1-3. Anto ray tepet na totoo nipaakar ed patey, tan anto ray ebat na nanduruman relihyon?

ABAYBAYAG lan itetepet iratan na totoo. Importante iratan a tepet. Amin tayo et labay tayon naamtaan so ebat ed saratan.

² Diad Kapitulo 5, inaral tayo no panon a say insakripisyo nen Jesu-Kristo ya bilay to so angiter ed sikatayo na ilalon manbilay ya tuloytuloy. Naamtaan tayo met so ibabaga na Biblia ya onsabi panaon et “anggapo lay patey.” (Apocalipsis 21:4) Balet natan et ompapatey itayo nin amin. “Saray mabilay et amta ra ya ompatey ira,” so imbaga na matalinon Ari ya si Solomon. (Eclesiastes 9:5) Labalabay tayon anggad posible et ondukey ni bilay tayo. Balet, siansian iisipen tayo no anto kasi nagawad sikatayo no ompatey itayo.

³ No ompatey iray inad-aro tayo, talagan maermen tayo. Tan nayarin nitepet tayo: ‘Anto la kasi nagagawad sikara? Maniirap ira kasi? Babantayan da tayo kasi? Kasin natulongan tayo ra? Kasin nanengneng tayo lamet ira?’ Nandurumay ebat na saray relihyon ed saratan a tepet. Wala ray mangibabagan no maong kan too, onla kad tawen balet no mauges ka, napoolan kad impierno. Ibabangat na arum a relihyon ya no walay ompatey, sikatoy onlad kawalaan na saray espiritu pian nakaiba to ray abaybayag lan inatey ya kapamilya tan kakanayon to. Ibabangat balet na arum ni ran relihyon ya no  say sakey et ompatey, onlad mundo na inaatey pian diman naukom, insan sikatoy onalis-alis odino iyanak lamet ed sananey a laman.

4. Antoy pareparehon ibabangat na dakel a relihyon nipaakar ed ipapatey?

⁴ Nanduruma so ibabangat na saray relihyon balet saksakey so ideya ra​—walay walad sikatayo ya tuloytuloy nin manbilay anggano ompatey so pisikal a laman tayo. Ibabaga na amin lawarin relihyon nensaman tan natan, ya tuloytuloy tayo ni kunon manbilay ya makanengneng, makadngel, tan makapannonot. Balet, panon itan ya nagawa anta say pakalikna, pakadngel, pakanengneng, pakaangob, tan pakataway, pati say panagnonot et konektado ed utek? No ompatey so sakey, agla ongganay utek to. Say memorya, liknaan, tan amin a parte na laman tayo et agmisteryoson onggana ya bukor. Ontunda la iratan no agla onggaganay utek tayo.

5, 6. Antoy ibabangat na Biblia nipaakar ed kipapasen na saray inaatey?

⁵ Si Jehova, say nanggawa na utek na too, et aliwan misteryo ed sikato so nagagawad ipatey na too. Amta to no antoy tua, tan diad Salita to, say Biblia, et impaliwawa to so kipapasen na saray inaatey. Oniay malinew ya ibabangat na satan: No ompatey so too, sikatoy ontunda lan manbilay. Say patey so kabaliktaran na bilay. Saray inaatey et agmakanengneng, agmakadngel, tan agmakapan-isip. Anggapoy kabiangan tayo ya tuloytuloy nin manbilay no ompatey tayo. Anggapoy imortal ya kamarerwa odino espiritu tayo. *

⁶ Imbaga nen Solomon ya “saray mabilay et amta ra ya ompatey ira, balet saray inatey et anggapon balot so amta ra.” Insan to impaliwawa itan nen imbaga ton saray inatey et  agda la nayariay mangaro odino manbusol tan “anggapo so kimey odino plano odino kakabatan odino karunongan diad Lubok.” (Basaen so Eclesiastes 9:5, 6, 10.) Ibabaga met na Salmo 146:4 ya no ompatey so too, “naandi so nonot to.” Aliwa itayon imortal tan ag-itayo tuloytuloy a manbilay no ompatey so laman tayo. Say bilay tayo et singa apoy na kandila. No naerep so apoy, ag-itan onlad sananey a lugar. Anggapo la itan.

