1-3. Jugu jumɛn de bɛ an kelen-kelen bɛɛ kɔ? Mun na a bɛna an jigi tugu k’a sɛgɛsɛgɛ Bibulu bɛ min fɔ o ko la?

E KA miiri ko i bɛ ka boli i jugu farinman dɔ ɲɛ. Fanga b’a la ka tɛmɛ i kan. A ka teli n’i ye fana. I b’a dɔn ko a tɛ hinɛ, bawo i y’a ye ko a ye i teri dɔw faga. I y’a ɲini k’i teliya cogo o cogo walisa a kana kun i la, nka o bɛɛ n’a ta, a bɛ ka gɛrɛ i la ka taa a fɛ. A bɛ i ko jigiya fosi tɛ i la ka se ka tila i jugu in na. Nka, mɔgɔ dɔ sinna ka na i kɛrɛ fɛ ten walisa ka i bɔ a bolo. Fanga b’a la ka tɛmɛ i jugu kan. O tigi ye layidu ta i ye fana ko a bɛna i dɛmɛ. Yala o tɛna i hakili sigi kosɛbɛ wa?

² A bɛ i ko o jugu sugu dɔ bɛ i kɔ. Nka, e kelen dɔrɔn tɛ. A bɛ an kelen-kelen bɛɛ de kɔ. I ko an y’a kalan tilayɔrɔba tɛmɛnen na cogo min na, Bibulu b’a fɔ ko saya y’an jugu ye. An si tɛ se ka taa k’a dan walima k’a bali a ka se an na. An fanba y’a ye ko a sera an diyanyemɔgɔ caman na. Nka, Jehova ka setigiya ka bon kosɛbɛ ni saya ta ye. Jehova min b’an kanu, a y’a jira ka tɛmɛ ko a bɛ se ka se sɔrɔ saya kan. A ye layidu ta ka saya bɔ yen pewu. Bibulu b’a fɔ ko: “An jugu min na ban fɛn bɛɛ kɔ, o ye saya de ye.” (1 Kɔrɛntekaw 15:26) O ye kibaru duman ye dɛ!

³ Ni saya kɛra, o bɛ min kɛ an na, an ka o lajɛ ɲɔgɔn fɛ  cogo surun na. O bɛna an dɛmɛ ka fɛn dɔ faamu min bɛna an nisɔndiya. Jehova ye layidu ta ko mɔgɔ minnu sara, olu bɛna ɲɛnamaya kɛ kokura. (Esayi 26:19) U bɛna segin ɲɛnamaya la. O jigiya bɛ wele ko su lakununni.

4. (a) Mun na an bɛ se ka fɛn dɔ dɔn Jehova dusukunnata kan, n’an b’a lajɛ Yesu kɛcogo kɛra min ye tuma min na a diyanyemɔgɔ dɔ sara? (b) Teriya kɛrɛnkɛrɛnnen tun bɛ Yesu ni jɔni cɛ?

⁴ Yala, i diyanyemɔgɔ dɔ sara wa? A bɛ kɛ i kɔnɔ ko o dusukasi ni o sentanya ye fɛnw ye i tɛ se ka minnu kun. O waati suguw la, an mago b’a la ka Ala ka kuma lajɛ walisa ka dususaalo sɔrɔ. (2 Kɔrɛntekaw 1:3, 4) Ni saya kɛra, o bɛ min kɛ Jehova ni Yesu la, Bibulu b’an dɛmɛ ka o faamu. Yesu kɛcogo fɛ, a y’a jira tuma bɛɛ ani cogo dafalen na a Fa bɛ cogo min na. Tuma min na Yesu dɔnbaga dɔ sara, Bibulu b’a fɔ ko a dusu kasira kosɛbɛ. (Yuhana 14:9) Ni Yesu tun bɛ taa Jerusalɛm, a tun bɛ to ka taa bɔ Lazarɛ ni a balimamusow Mariyama ni Marte ye. Olu tun sigilen bɛ Jerusalɛm dafɛ dugu dɔ la min tɔgɔ ye ko Betani. Lazarɛ, Mariyama, Marte ni Yesu tun kɛra teri sɛbɛw ye. Bibulu b’a fɔ ko: “Yesu tun bɛ Marte ni a balimamuso ani Lazarɛ kanu.” (Yuhana 11:5) I ko an y’a kalan cogo min na tilayɔrɔba tɛmɛnen na, Lazarɛ sara.

