1-3. ¿Toni netajtanilmej mochiuiliaj miakej keman aksa momikilia, uan toni tanankililmej kitemakaj miak taneltokalismej?

NEJIN netajtanilmej tein miakej mochiuiliaj itech nochi xiujmej tein panoua, motelneki. Yeski tiueyichiuanimej oso amo, uan kampa yeski tinemiskej, tinochin tikmatisnekij itanankililuan.

² Itech capítulo 5 tikitakej ke ika taxtauil, inemilis Jesucristo tein kitemakak, kichiuak maj ueli tinemikan nochipaya. No tikitakej ke Biblia motenkaua ke, “amo aken momikilis ok” (Apocalipsis 21:4). Sayoj ke axkan ayamo ejko nejon tonal uan kisentoka timomikiliaj. Kemej kijtoj tamatkej tekiuaj Salomón, “akin yoltokej kiyekmattokej ke momikiliskej” (Eclesiastés 9:5). Tikchiuaj nochi tein tiuelij maj okachi miak xiujmej tinemikan, sayoj ke tiksentokaj timotajtaniaj toni techpanoua ijkuak timomikiliaj.

³ Keman momikiliaj totasojikniuan oso tochankauan tichokaj, uan xa timotajtaniaj: “¿Toni mochiuak iniuan? ¿Tajyouijtokej? ¿Techyekpiaj? ¿Uelis tikinpaleuiskej? ¿Oksepa tikinitaskej?”. Taneltokalismej tein amo melaujkej kitemakaj tataman tanankililmej.  Sekin tamachtiaj ke akin yolkualmej youij iluikak, uan akin amo yolkualmej youij miktan. Oksekin kijtouaj ke tiyouij kampa yetokej espíritus uan ompa timoajsitij iniuan touejkaujtatuan. Uan sekin kiyekijtouaj ke tipanouaj kampa moajsij nochin mikemej, kampa techixkomakaj uan satepan oksepa tinemij itech okse nakayot.

4. ¿Toni se tanemilil kipiaj miak taneltokalismej ika mikilis?

⁴ Nejon taneltokalismej kipiaj sayoj se tanemilil: kijtouaj ke keman tonakayo momikilia, kisentoka nemi se teisa tein tikpiaj. Miak taneltokalismej, kemej achto uan kemej axkan, kiyekijtouaj ke tiksentokaj tinemij nochipaya, uan tiksentokaj tiuelij titachiaj, titakakij uan titanemiliaj, maski amo akin kimati keniuj. Sayoj ke, ¿ueli mochiua nejon? Totachialis, totakakilis uan totanemilil, ualeuaj itech tokuatixyo, uan ijkuak timomikiliaj amo tekitiok. Tein tikelnamikij, tein tikmachiliaj, totachialis, totakakilis, uan totanemilil, amo kisentokaj yoltokej. Amo, nejon amo ueli mochiua, ta nochi tami keman tokuatixyo momikilia.

5, 6. Kemej kijtoua Biblia, ¿keniuj moajsij mikemej?

⁵ Tein techpanoua amo se teisa tein Jiova amo kimati, akin kichijchiuak tokuatixyo. Yejuatsin kiixmati tein melauak, uan itech iTajtol, Biblia, kimelaua keniuj moajsij mikemej. Ompa techyekmachtia tein mochiua: keman aksa momikilia, amo nemiok. Mikilis amo kemej nemilis, yejua ika mikemej amo tachiaj, amo takakij nion no tanemiliaj. Nion se teisa tein tikpiaj kisentoka nemi keman momikilia tonakayo.  Kemaj, amo tikpiaj se alma oso se espíritu tein amo miki. *

⁶ Satepan keman Salomón kiyekijtoj ke akin yoltokej kimattokej ke momikiliskej, yejua kijkuiloj “sayoj ke akin momikilijkejya [...] amo kimatijok nion teyi”. Ompa, kiajxitij nejon tamachtilis tein melauak keman kijtoj ke mikemej amo uelij tetasojtaj nion no tetauelitaj, uan no kijtoua ke “amo onkak tekit nion teisa tein monemilia mochijchiuas nion taixmatilis nion tamatilis itech Miketekoch” (xikonixtajtolti Eclesiastés 9:5, 6, 10). No ijkon, Salmo 146:4 kijtoua ke keman aksa momikilia, “poliui itanemililuan”; tein kijtosneki ke senkis tami. Tein melauj tejuan timomikiliaj, uan amo tiksentokaj tinemij satepan keman momikilia tonakayo. Tonemilis kemej yeskia tit tein kipia se vela. Keman seui amo youi okseko, ta sayoj poliui.

7. ¿Toni technextilia kemej moajsij mikemej neskayot tein kitalij Jesús?

