တၢ်နီၤဖး ဃု
ပှၤသံတ့ၢ်တဖၣ် အိၣ်လၢတၢ်လီၢ်ဖဲလဲၣ်
-
ပမ့ၢ်သံ ပကကဲထီၣ် တၢ်မနုၤလဲၣ်.
-
ဘၣ်မနုၤအဃိ ပဘၣ်သံလဲၣ်.
-
တၢ်သ့ၣ်ညါတၢ်မ့ၢ်တၢ်တီ လၢဘၣ်ဃးဒီးတၢ်သံန့ၣ်ကဒုးသူၣ်မံသးမုာ်ပှၤဧါ.
၁-၃. ပှၤအါဂၤ သံကွၢ်ဝဲတၢ်သံကွၢ် မနုၤတဖၣ်လၢ ဘၣ်ဃးဒီးတၢ်သံလဲၣ်, တၢ်ဘူၣ်တၢ်ဘါ အါမးန့ၣ် စံးဆၢဝဲဒ်လဲၣ်.
ပှၤလၢအအိၣ်မူတ့ၢ်ဖဲပူၤကွံာ်အနံၣ် အကထိတဖၣ်န့ၣ် ဆိကမိၣ်ဘၣ်ဝဲဒၣ် တၢ်သံကွၢ်တဖၣ်အံၤလီၤ. တၢ်သ့ၣ်တဖၣ်အံၤ မ့ၢ်တၢ်သံကွၢ်လၢ အကါဒိၣ်တဖၣ်န့ၣ်လီၤ. ပမ့မ့ၢ် မတၤတဂၤဂ့ၤ, ပမ့ၢ်အိၣ်ဖဲလဲၣ်ဂ့ၤ တၢ်သံကွၢ်တဖၣ်အံၤ အတၢ်စံးဆၢန့ၣ် ဘၣ်ဃးဒီးပဝဲသ့ၣ် တဂၤစုာ်စုာ်န့ၣ်လီၤ.
၂ ယ့ၣ်ၡူးအတၢ်လုၢ်တၢ်ပှ့ၤက့ၤန့ၣ် အိးထီၣ်န့ၣ်ပှၤ ကျဲဒ်သိးပကအိၣ်မူဘၣ် လီၤထူလီၤယိာ်အဂီၢ်န့ၣ် ပကတိၤသကိး ဝံၤတ့ၢ်ဖဲ တၢ်နီၤဖးလၢညါ အပူၤန့ၣ်လီၤ. လံာ်စီဆှံ တဲဆိပာ်ဝဲလၢ ဆၢကတီၢ်ဖဲ “တၢ်သံတအိၣ်လၢၤဘၣ်” အဂ့ၢ်န့ၣ် ပမၤလိသ့ၣ်ညါဘၣ် ဝံၤလံန့ၣ်လီၤ. (လီၢ်ဖျါ ၂၁:၄) ဆၢကတီၢ်ခဲအံၤန့ၣ် ပဝဲသ့ၣ်ခဲလၢာ် ပဘၣ်သံလီၤ. ပှၤကူၣ်ဘၣ်ကူၣ်သ့ စီၤပၤၡလိၤမိၤ စံးဝဲလၢ, “ပှၤလၢအမူဒံးန့ၣ် သ့ၣ်ညါဝဲလၢ အကသံလီၤ.” (စံၣ်တဲၤတဲလီၤ ၉:၅) မ့ၢ်သ့န့ၣ် ပဝဲသ့ၣ်တဖၣ် ပဂုာ်ကျဲးစၢးဒ်သိး ပကအိၣ်မူဘၣ်ယံာ်ယံာ်လီၤ. ဘၣ်ဆၣ် ပအဲၣ်ဒိးသ့ၣ်ညါလၢ ပမ့ၢ်သံပကကဲထီၣ် တၢ်မနုၤလဲၣ်န့ၣ်လီၤ.
၃ ဖဲပှၤလၢပအဲၣ်ဘၣ်အီၤတဖၣ် သံအခါ ပသူၣ်အုးသးအုးလီၤ. လၢတၢ်န့ၣ်အဃိ ပကသံကွၢ်ဘၣ် ဒ်အံၤလီၤ– ‘အဝဲသ့ၣ် ကဲထီၣ်တၢ်မနုၤလဲၣ်. တူၢ်ဘၣ်တၢ်နးတၢ်ဖှီၣ်ဧါ. အဝဲသ့ၣ် အံးက့ၤကွၢ်က့ၤ ပှၤဧါ. ပမၤစၢၤအဝဲသ့ၣ် ကသ့ဧါ. ပက့ၤထံၣ်ဘၣ်ဒီး အဝဲသ့ၣ်ကသ့ဧါ.’ တၢ်ဘူၣ်တၢ်ဘါလၢ ဟီၣ်ခိၣ်ဒီဘ့ၣ်န့ၣ် တၢ်သံကွၢ်တဖၣ်အံၤအဂီၢ် ဟ့ၣ်ဝဲတၢ်စံးဆၢ အါမံၤအါမၠိလီၤ. တနီၤနီၤသိၣ်လိဝဲလၢ ပမ့ၢ်အိၣ်မူတၢ်အိၣ်မူလၢအဂ့ၤန့ၣ် ပကတုၤဆူ မူခိၣ်ဒီး ပတၢ်အိၣ်မူမ့ၢ်တဂ့ၤဒီး ပကတုၤဆူ တၢ်မၤနးမၤဖှီၣ်လၢ မ့ၣ်အူလီၤ. တၢ်ဘူၣ်တၢ်ဘါ အဂၤတဖၣ်န့ၣ် သိၣ်လိဝဲလၢ ပှၤမ့ၢ်သံဒီး ပှၤက့ၤတုၤဆူ ဖံဖုလၢ အိၣ်လၢနီၢ်သးအလီၢ်တဖၣ် အအိၣ်လီၤ. တၢ်ဘူၣ်တၢ်ဘါအဂၤတဖၣ်စ့ၢ်ကီး သိၣ်လိဝဲလၢ ပှၤသံတ့ၢ်တဖၣ်န့ၣ် ကဘၣ်တၢ်စံၣ်ညီၣ်အဂီၢ် လဲၤတုၤလၢ ပျုၤအလီၢ်လီၤ, ဝံၤဒီး ဟဲက့ၤလိၣ်ထီၣ်ကဒီး အသးလၢ ပှၤအဂၤတဂၤအအိၣ်လီၤ.
