1-3. Koyindu weyi ɖiɣni ɖɔɔnʋʋ ɖa-tɩŋa? Nɛ ɛbɛ yɔɔ tɔm ndʋ Bibl wɩlɩɣ yɔ, tɩhɛzɩɣ ɖa-laŋɩyɛ?

MAƔZƖ se ŋwɛɛ ŋseɣ koyindu sɔsɔ nɔɔyʋ. Ɛkɩlɩ-ŋ ɖoŋ kamaɣ fɛyɩ nɛ eseɣ pɩkɩlɩ-ŋ. Ŋnawa ɖɔɖɔ se ɛɛnaɣ ɛyaa pʋtɔdɩyɛ mbʋ pʋyɔɔ yɔ, ɛtɛm kʋʋ ña-taabalaa nabɛyɛ nɛ ŋna. Ŋñakɩ pana kpem se ŋposini-i ɛlɛ falaa, ɛñɔtʋʋnɩ-ŋ kʋñɔtɩnʋʋ pɩkɩlɩ. Pɩwɛ ɛzɩ lidaʋ nakʋyʋ tɩtasɩ wɛʋ yɔ. Tuda lɛ, ŋnaɣ ñʋʋ yaɖʋ nɔɔyʋ ñɔ-cɔlɔ. Ɛkɩlɩ ño-koyindu ɛnʋ ɖoŋ kamaɣ fɛyɩ, nɛ eheyi-ŋ se ŋtaahʋʋ se ɛnʋ sɩɣnɩ-ŋ. Ŋtisiɣ fezuu fʋʋʋ, yaa we?

² Ðɩpɩzɩɣ ɖɩtɔ se koyindu ɛnʋ eɖiɣni-ŋ ɖɔɔnʋʋ. Eɖiɣni ɖɔɔnʋʋ ɖa-tɩŋa. Ɛzɩ ɖɩtɛm kpɛlɩkʋʋ ñʋʋ ŋgʋ kɩɖɛwa yɔ, kɩ-taa yɔ, Bibl yaɣ sɩm se ɖo-koyindu. Ða-taa nɔɔyʋ ɛɛpɩzɩɣ ese nɛ ɛlɩɩ sɩm nesi tɛɛ. Ða-taa sakɩyɛ tɛm naʋ ɛzɩma koyindu ɛnʋ ɛkʋ ɖɛ-ɛyaa kʋsɔɔlaa yɔ. Ɛlɛ Yehowa kɩlɩ sɩm ɖoŋ kamaɣ fɛyɩ. Ɛnʋ kɛnɩ ɖa-Ñʋʋ Yaɖʋ kʋsɔɔlʋ weyi ɛwɩlaa se ɛpɩzɩɣ nɛ ɛwa ɖo-koyindu ɛnʋ yɔ. Nɛ ɛha-ɖʋ lidaʋ se ɛkaɣ ɖezuu koyindu ɛnʋ kpaagbaa ɖezuu. Bibl wɩlɩɣ se: “Nɛ wayɩ wayɩ koyindu weyi ɛkaɣ-ɩ tɛzʋʋ tɔyɩtʋʋ yɔ, ɛnʋ lɛ sɩm.” (1 Kɔrɛntɩ 15:26) Laŋhɛzɩyɛ tɔm pɩkɛnaa, yaa we?

 ³ Yele nɛ ɖɩna mbʋ sɩm pɩzɩɣ nɛ pɩkɔnɩ-ɖʋ alɩwaatʋ ndʋ pɩkpakɩɣ ɖɛ-ɛyʋ kʋsɔɔlʋ nɔɔyʋ yɔ. Pɩsɩɣnɩ-ɖʋ nɛ ɖɩnɩɩ tɔm natʋyʋ taa nɛ pɩlabɩ-ɖʋ leleŋ. Ŋtɔzʋʋ, Yehowa ha-ɖʋ lidaʋ se sɩɖaa kaɣ kʋyʋʋ. (Izaayii 26:19) Pakaɣ tasʋʋ caɣʋ wezuu. Mbʋ payaɣ se sɩɖaa fezuu lidaʋ.

