1-3. ¿Alkyeqe xjel in che ximen xjal tiʼj aj tkyim jun toj kyja, ex alkyeqe tzaqʼwebʼil in tzaj kyqʼoʼn nim okslabʼil kye xjel lu?

ATXIX ojtxe in che ximen xjal kyiʼj qeju xjel (pregunta) lu. Aʼyeqe xjel lu at kyoklen quʼn qkyaqilx in qo kyim.

² Toj xnaqʼtzbʼil ma kyaj o qo xnaqʼtzan tiʼj qa aju chojbʼil, moqa aju xi tqʼon tibʼ Jesucristo, jaqet bʼe tuʼn; tuʼntzun qanqʼin te jumajx (juneleʼx). Ax ikx o xnaqʼtzaʼn qa ok kʼelel tiʼn Dios aju «kamik» ik tzeʼnj in tzaj tqʼamaʼn Tuʼjil Tyol (Apocalipsis 21:4). Naqtzen tuʼnj kukx in qo kyim jaʼlo (jaʼla). Ik tzeʼn tqʼama ajkawil Salomón, «qe xjal itzʼx qe, bʼaʼn kyuʼn qa ok che kymel» (Eclesiastés 9:5). In nok tilil quʼn tuʼn qanqʼin toj tbʼanel, naqtzun tuʼnj kukx in qo ximen tiʼj jlu: ¿Tiʼ in bʼaj qiʼj aj qkyim?

³ Qa ma kyim jun toj qja atlo maj in kubʼ qximen, «¿jatumel ma pon? ¿At toj kʼixkʼej? ¿In xqʼuqin qiʼj? ¿Jaku qo onin tiʼj? ¿Ok qo tel juntl maj tukʼil?». Junxichaq tzaqʼwebʼil in tzaj kyqʼoʼn okslabʼil (nimbʼil) kyiʼj xjel lu. At junjun in kubʼ kyxnaqʼtzaʼn qa aʼyeqe tbʼanel xjal in cheʼx toj kyaʼj, aʼyetzen nya bʼaʼn xjal in cheʼx toj qʼaqʼ. At txqantl in kyqʼamaʼn qa in qo pon kyxol kyanmi kyimni, tuʼntzen qten kyukʼe toj qja o che kyim. Ex atqeʼ okslabʼil in kyqʼamaʼn qa in qo pon kyxol kyimni tuʼntzun qok toj malbʼil ex yajxitl in qo ul itzʼj juntl maj.

4. ¿Alkye xnaqʼtzbʼil tiʼj kamik junx kyxim nim okslabʼil tiʼj?

 ⁴ Kykyaqil qeju xnaqʼtzbʼil lu in tzaj kyyekʼun jun ximbʼetz: qa at jun piẍ tokx toj qxmilal (qchibʼjil) kukx in kyaj anqʼin aj qkyim. Chʼixme kykyaqil okslabʼil, aʼye qeju e ten ojtxe ex aʼye qeju ateʼ jaʼlo, in kyqʼamaʼn qa kukx in qo anqʼin te jun majx alkyexku tten qanqʼibʼil ex qa kukx in qo keʼyin, in qo bʼin ex in qo ximen. Nya ax tok (bʼanax) jlu, quʼn oʼkx jaku qo bʼin, jaku qo kin ex jaku qo ximen qa in naqʼanan t-sesil qwiʼ, moqa qjolon (cerebro), aj qkyim ya mitiʼtl in naqʼanan t-sesil qwiʼ. Qa mitiʼtl naqʼanan t-sesil qwiʼ ya melay tzultl jun tiʼ toj qwiʼ, ya mlaytl qnaʼ, ya mlaytl qbʼi, ex ya mlaytl qlonte jun tiʼ.

5, 6. Ik tzeʼn in tzaj tqʼamaʼn Tyol Dios, ¿tiʼ in bʼaj kyiʼj qeju kyimni?

