1-3. ¿Kasa süsakiraka anain wayuu süchiki tü ouktaakat? ¿Jamüsü sünüiki tü iküleesiakalüirua süchiki tia?

KAKALIAINNA maʼin na wayuukana asakirüin sünain tia. Jaʼitaina jaraliin otta jalain kepiain waya, choʼujaasü watüjaain saaʼu.

² Suluʼu ekirajaaya 5, ekirajaashii waya sünain ouktüin Jesukürisüto waaʼu süpüla katüin woʼu waneepia. Otta saashin tü Wiwüliakat «müiria nnojolüin ouktaa» (Alateetkat Mapeena 21:4). Süpülapünaa tia ouktüshii waya. Maʼaka nüküjüin shia Salomón: «Na wayuu katüshiikana oʼu, natüjaa aaʼu oukteenain naya soʼu wanee kaʼi» (Eclesiastés 9:5, TNM). Wainma kasa waainjaka süpüla katüin woʼu, akanasaʼa waya ayatüshii asakirüin sünain tü alatakat wamüin ouktapa waya.

³ Ouktüle wapüshi, eesü wasakirüle waaʼin: «¿Kasache alataka namüin? ¿Müliashiiche naya? ¿Naaʼinmajüinche waya? ¿Eeshiiche süpüla wakaaliinjain naya? ¿Weʼreenache naya nachikuaʼa?». Wainma sünüiki tü iküleesiakalüirua süchiki tia. Saashin, oʼunüshii sirumatuʼumüin na anamiakana jee na mojulaakana müliashii saʼaka siki. Saashin waneeirua oʼunüshii na ouktüshiikana eemüin saaʼinpülee tü ouktüsükalüirua süpüla chainjanain naya sümaa napüshi jee süpüla süsalainjanain naya naainjala,  mapa jemeishii nachikuaʼa süpüla wayuuin jee mürüʼlüin naya.

4. ¿Jamüsü sünüiki tü iküleesia nnojotkat shiimain süchiki tü alatakat wamüin ouktapa waya?

⁴ Saashin tü iküleesia sümaiwajatkat otta tü eekat maaʼulu tü nnojotkat shiimain, ojuʼitüsü wanee kasa woulia ouktapa waya otta katüsü woʼu waneepia. Ayatüsü waapüin pütchi, weʼrüin otta jülüjain waaʼin wanee kasa saashin. ¡Nnojotsü shiimain tia! Waapüin pütchi, weʼrüin jee jülüjasü waaʼin wanee kasa sutuma tü wekiisholoinkat. Ouktapa waya nnojotsü kasain sotuin waaʼin, jülüjain waaʼin, weʼrüin süka jimalaʼa sümüin tü wekiisholoinkat.

5, 6. ¿Kasa alataka namüin na ouktüshiikana saashin tü Wiwüliakat?

⁵ Tü alatakat wamüin ouktapa waya nütüjaa aaʼu shia Jeʼwaa, chi Kakumalakai tü wekiisholoinkat. Nüküjüin suluʼu tü Wiwüliakat tü alatakat namüin na ouktüshiikana. Saashin tü Wiwüliakat ouktapa wanee wayuu, nnojoluichipa eein nia. Tü ouktaakat shia nnojorüle katüin soʼu wayuu. Makalaka nnojoluin naapüin pütchi, neʼrüin jee jülüjain naaʼin wanee kasa na ouktüshiikana. Nnojotsü kasain ojuʼitüin woulia ouktapa waya. Ouktüsü tü waaʼinkat. *

⁶ Süchikijee nüküjüin Salomón natüjaain saaʼu na wayuu katüshiikana oʼu oukteenain naya soʼu wanee kaʼi, müshi nia: «Na ouktüshiikana nnojotsü kasain natüjaain aaʼu», ‹nnojoishii achunjüin, üttüin naaʼin otta alin napüla wayuu›, «nnojotsü kasain naʼyataain anain, nnojotsü kasain natüjaain aaʼu otta nnojotsü kasain natüjain apüleerua suluʼu tü Seolkat» (paashajeʼera Eclesiastés 9:5, 6,  10, TNM). Müsü Salmo 146:4, TNM: «Nnojoluitpa kasain jülüjain naaʼin». Shiimain ouktüin waya, nnojotsü katüin woʼu süchiki tü ouktaakat. Tü kataakalü oʼuu müsü aka saaʼin suchuwala wanee weela, shiyokojoopa nnojotsü jalain oʼunüin, nnojoluitpa eein shia.