5, 6. (a) Yesu kɛlen ka Lazarɛ somɔgɔw n’a teriw ye kasi la, o ye mun kɛ a la? (b) Mun na Yesu ka dusukasi bɛ dusu don an kɔnɔ?

⁵ Yesu terikɛ ka saya ye mun kɛ a la? Maana b’a fɔ ko Yesu taara Lazarɛ somɔgɔw n’a teriw yɔrɔ, u tun bɛ Lazarɛ sukasi la. Yesu kɛlen ka u ye, u hinɛba donna a la. Bibulu ko Yesu “dusu kasira kosɛbɛ, a ɲɛnasisira.” Maana b’a fɔ fana ko “Yesu kasira.” (Yuhana 11:33, 35) Yala Yesu ka dusukasi kɔrɔ tun ye ko jigiya si tun tɛ yen bilen wa? O tɛ, bawo Yesu tun b’a dɔn ko dakabanako dɔ tun bɛna kɛ tiɲɛ na. (Yuhana 11:3, 4) Nka, o tun tɛ Yesu bali ka dimin ni dusukasi dɔn, o min bɛ mɔgɔ sɔrɔ saya kosɔn.

⁶ Yesu ye dusukasi min dɔn Lazarɛ banni la, o bɛ dusu don an kɔnɔ cogo dɔ la. O b’a jira an na ko Yesu ni a Fa Jehova bɛ  saya koniya. Nka, Jehova Ala bɛ se k’an jugu kɛlɛ n’o ye saya ye, ka se sɔrɔ a kan fana. Ala ye se min di Yesu ma ka o kɛ, an k’o lajɛ sisan.

7, 8. Mɔgɔ minnu tun bɛ yen ka Lazarɛ ka ko ye, mun na olu bolo, a tun bɛ i ko jigiya si tun tɛ Lazarɛ ko la tun? Nka, Yesu ye mun kɛ?

⁷ Lazarɛ su tun bilala kuluwo dɔ kɔnɔ kaban. O la sa, Yesu y’a fɔ u ye ko u ka kabakurun bɔ kuluwo da la. Marte tun ma sɔn o ma, bawo o don tun ye Lazarɛ banni tile naani ye. O tun ka kan k’a sɔrɔ ko a su bɛ ka toli. (Yuhana 11:39) Hadamadenw ka jate la, yala jigiya dɔ tun bɛ yen tun wa?

⁸ U ye kabakurun bɔ kuluwo da la. Yesu pɛrɛnna ni kanba ye k’a fɔ ko: “Lazarɛ, bɔ kɛnɛma.” Mun kɛra? Cɛ min tun sara, a “bɔra” kɛnɛma. (Yuhana 11:43, 44) O ye nisɔndiya min lase mɔgɔw ma o yɔrɔ la, yala i bɛ se ka miiri o la wa? A kɛra ko Lazarɛ tun ye u balimakɛ ye wo, walima u teri ye wo, walima u sigiɲɔgɔn ye wo, u tun b’a dɔn ko a sara. Nka a filɛ, u tun ye o cɛ min kanu, o cɛ kelen de tun jɔlen filɛ kokura u cɛ ma. A ka ca a la ko o tun ka kan ka kɛ dakabanakoba ye, fo u ye min ye, olu bolo o tun tɛ se ka kɛ. Siga t’a la ko u caman y’u poron Lazarɛ kan ni nisɔndiyaba ye. Yala o ma kɛ sesɔrɔba ye saya kan wa? Ɔwɔ, a kɛra o ye.

9, 10. (a) Ka kɛɲɛ ni Yesu ka kuma ye, mun y’a to a ye se sɔrɔ ka Lazarɛ lakunun ? (b) Nafa minnu b’a la ka Bibulu maanaw kalan minnu bɛ lakununni kan, olu dɔw fɔ.

