1-3. Ki preguntanan hende ta haci tocante morto, y ki contesta varios religion ta duna?

HENDE tin miles di aña ta haci nan mes e preguntanan aki. Nan ta preguntanan importante. Sin importa ken nos ta of unda nos ta biba, e contestanan ta toca cada un di nos.

² Den e articulo anterior, nos a trata con e sacrificio di rescate di Hesucristo a habri e caminda pa bida eterno. Tambe nos a siña cu Bijbel a predeci un tempo cu “lo no tin morto mas.” (Revelacion 21:4) Pero mientrastanto, nos tur ta muri. Rei sabi Salomon a bisa: “E bibonan sa cu nan lo muri.” (Eclesiastes 9:5) Nos ta purba biba mas largo posibel. Toch nos ta puntra nos mes ta kico lo sosode cu nos ora nos muri.

³ Ora nos sernan keri muri, nos ta keda hopi tristo. Y kisas nos ta puntra: ‘Unda nan a bai? Nan ta sufri? Nan ta proteha nos? Nos por yuda nan? Nos lo mira nan algun dia atrobe?’ Religionnan di mundo ta duna contestanan distinto riba e preguntanan aki. Tin ta siña cu si bo a hiba un bida bon, lo bo bai shelo, pero si bo a hiba un mal bida, lo bo bai kima den un luga di tormento. Otro religionnan ta siña cu ora hende muri, nan ta pasa pa e region di spirito pa nan ta hunto cu nan antepasadonan.  Anto tambe tin religion ta siña cu e mortonan ta pasa pa un otro mundo pa nan ser husga y pa despues nan reencarna of nace di nobo den un otro curpa.

4. Ki idea basico hopi religion ta comparti relaciona cu morto?

⁴ Tur e siñansanan religioso ei ta comparti un idea basico—cu un parti di nos ta keda na bida ora cu nos curpa carnal muri. Segun casi tur religion—di antes y di awor—den un manera of otro nos ta sigui biba pa semper cu e habilidad di mira, tende y pensa. Pero esei no por, toch? Nos por tende, mira y pensa solamente pasobra nos celebro ta traha. Ora nos muri, e celebro ta stop di traha. Sin nos celebro, nos no por corda, sinti, tende ni mira nada mas.

5, 6. Kico Bijbel ta siña tocante e condicion di e mortonan?

⁵ Loke ta pasa ora un hende muri no ta un misterio pa Yehova, Creador di e celebro. E sa e berdad, y den su Palabra, Bijbel, e ta splica e condicion di e mortonan. Bijbel su siñansa bon cla ta esaki: Ora un persona muri, e ta stop di existi. Morto ta lo contrario di bida. E mortonan no ta mira ni tende ni pensa. Ningun parti di nos ta keda na bida ora e curpa muri. Nos no tin un alma of spirito inmortal. *

⁶ Despues cu Salomon a menciona cu e bibonan sa cu nan lo muri, el a skirbi: “Ma e mortonan no sa nada.” Anto el a duna mas detaye di e berdad basico ei bisando cu e mortonan no por stima ni odia y cu “no tin ni actividad ni planificacion ni sabiduria den [e graf].” (Eclesiastes 9:5, 6, 10) Asina tambe Salmo 146:4 ta bisa cu ora un hende muri, “su pensamentonan ta perece.” Nos ta hende mortal y nos no ta keda na bida ora nos curpa muri. E bida cu  nos tin ta manera e vlam di un bela. Ora paga e bela, e vlam no ta bai ningun caminda. Simplemente e no t’ei mas.

7. Hesus a splica cu morto ta manera kico?

⁷ Hesucristo a papia tocante e condicion di e mortonan. El a haci esei relaciona cu Lazaro, un homber cu e tawata conoce bon y cu a muri. Hesus a bisa su disipelnan: “Nos amigo Lazaro a pega soño.” E disipelnan a pensa cu Hesus tawata kiermen cu e tawata drumi pa asina e recupera di un malesa. Nan tawata ekiboca. Hesus a splica nan: “Lazaro a muri.” (Huan 11:11-14) Tuma nota cu Hesus a compara morto cu sosiego y soño. Lazaro no tawata den shelo ni den un fierno di candela. E no tawata serca e angelnan ni su antepasadonan. Lazaro no a bai nace di nobo como un otro hende. E tawata sosega den morto, como si fuera den un soño profundo sin soña. Y na un otro ocasion tambe Hesus a compara morto cu soño. Ora cu el a resusita e yiu mohe di Jairo, el a bisa “e no a muri, ma ta na soño e ta.” (Lucas 8:52, 53) Anto David tambe a skirbi tocante “drumi e soño di morto.”—Salmo 13:3.

