1-3. Tibneeg nug li cas txog txojkev tuag, thiab tej kev ntseeg teb lawv li cas?

TAU ntau txhiab xyoo, tibneeg muaj cov lus nug zoo li saum no. Tej lus nug no tseem ceeb heev. Peb xav paub cov lus teb rau tej lus nug no, rau qhov txij thaum peb yug los, peb tsuas pom muaj kev mob kev nkeeg thiab kev ploj kev tuag xwb.

² Hauv Tshooj 5 peb twb kawm txog qhov uas Yexus Khetos tuag txhiv peb, kom tibneeg thiaj tau txojsia ntev dhawv mus ib txhis. Peb kuj kawm tias phau Vajlugkub hais tseg tias, yuav muaj ib hnub uas “txojkev tuag yuav tsis muaj dua li lawm.” (Qhia Tshwm 21:4) Tiamsis niaj hnub no, tibneeg tseem txawj tuag. Vajntxwv Xalaumoo hais tias: “Cov uas tseem ciaj yeej paub tias lawv yuav tuag.” (Laj Lim Tswvyim 9:5) Yog li ntawd, tibneeg thiaj nrhiav kev los pab kom lawv muaj txojsia nyob ntev. Tiamsis txawm tibneeg nrhiav li ntawd los, lawv yeej niaj hnub xav tias, ua li cas rau tibneeg tom qab lawv tuag lawm?

³ Thaum cov neeg uas peb hlub tas sim neej lawm, ua rau peb quaj ntsuag lawv heev. Tej zaum peb yuav nug tias: ‘Lawv mus dua twg lawm? Lawv puas raug kev txom  nyem? Lawv puas pab tau peb? Peb puas pab tau lawv? Peb puas yuav rov pom lawv dua?’ Tej kev ntseeg hauv qab ntuj no nyias qhia nyias ib yam txog txojkev tuag. Ib txhia kev ntseeg qhia tias yog koj ua neeg zoo, ces koj yuav mus saum ntuj ceeb tsheej. Tiamsis yog koj ua neeg phem ces koj yuav raug tsim txom hauv ntuj tawg. Lwm txojkev ntseeg qhia tias thaum tibneeg tuag, lawv mus nyob rau sab yeeb ceeb, mus nrog lawv tej poj koob yawm txwv nyob. Tseem muaj dua lwm txojkev ntseeg qhia tias cov tuag yuav mus raug txiav txim hauv dab teb. Ces tom qab ntawd lawv mam tau kev mus thawj thiab, ua dua lwm yam.

4. Ntau txojkev ntseeg qhia li cas txog txojkev tuag?

⁴ Tag nrho tej kev ntseeg ntawd qhia ib yam nkaus txog txojkev tuag. Lawv qhia tias thaum tibneeg lub cev tuag lawm, tseem muaj ib yam dabtsi ciaj mus nyob rau lwm qhov. Lawv ib txwm ntseeg tias yam uas ciaj tom qab ntawd, muaj sia nyob mus li thiab nws tseem pom kev, hnov lus thiab txawj xav. Tiamsis, puas muaj tau li ntawd tiag? Nco ntsoov tias peb hnov lus, pom kev thiab txawj xav, vim peb lub hlwb ua haujlwm. Tiamsis thaum peb tuag, peb lub hlwb nres tsis ua haujlwm lawm. Yog tias peb lub hlwb tsis ua haujlwm, peb puas yuav pom kev, hnov lus, thiab txawj xav? Yeej muaj tsis tau li ntawd ib zaug li! Yog li ntawd, thaum peb lub hlwb tsis ua haujlwm lawm, ces peb yuav tsis pom kev, tsis hnov lus, tsis txawj xav thiab peb lub cim xeeb yuav nco tsis tau dabtsi li lawm.

5, 6. Raws li phau Vajlugkub qhia, ua li cas rau cov tuag lawm?