၄. တၢ်ဘူၣ်တၢ်ဘါအါမးတဖၣ်န့ၣ် အိၣ်ဒီးတၢ်နာ်အခီၣ်ထံးမနုၤလၢ ဘၣ်ဃးဒီးတၢ်သံန့ၣ်လဲၣ်.
၄ တၢ်ဘူၣ်တၢ်ဘါခဲလၢာ်အံၤ အတၢ်သိၣ်လိတဖၣ်န့ၣ် အတၢ်နာ်အခီၣ်ထံးမ့ၢ်ဒၣ် တမံၤဧိၤလီၤ—ပနီၢ်ခိ အကူးအခီတနီၤန့ၣ် အိၣ်မူဒံးဖဲ ပသံဝံၤအလီၢ်ခံန့ၣ်လီၤ. လၢအပူၤကွံာ်ဒီး ခ့ခါခဲအံၤ တၢ်ဘူၣ်တၢ်ဘါ ခဲလၢာ်ဃာ်ဃာ် အတၢ်သိၣ်တၢ်သီတဖၣ်န့ၣ် စံးဝဲလၢ ပအိၣ်ဒီးတၢ်သ့တၢ်ဘၣ် တမံၤမံၤလၢ ပထံၣ်, နၢ်ဃု, ဆိကမိၣ်တၢ်သ့ဒီး အိၣ်မူထီဘိန့ၣ်လီၤ. ဘၣ်ဆၣ်မၤအသး ကသ့ဒ်လဲၣ်. ပတၢ်သ့ၣ်ညါခဲလၢာ်, ဃုာ်ဒီးပတၢ်ဆိကမိၣ်တဖၣ်န့ၣ် ဘျးစဲလိာ်သးဒီး ခိၣ်နူာ်အတၢ်မၤတဖၣ်လီၤ. တုၤပသံန့ၣ်ဒီး ပခိၣ်နူာ်တမၤတၢ်လၢၤဘၣ်. ပတၢ်မၤနီၣ်မၤဃါ, တၢ်သူၣ်ဟူးသးဂဲၤ, တၢ်သ့ၣ်ညါနၢ်ပၢၢ်တဖၣ်န့ၣ် တမၤခူသူၣ်တၢ်လၢ တၢ်လီၢ်အဂၤဘၣ်. ဖဲပခိၣ်နူာ်ဟးဂီၤကွံာ်အခါ တၢ်သ့ၣ်တဖၣ်အံၤ တအိၣ်လၢၤဘၣ်.
ဖဲပသံအခါ နီၢ်နီၢ်ပကဲထီၣ် တၢ်မနုၤလဲၣ်
၅, ၆. တၢ်မၤအသးလၢ ဘၣ်ဃးဒီးပှၤသံန့ၣ် လံာ်စီဆှံသိၣ်လိဝဲ တၢ်မနုၤလဲၣ်.
၅ ဘၣ်ဃးဒီးပှၤသံ ပှၤကဲထီၣ်တၢ်မနုၤလဲၣ်န့ၣ် တၢ်ဘၣ်တ့ကစၢ် ယဟိဝၤ လၢအအိၣ်ဒီး တၢ်ကူၣ်ဘၣ်ကူၣ်သ့ဖးဒိၣ်အဂီၢ်, တမ့ၢ်တၢ်လၢအအိၣ်ခူသူၣ်ဘၣ်. ကစၢ်သ့ၣ်ညါတၢ်မ့ၢ်တၢ်တီအဃိ, အကလုၢ်ကထါ လံာ်စီဆှံပူၤန့ၣ် ပာ်ဖျါန့ၣ်ပှၤလၢ တၢ်မၤအသးဒီး ပှၤသံတဖၣ်န့ၣ်လီၤ. တၢ်သိၣ်လိလၢ ပနၢ်ပၢၢ်ဘၣ်အီၤညီန့ၣ် မ့ၢ်ဒ်အံၤလီၤ– ဖဲပှၤတဂၤသံအခါ ပှၤအံၤတအိၣ်ဝဲလၢၤဘၣ်. တၢ်သံန့ၣ်ထီဒါလိာ်အသးဒီး တၢ်မူလီၤ. ပှၤလၢအသံန့ၣ် ထံၣ်တၢ်, နၢ်ဟူတၢ်, ဆိကမိၣ်တၢ် တသ့လၢၤဘၣ်. ပနီၢ်ကစၢ်လၢအသံအပူၤန့ၣ် ကယဲၢ်တၢ်အကူးအခီမနုၤမး တအိၣ်မူတ့ၢ်လၢၤဘၣ်. ပဝဲသ့ၣ်တဖၣ်န့ၣ် ပတအိၣ်ဒီး သးစိလ် မ့တမ့ၢ် သးစပံရံး လၢအသံတသ့ဘၣ်. *
မ့ၣ်အူလၣ် လဲၤတုၤဖဲလဲၣ်
၆ ၡလိၤမိၤ ပာ်ဖျါဝဲလၢ ပှၤလၢအမူဒံးန့ၣ် သ့ၣ်ညါဝဲလၢ အကသံလီၤ, ဝံၤဒီးကွဲးတ့ၢ်ဝဲလၢ “မ့မ့ၢ်ပှၤသံန့ၣ် တသ့ၣ်ညါဘၣ်တၢ် နီတမံၤဘၣ်.” တၢ်န့ၣ်ဝံၤအလီၢ်ခံ အဝဲတဲနၢ်ပၢၢ်ကဒီးဝဲ တၢ်မ့ၢ်တၢ်တီ အခီၣ်ထံးလၢအမ့ၢ် ပှၤလၢအသံန့ၣ် တၢ်အဲၣ်, တၢ်သးဟ့တအိၣ်လၢၤ, “တၢ်မၤမ့ၢ်ဂ့ၤ, တၢ်ကူၣ်မ့ၢ်ဂ့ၤ, တၢ်သ့ၣ်ညါမ့ၢ်ဂ့ၤ, တၢ်ကူၣ်သ့မ့ၢ်ဂ့ၤ, တအိၣ်ဘၣ်လၢ ပျုၤပူၤဘၣ်” လီၤ. (စံၣ်တဲၤတဲလီၤ ၉:၅, ၆, ၁၀) ဒ်န့ၣ်အသိးလီၤ, စံးထီၣ်ပတြၢၤ ၁၄၆:၄ န့ၣ်ပာ်ဖျါဝဲလၢ ဖဲပှၤတဂၤသံအခါ “အတၢ်ကူၣ်တၢ်ဖး ဟးဂုာ်ဟးဂီၤ” ကွံာ်လီၤ. ပဝဲသ့ၣ်တဖၣ် ပသံသ့ဒီး ပနီၢ်ခိနီၢ်ကစၢ် သံဝံၤအလီၢ်ခံ တၢ်လၢအမူဒံးန့ၣ် တအိၣ်လၢၤဘၣ်. ပသးသမူလၢ ပမုာ်လၤအံၤန့ၣ် လီၤဂာ်ဒ် ပနဲတၢၣ်အမ့ၣ်အူန့ၣ်လီၤ. ဖဲပမၤပံာ်ကွံာ် မ့ၣ်အူအခါ မ့ၣ်အူအံၤ တလဲၤတုၤလၢ တၢ်လီၢ်ဖဲလဲၣ်မးဘၣ်. တၢ်အံၤတအိၣ်လၢၤဘၣ်.
