6-нҗы бап

Өлен адамлар ниреде?

Адам өленде, оңа нәме боляр?

Адам нәме үчин өлйәр?

Өлүм барадакы хакыкат нәме үчин теселли берйәр?

1—3. Адамлар өлүм барада нәхили сораг берйәрлер ве динлер нәме өвредйәр?

БУ СОРАГЛАР адамлары мүңлерче йыллап биынҗалык эдйәр. Бу сораглар өрән ваҗып, чүнки кимдигимизе ве ниреде яшаяндыгымыза гарамаздан, оларың җогабы хер биримизе тәсир эдйәр.

² Өңки бапдан Иса Месихиң төлег гурбанының эбеди яшайша ёл ачандыгыны билдик. Шейле-де Мукаддес Язгылардан өлүмиң болмаҗакдыгыны билдик (Ылхам 21:4). Йөне хәзир адамлар өлйәрлер. Акылдар Сүлейман патыша: «Дирилер өлҗегини билйәрлер» дийди (Вагызчы 9:5). Бизиң хеммәмизиң узак яшасымыз гелйәр. Эмма шонда-да, бизи шейле сораг биынҗалык эдйәр: адам өленде, оңа нәме боляр?

³ Якын гарындашларымызың өлүми бизе хасрат чекдирйәр. Шонуң үчин шу ашакдакы сораглар бизи биынҗалык эдйәндир: мерхум гарындашларымыз ниреде? Хорлук чекйәрмикә? Олар бизи гөрйәрмикә? Биз олара көмек эдип билерисми? Олары ене-де гөрермикәк? Бу сораглара хер дин хер хили җогап берйәр. Кәбирлери говы адамлар-а асмана гидйәр, эрбетлер болса довзахда яняр дийип пикир эдйәр. Башга адамлар болса, өлүлер о дүнйәдәки ата-бабаларының  янына баряр диййәрлер. Өлен адамлар ериң ашагында хөкүм эдилип, башга җандар болуп, тәзеден дүнйә инйәндигине ынанянлар хем бар.

4. Өлүм бабатда көп динлериң нәмеде меңзешлиги бар?

⁴ Динлер хер нәме өвретселер-де, бир затда меңзешлиги бар, ягны адам өленде ондан бир зат чыкып яшамагыны довам эдйәр. Адамлар өленден соң яшаяндыгына ве нәхилидир бир ёл билен гөрүп, эшидип ве пикир эдип билйәндигине хемише-де ынанярдылар. Эмма бу мүмкинми? Дуйгымыз ве пикиримиз бейнимизе баглы. Адам өленден соң бейни ишлемейәр. Бейни өленден соң, бизиң яткешлигимиз, дуйгымыз ве гайгымыз болмаяр. Бейни ишлемесе оларың болмагы мүмкин дәл.

АДАМ ӨЛЕНДЕ, ОҢА НӘМЕ БОЛЯР?

5, 6. Мукаддес Язгыларда өлен адамың ягдайы барада нәме дийилйәр?

⁵ Өлен адама нәме болянлыгы барада хакыкаты, Ярадыҗымыз Ехова билйәр. Ол өлен адамларың ягдайыны Мукаддес Язгыларда дүшүндирйәр. Мукаддес Язгылар адам өленде, яшамагыны бес эдйәндигини айдяр. Өлүм яшайышдан дүйбүнден тапавутланяр. Өлен адам гөрүп, эшидип ве пикир эдип билмейәр. Адам өленден соң башга ерде яшамаяр. Хава, бизде өлмейән җан я-да бакы рух ёк *.

⁶ Сүлейман: «Дирилер өлҗегини билйәрлер, өлүлер болса хич зат биленок» дийди. Ол өлен адамлар сөйүп я-да йигренип биленок, чүнки «габырда не иш бар, не ой-пикир, не билим, не-де акылдарлык бар» дийип дүшүндирди (Вагызчы 9:5, 6, 10). Шейле-де Зебур 146:4-де адам өленде «ниетлери... пуҗа чыкяр» дийилйәр.  Адамлар өлйәр ве өленден соң яшамаяр. Бизиң яшайшымызы шемиң ялны билен деңешдирип болар. Шеми өчүрсең, онуң ялны хем сөнйәр. Ялын башга ерде янмагыны довам этмейәр.