7. ¿Kasa shikirajaka anain waya tü nüküjakat Jesuu süchiki tü ouktaakat?

⁷ Wanaa sümaa ouktüin wanee naʼaleewain, nüküjüin Jesuu tü alatakat namüin na ouktüshiikana. Palajana, müshi nia namüin na nikirajüinkana: «Chi watünajutkai Lázaro, atunküshi nia». Atunkayaashi Lázaro sutuma ayuulin nia naashin na nikirajüinkana Jesuu. Tia nnojotsü shiain tü nüküjeekat Jesuu, müshi nia nüchikuaʼa: «Ouktüichipa Lázaro» (paashajeʼera Juan 11:11-14). Naashin Jesuu tü ouktaakat müsü aka saaʼin sutunküle maʼin wanee wayuu. Chi naʼaleewainkai nnojoishi chajachin sirumatuʼu otta müliain saʼaka siki. Nnojoishi chajachin namaa na aapieekana, namaa na nüpüshi ouktüinnapakana otta nnojoishi jemein nüchikuaʼa süpüla wayuuin jee mürüʼlüin nia. Ouktüshi nia, müshi nutunkakai maʼin sümaa maʼlapüin nia. Süpülapünaa nüsoʼireʼerüin saaʼin Jesuu nüchon Jairo, müshi nia: «Tü jintutkot, nnojotsü ouktüin, atunküsü neʼe» (Lucas 8:51-53).

8. ¿Jamüsü watüjaaka saaʼu nnojoluin nukumajüin waya Maleiwa süpüla ouktajanain waya?

⁸ ¿Nukumajüin waya Maleiwa süpüla ouktajanain waya? Nnojo. Nukumajüin waya süpüla katüin woʼu waneepia  Mmapaʼa. Maʼaka wekirajaain paala, niʼitaain Jeʼwaa Adán sümaa Eva suluʼu wanee mma anasü otta nnojoishii ayuulin naya. Keeʼireesü naaʼin anainjatüin nakuwaʼipa. ¿Eeshiche wayuu eeka keeʼireein naaʼin laülaain jee ouktüin nüchonnii? ¡Nnojorüleejaa! Aishii nüpüla Jeʼwaa na nüchonniikana otta keeʼireesü naaʼin talatüinjanain naya waneepia Mmapaʼa. Saashin tü Wiwüliakat niʼitaain Maleiwa «suluʼu saaʼin wayuu kateein soʼu waneepia» (Eclesiastés 3:11, TNM). Shiimain tia, niʼitaain Maleiwa suluʼu waaʼin kateein woʼu waneepia otta nukumajüin sukuwaʼipa süpüla nikeraajüin tia.

9. ¿Kasa nnojotka naainjainjatüin Adán naashin Jeʼwaa? ¿Jamüsü nnojotka kapüleein tia?

⁹ ¿Jamüshii ouktaka waya? Süpüla watüjaain saaʼu, wekirajaa sünain tü alatakat eeiwaʼaya wanee toolo otta wanee jierü Mmapaʼa. Müsü tü Wiwüliakat: ‹Niweetirüin Maleiwa wunuʼulia katataʼawai sümaa jemetüin süchon› (Génesis 2:9). Akatsaʼa eein wanee kasa nnojotka aainjünajatüin, müshi Maleiwa nümüin Adán: ‹Nnojoluinjatü piküin süchon tü wunuʼu atüjaweetkat atuma wayuu saaʼu tü anasükat jee tü mojusükat. Piküle shia, shiimüinshaana ouktajachin pia› (Génesis 2:16, 17). Nnojotsü kapüleein aainjaa tia süka eejatüin wainma süchon wunuʼulia süpüla niküin Adán sümaa Eva. Sükajee tia, neeʼiyatüinjatü naapüin tü analuʼutkat nümüin Maleiwa süka naapüin wainma kasa namüin maʼaka anain maʼin naya nutuma. Noonoole sümaa nünüiki, kojutüsü namüin nuluwataain Jeʼwaa naaʼu otta nekirajüin naya.

10, 11. (1) ¿Jamüshi nnojoika noonooin Adán otta Eva sümaa nünüiki Maleiwa? (2) ¿Jamüsü mojuka maʼin tü naainjakat Adán sümaa Eva?

