1-3. Nama munsuh ti ngagai semua kitai, lalu nama kebuah mikirka utai ti diajar Bup Kudus ngelantangka ati kitai?

PIKIRKA, nuan benung lari ari seiku munsuh ke amat jai. Iya kering sereta laju agi belanda ari nuan. Nuan nemu iya nadai penyinu laban nuan udah meda iya munuh sekeda kaban nuan. Enda ngira ni pengelaju nuan belanda, tang iya majak semak ngagai nuan. Nuan baka ke nadai peluang agi. Tang enda mukai-mukai, seiku penyelamat datai ba tisi nuan. Iya kering agi ari munsuh nuan, lalu iya bejanji deka nulung nuan. Nuan tentu berasai lantang ati!

² Pia mega, semua mensia nyengkaum nuan benung digagai munsuh tu. Baka ke udah dipelajar, Bup Kudus madah pemati munsuh mensia. Nadai seiku mensia ulih lari ari munsuh tu tauka ngalahka iya. Mayuh ari kitai kala meda munsuh tu munuh orang ti dikesayau kitai. Tang, Jehovah kering agi ari pemati. Iya Penyelamat ti bisi penyinu. Jehovah udah nunjukka Iya ulih ngalahka munsuh tu, lalu Iya besemaya deka muai pemati belama iya. Bup Kudus ngajar: “Munsuh ti pemadu dudi dirusak nya pemati.” (1 Korint 15:26) Tu berita manah!

 ³ Uji kitai berundingka pemerinsa kitai maya orang ti dikesayau kitai mati. Enggau nya, kita tentu beterima kasih ke semaya Jehovah ti ngagaka ati kitai, iya nya ngidupka orang ke udah mati. (Isaiah 26:19) Sida deka diidupka baru. Nya alai, semaya tu meri kitai peluang.

4. (a) Baka ni asai ati Jesus meda pemati kaban iya ulih nulung kitai nemu asai Jehovah? (b) Jesus bekaban rapat enggau sapa?

⁴ Kala nuan lenyau orang ti dikesayau? Nuan engka pedis ati, tusah ati enggau nadai daya. Maya nya, kitai begunaka pengerindang ari Jaku Petara. (2 Korint 1:3, 4) Bup Kudus nulung kitai nemu baka ni asai Jehovah enggau Jesus pasal pemati. Jesus ngayanka pemanah Apai iya enggau sempurna, lalu iya kala ngasaika pemerinsa maya orang dikesayau mati. (John 14:9) Maya Jesus di Jerusalem, iya selalu nemuai ngagai Lasarus enggau menyadi indu iya, Maria seduai Marta. Sida diau di nengeri Betani semak Jerusalem. Jesus nyadi kaban rapat sida. Bup Kudus nyebut: “Jesus rinduka Marta, Maria enggau Lasarus.” (John 11:5) Tang, baka ke udah dipelajar, Lasarus mati.

5, 6. (a) Baka ni asai ati Jesus maya iya meda kaban belayan Lasarus nyabakka Lasarus? (b) Nama kebuah utai ti diasai Jesus nya ulih meransang kitai?

⁵ Baka ni asai ati Jesus maya kaban iya mati? Cherita nya madahka kitai, Jesus enggau kaban belayan Lasarus maya penusah nya. Jesus sinu ati meda sida iya. Iya “sinu sereta tusah.” Udah nya, “Jesus nyabak.” (John 11:33, 35) Kati penusah ati Jesus nya nunjukka Lasarus nadai peluang? Enda. Jesus nemu bisi utai manah ti deka nyadi. (John 11:3, 4) Tang, iya agi ngasaika pemerinsa enggau penusah ti dibai pemati.

⁶ Iya ke amat, utai ti diasai Jesus nya ulih meransang kitai. Pekara nya ngajar kitai, Jesus enggau Apai iya,  Jehovah benchi ke pemati. Tang, Petara Jehovah ulih ngalahka munsuh tu! Aram kitai meda utai ti digaga Jesus ngena kuasa ti diberi Petara.

7, 8. Ba runding mensia, Lasarus baka ke nadai peluang agi, tang nama digaga Jesus?