⁵ Ojtzqiʼn tuʼn Jehová tiʼ in bʼaj aj qkyim, aju Bʼinchal t-sesil qwiʼ. A ojtzqilte alkye axix tok, ex in tzaj tqʼamaʼn toj Tyol tiʼ in bʼaj kyiʼj qeju o che kyim. In tzaj t-xnaqʼtzaʼnxix Tuʼjil Tyol: qa aj tkyim jun xjal bʼiʼx in naj. Qa kyimni taʼ jun xjal ya mitiʼtl in nanqʼin, a jlu in tzaj tyekʼun qa aʼyeqe kyimni mitiʼtl in che kaʼyin, mitiʼtl in che bʼin ex mitiʼtl in che ximen. Mitiʼx jun piẍ in kyaj anqʼin tiʼj qximlal aj qkyim. A jlu in tzaj tyekʼun qa mitiʼ (tiloʼ) in kyaj anqʼin qanmi, moqa alma ex qxew, moqa espíritu. *

⁶ Tej tbʼaj tqʼamaʼn Salomón qa aʼyeju xjal itzʼ qe, bʼiʼn kyuʼn qa ok che kyimel, ax ikx kubʼ ttzʼibʼin qa aʼye «qe xjal kyimni qe, mintiʼ bʼaʼn kyuʼn». Tzaj tchikʼbʼaʼn mastl tej tqʼama qa «in kubʼ naj kykʼujlalil ex kyikʼbʼil» kyibʼ ex qa ‹mi jun tiʼxti in bʼant kyuʼn ex mintiʼ jun in che ximan tiʼj, quʼn tzma chix mintiʼ nabʼl ex mintiʼ ojtzqibʼl at› (kjawil uʼjit Eclesiastés 9:5, 6, 10). Ax ikx toj Salmo 146:4 in tzaj tqʼamaʼn qa aj tkyim jun xjal ‹in naj aju otoq kubʼ t-ximan›; a jlu in tzaj tyekʼun qa  bʼiʼx in bʼaj tkyaqil t-xim xjal. Ik ttenju, bʼiʼx in qo naj aj qkyim ex mitiʼ jun piẍ in kyaj anqʼin aj qkyim. Ik tten qchwinqlal ik tzeʼn qʼaqʼ in kʼant tiʼj jun kandel. Aj tkubʼ yupj bʼiʼx in kubʼ naj, mitiʼ in xiʼ toj juntl plaj.

7. ¿Tiʼ in tzaj tyekʼun aju tqʼama Jesús tiʼj kamik?

⁷ Tej tyolin Jesús tiʼj jun tamiw aju otaq kyim, tqʼama tiʼ in bʼaj kyiʼj qeju kyimne. Tnejel tqʼama jlu kye qeju lepchiqeʼktaq tiʼj: «Aju qamiw Lázaro in tan». Atzun kye ela toj kywitz qa in jtantaq tuʼn tbʼanix. Nya iktaq ttenju, quʼn xi tqʼamaʼn Jesús juntl maj kye: «Ma kyim Lázaro» (kjawil uʼjit Juan 11:11-14). Qa ma tzʼok tqʼoʼn twitza tiʼj, ok tqʼoʼn Jesús kamik ik tzeʼn in qo wtan. Nya atztaq taʼ tamiw toj kyaʼj nix toj qʼaqʼ. Mitiʼ otaq japun Lázaro kyukʼe anjel, mitiʼ otaq txiʼ kyukʼe t-xeʼchil ex mitiʼ otaq tzul itzʼj juntl maj. In najlantaq toj kamik, ik tzeʼn in jtanxix, pero mitiʼtaq in witzkʼan. Toj juntl maj ax ikx tqʼama Jesús qa aju kamik ik tten ik tzeʼn in qo jtan. Tej tqʼama: «Mya kyimni te txin, noq in tan» tqʼama jlu tej tjaw anqʼin juntl maj tmeʼl (tmyal) Jairo tuʼn (Lucas 8:52, 53).

8. ¿Tiquʼn jaku tzʼok qʼuqeʼ qkʼuʼj qa nya tajtaq Dios tuʼn kykyim xjal?