⁵ Yehauvas yog tus tsim tibneeg lub hlwb. Yog li ntawd, nws yeej paub zoo tias ua li cas rau tibneeg tom qab lawv tuag. Yehauvas yeej yog tus paub qhov tseeb. Hauv Vajtswv  Txojlus, nws qhia tias cov tuag zoo li cas lawm. Phau Vajlugkub qhia meej li no: Thaum ib tug neeg tuag, ces tsis muaj nws nyob qhovtwg li lawm. Kev tuag txawv ntawm kev ciaj sia. Cov tuag tsis pom kev, tsis hnov lus thiab tsis txawj xav li lawm. Tsis muaj ib yam dabtsi uas tseem ciaj nyob hlo li tom qab lub cev tuag. Tibneeg tsis muaj ib tug ntsuj plig. *

⁶ Xalaumoo pom tias cov uas tseem ciaj sia paub tias lawv yuav tuag, nws thiaj sau li no: “Cov uas tuag lawm tsis paub dabtsi li lawm.” Xalaumoo qhia ntxiv tias tom qab ib tug neeg tuag lawm, nws hlub thiab ntxub tsis tau leejtwg li lawm. Xalaumoo sau tias: “Hauv [lub qhov ntxa] . . . tsis muaj haujlwm, thiab tsis muaj kev xav, tsis muaj kev txawj ntse thiab tsis muaj tswvyim.” (Nyeem Laj Lim Tswvyim 9:5, 6, 10.) Ib yam li ntawd, Ntawv Nkauj 146:4, TMZ, hais tias thaum tibneeg tuag, “lawv tej tswvyim yuav kawg rau hnub ntawd.” Tibneeg txawj ploj txawj tuag thiab tom qab lawv tuag lawm, tsis muaj ib yam dabtsi tseem ciaj nyob. Txojsia uas peb muaj zoo ib yam li tus nplaim tswm ciab. Thaum tshuab tus nplaim tuag lawm, tus nplaim ntawd yeej tsis ciaj mus rau lwm qhov, tiamsis cia li yaj tas lawm xwb.

7. Yexus piav tias kev tuag zoo li cas?

⁷ Yexus Khetos tau qhia txog cov tuag. Tej uas Yexus hais txog Laxalau pab peb to taub ntxiv txog txojkev tuag. Laxalau yog ib tug txivneej uas Yexus paub zoo heev, uas tau tuag lawm. Yexus tau hais li no rau nws cov thwjtim tias: “Peb tus kwvluag Laxalau tsaug zog lawm.” Thaum  Yexus hais li ntawd, Yexus cov thwjtim xav yuam kev tias Laxalau mob, nws thiaj pw tsaug zog. Tiamsis Yexus piav rau lawv tias: “Laxalau twb tuag lawm.” (Nyeem Yauhas 11:11-14.) Yexus qhia tias kev tuag zoo li qhov uas tibneeg pw tsaug zog xwb. Thaum Laxalau tuag, nws tsis mus saum ntuj ceeb tsheej lossis mus hauv ntuj tawg. Nws tsis mus ntsib cov tubtxib saum ntuj lossis tej poj koob yawm txwv. Laxalau tsis mus thawj thiab, ua dua ib tug neeg tshiab. Thaum Laxalau tuag, zoo li nws pw tsaug zog xwb, es tsis ua npau suav li. Muaj dua lwm nqe Vajlugkub kuj qhia tias kev tuag zoo li thaum tibneeg pw tsaug zog. Zoo li, thaum luag xuas pob zeb ntaus Xatefanau tuag, phau Vajlugkub hais tias nws pw “tsaug zog” lawm. (Tubtxib Tes Haujlwm 7:60, hauv qab taw qhia) Tus tubtxib Povlauj kuj sau txog cov tibneeg uas tuag lawm, nyob rau nws tiam thiab. Nws hais tias lawv pw “tsaug zog lawm” xwb.​—1 Khaulee 15:6.

8. Ua li cas peb ho paub tias, Vajtswv tsis yog tsim kom tibneeg txawj ploj txawj tuag?

⁸ Vajtswv lub ntsiab rau tibneeg yog dabtsi? Puas yog Vajtswv tsim kom tibneeg txawj tuag? Tsis yog! Yehauvas tsim kom tibneeg muaj txojsia nyob mus ib txhis hauv lub ntiajteb no. Zoo li peb twb kawm hauv phau ntawv no los lawm, Vajtswv tau tsim thawj nkawm niam txiv nyob hauv ib lub vaj kaj siab uas zoo kawg nkaus. Nws tsim nkawd tsis muaj mob muaj nkeeg kiag li. Yehauvas tsuas xav kom nkawd tau zoo xwb. Leej niam leej txiv uas muaj kev hlub, puas yuav xav kom nkawd cov menyuam txawj laus txawj tuag txom nyem ntsuav? Yeej tsis xav li! Yehauvas hlub nws cov menyuam thiab xav kom lawv muaj kev zoo siab mus ib txhis hauv lub ntiajteb no. Phau Vajlugkub tau hais li no txog tibneeg: “[Yehauvas] muab qhov uas nyob mus ib txhis tsis kawg tso rau hauv neeg lub siab.” (Laj Lim Tswvyim 3:11) Vajtswv tsim kom peb xav nyob mus ib txhis. Nws thiaj qheb kev kom peb tau raws li peb lub siab  ntshaw, uas yog tau txojsia ntev dhawv mus ib txhis.

