1-3. Us kwɛstyɔn dɛn pipul dɛn kin aks bɔt day? Aw difrɛn rilijɔn dɛn kin ansa dɛn kwɛstyɔn ya?

FƆ LƆNG tɛm naw, pipul dɛn dɔn de tink bɔt dɛn kwɛstyɔn ya. Dɛn kwɛstyɔn ya impɔtant to wi ɔl bikɔs frɔm di de we dɛn bɔn wi, wi no se wande wi gɛt fɔ day.

² Insay Chapta 5, wi bin lan bɔt aw di day we Jizɔs day fɔ wi, dɔn mek wi ebul fɔ gɛt layf we go de sote go. Wi bin lan bak se, tɛm de kam we mɔtalman “nɔ go day igen.” (Rɛvɛleshɔn 21:​4) Bɔt naw, wi ɔl de day. Di Baybul se: “Di wan we nɔ day yet no se in gɛt fɔ day, bɔt dayman nɔ de no natin.” (Ɛkliziastis 9:​5) Wi ɔl kin tray tranga wan fɔ mek wi gɛt lɔng layf. Ɛn wi kin tink bɔt wetin de apin to wi we wi day.

³ We pɔsin we wi lɛk day, wi kin kray. Sɔntɛm, wi kin aks kwɛstyɔn dɛn lɛk: ‘Wetin de apin to di wan dɛn we dɔn day? Dɛn de sɔfa? Dɛn de si wi? Wi ebul ɛp dɛn? Wi go ɛva si dɛn igen?’ Di difrɛn difrɛn rilijɔn dɛn we de na di wɔl kin gi difrɛn ansa to dɛn kwɛstyɔn ya. Sɔm dɛn kin se if yu na bin gud pɔsin, we yu day, yu de go na ɛvin, bɔt if yu na bin bad pɔsin we yu day, yu de go bɔn na faya. Ɔda rilijɔn dɛn kin se we pɔsin day, i de tɔn to spirit ɛn go de wit dɛn fɔstɛm pipul dɛn we bin dɔn  day. Ɛn ɔda rilijɔn dɛn bak kin tich se we pɔsin day, i de go na ɔndawɔl. We i go de, dɛn go jɔj am fɔ ɔl wetin i dɔn du. Afta dat, dɛn go bɔn am bak as mɔtalman ɔ animal.

4. Wetin na di men tin we bɔku rilijɔn dɛn de tich bɔt day?

⁴ Wan men tin de we bɔku rilijɔn dɛn de tich. Dɛn de tich se sɔntin de insay mɔtalman we nɔ de day afta di pɔsin dɔn day. Bɔku rilijɔn dɛn biliv se we wi day, wi kin stil ebul fɔ si, yɛri ɛn tink. Dɛn biliv se wi nɔ de rili day. Bɔt dat na tru? Nɔ. Wi de si, yɛri ɛn tink bikɔs wi bren de wok. Bɔt we pɔsin day, in bren de lɛf fɔ wok. Da tɛm de, i nɔ de mɛmba, fil, si, yɛri, ɔ tink bɔt ɛnitin bikɔs in bren nɔ de wok. Ɔl di pat dɛn na wi bɔdi de stɔp fɔ wok we wi bren lɛf fɔ wok.

5, 6. Wetin di Baybul se de apin to pɔsin we dɔn day?

⁵ Jiova Gɔd we mek wi bren, no wetin de apin to wi we wi day. I sabi di kɔrɛkt tin, ɛn insay di Baybul, i ɛksplen wetin kin apin to wi we wi day. Di Baybul de tich se: We pɔsin day, i nɔ gɛt layf igen. Day na we pɔsin nɔ gɛt layf. Pɔsin we dɔn day nɔ de si, yɛri ɔ tink. We pɔsin day, ɔl pat pan am de lɛf fɔ wok. Wi nɔ gɛt sol ɔ spirit we nɔ de day. *

⁶ Afta di Baybul bin dɔn tɔk se wi we gɛt layf no se wi go day, i tɔk bak se: “Dayman nɔ de no natin.” Dɔn, i ivin tɔk se pɔsin we dɔn day nɔ go ebul lɛk ɔ et pɔsin ɔ sɔntin, ɛn i se di pɔsin ‘nɔ gɛt fɔ wok, tink, ɔ sabi ɛnitin ɛn sɛns biznɛs nɔ de.’ (Rid Ɛkliziastis 9:​5, 6, 10.) Semweso, Sam 146:​4 se we pɔsin day, ɔl in “plan na  fɔ natin.” Wi na mɔtalman, so natin nɔ de na wi bɔdi we de kɔntinyu fɔ liv afta wi dɔn day. Di layf we wi gɛt tan lɛk di faya we kin de pan kandul. We yu ɔt kandul, usay di faya de go? I nɔ de go nɔsay. I dɔn ɔt.

