1-3. Ema husu pergunta saida deʼit kona-ba mate? Relijiaun balu fó resposta saida?

EMA barak hanoin kona-ba pergunta sira iha leten durante tinan rihun ba rihun ona. Resposta ba pergunta hirak-neʼe importante, tanba ita hotu sei mate no ema neʼebé ita hadomi mós mate.

² Iha Kapítulu 5, ita koʼalia tiha ona kona-ba oinsá mak Jesus Kristu nia sakrifísiu loke dalan ba ita atu hetan moris rohan-laek. Hanesan ita mós aprende tiha ona, Bíblia fó-hatene nanis katak “mate sei la iha tan”. (Apokalipse 21:4) Maibé, agora ita hotu sei mate. Liurai Salomão neʼebé matenek hatete: “Ema neʼebé moris hatene katak sira sei mate.” (Eclesiastes [Pengkhotbah] 9:5) Ita hotu hakarak tebes atu moris kleur. Maski nuneʼe, ita sei hanoin nafatin kona-ba saida mak sei akontese ba ita bainhira ita mate.

³ Bainhira ita-nia família ka belun mate, ita triste. Karik ita husu: ‘Nia bá neʼebé? Nia terus ka lae? Nia tau matan mai ita ka lae? Ita bele ajuda nia ka lae? Ita sei hasoru fali nia ka lae?’ Relijiaun ida-idak fó resposta oioin ba pergunta hirak-neʼe. Relijiaun balu hanorin katak se  ita halo buat neʼebé diʼak, kuandu ita mate ita bá lalehan; maibé se ita halo buat neʼebé aat, kuandu ita mate ita sei tama ba fatin terus ho ahi. Relijiaun seluk hanorin katak kuandu ema mate, nia bá mundu espíritu nian hodi hamutuk ho ninia beiʼala. No relijiaun seluk tan hanorin katak ema neʼebé mate bá mundu seluk hodi simu tesi-lia, depois moris fali iha mundu ho isin foun.

4. Relijiaun barak fó ideia saida kona-ba mate?

⁴ Relijiaun nia hanorin sira-neʼe fó ideia ida deʼit, neʼe mak kuandu ema mate, iha parte ida neʼebé la mate. Besik relijiaun hotu husi tempu uluk toʼo agora, sira hanorin katak ita ema moris ba nafatin ho kbiit atu haree, rona, no hanoin. Maibé, oinsá mak ida-neʼe bele akontese? Ita-nia sentimentu no hanoin liga ho ita-nia kakutak. No kuandu ita mate, ita-nia kakutak para, la bele uza tan. Se ita-nia kakutak la laʼo ona, ita la bele hanoin, sente, haree, ka rona tan.

5, 6. Tuir Bíblia, saida mak akontese ba ema neʼebé mate ona?

⁵ Maromak Jeová, Ida neʼebé kria kakutak, nia hatene saida mak akontese kuandu ema mate. Nia mak hatene lia-loos, no liuhusi ninia Liafuan, Bíblia, nia fó-hatene kona-ba saida mak akontese ba ema neʼebé mate ona. Bíblia hanorin ho klaru: Kuandu ema ida mate ona, ema neʼe la iha tan. Mate katak la iha moris tan. Ema mate la bele haree, rona, ka hanoin. La iha parte ida neʼebé moris hela kuandu ita mate. Ita la iha klamar neʼebé la bele mate. *

 ⁶ Salomão hakerek katak ema neʼebé moris hatene katak sira sei mate, no nia hatutan tan: “Ema neʼebé mate ona, sira la hatene buat ida.” Depois, nia esplika liután kona-ba lia-loos neʼe hodi dehan katak ema neʼebé mate ona la bele hatudu domin ka odi, no mós “la iha serbisu, ka planu, ka koñesimentu ka matenek iha rate”. (Eclesiastes [Pengkhotbah] 9:5, 6, 10) Eskritura iha Salmo (Mazmur) 146:4 mós hatete katak kuandu ema ida mate, “ninia hanoin hotu sei lakon”. Ita la bele moris nafatin kuandu ita-nia isin mate ona. Ita-nia moris hanesan lilin nia ahi. Bainhira ahi neʼe mate, ahi neʼe la bá fatin seluk. Ahi neʼe lakon deʼit.