⁹ Yesu m’a fɔ ko ale de ye o dakabana kabako kɛ ni a yɛrɛ fanga ye. A ye delili min kɛ sani ka Lazarɛ wele a ka bɔ kɛnɛma, o delili kɔnɔna na, Yesu y’a jira k’a jɛya ko Jehova de ye Lazarɛ su lakununni Sababu ye. (Yuhana 11:41, 42) Nka, Jehova ma baara kɛ ni a fanga ye ka su lakunun o ko kelenpe dɔrɔn na. Lakununni kɔnɔntɔn de kofɔlen bɛ Ala ka Kuma kɔnɔ. * Lazarɛ lakununni ye u dɔ la kelen dɔrɔn de ye. An bɛ  nisɔndiya sɔrɔ n’an bɛ o maanaw kalan, k’an hakili jakabɔ u kan. O maanaw b’a jira an na ko Ala tɛ mɔgɔ bɔ mɔgɔ la, bawo mɔgɔ minnu su lakununna, denmisɛnninw ni mɔgɔkɔrɔbaw tun bɛ u la, cɛw ni musow tun bɛ u la, ani minnu tun ye Israɛlkaw ye ani minnu tun tɛ Israɛlkaw ye, olu tun bɛ u la. Bibulu tɛmɛsira minnu bɛ kuma o suw lakununni kan, olu b’a jira ko o lakununniw kɛra nisɔndiyaba ye. Misali la, tuma min na Yesu ye dennin dɔ su lakunun, a bangebagaw “kabakoyara kosɛbɛ haali.” (Marka 5:42) Tiɲɛ na, Jehova de ye nisɔndiya di u ma, u ma ɲinɛ min kɔ abada.

¹⁰ Siga t’a la ko Yesu ye mɔgɔ minnu lakunun, olu sara tuguni. Yala o kɔrɔ ye ko nafa tun tɛ olu su lakununni na wa? Ayi. O maanaw bɛ tiɲɛ nafama dɔw de sɛmɛntiya, ka jigiya di an ma fana.

11. Maana min bɛ Lazarɛ ka lakununni kan, o bɛ tiɲɛ jumɛn sɛmɛntiya min bɛ Waajulikɛla 9:5 na?

¹¹ Bibulu b’a fɔ ko mɔgɔ salenw “tɛ foyi dɔn.” U tɛ ɲɛnamaya la tun. U tɛ ni na yɔrɔ si la fana, ani u tɛ ko kala ma. Lazarɛ ka maana b’o de jira. Yesu ye Lazarɛ lasegin ɲɛnamaya la tuma min na, yala a ye fɛnw fɔ sankolo kan minnu ye mɔgɔw kabakoya kosɛbɛ wa? Yala a ye fɛn cɛjugubaw fɔ jahanama tasuma dɔ kan minnu ye u lasiran wa? Ayi. Bibulu m’a fɔ ko Lazarɛ ye o kuma sugu fɔ. Lazarɛ salen tora tile naani minnu kɔnɔna na, o waati kɔnɔ, a tun “tɛ foyi dɔn.” (Waajulikɛla 9:5) Lazarɛ tun bɛ sunɔgɔ la saya la.—Yuhana 11:11.

12. Mun b’a to an bɛ se ka da a la tigitigi ko Lazarɛ lakununni kɛra?

¹² Lazarɛ ka maana b’a jira an na fana ko su lakununni ye tiɲɛ ye, ko nsiirin tɛ mɔgɔw bɛ min fɔ dɔrɔn. Yesu ye Lazarɛ su lawuli mɔgɔ caman ɲɛ na. Hali diinɛ ɲɛmɔgɔ minnu tun bɛ Yesu koniya, olu sɔnna a ma ko o kabako kɛra. U y’a fɔ ko: “An na mun kɛ? K’a masɔrɔ nin cɛ [Yesu] bɛ kabako caman kɛ.” (Yuhana 11:47) Mɔgɔ caman nana cɛ lajɛ min tun kununna  ka bɔ saya la. O kosɔn, u caman dara Yesu la. Lazarɛ kɛra u bolo dalilu ɲɛnama ye min y’a jira ko Ala de ye Yesu ci. O kɛra dalilu ɲɛnama ye fo Yahutudiinɛ ɲɛmɔgɔ dusukun gɛlɛn dɔw y’a latigɛ ka Yesu ni Lazarɛ faga.—Yuhana 11:53; 12:9-11.