⁸ ¿Tajtaq Dios tuʼn kykyim xjal? Nya tajtaq. Kubʼ tbʼinchaʼn Jehová xjal tuʼn tanqʼin te jun majx twitz Txʼotxʼ. Ik tzeʼn ma qo xnaqʼtzan tiʼj toj uʼj lu, e kubʼ tqʼoʼn Dios tnejel qtat toj jun tbʼanelxix najbʼil ex e kubʼ tkʼiwlaʼn tuʼn miʼ ttzaj kyyabʼ. Tajbʼiltaq (tgantoq) tuʼn kyten toj tbʼanel. ¿Bʼaqa at jun tbʼanel manbʼaj tajbʼil tuʼn tikʼx tijel ex kyimen kyuʼn tkʼwaʼl? Mitiʼx. In che oktaq tkʼujlaʼn te Jehová tkʼwaʼl ex tajtaq tuʼn kytzalaj tzalu twitz Txʼotxʼ te jumajx. Axpe in tzaj tqʼamaʼn Xjan Uʼj  (Biblia) qa «xi tqʼoʼn Dios kynabʼl xjal tuʼn tel kynikʼ tiʼj ju at te jumajx» (Eclesiastés 3:11). A t-xilen jlu, qa o qo kubʼ tbʼinchaʼn Dios tuʼn qanqʼin te jun majx, ex o jaqet bʼe tuʼn, tuʼn tten jlu qe.

9. ¿Alkye kawbʼil tzaj tqʼoʼn Jehová te Adán, ex tiquʼn nyataq kwest tuʼn tjapun jlu tuʼn?

⁹ ¿Tiquʼntzen in qo kyimtz? Tuʼn tkanet tzaqʼwebʼil quʼn, il tiʼj tuʼn qxnaqʼtzan tiʼ tzaj tej oʼkxtaq jun xinaq, moqa jun ichan, tukʼe jun xuʼj ateʼtaq twitz Txʼotxʼ. In tzaj tqʼamaʼn Tyol  Dios jlu: «Jawtzun tchʼiysan Qman Dios tuj txʼotxʼ lu tkyaqil wiq tzeʼ tbʼanilxix keʼyin ex bʼaʼn tloʼnjtz twitz» (Génesis 2:9). Naqtzun tuʼnj tzaj qʼoʼn jun kawbʼil. Tzaj tqʼamaʼn Dios te Adán: «Bʼaʼn tuʼn t-xi tloʼna twitz tkyaqil tzeʼ at tuj tqan awal; atzunju twitz tzeʼ tuʼn tel nikʼbʼaj tiʼj bʼaʼn ex tiʼj mya bʼaʼn, miʼn txi tloʼna; qatzun ma txi tloʼna ax tok [k]kymela» (Génesis 2:16, 17). Nyataq kwest tuʼn tjapun kawbʼil lu kyuʼn Adán tukʼe Eva, quʼn attaq txqantl tzeʼ aju jakutaq txi kloʼn twitz. Xi tqʼoʼn Dios ambʼil kye tuʼn t-xi kyqʼoʼn chjonte tiʼj tkyaqilju otaq tzaj tqʼoʼn kye, quʼn axpe ikx otaq tzaj tqʼoʼn kychwinqlal tzʼaqle. Qa ma tzʼokxtaq kybʼiʼn kawbʼil lu, ax ikx oktaq kbʼel kyyekʼun qa in jawtaq kynimen toklen kyTat aju at toj kyaʼj ex qa kyajtaq tuʼn tokx kybʼiʼn qeju tbʼanel tkawbʼil.

10, 11. a) ¿Tiquʼn mitiʼ okx kybʼiʼn qeju tnejel qtat aju tkawbʼil Dios? b) ¿Tiquʼn jun matij il aju mitiʼ okx kybʼiʼn Adán tukʼe Eva Dios?

¹⁰ Bʼisbʼajil aju bʼent kyuʼn tnejel qtat tuʼnju mitiʼ xi kynimen Jehová. Ajbʼen jun kan, moqa lobʼaj, tuʼn Satanás tuʼn t-xi tqanen jlu te Eva: «¿Maj o tzaj tmaʼn Dios kyeye tuʼn miʼn t-xi kyloʼne twitz tkyaqil tzeʼ kyxol awal lu?». Xi ttzaqʼweʼn Eva te kan kyjalu: «Bʼaʼn t-xi qloʼne kywitz tzeʼ kyxol awal lu, atzun tiʼj twitz tzeʼ tkubʼ tuj tmij awal tzaj tmaʼn Dios kyjaʼ: Miʼn txi kyloʼne ex miʼn tzʼok kymakoʼne, tuʼntzun miʼn kykyime» (Génesis 3:1-3).