ယ့ၣ်ၡူးအတၢ်ကတိၤလၢ ဘၣ်ဃးဒီးတၢ်သံ
၇. ယ့ၣ်ၡူးတဲနၢ်ပၢၢ်ပှၤလၢ တၢ်သံန့ၣ်လီၤဂာ်ဒီး တၢ်မနုၤလဲၣ်.
၇ ယ့ၣ်ၡူးစံးဝဲ ဘၣ်ဃးဒီးတၢ်အိၣ်အသးလၢ ပှၤသံတဖၣ်အဂ့ၢ်န့ၣ်လီၤ. ကစၢ်စံးတၢ်အံၤဖဲ အတံၤသကိး လါစရူးသံအဆၢကတီၢ်န့ၣ်လီၤ. ဖဲန့ၣ်အဆၢကတီၢ်န့ၣ် ယ့ၣ်ၡူးစံးဘၣ်အပျဲၢ်အဘီၣ်တဖၣ်လၢ “ပတံၤသကိး လါစရူးတဂၤ မံဘၣ်အသးလံ” လီၤ. အပျဲၢ်အဘီၣ်တဖၣ် ဆိကမိၣ်ဝဲလၢ ယ့ၣ်ၡူးစံးဝဲလၢ လါစရူးအိၣ်ဘှံးအိၣ်သါလၢ တၢ်မံဒီး ကက့ၤအိၣ်ဆူၣ်ထီၣ်လၢ တၢ်ဆူးတၢ်ဆါန့ၣ်လီၤ. အဝဲသ့ၣ်အတၢ်ဆိကမိၣ် ကမၣ်လီၤ. လၢတၢ်န့ၣ်အဃိ, ယ့ၣ်ၡူးဘၣ်တဲနၢ်ပၢၢ်အဝဲသ့ၣ်လၢ “လါစရူးသံလံ” န့ၣ်လီၤ. (ယိၤဟၣ် ၁၁:၁၁-၁၄, ခစ) ပာ်သူၣ်ပာ်သးလၢ ယ့ၣ်ၡူး ထိၣ်သတြီၤဝဲ တၢ်သံဒီး တၢ်အိၣ်ဘှံးလၢတၢ်မံန့ၣ်တက့ၢ်. လါစရူး တလဲၤတုၤဆူမူခိၣ်, ဒီတလဲၤတုၤဆူ လရာ်ဘၣ်. တထံၣ်လိာ်ဘၣ်အသးဒီး မူခိၣ်ကလူးတဖၣ်, မ့တမ့ၢ် ဖံဖုတဖၣ်ဘၣ်. လါစရူးန့ၣ် တဟဲက့ၤလိၣ်ထီၣ်ဒ် ပှၤအဂၤတဂၤအသိးစ့ၢ်ကီးဘၣ်. မ့ၢ်ဒၣ်အဝဲအိၣ်ဘှံးလၢ တၢ်သံန့ၣ်လီၤ, လီၤဂာ်ဒ် မံလၢတၢ်မံယိာ်န့ၣ်လီၤ. လံာ်စီဆှံအဆၢအဂၤတဖၣ်စ့ၢ်ကီး ထိၣ်သတြီၤဝဲ တၢ်သံဒီးတၢ်မံလီၤ. အဒိ, ဖဲအပျဲၢ်အဘီၣ်တဂၤလၢအမ့ၢ် စတ့းဖၣ် ဘၣ်တၢ်ကွံာ်သံအီၤလၢလၢၢ်အခါ လံာ်စီဆှံစံးဝဲလၢ အဝဲ “မံသပ့ၤ” ဝဲဒၣ်န့ၣ်လီၤ. (မၤတၢ် ၇:၆၀) ဒ်န့ၣ်အသိးလီၤ, တၢ်မၢဖိပီလူး ကွဲးတ့ၢ်ဝဲပှၤ “မံသပ့ၤ” လၢတၢ်သံအပူၤ တနီၤအဂ့ၢ်လီၤ.—၁ ကရံၣ်သူး ၁၅:၆.
ယဟိဝၤတ့လီၤ ပှၤကညီဒ်သိး ကအိၣ်မူလၢ ဟီၣ်ခိၣ်ချၢလီၤထူလီၤယိာ်
၈. ကစၢ်ယွၤတတိာ်ပာ်ဝဲလၢ ပှၤကညီတဖၣ်ကဘၣ်သံန့ၣ် ပသ့ၣ်ညါဘၣ်သ့ဒ်လဲၣ်.
