1-3. Ino aby raha an̈ontanianolo momba olo maty? Karakory amaliany fivavahan̈a maro fan̈ontanian̈a aby io?

TAN̈ATINY taon̈o maro olo nan̈ontany karaha zen̈y. Ten̈a maventy ankitin̈y fan̈ontanian̈a aby io. Atsika koa tsara mahay valinizen̈y, fotony atsika samy efa naty havan̈a.

² Tamy Toko faha-5 tamy boky ty, atsika nianatra fa vidipan̈avotan̈a nataony Jesosy in̈y hazahoantsika fiain̈ana tsisy farany. Atsika koa nianatra fa “fahafatesan̈a tsy ho hisy eky.” (Apokalypsy 21:4) Tsy karaha zen̈y raha hitantsika, fotony isanandra misy olo maty fo. Panjaka Solomona nivolan̈a fa “olo koa mbala velon̈o mahay fa izy mbala hofoaty.” (Mpitoriteny 9:5) Ndray atsika man̈ano raha hampahela velon̈o, atsika mbala loso eritreritry fo, han̈ano karakory atsika izikoa fa maty.

³ Izikoa atsika maty havan̈a na naman̈a, atsika malahelo mare. Mety karaha ty fan̈ontanian̈a mety ho avy amy jerintsika: ‘Asa mba man̈ano karakory iro in̈y ? Asa iro in̈y mijaly? Iro in̈y ma mbala mahavita mitahy atsika? Mbala misy raha mety hataontsika ma amindro in̈y? Atsika ma mbala hifanojy iro in̈y andra araiky an̈y?’ Tsy mitovy raha koran̈iny fivavahan̈a momba fan̈ontanian̈a aby io. Sasany mivolan̈a fa olo koa nan̈ano ny tsara, mandeha andan̈itry an̈y. Izikoa izy nan̈ano ny ratsy, mandeha amy motrobe.  Sasany ndraiky mivolan̈a fa mandeha ankoatra an̈y zen̈y olo koa fa maty. Misy koa fivavahan̈a mivolan̈a fa olo koa fa maty, mandalo fitsaran̈a amy Zan̈ahary antsendriky, baka io hamian̈a vatan̈a vaovao.

4. Ino raha araiky mampitovy raha ampianariny fivavahan̈a maro?

⁴ Amy raha jiaby koran̈iny fivavahan̈a aby io, misy raha araiky mampitovy raha ampianarindro: Vatan̈a fo maty, fa fan̈ahy tsy maty. Amindro, olo koa fa maty, raha nandeha nifindra tanàna fo, fa izy an̈y mbala mahita, maharen̈y ndreky mahavita mivolan̈a. Mba marin̈y edy zen̈y va? Baka amy betrontsika mahavy atsika mahavita mivolan̈a, mahita ndreky maharen̈y. Olo koa fa maty, betronany efa tsy miasa eky, ke zen̈y mahavy izy tsisy raha vitany eky.

5, 6. Izikoa Baiboly zahan̈a, man̈ano karakory ma olo koa fa maty?

⁵ Jehovah niasa atsika fo ten̈a mahay raha momba fahafatesan̈a io. Amy Baiboly ao izy man̈azava ny marin̈y momba olo maty. Ambarany ao fa olo koa fa maty efa tsisy eky. Dikany maty zen̈y tsisy fahin̈ana. Olo maty tsy mahita, tsy maharen̈y, tsy mivolan̈a, baka io tsisy fan̈ahy mandeha ankoatra zen̈y eky. Olo koa fa maty, fan̈ahinany koa maty. *

⁶ Solomona koa fa baka nivolan̈a fa olo koa mbala velon̈o mahay fa izy mbala hofoaty, misy raha hafa koa nambarany: ‘Olo maty tsisy raha hainy eky.’ Nivolan̈a koa izy fa olo maty tsy mahay tia olo, tsy mahavita mamaly faty, ‘tsisy asa na eritreritry na fahaizan̈a na fisiany jery amy fasan̈a handihanany an̈y.’ (Vakia Mpitoriteny 9:5, 6, 10.) Amy Salamo 146:4 koa mivolan̈a fa olo koa  fa maty, ‘foan̈a eritreritrinany.’ Fahin̈ana io mira motrony labozy. Izikoa fa maty labozy io, lelany motro in̈y tsisy tany nandihanany fa tsisy fo. Karaha zen̈y koa, atsika koa fa maty, tsisy fan̈ahy mandehandeha zen̈y eky.