⁷ Keman Jesús ika tajtoj se itasojikniuj akin momikilijka, kijtoj keniuj moajsij mikemej. Yekinika kiniluij imomachtijkauan: “Totasojikniu Lázaro, yejua axkan kochtok san”. Yejuan kiajsikamatkej ke yekmelauj kochtoya uan ijkon ueliskia pajtiskia. Sayoj ke mopolojtoyaj, ta satepan Jesús kinyekiluij: “Lázaro miyik ya” (xikonixtajtolti Juan 11:11-14). Kemej tikitaj, Jesús kineskayotij mikilis kemej ijkuak tikochij oso timoseuiaj. Itasojikniuj Jesús amo yetoya iluikak nion no miktan. Amo mosentilijka iniuan ángeles nion  no iniuan iuejkaujtatuan, nion no oksepa nemik kemej okse aksa. Moseuijtoya itech mikilis, kemej yeskia kuali kochtoskia, sayoj ke amo takochitaya. Okse tonal, Jesús oksepa kineskayotij mikilis kemej kochilis. Keman kiajokuik iichpoch Jairo kijtoj: “Nijin siuapiltsin amo miyik. Ta, sayo kochtok” (Lucas 8:52, 53). No ijkon, tatitanil Pablo kijkuiloj ke sekin akin nemiaj itech itonaluan ‘kochkajya itech mikilis’ (1 Tesalonicenses 4:13).

8. ¿Keyej senkis tikmatij ke amo katka itanejnekilis Dios maj timomikilikan?

⁸ ¿Katka itanejnekilis Dios maj timomikilianij? Amo keman ijkon kinekik. Jiova techchijchiuak maj tinemikan nochipaya nikan taltikpak. Kemej tikitakejya itech nejin amaix, Dios kitalij yekinika takat uan yekinika siuat itech se kualtsin xochital, uan kintiochiuak maj nion tepitsin kokolispeuanij. Moyekita ke kinnejnekiliaya tein okachi kuali. ¿Xe moajsi se tepopaj tetasojtakej maj kinnejnekili ikoneuan, maj ueuentsintiakan uan maj momikilikan? ¿Melauj ke amo? No ijkon, Jiova kintasojtaya ikoneuan uan kinnejnekiliaya maj yolpakinij nochipaya nikan taltikpak. Tein melauj, Biblia kijtoua ke Dios kintalilij “itech ininyolo maj kinejnekikan nemiskej nochipaya” taltikpakneminij (Eclesiastés 3:11). Kemaj, Dios techchijchiuak maj tiknekikan tinemiskej nochipaya, uan kichiuak nochi tein moneki uan ijkon uelis tikpiaskej nejon tein tiknejnekij.

9. ¿Toni Jiova kiluij Adán tein amo ueliskia kichiuaskia, uan keyej amo katka ouij kitakamatis nejon tanauatil?

⁹ Komo ijkon, ¿keyej timomikiliaj? Moneki tikyekitaskej  tein mochiuak keman yekinika sayoj moajsia se takat uan se siuat nikan taltikpak, uan ijkon tikajsiskej tanankilil. Biblia kimelaua: “Jiova Dios kichiuak maj moskaltiani nikan taltikpak nochi tataman koujmej tel kualtsitsin, uan itakilo kuali se kimajseuaskia” (Génesis 2:9). Sayoj ke, moajsia se taman tein amo ueliskiaj kichiuaskiaj. Dios kiluij Adán: “Nochi itakilo koujmej tein moajsij itech xochital uelis tikuas hasta tiixuis. Sayoj ke kouit tein kiixnextia taixmatilis ika tein kuali uan tein amo kuali, moneki amo tikuas, porin itech tonal keman tikuas, yekmelauj timomikilis” (Génesis 2:16, 17). Amo katka se tanauatil tein tel ouij kitakamatiskiaj, ta onkaya okseki koujtakilomej tein Adán uan Eva ueliskiaj kikuaskiaj. Sayoj ke yejuan, ika nejon tanauatil ueliskiaj kinextiskiaj ke motasojkamatiaj iuan Dios, akin kinmakaka nochi, ijkon kemej nemilis tein amo kipiaya tajtakol. Komo tatakamatiskiaj, kinextiskiaj ke kipoujkaitayaj ueyi tanauatil tein kipia ininDios akin nemi iluikak, uan no kinextiskiaj ke kinekiaj kiseliskej itanauatiluan tein kinmakaya ika netasojtalis.

10, 11. 1) ¿Toni kinchiualtij Adán uan Eva maj amo kitakamatinijok Dios? 2) ¿Keyej katka se ueyi tajtakol maj amo tatakamatinij?