7. Jesus kompara mate hanesan saida?

⁷ Jesus Kristu mós koʼalia kona-ba ema neʼebé mate ona nia kondisaun. Porezemplu, Jesus koʼalia kona-ba ninia belun naran Lázaro, neʼebé mate. Jesus fó-hatene ninia dixípulu sira: “Lázaro, ita-nia belun toba ona.” Dixípulu sira hanoin Jesus hatete katak Lázaro toba tanba moras. Maibé sira hanoin sala. Jesus esplika: “Lázaro mate ona.” (João 11:11-14) Nuneʼe, Jesus kompara mate hanesan toba. Lázaro la bá lalehan ka infernu. Nia la hasoru anju sira ka ninia beiʼala sira. Lázaro la moris dala ida tan ho isin ida seluk. Nia hanesan toba-dukur hodi la mehi. Eskritura seluk mós kompara mate hanesan toba. Porezemplu, bainhira ema tuda mate dixípulu Estevão, Bíblia hatete katak nia “toba”. (Apóstolu 7:60, nota-rodapé) Nuneʼe mós, apóstolu Paulo hakerek kona-ba ema balu iha ninia tempu neʼebé mate hodi dehan katak sira “toba”.—1 Korinto 15:6, nota-rodapé.

8. Oinsá mak ita hatene katak Maromak lakohi ema atu mate?

⁸ Horiuluk kedas, Maromak hakarak ema atu mate ka  lae? Lae duni! Maromak Jeová kria ema atu moris ba nafatin iha mundu neʼe. Hanesan ita aprende ona iha livru neʼe, Maromak tau ema primeiru, Adão ho Eva, iha jardín furak ida. Nia fó sira saúde perfeitu. Jeová hakarak sira atu moris kontente ba nafatin. Inan-aman neʼebé hadomi sira-nia oan hakarak ka lae, atu sira-nia oan sai ferik-katuas no mate? Lae duni! Jeová hadomi ninia oan no hakarak sira atu moris haksolok ba nafatin iha mundu. Bíblia esplika kona-ba ema hodi dehan: ‘Maromak Jeová tau tempu neʼebé la bele sura iha sira-nia fuan-laran.’ (Eclesiastes [Pengkhotbah] 3:11) Maromak kria ita ho hakarak atu moris ba nafatin. No nia loke dalan ba ita atu hetan hakarak neʼe.

9. Maromak Jeová bandu Adão atu labele halo saida? Tanbasá mak la susar atu halo tuir lei ida-neʼe?

⁹ Se nuneʼe, tansá mak ema mate? Atu hetan resposta ba pergunta neʼe, ita tenke hanoin kona-ba saida mak akontese bainhira iha mane no feto ida deʼit iha mundu. Bíblia esplika: “Maromak Jeová halo moris ai-hun oioin neʼebé diʼak atu haree no diʼak atu han.” (Gênesis [Kejadian] 2:9) Maibé, Maromak mós bandu buat ida. Nia fó-hatene Adão: “Ai-fuan husi ai-hun hotu iha jardín neʼe ó bele han toʼo bosu. Maibé kona-ba ai-fuan husi ai-hun koñesimentu nian kona-ba diʼak no aat, ó labele han, tanba iha loron neʼebé ó han ai-fuan neʼe, ó sei mate.” (Gênesis [Kejadian] 2:16, 17) La susar atu  halo tuir lei ida-neʼe tanba Adão no Eva bele han ai-fuan husi ai-hun seluseluk. Maibé lei neʼe fó oportunidade espesiál ba sira atu hatudu katak sira agradese ba Maromak tanba Nia fó moris perfeitu no buat hotu-hotu ba sira. Hodi halo tuir, sira hatudu katak sira respeitu sira-nia Aman iha lalehan nuʼudar ukun-naʼin, no katak sira simu buat neʼebé nia hakarak sira atu halo.

10, 11. (a) Tanbasá mak Adão no Eva la halo tuir Maromak? (b) Tanbasá mak sira-nia hahalok la bele hetan perdua?

 ¹⁰ Triste loos, Adão no Eva hili atu la halo tuir Jeová. Satanás koʼalia ba Eva liuhusi samea ida, hodi husu: “Maromak hatete katak imi labele han ai-fuan husi ai-hun sira iha jardín laran, neʼe tebes duni ka lae?” Eva hatán: “Ai-fuan husi ai-hun iha jardín ami bele han. Maibé kona-ba han ai-fuan husi ai-hun neʼebé iha jardín klaran, Maromak hatete, ‘Imi labele han ai-fuan husi ai-hun neʼe, labele, imi labele book ai-hun neʼe hodi imi la mate.’”—Gênesis (Kejadian) 3:1-3.

