1-3. ¿Tlake kinekiskiaj kimatisej maseualmej kema se akajya miki? ¿Uan tlake kiijtouaj ipan miak religiones?

NI TLAJTLANILI tlen tlauel ipati nochipa motlajtlanijtokej maseualmej tlen kampa ueli euaj. Uan nochi tijnekiskiaj tijmatisej kenijkatsa monankilia.

² Ipan tlamachtili makuili timomachtijkej kema Jesucristo motemaktilik kichijki ma timotemachikaj uelis tiitstosej nochipa. Nojkia tikitakej Biblia kiijtoua “ayok kema aki mikis” (Apocalipsis [Revelación] 21:4). Nama nochi timikij pampa ayamo asi nopa tonali. Yeka tlanauatijketl Salomón kiijtok: “Tlen yoltokej kimatij para se tonali mikisej” (Eclesiastés 9:5). Maske tijchiuaj kampeka tiitstosej miak xiuitl, nochipa timotlajtlaniaj tlake techpanos kema timikisej.

³ Kema miki se akajya katli tlauel tikikneliaj uelis timotlajtlaniaj: “¿Kanke itstok? ¿Tlaijiyouijtok? ¿Techmokuitlauia? ¿Uelis tijpaleuisej? ¿Sampa tikitasej?”. Ipan miak religiones kiijtouaj katli kuali ininyolo yauij iluikak uan tlen amo kualmej yauij kampa kintlaijiyouiltijtokej mijkatsitsij o yauij kampa itstokej tonaltsitsij uan nopaya itstokej ininuaya ininchampoyouaj katli miktokej. Sekij kiijtouaj yauij kampa itstokej katli miktokej, nopaya  kintlajtolsenkauaj uan teipa sampa yolij ipan sekinok inintlakayo.

4. ¿Tlake kineltokaj kinpano mijkatsitsij katli itstokej ipan miak religiones?

⁴ Miakej moiljuiaj kema timikij se kentsi tlen totlakayo nojua yoltok. Uejkajkia, ipan miak religiones uan tlen nama onka, kiijtouaj amo kema timikij, nojua titlachiaj, titlakakij uan nojua titlalnamikij. ¿Nelia tlen moiljuiaj? Amo. Pampa kej tijmatij, totsontekuich kichiua ma titlalnamikikaj uan ma tekiti totlakayo, uan kema timikij totsontekuich nojkia ayokmo tekiti. Nochi tlen tikilnamikij uan tlen tijyolmatij amo uelis yoltos iselti, pampa kema timikij tlami totsontekuich.

5, 6. ¿Kiijtoua ipan Biblia nojua itstokej katli miktokej?

⁵ Jehová kichijki totsontekuich, yeka kuali kimati tlake techpano kema timikij uan Biblia techiljuia tlaj nojua itstokej katli miktokej o amo. Nopaya kiijtoua kema maseualmej mikij, ayokmo itstokej, ayokmo tlachiaj, amo tlakakij yon tlalnamikij. Kema timikij ayokmo tleno tlen totlakayo nojua itstok. Yeka amo tijpiaj se alma o tonaltsi tlen amo kema miki. *

⁶ Kema Salomón kiijkuilok katli itstokej kimatij se tonali mikisej, kiijtok: “Tlen miktokej ayok tleno kimatij”. Nojkia kiijtok ayokmo teikneliaj uan amo tekualankaitaj. Uan ‘ipan nopa mijkaostotl, ayok uelis kichiuasej yon se tekitl uan ayok uelis moiljuisej kejatsa kichiuasej se tlamantli tlen kuali. Ayok tleno kiixmatisej, yon ayok kipiasej tlalnamikilistli’ (xijpoua Eclesiastés 9:5, 6 uan 10). Ipan Salmo 146:4 kiijtoua kema se akajya miki ‘tlami nochi  tlen moiljuijtoya kichiuas’. Ni kinextia kena timikij uan amo tleno mokaua yoltok. Tonemilis sanse kej kema tlatlatok se vela, kema kiseuiaj nopa tlitl amo kana yaui, nochi tlami.

7. ¿Tlake kiijtok Jesús kinpano katli mikij?

