1-3. Thihna chungchângah mite’n eng zawhnate nge an zawh ṭhin a, sakhaw hrang hrangte chuan eng ang chhânna nge an pêk?

HENG zawhnate hi mite’n kum sang tam tak chhûng an ngaihtuah tawh a, zawhna pawimawh tak a ni. Eng mi pawh niin, khawi hmunah pawh awm mah ila, a chhânna chu kan ngaihven ṭheuh a ni.

² Bung 5-naah khân Isua Krista tlanna inthâwinain chatuana nunna kawng min hawnsak dân kan sawiho tawh a. Tin, Bible-in: “Thihna a awm leh thei tawh lo vang,” tih a hrilh lâwkzia pawh kan zir tawh bawk. (Thu Puan 21:4) Mahse, chu mi hun a lo thlen hma chuan thihna chu kan la tawng ṭheuh a ni. Lal fing Solomona chuan: “Mi nungdamte chuan an la thi dâwn tih an hre si a,” tiin a sawi. (Thuhriltu 9:5) A theih thlenga dam chu kan duh a, chutichung pawhin, kan thih huna kan chunga thilthleng tûr chu kan ngaihtuah tho tho a ni.

³ Kan hmangaih takte an thihin, kan sûn êm êm a. Heti hian kan inzâwt mai thei a ni: “Khawiah nge an kal? Na an tuar em? Keini ho hi min lo thlîr reng em? Anni chu kan ṭanpui thei em? Kan hmu leh ngai ang em?,” tiin. Hêng zawhnate hi khawvêla sakhuate chuan chi hrang hrangin an chhâng a ni. Ṭhenkhat chuan: ‘Mi fel i nih chuan vân ramah i kal ang a, mi sual i nih erawh chuan hremhmun meidîla paih i ni ang,’ tiin an zirtîr a. Ṭhenkhat dangte chuan mi an thih hian thlahtute nêna chêng ho tûrin thlarau khawvêl an pan ṭhîn niin an  zirtîr a. Sakhaw dang lehte erawh chuan mi an thih hian rorêlsaka awm tûrin lei hnuai khawvêlah an kal a, chutah taksa dang puin, an piang nawn leh ṭhîn niin an zirtîr bawk.

4. Sakhaw tam tak hian thihna chungchângah eng ngaih dân nge an inṭawm?

⁴ Chûng sakhaw zirtîrna chi hrang hrangte chuan ngaih dân thuhmun pakhat an inṭâwm vek a ni—mihringin taksa thih hnu pawha thi ve lova dam khaw chhuak thei thil engemaw a nei, tih ngaih dân chu. Hmasâng aṭang tawhin sakhua zawng zawng deuhthaw hian thil hmuh theihna, hriat theihna, leh ngaihtuah theihna neiin engtin emaw tak hian kan nung reng tih a zirtîr tlat a ni. Mahse, chutiang chu a ni thei dâwn em ni? Thil kan hriat theih a, kan hmuh theih bawk a, kan ngaihtuah theih bawk nachhan hi kan thluakin hna a thawh vâng a ni a. Kan thih hian kan thluak hian hna a thawk tawh lo nghâl a ni. Kan thluak tel lo chuan, thil engmah kan hre reng thei tawh lo va, khawiha hriat theihna te, benga hriat theihna te, a nih loh leh hmuh theihna te pawh chu kan nei tawh lo a ni. Chûng hriat theihnate chu kan thluak a thih rual rualin a awm tawh lo nghâl mai a ni.

5, 6. Bible-in mitthite dinhmun chungchângah eng nge min zirtîr?

⁵ Kan thih huna kan chunga thilthleng chu thluak Siamtu Jehova tân chuan thilmak hriatthiam theih loh a ni lo. Ani chuan thu dik tak a hria a; a Thu, Bible-ah mitthite dinhmun chu min hrilh a ni. Bible zirtîrna fiah tak chu hei hi a ni: Mi a thih hian, ani chu a awm tawh lo, tih hi. Thihna chu nunna letling chiah a ni a. Mitthite chuan engmah an hmu thei lo va, an hre thei lo bawk a, an ngaihtuah thei bawk hek lo. Mihringin taksa thih hnu pawha thi ve lova dam khawchhuak thei thil kan nei lo rêng rêng a. Thlarau thi thei lo kan nei lo. *

⁶ Solomona chuan mi nungdamte chuan an la thi dâwn tih an hriatzia a sawi hnuah: “Mitthi erawh chuan engmah an hre  lo,” tiin a ziak zawm a. Chu thudik chu ṭanchhanin, mitthite chuan hmangaihna leh huatna an nei tawh lo va, “[thlânah] chuan thiltih tûr emaw, remruat tûr emaw, hriatna emaw, finna emaw a awm si lo,” tiin a sawi belh a ni. (Thuhriltu 9:5, 6, 10) Chutiang bawkin, Sâm 146:4 pawhin mi a thih hian “a ngaihtuahnate chu a bo nghâl” tih a sawi bawk. Thi thei lo kan ni lo va, kan taksa a thih hian thi ve lova dam khawchhuak thei thil engmah kan nei lo. Kan nun hi mom-bati alh lai ang a ni a. Chhêm hlum a nih chuan, a alh chu khawiah mah a kal lo. A awm tawh lo ringawt mai a ni.