4. (a) Ɛbɛ yɔɔ mbʋ Yesu laba ɛ-taabalʋ nɔɔyʋ sɩm wiye yɔ, pɩwɩlɩɣ-ɖʋ lɩmaɣza wena Yehowa wɛnɩ sɩm yɔɔ yɔ? (b) Taabalɩyɛ sɔsɔyɛ nɖɩ Yesu kaaɖʋwa?

⁴ Wiɖiyi ñɛ-ɛyʋ kʋsɔɔlʋ nɔɔyʋ sɩba yaa we? Siziŋ nɛ wɩzasɩ nzɩ ŋnɩwa nɛ ɛzɩma pitibi-ŋ yɔɔɔ yɔ, pɩfɛyɩ yɔɔdʋʋ. Alɩwaatʋ ndʋ tɩ-taa, pʋpɔzʋʋ se ɖiyele nɛ Ɛsɔtɔm hɛzɩ ɖa-laŋa. (Kalɩ 2 Kɔrɛntɩ 1:3, 4.) Bibl sɩɣnɩ-ɖʋ nɛ ɖɩnɩɩ lɩmaɣza wena Yehowa nɛ Yesu pɛwɛnɩ sɩm yɔɔ yɔ, a-taa. Yesu kaakpaɣ ɛ-Caa wɛtʋ pɩtɩŋa pɩ-taa. Ɛsɩm ɖɔɖɔ wɩzasɩ nzɩ ɛyʋ nɩɣ alɩwaatʋ ndʋ nɔɔyʋ sɩkɩ yɔ. (Yohanɛɛsɩ 14:9) Yesu wokaɣ Yerusalɛm lɛ, ewokaɣ ɖɔɖɔ ɛnaɣ Lazaarɩ nɛ ɛ-kɔɔnaa Maarɩɩ nɛ Maarta tɛtʋ ndʋ tɩwɛ Yerusalɛm cɔlɔ nɛ payaɣ-tʋ se Betaanii yɔ, tɩ-taa. Nɛ pɔkɔɔ papɩsɩ taabalaa sɔsaa. Bibl tɔm se: “Yesu kaasɔɔlɩ Maarta nɛ e-neu Maarɩɩ nɛ Lazaarɩ.” (Yohanɛɛsɩ 11:5) Ɛzɩ ɖɩtɛm naʋ ñʋʋ ŋgʋ kɩɖɛwa yɔ, kɩ-taa yɔ, Lazaarɩ kɔm nɛ ɛsɩ.

5, 6. (a) Lazaarɩ ñɩma nɛ ɛ-taabalaa pɛwɛɛ nɛ pewiɣ-i lɛ, ɛzɩma Yesu laba? (b) Ɛbɛ yɔɔ Yesu wɩzasɩ nɩʋ mbʋ, pɩhɛzɩɣ ɖa-laŋɩyɛ?

⁵ Yesu taabalʋ kʋsɔɔlʋ sɩba lɛ, siziŋ weyi ɛnɩwa? Bibl kɛdaa se Yesu wobi Lazaarɩ ñɩma nɛ ɛ-taabalaa mba pɛwɛɛ nɛ pewiɣ-i yɔ, pɔ-cɔlɔ. Yesu na-wɛ lɛ, ɛ-laŋɩyɛ wɛɛkɩ siŋŋ. “Pɩcɛyɩ-ɩ nɛ e-liu tɛɛ ta tomiye.” Nɛ Bibl tɔ se: “Yesu wii.” (Yohanɛɛsɩ 11:33, 35) Yesu nɩʋ siziŋ ɛnɩ yɔ, pʋ-tɔbʋʋ lɛ se ɛtaawɛnɩ lidaʋ nakʋyʋ yaa we? Aayɩ. Toovenim lɛ, Yesu kaanawa se lakasɩ kɩbanzɩ nasɩyɩ kaɣ labʋ. (Yohanɛɛsɩ 11:3, 4) Ɛlɛ paa mbʋ, sɩm laba nɛ ɛnɩɩ wɩzasɩ.

⁶ Yesu wɩzasɩ nɩʋ mbʋ pɩhɛzɩɣ ɖa-laŋa. Pɩwɩlɩɣ se  Yesu nɛ ɛ-Caa Yehowa papaɖɩɣ sɩm. Ɛlɛ, Yehowa Ɛsɔ pɩzɩɣ ɛlʋbɩnɩ sɩm nɛ ɛwabɩ-pʋ. Lɛɛlɛɛyɔ, ɖɩna mbʋ Ɛsɔ sɩnɩ Yesu nɛ ɛla yɔ.

