1-3. Anwi isteqsiyen yeɛnan lmut iɣef i ţmeyyizen medden? Acu n leǧwab i d-​ţţarrant kra n ddyanat?

WIGI d isteqsiyen iɣef i ţmeyyizen medden d luluf n lesnin aya. D isteqsiyen yesɛan azal ameqran. Akken nebɣu nili neɣ anda nebɣu nezdeɣ, leǧwab ɣef yesteqsiyen-​a yeɛna-​yaɣ.

² Deg yixef iɛeddan, nwala-​d belli asfel n leslak n Ɛisa Lmasiḥ yeldi abrid i tudert n dayem. Nelmed-​ed daɣen belli Adlis Iqedsen icar-​ed ɣef yiwen n zzman ideg “ur teţţuɣal ara a d-​tili lmut.” (Aweḥḥi 21:4) Acu kan, tura neţmeţţat irkelli. Akken i t-​id-​yenna ugellid ukyis Sliman: ‘Wid yeddren ẓran belli ad mmten.’ (Amusnaw 9:5) Ɣas akken neţnadi ad yiɣzif leɛmeṛ-​nneɣ akteṛ, nebɣa daɣen a nefhem amek i tḍerru yid-​neɣ m’ara nemmet.

³ M’ara mmten wid i nḥemmel, neţru fell-​asen; yerna nesteqsay ahat iman-​nneɣ, neqqar-​as: ‘Amek i teḍra yid-​sen? Ţţenɛeţţaben? Ţḥaraben fell-​aneɣ? Nezmer a ten-​nɛiwen? A nuɣal a ten-​nẓer yiwen wass?’ Ddyanat n ddunit mačči yiwen leǧwab i d-​ţţarrant. Kra sselmadent belli ma yella nexdem lxiṛ di temɛict-​nneɣ, a nṛuḥ s igenni; ma yella nexdem cceṛ, a nreɣ di tmes. Tiyaḍ qqarent belli m’ara nemmet, nettabaɛ lejdud-​nneɣ ɣer wemkan iɣer ţṛuḥun leṛwaḥ. Tiyaḍ daɣen sɣarayent belli lmeggtin ţṛuḥun ɣer ddaw n wakal iwakken ad ţţuḥasben, ssyin a d-ɛiwden talalit di lǧeţţa nniḍen.

4. Acu n uselmed yeɛnan lmut i gcudden xilla n ddyanat?

 ⁴ Leḥwayeǧ-​agi meṛṛa i sselmadent ddyanat yella d acu i tent-​icudden: ɛlaḥsab-​nsent yella wayen i d-​yeţɣaman yedder ɣas temmut lǧeţţa-​nneɣ. Azgen ameqran n ddyanat, ama ţ-​ţid n zik ama ţ-​ţid n tura, qqarent-​ed belli ɣas temmut lǧeţţa-​yagi, neţkemmil neţɛici i lebda; neţwali, nsell yerna neţxemmim. Meɛna amek i gezmer ad yili wayagi? Siwa ma yella lmux-​nneɣ ixeddem i nezmer a nsel, a nwali neɣ a nxemmem. M’ara nemmet, lmux-​nneɣ iḥebbes. Ihi, mebla lmux-​nneɣ, ur nezmir ara a d-​nemmekti, a nḥuss, a nsel, neɣ a nwali.

5, 6. Acu yesselmad Wedlis Iqedsen ɣef liḥala ideg i llan wid yemmuten?

⁵ Ayen i gḍerrun mbeɛd lmut mačči d ayen yeffren ɣef Yahwa, i d-​ixelqen lmux. Yessen tideţ, yerna yessefham-​ed deg Wawal-​is, Adlis Iqedsen, anta liḥala ideg i llan wid yemmuten. Aselmed-​ines ishel maḍi: m’ara yemmet ḥedd, teţfakka fell-​as temɛict. Lmut d lemxalfa n tudert. Lmeggtin ur ţwalin, ur sellen, ur ţxemmimen. Ulac d acu i d-​yeţɣimin yedder m’ara temmet lǧeţţa-​nneɣ. Ur nesɛi ara taṛwiḥt ur neţmeţţat ara neɣ ṛṛuḥ ur neţmeţţat ara. *