¹⁰ Tetayokoltij tein kichiujkej Adán uan Eva, porin kiixpejpenkej amo kitakamatiskej Jiova. Ijkuak Satanás tajtoj itenkopa se kouat, kitajtanij Eva: “¿[Yekmelauj] Dios kijtoj ke moneki amo nankikuaskej nochi  itakilo koujmej tein moajsij itech xochital?”. Siuat tanankilij: “Itakilo koujmej tein moajsij itech xochital uelis tikuaskej. Sayoj ke itakilo kouit tein moajsi tatajko itech xochital, Dios kijtoj: ‘Moneki amo nankikuaskej, amo, moneki amo nankimatokaskej uan ijkon amo nanmikiskej’” (Génesis 3:1-3).

¹¹ Satanás kijtoj: “Amo nanmikiskej. Porin Dios kimati ke itech tonal keman nankikuaskej koujtakilot,  nanixtajtapouiskej uan nanmochiuaskej kemej Dios, uan nankiixmatiskej tein kuali uan tein amo kuali” (Génesis 3:4, 5). Amokuali kinekia kiajsikamatiltis Eva ke okachi kuali kipanoskia komo kikua koujtakilot tein kiluijkaj maj amo kimajseua. No kiajsikamatiltij ke iselti ueliskia kiitas toni kuali uan toni amo kuali; oso ika okseki tajtolmej, ueliskia kichiuaskia tein kinekiskia. Satanás no kijtouilij Jiova, ke amo melauak kinpanoskia tein yejuatsin kijtoj komo kikuaskiaj koujtakilot. Eva kineltokilij uan yejua ika kikuik koujtakilot uan kiyekoj. Ompa, kimakak inamik uan no kikuaj. Amo kijtosnekia ke kinpolouaya taixmatilis. Yejuan kuali kimatiaj ke kichiujtoyaj tein Dios kintakaualtijka. Keman kikuajkej koujtakilot, kiyekmattoyaj ke amo kitakamatkej se tanauatil tein amo ouij uan taixejekol. Ika tein kichiujkej, kiixtopeujkej ininDios akin nemi iluikak uan iueyi tayekanalis. ¡Tel amo kipoujkaitakej ininDios tetasojtakej! Uan tein kichiujkej amo kipiaya netapojpoluilis.

12. ¿Toni uelis techpaleuis maj tikajsikamatikan keniuj momachilij Jiova keman Adán uan Eva kinekepilijkej?

¹² Xionmonemili ke se mokonetsin akin tikoniskaltij uan tikonyekpiak amo mitsontakamati, uan kinextia ke nion tepitsin mitsonpoujkaita nion no mitsontasojta. ¿Melauj ke mitsonyolkokoskia? Axkan, xionmonemili keniuj momachilij Jiova keman Adán uan Eva kinekepilijkej.

13. ¿Toni Jiova kiluij Adán tein kipanoskia keman momikiliskia, uan toni kijtosneki nejon?

¹³ Adán uan Eva amo kitakamatkejok Jiova, uan amo onkaya keyej kinkauaskia maj neminij nochipaya. Ika tamik, momikilijkej, ijkon kemej Dios kinnejmachtijka. Satepan amo nemiajok. Kemaj,  amo nemitoj okseko kemej espíritus. Ijkon kinextia itajtoluan Jiova keman kiluij yekinika takat tein kipanoskia ijkuak amo tatakamatikok: “[Timokepas] itech tal, porin ika tichijchiujtok. Porin titalnex uan talnex timokepas” (Génesis 3:19). Dios kichijchiujka Adán ika talnex tein moajsi talpan (Génesis 2:7). Keman Adán ayamo kichijchiuayaj, amo nemia. Yejua ika, keman Jiova kiluij ke mokepaskia talnex, kiluijtoya ke mochiuaskia kemej achto, tein kijtosneki, amo nemiskiaok. Adán amo kipiaskia nemilis, ijkon kemej talnex tein ika kichijchiujkej.

14. ¿Keyej timomikiliaj?

 ¹⁴ Adán uan Eva ueliskiaj nemiskiaj axkan, sayoj ke momikilijkej porin kiixpejpenkej amo kitakamatiskej Dios uan ijkon tajtakojkej. Uan kemej tiikoneuan Adán, techpanoltilij tajtakol uan mikilis, uan yejua ika tejuan timomikiliaj (xikonixtajtolti Romanos 5:12). Nejon tajtakol kemej yeskia se tel pitsotik kokolis tein aksa kipia uan nochin ikoneuan kinpanoltilijtiuj uan nion se mopaleuia. Uan itamilis yejua mikilis. Nejon amo se tetasojikniuj oso se tatiochiualis, ta kemej yeskia se aksa tel tetauelitakej (1 Corintios 15:26, TNM). Sayoj ke Jiova kitemakak taxtauil tein ika techmakixtia itech mikilis tein tamati kemej se aksa tel tetauelitakej. ¡Semi moneki timotasojkamatiskej!

