1-3. Gini asanahe aboro naasanaha nibipa kpio, na gini akaragapai ni bakiakia dungu apambori afuhe sa agu asanahe re?

SI NGA agu asanahe aboro aima digo ni berẽkuriihe tipa akutu agarã. Si nga nyanyakipa asanahe. Gaha akaragapai nabi rani wadu ani ni basasa dunduko.

² Rogo gu kapita nasusi, ani afura tipa wai ga Yesu Kristo motumo tumorii aza gene tipa nyenye unga. Ani awiriki gupai a nga, Ziazia Kekeapai aima pepa gu regbo kpio ‘nikaa dunga berewe ya.’ (Yugoti 21:4) Ono tie, ani dunduko nakpiko akpiko. “Agu yo du ni ungayo i ini he ya i akpí akpi,” wo gu tatamanatatamana bakindo nangia Soromo agumbaha. (Batungusipai 9:5) Ani na asada ka raka ni gbangaha a wa rengbe ani na ni. Ono ani nabakabangirani abaka na pa gupai nika manga tipa rani ho ani ka kpi ni.

³ Rago naagberã agberã tirani gbe ho abadiangbarani akpiko ni. Ani rengbe ka sanahe nga: ‘Ginipai mangi tipa yo? Ya mo i nambu ambu awere? Ya mo i nabi rani? Ani rengbe ka undo yo? Ani abiyo berewe?’ Agu apambori nga ga zegino nafu akaragapai sa agu asanahe re ni bakiakia. Aguyo nayugoho nga, ka mo raki wene raka, mo nika ndu ku ngbangbaturũ yo, ono ka mo raki  gbegberẽ raka, i nika zoro rogo we. Gu kura apambori nayugo gupai nga, ti regbo kpio, boro naga ku rogo gu ngbii nga ga atoro tipa kadu na atitani. Gu kurayo naya wẽ kpikpi aboro nandu ku rogo gu ngbii du sende yo tipa i sapungbangayo, fuoho, i kini vunguyo berewe ni kura ngbatunga aboro watadu ni anya.

4. Gini berãpai du dungu apambori na ni tipa kpio?

⁴ Ngbatunga agu ayugopai nga ga apambori re dunduko na bangisapai sa rogoho nga, papara boro kinaho nabata tingbafuo kpioni. Dungu apambori, singia gu du awere watadu gu naadu mbata, naya wẽ ani naraka nyeanye kindi kini ngere angera, kini gipai agia, na kini berẽ aberã. Ono wai rengbe gupai re kadu wo? Agu abarapa boro ní aino apai na ni wa gu nga hõse na bangirise, si namangasunge mbiko dudu. Ho boro akpi ni, dudu ní amanganga sunge berewe te. Barapa boro ho naraka ku mbatayo kindi fuo mbu dudu mangasunge te.

5, 6. Ginipai Ziazia Kekeapai ayugoho tipa gupai du tipa kpikpi aboro?

⁵ Yekova Mbori ima ino gupai nzunzu ninaamanga ho boro akpi ni, bambiko ko nakusi boro. Ko ima ino gu rengo du tipa kpio, na Sangbako nga Ziazia Kekeapai nagumba gupai furani du tipa kpikpi aboro. Si nagumba gupai ziazia nga: Ho boro akpi ni, ní nago kusayo. Kpio nga zanga unga. Kina gu boro du ni ungani, ní rengbe ka bi hee, ka giapai, na ka berã. Papara boro ho kandara sa ninaabata ho ní akpi ni te. He ho rogoraniyo nga mbisimo watadu toro kaa kpingo ya te. *

 ⁶ Fuo bi Soromo gupai nga agu aboro du ni ungayo inihe ya i akpi akpi, ko aya: ‘Kpikpi aboro ainanga pai te.’ Fuo gure, ko asakipai tipa gipai re ki ya wẽ kpikpi aboro arengbanga ka kpinyemu aboro watadu ka sogayo te, na ‘sunge, berãpai, inahe, na tatamana rogo Baatoro kpikpi aboro yo [nga murã] te.’ (Mo gedi Batungusipai 9:5, 6, 10.) Atambuahe 146:4 nagumba kina gu bangisapai re ki ya wẽ, ho boro akpi ni, ‘gani berãpai nanyasa.’ Ho kpotorani akpi ni, ani nanyasa kusayo dunduko. Gu unga du ani na ni, si wakina mirãwe. Ho i abiso mirãwe ni, si andunga ku rogo kura ba te. Si nanyasa kusayo.