7, 8. Lazaarɩ sɩba lɛ, ɛbɛ yɔɔ ɛyaa pɩzaɣ se pamaɣzɩ se lidaʋ nakʋyʋ tɩtasɩ wɛʋ? Ɛlɛ, ɛbɛ Yesu laba?

⁷ Paapim Lazaarɩ ɛwaɣ nakɛyɛ pɔʋ taa, nɛ Yesu pɔzɩ se pokuli pɩyɛ nɖɩ paɖɩɣ-ɖɩ pɩlaʋ nɔɔ yɔ. Peeɖe Maarta kitini Yesu se pepim Lazaarɩ yɔ, pɩlabɩ kɩyakɩŋ naanza nɛ ɛzʋnɔ ɛpaɣzɩ wɛɛkʋʋ. (Yohanɛɛsɩ 11:39) Ɛyaa lɩmaɣza taa lɛ, lidaʋ nakʋyʋ taatasɩ wɛʋ.

⁸ Pepilisi pɩyɛ nɖɩ paasuli pɩlaʋ yɔɔ yɔ hɔɔlʋʋ, nɛ Yesu ma kubuka nɛ ɛtɔ se: “Lazaarɩ, lɩɩ awayɩ!” Nɛ ɛbɛ la pʋwayɩ? ‘Kpaagbaa mbʋ lɛ weyi ɛɛsɩba yɔ, ɛlɩɩnɩ pɩlaʋ taa.’ (Yohanɛɛsɩ 11:43, 44) Maɣzɩ nɛ ŋna ɛzɩma pɩlabɩ leleŋ ɛyaa mba paawɛ peeɖe yɔ! Paanawa se Lazaarɩ, pe-neu yaa po-koobu yaa pa-taabalʋ yaa pɔ-cɔlɔ tʋ ɛnʋ ɛɛsɩba. Nɛ lɛɛlɛɛyɔ ɛwɛ pɛ-hɛkʋ taa, ɛ-maɣmaɣ, ɛnʋ weyi pɔsɔɔlɩ siŋŋ yɔ. Pɩlakaɣ-wɛ ɛzɩ pɛwɛɛ poɖozuu kiɖozu yɔ. Pɩtʋʋ fɛyɩ se pa-taa sakɩyɛ kpiiki Lazaarɩ pɔ-nɔkɔyʋʋ taa nɛ taa leleŋ. Patɩwa sɩm lɛ mbʋ yɔ!

9, 10. (a) Ɛbɛ Yesu laba nɛ ɛwɩlɩ ɖenɖe ehiɣ ɖoŋ nɛ efezini Lazaarɩ yɔ? (b) Sɩɖaa fezuu kɛdasɩ nzɩ sɩwɛ Bibl taa yɔ, sɩ-kalʋʋ wazɩɣ-ɖʋ we?

⁹ Yesu tɩyɔɔdɩ wiɖiyi se maamaaci lakasɩ nzɩ, e-ɖoŋ ɛlabɩnɩ-sɩ. Pʋcɔ nɛ ɛyaa Lazaarɩ se ɛlɩɩ pɩlaʋ taa nɛ ɛkɔɔ lɛ, ɛyɔɔdɩ adɩma taa kpayɩ se Yehowa ɖoŋ taa Lazaarɩ kaɣ fem. (Kalɩ Yohanɛɛsɩ 11:41, 42.) Yehowa kpaɣʋ e-ɖoŋ nɛ efezini sɩɖʋ nɔɔyʋ yɔ, pɩtɩkɛ kajalaɣ ɖeɖe yɔ. Ɛsɔtɔm taa pɛkɛdɩ sɩɖaa fezuu nakʋ tɔm nɛ tɩ-taa kʋyʋmtʋ lɛ Lazaarɩ fezuu tɔm. * Ye  ɖɩkalɩɣ nɛ ɖɩkpɛlɩkɩɣ sɩɖaa fezuu tɔm ndʋ yɔ, ɖɩnɩɣ leleŋ pɩdɩɩfɛyɩ. Tɩwɩlɩɣ se Ɛsɔ fɛyɩ tɛ-yɔɔ tɛ-yɔɔ mbʋ pʋyɔɔ yɔ, efezi sɔsaa nɛ piya, abalaa nɛ halaa, Izrayɛɛlɩ mba nɛ mba patɩkɛ Izrayɛɛlɩ mba yɔ. Nɛ sɩɖaa fezuu tɔm ndʋ tɩɩlabɩ sakɩyɛ leleŋ. Kɩyakʋ ŋgʋ Yesu fezi pɩɣa peleɣa nakɛyɛ nɛ sɩm yɔɔ yɔ, ‘pɩɩɖɩɣzɩ ka-lʋlɩyaa pɩŋŋ [yaa pɩlabɩ ka-lʋlɩyaa leleŋ pɩdɩɩfɛyɩ].’ (Maarkɩ 5:42, ABT) Toovenim Yehowa laba nɛ pa-taa la leleŋ nɛ wiɖiyi paakaɣ sɔʋ tɔm ndʋ tɩ-yɔɔ.