⁶ Mbeɛd mi d-​yenna Sliman belli wid yeddren ẓran ad mmten, yerna-​d lehduṛ-​agi: “Ma d wid yemmuten ur ẓrin acemma.” Issefhem-​ed daɣen belli wid yemmuten ur zmiren ad ḥemmlen wala ad keṛhen, yerna “ulac la ccɣwel, la leḥsab, la tamusni, la lekyasa [deg uẓekka].” (Ɣer-​ed Amusnaw 9:5, 6, 10.) Ula d Ahellil 146:4 yenna-​d belli ass ideg ara yemmet walbeɛḍ “leɛzayem-​is meṛṛa ad ɣaben.” Neţmeţţat yerna ulac d acu ara d-​iqqimen seg-​neɣ  yedder m’ara temmet lǧeţţa-​nneɣ. Tudert-​nneɣ teţţemcabi ɣer tmes n tcemmaɛt. M’ara ţ-​nessexsi, ulac saniɣer i tṛuḥ. Tɣab, d aya kan.

7. Ɣer wacu i gmettel Ɛisa lmut?

⁷ Ɛisa Lmasiḥ immeslay-​ed ɣef liḥala ideg i llan wid yemmuten. Ihdeṛ-​ed ɣef waya di temsalt n Ilɛazar (Laɛẓar), yiwen wergaz i gemmuten, i gella yessen mliḥ. Yenna i inelmaden-​is: “Aḥbib-​nneɣ Ilɛazar iṭṭeṣ.” Inelmaden-​is ɣilen belli Ilɛazar igen akken ad isteɛfu w’ad yeḥlu si lehlak-​is. Meɛna ɣelṭen. Ɛisa issefhem-​asen: “Ilɛazar immut.” (Ɣer-​ed Yuḥenna 11:11-14.) Ɛisa imettel lmut ɣer yiḍeṣ. Ilɛazar ur yelli la deg igenni la di ǧahennama n tmes. Ur iṛuḥ ara ɣer lejdud-​is neɣ ɣer lmalayekkat. Ur d-​yuɣal ara ɣer tudert di lǧeţţa nniḍen. Yella amzun yesteɛfuy di lmut, am win ara iɣemqen di tnafa mebla tirga. Llan yefyar nniḍen n Wedlis Iqedsen i geţmettilen lmut ɣer yiḍeṣ. Di lemtel, yiwen wafir yenna-​d belli anelmad Stifanus “iṭṭeṣ”, yuɣ lḥal neţţa yeţwaṛjem armi yemmut. (Lecɣal 7:60) Taswiɛt nniḍen, Ɛisa imettel daɣen lmut ɣer tguni. Asmi i d-​issker si lmut yelli-​s n Yayir (Jayṛus), yenna-​d: “Mačči d lmut i temmut, d iḍeṣ i teṭṭeṣ!”—Luqa 8:52, 53.

8. Amek i neɛlem belli Ṛebbi ur sen-​yebɣi ara lmut i yemdanen?

⁸ Ṛebbi yebɣa-​yasen lmut i yemdanen di tazwara? Ala. Ixleq-​ed amdan bac ad iɛic i lebda ɣef lqaɛa. Akken i t-​nwala yakan, Ṛebbi yessers argaz amezwaru ţ-​ţmeṭṭut tamezwarut deg yiwet lǧennet itɛeddan. Yefka-​yasen ṣṣeḥḥa ikemlen. D ayen yelhan kan i sen-​yebɣa. Ababat  (neɣ tayemmaţ) i geţḥibbin arraw-​is ad yebɣu ad uɣalen d imɣaren yerna ad mmten? Awwah, xaṭi! Yahwa iḥemmel arraw-​is; yebɣa ad ilin d iseɛdiyen i dima ɣef lqaɛa. Adlis Iqedsen yenna-​d belli Yahwa “yerra-​d deg wul n wemdan ad iţxemmim ɣef lebda.” (Amusnaw 3:11) Lmeɛna-​s, mi ɣ-​d-​yexleq Ṛebbi, ixleq-​ed deg wulawen-​nneɣ lebɣi a nɛic i dima. Uyerna yexdem ţţawil akken a ɣ-​yessiweḍ ɣer lebɣi-​yagi.

