1-3. ¿Te mä ntꞌani o̱tꞌe yä jäꞌi de rä du ꞌne te mä mpengi uni ndunthi yä relijion?

GEHYA rꞌa de nuꞌu̱ yä ntꞌani xä yꞌo̱tꞌe yä jäꞌi po yä mꞌotho yä je̱ya. Hindi mporta toꞌogihu̱ ꞌne habu̱ di ꞌmu̱ihu̱, gatꞌho di ne gä pädihu̱ yä mpengi nuya yä ntꞌani.

² Ha näꞌä rä ntheke bi thogi, dä handihu̱ hanja ko näꞌä njutꞌi bi uni rä Zi Dada Jeoba nuꞌmu̱ bä pe̱hni Ñhesukristo pa bi du po nuju̱, bi xoki rä ꞌñuu pa dä za gä pe̱ꞌtsihu̱ rä te pa nzäntho. ꞌNehe, dä pädihu̱ xä ñho ge rä Mäkä Tꞌofo di promete ge «ya hindä nja rä du» (Apocalipsis [Revelación] 21:4). Pe mientra dä zo̱ho̱ näꞌä paꞌä, gatꞌho di tuhu̱. Ja ngu bi yꞌofo rä rey Salomon, «nuꞌu̱ te, pädi ge ma dä du» (Eclesiastés 9:5). Nuju̱ xa di o̱tꞌehu̱ ntsꞌe̱di pa gä ꞌmu̱ihu̱ ndunthi yä je̱ya, pe mäske njabu̱ di sigi di ñꞌanihu̱: ¿te thogi kongekhu̱ nuꞌmu̱ di tuhu̱?

³ Nuꞌmu̱ di zonihu̱ ngeꞌä xtä ꞌme̱dihu̱ nꞌa mä jäꞌihu̱ ha rä du, zäi ge nuju̱ di ñꞌanihu̱: «¿Te xä thogi kongeꞌä? ¿Bi sufri? ¿Dä za dä sugägi? ¿Dä za gä fatsꞌi? ¿Ma dä za gä handi mänꞌaki?». Yä relijion de gatꞌho  rä xiꞌmhai uni rꞌa nꞌañꞌo yä mpengi pa nuyu̱ yä ntꞌani. Rꞌaa, udi ge nuꞌu̱ yä hojäꞌi xä du, pa ha mähetsꞌi, ꞌne ge nuꞌu̱ yä tsꞌomꞌu̱i, di ꞌme̱hni ha rä nidu. Märꞌaa, udi ge nuꞌu̱ tu, pa habu̱ bi ꞌmu̱i gatꞌho yä espiritu. ꞌNehe, ja rꞌa yä relijion nuꞌu̱ udi ge nuꞌu̱ yä jäꞌi tu, mꞌe̱tꞌo bri juzga ꞌne bi tꞌapäbi ngue̱nda de gatꞌho näꞌä bi yꞌo̱tꞌe, ꞌnepu̱ enä ge bi pengi pa dä mꞌu̱i ha rä ndoyꞌo mä nꞌa rä jäꞌi o nꞌa rä zuꞌue.

4. ¿Te udi ndunthi yä relijion de rä du?

⁴ Ndunthi yä relijion, mähye̱gi udi ge di pe̱ꞌtsihu̱ nꞌa rä alma näꞌä sigi te mꞌe̱fa de gä tuhu̱. Kasi gatꞌho yä relijion de mäyaꞌmu̱ ꞌne de mäpaya udi ge nuꞌmu̱ tu nꞌa rä jäꞌi, bi sigi bi ꞌmu̱i pa nzäntho ha mä nꞌa rä luga, ꞌne ge sigi handi, o̱de, ꞌne di mbeni. Pe, ¿mäjuäni näꞌä kamfri? Nuju̱ di pädihu̱ ge ko rä mfatsꞌi mä bo̱yꞌohu̱ dä za gä handihu̱, gä o̱dehu̱ ꞌne gä mbenihu̱. Pe nuꞌmu̱ di tuhu̱, ꞌnehe tu mä bo̱yꞌohu̱, ꞌne ja huadibu̱ gatꞌho näꞌä di tsahu̱ ꞌne di mbenihu̱.