¹⁰ Toovenim, mba Yesu kaafezaa yɔ, pɔkɔm paɖaɣnɩ sɩbʋ. Pʋ-tɔbʋʋ lɛ se Yesu kaafeziɣ sɩɖaa mba yɔ, pɩtɩwazɩ nabʋyʋ yaa we? Aayɩ. Sɩɖaa fezuu tɔm ndʋ tɩkpɛlɩkɩɣ-ɖʋ toovenim tɔm kɩcɛyɩtʋ natʋyʋ nɛ tɩhaɣ-ɖʋ lidaʋ.

11. Ɛzɩma Lazaarɩ fezuu tɔm ñɩkɩɣ niye toovenim tɔm ndʋ tɩwɛ Eklesɩyastɩ 9:5 taa yɔ, tɩ-yɔɔ?

¹¹ Bibl wɩlɩɣ se sɩɖaa “ɩɩtasɩɣ natʋyʋ sɩm.” Patɩtasɩ ɖoli wɛʋ. Lazaarɩ tɔm ñɩkɩɣ niye toovenim pʋnɛ pɩ-yɔɔ. Lazaarɩ fema lɛ, ɛkɛdaɣ ɛyaa ɛzɩma ɛsɔdaa wezuu caɣʋ wɛɛ yɔ? Yaa ɛkɛdaɣ-wɛ miŋ sɔsɔŋ yɔɔ sɔɔndʋ tɔm natʋyʋ? Aayɩ. Bibl taa hɔɔlʋʋ nakʋyʋ tɩyɔɔdɩ se Lazaarɩ labɩ mbʋ. Kɩyakɩŋ naanza weyi ɛsɩba yɔ ɩ-taa, ɛɛtaatasɩ “natʋyʋ sɩm.” (Eklesɩyastɩ 9:5) Lazaarɩ kaawɛɛ eɖou kiɖou sɩm taa.—Yohanɛɛsɩ 11:11.

12. Ɛbɛ yɔɔ ɖɩpɩzɩɣ nɛ ɖitisi se paafezi Lazaarɩ toovenim?

¹² Lazaarɩ fezuu tɔm wɩlɩɣ-ɖʋ ɖɔɖɔ se sɩɖaa fezuu tɔm kɛ toovenim, pɩtɩkɛ eduuye yem. Yesu kaafezi Lazaarɩ ɛyaa samaɣ nakɛyɛ ɛzɩdaa nɛ kana-ɩ nɛ kɛ-ɛza. Ɛsɔ sɛtʋ agbaa ñʋndɩnaa mba pakaɖaɣnɩ Yesu yɔ, pataapɩzɩɣ se pɛkpɛzɩ se ɛlabɩ maamaaci lakasɩ nzɩ toovenim. Halɩ paayɔɔdaa se: “Ðɩlakɩ we? Ɛyʋ ɛnʋ yɔ ɛwɩlɩɣ kawɩlɩsɩ sakɩyɛ.” (Yohanɛɛsɩ 11:47) Ɛyaa sakɩyɛ kaawoba nɛ pana  Lazaarɩ weyi pefezaa yɔ. Mbʋ labɩna nɛ ɛyaa mba pa-taa sakɩyɛ tisi Yesu yɔɔ. Pʋwayɩ panaɣaɣ Lazaarɩ lɛ, pɩɩkɛnɩ-wɛ aseɣɖe se Ɛsɔ tiyini Yesu toovenim. Tɔm ndʋ tɩnaɣaɣ kaɣlaa. Mbʋ labɩna nɛ Yuda Ɛsɔ sɛtʋ ñʋndɩnaa mba pañɩnɩɣ se pakʋ Yesu nɛ Lazaarɩ.—Yohanɛɛsɩ 11:53; 12:9-11.