7. Wai Yesu asakirogo gupai yo du tipa kpio?

⁷ Yesu Kristo aima fura tipa gupai du tipa kpikpi aboro. Ti kura regbo sa, ko agumba gipai re nibipa Razaro nakpi, nga gu kumba ko aima inoko wenengai. Yesu aya fu gako abawiriki wẽ: “Badiangbarani ti ni rame nga Razaro.” Gako abawiriki aberẽ gupai tigayo nga Razaro aara ara tipa ka hu be gako kaza. Ono anga wo si adu te. Yesu aya berewe fuyo ziazia wẽ: “Razaro kpi.” (Mo gedi Yoane 11:11-14.) Mo bingo gupai nga Yesu aringbisi kpio kuti ongoda na rame. Ho Razaro akpi ni, ko aandunga ku ngbangbaturũ yo watadu ku iferno yo te. Ko aandunga fuo amaraika watadu agu atitako naima kpiko te. Ko aasanga tiko ku rogo kura ngbatunga boro watadu kura he a te. Ono ko aaongoda rogo kpio yo, nga guhe du wakina gu bakere rame adunga na amosumo rogoho ya. Kura apapara Ziazia Kekeapai naringbisa kpio aringbisa a kuti rame. Ni kpiapai, ho i asopo gu bawiriki ni nangia Setefano na ambia, Ziazia Kekeapai naya wẽ ko ‘ati ni rame.’ (Amokedi 7:60) Wakina gure  a, gu mokedi nangia Pauro akepai tipa kura aboro naadu ti ragoko ‘nati ni rame’ rogo kpio yo.—1 AKorindo 15:6.

8. Wai ani aino ya anga ga Mbori ringbisapai du nangia aboro nikpiki te?

⁸ Ya mo ga Mbori ringbisapai du nangia aboro nikpiki? Oó. Yekova Mbori amangi aboro i raki nyeanye kindi auru kpotosende. A wa ani awirikihe kusayo rogo gi buku re, Mbori amoi gu bambata kumba na dee ko akusiyo rogo gu rago nangia paradizo. Kpotoyo adu ni wenehe zanga ingapai na kaza. Mbori akpinyemu kina weneapai du tipa yo. Ya mo wene baagude ho nakpinyemu gupai nga awirini rungo be gbinza na ki kpiki? Wagusa te! Mbori aima kpinyemu awiriko, na kini idi i raki bawene raka auru kpotosende nyeanye kindi. Ziazia Kekeapai naya tipa aboro wẽ: ‘[Yekova] amoi nyenye apai ku berãyo yo.’ (Batungusipai 3:11) Yekova amangi aboro ki moi nyemu nyenye unga ku rogoyo yo. Na ko ima zakagene tipa i gbia gu nyenye unga re.

9. Gini rugute Yekova afuhe fu Adamu, na tipagine gi rugute re aadunga ti ni ni mbumbuhe ka irisaha ya?

⁹ Tipagine tie aboro akpi ti ni? Tipa ani ini gupai aboro akpi ti ni, ani wisigingo gupai namangi ho kina Adamu na Eva adu ni ue auru kpotosende. Ziazia Kekeapai naya: “Yekova Mbori ki mangi angua dunduko si nisono ti sende, nga gu ngba bi he nga gu ngba tipa  riahe.” (Bambata Pai 2:9) Ono Yekova azayo ti pai sa. Ko aya fu Adamu wẽ: “Agu angua du ati yo dunduko mo nirí zuzuhe ari a wa mo akpi nyemu he; ono gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago ka mo ri zuzuhe mo akpí akpi ni rengo.” (Bambata Pai 2:16, 17) Si aadunga ni mbumbupai fuyo i irisi gi rugute re te, bambiko badungu angua  naadu ho Mbori aya i niri zuzuhe. Ono gi rugute ko afuhe fuyo re angia momu tipa i yugu gayo tambuahe fu Mbori tipa gu weneapai ko amangihe tipa yo, kodihe na gu unga ko afuhe fuyo. Ka i agisangba Mbori, ka si ayugu gupai nga i adu na irisa tipa gu pagbia nga ga Mbori na i aima ida ko nifu arugute fuyo.

10, 11. (a) Wai bambata kumba na diako abasasangba Mbori? (b) Tipagine gu basasangba nga ga Adamu na Eva adu ti ni ni kerepai gbe?