⁷ Kema Jesucristo kimatki miktoya iuampo Lázaro kiijtok tlake kinpano katli mikij. Ya kiniljuik itokilijkauaj: “Touampo Lázaro kochtok”. Inijuantij moiljuijkej Lázaro kipiayaya se kokolistli uan yeka kochtoya. Kema Jesús kiitak amo kikuamachilijkej kiniljuik: “Lázaro ya miktok” (xijpoua Juan 11:11-14). Ika ni Jesús kiijtok kema se akajya miki kejuak kochi. Lázaro amo itstoya ne iluikak o kampa kintlaijiyouiltiaj ipan tlitl, amo itstoya ininuaya iluikaeuanij o ininuaya ichampoyouaj katli ya miktoyaj, uan amo yolki kej seyok tlamantli. Kema miktoya kejuak kochtoya uan amo temikiyaya. Jesús nojkia kiijtok kema se akajya miki sanse kej kema se kochi, pampa kema kiyolkuik Jairo isiuapil kiijtok: “Axmiktok, san kochtok” (Lucas 8:52, 53).

8. ¿Kenke temachtli tijmatij toTeotsij amo kinekiyaya ma mikikaj maseualmej?

⁸ ¿Kinekiyaya toTeotsij ma mikikaj maseualmej? Amo, Jehová kinekiyaya ma itstokaj nochipa ipan Tlaltipaktli. Ipan ni amochtli tikitakej toTeotsij kinkajki totatauaj tlen achtouia itstoyaj ipan se yejyektsi xochimili. Inijuantij amo kema kipiaskiaj kokolistli pampa toTeotsij kinchijki amo tlajtlakolejkej uan kinekiyaya kuali ma itstokaj.  Ximoiljui, ¿kinekiskia se tetata ma ueuejtixtiakaj uan ma mikikaj ikoneuaj katli tlauel kiniknelia? ¡Amo! Jehová nojkia tlauel kinikneliyaya ikoneuaj uan kinekiyaya ma yolpaktokaj nochipa ipan Tlaltipaktli. Yeka Biblia kiijtoua toTeotsij “kitlalijtok ipan iyolo sejse tlakatl para ma kimati [...] axkema mikis” (Eclesiastés 3:11). Kena, ya  kichijki ma tijnekikaj tiitstosej nochipa, yeka kichijki tlen moneki uan kej nopa uelis tiitstosej nochipa.

9. ¿Tlake kiiljuik Jehová amo ma kichiua Adán, uan kenke amo ouij eliyaya?

⁹ Tlaj tikitasej tlake panok kema itstoya san setsi tlakatl uan setsi siuatl tijmatisej kenke timikij. Biblia kiijtoua: “ToTeko Dios kichijki ma moskalti xochimilijtik nochi tlamantli kuatinij [...] tlen temakaj kuatlajkayotl para kikuasej” (Génesis 2:9). San se tlamantli amo ueliskiaj kichiuasej. ToTeotsij kiiljuik Adán: “Uelis tijkuas itlajka tlen ueli kuauitl ipan ni Xochimili, pero ne kuauitl tlen itoka ‘kuauitl tlen temachiltia tlen kuali uan tlen axkuali’, axtle. Amo xijkua itlajka, pampa ipan nopa tonal kema tijkuas itlajka, melauak timikis” (Génesis 2:16, 17). Ni amo ouij kineltokatoskiaj pampa onkayaya miak kuauitl itlajka tlen ueliskia kikuajtoskiaj. Kinamikiyaya kitlaskamatilijtoskiaj toTeotsij pampa kinmakak ininnemilis tlen amo tlajtlakole uan nochi tlamantli. Tlaj kineltokatoskiaj, kinextijtoskiaj kitlepanitayayaj ininTata Jehová uan kinekiyayaj kichiuasej tlen kinnauatiyaya.

10, 11. 1) ¿Ajkia kichijki Adán uan Eva amo ma kineltokakaj toTeotsij? 2) ¿Kenke tlauel tlaixpanokej Adán uan Eva kema amo tlaneltokakej?