၈ ကစၢ်ယွၤ အတၢ်တိာ်ပာ်အခီၣ်ထံးန့ၣ် မ့ၢ်ဒ်သိးပှၤကညီတဖၣ် ကသံအဂီၢ်ဧါ. တမ့ၢ်လ့ၤတက့ၤဘၣ်! ယဟိဝၤတ့လီၤပှၤကညီ ဒ်သိးကအိၣ်မူဘၣ် လီၤထူလီၤယိာ်လၢ ဟီၣ်ခိၣ်ချၢန့ၣ်လီၤ. ဒ်ပမၤလိဝံၤတ့ၢ်လၢ လံာ်အံၤအခီၣ်ထံးအသိး ကစၢ်ယွၤပာ်လီၤ ပှၤဒီမိၤဝၤ အဆိကတၢၢ်ခံဂၤလၢ ပၤရဒံစူးလၢ အဒုးမုာ်လၤသးခုအီၤ အပူၤန့ၣ်လီၤ. ကစၢ်ဆိၣ်ဂ့ၤအဝဲသ့ၣ်လၢ တၢ်အိၣ်ဆူၣ်အိၣ်ချ့ အလၢအပှဲၤလီၤ. အဝဲသ့ၣ်အဂီၢ် ယဟိဝၤအဲၣ်ဒိး ထဲတၢ်ဂ့ၤန့ၣ်လီၤ. ကယဲၢ်မိၢ်ပၢ်လၢ အပှဲၤဒီးတၢ်အဲၣ်ခဲလၢာ်န့ၣ် ကအဲၣ်ဒိးဝဲလၢအဖိတဖၣ် တူၢ်ဘၣ်တၢ်နးတၢ်ဖှီၣ်လၢ တၢ်သံတၢ်ပှၢ်အဃိဧါ. တအဲၣ်ဒိးဝဲဘၣ်! ယဟိဝၤအဲၣ်အဖိတဖၣ်ဒီး အဲၣ်ဒိးဝဲလၢ အဝဲသ့ၣ် အိၣ်ဒီးတၢ်မုာ်လၤသးခူလၢ အကတၢၢ်တအိၣ်လၢ ဟီၣ်ခိၣ်ချၢန့ၣ်လီၤ. ဘၣ်ဃးဒီးပှၤကညီန့ၣ် လံာ်စီဆှံစံးဝဲဒ်အံၤလီၤ– “[ယဟိဝၤ] ပာ်တၢ်အထူအယိာ်လၢ အသးကံၢ်ပူၤ” လီၤ. (စံၣ်တဲၤတဲလီၤ ၃:၁၁) ကစၢ်ယွၤတ့လီၤ ပှၤဒီးသးလၢအအဲၣ်ဒိးအိၣ်မူ လီၤထူလီၤယိာ်လီၤ. ကစၢ်အိးထီၣ်န့ၣ်ပှၤ ကျဲဒ်သိးပသးအတၢ်အဲၣ်ဒိးအံၤ ကလၢပှဲၤအဂီၢ်န့ၣ်လီၤ.
ဘၣ်မနုၤအဃိ ပှၤကညီဘၣ်သံ
၉. လၢအၤဒၣ်အဂီၢ် ယဟိဝၤ ထုးထီၣ်ဝဲ တၢ်တြီမနုၤလဲၣ်, ဘၣ်မနုၤအဃိ တကီခဲလၢ ကစူၢ်ဝဲ တၢ်ကလုၢ်အံၤလဲၣ်.
၉ မ့မ့ၢ်ဒ်န့ၣ်ဒီး ဘၣ်မနုၤအဃိ ပှၤကညီတဖၣ်ဘၣ်သံလဲၣ်. ပကထံၣ်ဘၣ်တၢ်စံးဆၢအံၤအဂီၢ်, ထဲဒၣ်ပှၤပိာ်ခွါတဂၤဒီး ပိာ်မုၣ်တဂၤ အိၣ်လၢဟီၣ်ခိၣ်ချၢ အဆၢကတီၢ်အခါ တၢ်မနုၤကဲထီၣ်တ့ၢ်အသးလဲၣ်န့ၣ် ပကဘၣ်ဆိကမိၣ်က့ၤလီၤ. လံာ်စီဆှံ ဒုးနၢ်ပၢၢ်ပှၤဒ်အံၤလီၤ– “ကစၢ်ယွၤဒုးမဲထီၣ် ကယဲၢ်သ့ၣ်လၢ ပကွၢ်ဂ့ၤ, ဒီးပအီၣ်ဂ့ၤလၢ ဟီၣ်ခိၣ်ပူၤတထံးလၢ်လၢ်” န့ၣ်လီၤ. (၁ မိၤၡ့ ၂:၉) ဘၣ်ဆၣ် တၢ်တြီအိၣ်ဝဲတခါလီၤ. ယဟိဝၤ စံးဘၣ်အၤဒၣ်ဒ်အံၤလီၤ– “ကယဲၢ်သ့ၣ်လၢတၤသၣ်အလီၢ်ပူၤအံၤ, နအီၣ်ဒီးနအီၣ်ဘၣ်သၢၣ်. မ့မ့ၢ်တၢ်သ့ၣ်ညါတၢ်ဂ့ၤဒီး တၢ်အၢအသ့ၣ်တထံးန့ၣ် အီၣ်အသၣ်တဂ့ၤ. အဂ့ၢ်ဒ်အံၤ, မုၢ်တနံၤလၢ နအီၣ်အီၤန့ၣ် သံဒီးနကသံလီၤ.” (၁ မိၤၡ့ ၂:၁၆, ၁၇) တၢ်ကလုၢ်အံၤ တကီခဲလၢ ကစူၢ်ဝဲအဂီၢ်ဘၣ်. တၢ်ထူၣ်တၢ်ဘိအဂၤတဖၣ် အိၣ်အါမးလၢ အၤဒၣ်ဒီးအံၣ်အု အီၣ်ဝဲသ့န့ၣ်လီၤ. ခဲအံၤအဝဲသ့ၣ် ဒိးန့ၢ်ဘၣ် တၢ်အခွဲးအယာ်လီၤဆီလၢ ကပာ်ဖျါတၢ်စံးဘျုးက့ၤ ကစၢ်လၢအဟ့ၣ်အီၤတၢ်ခဲလၢာ် ဃုာ်ဒီးသးသမူ အလၢအပှဲၤန့ၣ်လီၤ. အဝဲသ့ၣ်အတၢ်ဒိကနၢ်န့ၣ် မ့ၢ်တၢ်ပာ်ဖျါထီၣ် တၢ်ပာ်ကဲပၢ်အိၣ်လၢမူခိၣ် အတၢ်ပၢတၢ်ပြး, ဒီးအဲၣ်ဒိးဝဲ ကစၢ်အတၢ်နဲၣ်လိ လၢအပှဲၤဒီးတၢ်အဲၣ်တၢ်ကွံန့ၣ်လီၤ.
၁၀, ၁၁. (က) ပှၤဒီမိၤဝၤအဆိကတၢၢ်ခံဂၤန့ၣ် တစူၢ်ယွၤအကလုၢ်ဒ်လဲၣ်. (ခ) အၤဒၣ်ဒီးအံၣ်အု အတၢ်တဒိကနၣ်အံၤန့ၣ် ဘၣ်မနုၤအဃိ မ့ၢ်တၢ်ဂ့ၢ်လၢအဒိၣ်ဝဲမုၢ်ဝဲလဲၣ်.