7. Tamy Jesosy, karakory ma olo koa fa maty?

⁷ Jesosy koa nikoran̈a raha momba olo maty. Nisy olo hainy naty, Lazarosy an̈arany. Izy nivolan̈a karaha ty tamy pianatranany: “Lazarosy mandry.” Tsy nazava tamy pianatranany aby io raha nivolan̈iny. Iro nieritreritry fa Lazarosy io mangala kajo ankitin̈y, fotony baka narary. Jesosy amy zay nan̈azava fa Lazarosy io maty. ( Vakia Jaona 11:11-14.) Tamy Jesosy, olo maty zen̈y mira olo mandry. Lazarosy tsy fanojy anjely zen̈y. Izy koa tsy niaraka tamy havany efa naty, baka io tsy namian̈a vatan̈a vaovao. Izy tsy tandan̈itry tan̈y, izy koa tsy tamy motrobe. Izy tampasan̈a tao fo. Izy naty in̈y mira olo mandry mare fa tsisy nofy. Misy toko ndreky andininy hafa koa amy Baiboly mivolan̈a fa olo maty mira olo mandry. Jesosy koa fa namelon̈o tsaiky man̈angy araiky zanaka Jairo in̈y, izy nivolan̈a: “Izio tsy maty fa mandry.” (Lioka 8:52, 53) Davida koa nivolan̈a fa olo maty “mandry mare amy fahafatesan̈a.”—Salamo 13:3.

8. Ino ahaizantsika fa fahafatesan̈a io tsy lahatra Zan̈ahary?

⁸ Fahafatesan̈a io ma tsy efa lahatra Zan̈ahary? Ehe, fotony Jehovah koa fa niasa Adama ndreky Eva, iro tiany ho  velon̈o tsisy farany ambony tany eto. Atsika efa ­nianatra fa iro napetraka Zan̈ahary tamy zaridain̈y tsara. Iro tao tsy narary, tsy nijaly. Namiany iro raha jiaby nilaindro. ­Karaha ataony raimandreny ten̈a tia zanaka, tsy mety ho tiandro zanakandro hijaly, hatoe ndreky hofoaty. Tiany Jehovah koa olo niasainy ho sambatra tsisy farany ambony tany eto. Baiboly mivolan̈a fa Jehovah koa fa niasa olo, nataony tan̈atiny fondro tao fan̈irian̈a hiain̈y tsisy farany. (Mpitoriteny 3:11) Atsika tsy raha nataony han̈iry ho  velon̈o tsisy farany fo fa mbala nataony koa raha hampatanteraka fan̈irian̈antsika zen̈y.

9. Ino raha tsy nimboany Jehovah nataony Adama? Nan̈ino tsy tokony ho sarotro tamindro nan̈araka volan̈a Jehovah io?

⁹ Alohany hamaliantsika fan̈ontanian̈a io, atsika himpody amy tantarany Adama ndreky Eva, taminiro vo niasainy Jehovah. Baiboly mivolan̈a fa “nampaniriny Zan̈ahary Jehovah tambony tany karazan̈a kakazo jiaby tsara zahan̈a ndreky mety ahanin̈y.” (Genesisy 2:9) Ndray izy man̈ano zen̈y, izy nivolan̈a taminy Adama karaha ty: ‘Anao mety mihina zay laninao amy voany kakazo jiaby amy zaridain̈y ty. Voany kakazo araiky ahaizan̈a ny tsara ndreky ratsy fo aza ahanin̈y, fa hofoaty ankitin̈y anao aminandra ihinananao izy.’ (Genesisy 2:16, 17) Tsy tokony ho sarotro tamindro nan̈araka volan̈a Jehovah io, fotony maro voany kakazo mety nahanindro. Iro koa nan̈araka volan̈a Jehovah, ho hita fa iro ten̈a mankasitraka izy nan̈amia raha jiaby, an̈atinizen̈y fiain̈ana tsarabe io. Ho hita baka amy zen̈y koa fa iro nan̈aja Jehovah ndreky tia man̈araka volan̈anany.