13. Kun jumɛn b’an bolo ka da a la tigitigi ko Jehova bɛ se ka suw lakunun?

¹³ Yala a ka gɛlɛn ka sɔn a ma ko su lakununni ye ko ye min ye tiɲɛ ye wa? Ayi, bawo Yesu y’a fɔ ko don dɔ “mɔgɔ salen minnu bɛ kaburuw kɔnɔ”, olu bɛna lakunun. (Yuhana 5:28) Jehova ye ɲɛnamaya bɛɛ Dabaga ye. O la sa, yala a ka kan ka kɛ ko gɛlɛn ye an bolo ka da a la ko a bɛ se ka ɲɛnamaya da kokura wa? O bɛ Jehova ka miiri de bolo. Yala a hakili bɛ se ka kɛ an diyanyemɔgɔ salenw na wa? Dunuya falen don dolo miliyari-miliyari caman na. Nka, Ala ye tɔgɔ da u kelen-kelen bɛɛ la. (Esayi 40:26) O la, ko misɛnnin kelen o kelen minnu bɛ an diyanyemɔgɔ salenw na, Jehova Ala hakili bɛ se ka to olu kelen-kelen bɛɛ la. A se b’a ye k’u lasegin ɲɛnamaya la.

14, 15. Ka kɛɲɛ ni Job ka kuma ye, Jehova dusukunnata ye jumɛn ye lakununni ko la?

¹⁴ Jehova min bɛna su lakununni kɛ, a dusukunnata ye jumɛn ye o ko la? Bibulu b’a fɔ ko Jehova kɔrɔtɔlen don ka suw lakunun. Job min tun ye kantigi ye, a ye ɲininkali kɛ ko: “Ni mɔgɔ salen tun bɛ se ka kunun tun.” Job tun bɛ kumana a yɛrɛ de ka makɔnɔni kan kaburu kɔnɔ fo waati ka se Ala bolo k’a hakili to ale la. A ko Jehova ma: “I na weleli kɛ, ne na jaabili kɛ, i bolo barika nɔw yeli nege na kɛ i la o tuma la.”—Job 14:13-15.

¹⁵ I miiri dɔɔnin nin na: A nege bɛ Jehova la tiɲɛ na ka suw lasegin ɲɛnamaya la. Yala o t’an dusu saalo k’a dɔn ko o de ye Jehova ŋaniya ye wa? Nka, an bɛ mun dɔn o su lakununni nata ko la? Jɔni bɛna lakunun? U bɛna lakunun min?

16. Suw bɛna kunun walisa ka ɲɛnamaya kɛ hukumu jumɛn kɔnɔ?

¹⁶ Bibulu maana minnu bɛ su lakununni kan, olu bɛ fɛn caman fɔ an ye su lakununni nata kan. Mɔgɔ minnu tun  seginna ɲɛnamaya la dugukolo kan yan, olu ni u diyanyemɔgɔw ye ɲɔgɔn sɔrɔ kokura. A bɛna kɛ o cogo kelen na su lakununni nata la. Nka, o lakununni bɛna fisaya ni lakununni ye minnu kɛra ka tɛmɛ. I ko an y’a kalan ka tɛmɛ cogo min na tilayɔrɔba 3nan na, Ala sagonata ye ko dugukolo yɔrɔ bɛɛ ka yɛlɛma ka kɛ alijinɛ ye. O la sa, mɔgɔ salenw tɛna segin ɲɛnamaya la diɲɛ dɔ kɔnɔ min falen bɛ kɛlɛw, nijuguyakow ni banaw la. U bɛna se ka cogo sɔrɔ ka ɲɛnamaya banbali kɛ dugukolo kan hɛrɛ ni lafiya la.

