1-3. Ko e heigoa e tau hūhū ne hūhū he tau tagata hagaao ke he mate, ti ko e heigoa e tau tali he tau lotu kehekehe?

KO E tau hūhū anei ne manamanatu e tau tagata ki ai ke he afe e tau tau. Ko e tau hūhū aoga a ia. Ti pete ni ko hai a tautolu po ke mena ne nonofo ai a tautolu, kua lauia takitokotaha a tautolu he tau tali.

² He veveheaga kua mole, ne fakatutala a tautolu ke he puhala ne hafagi he poa lukutoto ha Iesu Keriso e puhala ke he moui tukulagi. Kua ako foki e tautolu na talahau tuai he Tohi Tapu e magaaho ka “nakai tuai fai mate.” (Fakakiteaga 21:4) Ka e he magaaho nei, kua mamate oti a tautolu. “Ko lautolu kua momoui, kua iloa e lautolu to mamate a lautolu,” he talahau he patuiki pulotu ko Solomona. (Fakamatalaaga 9:5) Kua lali a tautolu ke leva e moui. Ka e manamanatu agaia a tautolu ke he mena ka tupu ki a tautolu ka mamate.

³ Ka mamate e tau fakahele ha tautolu, kua maanu a tautolu. Mo e liga hūhū hifo a tautolu: ‘Ko e heigoa ne tupu ki a lautolu? Kua matematekelea kia a lautolu? Hane onoono mai kia a lautolu ki a tautolu? Maeke nakai ia tautolu ke lagomatai a lautolu? To liliu nakai a tautolu ke kitia a lautolu?’ Kua kehekehe e tau tali he tau lotu he lalolagi ke he tau hūhū nei. Ne fakaako he falu kaeke kua mitaki e puhala moui haau, to hake a koe ke he lagi ka e ka kelea e puhala moui haau, to vela a koe he matakavi fakakikiveka. Ka e fakaako he falu lotu, ka mamate e tau tagata to o atu a lautolu ke he takatakaiaga fakaagaaga ke fakalataha  mo e tau tupuna ha lautolu. Ka e fakaako agaia he falu lotu kua o atu e tau tagata mamate ke he matakavi ke fakafili ti fakafaliu e tau tino, po ke liu fanau ke he taha tino foki.

4. Ko e heigoa e matapatu manatu ne tatai ke he tau lotu loga hagaao ke he mate?

⁴ Ko e tau fakaakoaga fakalotu pihia kua taha ni e matapatu manatu—kua fai vala ia tautolu ne hao mai he tino ka mate. Hagaao ke he laulahi he tau lotu, he vahā ia mo e vahā nei, kua fai kakano galo ke maeke ia tautolu ke momoui tukulagi, maeke ke kitia, logona, mo e manamanatu. Ka e, maeke fēfē e mena ia? Na matutaki e tau logonaaga, katoa mo e tau manatu ha tautolu ke he gahuahua he uhoniu. Ti ka mate, kua nakai gahua e uhoniu. Ko e tau manamanatuaga, tau logonaaga mo e tau lotomatala ha tautolu kua nakai maeke mogoia ke matutaki ke igatia ni mo e gahuahua ke he taha puhala galo. Ka mate e uhoniu ha tautolu, ti nakai gahuahua e tau logonaaga ia.

5, 6. Ko e heigoa ne fakaako he Tohi Tapu hagaao ke he tuaga he tau tagata mamate?