9. Acu i gḥeṛṛem Yahwa i Adam? Iwacu ur sen-​yewɛiṛ ara i Adam d Ḥewwa ad ṭebbqen lameṛ-​agi?

⁹ Acuɣer ihi i ţmeţţaten yemdanen? Akken a d-​naf lǧawab, ilaq a nẓer d acu yeḍran di zzman ideg yella kan yiwen wergaz d yiwet tmeṭṭut ɣef lqaɛa. Atan wayen i d-​yeḥka Wedlis Iqedsen: Yahwa Ṛebbi “yessemɣi-​d si lqaɛa, mkul ṣṣenf n ttjuṛ iɛeǧben i tmuɣli, yelhan i wučči.” (Laṣel n ddunit 2:9) Acu kan, tella lḥaǧa i sen-​iḥeṛṛem. Yahwa yenna i Adam: “Tzemreḍ aţ-​ţeččeḍ si ttjuṛ meṛṛa n leǧnan agi; lameɛna si ttejṛa n tmusni n lxiṛ akw-​d cceṛ, ur tţeţţeḍ ara, axaṭer asm’ara teččeḍ seg-​s, aţ-​ţemmteḍ.” (Laṣel n ddunit 2:16, 17) Lameṛ-​agi ur yewɛiṛ ara, axaṭer ttjuṛ iseg i zemren ad ččen Adam d Ḥewwa mačči d ayen i gxuṣṣen. Lameɛna yefka-​yasen tagniţ akken a d-​beggnen belli steɛṛfen s Win i sen-​d-​yefkan kulci, s Win i sen-​d-​yefkan ula ţ-​ţudert n dayem. Ma yella uɣen awal, a d-​sseknen daɣen belli ţqadaren leḥkem n baba-​tsen n igenwan, yerna qeblen leḥkem-​agi-​ines yeččuṛen d leḥnana.

10, 11. a) Amek i ɛuṣan Ṛebbi Adam d Ḥewwa? b) Iwacu lmeɛṣegga n Adam d Ḥewwa ţ-​ţamsalt meqqren?

¹⁰ Acu kan, Adam d Ḥewwa xtaṛen ad ɛaṣin Yahwa. Cciṭan yenna i Ḥewwa s yiwen wezrem: “Akka ihi, inna-​d Yillu: ‘Ur tţeţţem ara si ttjuṛ meṛṛa n leǧnan’...” Ḥewwa terra-​yas: “Nezmer an-​nečč si lfakya n ttjuṛ meṛṛa n leǧnan, lameɛna, ɣef lfakya n ttejṛa yellan di tlemmast n leǧnan, Illu yenna-​d: ‘Ur teţţet ara seg-​s, ur ţ-​ţnalet ara, neɣ m’ulac aţ-​ţemmtem.’”—Laṣel n ddunit 3:1-3.

¹¹ Cciṭan yenna: “Xaṭi! Ur teţmeţţatem ara! Illu yeẓra belli, asm’ara teččem seg-​s, allen-​nwen ad ldint, yerna aţ-​ţilim am Yillu, aţ-​ţissinem lxiṛ akw-​d cceṛ.” (Laṣel n ddunit 3:4, 5) Cciṭan yebɣa ad yessimen Ḥewwa belli aţ-​ţaf lfayda ma tečča si lfakya-​nni yeţţuḥeṛṛmen. Amzun yenna-​d belli tezmer aţ-​ţextiṛ s timmad-​is d acu yelhan  d acu i diri, belli tezmer aţ-​ţexdem ayen i s-​yehwan. Iger-​ed daɣen lekdeb ɣef Yahwa; iqsed-​ed belli Yahwa iskaddeb deg wayen ara sen-​d-​yessis wučči n lfakya-​nni. Ḥewwa tumen Cciṭan. Tekkes-​ed lfakya, tečča-​ţ. Umbeɛd, tefka i wergaz-​is, yečča ula d neţţa. Mačči am win ur neẓri ara d acu i gxeddem. Nutni ɛelmen belli la xeddmen swaswa ayen akken i sen-​yenna Ṛebbi ur t-​xeddmen ara. Imi ččan si lfakya-​nni, ɛuṣan s ţţɛemda lameṛ-​nni isehlen yerna ur neẓẓay ara. Beggnen-​d belli ḥeqren Baba-​tsen n igenwan akk-​d leḥkem-​ines. Mačči d ayen ara sen-​iţwasemmḥen imi kksen leqder ɣef Uxellaq-​nsen yeččuṛen d leḥmala!