10, 11. a) Karakory ma nahavy Adama ndreky Eva tsy nan̈araka volan̈a Zan̈ahary? b) Ino ivolan̈ana fa ten̈a tsy nety raha nataony Adama ndreky Eva?

¹⁰ Adama ndreky Eva tsy nan̈araka volan̈a Jehovah. Satana namadiky jerindro. Izy nampivolan̈a bibilava, ­hivolan̈a taminy Eva karaha ty: “Izio ma marin̈y ankitin̈y Zan̈ahary nivolan̈a taminaro fa anaro tsy mahazo mihina voany kakazo jiaby amy zaridain̈y ato?” Volan̈iny Eva ­taminany: “Zahay mahazo mihina voany kakazo aby amy zaridain̈y ty. Fa momba voany kakazo an̈ivony zaridain̈y io fo, karaha ty nivolan̈iny Zan̈ahary: ‘Aza ahaninaro izio, baka io aza mikasiky izio anaro, tsao anaro maty.’ ”—Genesisy 3:1-3.

 ¹¹ Satana amy zay nivolan̈a karaha ty: “Anaro tsy hofoaty zen̈y foeky. Hainy Zan̈ahary tsarabe fa aminandra hihinananaro izio, masonaro hibian̈a, anaro ho mira Zan̈ahary, hahay ny tsara ndreky ratsy.” (Genesisy 3:4, 5) Nataony Satana raha iritriretany Eva fa mahatsara izy fihinanan̈a voany kakazo io. Amy Satana, Eva zaraiky fo mahavita manapakevitry fa tsy mila Zan̈ahary. Nataony koa raha iritriretany Eva fa Zan̈ahary navandy tamindro. Eva nan̈araka volan̈a Satana, ke nalainy voany kakazo in̈y, baka io nahaniny. Vadiny koa fa namiany, nihina koa. Haindro tsarabe volan̈a Zan̈ahary, fa raha efa nivolan̈iny tamindro aza ahanin̈y edy kinia nahanindro. Adama  ndreky Eva tsy nan̈aja Jehovah, kanefa izy niasa iro sady ten̈a tia iro. Zen̈y nahavy Jehovah tsy nandefitry tamindro.

12. Nan̈ano karakory Jehovah, izikoa fa tsy nan̈araka volan̈anany Adama ndreky Eva?

¹² Malahelo raimandreny, izikoa zanakandro tsy man̈araka volan̈andro ndreky tsy man̈aja iro. Nalahelo koa Jehovah taminy Adama ndreky Eva tsy nan̈araka volan̈anany.

13. Han̈ano karakory Adama koa fa maty? Ino ma dikany “hanjary fotaka” zen̈y?

¹³ Adama ndreky Eva koa fa tsy nan̈araka volan̈a Zan̈ahary, iro naty, karaha nivolan̈iny Zan̈ahary in̈y. Iro tsy nisy eky. Iro tsy nanonga andan̈itry. Akory ma ahaizantsika zen̈y? Fotony Jehovah efa nivolan̈a taminy Adama: ‘Anao fotaka, baka io hanjary fotaka koa.’ (Genesisy 3:19) Baka tamy fotaka niasan̈a Adama. (Genesisy 2:7) Talohanizen̈y, izy tsisy. Zan̈ahary koa fa nivolan̈a taminy Adama fa izy hanjary fotaka, dikanizen̈y Adama himpody tsisy karaha taloha.

14. Nan̈ino ma atsika maty?

¹⁴ Adama ndreky Eva koa nan̈araka volan̈a Zan̈ahary, iro tsy naty. Adama ndreky Eva namindra fahotan̈a ndreky fahafatesan̈a tamy taranakandro jiaby, ke zen̈y mahavy atsika jiaby maty. ( Vakia Romanina 5:12.) Fahotan̈a io mira aretin̈y manaranaka mamono. Zay olo azony, maty fo. Dikanizen̈y, fahafatesan̈a io fahavalo fa tsy naman̈a. (1 Korintianina 15:26) Atsika mankasitraka Jehovah nan̈amia vidipan̈avotan̈a in̈y, fotony baka amizio mahavy atsika tsy ho azony fahavalo tsy manjary io!