9. Yehauvas txwv kom Adas tsis txhob ua dabtsi, thiab vim li cas tsis nyuaj coj raws li lo lus sam hwm no?

⁹ Vim li cas tibneeg txawj tuag? Yuav kom teb tau lo lus nug no, peb yuav tsum kawm seb tau muaj li cas rau thawj nkawm niam txiv hauv ntiajteb no. Phau Vajlugkub piav tias Vajtswv Yehauvas “ua kom txhua yam ntoo uas zoo saib zoo noj tawm hauv av tuaj.” (Chiv Keeb 2:9) Tiamsis, tsuas muaj ib tsob ntoo uas Vajtswv txwv tsis pub rau nkawd noj xwb. Yehauvas hais li no rau Adas: “Txhua yam txiv ntoo hauv lub vaj no koj noj tau huvsi, tiamsis tsob ntoo uas pub kom paub qhov zoo qhov phem, koj tsis txhob noj cov txiv kiag li, yog hnub twg koj noj koj yuav tuag.” (Chiv Keeb 2:16, 17) Yeej tsis nyuaj rau Adas thiab Eva coj raws li lo lus sam hwm no. Twb muaj ntau tsob txiv ntoo rau Adas thiab Eva noj. Yog tias nkawd mloog Yehauvas lus, ces yuav qhia tias nkawd nco Yehauvas txiaj ntsig. Nws twb yog tus pub ib puas tsav yam rau nkawd. Yehauvas kuj pub txojsia ntev mus ib txhis rau nkawd thiab. Yog tias Adas thiab Eva mloog nkawd Leej Txiv Yehauvas lus yuav qhia tias nkawd saib taus Yehauvas txojkev tswjhwm, thiab nkawd xav kom nws pab coj nkawd txoj hauv kev.

10, 11. (1) Ua li cas thawj nkawm niam txiv ho tsis mloog Vajtswv lus? (2) Vim li cas qhov uas Adas thiab Eva tsis mloog Vajtswv lus, yog ib qho txhaum loj heev?

¹⁰ Tu siab kawg li uas thawj nkawm niam txiv txiav txim  siab tsis mloog Yehauvas lus. Xatas siv ib tug nab los nug Eva li no: “Vajtswv hais tias tsis txhob noj txhua yam txiv ntoo hauv lub vaj no tiag lov?” Eva teb Xatas tias: “Wb noj tau tej txiv ntoo hauv lub vaj no huvsi, tiamsis Vajtswv hais tias, ‘Neb tsis txhob noj tsob txiv ntoo uas nyob hauv plawv vaj, thiab tsis txhob kov kiag li, tsam ces neb tuag.’”​—Chiv Keeb 3:1-3.

 ¹¹ Xatas hais tias: “Neb yeej yuav tsis tuag li. Vajtswv . . . paub tias neb noj tsob txiv ntoo ntawd thaum twg ces neb lub qhov muag yuav pom tseeb, thaum ntawd mas neb yuav zoo ib yam li Vajtswv, yog paub qhov zoo qhov phem.” (Chiv Keeb 3:4, 5) Xatas xav kom Eva ntseeg tias, nws yuav tau zoo yog tias nws noj tsob txiv uas Vajtswv txwv tsis pub noj ntawd. Raws li Xatas hais, Eva muaj cai txiav txim rau nws tus kheej tias yam twg zoo thiab yam twg phem. Xatas hais tias Eva ua tau raws li Eva lub siab nyiam. Xatas kuj liam tias Yehauvas dag xwb. Xatas hais tias yog nkawd noj tsob txiv ntawd, nkawd yeej yuav tsis tuag li Yehauvas tau hais. Eva thiaj ntseeg Xatas. Eva txawm de tsob txiv los noj. Ces nws muab rau Adas noj thiab. Tsis yog nkawd tsis paub, tiamsis nkawd txhob txwm ua yam uas Vajtswv txwv tsis pub nkawd ua. Yeej tsis nyuaj rau nkawd coj raws li Vajtswv lo lus sam hwm. Yeej tsim nyog nkawd mloog Yehauvas lus. Qhov uas Adas thiab Eva tsis mloog lus, qhia tias nkawd tsis hwm nkawd Leej Txiv Yehauvas, thiab tsis xav nyob hauv qab nws txojkev tswjhwm. Qhov uas nkawd tsis mloog lus yeej zam tsis tau txim kiag li!