12. Acu i gzemren a ɣ-​iɛiwen a nefhem ayen i gḥuss Yahwa asmi t-ɛuṣan Adam d Ḥewwa?

 ¹² A d-​nefk lemtel: acu ara tḥusseḍ lukan yiwen wass mmi-​k (neɣ yelli-​k), i d-​tṛebbaḍ s leḥnana, a k-​iɛaṣi w’a d-​ibeggen s lmeɛṣegga-​yagi belli ur k-​iţqadar ara yerna ur k-​iḥemmel ara? A k-​iqreḥ mliḥ lḥal, neɣ ala? Xayel ihi acḥal i geḥzen Yahwa asmi t-ɛuṣan Adam d Ḥewwa di sin.

13. Ɣur Yahwa, amek ara teḍru d Adam m’ara yemmet, yerna acu i d lmeɛna n wayagi?

¹³ Ulac ssebba ara yeǧǧen Yahwa ad iɛemmed i Adam d Ḥewwa i t-​iɛuṣan akken ad ɛicen i lebda. Akken i t-​id-​yenna, mmuten. Tekfa fell-​asen temɛict. Ur ṛuḥen ara ɣer wemkan-​nni ideg ţţilin leṛwaḥ. Nefhem-​ed annect-​a seg wayen i genna Yahwa i Adam asmi i t-​iḥuseb ɣef lmeɛṣegga-​ines. Ṛebbi yenna-​yas: “[Aţ-​ţuɣaleḍ] s akal, ansi akken i d-​teţwakkseḍ; axaṭer, kečč d aɣebbar, aţ-​ţuɣaleḍ alamma d aɣebbar.” (Laṣel n ddunit 3:19) Ṛebbi ixleq-​ed Adam seg uɣebbar n wakal. (Laṣel n ddunit 2:7) Uqbel a d-​iţwaxleq, Adam ulac-​it. Ihi, m’akken i s-​yenna Yahwa belli ad yuɣal s aɣebbar, lmeɛna-​s ad yuɣal ɣer wulac. Adam ur iseɛɛu ara tudert, am uɣebbar iseg i d-​yeţwaxleq.

14. Ayɣer i neţmeţţat?

¹⁴ Lukan Adam d Ḥewwa uɣen awal, tili mazal ţɛicin ar ass-​a. Lameɛna, mmuten axaṭer denben imi xtaṛen ad ɛaṣin Ṛebbi. Neţmeţţat axaṭer Adam yeǧǧa-​d i tarwa-​s meṛṛa ddnub akk-​d lmut. (Ɣer-​ed Iṛumaniyen 5:12.) Ddnub icuba lehlak iṣeɛben i d-​nweṛṛet, iseg ur yezmir ḥedd ad yemneɛ. Lmut, i d-​yeţţawi ddnub-​agi, d deɛwessu. Lmut ţ-​ţaɛdawt mačči ţ-​ţaḥbibt. (1 Ikurintiyen 15:26) Nezmer a ncekkeṛ mliḥ Yahwa imi d-​yefka lefdiya akken a ɣ-​d-​isellek si teɛdawt-​agi tamcumt!

15. Acuɣer tamusni n tideţ ɣef lmut d ayen yeţṣebbiren?

¹⁵ Aselmed n Wedlis Iqedsen i d-​iheddṛen ɣef liḥala  ideg i llan wid yemmuten yeţṣebbir. Akken i t-​nwala, lmeggtin ur ţḥussun la s lqerḥ la s leḥzen. Ulayɣer akk a ten-​nagad, axaṭer ur zmiren ara a ɣ-​ḍurren. Ur ḥwaǧen ara a ten-​nɛiwen yerna ur zmiren ara a ɣ-ɛiwnen. Ur nezmir a sen-​nehdeṛ, ur zmiren a ɣ-​d-​hedṛen. Xilla n lɛulama n ddin i d-​iqqaren belli zemren ad ɛiwnen lmeggtin, lameɛna ayagi d lekdeb. Wid i geţţamnen s waya ţţaken iṣurdiyen i lɛulama-​yagi. Meɛna, nekni, imi nessen tideţ, ur neţɛemmid ara a ɣ-​kellxen wid yesselmaden lekdubat am wigi.