7. Wetin Jizɔs se day tan lɛk?

⁷ Jizɔs Krays bin sho wi wetin de apin to dayman. I bin du dis we wan man we nem Lazarɔs, bin day. Jizɔs bin sabi dis man gud gud wan. Jizɔs bin tɛl in disaypul dɛn se: “Wi padi, Lazarɔs, ledɔm de slip.” We Jizɔs tɔk so, di disaypul dɛn fil se fɔ tru Lazarɔs de slip. Bɔt nɔto dat Jizɔs bin min. So Jizɔs tɛl dɛn se: “Lazarɔs dɔn day.” (Rid Jɔn 11:​11-14.) So yu si, Jizɔs se day tan lɛk slip. Lazarɔs nɔ bin de na ɛvin ɔ na ɛl. I nɔ bin go to dɛn fɔstɛm pipul dɛn we bin dɔn day. Dɛn nɔ bin bɔn am as ɔda pɔsin. Di day we i day tan lɛk we pɔsin de slip dip dip wan, bɔt nɔ de drim. Ɔda skripchɔ dɛn bak tɔk se day fiba slip. Fɔ ɛgzampul, wan ɔda tɛm, Jizɔs bin tɔk bɔt pɔsin we dɔn day se, na slip i de slip. Dis bin apin we i bin gi layf bak to wan man in gyal pikin. I tɛl di pipul dɛn se: “Di pikin nɔ day, i jɛs de slip.”—Lyuk 8:​52, 53.

8. Aw wi no se Gɔd nɔ bin want mɔtalman fɔ day?

⁸ Gɔd bin want lɛ pipul dɛn day? Nɔ, i nɔ bin want dat! Jiova bin mek mɔtalman fɔ de na di wɔl sote go. Wi bin dɔn lan se we Gɔd bin mek di fɔs man ɛn uman,  i bin put dɛn na wan fayn fayn ples. I mek dɛn gɛt wɛlbɔdi. Na gud tin dɛn nɔmɔ Jiova bin want fɔ dɛn. Ɛni mama ɛn papa de we want mek dɛn pikin dɛn sɔfa te dɛn day? Nɔ! Semweso, Jiova lɛk in pikin dɛn ɛn i bin want lɛ dɛn gɛt gladi at sote go na dis wɔl. Di Baybul se: “[Jiova] dɔn put am na mɔtalman at fɔ mek dɛn want fɔ liv sote go.” (Ɛkliziastis 3:​11, NW) We Gɔd mek wi, i put sɔntin insay wi we kin mek wi want fɔ de sote go.  Na dat mek nɔbɔdi nɔ want fɔ day. So, na dat mek Gɔd sɛn in Pikin fɔ kam day fɔ wi so dat wi go gɛt layf we go de sote go.

9. Wetin Gɔd tɛl Adam fɔ du? Wetin mek di tin we Gɔd tɛl am nɔ at fɔ du?

⁹ Wetin mek mɔtalman de day? Fɔ no di ansa, i go fayn lɛ wi tɔk bɔt wetin bin apin di tɛm we na wangren man ɛn uman bin de na di wɔl. Di Baybul se: “[Jiova Gɔd] mek fayn fayn tik dɛn gro de we gɛt gud frut fɔ it.” (Jɛnɛsis 2:​9) Bɔt sɔntin bin de we i tɛl dɛn nɔ fɔ du. Jiova bin tɛl Adam se: “Yu kin it di frut dɛn pan ɛni tik na di fam, bɔt yu nɔ fɔ it pan di ‘Sɛns tik,’ bikɔs if yu it pan am da sem de de, yu go day.” (Jɛnɛsis 2:​16, 17) Dis tin we Gɔd tɛl am nɔ bin at fɔ du. Bɔku frut dɛn bin de na di gadin we Adam ɛn Iv bin fɔ dɔn it. Bɔt dis tin we Gɔd se, gi dɛn di chans fɔ sho se dɛn gladi fɔ di layf ɛn ɔl di ɔda fayn fayn tin dɛn we Gɔd dɔn gi dɛn. We dɛn obe Gɔd, go sho se dɛn rɛspɛkt am ɛn dɛn want mek i sho dɛn wetin fɔ du.

10, 11. (a) Aw di fɔs man ɛn uman du wetin Gɔd tɛl dɛn nɔ fɔ du? (b) Wetin mek dis tin we Adam ɛn Iv du, na siriɔs tin?