⁷ Lasarus udah dikuburka dalam siti lubang gua, lalu Jesus ngasuh orang ngengkahka batu ti nutup lubang gua nya ke tisi. Marta nyakal, laban Lasarus udah mati empat hari, lalu bau but. (John 11:39) Ba runding mensia, kati Lasarus bisi peluang?

⁸ Batu nya diengkah ke tisi, lalu Jesus ngangau enggau nyawa ti inggar: “Lasarus, pansut nuan!” Nama nyadi? “Orang ke mati nya lalu pansut.” (John 11:43, 44) Ulih nuan ngasaika pengaga ati orang ke dia? Semua orang ke dia nyengkaum menyadi indu, kaban belayan enggau orang ke diau semak Lasarus nemu iya udah mati. Tang, lelaki ti dikesayau sida bisi begulai enggau sida baru. Utai tu tusah dipechaya. Sida merap Lasarus enggau gaga ati. Pemati udah dialahka!

9, 10. (a) Baka ni Jesus madahka Pun kuasa ti dikena iya ngangkatka Lasarus ari mati? (b) Nama penguntung enti macha cherita pasal pengangkat ari mati ba Bup Kudus?

⁹ Jesus enda ngaku ngena kuasa diri empu ngaga kereja ajih ti ngalitka ati. Sebedau ngangauka Lasarus pansut, iya madah enggau terang dalam sampi iya, Jehovah nya ti Pun pengangkat orang mati. (John 11:41, 42) Ukai semina maya nya aja Jehovah udah ngena kuasa Iya ngangkatka orang mati. Cherita Lasarus nya siti ari semilan cherita pasal pengangkat ari mati ke bisi ditulis ba Jaku Petara. * Macha enggau belajarka cherita nya  ngagaka ati. Cherita nya ngajar kitai, Petara enda bebagi ati, laban Iya ngidupka orang tuai enggau biak, lelaki enggau indu, orang Israel enggau ukai Israel. Cherita tu endang ngagaka ati! Chunto, maya Jesus ngidupka seiku anak mit indu, apai enggau indai iya “balat amat alit ati.” (Mark 5: 42) Ya, Jehovah udah merekat sida enggau pengaga ati!

¹⁰ Endang amat, sida ke udah diidupka Jesus agi ulih mati. Kati ngidupka sida iya nadai reti? Enda. Cherita tu meri peluang, lalu ngamatka pemendar ari Bup Kudus.

11. Baka ni cherita Lasarus diidupka baru ngamatka utai ti ditulis ba Pengajar 9:5?

¹¹ Bup Kudus madahka kitai orang ke mati “nadai nemu utai.” Sida enda idup tauka bisi ba dunya bukai. Cherita Lasarus ngamatka utai tu. Udah Lasarus diidupka baru, bisi iya nusui cherita pasal serega tauka api neraka? Nadai. Bup Kudus nadai madahka Lasarus bejaku baka nya. Maya iya mati dalam timpuh empat hari, iya “nadai nemu utai.” (Pengajar 9:5) Lasarus semina baka ke tinduk.—John 11:11.

12. Baka ni kitai nemu pengangkat Lasarus ari mati amat nyadi?

¹² Cherita Lasarus mega ngajar kitai pengangkat ari mati ukai cherita ngapa. Jesus ngidupka Lasarus ba mua orang mayuh. Nyentukka sida tuai pengarap ke begedika Jesus mega enda nyakal kereja ajih tu. Ku sida: “Nama utai ti patut dikereja kitai? Orang tu [Jesus] ngereja mayuh kereja ajih.” (John 11:47) Mayuh orang datai meda Lasarus diidupka baru. Nya alai, mayuh orang arapka Jesus. Sida nemu pengangkat Lasarus ari mati nerangka, Jesus nya dikirum Petara. Ketegal nya, sekeda tuai pengarap bansa Judah ti kieh, bekira deka munuh Jesus enggau Lasarus.—John 11:53; 12:9-11.

13. Nama kebuah kitai pechaya Jehovah ulih ngangkatka orang mati idup baru?

 ¹³ Kati pengangkat ari mati nya ulih dipechaya? Ulih, laban Jesus ngajar jemah ila “semua orang ke udah mati” deka diidupka baru. (John 5:28) Jehovah nya Penempa semua utai ti idup. Patut kitai pechaya Iya ulih ngidupka orang mati? Patut, tang nya bepanggai ba pengingat Jehovah. Ulih Iya ngingatka orang ti dikesayau kitai ke udah mati? Ba langit mayuh bintang. Tang, Petara nemu nama tiap iti bintang tu! (Isaiah 40:26) Nya alai, Petara Jehovah ulih ngingatka semua utai pasal orang ti dikesayau kitai, lalu Iya mega deka ngidupka sida baru.