16. Menhu i d-​yeǧǧan lateṛ-​is deg uselmed n waṭas n ddyanat, yerna amek i gxeddem?

¹⁶ Yeɛdel ddin-​inek d wayen yesselmad Wedlis Iqedsen ɣef wid yemmuten? Amur ameqran n ddyanat ur ɛdilent ara d uselmed-​agi. Iwacu? Axaṭer yella lateṛ n Cciṭan deg wayen i sselmadent. Cciṭan yessexdam ddin n lekdeb akken ad ɣilen lɣaci belli ɣas temmut lǧeţţa-​nneɣ, neţkemmil neţɛic deg wemkan-​nni iɣer ţṛuḥun leṛwaḥ. D lekdeb i geţcuddu ɣer lekdubat nniḍen akken ad yessebɛed lɛibad ɣef Yahwa Ṛebbi. Amek yeɛni?

17. Ayɣer aselmed n lɛiqab di tmes i lebda d aselmed iţekksen ccan i Yahwa?

¹⁷ Akken i t-​id-​nwala, kra n ddyanat sselmadent belli ma yella yiwen yexdem cceṛ di ddunit-​is, asm’ara yemmet ad iṛuḥ s anda ara yenɛeţţab di tmes i lebda. Aselmed-​agi iţekkes ccan i Ṛebbi. Yahwa d Ṛebbi n leḥmala; d lmuḥal ad imeḥḥen albeɛḍ akkagi. (Ɣer-​ed 1 Yuḥenna 4:8.) Acu ara tiniḍ ɣef wergaz ara yegren afus n mmi-​s ɣer tmes bac a t-​iɛaqeb axaṭer ur s-​yeţţaɣ ara awal? Aţ-​ţqadreḍ argaz am wagi? Aţ-​ţebɣuḍ a t-​tissineḍ alukan ţ-​ţamusni? Xaṭi! Ahat a k-​d-​iban d uqsiḥ almi dayen. Acu kan, Cciṭan yebɣa a nɣil belli Yahwa yeţɛaqab lɣaci di tmes i lebda, yeɛni d imelyaṛen iseggasen!

18. Anwa aselmed n lekdeb i geţţawin kra ad ɛebden lmeggtin?

 ¹⁸ Cciṭan yessexdam daɣen kra n ddyanat akken ad yesselmed belli m’ara mmten lɛibad, ţţuɣalen d leṛwaḥ i glaq ad qadren w’ad ɛuzzen wid yeddren. Ɛlaḥsab n uselmed-​agi, leṛwaḥ n wid yemmuten zemren ad qqlen d leḥbab yesɛan tazmert neɣ d iɛdawen yesserhaben. Aṭas i geţţamnen lekdeb-​agi. Ţţagaden lmeggtin, dɣa ţɛuzzun-​ten yerna ţɛebbiden-​ten. Ma d Adlis Iqedsen yesselmad belli wid yemmuten ṭṭṣen yerna yewwi-​d a neɛbed ḥaca Ṛebbi n ṣṣeḥ Yahwa, Axellaq-​nneɣ.—Aweḥḥi 4:11.

19. M’ara nissin tideţ ɣef lmeggtin, anwa aselmed nniḍen n Wedlis Iqedsen i nfehhem akteṛ?

¹⁹ Ma yella tessneḍ tideţ ɣef lmeggtin, aţ-​ţmenɛeḍ si lekdubat n ddyanat. Tamusni-​yagi a k-​tɛiwen daɣen akken aţ-​ţfehmeḍ leḥwayeǧ nniḍen i gesselmad Wedlis Iqedsen. Ɣef lemtel, m’ara teẓreḍ belli wid yemmuten ur ţṛuḥun ara ɣer laxeṛt, aţ-​ţfehmeḍ akteṛ lweɛd i d-​yefka Ṛebbi yeɛnan tamɛict n lebda ɣef lqaɛa ara yuɣalen d lǧennet.

20. Anwa asteqsi iwumi ara d-​nerr lǧawab deg yixef ara d-​itebɛen?

²⁰ Zik-​nni, Yub yellan d aḥeqqi, imeyyez d yiman-​is, yenna: “Lemmer i d-​iḥeggu wemdan m’ara yemmet, ad ṣebreɣ.” (Yub 14:14) Win yegnen di lmut yezmer a d-​yuɣal ɣer tudert? Ayen yesselmad Wedlis Iqedsen ɣef temsalt-​agi yeţṣebbir mliḥ. D ayen ara nẓer deg yixef ara d-​itebɛen.