၁၀ လီၤသးအုးမးလၢ, ပှၤဒီမိၤဝၤ အဆိကတၢၢ်ခံဂၤအံၤ ဃုထၢဝဲလၢ တစူၢ်ယဟိဝၤ အကလုၢ်န့ၣ်လီၤ. စၤတၣ်ကတိၤတၢ်ဒီး အံၣ်အုခီဖျိလၢ ဂုၢ်တဘိဒီး သံကွၢ်ဝဲဒ်အံၤလီၤ– “ကယဲၢ်သ့ၣ်အိၣ်လၢ တၤသၣ်အလီၢ်ပူၤ တထံးလၢ်လၢ်န့ၣ် ယွၤမၤလိာ်သု, အီၣ်အီၤတဂ့ၤန့ၣ်, သပှၢ်တၢၢ်ဧါ.” ဒီးအံၣ်အု စံးဆၢအီၤဒ်အံၤလီၤ– “သ့ၣ်အသၣ်လၢ တၤသၣ်အလီၢ်ပူၤန့ၣ်, ပအီၣ်ဘၣ်သၢၣ်. မ့မ့ၢ်သ့ၣ်အိၣ်လၢတၤသၣ်အလီၢ် အသးကံၢ်ပူၤတထံးန့ၣ်, ယွၤစံးဝဲဒၣ်, အီၣ်အီၤတဂ့ၤ, ထိးအီၤတဂ့ၤ, သုကသံဘၣ်ဖုးလီၤ.”—၁ မိၤၡ့ ၃:၁-၃.
၁၁ စၤတၣ် စံးက့ၤအီၤဒ်အံၤလီၤ– “သုတသံဒီးသုတသံဘၣ်ဘၣ်လီၤ. မ့ၢ်ယွၤသ့ၣ်ညါလၢ မုၢ်တနံၤလၢသုအီၣ်အီၤန့ၣ် သုမဲာ်ကအိးထီၣ်အသး, ဒီးသုကလီၤဂာ်ယွၤ, ဒီးကသ့ၣ်ညါတၢ်ဂ့ၤဒီးတၢ်အၢန့ၣ်လီၤ.” (၁ မိၤၡ့ ၃:၄-၅) စၤတၣ်အဲၣ်ဒိးလၢ အံၣ်အုနာ်ဝဲဒ်သိး မ့ၢ်အီၣ်တၤသၣ်လၢ တၢ်တြီပာ်အီၤအံၤန့ၣ် ကဒိးန့ၢ်ဘၣ် တၢ်အဘျုးအဖှိၣ်န့ၣ်လီၤ. အတၢ်ကတိၤန့ၣ်ဖျါလၢ အံၣ်အုနီၤဖး တၢ်ဂ့ၤဒီးတၢ်အၢလၢ အနီၢ်ကစၢ်ဒၣ်ဝဲသ့, ဒီးတၢ်လၢအအဲၣ်ဒိးဝဲန့ၣ် မၤဝဲသ့လီၤ. စၤတၣ်ဆှိးစ့ၢ်ကီးဝဲလၢ ယဟိဝၤ ကတိၤကဘျံးကဘျၣ်တၢ် ဘၣ်ဃးဒီး တၢ်အီၣ်သ့ၣ်သၣ်အံၤ အဘျုးတဖၣ်န့ၣ်လီၤ. အံၣ်အုနာ်ဝဲ စၤတၣ်လီၤ. လၢတၢ်န့ၣ်အဃိ, အံၣ်အုဘ့ဝဲသ့ၣ်သၣ်တနီၤဒီး အီၣ်ဝဲလီၤ. လၢတၢ်န့ၣ်အလီၢ်ခံ ဟ့ၣ်ဝဲအဝၤတနီၤဒီး အဝၤစ့ၢ်ကီးအီၣ်ဝဲဒၣ်လီၤ. အဝဲသ့ၣ် တမ့ၢ်လၢတသ့ၣ်ညါဝဲဒီး မၤဝဲဘၣ်. အဝဲသ့ၣ်,သ့ၣ်ညါဝဲလၢ မ့ၢ်ဒၣ်အမၤတၢ်လၢ ကစၢ်ယွၤစံးလၢ မၤတဂ့ၤန့ၣ်လီၤ. ဃုထၢဝဲလၢအသးဒၣ်ဝဲ ဒ်သိးတဒိကနၣ် တၢ်ကလုၢ်လၢ ယိယိဖိ ဒီးအကြၢးဝဲဘၣ်ဝဲအံၤ ခီဖျိလၢအီၣ်ဝဲသ့ၣ်သၣ်န့ၣ်လီၤ. အဝဲသ့ၣ်တယူးယီၣ်ပာ်ကဲ အပၢ်အိၣ်လၢမူခိၣ်ဒီး အတၢ်ပၢတၢ်ပြးဘၣ်လီၤ. တၢ်တယူးယီၣ်ပးကဲ တၢ်အဲၣ်တၢ်ကွံ တၢ်ဘၣ်တ့ကစၢ်အံၤန့ၣ် တကြၢးပျၢ်အတၢ်ကမၣ်ဘၣ်.
၁၂. အၤဒၣ်ဒီးအံၣ်အု လူၤပိာ်ကျဲလၢ အထီဒါယဟိဝၤအခါ ကစၢ်အသးကမၤသးဒ်လဲၣ်န့ၣ် ပကနၢ်ပၢၢ်အဂီၢ် တၢ်မနုၤမၤစၢၤပှၤသ့လဲၣ်.
၁၂ ပမ့ၢ်ဟ့ၣ်အဒိန့ၣ်– ဖိမုၣ် မ့တမ့ၢ် ဖိခွါလၢ နလုၢ်အီၣ်လုၢ်အီ, အံးထွဲကွၢ်ထွဲအီၤတဂၤန့ၣ် မ့ၢ်တပးကဲနၤ, အတၢ်အဲၣ်မ့ၢ်တအိၣ်လၢ နဖီခိၣ်ဒီး မ့ၢ်တဒိကနၢ် နကလုၢ်န့ၣ် နသးကမၤအသးဒ်လဲၣ်. နသးကဘၣ်ဒိဒိၣ်မးလီၤ. မ့မ့ၢ်ဒ်န့ၣ်ဒီး ဆိကမိၣ်ကွၢ်လၢ အၤဒၣ်ဒီးအံၣ်အုခံဂၤလၢာ် လူၤပိာ်ကျဲလၢ အထီဒါယဟိဝၤအခါ ကစၢ်အသးကဘၣ်ဒိ ဆံးဒိၣ်လဲၣ်န့ၣ်တက့ၢ်.