¹⁰ Nnojoishi jaa müin Adán sümaa Eva nümüin Jeʼwaa. Müshi Satanaa sümüin Eva sükajee wanee wüi: ‹¿Shiimüinsaʼaya nnojoliinjanain jiküin süchon tü wunuʼuliakat süpüshua?›. Sümaka Eva nümüin: ‹Nnojo, eesü süpüla weküin süchon tü wunuʼuliakat süpüshuaʼa. Shia neʼe apülajünaka woulia tü pasanainkat sünain tü apainkat. Müshi Maleiwa: «Jiküle shia, shiimüinshaana ouktajanain jia sutuma » › (Génesis 3:1-3).

¹¹ Müshi Satanaa: ‹Nnojoleena jia ouktüin. Jiküle shia meena jia aka Maleiwa sünain jiyaawatüin saaʼu tü anasükat jee tü mojusükat.› (Génesis 3:4, 5.) Shiküle Eva süchon tü wunuʼukat, anainjatü sukuwaʼipa otta saainjüinjatü tü saainjeekat naashin chi Yolujaakai. Naashin Satanaa  naʼalain Maleiwa tü nümakat süchiki süchon tü wunuʼukat. Sunoujain Eva tü nünüikikat, saapaaka süchon tü wunuʼukat jee shikaka shia, mapa shikiraka chi suʼwayuusekai. Nnojotsü shiain sutuma nnojoluin natüjaain saaʼu tia, natüjaa aaʼu tü nnojoluinjatkat naainjain. Sükajee neküin süchon tü wunuʼukat naainjain tü achiaanakat oulia naya sümaa natüjaain saaʼu mojuin shia. Sükajee tia nayouktüin chi Nashikai süpüla nuluwataain naaʼu. ¡Mojushaatasü tü naainjakat nümüin Jeʼwaa!

12. ¿Jamüsü süpüla watüjaain saaʼu mojuin maʼin naaʼin Jeʼwaa sutuma tü naainjakat Adán sümaa Eva?

¹² Nnojorüle noonooin sümaa pünüiki wanee püchon eeka pipijalain, nnojorüle alin pia nüpüla sümaa mojutüin  pia nümüin, mojusü maʼin tia pümüin ¿aashimüin? Müshia Jeʼwaa, mojusü maʼin naaʼin sutuma tü naainjakat Adán sümaa Eva.

13. ¿Kasa alatajatka nümüin Adán naashin Jeʼwaa ouktapa nia? ¿Jamaluʼulu tia?

¹³ Nnojoishi jaa müin Adán sümaa Eva nümüin Jeʼwaa, nnojotsü katüinjatüin noʼu waneepia nutuma. Sutuma tia, ouktüshii maʼaka nüküjüin shia paala. Nnojoishii eein naya. Nnojoishii oʼunüin eemüin saaʼinpülee tü ouktusükalüirua. Müsü nünüiki Jeʼwaa nümüin Adán wanaa sümaa nüsakirüin nia süchiki tü naainjalakat: «Aleʼejeechi ouktapa pia saʼakamüin tü mma tatükakat anainjee pia. Shiimüin sünain mmainjachin pia püchikua, süka aainjuushin pia sünainjee» (Génesis 3:19). Nukumajüin Maleiwa Adán süka mma (Génesis 2:7). Süpülapünaa tia nnojoishi eein Adán. Wanaa sümaa mmainjachin nia nüchikuaʼa naashin Jeʼwaa, nnojoluinjachi eein nia. Nnojoluinjatü katüin noʼu.

14. ¿Jamüshii ouktaka waya?

¹⁴ Katüsüjeʼe noʼu Adán otta Eva maaʼulu. Akanasaʼa naya ouktüshii süka kaainjalain naya, nnojoishii jaa müin nümüin Maleiwa. Ouktaka waya maaʼulu shia süka nuuʼuliwoʼuin waya Adán, kaainjalashii jee ouktüshii waya nünainjee (paashajeʼera Roma 5:12). Tü kaainjalaakat müsü aka saaʼin wanee ayuulii ouktasiroʼu nülatiraka wanainmüin washi jee wei. Nnojotsü waʼaleewain tü ouktaakat, waʼünüü shia (1 Corinto 15:24-26). ¡Talatüshii maʼin waya sükajee naakajirüin waya Jeʼwaa suulia tü ouktaakat!