13. Ɛbɛ sɩɣnɩ-ɖʋ nɛ ɖitisi se Yehowa pɩzɩɣ nɛ efezi sɩɖaa toovenim?

¹³ Ðɩpɩzɩɣ nɛ ɖitisi se pakaɣ fezuu sɩɖaa wiɖiyi yaa we? Ɛɛɛ, mbʋ pʋyɔɔ yɔ, Yesu kaayɔɔdaa se kɩyakʋ nakʋyʋ kaɣ kɔm nɛ pakaɣ “mba pɛwɛ pɩlaŋ taa yɔ” fezuu. (Yohanɛɛsɩ 5:28) Yehowa cɔlɔ wezuu lɩnaa. Pɩwɛ kaɖɛ se ɖitisi se ɛpɩzɩɣ ɛɖaɣnɩ haʋ wezuu yaa we? Toovenim taa lɛ, pɩlɩɣnɩ Yehowa cɔlɔ na. Ɛzɩ Yehowa pɩzɩɣ nɛ ɛtɔzɩ ɖɛ-ɛyaa kʋsɔɔlaa mba pasɩba yɔ, pa-tɩŋa pɔ-yɔɔ? Tɩɩnzɩ nzɩ sɩwɛ ɛsɔdaa yɔ, sɩfɛyɩ kalʋʋ. Sɩkɛ tɩɩnzɩ kudokiŋ ɛgbɔŋ sakɩyɛ, ɛlɛ Ɛsɔ ha paa tɩɩŋa ŋga lɛ hɩɖɛ! (Izaayii 40:26) Ye mbʋ Yehowa Ɛsɔ pɩzɩɣ nɛ ɛtɔzɩ ɖɛ-ɛyaa kʋsɔɔlaa mba pasɩba nɛ mbʋ mbʋ paakɛnaa yɔ, pɩ-yɔɔ. Nɛ ɛpɩzɩɣ ɖɔɖɔ nɛ ɛɖaɣnɩ-wɛ haʋ wezuu.

14, 15. Ɛzɩ Yɔb yɔɔdʋʋ yɔ, lɩmaɣza wena Yehowa wɛnɩ sɩɖaa fezuu yɔɔ?

¹⁴ Ɛlɛ, lɩmaɣza wena Yehowa wɛna sɩɖaa fezuu yɔɔ? Bibl wɩlɩɣ se piselitiɣ-i se efezi sɩɖaa. Ɛyʋ siɣsiɣ tʋ weyi payaɣ se Yɔb yɔ, ɛɛpɔzaa se: “Ɛzɩ ŋmaɣzɩɣ se ɛyʋ ɛsɩba yɔ ɛɖaɣnɩɣ wɛʋ na?” Yɔb yɔɔdaɣ ɛzɩma ɛkaɣ wɛʋ pɩlaʋ taa nɛ ɛɖaŋ se alɩwaatʋ ɛkɔɔ nɛ Ɛsɔ tɔzɩ ɛ-yɔɔ yɔ, pɩ-tɔm na. Nɛ eheyi Yehowa se: “Ŋŋya-m lɛ, moncosi-ŋ; ŋŋɖaɣnɩ ñɩnʋʋ ñe-nesi tɛɛ tʋmɩyɛ [ŋŋɖaɣnɩ selituu ñe-nesi tɛɛ tʋmɩyɛ yɔɔ, NW].”—Yɔb 14:13-15.