15. Ino mahatsara atsika mahay ny marin̈y momba olo maty?

¹⁵ Ravoravo atsika mahay raha ampianariny Baiboly  momba olo maty. Haintsika fa iro tsy mijaly, tsy marary. Iro tsy mahavita mampavozo atsika, fotony olo maty tsisy raha vitany eky. Ke tsisy raha tokony hatahoran̈a iro in̈y eky. Iro tsy mahavita man̈ampy atsika. Atsika koa tsy mahavita man̈ampy iro. Iro tsy mahavita mivolan̈a, karaha ataontsika tsy mahavita mikoran̈a amindro. Maro pitariky fivavahan̈a mangala volanolo, man̈ano vavaka ninolo maty, baka zen̈y iro in̈y mahazo hatsaran̈a. Atsika koa fa mahay ny marin̈y, atsika tsy azondro amy zen̈y.

16. Azovy ma nampiditry hevitry diso amy raha ampianariny fivavahan̈a maro? Karakory nan̈anovany zen̈y?

¹⁶ Mba mifan̈araka amy raha volan̈iny Baiboly edy raha ampianariny fivavahan̈anaro momba olo maty? Ankamarozany fivavahan̈a tsy mampianatra ny marin̈y momba olo maty, fotony misy hevitry diso nampidiriny Satana amy raha ampianarindro. Satana mampiasa fivavahan̈a diso aby io, baka olo hino fa olo araiky koa fa maty, fan̈ahinany tsy maty. Zen̈y tsy marin̈y! Mbala misy vandy hafa koa ampianariny Satana, baka olo tsy hihavan̈a amy Jehovah. Nan̈ino ma atsika mivolan̈a zen̈y?

17. Nan̈ino ma man̈isy baraka Jehovah fampianaran̈a mivolan̈a fa izy man̈oro olo amy motrobe?

¹⁷ Nianarantsika taloha tan̈y in̈y fa fivavahan̈a maro mampianatra fa zay olo ratsy fan̈ahy mandeha amy motrobe koa fa maty. Ten̈a man̈isy baraka Zan̈ahary fampianaran̈a karaha zen̈y. Jehovah io Zan̈ahary be fitiavan̈a, ke izy tsy mety hampijaly atsika karaha zen̈y. ( Vakia 1 Jaona 4:8.) Izikoa misy olo araiky manan̈a zanaka maditry, ke hiroany tan̈any zanany, akory fahitanao zen̈y? Mba tianao han̈aja olo karaha zen̈y? Tianao hanjary kamaradinany? Hay tsarabe fa tsy tianao. Mety hahinihiny fo anao mahita olo kafiry be karaha zen̈y. Tiany Satana atsika hino fa Zan̈ahary io mampijaly olo tsisy farany amy motrobe.

18. Ino fampianaran̈a diso mahavy olo hivavaka aminolo maty?

 ¹⁸ Mampiasa fivavahan̈a koa Satana hampianatra fa olo araiky koa fa maty, manjary fan̈ahy, ke tsy maintsy hajain̈y ndreky hamian̈a voninahitry. Fivavahan̈a aby io koa mampianatra fa fan̈ahinolo maty aby in̈y, mety hanjary namantsika na fahavalontsika. Maro olo mino vandy zen̈y, ke manjary mavozo olo maty ndreky mivavaka amindro. Izikoa Baiboly zahan̈a, olo maty tsisy raha vitany mira olo mandry. Jehovah zaraiky fo tokony hivavahantsika, fotony izy niasa atsika ndreky mamelon̈o atsika.—Apokalypsy 4:11.

¹⁹ Anao koa mianatra Baiboly, ke mahay tsarabe ny marin̈y momba olo maty, anao tsy hankadalainolo eky. Misy raha hafa ampianariny Baiboly koa hazava aminao. Hanjary hazava aminao fa ho hisy marin̈y Paradisa ambony tany zen̈y.

20. Ino fan̈ontanian̈a hivalian̈a amy toko fan̈araka ty?

²⁰ Taloha tan̈y, misy olony Zan̈ahary araiky, Joba an̈arany, nan̈ontany karaha ty: “Izikoa lelahy matanjaka maty, mbala ho velon̈o fo va?” (Joba 14:14) Ho hitantsika amy toko fan̈araka ty valiny fan̈ontanian̈a zen̈y.