14, 15. Nitih ku Jop, baka ni asai Jehovah pasal ngangkatka orang ari mati?

¹⁴ Baka ni asai Jehovah pasal ngangkatka orang ari mati? Bup Kudus madahka Iya endang keran deka ngangkatka orang mati idup baru. Jop, seiku lelaki ti ngasika Petara nanya: “Enti orang mati, kati iya ulih angkat idup baru?” Jop bejaku pasal orang ke udah mati dalam kubur, lalu nganti maya Petara ingat ke iya. Udah nya, Jop bejaku ngagai Jehovah: “Nuan deka ngangau, lalu aku deka nyaut, lalu nuan deka gaga ati ke aku, ti udah digaga nuan.”—Jop 14:13-15.

¹⁵ Pikirka! Jehovah keran deka ngangkatka orang mati idup baru. Enda ke tu ngasuh nuan gaga ati? Tang, pasal pengangkat ari mati jemah ila, sapa ti deka diangkatka idup baru, lalu dini endur iya?

16. Jemah ila, orang ke diangkatka idup baru deka diau ba dunya ti baka ni?

¹⁶ Cherita pengangkat ari mati ba Bup Kudus, ngajar kitai pasal pengangkat ari mati ke jemah ila. Kelia menya, orang ke udah diidup ari mati deka begulai enggau orang ti dikesayau sida. Jemah ila, pekara ti sama mega  deka nyadi, tang jauh manah agi. Baka ke udah dipelajar ba Pelajar 3, Petara deka serata dunya tu nyadi paradais. Enggau tu, orang ke udah mati enda diangkatka idup ba dunya ti penuh enggau perang, penyai, sereta penyakit. Sida deka bisi peluang idup belama iya ba dunya ti penuh pemaik enggau pengelantang.

17. Sapa deka diangkatka idup baru?

¹⁷ Sapa deka diangkatka idup baru? Jesus madah “semua orang ke udah mati deka ninga nyawa iya [Jesus], lalu deka pansut ari kubur.” (John 5:28, 29) Pia mega, Pemandang 20:13 madah: “Tasik lalu nyerahka orang ke mati dalam iya. Pemati enggau Dunya pemati nyerahka orang ke mati dalam seduai iya.” “Pemati” enggau “Dunya pemati” nya pendam tauka kubur mensia mayuh. (Peda Penerang ba lambar 212-213.) Pendam mensia mayuh tu deka dikusungka. Bebiliun iku orang ke udah mati dalam pendam deka diidupka baru. Rasul Paul bejaku: “Semua orang ke lurus enggau ke enda lurus deka diangkatka ari mati.” (Kereja Rasul 24:15) Nama reti nya?

18. Sapa “orang ke lurus” ti deka diidupka baru, lalu nama kebuah peluang tu ulih meransang nuan?

¹⁸ “Orang ke lurus” nya nyengkaum orang ke idup sebedau Jesus datai ke dunya tu. Sida ngembuan pengarap ti teguh ba Petara. Sida nya, Noah, Abraham, Sarah, Moses, Rut, Ester, enggau mayuh agi. Sida tu bisi disebut ba Bab 11, bup Hebrew. “Orang ke lurus” nya mega nyengkaum nembiak Jehovah ke mati kemaya hari tu. Kitai beterima kasih laban bisi peluang diidupka baru. Nya alai, kitai enda ibuh takut ke pemati.—Hebrew 2:15.