¹⁰ Adán uan Eva amo kineltokakej Jehová. Satanás kinojnotski Eva ika se kouatl uan kitlajtlanik: “¿Axinmechiljuijtok Dios para amo xijkuakaj itlajka niyon se kuauitl ipan ni Xochimili? Uan nopa siuatl kinankilik: Uelis tijkuasej itlajka tlen ueli kuauitl, pero iyojtsi ne tlen eltok tlatlajko Xochimili Dios techiljuijtok axkuali tijkuasej, niyon tikitskisej itlajka ne kuauitl pampa intla tijchiuasej, timikisej” (Génesis 3:1-3).

¹¹ Uajka Satanás kiiljuik: “Axinmikisej. Kuali kimati  Dios intla inkikuasej itlajka nopa kuauitl elis keja inmechtlapouilis inmoixtiyol uan inmotlalnamikilis uan inkimatisej tlen kuali uan tlen axkuali. Keja nopa inelisej keja ya” (Génesis 3:4, 5). Diablo kinekiyaya Eva ma moiljui kuali kikuaskia nopa kuauitl itlajka. Kejuak kiiljuik ya ueliskia kiijtos tlake kuali uan tlake amo kuali o ueliskia kichiuas tlen ya kinekis. Satanás nojkia kiistlakauik Jehová pampa kiijtok amo nelia mikiskiaj tlaj kikuaskiaj nopa kuauitl itlajka. Eva kineltokak, yeka kitejki uan kikuajki. Teipa kimakak iueue uan ya nojkia kikuajki. Inijuantij kuali kimajtoyaj kichiuayayaj tlen toTeotsij kiniljuijtoya  amo ma kichiuakaj. Kej nopa kiixpanokej se tlanauatili tlen amo ouij kineltokatoskiaj uan kinextijkej amo kinekiyayaj ma kinnauati Jehová. ¡Tlauel kiixpanokej toTeotsij katli kinikneliyaya!

12. ¿Kenijkatsa uelis tijkuamachilisej tlen Jehová kiyolmatki kema Adán uan Eva kiixpanokej?

¹² ¿Mitsyolkokoskia tlaj se mokone katli tikiskaltijtok uan tijmokuitlauijtok amo mitsneltokaskia, amo mitstlepanitaskia uan amo mitsikneliskia? Kena. Uajka ximoiljui kenijkatsa tlauel kiyolkokok Jehová kema Adán uan Eva kiixpanokej.

13. ¿Tlake kiijtok Jehová kipanoskia Adán kema mikiskia, uan tlake kiijtosneki nopa?

¹³ Adán uan Eva amo kineltokakej Jehová, yeka amo kinamikiyaya ma itstokaj nochipa. Mijkej kej toTeotsij kiniljuijtoya. Uan pampa tlanki ininnemilis, amo yajkej kampa kiijtouaj itstokej tonaltsitsij. Jehová kej nopa kiiljuik kipanoskia Adán: “Nijchijki motlakayo ika tlali, uan kema timikis, sampa timokuepas tlali” (Génesis 3:19). Adán kichijkej ika tlali (Génesis 2:7). Kema ayamo kichijtoyaj, amo kana itstoya. Uajka, kema Jehová kiiljuik Adán sampa mokuepaskia tlali, kiiljuik ayokmo itstoskia kej nopa tlali amo yoltok.

14. ¿Kenke timikij?

¹⁴ Adán uan Eva amo miktoskiaj tlaj kineltokatoskiaj toTeotsij. Inijuantij mijkej pampa tlajtlakolchijkej, uan tojuantij nojkia timikij pampa tiikoneuaj uan pampa techpanoltilijkej tlajtlakoli uan mikilistli (xijpoua Romanos 5:12). Nopa tlajtlakoli kejuak se kokolistli tlen tlauel amo kuali katli nochi kinmaua. Yeka kema timikij amo tijseliaj se tlateochiualistli, pampa nopa mikilistli kejuak se tokualankaitaka (1 Corintios 15:26). ¡Tlauel moneki ma tijtlaskamatilikaj Jehová pampa techmakixtik tlen tokualankaitaka kema temaktilik iKone!