5, 6. Ja ngu udi rä Mäkä Tꞌofo, ¿te thogi ko nuꞌu̱ yä jäꞌi xä du?

⁵ Rä Zi Dada Jeoba pädi xä ñho näꞌä thogi nuꞌmu̱ di tuhu̱, ngeꞌä go geꞌä mä Hyokätehu̱. Näꞌä pädi näꞌä mäjuäni, ꞌne ha rä Noya xikägihu̱ te thogi ko nuꞌu̱ yä jäꞌi xä du. Rä Mäkä Tꞌofo udi ge nuꞌmu̱ tu nꞌa rä jäꞌi, ja huadini rä te. Ha rä du ja tsꞌe̱hnitho rä te, hänge nuꞌu̱ xä du hinte handi, hinte o̱de ha nixi hinte di mbeni. Nuꞌmu̱ di tuhu̱ hinte pongi de gekhu̱. Nuju̱ hindi pe̱ꞌtsihu̱ nꞌa rä alma o espiritu näꞌä hingi tu. *

 ⁶ Rä rey Salomon bi yꞌofo: «Nuꞌu̱ yä jäꞌi te, pädi ge ma dä du, pe nuꞌu̱ xä du, nuꞌu̱ hinte pädi». ꞌNepu̱ bi sigi bi mää ge nuꞌu̱ yä jäꞌi xä du, ya hingi tsa dä uni rä mhäte nixi hingi tsa dä ñꞌu̱tsate ꞌne ge «hinte mä ꞌme̱fi, hinte mä mfeni, hinte mä mfädi, nixi hinte mä bämhñä bi ja ha rä ntꞌagi» (hñeti Eclesiastés 9:5, 6, 10). Njabu̱ ꞌnehe, rä Salmo 146:4 mää ge nuꞌmu̱ tu nꞌa rä jäꞌi, «di mꞌe̱di gatꞌho yä mfeni». Hää, nuꞌmu̱ tu mä ndoyꞌohu̱ ꞌne mä bo̱yꞌohu̱, ja huapu̱tho gatꞌho. Mä tehu̱ dä za gä komparahu̱ ko rä ñotꞌi nꞌa rä yoo, nuꞌmu̱ xti huetꞌi hiñhabu̱ pa, se̱he̱ di huetꞌi ꞌne ja huahnitho gatꞌho.

7. ¿Konte bi kompara rä Hesu nuꞌmu̱ tu yä jäꞌi?

⁷ Rä Hesu bi mää te thogi ko nuꞌu̱ yä jäꞌi xä du. Mi du nꞌa de nuꞌu̱ yä ntsitsꞌi, rä Hesu bi ꞌñembäbi nuꞌu̱ yä de̱ni: «Mä amigohu̱ rä Lasaro bi ähä». Nuꞌu̱ yä de̱ni rä Hesu bi ntiende ge Lasaro mi ähä pa dä hogi de nꞌa rä ñheni mi pe̱ꞌtsi. Pe nuꞌu̱ hingä xki ntiende näꞌä xki mää rä Hesu, hänge näꞌä bi ꞌñembäbiꞌu̱: «Rä Lasaro xä du» (hñeti Juan 11:11-14). Ja ngu di handihu̱, rä Hesu bi kompara rä du ko rä tꞌähä. Mi du rä Lasaro, näꞌä hingä xki ma ha mähetsꞌi o ha rä nidu. Lasaro hingä xki ma dä zu̱di nuꞌu̱ yä xita xki du, nixi hixki mengi dä mꞌu̱i ha rä ndoyꞌo mä nꞌa rä jäꞌi. Rä Lasaro mi tsaya ha rä du, ja rä ue̱nda ge xki zu̱di nꞌa rä tꞌähä xa ntsꞌe̱di pe nsinke te dä ꞌui. Märꞌa yä testo de rä Mäkä Tꞌofo mää ge rä du, ꞌñenä ngu rä tꞌähä. Nꞌa rä pa, nuꞌmu̱ rä Hesu bi gu̱tsꞌi de rä du näꞌä rä tꞌixu rä Jairo, bi ꞌñenä: «Ogi zoñhu̱, ngeꞌä nu rä nxutsi hinxä du, ähätho» (Lucas 8:52, 53).