12. Yehauvas xav li cas xwb thaum Adas thiab Eva ntxeev siab tawm tsam nws, thiab qhov piv txwv twg pab peb to taub txog qhov no?

¹² Muab ua piv txwv li no: Yog tias koj saib xyuas thiab tu koj tus tub lossis tus ntxhais loj hlob, tiamsis nws ua saib tsis taus koj, tsis hwm koj, thiab tsis mloog koj lus li, koj yuav xav li cas? Yeej yuav ua rau koj tu siab kawg li. Ib yam li ntawd, thaum Adas thiab Eva ntxeev siab tawm tsam Yehauvas, kuj mob Yehauvas siab kawg li thiab.

13. Yehauvas hais tias yuav ua li cas rau Adas tom qab Adas tuag, thiab Yehauvas cov lus txhais li cas?

¹³ Vim Adas thiab Eva tsis mloog lus, yeej tsis tsim nyog Yehauvas cia nkawd muaj txojsia nyob mus ib txhis. Nkawd thiaj tuag raws li Yehauvas tau hais. Tom qab Adas  thiab Eva tuag lawm, tsis muaj nkawd nyob qhovtwg li lawm. Nkawd yeej tsis mus nyob rau sab yeeb ceeb. Peb paub li no rau qhov tom qab Adas poob kev txhaum, Yehauvas tau hais li no rau Adas: “Koj [yuav] rov qab mus rau hauv av, vim yog tsim koj tawm hauv av los. Koj yog hmoov av, mas koj yuav rov mus ua hmoov av.” (Chiv Keeb 3:19) Thaum Yehauvas hais tias Adas yuav rov mus ua av, qhov ntawd txhais li cas tiag? Vajtswv muab hmoov av los tsim ua Adas. (Chiv Keeb 2:7) Ua ntej Vajtswv tsis tau tsim Adas, yeej tsis muaj Adas nyob qhovtwg li. Yog li  ntawd, tom qab Adas tuag, ces yuav tsis muaj nws nyob qhovtwg li lawm thiab. Adas yuav rov tsis muaj sia, ib yam li cov hmoov av uas Yehauvas tau siv los tsim ua Adas.

14. Vim li cas tibneeg txawj tuag?

¹⁴ Yog tias Adas thiab Eva mloog lus, ces nkawd tseem muaj txojsia nyob txog niaj hnub nimno. Tiamsis vim nkawd txiav txim siab tsis mloog Vajtswv lus thiab ua txhaum, nkawd thiaj tuag lawm. Adas qhov txhaum thiab kev tuag los raug tag nrho Adas tej xeeb ntxwv huvsi. Vim li ntawd, peb thiaj raug kev ploj kev tuag thiab. (Nyeem Loos 5:12.) Qhov txhaum ntawd, zoo li tus kab mob phem uas peb khiav tsis dim li. Kev txhaum ua rau tibneeg raug kev ploj kev tuag. Kev tuag zoo li peb tus yeeb ncuab. (1 Khaulee 15:26) Zoo kawg li uas Yehauvas tau txib nws tus tub los tuag txhiv peb, thiaj cawm tau peb dim ntawm tus yeeb ncuab phem no!

15. Vim li cas thaum peb paub qhov tseeb txog txojkev tuag, nplig tau peb siab?

¹⁵ Tej uas phau Vajlugkub qhia txog cov tuag nplig tau peb lub siab tiag. Zoo li peb tau kawm, cov tuag tsis muaj kev nyuaj siab, tsis muaj mob, thiab tsis raug kev txom nyem lawm. Peb tsis tas ntshai cov tuag rau qhov lawv yeej ua phem tsis tau rau peb. Lawv tsis tas yuav peb txojkev pab, thiab lawv pab tsis tau peb lawm. Peb txuas lus tsis tau nrog lawv, thiab lawv txuas lus tsis tau nrog peb lawm thiab. Tej thawj coj ntawm ntau txojkev ntseeg dag tias, lawv muaj peevxwm pab tau cov tuag. Muaj coob leej kuj ntseeg cov thawj coj ntawd tej lus dag, lawv thiaj pub nyiaj rau cov thawj coj ntawd. Tiamsis thaum peb paub qhov tseeb txog txojkev tuag, ces peb yuav tsis qaug rau tej lus dag ntawd.