8. Con nos por sa cu no tawata Dios su proposito pa hende muri?

⁸ Tawata Dios su proposito original pa hende muri? Ni un ora so! Yehova a traha hende pa biba pa semper riba tera. Manera nos a siña mas prome den e buki aki, Dios a pone e prome pareha humano den un paradijs masha dushi. El a bendiciona nan cu salud perfecto. Yehova tawata kier cos bon so pa nan. Un mayor amoroso lo kier pa su yiunan sufri e dolor di biehes y morto? Claro cu no!  Yehova tawata stima su yiunan y e tawata kier pa nan gosa di felicidad eterno riba tera. Bijbel ta bisa relaciona cu hende: “[Yehova] a pone eternidad den nan curason.” (Eclesiastes 3:11) Dios a crea nos cu e deseo di biba pa semper. Y el a haci areglo pa cumpli cu e deseo ei.

9. Ki restriccion Yehova a pone riba Adam, y dicon no tawata dificil pa obedece e mandamento aki?

⁹ Dicon hende ta muri anto? Pa haya e contesta nos  tin cu considera loke a pasa ora cu tawatin un homber y un mohe so riba tera. Bijbel ta splica: “For di suela SEÑOR Dios a haci nace tur palo cu ta agradabel pa bista y bon pa cuminda.” (Genesis 2:9) Sinembargo, tawatin un solo restriccion. Yehova a bisa Adam: “Di tur palo di e hofi bo mag come libremente, ma di e palo di conocemento di bon y malo lo bo no come, pasobra e dia cu bo come di dje, lo bo muri sigur.” (Genesis 2:16, 17) No tawata dificil pa nan obedece e mandamento aki. Tawatin hopi otro palo for di cua Adam cu Eva por a come. Pero e mandamento aki a duna nan un oportunidad special pa demostra nan gratitud na Esun cu a duna nan tur cos, incluso bida perfecto. Nan obediencia lo a demostra tambe cu nan a respeta e autoridad di nan Tata celestial y cu nan tawata kier su guia amoroso.

10, 11. (a) Kico a pone e prome pareha humano desobedece Dios? (b) Dicon e desobediencia di Adam cu Eva tawata un asunto serio?

¹⁰ Lamentablemente, e prome pareha humano a scohe pa desobedece Yehova. Satanas, papiando via un colebra, a puntra Eva: “Di berdad Dios a bisa: ‘Bo no mag come di ningun palo di e hofi’?” Eva a contesta: “Di fruta di e palonan di e hofi nos por come, ma di fruta di e palo cu ta keda meimei di e hofi, Dios a bisa: ‘Boso no mester come di dje ni mishi cu ne, pa boso no muri.’”—Genesis 3:1-3.

¹¹ Satanas a bisa: “Siguramente boso lo no muri! Pasobra Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.” (Genesis 3:4, 5) Satanas tawata kier pa Eva kere cu lo el a beneficia door di come di e fruta prohibi. Segun Satanas, Eva tawatin derecho di dicidi pa su mes kico ta bon y kico ta malo; e tawatin derecho di haci loke e kier. Tambe Satanas a acusa Yehova di a gaña tocante e consecuencianan di come di e fruta. Eva a kere Satanas. Pesei el a cohe di e  fruta y a com’e. Caba el a duna su casa, y e tambe a come. Nan no a actua den ignorancia. Nan tawata sa cu nan tawata haciendo precis loke Dios a bisa nan pa no haci. Door di come e fruta, nan a desobedece deliberadamente un mandamento simpel y rasonabel. Nan a demostra desprecio pa nan Tata celestial y su autoridad. Tal falta di respet pa nan Creador amoroso tawata impordonabel!

12. Kico por yuda nos compronde con Yehova a sinti ora cu Adam cu Eva a coi un rumbo cu a bai contra dje?

¹² Pa duna un ehempel: Con lo bo sinti si bo a cria y cuida un yiu homber of un yiu mohe cu despues ta desobedece bo den un manera cu ta demostra cu e no tin ni un tiki respet ni amor pa bo? Esei lo causa bo hopi dolor di  curason. Imagina anto, cuanto dolor Yehova lo mester a sinti ora cu tanto Adam como Eva a coi un rumbo cu a bai contra dje.

13. Kico Yehova a bisa lo a pasa cu Adam ora e muri, y kico esaki ta nifica?

¹³ Yehova no tawatin ningun motibo pa sostene e personanan desobediente ei, Adam cu Eva, na bida pa semper. Nan a muri, manera el a bisa cu lo a pasa. Adam cu Eva a stop di existi. Nan no a pasa pa e region di spirito. Nos sa esei debi na loke Yehova a bisa Adam despues ora cu el a confronta Adam cu su desobediencia. Dios a bisa: “[Lo] bo bolbe na tera, pasobra for di dje bo a wordo tuma; pasobra stof bo ta, y na stof lo bo bolbe.” (Genesis 3:19) Dios a traha Adam for di e stof di tera. (Genesis 2:7) Prome cu esei Adam no tawata existi. Pesei, ora Yehova a bisa cu Adam lo bolbe na stof, e tawata kiermen cu Adam lo a bolbe na un estado di no ta existi. Adam lo tawata sin bida mescos cu e stof for di cua el a ser traha.