17. Su lakununni bɛna kɛ fo ka se jɔni ni jɔni ma?

¹⁷ Jɔni su bɛna lakunun? Yesu y’a fɔ ko “mɔgɔ salen minnu bɛ kaburuw kɔnɔ, olu n’a [Yesu] kan mɛn. U na bɔ yen”. (Yuhana 5:28, 29) O cogo kelen na, Jirali 20:13 b’a fɔ ko: “Su minnu bɛ kɔgɔji kɔnɔ, o ye olu labɔ. Saya ni Hadɛsi fana ye u taw labɔ.” “Hadɛsi” kɔrɔ ye mɔgɔ salenw bɛ foroba kaburu min kɔnɔ. (Ɲɛfɔli farankanw, ɲɛ 212nan ni 213nan lajɛ.) O yɔrɔ bɛna lankolonya. Mɔgɔ salen miliyari-miliyari minnu be lafiya la o yɔrɔ la, olu bɛɛ bɛna segin ɲɛnamaya la kokura. Ciden Paul y’a fɔ ko: “Mɔgɔw . . . suw na kunun, mɔgɔ tilennenw ni mɔgɔ tilenbaliw bɛɛ.” (Kɛwalew 24:15) O kuma kɔrɔ ye mun ye?

18. Jɔni ni jɔni sen bɛ mɔgɔ tilennenw na minnu bɛna lakunun? O jigiya bɛ mun kɛ i la?

¹⁸ Bibulu bɛ kuma mɔgɔ minnu kan, ni olu ye u ka ɲɛnamaya kɛ sani Yesu ka na dugukolo kan, olu caman sen bɛ “mɔgɔ tilennenw” na. Laala i bɛ miiri Nuhun, Ibrahima, Saran, Musa, Ruti, Esiteri ani mɔgɔ caman wɛrɛw la. Heburuw kitabu tilayɔrɔba 11nan bɛ kuma o cɛw ni o muso dɔw kan minnu ka dannaya tun ka bon kosɛbɛ. Nka, Jehova batobaga minnu banna an ka waati la, olu fana sen bɛ “mɔgɔ tilennenw” na minnu bɛna lakunun. Ni an sara, jigiya min bɛ an na ka se ka lakunun, o bɛ se k’a to an tɛ siran saya ɲɛ tun.—Heburuw 2:15.

19. “Mɔgɔ tilenbaliw” ye jɔni ye? Jehova bɛna cogo jumɛn di u ma a ka ɲumanya kɔnɔ?

¹⁹ Mɔgɔ bɛɛ minnu ma Jehova bato walima minnu ma Jehova  kan minɛ bawo u m’a komɛn, olu ka ko bɛna kɛ cogo di? Ala tɛna ɲinɛ o “mɔgɔ tilenbali” miliyari-miliyari kɔ. Olu fana suw bɛna lakunun. Waati bɛna di u ma u ka kalan Ala lakika ko la ani k’a bato. San ba kelen kɔnɔna na, suw bɛna lakunun ani cogo bɛna di u ma ka fara mɔgɔ kantigiw kan dugukolo kan, walisa ka Jehova bato. O bɛna kɛ dakabana waati ye. Bibulu b’a fɔ o waati de ma ko Kiritigɛ Don. *

20. Géhenne ye mun ye? Jɔni de bɛ taa o yɔrɔ la?

²⁰ Yala o kɔrɔ ye ko mɔgɔ minnu ye ɲɛnamaya kɛ dugukolo kan, olu kelen-kelen bɛɛ su bɛna lakunun wa? Ayi. Bibulu b’a fɔ ko su dɔw bɛ géhenne na (géhenne ye tubabukan ye), n’o bayɛlɛmana bamanankan Bibulu kɔnɔ ko “jahanama”. (Luka 12:5) Géhenne tɔgɔ bɔra ɲama filiyɔrɔ la min tun bɛ Jerusalɛm dugu kɔrɔ kogow kɔfɛ. U tun bɛ suw ni ɲamaw jeni o yɔrɔ la. Su minnu tun bɛ fili o yɔrɔ la, Yahutuw tun bɛ olu jate mɔgɔw ye minnu man kan ni sudon ni lakununni ye. O la sa, Géhenne ye abada halakili taamasyen bɛnnen ye. Hali ni Yesu bɛna jɔyɔrɔ sɔrɔ ɲɛnamaw ni suw kiritigɛli la, Jehova de ye kiritigɛlaba ye. (Kɛwalew 10:42) A bɛna mɔgɔ minnu kiri tigɛ ko mɔgɔjuguw don ani ko u t’a fɛ ka yɛlɛma, a tɛna olu lakunun abada.

21, 22. (a) Lakununni sugu jumɛn wɛrɛ bɛ yen? (b) Jɔni de kɛra mɔgɔ fɔlɔ ye ka lakunun ɲɛnamaya kama sankolo la?