7. Isua’n thihna chu eng nên nge a khaikhin?

⁷ Isua chuan mitthite dinhmun a sawi a. Chu chu a mi hriat chian êm êm leh thi ta, Lazara chungchângah a ni. Isua chuan a zirtîrte hnênah: “Kan ṭhian Lazara chu a muhîl ta a,” a ti a. Zirtîrte chuan Lazara chu a dam lohna ata dam chhuak tûra mu hahchâwl emaw an ti a. Mahse, chu chu Isua sawi tum a ni lo. Ani chuan: “Lazara a thi a ni,” tiin a hrilhfiah ta a ni. (Johana 11:11-14) Hetah hian Isua chuan thihna chu muthilh nên a khaikhin tih chhinchhiah ang che. Lazara chu vânah emaw, meidîlah emaw a awm lo. Vântirhkohte emaw, thlahtu thi tate emaw hnênah a awm lo va. Tin, Lazara chu mihring dang daih angin a piang nawn hek lo. Mumang nei lo khawpa tui taka muhîl ang maiin, thihnaah chuan a hahchâwl mai a ni. Bible châng dangte pawhin thihna chu muthilhna nên a khaikhin bawk a. Entîr nân, zirtîr Stephana lunga den hlum a nih pawh khân, Bible chuan “a muhîl ta a” tiin a sawi a ni. (Tirhkohte 7:60) Chutiang bawk chuan, tirhkoh Paula chuan a dam laia mi  ṭhenkhatte chu thihnaah “an muhîl” tawh tiin a ziak bawk.—1 Korinth 15:6.

8. Mihringte an thih hi Pathian thiltum a ni lo tih engtin nge kan hriat?

⁸ Mite an thi hi atîra Pathian thiltum a ni em? Ni teh suh e! Jehova chuan mihringte chu chatuana nung tûrin a siam a. Kan zir tawh ang khân, Pathian chuan nupa tuak hmasa berte chu paradis nuam takah a dah a. Hrisêlna ṭha famkim a pe a ni. Jehova chuan an tân thil ṭha chauh a duhsak a. Hmangaihna  nei nu leh pa tupawhin an fate an tar a, an thih chu an duh ang em? Duh lo vang! Jehova chuan a fate a hmangaih a, he leiah hian chatuana hlimna an neih chu a duh a. Mihringte chungchângah Bible chuan: “[Jehova chuan] mihring rilruah chuan chatuan a dah,” a ti. (Thuhriltu 3:11) Pathian chuan chatuana nun duhna neiin min siam a. Chu mi tihpuitlin dân tûr kawng chu a ruahman bawk a ni.

9. Eng khapna nge Jehova’n Adama hnênah a pêk a, engvângin nge chu thupêk chu zawm harsa tak a nih loh?

⁹ A nih leh, engvângin nge mihringte an thih? Chu mi chhânna hre tûr chuan, he leia mipa leh hmeichhe hmasa berte chauh an awm laia thilthleng kha kan ngaihtuah tûr a ni. Bible chuan: “Lei aṭangin LALPA Pathianin thing mit la tak leh ei mi tinrêng a ṭotîr a,” tiin a sawi. (Genesis 2:9) Mahse, thil khap pakhat a awm a. Jehova chuan Adama hnênah: “Huana thing tinrêng rahte hi i duh duhin i ei thei e; a chhia leh a ṭha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni,” tiin a hrilh a ni. (Genesis 2:16, 17) Chu huanah chuan thei rah dang ei tur tam tak a awm avângin, chu thupêk chu zawm harsa a ni lo. Mahse, chu chuan an nun ṭha famkim pawh tiama engkim Petu hnêna an lâwmzia lantîr theihna hun remchâng ṭha bîk tak a pe a. An thuawihna chuan an Pa vana mi thuneihna an zahzia leh a kaihhruai nih an duhzia a lantîr ngei ang.