¹⁰ Bɔt pan ɔl dis, Adam ɛn Iv nɔ bin du wetin Jiova se. Setan yuz wan snek fɔ tɔk to Iv. I aks Iv se: “Fɔ tru tru PAPA GƆD tɛl una se, una nɔ fɔ it di frut dɛn pan ɔl di tik dɛn na di fam?” Iv tɛl am se: “Wi kin it frut pan ɛni tik na di fam, pas nɔmɔ pan di wan we de midul di fam. PAPA GƆD bin dɔn tɛl wi se, wi nɔ fɔ it da frut de ɛn nɔ fɔ tɔch am sɛf, if wi du so, wi go day.”—Jɛnɛsis 3:​1-3.

¹¹ Setan tɛl am se: “Dat nɔto tru; una nɔ go day. PAPA GƆD bin se so bikɔs i no se if una it am, una yay go opin ɛn una go tan lɛkɛ am; dɔn una go no wetin gud  frɔm wetin bad. (Jɛnɛsis 3:​4, 5) Setan bin want mek Iv biliv se i go bɛnifit if i it di frut we Gɔd dɔn tɛl dɛn nɔ fɔ it. Setan se Iv go ebul fɔ disayd fɔ insɛf wetin gud ɛn wetin bad; i go ebul fɔ du ɛnitin we i want. Setan tɔk bak se na lay Jiova de lay we i se if dɛn it di frut, dɛn go day. Iv biliv Setan. So i pik sɔm pan di frut ɛn bigin it am. Leta, i gi sɔm to in man, ɛn insɛf it. Yu tink se Adam ɛn Iv nɔ bin no wetin dɛn bin de du? Dɛn bin no wetin dɛn de du. Dɛn bin rili no se wetin dɛn de du na  in Jiova bin tɛl dɛn mek dɛn nɔ du. We dɛn it di frut, sho se dɛn nɔ gɛt wan rɛspɛkt fɔ Jiova ɛn dɛn nɔ want lɛ i rul dɛn. So wi go se na bay wilful dɛn du wetin Jiova tɛl dɛn nɔ fɔ du.

12. Wetin go ɛp wi fɔ no aw Jiova bin fil we Adam ɛn Iv du wetin i tɛl dɛn nɔ fɔ du?

¹² Fɔ ɛgzampul, aw yu go fil if di pikin we yu bɔn ɛn mɛn, du sɔntin we yu dɔn wɔn am mek i nɔ du? Yu go fil bad, nɔto so? So jɔs tink bɔt aw Jiova bin fil we Adam ɛn Iv bin du wetin i tɛl dɛn nɔ fɔ du.

13. Wetin Jiova se go apin to Adam we i day? Wetin dat min?

¹³ Jiova nɔ bin mek dɛn tranga-yes pipul ya kɔntinyu fɔ liv sote go. Dɛn ɔl tu bin day, lɛk aw nɔmɔ Gɔd bin tɛl dɛn. Bɔt wetin bin apin to dɛn we dɛn day? Dɛn bin lɛf fɔ liv. Dɛn nɔ tɔn spirit ɛn go de ɔdasay. Wetin mek wi se so? Na di tin we Jiova tɛl Adam afta dɛn sin, mek wi se so. Gɔd bin tɛl am se: “Na dɔti a bin tek mek yu, ɛn na dɔti yu go go bak we yu day.” (Jɛnɛsis 3:​19) Na di dɔti we de na grɔn Gɔd bin yuz fɔ mek Adam. (Jɛnɛsis 2:​7) Bɔt bifo da tɛm de, Adam nɔ bin de nɔsay. So, we Jiova se Adam go go bak na di dɔti, i bin min se Adam nɔ go de igen. Adam nɔ go gɛt layf jɔs lɛk aw dɔti nɔ gɛt layf.

14. Wetin mek wi de day?

¹⁴ Adam ɛn Iv dɛn bin fɔ stil de tide, bɔt bikɔs dɛn nɔ du wetin Gɔd tɛl dɛn fɔ du, dɛn bin day. Di tin we mek wi de day tide na bikɔs Adam dɔn put wi ɔl pan sin ɛn day. (Rid Lɛta Fɔ Rom 5:​12.) Dis sin tan lɛk dɛn bad bad sik we pɔsin kin gɛt frɔm in mama ɔ papa. Di pe we sin de gi na day. Day na bad tin. Na wi ɛnimi; nɔbɔdi nɔ lɛk am. (Fɔs Lɛta Fɔ Kɔrint 15:​26) Wi fɔ rili tɛl Gɔd tɛnki fɔ we i mek in Pikin kam pul wi na dis bad ɛnimi in an!