ИСА ӨЛҮМ БАБАТДА НӘМЕ ДИЙДИ?

7. Иса өлүми нәме билен деңешдирди?

⁷ Иса Месихиң сөзлери өлен адамың нәхили ягдайдадыгына дүшүнмәге көмек эдйәр. Исаның говы гөрйән досты Лазар өленде, ол шәгиртлерине: «Достумыз Лазар уклап ятыр» дийди. Лазарың кеселләндигини билйән шәгиртлер, ол яравсызлыкдан яңа ятандыр дийип дүшүндилер. Эмма олар ялңышярдылар. Шонда Иса олара гөни: «Лазар өлүпдир» дийди (Яхя 11:11—14). Гөрйәңми, Иса өлүми укы билен деңешдирди. Лазар гөге-де гитмеди, довзахда хем янмады. Ол перишделериң яшаян ерине-де гитмеди, о дүнйәдәки ата-бабаларының янына-да бармады. Башга җандар болуп, тәзеден дүнйә хем инмеди. Ол өленде гүйчли ука гиден ялыды. Мукаддес Язгыларың башга аятларында-да, өлүм укы билен деңешдирилйәр. Меселем, Давут хем: «Гөзлерими ягтыландыр, өлүм укусына гидәймәйин» дийип язды (Зебур 13:3).

8. Худай адамларың өлмегини ислемәндигини ниреден билйәрис?

⁸ Худай адамларың өлмегини иследими? Элбетде, ёк. Ехова адамлары ер йүзүнде эбеди яшамак үчин яратды. Бу китапдан билшимиз ялы, Худай илкинҗи ынсаны аҗайып Җеннетде ерлешдирди. Ол адамлара кәмил  саглык берди. Ехова олара диңе ягшылык иследи. Эйсем, сөййән ата-энелер чагаларының гаррамагыны ве өлмегини ислейәрми? Элбетде ёк! Ехова чагаларыны сөййәр ве оларың ер йүзүнде багтлы хем-де эбеди яшамагыны ислейәр. Мукаддес Язгыларда Ехова адамларың «йүрегине эбедилиги гуйды» дийилйәр (Вагызчы 3:11, ТД). Шонуң үчин бизиң эбеди яшасымыз гелйәр. Худай эбеди яшайыш үчин әхли шертлери хем дөретди.

 АДАМ НӘМЕ ҮЧИН ӨЛЙӘР?

9. Ехова Адам ата нәме табшырды ве бу табшырыгы ерине етирмек нәме үчин кын дәлди?

⁹ Онда адамлар нәме үчин өлйәркә? Бу сорагың җогабыны билмек үчин, Адам ата билен Хов энәниң яшан гүнлерини ятлалың. Мукаддес Язгыларда: «Реб Худай гөрмәге овадан ве иймәге оңат хер агаҗы... гөгертди» дийилйәр (Барлык 2:9). Эмма Ехова Адам ата: «Багың хер агаҗындан гайгысыз ийибер; йөне велин, ягшылык ве яманлыгы билме агаҗындан ийме» дийип табшырды (Барлык 2:16, 17). Бу табшырыгы ерине етирмек кын дәлди, чүнки Җеннетде иймәге башга-да мивели агачлар кәнди. Бу табшырык әхли зады ве кәмилиги берен Ехова миннетдарлык билдирмәге оларда мүмкинчилик дөредйәрди. Олар Худая гулак ассалар, сөйгүден долы гөкдәки Атасының хәкимиетини хорматлаяндыкларыны ве онуң табшырыкларыны ерине етирмек ислейәндиклерини гөркезердилер.

10, 11. а) Илкинҗи адамлар нәдип Худая гулак асмадылар? б) Адам ата билен Хов энәниң гулак асмазлыгы нәме үчин багышланмаз?

¹⁰ Гынансак-да, илкинҗи адамлар Ехова билгешлейин гулак асмадылар. Шейтан йыланың үсти билен Хов энә шейле дийди: «Догрудан, Худай сизе: Багың хич бир агаҗындан иймәң дийдими?» Хов эне оңа җогап берип шейле дийди: «Багың агачларының мивесинден ийип билйәрис. Йөне велин, багың ортасындакы агаҗың мивеси барада Худай: Ондан иймәң, ве оңа элиңизи дегирмәң, өләймәң, дийди» (Барлык 3:1—3).