¹¹ Satanás hatete: “Imi sei la mate. Tanba Maromak hatene katak iha loron neʼebé imi han ai-fuan husi ai-hun ida-neʼe, imi-nia matan sei nakloke no imi sei sai hanesan Maromak hodi hatene diʼak no aat.” (Gênesis [Kejadian] 3:4, 5) Satanás hakarak Eva atu fiar katak diʼak liu ba Eva atu han ai-fuan neʼebé bandu. Tuir Satanás, Eva bele foti desizaun ba nia an kona-ba buat neʼebé loos no buat neʼebé sala; nia iha direitu atu halo buat naran deʼit neʼebé nia hakarak. Satanás mós duun katak Maromak koʼalia bosok hodi hatete sira sei mate se sira han ai-fuan neʼebé bandu. Eva fiar Satanás. Tan neʼe nia kuʼu ai-fuan neʼebé bandu no han. Depois, nia fó ba ninia laʼen, no nia mós han. Sira hatene katak sira-nia hahalok neʼe kontra buat neʼebé Maromak bandu tiha ona. Hodi han ai-fuan neʼe, sira rasik mak hili atu la halo tuir lei neʼebé simples no la susar atu halo tuir. Sira la respeitu duni sira-nia Aman iha lalehan no ninia direitu atu ukun. Sira-nia hahalok neʼe la bele hetan perdua tanba sira la hatudu respeitu ba Kriadór neʼebé hadomi sira!

12. Konta toʼok ezemplu kona-ba oinsá Jeová sente bainhira Adão ho Eva kontra hasoru nia.

 ¹² Hanoin toʼok: Se Ita haboot oan ida ho domin, maibé ikusmai oan neʼe la hatudu respeitu no domin hodi la halo tuir Ita, oinsá mak Ita sei sente? Se hanesan neʼe, Ita sente laran-kanek duni, loos ka lae? Nuneʼe mós, Jeová sente laran-kanek tebes bainhira Adão ho Eva kontra hasoru nia.

13. Tuir Maromak Jeová, saida mak sei akontese ba Adão bainhira nia mate? Maromak nia liafuan neʼe katak sá?

¹³ Tanba Adão no Eva la halo tuir Maromak Jeová, nia la husik sira atu moris ba nafatin. Sira mate, hanesan  Maromak hatete nanis ona. Bainhira Adão no Eva mate, sira la iha tan. Sira la bá mundu espíritu nian. Ita hatene ida-neʼe tanba kuandu Maromak Jeová koʼalia ba Adão, nia mós dehan: “Ó [sei] fila fali ba rai, tan husi rai mak haʼu foti ó. Tan ó mak rai-rahun no ó sei fila fali ba rai-rahun.” (Gênesis [Kejadian] 3:19) Antes Maromak kria Adão husi rai-rahun, Adão la iha. (Gênesis [Kejadian] 2:7) Tan neʼe, kuandu Maromak Jeová hatete katak Adão sei fila fali ba rai-rahun, neʼe katak Adão sei la iha tan. Adão sai hanesan deʼit rai-rahun neʼebé la iha moris.

14. Tansá mak ita mate?

¹⁴ Tuir loloos, Adão no Eva bele moris hela toʼo ohin loron, maibé sira mate tanba sira hili atu halo sala hodi la halo tuir Maromak. Ita mate tanba Adão nia sala kona nia bei-oan hotu, no tan neʼe ita simu sala no mós mate husi Adão. (Roma 5:12) Sala neʼe hanesan moras aat neʼebé kona inan-aman, no moras neʼe la bele kura. Moras aat neʼe mós hadaʼet ba sira-nia oan hotu. Ida-neʼe lori rezultadu mate, no mate mak hanesan malisan ida. Mate mak inimigu, laʼós belun. (1 Korinto 15:26) Ita agradese tebes ba Maromak Jeová tanba nia fó ninia Oan nia moris nuʼudar sakrifísiu atu salva ita husi inimigu aat neʼe, loos ka lae?