8. ¿Hanja di pädihu̱ xä ñho ge rä Zi Dada Jeoba hingä mi ne ge yä jäꞌi xä du?

 ⁸ ¿Mi ne rä Zi Dada Jeoba ge yä jäꞌi xä du? Hinä, hingä geꞌä mi ne. Rä Zi Dada Jeoba bi hyoki yä jäꞌi pa xä mꞌu̱i pa nzäntho ha rä Xiꞌmhai. Ja ngu ya dä pädihu̱ ha nuꞌu̱ yä mu̱di ntheke de nunä mfistꞌofo, Äjuä bi zoogi nuꞌu̱ mä mu̱di dadahu̱ ha nꞌa rä uädri xa mähotho ꞌne bi jäpi ko nꞌa rä hogä nzaki pa nunka xä ñheni. Rä Zi Dada Jeoba mi ne ge nuꞌu̱ xä mꞌu̱i xä ñho. ¿Xkä hyandi te ngu nꞌa rä hogä dada? ¿Gi kamfri ge näꞌä dada ne ge yä bätsi dä sufri, dä nxita ꞌne dä du? ¿Hänge hinä? Njabu̱ ꞌnehe, rä Zi Dada Jeoba xa mi mädi yä bätsi ꞌne mi ne ge nuꞌu̱ xä mꞌu̱i ko ndunthi rä johya pa nzäntho ha rä Xiꞌmhai. Rä Mäkä Tꞌofo mää ge Jeoba «xä hñuꞌspäbi ha yä koraso [yä jäꞌi] dä ne dä mꞌu̱i pa nzäntho» (Eclesiastés 3:11). Hää, nuju̱ di nehu̱ gä ꞌmu̱hu̱ pa nzäntho ngeꞌä Äjuä bi hyogägihu̱ njabu̱, ꞌne näꞌä ya xä xoki rä ꞌñuu pa dä za gä ꞌmu̱hu̱ pa nzäntho nuua ha rä Xiꞌmhai.

9. ¿Te mä mhända bi tꞌumbäbi rä Adan, ꞌne por hanja hingä mi xä ñhei dä me̱fi?

⁹ Nuꞌmu̱, ¿por hanja di tuhu̱? Pa gä tinihu̱ rä mpengi nunä ntꞌani, ma gä handihu̱ te bi thogi nuꞌmu̱ mi ꞌmu̱i ho̱nse̱ rä Adan ꞌne Eba ha rä Xiꞌmhai. Rä Mäkä Tꞌofo mää: «Rä Zi Dada Jeoba bi japi bi fo̱tsꞌe de rä hai nuꞌu̱ yä arbol mi uni nkꞌatꞌi toꞌo dä hyandi ꞌne mi xä ñho pa dä tsꞌi» (Génesis 2:9). Pe rä Zi Dada Jeoba bi umbi nunä mhända rä Adan: «De gatꞌho yä arbol de rä jardin dä za gi tsi asta gi niñä. Pe de näꞌä arbol de rä mfädi de näꞌä xä ñho ꞌne de näꞌä xä ntsꞌo, hingi ja gi tsi, ngeꞌä näꞌä pa gi tsi  de geꞌä, pädi ge ma gi tu» (Génesis 2:16, 17). Nunä mhända bi tꞌumbäbi rä Adan ꞌne Eba, hingä mi xä ñhei dä me̱fi, ngeꞌä mi ja ndunthi märꞌa yä arbol nuꞌu̱ xä za xä zipäbi yä fruta. Pe rä Zi Dada Jeoba mi ne ge rä Adan ꞌne Eba, xä ꞌñudi hängu mi jamädi po näꞌä rä te ꞌne gatꞌho nuꞌu̱ märꞌa yä hogä tꞌo̱tꞌe xki hñäni de geꞌä. ꞌNehe, mu̱ nuyu̱ xä yꞌo̱de näꞌä mhändaꞌä, ma xä ꞌñudi ge mi pe̱ꞌspäbi rä tꞌekꞌei rä Zi Dada Jeoba ꞌne ge xa mi ne dä yꞌo̱de nuꞌu̱ yä tsꞌofo xki umbäbi.