10, 11. (a) Engtin nge nupa tuak hmasa berte’n Pathian thu an âwih loh? (b) Engvângin nge Adama leh Evi-te thuâwih lohna chu thil pawi tak a nih?

¹⁰ Lungchhiatthlâk takin, nupa tuak hmasa berte chuan Jehova thuawih loh an thlang ta zâwk a ni. Setana chuan rûl hmangin Evi hnênah: “Pathianin, ‘Huana thing rah rêng rêng hi in ei tur a ni lo,’ a ti elo maw?” tiin a zâwt a. Evi chuan: “Ti lo ve, huana thing rahte hi kan ei thei asin: huan lai taka thing awm rah erawh chu Pathianin, ‘In ei tur a ni lo, tawh pawh in tawk tûr a ni lo, chutilochuan in thi ang,’ a ti a ni,” tiin a chhâng a ni.—Genesis 3:1-3.

 ¹¹ Setana chuan: “Thi teh suh e: in ei nî apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,” a ti a. (Genesis 3:4, 5) Setana chuan thei rah ei phal loh ei chu a hlâwkpui dâwn tih Evi rintîr a duh a ni. Setana sawi dân chuan, Evi chuan atâna ṭha leh ṭha lo chungchângah thutlûkna a siam thei a, a duh duh a ti thei a ni. Tin, ei phal loh thei rah ei sawhkhâwk chungchângah Jehova chu dâwt sawi angah a puh bawk a ni. Evi chuan Setana thusawi chu a âwih a. Tichuan, thei rah ṭhenkhat chu lovin a ei a. A pasal pawh a pe ve a, ani pawhin a ei ve ta a ni. Chu chu hriat loh vânga ti an ni lo. Pathianin ti lo tûra a hrilh ngei mai chu an ti a ni tih an hre reng a ni. Thei rah chu eiin, thupêk khirh lo tak leh pêk âwm  tak chu an bawhchhe lui ta a. An Pa vâna mi leh a thuneihna an ngaihnêpzia an lantîr a ni. Chutiang taka anmahni Siamtu hmangaihna ngah tak an zah lo chu thiam chantîr theih an ni lo rêng rêng!

12. Adama leh Evi’n Jehova dodâlna kawng an zawh ṭan laia Pathian rilru nat dân tûr hre chiang tûrin engin nge min ṭanpui ang?

¹² Entîr nân: Duat taka i lo chawilen i fanu emaw, fapa emaw chuan nangmah zahna leh hmangaihna nei miah lovin i thu âwih lo ta se, engtin nge i ngaih ang? Chu chuan i rilru a tina ngawt ang. Chuti chu, Adama leh Evi’n Jehova dodâlna kawng an zawh ṭan laia Pathian rilru nat dân tûr chu han ngaihtuah teh.

13. Jehova’n Adama a thih huna thil awm dân tûr eng nge a sawi a, chu chu eng a tihna nge ni?

¹³ Jehova chuan thuâwih lo Adama leh Evi chu kumkhuaa nuntîr zêl chhan tûr a nei lo. An hnêna a lo sawi tawh ang ngeiin an thi ta a; an awm ta lo a ni. Anni chu thlarau khawvêl khawi emaw laiah an insawn lo. Adama’n thu a awih loh hnua a hnêna Jehova thusawi: “Lei aṭanga lâk chhuah i ni si a: vaivut i ni a, vaivutah i kîr leh tûr a ni,” tih aṭangin chu chu kan hre thei a ni. (Genesis 3:19) Pathian chuan Adama chu leia vaivut aṭangin a siam a. (Genesis 2:7) Chu mi hma chuan, Adama chu a la awm lo. Chuvângin, Jehova’n Adama hnêna: “Vaivutah i kîr leh tûr a ni,” tia a sawi khân, ani chu khawiah mah a awm tawh dâwn lo a tihna a ni.

14. Engvângin nge kan thih?

¹⁴ Adama leh Evi chu vawiin nî thlenga nungdama awm thei tûr an ni a; mahse, Pathian thu âwih lo va, thil sual an tih avângin an thi ta a. Kan thih chhan erawh chu, Adama’n sualna leh thihna chu a thlah zawng zawngte hnêna a hlan chhâwn vâng a ni. (Rom 5:12) Chu sual chu tuma pumpelh theih loh thlahtute hnên aṭanga kan kai chhâwn natna râpthlâk tak ang a ni a. A rah chhuah thihna chu ânchhia a ni. Thihna chu ṭhian a ni lo va, hmêlma a ni zâwk. (1 Korinth 15:26) Jehova’n he hmêlma râpthlâk tak ata min chhan chhuak tûra tlanna min pêk avâng hian kan va lâwm tak êm!