15. Watüjaale saaʼu tü shiimainkat nachiki na ouktüshiikana, ¿jamüsü sümülialaka waaʼin tia?

¹⁵ Sümülialüin waaʼin tü shikirajakat tü Wiwüliakat süchiki tü alatakat namüin na ouktüshiikana. Maʼaka  wekirajaain paala, nnojoishii müliain na ouktüshiikana. Nnojoluinjana mmoluin waya neema. Nnojoishii süpüla waashajaain namaa, nakaaliinjain waya, wakaaliinjain naya, naashajaain wamaa jee naainjain kasa mojusü wamüin. Naashin na shikiipuʼukana tü iküleesia nnojotkat shiimain eeshii naya süpüla nakaaliinjain na ouktüshiikana. Sükajee tia na wayuukana aapüshii nneerü namüin. Watüjaale saaʼu tü shiimainkat nnojoishii süpüla wemeejünüin süka tia alawaakat.

16. ¿Jarai chi sünainpünaakai tü shikirajakat tü iküleesia nnojotkat shiimain? ¿Jamüsü sukuwaʼipa nutuma?

¹⁶ ¿Sücheküin tü iküleesia kaluʼukat pia tü sümakat tü Wiwüliakat nachiki na ouktüshiikana? Wainma iküleesia nnojotka acheküin tia. ¿Jamüsü? Shia süka nünainpünaain Satanaa tü nekirajakalü anain. Sükajee tia iküleesiakalüirua, nunoujirüin na wayuukana sünain suʼunüin naaʼin na ouktüshiikana eemüin saaʼinpülee tü ouktüsükalüirua. Aküjüshi nia sooʼomüin alawaa süpüla nükayaleʼerüin wayuu nuulia Jeʼwaa. ¿Jamüsü sukuwaʼipa nutuma?

17. ¿Jamüsü mojuka nümüin Jeʼwaa müliain wayuu saʼaka siki?

¹⁷ Maʼaka wekirajaain paala, saashin tü iküleesia nnojotkat shiimain ouktapa na mojulaakana müliashii saʼaka siki. Mojusü tia nümüin Jeʼwaa süka aipüralin nia, nnojotsü müliain wayuu nutuma (paashajeʼera 1 Juan 4:8). ¿Jamüsü pünüiki nüchiki wanee wayuu eeka naʼajüin najapü wanee nüchon sükajee nnojoluin noonooin sümaa nünüiki? ¿Kojutüshijeʼe nia pümüin? ¿Piʼraajeein nia? Nnojorüleejaa. ‹Wayuu mojulaashi› eesü süpüla pümüin. Shia keeʼireeka naaʼin Satanaa tia, wanoujain sünain müliain wayuu waneepia saʼaka siki nutuma Jeʼwaa.

18. ¿Kasa shikirajaka tü iküleesia nnojotkat shiimain nachiki na ouktüshiikana?

¹⁸ Ekirajüshi Satanaa sükajee tü iküleesia nnojotkat shiimain sünain meʼrujuin jee pülain na ouktüshiikana. Saashin  tia iküleesiakat eeshii süpüla waʼaleewain, waʼünüüin otta waʼwaajüin na ouktüshiikana. Wainma wayuu mmotka neema otta aʼwaajaka na ouktüshiikana sutuma tia. Saashin tü Wiwüliakat atunküshii na ouktüshiikana, nia neʼe waʼwaajüinjachika Jeʼwaa chi kakumainkai waya otta aapaka wainma kasa wamüin (Alateetkat Mapeena 4:11).

19. ¿Kasa watüjaaka aaʼu sükajee watüjaain saaʼu tü shiimainkat nachiki na ouktüshiikana?

¹⁹ Watüjaapa saaʼu tü shiimainkat nachiki na ouktüshiikana, nnojoishii shimeejüin waya tü iküleesia nnojotkat shiimain. Otta müsia watüjaa aaʼu tü shikirajakat tü Wiwüliakat maʼaka katüinjatüin woʼu waneepia suluʼu tü Paraiisükat. Shiimain tia wamüin sükajee watüjaaitpain saaʼu nnojoluin noʼunüin na ouktüshiikana eemüin saaʼinpülee tü ouktüsükalüirua.

20. ¿Kasa asakiraa wekirajaainjatka anain suluʼu tü wanee ekirajaayakat?

²⁰ Sümaiwa paala, asakitshi Job: «Ouktüle wanee wayuu [...], ¿kateetche noʼu nüchikuaʼa?» (Job 14:14, TNM). ¿Kateetche noʼu nachikuaʼa na ouktüshiikana? Tü süküjakat tü Wiwüliakat sümülialüin waaʼin. Wekirajaajeerü anain tia suluʼu tü wanee ekirajaayakat.