²¹ Bibulu bɛ kuma fana su lakununni sugu wɛrɛ kan. O ye ka lakunun ɲɛnamaya kama sankolo la i ko danfɛn hakilimaalama. Mɔgɔ kelen min su lakununna o cogo la, n’o fɔra Bibulu kɔnɔ, o kɛra Yesu ye.

²² Yesu fagara k’a to hadamaden sawura la. Nka, Jehova ma jɛn n’a ye A Denkɛ kantigi ka to kaburu kɔnɔ. (Zaburu 16:10, BS; Kɛwalew 13:34, 35) Ala ye Yesu su lakunun, nka a ma a  lakunun i ko hadamaden. Ciden Piɛrɛ y’a fɔ Krisita ko la ko ‘Min ye a farikolo ta fan ye, o sara, nka min ye hakili ta fan ye, a ɲɛnamayara ko kura.’ (1 Pyɛri 3:18, LK) O kɛra kabako belebele de ye tiɲɛ na. Yesu tun ɲɛnama don kokura i ko danfɛn hakilimaalama barikama dɔ. (1 Kɔrɛntekaw 15:3-6) Ale de kɛra mɔgɔ fɔlɔ ye ka o lakununni nɔɔrɔma sugu sɔrɔ. (Yuhana 3:13) Nka, a tɛna kɛ mɔgɔ laban ye ka lakunun o cogo la.

23, 24. Jɔni de sen bɛ Yesu ka “Sagakulunin” na? U ye mɔgɔ joli ye?

²³ Ikomi Yesu tun b’a dɔn ko a bɛna segin sɔɔni sankolo la, a y’a fɔ a ka kalanden kantigiw ye ko a bɛna taa “yɔrɔ labɛn” u ye. (Yuhana 14:2) Mɔgɔ minnu tun bɛna taa sankolo la, Yesu y’a fɔ olu de ma ko a ka “Sagakulunin.” (Luka 12:32) Krecɛn kantigi joli de bɛ o kulu la min ye kulunin ye? Ciden Yuhana b’a fɔ Jirali 14:1 na ko: “Ne ye filɛli kɛ ka Sagaden [Yesu Krisita] jɔlen ye Sion kulu kan. Mɔgɔ waa kɛmɛ ni binaani ni waa naani bɛ a fɛ. Sagaden tɔgɔ ni a Fa tɔgɔ sɛbɛnnen tun bɛ o mɔgɔw tenw na.”

²⁴ Yesu ka ciden kantigiw sen bɛ o Krecɛn 144 000 na minnu su bɛna lakunun ɲɛnamaya kama sankolo la. Olu ka lakununni bɛ kɛ waati jumɛn na? Ciden Paul y’a sɛbɛn ko Krisita bɛna kɛ yan waati min na, k’o waati de la o lakununni bɛna kɛ. (1 Kɔrɛntekaw 15:23) Ikomi an bɛn’a ye Tilayɔrɔba 9nan na cogo min na, an bɛ o waati de la sisan. O la sa, mɔgɔ 144 000 tɔ minnu tora, n’olu man ca tun, ni u sara yɔrɔnin min na dɔrɔn, o yɔrɔnin kelen bɛɛ la u bɛ lakunun ɲɛnamaya kama sankolo la. (1 Kɔrɛntekaw 15:51-55) Nka, jigiya min bɛ hadamaden fanba la, o ye ka lakunun ɲɛnamaya kama Alijinɛ kɔnɔ, dugukolo kan yan.

25. An bɛna kuma mun kan tilayɔrɔba nata kɔnɔ?

²⁵ Tiɲɛ na, Jehova bɛna se sɔrɔ an jugu kan, n’o ye saya ye. O tɛna kɛ abada tun. (Esayi 25:8) Nka, laala i bɛ i yɛrɛ ɲininka ko: ‘Mɔgɔ minnu bɛna lakunun sankolo kama, olu bɛna taa mun kɛ o yɔrɔ la?’ U bɛna kɛ Ala ka masaya dakabana dɔ mɔgɔw ye sankolo la. An bɛna fɛn wɛrɛw ye o gofɛrɛnaman ko la tilayɔrɔba nata la.