¹¹ Шейтан: «Элбетде, өлмерсиңиз, чүнки Худай ондан иен гүнүңиз, шол вагт гөзлериңиз ачылып, ягшыны ве яманы билип-де, Худай ялы болҗакдыгыңызы билйәр» дийди (Барлык 3:4, 5). Хов эне гадаган эдилен миведен ийсе, онуң хас багтлы болҗакдыгына Шейтан  ынандырҗак болды. Онуң айтмагына гөрә, Хов эне ягшыны ве яманы селҗерип, өз ислейши ялы яшап билерди. Шейле-де Шейтан Ехова төхмет атып, адамлар гадаган эдилен миведен ийсе, аслында, нәме болҗагыны Худай гизлән ялы этди. Хов эне Шейтаның сөзүне ынанды. Шонуң үчин ол агаҗың мивесинден алып ийди. Соңра әрине-де берди ве ол хем датды. Олар муны билмән этдилер дийип болмаз. Олар Худайың канунына гаршы гидйәндиклерине оңат дүшүнйәрдилер. Олар миведен ийип, Худайың йөнекей хем-де пайхаслы табшырыгыны боздулар. Олар гөкдәки Атасыны ве онуң хәкимиетини сыламадылар. Бу багышланылмаян гүнәди.

12. Адам ата билен Хов энәниң гулак асмазлыгы, Ехова нәхили тәсир эдендигини хайсы мысал гөркезйәр?

 ¹² Эгер сениң өсдүрип етишдирен чагаларың өз херекети билен сени сыламаяндыкларыны ве сөймейәндиклерини гөркезсе, өзүңи нәхили дуярдың? Ехованың чагалары Адам ата билен Хов энәниң гулак асмазлыгы, оны гөр, нәхили гынандырандыр!

13. Ехова Адам ата җеза беренде нәме дийди ве ол нәмәни аңладяр?

¹³ Ехова гулак асмадык Адам ата билен Хов энәниң эбеди яшамагына ёл бермеди. Онуң дуйдурышы ялы, олар өлди. Адам ата билен Хов эне яшамагыны бес этди. Олар рухларың дүнйәсине дүшмедилер. Ехова Адам ата җеза беренде: «Чүнки топраксың ве топрага өврүлерсиң» дийди (Барлык 3:19). Худай Адам атаны топракдан яратды (Барлык 2:7). Адам ата ярадылмазындан өң, хич ерде яшанокды. Шонуң үчин «топрага өврүлерсиң» диен сөзлер, яшамагыны бес эдендигини аңладяр. Адам ата топрак ялы җансыз болар.

14. Биз нәме үчин өлйәрис?

¹⁴ Адам ата билен Хов эне гүнә этмән Худая гулак асан болсалар, хәзирем яшардылар. Адам ата неслине гүнәни ве өлүми гечирди, шонуң үчин хемме адамлар өлйәр (Римлилер 5:12). Гүнәни несилден-несле гечйән кесел билен деңешдирип болар. Өлүм — гүнәниң нетиҗеси, ол нәлет. Өлүм — дост дәл-де, душман (1 Коринтослылар 15:26). Бу залым душмандан азат этҗек, Ехованың төлег гурбанына биз нәхили миннетдар!

ӨЛҮМ БАРАДАКЫ ХАКЫКАТ ТЕСЕЛЛИ БЕРЙӘРМИ?

15. Өлүм барадакы хакыкаты билмек нәме үчин теселли берйәр?

¹⁵ Мукаддес Язгылар өлен адамлар барадакы хакыкаты айдып, йүрегимизе теселли берйәр. Билшимиз  ялы, өлен адам эҗирем чекмейәр, агыры хем дуймаяр. Биз олардан горкмалы дәл, чүнки олар зыян етирип билмейәр. Олар бизиң көмегимизе-де мәтәч дәл, бизе көмегем эдип билмейәр. Биз олар билен гүрлешип хем-де сесини эшидип билмейәрис. Эмма көп дини ёлбашчылар өлен адамлара көмек эдип билйәрис дийип ялан сөзлейәрлер. Дине уйян адамлар муңа ынанярлар ве мерхум гарындашларына көмек этҗек болуп, дини ёлбашчылара пул берйәрлер. Эмма хакыкаты билйәнлигимиз бизи шейле ялан дүшүнҗелерден гораяр.