¹¹ «Mlay che kyime —chi Satanás—. Porque ojtzqiʼn tuʼn Dios, ok t-xi kyloʼne twitz tzeʼ lu, kjaqetel kynabʼle, che okele ik tzaʼn te Dios ex kʼelel kynikʼe tiʼj bʼaʼn ex tiʼj mya bʼaʼn.» (Génesis 3:4, 5.) Tajtaq Tajaw il tuʼn tkubʼ t-ximen Eva qa mastaq tbʼanel tuʼn t-xi tloʼn twitz tzeʼ aju nyataq bʼaʼn tuʼn t-xi tloʼn. Tukʼe jlu, tqʼama Satanás qa jakutaq jaw tjyoʼn Eva alkye bʼaʼn ex alkye nya bʼaʼn in nela toj twitz; toj juntl yol, jakutaq kubʼ tbʼinchaʼn alkyexku taj. Ax ikx tqʼama Satanás qa otaq txi tqʼamaʼn Jehová nya ax yol tiʼjju tzultaq kyiʼj qa ma txi kyloʼn twitz tzeʼ. Xi tokslaʼn Eva aju xi tqʼamaʼn Tajaw il te, tuʼntzun jlu el tiʼn twitz tzeʼ ex xi tloʼn. Yajxitl xi tqʼoʼn te  tchmil, ax ikx te xi tloʼn. Ojtzqiʼntaq kyuʼn qa aju in kubʼtaq kybʼinchen nya bʼaʼntaq, quʼn otaq tzaj tqʼamaʼn Dios kye tuʼn miʼ tkubʼ kybʼinchen jlu. Tej t-xi kyloʼn twitz tzeʼ, el kyikʼen jun kawbʼil nya kwest ex aju jakutaq bʼent kyuʼn. Tukʼe jlu, el kyikʼen kyTat ex aju toklen tuʼn tkawin. ¡Jun matij (nim) il jlu twitz aju Bʼinchal kye!

12. ¿Tiʼ jaku tzʼonin qiʼj tuʼn tel qnikʼ tiʼ tnaʼ Jehová tej mitiʼ okx bʼiʼn kyuʼn Adán tukʼe Eva?

¹² Ximana tiʼj jun tkʼwaʼla (tkyʼajola) aju ma tzʼok t-xqʼuqina ex ma chʼiy tuʼna, pero mitiʼ in nokx bʼiʼna tuʼn, mitiʼ in nimen teya ex mitiʼ tkʼuʼj tiʼja. ¿Tiʼ jaku tnaʼya tuʼn jlu? Jakulo  tzaj nim tbʼisa tuʼn. Axle ikx te Jehová nimxixlo tzaj tbʼis tej mitiʼ okx bʼiʼn kyuʼn Adán tukʼe Eva.

13. ¿Tiʼtaq kbʼajel tiʼj Adán aj tkyim ik tzeʼnj tqʼama Jehová, ex tiʼ t-xilen jlu?

¹³ Tuʼnju otaq tzʼel kyikʼen Adán tukʼe Eva tkawbʼil Jehová, ya melaytaq bʼant tuʼn kyanqʼin te jun majx. Tuʼntzun jlu, e kyim ikxix tzeʼn otaq tzaj tqʼamaʼn Jehová kye. Tej kykyim bʼiʼx e naj. Mitiʼ kyaj anqʼin kyanmi tuʼn kyxiʼ najal toj juntl plaj. Ik in tzaj tyekʼun tyol Jehová aju tzaj tqʼamaʼn te tnejel xjal tej ttzaj tqanin te tiquʼn otaq kubʼ tbʼinchaʼn il: «[Kmeltzʼajela] tuj txʼotxʼ, porque tiʼj txʼotxʼ kubʼ bʼinchaʼna; tquqil txʼotxʼa, ex ax tquqil txʼotxʼ kʼokela ok tkyima» (Génesis 3:19). Quq ajbʼen tuʼn Dios tuʼn tkubʼ tbʼinchaʼn Adán (Génesis 2:7). Tej naʼmxtaq tkubʼ bʼinchen Adán. Mitiʼtaq in nanqʼin toj juntl plaj. Tuʼntzen jlu, tej t-xi tqʼamaʼn Jehová te qa kmeltzʼajeltaq juntl maj te quq, in xitaq tqʼamaʼn te qa bʼiʼxtaq knajel. Ik tzeʼn quq aju ajbʼen tuʼn tkubʼ bʼinchaʼn Adán mitiʼtaq tchwinqlal, ax ikx te Adán mitiʼtaqtl tchwinqlal.