16. Ntau txojkev ntseeg qhia raws li leejtwg lub tswvyim, thiab lawv qhia raws li nws lub tswvyim li cas?

 ¹⁶ Raws li koj pom, ntau txojkev ntseeg puas qhia raws li tej lus hauv phau Vajlugkub? Yeej tsis qhia. Yog vim li cas? Twb yog vim tej kev ntseeg ntawd, qhia raws li Xatas lub tswvyim lawm. Xatas siv tej kev ntseeg cuav los dag tibneeg, kom lawv ntseeg tias tom qab lawv tuag, lawv tseem muaj ib yam ciaj sia mus nyob rau sab yeeb ceeb. Xatas tseem siv lwm cov lus dag ntxiv los ntxias kom tibneeg tsis txhob pe hawm Vajtswv Yehauvas. Xatas dag ntxias li cas?

17. Ib txhia kev ntseeg qhia tias Vajtswv yuav tsim txom tibneeg phem mus ib txhis. Txojkev ntseeg ntawd ua saib tsis taus Yehauvas li cas?

¹⁷ Raws li peb nyuam qhuav kawm, muaj ib txhia kev ntseeg qhia tias thaum cov tibneeg phem tuag ces lawv yuav mus rau hauv ntuj tawg, thiab raug tsim txom mus ib txhis. Tej lus qhia no ua saib tsis taus Vajtswv. Yehauvas yog ib tug Vajtswv uas muaj kev hlub. Nws yeej tsis tsim txom tibneeg li ntawd. (Nyeem 1 Yauhas 4:8.) Muab ua piv txwv li no: Muaj ib tug menyuam tsis mloog lus, leej txiv thiaj muab tus menyuam ob txhais tes hlawv. Koj yuav xav li cas txog qhov uas leej txiv rau txim rau nws tus menyuam li ntawd? Koj puas yuav hwm thiab saib taus leej txiv uas coj li ntawd? Koj puas xav ntaus phoojywg nrog nws? Yeej tsis xav li! Koj yeej yuav hais tias nws yog ib tug neeg phem thiab limhiam heev. Xatas xav kom peb ntseeg tias Yehauvas coj li ntawd, tias Yehauvas tsim txom tibneeg hauv ntuj tawg mus ib txhiab ib txhis!

18. Cov tibneeg uas pe hawm cov tuag, ntseeg tej lus dag twg?

¹⁸ Xatas siv ib txhia kev ntseeg los qhia tias tibneeg tuag mus ua dab lawm thiab cov ciaj yuav tsum pe hawm lawv. Raws li tej lus qhia ntawd, cov tuag uas mus ua dab ntawd muaj hwjchim heev. Lawv ntseeg tias tej dab ntawd ua tau peb cov phoojywg lossis peb cov yeeb ncuab. Coob leej  ntseeg tej lus dag no. Lawv thiaj ntshai cov tuag heev. Lawv kuj hwm thiab pe hawm tej dab ntawd. Tiamsis phau Vajlugkub tsis qhia li ntawd. Phau Vajlugkub qhia tias cov tuag tsaug zog lawm xwb. Thiab peb yuav tsum pe hawm tus tseem Vajtswv Yehauvas tib leeg xwb. Nws yog peb tus Tswv Tsim thiab yog tus pub ib puas tsav yam rau peb.​—Qhia Tshwm 4:11.

19. Thaum koj paub qhov tseeb txog txojkev tuag lawm, koj yuav muaj kev cia siab li cas?

¹⁹ Thaum koj paub qhov tseeb txog cov tuag lawm, ces koj yuav tsis qaug rau tej lus dag uas tej kev ntseeg cuav ntawd qhia. Qhov tseeb kuj yuav pab koj to taub lwm zaj lus qhia hauv phau Vajlugkub. Zoo li thaum koj paub tias cov tuag tsis mus nyob rau sab yeeb ceeb, ces koj yuav muaj kev cia siab tiag tiag rau phau Vajlugkub lo lus cog tseg, txog txojsia ntev dhawv mus ib txhis hauv lub vaj kaj siab.

20. Tshooj 7 yuav teb lo lus nug twg?

²⁰ Puag thaum ub, tus txivneej ncaj ncees hu ua Yauj tau nug li no: “Yog neeg tuag lawm nws yuav rov muaj txojsia lov?” (Yauj 14:14) Cov uas tuag lawm, puas yuav ciaj sawv tau rov qab los? Tej uas phau Vajlugkub qhia nplig tau peb lub siab kawg li. Cia peb kawm txog qhov no nyob rau Tshooj 7.