10, 11. a) ¿Te mä tꞌo̱tꞌe bi zitsꞌi nuꞌu̱ mä mu̱di dadahu̱ pa himbi yꞌo̱te Äjuä? b) ¿Por hanja xa nꞌa rä däta tsꞌoki näꞌä bi me̱fi rä Adan ꞌne Eba?

¹⁰ Nuꞌu̱ mä mu̱di dadahu̱ bi huahni himbi yꞌo̱te rä Zi Dada Jeoba. Po mäde de nꞌa rä kꞌeñä, rä Zithu bi yꞌambäbi rä Eba: «¿Xa mäjuäni Äjuä xä mää ge hingi ja gi tsihu̱ de rä fruta de gatꞌho nuꞌu̱ yä arbol de rä jardin?». Eba bi dädi: «Dä za gä tsihe de rä fruta de gatꞌho nuꞌu̱ yä arbol ja ha rä jardin. Pe de näꞌä rä arbol ꞌmai mädetho ha rä jardin Äjuä xä ꞌñenä: “Hingi ja gi tsipäbihu̱ rä fruta, hinä, hingi ja gi thathu̱ pa hingi tuhu̱”» (Génesis 3:1-3).

¹¹ Nubye̱, rä Zithu bi ꞌñembäbi rä Eba: «Hingä ma gi tuhu̱. Ngeꞌä Äjuä pädi ge näꞌä rä pa gi tsihu̱ de näꞌä fruta, ma dä xogi ri dahu̱ ꞌne ma dä zo̱ho̱ gi njahu̱ ngu Äjuä, ma gi pähu̱ näꞌä xä ñho ꞌne näꞌä hingi ho» (Génesis 3:4, 5). Rä Zithu mi ne ge rä Eba xä gamfri  ge ma xä mabi xä ñho mu̱ xä zi de näꞌä fruta xki tꞌembi ge hinä, ꞌne ge njabu̱ ya hinto ma xä xipäbi ndaꞌä xä ñho ꞌne ndaꞌä xä ntsꞌo; rä Zithu bi ꞌñembäbi rä Eba ge ma xä za xä me̱fi näꞌä go xä nese̱. Rä Zithu bi mää ge rä Zi Dada Jeoba xki hyatꞌi Eba nuꞌmu̱ xki ꞌñembäbi ge ma xä du mu̱ xä zi näꞌä frutaꞌä. Eba bi gamfri näꞌä bi mää rä Diablo, hänge bi du̱ki ꞌne bi zi näꞌä fruta, ꞌne mꞌe̱fa bi umbäbi ꞌnehe rä däme pa bi zi. Pe rä Adan ꞌne rä Eba mi pädi xä ñho ge Äjuä xki proibibi dä zi näꞌä frutaꞌä. Näꞌä mhända xki tꞌumbäbi, himi hei dä kumpli. Pe nuꞌu̱ bi huahni hindä yꞌo̱te rä Zi Dada Jeoba. Ko näꞌä bi me̱fi rä Adan ꞌne Eba, bi ꞌñudi ge hingä mi mädi rä Zi Dada Jeoba nixi nuꞌu̱ yä mhända. ¡Hinte mä mpumbäte mi ja pa näꞌä däta tsꞌoki xki yꞌo̱tꞌe kontra rä Zi Dada Jeoba!