14. ¿Tiquʼn in qo kyim?

¹⁴ In che anqʼinwtlo Adán tukʼe Eva jaʼlo, pero e kyim tuʼnju mitiʼ okx kybʼiʼn tkawbʼil Dios, iktzun tten e ilenju. In qo kyim qkyaqilx tuʼnju tkʼwaʼl Adán qoʼ, aju kyaj tqʼoʼn il ex kamik qibʼaj (kjawil uʼjit Romanos 5:12). Aju il ik tten ik tzeʼn jun yabʼil in nel qiqen kyiʼj qtat aju mi aʼlx jun jaku tzaqpaj tuʼn. Aju in tzaj tiʼj xjal tuʼn il, aju kamik, nya jun amiw ex nya jun kʼiwlabʼil, quʼn a jlu jun ajqʼoj moqa jun nya bʼaʼn (1 Corintios 15:26). ¡In qo tzalajxix tuʼnju o tzaj tqʼoʼn Jehová chojbʼil tuʼn qtzaqpaj tiʼj ajqʼoj lu!

15. ¿Tiquʼn in nok tqʼuqbʼaʼn qkʼuʼj qa ma tzʼel qnikʼ tiʼj axix tok tiʼj kyimen?

¹⁵ In nok tqʼuqbʼaʼn qkʼuʼj aju in tzaj t-xnaqʼtzaʼn Tyol Dios  tiʼ in bʼaj kyiʼj qeju xjal o che kyim. Ik tzeʼnj ma qo xnaqʼtzan tiʼj, mitiʼ in kynaʼn kʼixkʼej. Mitiʼ tuʼn qtzaj xobʼ kyuʼn, quʼn mlay tzʼok kybʼinchen jun nya bʼaʼn qiʼj. Mlay bʼant kyonit quʼn ax ikx kye melay qo onit kyuʼn. Mlay bʼant kyyolin qukʼil ax ikx qe melay bʼant qyolin kyukʼil. In kyqʼamaʼn nim nejenel kye okslal qa jaku che onin kyiʼj kyimni, ex aʼyeqe xjal in nok qʼuqeʼ kykʼuʼj tiʼj nya ax tok kyyol nejenel lu, in xi kyqʼoʼn pwaq (tumi) kye. Pero aj tel qnikʼ tiʼj axix tok tiʼj kyimen melay qo kubʼ kysbʼuʼn tukʼe nya ax kyyol.

16. ¿Tiquʼn mitiʼ in kubʼ kyxnaqʼtzaʼn nim okslabʼil aju axix tok tiʼj kamik ex alkye tten o bʼent jlu tuʼn Satanás?

¹⁶ ¿In kubʼ t-xnaqʼtzaʼn okslabʼil jatumel tokxiya aju in tzaj t-xnaqʼtzaʼn Tyol Dios kyiʼj qe kyimne? Chʼixmi kykyaqil okslabʼil mitiʼ in kubʼ kyxnaqʼtzaʼn aju in tzaj tqʼamaʼn Tyol Dios tiʼj kyimen. ¿Tiquʼn? Tuʼnju a Satanás bʼinchal te jlu. In najbʼen nya ax tok okslabʼil tuʼn Satanás tuʼn tkubʼ kyximen xjal, qa kukx in nanqʼin qanmi toj juntl plaj. Ax ikx in najbʼen txqantl nya ax yol tuʼn Satanás, tuʼn kyel tlaqʼbʼaʼn xjal tiʼj Jehová. ¿Alkye tten in bʼent jlu tuʼn?

17. ¿Tiquʼn nya bʼaʼn in nela toj twitz Jehová aju xnaqʼtzbʼil qa in che kux qʼoʼn xjal toj qʼaqʼ te jun majx?

