanchea xikounne fattlean Soitan asa. To dhormank uzar korun, melea uprantui munis khoim tori jivo urta mhunn sangon, lokank fottoita. Hi fott uzar korun to anik zaiteo fott marta, ani lokank Jehova Deva thaun pois vhorta. Tem koxem?

17. Munis ifernant sasnak vollvolltta hi xikounn Devak kiteak okman haddtta?

¹⁷ Zoxem ami poilim polloilem, thodde dhorm xikoita ki vaitt jivit jieun ek munis melear, to ifernant sasnak vollvolltta. Punn hi xikounn Devacho okman korta. Jehova mogall Dev zal’lean, to lokank hea ritin kednanch tras diuncho na. (1 Juanv 4:8 vachat.) Aplem utor aikona mhunn, eka bapain aplea bhurgeacho hat ujeant ghatlear, tea bapai vixim tumi kitem chint’tolim? Taka tumi man ditolim? Kednanch nam! Tumi oslea munxa vixim zannam zaunk pasun sodhchim na. To ek doia naslolo munis, oxem tumi mhunnttolim. Teach ritin, Jehova lokank sasnak ujeant lasoita mhunn ami manlolem Soitanak zai.

18. Thodde lok khoinche khotte xikounnecher visvas dovrun meloleanchi bhokti kortat?

¹⁸ Melea uprant lok otme zatat, ani tankam jivim asat tannim man diunk zai, hi khotti xikounn lokanchea motint ghalunk Soitan dhormank uzar korta. He xikounne pormonnem, melolea munxanche otme  lokanche ixtt vo tanche dusman zaunk xoktat. Zaitea lokamnim hi fott manun ghetlea. Taka lagon, te melolea munxank bhietat ani tanchi bhokti kortat. Punn Bible amkam, melole munis nhidleat mhunn sangta. Ani ami fokot ekleach khorea Devachi, mhunnttlear, amchea rochnnarachi bhokti korunk zai mhunn sangta.—Prokasovnni 4:11.

19. Meloleam vixim sot zannam zal’lean Bible-antli khoinchi xikounn tumi somzonk pavtolim?

¹⁹ Meloleam vixim sot zannam zal’lean, dhormachea khottea xikounnentlean pois ravonk tumkam modot zatoli. Toxench Bible-acheo her xikounneo-i somzonk tumkam modot mellttoli. Udharonnak, melea uprant munis khoinch jivo urona hem zannam zal’lean, sobit bag zal’lea prithumer, Dev diuncho asa tea sasnik jivitacho valor tumi somzonk pavtolim.

20. Fuddlea odheai-ant amkam koslea prosnacho zobab mellttolo?

²⁰ Zaitea kalla adim Job nanvachea nitivont munxan prosn vicharlolo, “Melolea mon’xachean anink jivont zaunk zata?” (Job 14:14) Bible amkam tacho zobab dita ani tachea vixim ami fuddlea odheai-ant xiktolim.