⁵ Ko e mena ka tupu he mate kua nakai galo ki a Iehova, ko e Tufuga he uhoniu. Ne iloa e ia e kupu mooli, mo e i loto he Kupu haana, ko e Tohi Tapu, ne fakamaama e ia e tuaga he tau tagata mamate. Kua fakaako fakamahino mai: Ka mate e tagata, kua nakai moui a ia. Kua kehe e mate mai he moui. Kua nakai kitia po ke logona po ke manamanatu e tau tagata mamate. Mo e nakai fai vala he tino ha tautolu kua moui he magaaho ka mate. Kua nakai ha i loto ia tautolu e agaaga ne nakai maeke ke mate. *

⁶ He mole e mailoga e Solomona na iloa he tau tagata momoui to mamate a lautolu, ne tohia e ia: “Ka ko lautolu ne mamate nakai iloa e lautolu ha mena.” Ne fakalaulahi atu a ia hagaao ke he kupu mooli ia he talahau kua nakai maeke e tau tagata mamate ke fakaalofa po ke vihiatia “ha kua nakai fai  gahua, po ke manamanatu, po ke mena kua iloa, po ke iloilo ke he tukuaga.” (Totou Fakamatalaaga 9:5, 6, 10.) Tatai foki, ne pehē e Salamo 146:4 ka mate e tagata, “kua mate ai hana tau manatu.” Ko e tau tagata a tautolu ti nakai hao ka mamate e tau tino ha tautolu. Ko e moui hane olioli e tautolu kua tuga e puho he kanela. Ka tamate ai, ti nakai fano e puho ke he taha mena. Kua galo tuai.

7. Fakamaama fēfē e Iesu ko e heigoa ne tatai mo e mate?

⁷ Ne vagahau a Iesu Keriso hagaao ke he tuaga he tau tagata mamate. Tutala pihia a ia hagaao ki a Lasalo, ko e tagata ne iloa mitaki e ia ka kua mate tuai. Ti tala age a Iesu ke he tau tutaki haana: “Kua mohe tuai ha tautolu a kapitiga ko Lasalo.” Ne manatu e tau tutaki ha Iesu kua okioki a Lasalo he mohe, ke malolō mai he gagao. Ka kua hepe a lautolu. Ne fakamaama e Iesu: “Kua mate tuai a Lasalo.” (Totou Ioane 11:11-14.) Mailoga ne fakatatai e Iesu e mate ke he okioki mo e mohe. Kua nakai ha ha a Lasalo he lagi po ke he afi velagia. Kua nakai feleveia a ia mo e tau agelu po ke tau tupuna. Kua nakai liu fanau a Lasalo ke eke mo tagata kehe. Kua okioki a ia ke he mate, tuga kua mohe pulumohea ka e nakai miti. Ne fakatatai foki he falu kupu tohi e mate ke he mohe. Ke fakatai, he magaaho ne pinimaka e tutaki ko Setefano ke mate, ne pehē e Tohi Tapu “ati mohe ai a ia.” (Gahua 7:60) Tatai foki, ne tohia he aposetolo ko Paulo hagaao ke he falu he vahā haana ne “kua momohe” ke he mate.—1 Korinito 15:6.

8. Iloa fēfē e tautolu ne nakai ko e finagalo he Atua ke mamate e tau tagata?

⁸ Ko e finagalo fakamua kia he Atua ke mamate e tau tagata? Nakai pihia! Ne eke e Iehova e tau tagata ke momoui tukulagi ke he lalolagi. Tuga ne ako fakamua e tautolu i loto he  tohi nei, ne tuku he Atua e hoa tagata fakamua ke he parataiso fulufuluola. Ne fakamonuina e ia a laua aki e malolō tino mitaki katoatoa. Ne manako ni a Iehova ke moua e laua e mitaki. Manako nakai ha matua loto fakaalofa ma e fanau haana ke matematekelea ke he mamahi he vahā fuakau mo e mate? Nakai! Kua fakaalofa a Iehova ke he fanau haana mo e manako ke olioli e lautolu e fiafia tukulagi ke he lalolagi. Hagaao ke he tau tagata, ne talahau e Tohi Tapu: “Kua tuku foki e [Iehova] e manatu ke he tukulagi ke he tau loto ha lautolu.” (Fakamatalaaga  3:11) Ne tufuga he Atua a tautolu mo e manako ke moui tukulagi. Ti kua hafagi e ia e puhala ke fakamooli e manako ia.