15. Engvângin nge thihna chungchânga thudik hriat chu a thlamuanthlâk?

¹⁵ Mitthite dinhmun chungchânga Bible zirtîrna hriat chu a thlamuanthlâk hle. Kan hriat tawh angin, mitthite chuan nâ an nei tawh lo va, lungngaihna lah an nei tawh hek lo. Mi an tihnat theih loh avângin, mitthite kan hlauh pawh a ngai lo bawk. Kan ṭanpuina an mamawh lo va, min ṭanpui thei hek lo. Min be thei lo va, kan be thei bawk hek lo. Sakhaw hruaitu tam tak chuan dik lo takin mitthite ṭanpui theiah an inchhâl a, anmahni ringtute chuan sum an pe bawk ṭhîn. Mahse, thihna chungchânga thudik hriatna chuan, chutiang dâwtthu zirtîrtute buma awm lo tûrin min vênghim a ni.

16. Sakhaw tam takte zirtîrna chu tuin nge thunun a, eng kawngin nge?

¹⁶ I sakhaw vawn chuan mitthite chungchânga Bible zirtîrna chu a pawm em? Sakhaw tam tak chuan a pawm lo. Engvângin nge? An zirtîrna chu Setana’n a thunun tlat vâng a ni. Sakhaw tam tak chuan mite chu an thi tak tak lo va, an taksa a thih hnuah thlarau khawvêla nung chhunzawm zêl angin a zirtîr a. Setana chuan Pathian Jehova hnên ata mite hruai bo nân he dâwt thu leh dâwt thu dangte hi a hmang a ni. Engtin nge a hman?

17. Engvângin nge chatuana innghaisakna zirtîrna chuan Jehova a chawimawi loh?

¹⁷ A hmâa kan hriat tawh angin, sakhaw ṭhenkhat chuan mi chu a dam chhûnga a sual chuan, a thih hnuah chatuana nghaisaka awm tûrin hremhmun meidîlah a kal ang tih a zirtîr a. He zirtîrna hian Pathian a chawimawi lo. Jehova chu hmangaihna Pathian a ni a, hetiang hian mite hrehawm takin a siam ngai lo vang. (1 Johana 4:8) Naupang thuâwih lo kut vuan beta meia halsaktu chu engtin nge i ngaih ang? Chutiang mi chu i zah ang em? Chutiang mi hmêlhriat chu i duh ang em? I duh hauh lo vang! Chutiang mi chu mi nunrâwng takah i ngai ngei ang. Mahse, Jehova’n mite chu chatuanin meiah a nghaisa tih kan rin Setana chuan a duh a ni.

18. Mitthi biakna hian sakhaw lama eng dâwt thu nge a ṭanchhan?

 ¹⁸ Setana chuan mi an thih hian a la damte’n an zah leh an chawimawi ngei tûr thlarauva chang anga zirtîr tûrin sakhaw ṭhenkhat chu a hmang bawk a. Chu zirtîrnain a sawi dân chuan, mitthite thlarau chu ṭhian thiltithei tak emaw, hmêlma ṭihbaiawm tak emaw an ni thei a ni. Mi tam tak chuan chu dâwt thu chu an ring a. Mitthite chu an hlauh avângin an chawimawi a, an be hial a ni. Chu mi nêna inkalh takin, Bible chuan mitthite chu an muhîl a, min Siamtu leh thil engkim min Petu, Pathian dik Jehova chauh kan be tûr a ni tih min zirtîr zâwk a ni.—Thu Puan 4:11.

19. Mitthite chungchâng thudik hriatna chuan Bible zirtîrna dang eng nge hre thiam tûra min ṭanpui?

¹⁹ Mitthite chungchânga thudik hriatna chuan sakhaw lama dâwt thu hruai suala awm lo tûrin a vênghim che a. Chu chuan Bible zirtîrna dangte pawh hrethiam tûrin a ṭanpui bawk che a ni. Entîr nân, mi a thihin thlarau khawvêlah a kal lo tih i han hriatthiam hian, he lei paradis-a chatuana nun theihna thutiam chuan i tân awmzia a nei lehzual a ni.

20. Bung 7-naah eng zawhna nge kan ngaihtuah ang?

²⁰ Mi fel Joba chuan hun rei tak liam taah khân, heti hian a lo zâwt tawh a ni: “Mi a thih chuan a nung leh ang em ni?” tiin. (Joba 14:14) Nunna nei lo mitthi tawhte chu nuntîr leh theih a ni dâwn em ni? Bung 7-nain a târ lan angin, he mi chungchânga Bible zirtîrna hi a thlamuanthlâk tak zet a ni.