12. ¿Te mä kꞌoi dä za dä maxkägihu̱ gä pädihu̱ te bi za Jeoba nuꞌmu̱ rä Adan ꞌne Eba bi nju̱tsꞌi kontra geꞌä?

¹² Imäjinä ge nꞌa ri bätsi näꞌä xkä tede ꞌne xkä su, nubye̱ ya hingi o̱tꞌäꞌi, ꞌne hinte mä mhäte nixi rä tꞌekꞌei pe̱tsꞌäꞌi. ¿Te ma gi tsa? Zäi ge xa ma dä u̱ ri mfeni. ¿Dä za gi imäjinä hängu bi u̱ rä mfeni ꞌne bi sufri rä Zi Dada Jeoba, nuꞌmu̱ rä Adan ꞌne Eba bi nju̱tsꞌi kontra geꞌä?

13. ¿Te bi mää Jeoba ge ma xä thogi ko rä Adan nuꞌmu̱ xä du, ꞌne te ne dä mää nuꞌu̱ yä noyaꞌu̱?

¹³ Rä Adan ꞌne Eba xki yꞌo̱tꞌe nꞌa rä däta tsꞌoki kontra Jeoba. Hänge Äjuä ya himbi hye̱gi xä sigi xä mꞌu̱i pa nzäntho. Njabu̱, nuꞌu̱ bi du ja ngu xki xipäbi Äjuä ge ma xä thogi. Mi du, ja bi uapu̱tho yä te ꞌne himbi ma pa dä ꞌmu̱i ngu yä espiritu ha mä nꞌa rä luga. Di pädihu̱ ge njabu̱ po näꞌä bi mää Jeoba mꞌe̱fa de bi yꞌapäbi ngue̱nda Adan. Jeoba bi ꞌñembäbi: «[Ma gi]  pengi ha rä hai, ngeꞌä de gehni xki ꞌñehe. Ngeꞌä nuꞌi grä fonthai ꞌne ma gi pengi ha rä fonthai» (Génesis 3:19). Äjuä xki hyoki rä Adan de rä fonthai (Génesis 2:7). Änte de geꞌä, Adan himi ꞌmu̱i. Hänge nuꞌmu̱ rä Zi Dada Jeoba bi ꞌñembäbi Adan ge ma xä mengi mänꞌaki ha rä fonthai, bi xipäbi ge ya hingä ma xä nja rä te, ja ngu näꞌä rä fonthai de habu̱ xki thoki.

14. ¿Por hanja di tuhu̱?

¹⁴ Rä Adan ꞌne rä Eba di ꞌmu̱ihmä asta mäpaya, pe nuꞌu̱ bi du ngeꞌä himbi ne bi yꞌo̱te rä Zi Dada Jeoba  ꞌne bi me̱fi rä tsꞌoki. Gatꞌho di tuhu̱ ꞌnehe ngeꞌä xti ꞌñehu̱ de rä Adan, näꞌä toꞌo bi zogägihu̱ rä tsꞌoki ꞌne rä du (hñeti Romanos 5:12). Rä tsꞌoki ꞌñenä ngu nꞌa rä tsꞌo ñheni näꞌä texte ꞌne hinto di kꞌotꞌi de geꞌä, ꞌne di jutꞌihu̱ ko rä du. Rä du hingä nꞌa rä amigo o nꞌa rä jäpi, näꞌä nꞌa mä däta nkontrahu̱ (1 Corintios 15:26). ¡Hängu di jamädibihu̱ Jeoba po näꞌä rä njutꞌi bi uni pa njabu̱ bi ñängägihu̱ de rä tsꞌoki ꞌne de rä du!