9. Ko e heigoa e fakakaupāaga ne tuku e Iehova ki a Atamu, mo e ko e ha ne nakai uka ke omaoma e poaki nei?

⁹ Ko e ha, mogoia, ne mamate e tau tagata? Ke moua e tali, kua lata ia tautolu ke kikite ke he mena ne tupu he magaaho ne tokotaha ni e tagata taane mo e fifine he lalolagi. Ne fakamaama he Tohi Tapu: “Ne fakatupu foki e Iehova ko e Atua ke he fonua e tau akau oti kua fulufuluola he kitekite, mo e mitaki ke kai.” (Kenese 2:9) Ka e, taha e fakakaupāaga. Ne tala age a Iehova ki a Atamu: “Ko e tau akau oti kana ha he kaina ke kai ai ni e koe. Ka ko e akau ke iloa ai e mitaki mo e kelea, aua neke kai ai e koe; ha ko e aho ka kai ai e koe to mate ai ni a koe.” (Kenese 2:16, 17) Kua nakai uka ke omaoma e poaki nei. Kua ha ha ai foki e tau akau loga ne kua maeke ia Atamu mo Eva ke kai. Ka kua moua e laua mogonei e magaaho pauaki ke fakakite e loto fakaaue ki a Ia ne foaki ki a laua e tau mena oti kana, fakalataha mo e moui mitaki katoatoa. To fakakite foki he omaoma ha laua kua fakalilifu e laua e pule he Matua he lagi mo e kua fiafia a laua ke he takitakiaga fakaalofa haana.

10, 11. (a) Fakaohooho fēfē e hoa mau fakamua ke nakai omaoma ke he Atua? (e) Ko e ha ne kelea lahi ai e nakai omaoma ha Atamu mo Eva?

¹⁰ Momoko ni, ne fifili e hoa mau fakamua ia ke nakai omaoma ki a Iehova. He vagahau puhala he gata, ne hūhū a Satani ki a Eva: “Ko e moli kia kua pehe mai e Atua, aua neke kai e mua ke he tau akau oti he kaina?” Ne tali a Eva: “Mena kai e maua e tau fua he tau akau he kaina. Ka ko e fua he akau ha he vaha loto he kaina, ne pehe mai e Atua, Aua neke kai ai e maua, po ke pipiki a maua ki ai, neke mamate a maua.”—Kenese 3:1-3.

¹¹ “Nakai ni mamate a mua,” he talahau e Satani. “Ha kua fioia he Atua ko e aho ka kai ai e mua, ti fakaala ai ha mua a tau mata; ti eke ai ni a mua ke tuga ne tau atua ke iloa ai e mitaki mo e kelea.” (Kenese 3:4, 5) Ne manako a Satani ki a Eva ke talitonu to fai mena aoga ka moua e ia ka kai e fua akau fakatapu. Ti kua talahau e Satani, kua maeke ia Eva ke fifili ni e ia e mena  hako mo e hepe; maeke a ia ke taute e mena ne manako. Ne paleko foki a Satani kua pikopiko a Iehova hagaao ke he mena ka tupu he kai e fua akau. Ne talitonu a Eva ki a Satani. Ati tau e ia e falu fua akau mo e kai ai. Ti age ai e ia ke he taane haana, mo e kai foki e ia. Nakai kakano kua taute e laua he nakai iloa. Iloa mooli e laua kua taute e laua e mena ne tala age e Atua ke nakai taute. He kai e fua akau, kua nakai omaoma pauaki a laua ke he poaki mukamuka mo e kakano mitaki. Ne fakakite e laua e nakai fakalilifu ma e Matua he lagi mo e pule haana. Ko e nakai fakalilifu ia ma e Tufuga loto fakaalofa ha laua kua nakai lata ke fakamagalo!