¹⁰ Ono si ni pa gberãrago nga, Adamu na Eva adiberã ka basasangba Yekova. Satana aye rogo woo yo ki sana Eva ki ya: “[Ya mo] Mbori aya, ‘Ka oni rí nga agu angua du ati yo dunduko ya’?” Eva akaragapai ki ya: “Gu zuzu angua du ati yo ka ani ri he ari; ono zuzu gu ngua du bebere ati yo, Mbori aya, ‘Ka oni rí nga zuzuhe ya, ka oni zádi nga ha wa sa ya, oni ka kpi.’ ”—Bambata Pai 3:1-3.

¹¹ Satana ki ya: “Oni akpí nga wa sa te. Bambiko Mbori ini ya ni gu rago ka oni ri zuzuhe bangironi azá aza, oni ki du wa kina Mbori, niini wenepai na gbegberẽpai.” (Bambata Pai 3:4, 5) Satana aidi ka sa Eva ri berẽ gupai nga, ka ri ri zuzu gu ngua Mbori azahe ti ni, ri gbia undo agbia. Gupai ko aaida ka gumbaha nga, ri rengbe arengba ka diaberã tipa tiri nibipa gupai du ni ruruhe na gu du ni irairaha; watadu ri rengbe arengba ka manga gupai ri akpinyemu ka mangaha. Satana ape gupai a nga, ziree du Mbori apehe nga ka i ri gu zuzu ngua re, i kpi akpi. Eva aidi kuti sangba Satana, ki kati zuzu gu ngua re ki rihe. Fuoho, ri ki ndu na gu fu kumbari, ko ki rihe a. I aima ino gupai i aamangaha. I aima ino ya i aamanga kina boro gupai nzunzu Mbori aya ka i mangingo ho ya. I aayugongo irisa tipa Bayo nga Yekova na gako pagbia te. Ndupai ho si aidi i du na zanga irisa ti ni tipa Bakusiyo te!

12. Ginipai rengbe ka undo rani ani inipa wai rago agberẽ ti Yekova ho Adamu na Eva abasasangbako ni ni samungu?

 ¹² Ani bingo kpiapai: Ka si du nga mo sonosi wiro kini ngerefuo ru wenengai, u kini ka basasangbaro ngba gu gene nayugoho nga u airisongo ro watadu ka kpinyemuro te, mo du wai? Rago gberẽ agberã tiro kisusi. Sidu tie, rago aima gberã ti Yekova kisusi ho Adamu na Eva abasasangbako ni ni samungu.

13. Ginipai Yekova aya si nika manga tipa Adamu fuo kpiko, na rogo gupai yo re nga gine?

¹³ Ndupai aadunga ho Yekova mbu Adamu na Eva i naaraka nyeanye kindi te. I araki i ki kpiki a wa  Mbori agumbaha. I ago kusayo. I aandunga ku rogo ngbii nga ga atoro te. Ani naino gipai re ti gupai Yekova agumbaha fu Adamu fuo basayo sangbako. Mbori aya: ‘Mo akaraga tiro ku sendeyo, bambiko mi adiro kina rogoho; mbiko mo nga kina nvutu, kina ku nvutu yo mo ka karaga tiro ku ho ni.’ (Bambata Pai 3:19) Mbori amangi Adamu rogo nvutu sende. (Bambata Pai 2:7) Mbata fu gure, Adamu aadunga ti ni te. Sidu, ho Yekova ayani wẽ Adamu nika karagatiko ku nvutu yo, gupai ko aagumbaha nzunzu nga Adamu nika go kusayo. Si adu nga Adamu nika du zanga unga wakina kungbo nvutu nga gu i amangiko rogoho.

14. Tipagine ani akpi ti ni?

¹⁴ Wa ka Adamu na Eva aabasanga sangba Mbori ki ingipai ya, ka i du ti kina unga areme. Gupai ani akpi ti ni nga, ga Adamu ingapai gbiati kpio arimi ku rogo awiriko yo dunduko. (Mo gedi ARomo 5:12.) Gu ingapai re wakina gu kere kaza gude adiaha ti avunguni nga gu ní arengbanga ka bata behe ya. Sangbana ingapai nga kpio, motiwa du. Kpio nga vurarani, angianga bakurearani ya. (1 AKorindo 15:26) Si naida ani fu bakere tambuahe fu Yekova mbiko ko afu motumo tumorii tipa si batasi rani be gi kere vurarani kina iriwoho ati tirani re!