7. Panon ya impaliwawa nen Jesus so nipaakar ed kipapasen na saray inaatey?

⁷ Walay imbaga nen Jesus ed saray disipulo to nipaakar ed kipapasen na saray inaatey. Nen inatey so kabkabat ton si Lazaro, imbaga to: “Say kaaro tayon si Lazaro et naugip.” Say atalosan na saray disipulo ed imbaga nen Jesus et naugip labat si Lazaro, manpapainawa ta mansasakit. Aliway atalosan da. Oniay impaliwawa nen Jesus: “Inatey lay Lazaro.” (Basaen so Juan 11:11-14.) Imanoen ya inkompara nen Jesus so patey ed ugip. Aglinmay Lazaro ed tawen odino diad mandarlang ya impierno. Agto apinengnengan iray anghel odino saray kakanayon ton abayag lan inatey. Si Lazaro et ag-inyanak lamet bilang sananey a too. Imbes, sikatoy nampainawa ed patey, ya singa araldalem so ugip to. Inkompara na arum nin teksto so patey ed ugip. Singa bilang, nen tinupak anggad inatey so disipulon si Esteban, imbaga na Biblia ya sikatoy “naugip.” (Gawa 7:60) Ontan met, insulat nen apostol Pablo ya wala ray totoo ed panaon to ya “naugip lad patey.”​—1 Corinto 15:6.

8. Akin et segurado tayon aglabay na Dios ya ompatey so totoo?

⁸ Talaga kasin labay na Dios ya ompatey so totoo? Andi! Ginawa nen Jehova so totoo ya manbilay ya tuloytuloy diad  dalin. Singa naaralan tayo lad sayan libro, inyan na Dios so inmunan sanasawan too diad marakdakep a paraiso. Ginawa to ran perpekto kanian ag-ira mansakit tan ontatken. Labay nen Jehova ya maong so pansumpalan da. Wala kasi maaron ateng ya labay ton manirap so ananak to lapud itatatken tan ipapatey? Siempre, anggapo! Inaro nen Jehova iray ananak to tan labay ton maliket iran naynay diad dalin. Oniay ibabaga na Biblia nipaakar ed saray totoo: “Inyan [nen Jehova] ni ingen so andi-anggaan  ed puso ra.” (Eclesiastes 3:11) Nen ginawa itayo na Dios, inyan tod puso tayo ya agtayo labay so ompatey. Tan sikato met so nanggaway paraan pian niiter itan ya pilalek ed puso tayo.

9. Antoy imbawal nen Jehova ed si Adan, tan akin et aliwan mairap ya unoren itan ya ganggan?

⁹ Akin balet et ompapatey so totoo? Pian naebatan itan, amtaen tayo ni no antoy agawa nen si Adan tan Eva ni labat so too diad dalin. Oniay ibabaga na Biblia: “Si Jehova a Dios et pinatubo tod dalin so amin a kiew a makapaliket a nengnengen tan maabig a naakan.” (Genesis 2:9) Balet walay sakey labat ya imbawal to. Imbaga nen Jehova ed si Adan: “Manlapud amin a kiew ed hardin et nayarian moy mangan na bunga anggad napesel ka. Balet agka nepeg a mangay bunga na kiew na pikakabat ed maong tan mauges, ta diad agew a pangan mo ed satan et seguradon ompatey ka.” (Genesis 2:16, 17) Aliwan mairap ya unoren itan ya ganggan. Dakdakel iray kakiewan ya napangalaan nen Adan tan Eva na kanen da. Kanian pankanawnawa dan ipanengneng so pisasalamat dad samay angiter na amin ed sikara, pati say perpekton bilay da. No ontulok ira, ipapanengneng dan rerespetoen day autoridad na maaron Ama rad tawen tan labay day paibangat ed sikato.

10, 11. (a) Panon ya ag-inunor na inmunan sanasawa so Dios? (b) Akin et seryoson bengatla so ag-intulok nen Adan tan Eva?