အၤဒၣ် ဘၣ်တၢ်တ့လီၤအီၤလၢ ဟီၣ်ခိၣ်ကမူၣ်, ဒီးအဝဲက့ၤဆူ ဟီၣ်ခိၣ်ကမူၣ်လီၤ
၁၃. အၤဒၣ်မ့ၢ်သံ ကကဲထီၣ်တၢ်မနုၤလဲၣ်န့ၣ် ယဟိဝၤစံးဝဲဒ်လဲၣ်, တၢ်န့ၣ်အခီပညီအိၣ်ဒ်လဲၣ်.
၁၃ အၤဒၣ်ဒီးအံၣ်အုလၢ တအိၣ်ဒီးတၢ်ဒိကနၣ်အံၤ အလီၢ်တအိၣ်လၢ ယဟိဝၤ ကဘၣ်ဒုးအိၣ်မူအီၤ လီၤထူလီၤယိာ်ဘၣ်. ဒ်ကစၢ်စံးတ့ၢ်ဝဲအသိး အဝဲသ့ၣ်ဘၣ်သံဝဲလီၤ. အၤဒၣ်ဒီး အံၣ်အုတအိၣ်လၢၤဘၣ်. ဒီးအဝဲသ့ၣ် တလဲလိာ်အသးဆူ နီၢ်သးအလီၢ်ဘၣ်. ပသ့ၣ်ညါဘၣ်လၢ အၤဒၣ်အတၢ်ဒိကနၣ် တအိၣ်အဃိ ယဟိဝၤ ထံၣ်လိာ်အသးဒီးအီၤဒီး စံးတ့ၢ်ဝဲ တၢ်ကတိၤတဖၣ်အဃိလီၤ. ကစၢ်ယွၤစံးဝဲဒ်အံၤလီၤ– “နကအီၣ်တၢ်ဒီး နမဲာ်ကပၢၤန့ၣ် တုၤနက့ၤက့ၤဆူ ဟီၣ်ခိၣ်လာ်လီၤ. အဂ့ၢ်ဒ်အံၤ, နမ့ၢ်ဟီၣ်ခိၣ်ကမူၣ်, ဒီးနကက့ၤက့ၤဆူ ဟီၣ်ခိၣ်ကမူၣ်လီၤ.” (၁ မိၤၡ့ ၃:၁၉) ကစၢ်ယွၤတ့လီၤ အၤဒၣ်လၢဟီၣ်ခိၣ်အကမူၣ်လီၤ. (၁ မိၤၡ့ ၂:၇) အၤဒၣ်တချုး ဘၣ်တၢ်တ့လီၤအီၤန့ၣ် တအိၣ်ဝဲဒၣ်ဘၣ်. လၢတၢ်န့ၣ်အဃိ, ဖဲယဟိဝၤစံးဘၣ် အၤဒၣ်လၢ ကဘၣ်က့ၤဆူ ဟီၣ်ခိၣ်ကမူၣ်အခါ ကစၢ်အဲၣ်ဒိးစံးဝဲလၢ အၤဒၣ်ဘၣ်က့ၤကဒါက့ၤလၢ တၢ်တအိၣ်အသးန့ၣ်လီၤ. အၤဒၣ်က့ၤကဲထီၣ် တၢ်လၢအသးတအိၣ်, ဒ်သိးဟီၣ်ခိၣ်ကမူၣ်လၢ တၢ်သူအီၤလၢ တၢ်တ့လီၤအီၤအခါန့ၣ်လီၤ.
၁၄. ဘၣ်မနုၤအဃိ ပဘၣ်သံလဲၣ်.
၁၄ နီၢ်နီၢ်န့ၣ် အၤဒၣ်ဒီးအံၣ်အု အိၣ်မူဝဲသ့တုၤလၢ ဆၢကတီၢ်ခဲအံၤလီၤ. ဘၣ်ဆၣ် အဝဲသ့ၣ်ဃုထၢဝဲလၢ တစူၢ်ယွၤအကလုၢ်ဒီး မၤတၢ်ဒဲးဘးအဃိ ဘၣ်သံဝဲဒၣ်လီၤ. တၢ်ဂ့ၢ်လၢပဘၣ်သံန့ၣ် မ့ၢ်တၢ်အိၣ်အသးလၢ အၤဒၣ်အိၣ်ဒီးအတၢ်ဒဲဘး တကးဘၣ် အဝဲဟ့ၣ်လီၤတၢ်သံဆူ အဖိအလံၤတဖၣ်အအိၣ်န့ၣ်လီၤ. (ရိမ့ၤ ၅:၁၂) တၢ်ဒဲးဘးန့ၣ် လီၤဂာ်ဒ် တၢ်ဆါအၢလၢ အလီၤစဲၤတစိၤဘၣ်တစိၤ လၢကယဲၢ်ပှၤခဲလၢာ် ပူၤဖျဲးဝဲတသ့ဘၣ်န့ၣ်လီၤ. တၢ်ဒဲးဘးအဘုးအလဲလၢ အမ့ၢ်တၢ်သံန့ၣ် မ့ၢ်တၢ်ဆိၣ်ဃီၣ်လီၤ. တၢ်သံန့ၣ်မ့ၢ် ဒုၣ်ဒါလီၤ, တမ့ၢ်တံၤသကိးဘၣ်. (၁ ကရံၣ်သူး ၁၅:၂၆) ပစံးဘျုးယဟိဝၤ သ့ဒိၣ်မးလၢ အဝဲကတဲာ်ကတီၤန့ၣ်ပှၤ တၢ်ပှ့ၤက့ၤဒ်သိး ပကပူၤဖျဲးလၢ ဒုၣ်ဒါလၢအလီၤပျံၤလီၤဖုး အစုပူၤအဂီၢ်န့ၣ်လီၤ.