12. Ko e heigoa ka lagomatai a tautolu ke maama e logonaaga ha Iehova he mogo ne totoko a Atamu mo Eva ki a ia?

¹² Ke fakatai: To fēfē la a koe kaeke feaki mo e leveki e koe  e tama taane po ke tama fifine ti kua nakai omaoma ki a koe ke he puhala ne fakakite e nakai fakalilifu po ke fakaalofa haana ki a koe? To fakamamahi lahi he mena ia e loto haau. Manamanatu la mogoia ke he mamahi ne logona e Iehova he totoko a Atamu mo Eva ki a ia.

13. Ko e heigoa ne talahau e Iehova ka tupu ki a Atamu ka mate, mo e ko e heigoa e kakano he mena nei?

¹³ Kua nakai fai kakano a Iehova ke toka leva a Atamu mo Eva ne nakai omaoma. Ne mamate a laua, tuga ni he talahau e ia. Kua nakai momoui a Atamu mo Eva. Ne nakai o atu a laua ke he takatakaiaga fakaagaaga. Kua iloa e tautolu e mena nei ha ko e mena ne tala age e Iehova ki a Atamu he mole e fakafehagai mo ia ha ko e nakai omaoma haana. Ne talahau e Atua: “Ato liu a koe ke he kelekele; ha ko e mena eke mai ai a koe; ha ko e efuefu ni a koe, to liu foki a koe ke he efuefu.” (Kenese 3:19) Ne eke he Atua a Atamu mai he efuefu he kelekele. (Kenese 2:7) Ato hoko e magaaho ia, ne nakai fai Atamu. Ko e mena ia, he magaaho ne talahau e Iehova to liu a Atamu ke he efuefu, kua pehē a Ia to liu a Atamu ke he tuaga nakai moui. To nakai moui a Atamu ke tuga e efuefu ne taute aki a ia.

14. Ko e ha ne mamate a tautolu?

¹⁴ Ne maeke a Atamu mo Eva ke momoui agaia he vahā nei, ka kua mamate a laua he fifili ke nakai omaoma ke he Atua ati hala ai. Ko e kakano ne mamate ai a tautolu ha ko e tuaga agahala mo e mate ha Atamu ne fakaholo hifo ke he tau hologa oti kana haana. (Totou Roma 5:12.) Ko e agahala ia kua tuga e gagao kelea lahi ne nakai maeke he taha ke hao mai ai. Ti ko e malaia ne tupu mai ko e mate. Ko e fī e mate, nakai ko e kapitiga. (1 Korinito 15:26) Ko e loto fakaaue ha ia ha tautolu he foaki mai e Iehova e lukutoto ke fakahao a tautolu mai he fī matakutakuina nei!

15. Ko e ha ne mafanatia ai ke iloa e kupu mooli hagaao ke he mate?

¹⁵ Kua mafanatia e mena ne fakaako he Tohi Tapu hagaao ke he tuaga ha lautolu ne mamate. Tuga he kitia e tautolu, kua nakai matematekelea e tau tagata mamate he  mamahi po ke loto malipilipi. Kua nakai fai kakano ke matakutaku ki a lautolu, ha kua nakai maeke ia lautolu ke fakamamahi a tautolu. Kua nakai manako a lautolu ke he lagomatai ha tautolu, ti nakai maeke ia lautolu ke lagomatai a tautolu. Kua nakai maeke ia tautolu ke tutala mo lautolu, mo e nakai maeke ia lautolu ke tutala mo tautolu. Tokologa e tau takitaki lotu ne fakavai kua maeke ia lautolu ke lagomatai a lautolu ne mamate, ti ko e tau tagata ne talitonu ke he tau takitaki pihia ne foaki age e tau tupe ki ai. Ka e he iloa e kupu mooli kua puipui a tautolu mai he fakavaia ha lautolu ne fakaako e tau pikopiko pihia.