15. ¿Hanja hubgä mä mu̱ihu̱ gä pädihu̱ näꞌä udi rä Mäkä Tꞌofo de rä du?

¹⁵ ¡Hängu di hubgä mä mu̱ihu̱ gä pädihu̱ näꞌä udi rä Mäkä Tꞌofo de nuꞌu̱ yä jäꞌi xä du! Ja ngu ya dä pädihu̱, nuꞌu̱ xä du himbi sufri nixi hinte tsamäñꞌu̱. Hinte mä raso ja pa gä tsuhu̱, ngeꞌä nuꞌu̱ hindä za te dä yꞌo̱tkägihu̱. Nuꞌu̱ yä jäꞌi xä du hindä za gä fatsꞌihu̱ ha nixi hindä za dä maxkägihu̱. Nuju̱ hindä za gä ñäꞌmehu̱ ha nixi geꞌu̱ hindä za dä ñä ko nuju̱. Ndunthi de nuꞌu̱ yä jäꞌi di gu̱tꞌi rä ꞌñuu ha yä nijä o templo, mää ge nuꞌu̱ dä za dä matsꞌi nuꞌu̱ yä jäꞌi xä du. Njabu̱, xä zipäbi yä bojä nuꞌu̱ yä jäꞌi xä gamfri nunä nkꞌuamba o nhemhñä. Pe gä pädihu̱ näꞌä mäjuäni, ma dä maxkägihu̱ pa hingä tagihu̱ ha nuꞌu̱ yä hyate ntꞌudi.

16. ¿De toꞌo bi ehe nuꞌu̱ yä ntꞌudi pe̱ꞌtsi yä hyate relijion, ꞌne te japi dä gamfri yä jäꞌi?

¹⁶ ¿Mähye̱gi näꞌä udi ri relijion ko näꞌä udi rä Mäkä Tꞌofo de rä du? Kasi gatꞌho yä relijion hingi udi näꞌä udi rä Mäkä Tꞌofo de rä du. ¿Por hanja? Ngeꞌä nuꞌu̱ yä ntꞌudi pe̱ꞌtsi yä hyate relijion, bi ehe de rä Zithu. Po mäde de nuꞌu̱ yä hyate relijion, rä Zithu xä japi yä  jäꞌi dä gamfri ge mꞌe̱fa de dä du nꞌa rä jäꞌi, bi sigi bi ꞌmu̱i ngu nꞌa rä espiritu ha mä nꞌa rä luga. Pe hingä ho̱nse̱ꞌä, rä Zithu ꞌnehe xä thäntsꞌi nunä ntꞌudi ko märꞌa yä nkꞌuamba o nhemhñä, pa njabu̱ dä ꞌueke yä jäꞌi de rä Zi Dada Jeoba. Ma gä handihu̱ hanja xä japi.

17. ¿Por hanja nꞌa rä däta tsꞌoki kontra Jeoba näꞌä rä ntꞌudi de rä nidu?

¹⁷ Ja ngu ya dä handihu̱, rꞌa yä relijion udi ge xti du nuꞌu̱ yä tsꞌomꞌu̱i jäꞌi, ma dä sufri pa nzäntho ha rä nidu. Pe nunä ntꞌudinä, ꞌme̱ꞌtuäbi rä tꞌekꞌei rä Zi Dada Jeoba. Ngeꞌä nuju̱ di pädihu̱ ge Jeoba, näꞌä nꞌa rä Zi Dada de gä mhäte ꞌne nunka xä mbeni dä kastigagihu̱ njabu̱ (hñeti 1 Juan 4:8). ¿Te ma gi mbeni de nꞌa rä dada mu̱ gi hyandi dä zäꞌtuäbi yä yꞌe̱ rä bätsi ha rä tsibi ngeꞌä himbi yꞌo̱te? ¿Ma gi pe̱ꞌtsi rä tꞌekꞌei po geꞌä? ¿Ma gi ne gi ntsitsꞌi kongeꞌä? ¿Hänge hinä? Nuꞌi ma gi hyandi ngu nꞌa rä tsꞌomꞌu̱i jäꞌi. Njabu̱ ꞌnehe, rä Zithu ne ge nuju̱ gä kamfrihu̱ ge rä Zi Dada Jeoba di kastiga ha rä tsibi o ha nꞌa rä nidu nuꞌu̱ yä jäꞌi xä du.