တၢ်သ့ၣ်ညါပာ် တၢ်မ့ၢ်တၢ်တီလၢ ဘၣ်ဃးဒီးတၢ်သံန့ၣ် အဘျုးအိၣ်
၁၅. တၢ်သ့ၣ်ညါပာ် တၢ်မ့ၢ်တၢ်တီလၢ ဘၣ်ဃးဒီးတၢ်သံန့ၣ် ဘၣ်မနုၤအဃိ ဟ့ၣ်ပှၤတၢ်သူၣ်မံသးမုာ်လဲၣ်.
၁၅ လံာ်စီဆှံ အတၢ်သိၣ်လိလၢ ဘၣ်ဃးဒီး တၢ်အိၣ်အသးဒီးပှၤသံတဖၣ်န့ၣ် ဒုးသူၣ်မံသးမုာ်ပှၤလီၤ. ဒ်ပသ့ၣ်ညါဘၣ်တ့ၢ်လံအသိး ပှၤသံတဖၣ်န့ၣ် တတူၢ်ဘၣ် တၢ်ဆူးတၢ်ဆါ, ဒီးတၢ်သူၣ်အုးသးအုး မနုၤမးဘၣ်. အဝဲသ့ၣ် မၤကီမၤခဲပှၤတသ့အဃိ အလီၢ်တအိၣ်လၢ ပကဘၣ်ပျံၤအီၤဘၣ်. အဝဲသ့ၣ် တလိၣ်ဘၣ်ပတၢ်မၤစၢၤဘၣ်, အဝဲသ့ၣ်စ့ၢ်ကီး မၤစၢၤပှၤတသ့ဘၣ်. ပကတိၤတၢ်ဒီးအဝဲသ့ၣ်တသ့, ဒီးအဝဲသ့ၣ်စ့ၢ်ကီး ကတိၤတၢ်ဒီးပှၤတသ့ဘၣ်. တၢ်ဘူၣ်တၢ်ဘါ ခိၣ်နၢ်အါဂၤန့ၣ် စံးဝဲတၢ်တမ့ၢ်တတီလၢ အဝဲသ့ၣ်မၤစၢၤ ပှၤသံတ့ၢ်တဖၣ်သ့ဒီး ပှၤလၢအနာ် ခိၣ်နၢ်တဖၣ်အံၤန့ၣ် ဘၣ်ဟ့ၣ်အဝဲသ့ၣ် ကျိၣ်ဧိၤစ့ဧိၤလီၤ. ဘၣ်ဆၣ် တၢ်သ့ၣ်ညါပာ် တၢ်မ့ၢ်တၢ်တီန့ၣ် တြီသဒၢပှၤလၢ ပှၤသိၣ်လိတၢ် ကဘျံးကဘျၣ်တဖၣ်အံၤ အတၢ်လီန့ၢ်လွဲန့ၢ် န့ၣ်လီၤ.
၁၆. တၢ်ဘူၣ်တၢ်ဘါအါမး အတၢ်သိၣ်တၢ်သီတဖၣ်န့ၣ် မ့ၢ်မတၤအစိကမီၤ လုၢ်ဘၢဃာ်လဲၣ်, မ့ၢ်ဒ်လဲၣ်အသိးလဲၣ်.
၁၆ တၢ်ဘူၣ်တၢ်ဘါ အါတက့ၢ်န့ၣ် လီၤပလိာ်အသးဒီး လံာ်စီဆှံ အတၢ်သိၣ်လိဧါ. အါတက့ၢ်န့ၣ် တလီၤပလိာ်အသးဘၣ်. လၢမနုၤအဃိလဲၣ်. မ့ၢ်လၢ စၤတၣ်အစိကမီၤလုၢ်ဘၢ အဝဲသ့ၣ် အတၢ်သိၣ်လိအဃိလီၤ. စၤတၣ်သူဝဲ တၢ်ဘူၣ်တၢ်ဘါအကမၣ် ဒ်သိးပှၤကညီတဖၣ် ကနာ်လၢ အဝဲသ့ၣ်အနီၢ်ခိသံဝံၤအလီၢ်ခံ သးန့ၣ်မူဒံးဝဲလၢ နီၢ်သးအလီၢ်န့ၣ်လီၤ. တၢ်နာ်အံၤန့ၣ် မ့ၢ်တၢ်လီတၢ်ဝ့ၤတခါလၢ စၤတၣ်သူဝဲဃါဃုာ်ဒီး တၢ်လီတၢ်ဝ့ၤအဂၤတဖၣ်, ဒ်သိးဒီး ပှၤကညီတဖၣ် ကဃာ်ကွံာ်အသးလၢ ယဟိဝၤ ကစၢ်ယွၤအအိၣ်န့ၣ်လီၤ. မ့ၢ်ဒ်လဲၣ်အသိးလဲၣ်.
၁၇. တၢ်သိၣ်လိလၢ တၢ်မၤနးမၤဖှီၣ်လီၤစိၤန့ၣ် ဘၣ်မနုၤအဃိ မၤလီၤညွံးလီၤဘၢ ယဟိဝၤအလၤကပီၤလဲၣ်.
၁၇ ဒ်ပသ့ၣ်ညါဘၣ်လၢ ညါအသိး တၢ်ဘူၣ်တၢ်ဘါတနီၤ သိၣ်လိဝဲလၢ ပှၤတဂၤမ့ၢ်အိၣ်မူလၢ တၢ်အိၣ်မူအတဂ့ၤန့ၣ် မ့ၢ်သံဒီးကတုၤဆူ လရာ်လၢ တၢ်မၤနးမၤဖှီၣ် လီၤစိၤအပူၤလီၤ. တၢ်သိၣ်လိအံၤန့ၣ် မၤလီၤညွံးလီၤဘၢ ယွၤအလၤကပီၤလီၤ. ယဟိဝၤမ့ၢ် တၢ်အဲၣ်တၢ်ကွံကစၢ်အဃိ တဒုးတူၢ်ဘၣ်ပှၤကညီတဖၣ်လၢ တၢ်နးတၢ်ဖှီၣ်ဒ်အံၤ နီတဘျီဘၣ်. (၁ ယိၤဟၣ် ၄:၈) ပှၤတဂၤ မ့ၢ်ဆှိဖိသၣ်လၢ တဒိကနၢ်တၢ်တဂၤ အစုလၢမ့ၣ်အူန့ၣ် ပှၤအံၤနကဆိကမိၣ်အီၤဒ်လဲၣ်. ပှၤဒ်သိးအံၤ တဂၤန့ၣ် နကပးကဲအီၤစ့ၢ်ကီးဧါ. နကအဲၣ်ဒိးသ့ၣ်ညါဒီး ပှၤဒ်အံၤစ့ၢ်ကီးဧါ. တအဲၣ်ဒိးလ့ၤတက့ၤဘၣ်. နကပာ်ပှၤအံၤလၢ ပှၤသူၣ်အၢသးသီဒိၣ်မး တဂၤန့ၣ်လီၤ. ဘၣ်ဆၣ်, စၤတၣ်အဲၣ်ဒိး ပနာ်လၢ ယဟိဝၤ မၤနးမၤဖှီၣ် ပှၤကညီလၢမ့ၣ်အူ လီၤစိၤ—နံၣ်အကကွဲၢ်လၢ ပဂံၢ်တဘၣ်ဘၣ်န့ၣ်လီၤ.