15. ¿Keyej techyolseuia tikmatiskej tein yekmelauj techpanoua keman timomikiliaj?

¹⁵ Semi techyolseuia tikmatiskej tein Biblia tamachtia kemej moajsij mikemej. Kemej tikitakejya, amo tajyouiaj nion no teyi kinkokoua. Yejua ika amo uelij techchiuiliaj nion teyi, uan amo onkak keyej tikinmouiliskej. Amo ueli tikinpaleuiaj nion no ueli techpaleuiaj. Amo ueli iniuan titajtouaj nion no yejuan touan. Moajsij miakej tayekananij itech taneltokalis akin kiyekijtouaj ke uelij kinpaleuiaj mikemej, uan kemej taltikpakneminij kineltokaj nejon takajkayaualis, kinmakaj tomin. Sayoj ke tikmatiskej tein melauak kinpanoua mikemej amo techkajkayauajok ika nochi nejon.

16. ¿Akoni kinpojpolojtok itech inintamachtilis miak taneltokalismej, uan keniuj kichiua?

¹⁶ ¿Nochin taneltokalismej kiseliaj tein kijtoua  Biblia kemej moajsij mikemej? Miakej amo. ¿Keyej? Porin Satanás kinpojpolojtok itech inintamachtilis. Yejua kitekitiltia taneltokalis tein amo melauak, uan ika nejon ueli kichiua maj taltikpakneminij kineltokakan, ke satepan keman aksa momikilia, kisentoka nemi okseko kemej espíritu. Uan no, nejin takajkayaualis kisentilia ika okseki takajkayaualis uan ika nejon kinuejkatilia taltikpakneminij iuan Jiova Dios. ¿Keniuj kichiua?

17. ¿Keyej kimouispoloua Jiova taneltokalis ke moajsi se miktan, kampa kinchichinojtok nochipaya akin amo yolkualmej?

¹⁷ Kemej tikitakejya, sekin taneltokalismej tamachtiaj ke akin amo yolkualmej tajyouitij miktan nochipaya. Nejin taneltokalis kimouispoloua Jiova, ta yejuatsin se Dios tetasojtakej uan amo keman kichichinojtoskia nion akin (xikonixtajtolti 1 Juan 4:8). ¿Keniuj tikonitaskia tejuatsin se takat maj kimachichinojtoskia ikonetsin akin amo kitakamatik? ¿Tikonpoujkaitaskia? ¿Tikonnekiskia maski sayoj tikonitas? ¿Melauj ke amo? Amo tiomeyolouaj ke tikonitaskia tel amo yolkuali. Yejua nejon tein Satanás kineki maj timoluikan ke Jiova kintajyouiltia taltikpakneminij itech tit nochipaya.

18. ¿Itech toni takajkayaualis tein uitse itech taneltokalis tein amo melauak mokixtia keman kinueyichiuaj mikemej?

¹⁸ Satanás no kitekitiltia seki taneltokalismej, kampa kichiua maj motamachti ke mikemej mochiuaj espíritus, uan akin yoltokej moneki kinpoujkaitaskej. Akin ika tamachtiaj nejin tanemilil, kijtouaj ke espíritus uelis mochiuaskej tasojiknimej chikaujkej oso tetauelitanij tamouililmej. Kemej miakej kineltokaj nejin takajkayaualis, kinmouiliaj uan yejua ika kinpoujkaitaj uan kinueyichiuaj. Biblia amo yejua nejon  tamachtia, ta kijtoua ke mikemej kochtokej uan sayoj moneki tikueyichiuaskej Jiova, Dios akin melauak, akin kichijchiuak nochi uan techmakatok nochi (Apocalipsis 4:11).

19. ¿Toni okse tamachtilis tein kitemaka Biblia ueli tikajsikamatij keman tikmatij keniuj yekmelauj moajsij mikemej?

¹⁹ Keman tikmatij keniuj yekmelauj moajsij mikemej, amo techkajkayauaj tamachtilismej tein ualeuaj itech taneltokalis tein amo melauak. Uan no, okachi kuali tikajsikamatij okseki tamachtilismej tein kitemaka Biblia. Se taman yejua tein Dios motenkaujtok kichiuas, maj tinemikan nochipaya itech Xochital. Nejin nechialis tikitaj yekmelauj mochiuas keman timomachtiaj ke mikemej amo okseko nemitij kemej espíritus.

20. ¿Toni netajtanil tikitaskej itech okse capítulo?

²⁰ Ne tel uejkauj, Job akin amo keman kikauak Dios, tajtanik: “Komo se takat momikilia, ¿uelis oksepa nemis?” (Job 14:14). Ika okseki tajtolmej, ¿uelis oksepa nemiskej akin kochtokej itech mikilis? Tanankilil tein kitemaka Biblia tel teyolseuia, kemej tikitaskej itech okse capítulo.