15. ¿Kenke tlauel techyolchikaua kema tijmatij katli miktokej ayokmo itstokej?

¹⁵ Kema tijmatij Biblia kiijtoua katli miktokej ayokmo itstokej tlauel techyolchikaua. Inijuantij amo tleno kinkokoua yon amo tlaijiyouiaj. Amo kinamiki tikinimakasisej pampa amo uelis techchiuilisej tlen amo kuali. Amo uelis tikinpaleuisej yon amo uelis techpaleuisej. Amo uelis technojnotsasej yon amo uelis tikinnojnotsasej. Miakej katli tlamachtiaj ipan religiones tlen amo melauak kiijtouaj uelis kinpaleuisej mijkatsitsij, yeka maseualmej kintlaxtlauiaj pampa kineltokaj ni istlakatili. Tojuantij amo uelis techkajkayauasej pampa tijmatij katli mikij ayokmo itstokej.

16. ¿Ajkia kichijtok amo kuali ma tlamachtikaj ipan miak religiones, uan kenijkatsa kichiua?

¹⁶ ¿Kineltokaj ipan moreligión kema ipan Biblia kiijtoua katli miktokej ayokmo itstokej? Miakej amo kineltokaj pampa Satanás kinkajkayaua. Ika nopa religiones katli amo melauak kichiua maseualmej ma kineltokakaj kema timikij nojua tiitstokej kej tonaltsitsij. Nojkia kitekiuia sekinok istlakatili pampa amo kineki ma kinechkauikaj toTeotsij Jehová. ¿Kenijkatsa kichiua ni?

17. ¿Kenke kiixpanoj Jehová kema tlamachtiaj ya nochipa tetlaijiyouiltia ipan tlitl?

¹⁷ Ipan sekij religiones tlamachtiaj katli amo kualmej nochipa tlaijiyouisej ipan tlitl. Ika ni kiixpanoj Jehová, pampa ya tlauel teiknelia uan amo kema tetlaijiyouiltiskia (xijpoua 1 Juan 4:8). ¿Tlake timoiljuiskia tlaj se tetata kimatlatiskia ikone pampa amo kineltoka? ¿Tijtlepanitaskia nopa tlakatl? ¿Tijnekiskia tikixmatis? ¡Amo! Pampa timoiljuiskia ya se tlauel amo kuali tlakatl. Satanás nojkia kineki ma tijneltokakaj Jehová tetlaijiyouiltia ipan tlitl.

18. ¿Kenke miakej kinueyichiuaj mijkatsitsij?

 ¹⁸ Satanás nojkia kichiua ma tlamachtikaj katli miktokej mochiuaj tonaltsitsij tlen moneki tikintlepanitasej uan kiijtouaj uelis mochiuasej touampoyouaj o tokualankaitakauaj. Yeka miakej kinimakasij, kintlepanitaj uan kinueyichiuaj. Biblia amo ya nopa tlamachtia. Nopaya kiijtoua katli miktokej kejuak kochtokej uan kinamiki san tijueyichiuasej Jehová pampa ya toTeotsij katli melauak, techchijtok uan techmakatok nochi (Apocalipsis 4:11).

19. ¿Tlake seyok tlamachtili kuali tijkuamachiliaj kema tijmatij ayokmo itstokej mijkatsitsij?

¹⁹ Kema tijmatij ayokmo itstokej mijkatsitsij, ayokmo techkajkayauaj katli tlamachtiaj ipan miak religiones, uan nojkia kuali tijkuamachiliaj sekinok tlamantli tlen tlamachtia Biblia, kej kema kiijtoua nochipa tiitstosej ipan Xochimili. Ni tijneltokaj temachtli mochiuas pampa tijmatij mijkatsitsij ayokmo itstokej.

20. ¿Tlake tikitasej ipan nopa seyok tlamachtili?

²⁰ Job, katli amo kema kikajki toTeotsij, kiijtok: “Intla se tlakatl mikis, ¿sampa moyolkuis?” (Job 14:14). Uajka, ¿uelis moyolkuisej katli miktokej? Ipan nopa seyok tlamachtili tikitasej kenke tlauel techyolchikaua tlen tlamachtia Biblia.