18. ¿Te udi yä hyate relijion de nuꞌu̱ yä jäꞌi xä du, ꞌne habu̱ xpä ehe näꞌä rä ntꞌudiꞌä?

¹⁸ Rä Zithu ꞌnehe di usa yä hyate relijion pa dä hyatꞌi yä jäꞌi, ꞌne pa dä japi dä gamfri ge nuꞌu̱ yä jäꞌi xä du, di mpu̱ngä espiritu, ꞌne ge mähyoni drä nsundabi ꞌne dä tꞌumbäbi rä tꞌekꞌei. Nuyu̱ yä hyate relijion, udi ge nuꞌu̱ yä espirituꞌu̱, xa ja ndunthi yä tsꞌe̱di ꞌne ge dä za gä ntsitsꞌihu̱ o gä nkontrahu̱ kongeꞌu̱. Ndunthi yä jäꞌi xä gamfri nunä nhemhñä o nkꞌuamba, hänge nuꞌu̱ tsu, di xo̱kämbeni ꞌne umbäbi rä tꞌekꞌei nuꞌu̱ yä jäꞌi xä du. Pe rä Mäkä Tꞌofo udi ge nuꞌu̱ xä du, ꞌñenä ähä ꞌne ge hinxä ñho gä tsuhu̱ o gä xo̱kämbenibihu̱.  Ho̱nse̱ rä Zi Dada Jeoba ri ꞌñepi gä xo̱kämbenihu̱ ngeꞌä go geꞌä xä rꞌakägihu̱ mä tehu̱ ꞌne xä rꞌakägihu̱ gatꞌho näꞌä di pe̱ꞌtsihu̱ (Apocalipsis 4:11).

19. ¿Hanja faxkägihu̱ nuꞌmu̱ di pädihu̱ te udi rä Mäkä Tꞌofo de nuꞌu̱ yä jäꞌi xä du?

¹⁹ Nuꞌmu̱ di pädihu̱ te udi rä Mäkä Tꞌofo de nuꞌu̱ yä jäꞌi xä du, faxkägihu̱ pa ya hingä kamfrihu̱ näꞌä udi yä hyate relijion. ꞌNehe, faxkägihu̱ gä ntiendehu̱ xä ñho märꞌa yä ntꞌudi de rä Mäkä Tꞌofo. Nuꞌmu̱ di pädihu̱ ge nuꞌu̱ yä jäꞌi xä du, himbi sigi bi te ha mä nꞌa rä luga, nubye̱ hää di dahu̱ ngue̱nda ge o rä ꞌñuu näꞌä rä promesa xä uni Äjuä de dä rꞌakhu̱ nꞌa rä te pa nzäntho nuua ha rä Xiꞌmhai.

20. ¿Te mä ntꞌani ma gä handihu̱ ha näꞌä ntheke xä ꞌñepu̱?

²⁰ O̱tꞌe ndunthi yä siglo, nꞌa rä hogä ꞌme̱go Äjuä mi rä thuhu Job, bi ñꞌani: «Xiꞌmu̱ nꞌa rä ñꞌo̱ho̱ dä du, ¿dä za dä me̱ꞌtsi rä te mänꞌaki?» (Job 14:14). ¿Xa mäjuäni dä za dä mengi dä mꞌu̱i nuꞌu̱ yä jäꞌi ähä ha rä du? Näꞌä rä mpengi uni rä Mäkä Tꞌofo, xa di hubgä mä mu̱ihu̱ ja ngu ma gä handihu̱ ha näꞌä ntheke xä ꞌñepu̱.