14. Dicon nos ta muri?

¹⁴ Adam cu Eva lo por tawata na bida awe, pero nan a muri pasobra nan a scohe pa desobedece Dios y asina a peca. E motibo cu nos ta muri ta pasobra Adam su condicion pecaminoso y tambe morto a pasa pa tur su desendientenan. (Romanonan 5:12) E pica ei ta manera un malesa teribel cu nos a hereda y for di cua ningun hende no por scapa. Su consecuencia—morto—ta un maldicion. Morto ta un enemigo, no un amigo. (1 Corintionan 15:26) Nos por ta hopi gradicido cu Yehova a percura e rescate pa salba nos for di e enemigo teribel aki!

15. Dicon ta un consuelo pa sa e berdad tocante morto?

¹⁵ Loke Bijbel ta siña tocante e condicion di e mortonan ta un consuelo. Manera nos a mira, e mortonan no  ta sufri ningun dolor ni pena. Nos no tin ningun motibo pa tene miedo di nan, pasobra nan no por haci nos daño. Nan no tin mester di nos yudansa, y nan no por yuda nos. Nos no por papia cu nan, y nan no por papia cu nos. Hopi lider religioso ta pretende falsamente cu nan por yuda esnan cu a muri, y hende cu ta kere e lidernan ei ta duna nan placa. Pero ora nos sa e berdad, esei ta proteha nos di ser gaña door di esnan cu ta siña tal mentira.

16. Ken a influencia e siñansanan di hopi religion, y den ki manera?

¹⁶ Bo religion ta bai di acuerdo cu loke Bijbel ta siña tocante e mortonan? Mayoria religion no ta bai di acuerdo. Dicon? Pasobra Satanas a influencia nan siñansanan. E ta uza religion falso pa pone hende kere cu despues cu nan curpa muri, nan lo sigui biba den e region di spirito. Esaki ta un mentira cu Satanas ta combina cu otro mentira pa kita hende for di Yehova Dios. Con asina?

17. Dicon e siñansa di tormento eterno ta deshonra Yehova?

¹⁷ Manera a wordo menciona caba, tin religion ta siña cu si un persona hiba un mal bida, despues di morto lo e bai na un luga di tormento di candela pa e sufri pa semper. E siñansa aki ta deshonra Dios. Yehova ta un Dios di amor y nunca lo e no pone hende sufri den e manera aki. (1 Huan 4:8) Kico abo lo a pensa di un homber cu ta castiga un yiu desobediente door di tene su man den candela? Lo bo tin respet pa un homber asina? De echo, lo bo kier sikiera siña conoc’e? Definitivamente cu no! Probablemente lo bo pensa cu e ta hopi cruel. Sinembargo, Satanas kier pa nos kere cu Yehova ta tortura hende den candela pa semper, pa miles di miyones di aña!

18. Adoracion di e mortonan ta basa riba cua mentira religioso?

¹⁸ Tambe Satanas ta uza algun religion pa siña cu despues  di morto hende ta bira spirito cu e bibonan mester respeta y honra. Segun e siñansa aki, e spirito di e mortonan por bira sea amigonan poderoso of enemigonan spantoso. Hopi hende ta kere e mentira aki. Nan tin miedo di e mortonan y ta honra nan y adora nan. Na contraste, Bijbel ta siña cu e mortonan ta drumi na soño y cu nos mester adora solamente e Dios berdadero, Yehova, nos Creador y Percurador.—Revelacion 4:11.

19. Conocemento di e berdad tocante morto ta yuda nos compronde cua otro siñansa di Bijbel?

¹⁹ Conocemento di e berdad tocante e mortonan ta proteha bo di mentiranan religioso. Tambe e ta yuda bo compronde otro siñansanan di Bijbel. Por ehempel, ora bo realisa cu hende no ta pasa pa un region di spirito ora nan muri, e ora ei e promesa di bida eterno den Paradijs riba tera ta haya berdadero nificacion pa bo.

20. Cua pregunta nos lo considera den e siguiente capitulo?

²⁰ Hopi tempo pasa e homber husto Job a haci e pregunta aki: “Si un hende muri, lo e bolbe biba?” (Job 14:14) Un persona sin bida cu ta drumi den morto por bolbe bek na bida? Loke Bijbel ta siña tocante esaki ta un consuelo masha grandi, manera e siguiente capitulo lo mustra.