16. Ko hai ne fakaohooho e tau fakaakoaga he tau lotu loga, mo e ke he puhala fe?

¹⁶ Talia nakai he lotu haau e fakaakoaga he Tohi Tapu hagaao ke he tau tagata mamate? Laulahi ne nakai. Ko e ha? Ha kua fakaohooho e Satani e tau fakaakoaga ha lautolu. Ne fakaaoga e ia e lotu fakavai ke fakaohooho e tau tagata ke talitonu ka mate e tino, to matutaki atu a lautolu ke moui he takatakaiaga fakaagaaga. Ko e pikopiko anei ne lafilafi e Satani mo e falu a pikopiko foki ke fuluhi kehe e tau tagata mai ia Iehova ko e Atua. He puhala fe?

17. Ko e ha e fakaakoaga he fakakikiveka tukulagi ne nakai fakalilifu a Iehova?

¹⁷ Tuga ne mailoga fakamua, ne fakaako he falu lotu ka kelea e puhala moui he tagata, ka mate to fina atu a ia ke he matakavi he afi fakakikiveka ke matematekelea tukulagi. Kua nakai fakalilifu he fakaakoaga nei e Atua. Ko Iehova ko e Atua he fakaalofa mo e to nakai fakamatematekelea e tau tagata ke he puhala nei. (Totou 1 Ioane 4:8.) Fēfē la e manatu haau ke he tagata ne fakahala e tama liuliu he tuku e tau lima haana ke he afi? To fakalilifu nakai e koe e tagata ia? Ti to manako foki nakai a koe ke iloa a ia? Nakai! Liga manatu a koe ko e vale ha ia he tagata ia. Ka kua manako a Satani ke talitonu e tautolu na fakakikiveka tukulagi e Iehova e tau tagata ke he afi—ke he tau piliona e tau tau!

18. Ko e heigoa e pikopiko fakalotu ne fakavē ki ai e tapuaki ke he tau tagata mamate?

¹⁸ Kua fakaaoga foki e Satani e falu lotu ke fakaako ka mole e  mate to eke e tau tagata mo tau agaaga ne lata he tau tagata momoui ke fakalilifu mo e fakaheke ki ai. Hagaao ke he fakaakoaga nei, kua maeke he tau agaaga he tau tagata mamate ke eke mo tau kapitiga malolō po ke tau fī matakutakuina. Tokologa e tau tagata ne talitonu ke he pikopiko nei. Ne matakutaku a lautolu ke he tau tagata mamate mo e foaki ki a lautolu e lilifu mo e tapuakiaga. Ke he taha faahi, ne fakaako he Tohi Tapu kua momohe a lautolu ne mamate ti kua lata ia tautolu ke tapuaki ke he Atua mooli tokotaha, ko Iehova, ko e ha tautolu a Tufuga mo e Foaki.—Fakakiteaga 4:11.

19. He iloa e kupu mooli ke he mate kua lagomatai a tautolu ke maama foki falu fakaakoaga fe he Tohi Tapu?

¹⁹ He iloa e kupu mooli hagaao ke he tau tagata mamate ka puipui a koe mai he fakahehē he tau pikopiko fakalotu. Kua lagomatai foki a koe ke maama falu fakaakoaga he Tohi Tapu. Ke fakatai, he mailoga e koe kua nakai o atu e tau tagata ke he takatakaiaga fakaagaaga ka mamate, to kakano mooli e maveheaga ke he moui tukulagi he lalolagi parataiso ki a koe.

20. Ko e heigoa e tau hūhū ka kikite a tautolu ki ai he veveheaga ka mui mai?

²⁰ Kua leva tuai e hūhū he tagata tututonu ko Iopu e hūhū nei: “Ka mate e tagata to liu moui mai kia a ia?” (Iopu 14:14) Kua maeke kia e tagata nakai moui hane mohe ke he mate ke liu fakamoui? Ko e fakaakoaga he Tohi Tapu hagaao ke he mena nei kua mafanatia lahi, tuga ka fakakite he veveheaga ka mui mai.