၁၈. တၢ်ဘူၣ်ထီၣ်ဘါထီၣ်ပှၤသံတဖၣ်န့ၣ် ဒိးသန့ၤထီၣ်အသးလၢ တၢ်ဘူၣ်တၢ်ဘါအတၢ်လီတၢ်ဝ့ၤ မနုၤအဖီခိၣ်လဲၣ်.
၁၈ စၤတၣ်သူဝဲ တၢ်ဘူၣ်တၢ်ဘါတနီၤ ဒ်သိးကသိၣ်လိဝဲလၢ ပှၤလၢအမူတဖၣ်န့ၣ် ကဘၣ်ပာ်ကဲ, ဒီးမၤလၤကပီၤ ပှၤလၢအသံတ့ၢ်လၢ အကဲထီၣ်ပှၤနီၢ်သးဖိတဖၣ်န့ၣ်လီၤ. တၢ်သိၣ်လိအံၤအဲၣ်ဒိးစံးဝဲလၢ ပှၤသံတ့ၢ်တဖၣ် အနီၢ်သးန့ၣ် ကဲထီၣ် တံၤသကိးလၢအစိကမီၤဒိၣ် မ့တမ့ၢ် ဒုၣ်ဒါလၢအလီၤပျံၤဒိၣ်မး သ့န့ၣ်လီၤ. ပှၤအါဂၤနာ်ဝဲ တၢ်သိၣ်လိ ကဘျံးကဘျၣ်အံၤလီၤ. မ့ၢ်လၢအဝဲသ့ၣ်ပျံၤ ပှၤသံတဖၣ်အဃိ မၤလၤကပီၤအဝဲသ့ၣ်ဒီး ဘူၣ်ထီၣ်ဘါထီၣ်ဝဲန့ၣ်လီၤ. တၢ်အံၤထီဒါလိာ်သးလၢ, လံာ်စီဆှံ အတၢ်သိၣ်လိလၢအမ့ၢ် ပှၤသံတဖၣ် မ့ၢ်ဒၣ်မံသပ့ၤဝဲ, ဒီးပကြၢးဘူၣ်ထီၣ်ဘါထီၣ်ဒၣ် ယဟိဝၤ, ယွၤအမ့ၢ်အတီ, တၢ်ဘၣ်တ့ဒီး တၢ်လုၢ်အီၣ်ကစၢ် ထဲတဂၤဧိၤန့ၣ်လီၤ.—လီၢ်ဖျါ ၄:၁၁.
၁၉. တၢ်သ့ၣ်ညါပာ် တၢ်မ့ၢ်တၢ်တီလၢ ဘၣ်ဃးဒီးတၢ်သံန့ၣ် မၤစၢၤပှၤဒ်သိး ပကနၢ်ပၢၢ်လံာ်စီဆှံ အတၢ်သိၣ်လိအဂၤ မနုၤတဖၣ်လဲၣ်.
၁၉ တၢ်သ့ၣ်ညါပာ် တၢ်မ့ၢ်တၢ်တီလၢ ဘၣ်ဃးဒီးပှၤသံန့ၣ် တြီသဒၢပှၤဒ်သိး ပသုတဘၣ် တၢ်ကွဲန့ၢ်လွဲန့ၣ်ပှၤလၢ တၢ်ဘူၣ်တၢ်ဘါအတၢ်လီတၢ်ဝ့ၤ တဂ့ၤန့ၣ်လီၤ. ဒီးမၤစၢၤပှၤဒ်သိး ပကနၢ်ပၢၢ် လံာ်စီဆှံအတၢ်သိၣ်လိ အဂုၤအဂၤတဖၣ်စ့ၢ်ကီးလီၤ. အဒိ, ဖဲနသ့ၣ်ညါဘၣ်လၢ တၢ်သံန့ၣ် တမ့ၢ်တၢ်လဲလိာ်ဆူ နီၢ်သးအလီၢ်ဘၣ်အခါ, တၢ်စံးပာ်လၢအမ့ၢ် တၢ်မူအထူအယိာ်လၢ ဟီၣ်ခိၣ်ပၤရဒံစူးန့ၣ် အခီပညီကအိၣ် နီၢ်နီၢ်လၢ နဂီၢ်လီၤ.
၂၀. တၢ်နီၤဖးလၢခံန့ၣ် ပကကတိၤသကိး တၢ်သံကွၢ်မနုၤလဲၣ်.
၂၀ လၢပျၢၤ ပှၤအတီအလိၤယိၤဘး သံကွၢ်ဝဲဒၣ်လၢ “ပှၤကညီမ့ၢ်သံဒီး, ကမူထီၣ်ဒံးစ့ၢ်ကီးဧါ” လီၤ. (ယိၤဘး ၁၄:၁၄) ပှၤမံလၢတၢ်သံလၢ အသးသမူတအိၣ်တဂၤန့ၣ် သမူထီၣ်က့ၤကသ့ဧါ. လံာ်စီဆှံအတၢ်သိၣ်လိလၢ ဘၣ်ဃးဒီးတၢ်အံၤ ဒုးသူၣ်မံသးမုာ်ပှၤဒိၣ်မးအဂ့ၢ်န့ၣ်, ပကပာ်ဖျါထီၣ်ဖဲ တၢ်နီၤဖးလၢခံန့ၣ်လီၤ.
^ လံာ်အဆၢ. 5 ဘၣ်ဃးဒီး တၢ်ကတိၤပာ်ဖျါထီၣ်လၢ “သးစိလ်” ဒီး “သးစပံရံး” အဂီၢ်, ကွၢ်တၢ်ပိာ်ထွဲ, လံာ်ကဘျံးပၤ ၂၀၈-၁၁ န့ၣ်တက့ၢ်.