16. Көп динлериң таглыматлары кимиң тәсири билен дөреди ве нәдип?

¹⁶ Мукаддес Язгыларың өлүм барада өвредиши ялы, сениң уйян диниңде-де өвредйәрлерми? Көп динлер өлүм барада хакыкаты өвретмейәр. Нәме үчин? Себәби оларың таглыматлары Шейтаның тәсири билен дөреди. Шейтан адам өленден соң, о дүнйә гидйәр диен дүшүнҗәни ялан дин аркалы яйрадяр. Шейле ялан таглыматлар адамлары Ехова Худайдан дашлашдыряр. Нәдип?

17. Бакы гынамак барадакы таглымат нәме үчин Ехова Худая ыснат гетирйәр?

¹⁷ Ёкарда айдылышы ялы, кәбир динлер эрбет адам өленден соң, отда янып бакы гыналяр дийип өвредйәр. Бу таглымат Худая ыснат гетирйәр. Ехова сөйгүден долы Худай. Ол адамлары хич хачан гынамаз (1 Яхя 4:8). Темми бермек үчин диен этмейән чагасының элини отда якян адам барада нәме пикир эдердиң? Шол адам билен танышасың гелермиди? Элбетде, ёк! Сен ол адамы залым хасаплардың. Шейтаның максады хем шол. Шейтан бизе Ехованың адамлары миллиардларча йыллап отда якяндыгына ынандырҗак боляр!

18. Хайсы таглымат өлүлере сежде этмеги өвредйәр?

¹⁸ Адам өленсоң руха өврүлйәр ве олара хормат гоймалы  хем-де разы этмели диен таглыматы, Шейтан кәбир ялан динлер аркалы яйрадяр. Шу таглымата гөрә, өлен адамларың рухы ягшызадалара я-да ёвуз душмана өврүлйәрмишин. Бу ялан таглымата көп адамлар ынанярлар. Олар өлүлерден горкуп, олара хормат гойярлар я-да сежде эдйәрлер. Мукаддес Язгылар болса өлен адамларың өлүм укусында ятандыгыны ве диңе Ярадыҗымыза, Яшайыш бериҗи хак Худай Ехова сежде этмелидигини өвредйәр (Ылхам 4:11).

19. Өлүм барадакы хакыкаты билсең, хайсы таглымата дүшүнмек кын дәл?

¹⁹ Өлен адамлар барадакы хакыкаты билсең, сени ялан динлериң таглыматларындан горап, Мукаддес Язгыларың таглыматына догры дүшүнмәге көмек эдер. Меселем, о дүнйәде яшайшың ёкдугыны билсең, ер йүзүндәки Җеннетде болҗак дурмушың нәхили аҗайыпдыгына дүшүнерсиң.

20. Индики бапда хайсы сорага середерис?

²⁰ Гадымы дөвүрде яшан Эйюп пыгамбер: «Өлен адам ене яшап билермикә?» дийди (Эйюп 14:14). Өлүм укусына гиден адам ене-де яшармыка? Мукаддес Язгылар бизе теселли берйәр. Муны биз индики бапдан билерис.

[Чыкгыт]

МУКАДДЕС ЯЗГЫЛАР НӘМЕ ӨВРЕДЙӘР?

▪ Өлен адамлар гөрүп, эшидип ве пикир эдип билмейәр (Вагызчы 9:5).

▪ Өлүми укы билен деңешдирсе болар; өлен адам эҗир чекмейәр (Яхя 11:11).

▪ Адамлар Адам атадан гечен гүнә себәпли өлйәр (Римлилер 5:12).

[Макаланың согарлары]

[59 Сахыпадакы сурат]

Ялын нирә гитди?

[60 Сахыпадакы сурат]

Ехова адамлары ер йүзүнде эбеди яшатмак үчин яратды

[62 Сахыпадакы сурат]

Адам ата топракдан ярадылды, топрага-да өврүлди