15. Tanbasá mak lia-loos kona-ba ema mate halo ita sente kmaan?

¹⁵ Bíblia nia hanorin kona-ba saida mak akontese ba ema neʼebé mate ona halo ita sente kmaan. Hanesan ita aprende ona, ema mate la sente laran-susar ka terus. Ita lalika taʼuk ba ema mate, tanba sira la bele halo aat mai ita. Sira la presiza ita atu ajuda sira, no sira la bele ajuda ita. Ita la bele koʼalia ho sira, no sira la bele koʼalia ho  ita. Ema-boot iha relijiaun barak bosok katak sira bele ajuda ema neʼebé mate ona, no ema neʼebé fiar ba bosok neʼe fó osan ba sira. Maibé tanba ita hatene lia-loos, ema neʼebé hanorin lia-bosok sira-neʼe la bele lohi ita.

16. Relijiaun barak nia hanorin mai husi sé? Nia uza relijiaun falsu atu halo saida?

¹⁶ Ita rasik nia relijiaun apoia Bíblia nia hanorin kona-ba saida mak akontese ba ema neʼebé mate ona ka lae? Relijiaun barak liu la apoia. Tanbasá? Tanba sira-nia hanorin mai husi Satanás. Nia uza relijiaun falsu atu lohi ema hodi sira fiar katak maski sira-nia isin mate, sira moris hela iha mundu espíritu nian. Satanás uza lia-bosok ida-neʼe, no lia-bosok seluseluk, atu hadook ema husi Maromak Jeová. Oinsá?

17. Tanbasá mak hanorin kona-ba haterus ema iha infernu ba nafatin la hatudu respeitu ba Maromak Jeová?

¹⁷ Hanesan ita lee ona iha parágrafu 3, relijiaun balu hanorin katak se ema ida halo buat neʼebé aat, kuandu nia mate nia sei terus ba nafatin iha ahi, ka infernu. Hanorin neʼe la hatudu respeitu ba Maromak. Jeová mak Maromak domin nian no nia nunka haterus ema hanesan neʼe. (1 João 4:8) Ita sente oinsá kona-ba ema neʼebé kastigu ninia oan hodi hatama oan nia liman ba ahi? Ita respeitu ema hanesan neʼe ka lae? Ita hakarak sai kolega ho ema hanesan neʼe ka lae? Lae duni! Tuir loloos, ita hanoin katak ema neʼe laran-aat. Maibé, Satanás hakarak ita atu fiar katak Maromak Jeová haterus ema iha ahi laran ba nafatin!

18. Ema neʼebé adora ema mate fiar lia-bosok saida?

¹⁸ Satanás mós uza relijiaun balu atu hanorin katak ema neʼebé mate tiha ona sai espíritu, ka mate-klamar, no ema neʼebé moris tenkesér hatudu respeitu ba mate-klamar sira-neʼe. Tuir hanorin ida-neʼe, mate-klamar bele  sai belun neʼebé forte, ka inimigu neʼebé halo taʼuk. Ema barak fiar lia-bosok ida-neʼe. Nuneʼe, sira taʼuk ba ema mate no hatudu respeitu no adora sira. Maibé, Bíblia la hanorin hanesan neʼe. Bíblia hanorin katak ema mate toba deʼit, no ita tenke adora deʼit Maromak neʼebé loos, Jeová, ita-nia Kriadór neʼebé fó buat hotu mai ita.—Apokalipse 4:11.

19. Hatene lia-loos kona-ba ema mate ajuda ita atu komprende hanorin saida tan husi Bíblia?

¹⁹ Kuandu ita hatene lia-loos kona-ba ema neʼebé mate tiha ona, ita la fiar tan relijiaun nia lia-bosok. Lia-loos neʼe mós ajuda ita atu komprende buat seluk tan neʼebé Bíblia hanorin. Porezemplu, kuandu ita aprende katak ema mate la bá mundu espíritu nian, neʼe ajuda ita atu tau fiar ba promesa kona-ba moris rohan-laek iha paraízu iha mundu.

20. Ita sei koʼalia kona-ba saida iha kapítulu tuirmai?

²⁰ Iha tempu uluk, ema loos naran Job husu: “Se ema ida mate nia bele moris fali ka lae?” (Jó [Ayub] 14:14) Entaun, ema neʼebé mate ona bele moris hiʼas ka lae? Buat neʼebé Bíblia hanorin kona-ba ida-neʼe halo ita sente kmaan. Kapítulu tuirmai sei koʼalia kona-ba ida-neʼe.