¹⁰ Balet makapaermen ta pinili na inmunan sanasawa ya ag-unoren si Jehova. Panamegley na sakey ya uleg, tinepetan nen Satanas si Eva: “Talaga ta’n imbaga na Dios ya agkayo nepeg a mangay bunga na amin a kiew ed hardin?” Inmebat si Eva: “Nayarian mi mangay bunga na saray kiew ed hardin. Balet oniay inkuan na Dios nipaakar ed bunga na kiew a walad pegley na hardin: ‘Agkayo nepeg a mangan ed satan, andi, agyo nepeg a diwiten itan; ta no ontan so gawaen yo, ompatey kayo.’”​—Genesis 3:1-3.

 ¹¹ Imbaga nen Satanas: “Seguradon agkayo ompatey. . . . Amta na Dios a diad mismon agew a pangan yo ed satan et nalukasan iray mata yo tan magmaliw kayon singa Dios, ya amta yoy maong tan mauges.” (Genesis 3:4, 5) Labay nen Satanas ya kombinsien si Eva ya parad pankaabigan toy pangan ed imbawal ya prutas. Singa ibabaga nen Satanas ya sarag nen Eva so mandesisyon no anto so duga tan aliwa; sarag ton gawaen no antoy labay to. Papalsaan met nen Satanas si Jehova ya intila To no antoy epekto na pangan ed prutas. Anisiay Eva ed si Satanas. Kanian amudbor na prutas tan kinan to. Insan inikdan to si Adan, tan angan met. Ag-ira ignorante ed ginawa ra. Amta ran say gagawaen da et amay mismon imbaga na Dios ya agda nepeg a gawaen. Nen kinan da may  prutas, ginagala ran ag-unoren so sakey a simpli tan ag-ambelat ya ganggan. Agda nirespeto so Ama rad tawen tan say autoridad to. Anggapoy nibaraan dad satan ya ginawa ra ed maaron Amalsa ed sikara!

12. Antoy makatulong pian natalosan tayoy alikna nen Jehova nen agtinmulok si Adan tan Eva?

¹² Niay sakey ya ilustrasyon: Antoy naliknam no say pinabaleg tan inasikasom ya anak et agto ka inunor, nirespeto, odino aaroen? Seguradon nasakitan ka. Isip mo pa labat so sakit ya alikna nen Jehova nen agtinmulok si Adan tan Eva.

13. Antoy imbaga nen Jehova ya nagawad si Adan no ompatey, tan antoy labay ya ibaga na satan?

¹³ Anggapo lay rason pian abuloyan nen Jehova ya tuloytuloy nin manbilay so agmatulok ya sanasawa. Inatey ira, ya singa imbaga to. Anggapo lay Adan tan Eva. Ag-ira linma ed kawalaan na saray espiritu. Segurado tayod satan ta imbaga nen Jehova ed si Adan nen tinepetan to ra nipaakar ed ginawa da. Imbaga na Dios: “Ompawil ka ed dalin, ta ditan so angalaan ed sika. Lapud dabok ka, ompawil ka ed dabok.” (Genesis 3:19) Ginawa na Dios si Adan manlapud dabok na dalin. (Genesis 2:7) Balet antis to ’tan, anggapoy Adan. Kanian, nen imbaga nen Jehova ya ompawil ed dabok si Adan, say labay Ton ibaga et ompawil ed dati, ya anggapoy Adan. Magmaliw ya anggapo lay bilay to ya singa dabok, ya angalaan ed sikato.

14. Akin ya ompapatey tayo?

¹⁴ Mabilay ni komon natan si Adan tan Eva, balet inatey ira ta pinili ran ag-onuren so Dios, kanian nankasalanan ira. Say rason no akin ya ompapatey itayo et impatawir nen Adan ed amin ya anak to so kasalanan pati say patey. (Basaen so Roma 5:12.) Satan a kasalanan et singa atawir ya graben sakit tan agnapaliisan na anggan siopa. Say resulta to ’tan et patey, sakey ya sumpa. Say patey et sakey a kabusol, aliwan kaaro. (1 Corinto 15:26) Talagan misalsalamat tayo ta inter nen Jehova so dondon pian nisalba tayod satan ya makapataktakot ya kabusol!