¹⁷ Ik tzeʼn ma qo xnaqʼtzan tiʼj, at junjun okslabʼil in kubʼ kyxnaqʼtzaʼn qa aqeju nya bʼaʼn xjal ok che kbʼelex qʼoʼn toj qʼaqʼ tuʼn kyten toj kʼixkʼej te jumajx. Aju xnaqʼtzbʼil lu nya bʼaʼn in nela toj twitz Jehová, quʼn jun Dios te kʼujlabʼil te ex melayx che kux tqʼoʼn xjal toj qʼaqʼ tuʼn kyten toj kʼixkʼej (kjawil uʼjit 1 Juan 4:8). ¿Tiʼ teya jaku kubʼ t-ximen tiʼj jun xjal qa ma tzʼokx tqʼoʼn tqʼabʼ tkʼwaʼl toj qʼaqʼ tuʼnju mitiʼ xi tbʼiʼn tyol? ¿Bʼaʼn jaku tzʼela xjal lu toj twitza? ¿Taja tuʼn tok tojtzqiʼna twitz? Junlo nya bʼaʼn xjal jaku tzʼela toj twitza. Atzun taj Satanásju tuʼn tkubʼ qximen: aju qa in che kux tqʼoʼn Jehová nim xjal toj qʼaqʼ tuʼn kyten toj kʼixkʼej te jun majx.

18. ¿Alkye xnaqʼtzbʼil in najbʼen kyuʼn junjun okslabʼil tuʼn tjaw kynimsaʼn xjal qeju kyimni?

¹⁸ Ax ikx in najbʼen junjun okslabʼil tuʼn Satanás tuʼn tkubʼ  kyxnaqʼtzaʼn qa in che ok kyimni te xewbʼaj ex qa il tiʼj tuʼn kynimen qe xjal kye. Aju xnaqʼtzbʼil lu, in tzaj tyekʼun qa aʼyeju kyimni lu jaku che ok te qamiw ex jaku che ok te qajqʼoj. Tuʼnju in xi kybʼiʼn nimku xjal aju nya ax xnaqʼtzbʼil lu, in che tzaj xobʼ, in che jaw kynimsaʼn ex in xi kyqʼoʼn kʼulbʼil kye. Atzun te Tyol Dios nya ik in tzaj t-xnaqʼtzaʼnju, quʼn in tzaj t-xnaqʼtzaʼn qa naq in che jtan kyimni ex qa oʼkx qo nimel te Jehová aju axix Dios, aju o qo kubʼ tbʼinchaʼn ex o tzaj tqʼoʼn tkyaqilju at tajbʼen qe (Apocalipsis 4:11).

19. ¿Alkye juntl xnaqʼtzbʼil jaku tzʼel qnikʼ tiʼj qa qojtzqiʼn axix xnaqʼtzbʼil tiʼj kamik?

¹⁹ Qa ojtzqiʼn quʼn tiʼxix in bʼaj kyiʼj kyimni, ya mlay qo kubʼ sbʼuʼntl kyuʼn qeju nya ax tok xnaqʼtzbʼil in kubʼ kyxnaqʼtzaʼn okslabʼil. Ax ikx in nelxix qnikʼ kyiʼj mastl xnaqʼtzbʼil ateʼkux toj Tyol Dios, ik tzeʼnj qa qo anqʼil te jumajx toj jun Tbʼanel Najbʼil. Jaku tzʼok qʼuqeʼxix qkʼuʼj tiʼj jlu, aj tel qnikʼ qa mitiʼ in che ok kyimni te xewbʼaj tuʼn kyxiʼ anqʼil toj juntl plaj.

20. ¿Tiʼ kbʼel qxnaqʼtzaʼn toj juntl xnaqʼtzbʼil?

²⁰ O tzikʼ nim syent abʼqʼi, tej tqʼama Job jlu: «Qa ma kyim jun xjal, ¿kʼanqʼilpelo juntl maj?» (Job 14:14). Toj juntl yol, ¿jakupetzele txi qʼoʼn juntl maj kychwinqlal qeju in che jtan toj kamik? Aju tzaqʼwebʼil in tzaj tqʼoʼn Tyol Dios in nokxix tqʼuqbʼaʼn qkʼuʼj, ik tzeʼn qo xnaqʼtzal tiʼj toj juntl xnaqʼtzbʼil.