19. Sapa “orang ke enda lurus” nya, lalu nama peluang ti diberi Jehovah ke sida?

¹⁹ Sapa “orang ke enda lurus” tu? Sida tu bebiliun iku orang ke enda nyembah tauka ngasika Jehovah, laban sida nadai peluang ngelala Iya. Petara ingatka sida. Petara  mega deka ngangkatka sida ari mati, lalu meri sida awak ti chukup kena ngelala sereta nyembah Iya. Dalam timpuh seribu taun, orang mati deka diidupka baru, lalu diberi peluang nyembah Jehovah begulai enggau orang ti ngasika Iya ba dunya tu. Pekara tu endang manah. Ba Bup Kudus, timpuh seribu taun tu dikumbai Hari Pechara. *

20. Nama reti Gehenna, lalu sapa ke deka kia?

²⁰ Kati genap iku mensia ke kala idup deka diangkatka ari mati? Enda. Bup Kudus madahka sekeda orang mati ba “Gehenna.” Ba Bup Kudus Baru, “Gehenna” dikumbai “neraka.” (Luke 12:5, peda nota kaki) Gehenna diambi ari nama siti endur muai sampah, di luar nengeri Jerusalem kelia menya. Bangkai mensia enggau sampah ditunu dia. Orang Judah ngumbai bangkai ke dibuai dia enda patut dikubur tauka diangkat ari mati. Nyadi, Gehenna nya tanda dikena nunjukka pengerusak belama iya. Jesus deka ngakim orang ke idup enggau orang ke udah mati. Tang, Jehovah nya Hakim ke deka meri pemutus. (Kereja Rasul 10:42) Iya enda ngidupka orang jai ke enggai ngubah ulah sida.

21, 22. (a) Nama sebengkah agi pengangkat ari mati ke bisi disebut ba Bup Kudus? (b) Sapa mensia keterubah ti diidupka baru nyadi melikat?

²¹ Bup Kudus mega nyebut pasal pengangkat ari mati ti bukai. Iya nya, nyadi mensia roh ba serega. Bup Kudus semina bisi siti chunto pengangkat ari mati ke baka tu, iya nya pengangkat Jesus Kristus ari mati.

²² Pengudah Jesus dibunuh, Jehovah enda ngelakka Anak Iya ti tetap ati terus dalam kubur. (Masmur 16:10; Kereja Rasul 13:34, 35) Petara ngangkatka Jesus ari mati,  tang ukai nyadi mensia. Rasul Peter nerangka Jesus Kristus udah “dibunuh batang tubuh, tang diidupka dalam roh.” (1 Peter 3:18) Kereja ajih tu endang manah. Jesus udah diidupka baru nyadi melikat ti bisi kuasa! (1 Korint 15:3-6) Jesus nya mensia keterubah ti diangkat ke serega. (John 3:13) Tang, iya ukai mensia ti penudi.

23, 24. Sapa deka nyadi raban ke “mimit,” lalu ni penyampau sida?

²³ Sebedau iya pulai ke serega, Jesus madah ngagai bala murid iya ti tetap ati, iya deka “nyediaka endur” ke sida di serega. (John 14:2) Jesus ngumbai sida ti ke serega nya, raban ke “mimit.” (Luke 12:32) Ni penyampau sida? Ba Pemandang 14:1, rasul John bejaku: “Udah nya aku malik, lalu tepedaka Anak Domba [Jesus Kristus] bediri ba Bukit Sion. Lalu sama bediri enggau Iya mega 144,000 iku orang ke bisi nama Anak Domba enggau nama Apai Iya ditulis ba kening sida.”

²⁴ Semua 144,000 orang Kristian tu, nyengkaum bala rasul Jesus ti tetap ati, diangkatka idup di serega. Kemaya tu nyadi? Rasul Paul madah tu deka nyadi maya Kristus merintah. (1 Korint 15:23) Baka ke deka dipelajar nuan ba Pelajar 9, kitai benung idup ba maya Kristus merintah. Nya alai, enti sekeda ari raban 144,000 iku orang ke agi idup ba dunya tu mati, sida deka terus diangkatka ari mati ke serega. (1 Korint 15:51-55) Tang jemah ila, mayuh mensia bisi peluang diidupka baru ba Paradais di dunya tu.

25. Nama deka dipelajarka ba Pelajar 8?

²⁵ Ya, Jehovah deka ngalahka munsuh kitai, pemati, belama iya! (Isaiah 25:8) Tang, nuan engka bepikir, ‘Nama deka digaga sida ti diangkatka idup di serega?’ Sida deka enggau Jesus ba Perintah Petara di serega. Ba Pelajar 8, kitai deka belajar pasal perintah tu enggau mayuh agi.