15. Tipagine duhe ti ni ni pa wasa ka ino gu rengo du tipa kpio?

¹⁵ Gupai Ziazia Kekeapai ayugoho tipa kpikpi aboro nafu wasa afu. A wa bi ani he, kpikpi aboro ho ti ni narungo rogo kura ba te. Ndupai ho ani gunde be kpikpi aboro te, bambiko i ti ni ka mangi rani gbegberẽ te. Ka ani mangingo wiripai tipa yo te. Ani arengbanga ka fura na yo te, na ka i furanga na ani a te. Dungu aboro  pambori naya wẽ i rengbe arengba ka undo agu aboro naima kpiko, na agu aboro naida kuti gu gayo ziree re nafu marã fuyo tipa i undo gu gayo aboro nakpiki. Ono pa ino ani gu rengo du tipa kpio rengbe ka banda rani be agu aboro nayugo ngbatunga agu aziree re.

16. Da rimisi gani apai ku rogo agu ayugopai nga ga dungu apambori, na ngba gini gene?

¹⁶ Ya mo gu pambori watadu kanisa du mo rogoho, si nayugo gupai Ziazia Kekeapai agumbaha tipa kpikpi aboro? Dungu apambori nayugo gupai du kia. Tipagine? Si wo mbiko gupai nga, Satana aima rimiso gako apai ku rogo gayo pambori. Ko namangasunge na zire pambori ka sa aboro i niberẽ gupai nga, ho kpotoyo nika kpi ni, i nika ga ku rogo gu ngbii nga ga atoro kaa raka yo. Gere nga gu ziree Satana akodaha na kura aziree tipa ka nyaga aboro kusayo ti Yekova Mbori. Wai duhe wo?

17. Tipagine gu yugopai nga ga nyenye mbusa afunga irisa ti ni fu Yekova ya?

¹⁷ A wa ani nibihe kusayo, kura apambori nayugo gupai nga, ka boro araka gbegberẽ raka, ní nika ndu ku rogo we tipa ka rungo nyeanye kindi. Gi yugopai re afunga irisa fu Mbori te. Yekova nga Mbori nyemuse na ko arengbanga ka rungosi aboro wa gure te. (Mo gedi 1 Yoane 4:8.) Ka boro fu mbusa fu wirini nga ka dia beru ka zogaha ku rogo we ki mbuhe koyo, mo bi gu ngbatunga boro re wai? Ya mo mo rengbe ka irisa gu ngbatunga boro re? Ya mo mo rengbe ka kpinyemu ngbatunga gu boro re? Wagusa te! Mo nibi ní ni kere gbegberẽ boro. Gure nga wai Satana aida ani naabi Yekova, bambiko ko nasa aboro i du na gu ida nga Yekova narungosi aboro rogo we yo nyeanye kindi.

18. Gini ziree nasa aboro i naairiso kpikpi aboro?

¹⁸ Satana namangasunge na kura apambori a ka yugo gupai nga, aboro nakpi kini sa tiyo ni atoro nga  aguyo si aida aida agu aboro du ni ungayo niirisiyo. I naya wẽ agu atoro re rengbe arengba kadu ni bawene abakurea aboro watadu gbegberẽ avurayo. Badungu aboro idi kuti gi ziree re. I nagunde be kpikpi aboro na kini irisiyo. Ono Ziazia Kekeapai nayugo gupai nga, kpikpi aboro nara ara na si naida ani irisi kina bangisa ndikidi Mbori nga Yekova nga guko nakusi ahe.—Yugoti 4:11.

19. Ino gu rengo du tipa kpio naundo rani ani rugutirani na gini kura yugopai nga ga Ziazia Kekeapai?

¹⁹ Ino gu rengo du tipa kpikpi aboro rengbe ka banda ro be agu aziree nga ga apambori. Si rengbe arengba ka undoro mo rugutiro na kura ayugopai nga ga Ziazia Kekeapai. Ni kpiapai, ho mo aino gupai ni nga aboro akpingo kini ndu ku rogo gu ngbii nga ga atoro te, gu kidohe du tipa nyenye unga rogo paradizo auru kpotosende nada ni ndikidipai bangiro.

20. Gini sanahe ani ka wisigoho rogo gu kapita naye fuo gere?

²⁰ Bakuru kusayo, gu ruru kumba nangia Eyobo asanahe ki ya: “Ka boro kpi, ni adú ni ungani berewe?” (Eyobo 14:14) Ya mo gu boro naima kpi, ní rengbe kadu ni ungani berewe? Gupai Ziazia Kekeapai ayugoho tipa gipai re, si nafu wasa afu, a wa ani ka bihe rogo gu kapita naye fuo gere.