15. Wetin mek i fayn fɔ no di tru bɔt day?

¹⁵ Di tin we di Baybul tɔk bɔt dayman kin kɔrej wi. Wi dɔn lan se we pɔsin day, i nɔ no natin. Wi nɔ fɔ fred dayman bikɔs i nɔ ebul fɔ du wi natin. Wi nɔ go ebul ɛp am, ɛn insɛf nɔ go ebul ɛp wi. Wi nɔ go ebul tɔk to am, ɛn insɛf nɔ go ebul tɔk to wi. Bɔku bigman dɛn pan Gɔd biznɛs kin se dɛn ebul fɔ ɛp di wan dɛn we dɔn day, ɛn di pipul dɛn we kin biliv dɛn, kin gi dɛn mɔni. Bɔt we wi no di tru bɔt dayman, de pul wi pan ɔl dɛn lay lay tichin ya.

16. Udat de kɔntrol di tin dɛn we bɔku rilijɔn dɛn de tich? Aw i de du dat?

¹⁶ Na ɔl di rilijɔn dɛn de tich wetin di Baybul se bɔt dayman? Bɔku nɔ de du so. Yu no wetin mek? Na bikɔs na Setan de kɔntrol bɔku rilijɔn dɛn. I de yuz dɛn rilijɔn ya fɔ mek pipul dɛn biliv se we pɔsin day, i de tɔn spirit ɛn go liv ɔdasay. Bɔt na dis ɛn ɔda lay lay tin dɛn Setan de yuz fɔ mek pipul dɛn nɔ sav Jiova Gɔd. Aw i de du dis?

17. Wetin mek wi se sɔm pan di tin dɛn we sɔm rilijɔn de tich, de briŋ badnem pan Jiova?

¹⁷ Wi bin lan se sɔm rilijɔn dɛn de tich se, if pɔsin bin de du bad, we i day dɛn de go bɔn am na faya sote go. Dis tichin de briŋ badnem pan Gɔd. Jiova na Gɔd we lɛk wi ɛn i nɔ go ɛva mek mɔtalman sɔfa da kayn we de. (Rid Jɔn In Fɔs Lɛta 4:​8.) Aw yu go fil if pɔsin put in pikin in an na faya bikɔs di pikin du bad? Yu go lɛk da pɔsin de? Yu go want lɛ i bi yu padi? Yu nɔ go want dat, nɔto so? Yu nɔ tink se da pɔsin de wikɛd? Na so Setan want mek wi tink bɔt Jiova. I want mek wi biliv se Jiova de mek pipul dɛn bɔn na faya sote go.

18. Wetin na di ɔda lay lay tin we Setan de mek pipul dɛn biliv bɔt dayman?

¹⁸ Setan de yuz sɔm rilijɔn dɛn bak fɔ tich se we pɔsin  day, i de tɔn spirit. Dɛn biliv se wi we gɛt layf fɔ ɔna ɛn rɛspɛkt di pipul dɛn we dɔn day. Dis tichin de mek pipul dɛn biliv se di dayman in spirit ebul fɔ du gud ɔ bad. Plɛnti pipul biliv dis lay lay tichin. Dis dɔn mek dɛn de fred ɛn ɔna dayman, ɛn dɛn de ivin wɔship dɛn. Bɔt di Baybul de tich se di wan dɛn we dɔn day de slip ɛn na Jiova nɔmɔ wi fɔ wɔship. Na in mek wi ɛn na in de gi wi ɔltin we wi want.—Rɛvɛleshɔn 4:​11.

19. Us ɔda tin wi go ɔndastand we wi no di tru bɔt day?

¹⁹ We yu no di tru bɔt day de pul yu pan ɔl dɛn lay lay tichin ya we rilijɔn dɛn de tich. I de ɛp yu bak fɔ ɔndastand ɔda tin dɛn we di Baybul de tich. Fɔ ɛgzampul, we yu no se we pɔsin day, i nɔ de tɔn spirit ɛn go de ɔdasay, go mek yu ɔndastand mɔ bɔt di prɔmis na di Baybul we se di wan dɛn we dɔn day, go gɛt layf bak na Paradays.

20. Us kwɛstyɔn wi go lan bɔt na di ɔda chapta?

²⁰ Trade trade, wan gud man we di Baybul kɔl Job, bin aks wan kwɛstyɔn. I bin aks se: “If pɔsin day, i go gɛt layf bak?” (Job 14:​14, NW) Pɔsin we dɔn day go ɛva gɛt layf bak? Di ansa we di Baybul gi, go rili kɔrej wi. Na dat wi go lan bɔt na di ɔda chapta.