15. Akin et naligliwa itayo no amta tayoy tua nipaakar ed patey?

¹⁵ Naligliwa itayo ed ibabangat na Biblia nipaakar ed kipapasen na inaatey. Singa naaralan tayo la, saray inaatey et agnaiirapan odino nasasakitan. Agtayo ra nepeg ya takotan ta agda itayo nasakitan. Agda kaukolan so tulong tayo tan agda itayo natulongan. Agtayo ra nakatongtong tan agda itayo met nakatongtong. Ibabaga na dakel ya lider na relihyon ya natulongan da kuno iray inaatey kanian babayaran ira na totoon manisia ed sikara. Balet no amta tayoy tua, ag-itayo naloko na saray mangibabangat ed saratan ya tila.

16. Siopay angimpluensya ed saray bangat na dakel a relihyon, tan panon?

¹⁶ Kasin say ibabangat na dakel ya relihyon nipaakar ed saray inaatey et mipara ed ibabangat na Biblia? Maslak et andi. Akin? Lapud saray bangat da et naimpluensyaan nen Satanas. Uusaren toy palson relihyon pian panisiaen so totoo ya no ompatey ira, manbilay ni ran siansia diad kawalaan na saray espiritu. Saya et tila ya ilalaok nen Satanas ed arum ni ran tila pian niyarawi toy totoo ed si Jehova a Dios. Panon?

17. Akin ya say bangat nipaakar ed impierno et mamauges ed si Jehova?

¹⁷ Singa naamtaan tayo la, ibabangat na arum a relihyon ya no ompatey so mauges ya too, onlad impierno pian tuloytuloy ya pairapen. Papaugesen na sayan bangat so Dios. Si Jehova et maar-aron Dios tan agton balot itan gawaen. (Basaen so 1 Juan 4:8.) Antoy naliknam no say sakey ya too et siniten toy lima na ugaw lapud benger? Narespetom kasi itan a too? Labay mo ni kasin kabaten? Seguradon andi! Ompan parad sika et marukruksa ’tan a too. Ontan so labay nen Satanas ya isipen tayo nipaakar ed si Jehova, ya tuloytuloy To kuno ya papairapen tan popoolan iray totoo!

18. Say pandayew ed saray inaatey et base ed anton tilan bangat na arum ya relihyon?

¹⁸ Uusaren met nen Satanas so arum a relihyon pian ibangat ya no ompatey iray totoo et magmaliw iran espiritu,  tan nepeg iran respetoen tan galangen na mabilay ya totoo. Base ed satan ya bangat, say espiritu na saray inaatey et magmaliw kunon makapanyarin kakaaro odino makapataktakot a kakabusol. Dakel so manisia ed sayan tila. Natatakot irad saray inaatey kanian papagalangan tan dadayewen da ra. Balet, ibabangat na Biblia ya saray inaatey et singa naugip, tan say nepeg labat ya dayewen tayo et say tuan Dios, si Jehova, say Amalsa tan mangiiter ed amin ya kaukolan tayo.​—Apocalipsis 4:11.

19. Anto nin bangat na Biblia so natalosan tayo no amta tayoy tua nipaakar ed saray inaatey?

¹⁹ No amta tayoy tua nipaakar ed saray inaatey, ag-itayo nibalang na saray tilan bangat na arum ya relihyon. Ontulong met itan ed sika pian natalosan mo ni ray arum ya bangat na Biblia. Singa bilang, lapud atalosan mo ya saray inaatey et ag-oonla ed kawalaan na saray espiritu, magmaliw ya tudtua ed sika so promisa ya manbilay ya tuloytuloy diad paraison dalin.

20. Anton tepet so naebatan ed ontumbok ya kapitulo?

²⁰ Nensaman et oniay intepet na maong ya toon si Job: “No ompatey so sakey a too, nabilay lamet kasi?” (Job 14:14) Nabilay lamet kasi so inatey? Naligliwa tayo ed ibabangat na Biblia nipaakar ed satan, a singa naaralan tayo ed ontumbok ya kapitulo.