¹⁵ Maɣzɩ kpem nɛ ŋna! Piselitiɣ Yehowa se ɛɖaɣnɩ sɩɖaa haʋ wezuu. Pɩɩlakɩ-ɖʋ leleŋ se lɩmaɣza anɛ Yehowa wɛna? Ɛlɛ ɛzɩma sɩɖaa fezuu mbʋ pɩkaɣ wɛʋ? Mba pakaɣ fezuu? Nɛ le pakaɣ caɣʋ?

16. Pefeziɣ sɩɖaa se pacaɣ wezuu wɛtʋ ndʋ taa?

¹⁶ Bibl taa sɩɖaa fezuu kɛdasɩ wɩlɩɣ-ɖʋ tɔm sakɩyɛ cee wayɩ sɩɖaa fezuu yɔɔ. Pefezi ɛyaa tɛtʋ yɔɔ cɩnɛ na nɛ papɩsɩ pacaɣ wezuu pɛ-ɛyaa kʋsɔɔlaa cɔlɔ. Cee wayɩ sɩɖaa fezuu kaɣ wɛʋ mbʋ ɖɔɖɔ na, halɩ cee wayɩ ñɩmbʋ kɩlɩɣ ɖeu. Ɛzɩ ɖɩkpɛlɩkʋʋ ñʋʋ 3 taa yɔ, Ɛsɔ tamaɣ lɛ se tɛtʋ tɩŋa ɛpɩsɩ Paradisuu. Ye mbʋ paakaɣ fezuu sɩɖaa se pacaɣ wezuu ɛjaɖɛ nɖɩ ɖɩ-taa you, ɛyaa kʋʋ nɛ kʋdɔŋ pɔtɔyaa yɔ. Pakaɣ wɛnʋʋ waɖɛ se pacaɣ tɛtʋ tʋnɛ tɩ-yɔɔ laŋhɛzɩyɛ nɛ koboyaɣ pa-taa.

17. Mba pakaɣ fezuu?

¹⁷ Mba pakaɣ fezuu? Yesu kaayɔɔdaa se ‘mba pɛwɛ pɩlaŋ taa yɔ, Ɛyʋ Pɩyalʋ Yesu kaɣ pe-kpeekpe yaʋ nɛ pefe.’ (Yohanɛɛsɩ 5:28, 29) Natʋ 20:13 tɔŋ ɖɔɖɔ se: “Lɩm sɔsɔm hoo nɛ pɩtɔ sɩɖaa mba paawɛ pɩ-taa yɔ, Sɩm nɛ Hadɛ papɩsɩnɩ sɩɖaa mba paaɖɔkaa yɔ.” “Hadɛ” kɛ ɛyaa tɩŋa pɩlaʋ. (Cɔnɩ Tɔm Kɩsɔzɩtʋ, hɔɔlɩŋ 212-213 yɔɔ.) Nɔɔyʋ ɛɛkaɣ tasʋʋ wɛʋ pɩlaʋ ŋgʋ kɩ-taa. Ɛyaa miiliyɔɔwaa sakɩyɛ mba paawɛ peeɖe yɔ, pefeŋ nɛ pacaɣ wezuu. Apostoloo Pɔɔlɩ kaayɔɔdaa se: “Ɛyaa kʋtʋʋzaa nɛ kɩtɩtʋʋzɩŋ mba pasɩba yɔ, pɔkɔŋ fem.” (Tʋma Labʋ 24:15, ABT) Pʋ-tɔbʋʋ lɛ suwe?

18. Mba payaɣ se “ɛyaa kʋtʋʋzaa”? Nɛ suwe ŋmaɣzɩɣ sɩɖaa fezuu lidaʋ ŋgʋ kɩ-yɔɔ?

¹⁸ “Ɛyaa kʋtʋʋzaa” mba pa-taa nabɛyɛ lɛ, ɛyaa kɩbama mba Bibl yɔɔdʋʋ pɔ-tɔm se paacaɣ wezuu pʋcɔ nɛ Yesu kɔŋ tɛtʋ yɔɔ yɔ. Pɩtɩla ŋtɔzʋʋ pa-taa nabɛyɛ yɔɔ, ɛzɩ Noa, Abraham, Saara, Moyizi, Ruti, Ɛstɛɛrɩ nɛ lalaa. Ɛyaa mba paawɛnɩ tisuu kpem. Pɔyɔɔdɩ pa-taa nabɛyɛ tɔm Ebree takayaɣ ñʋʋ 11 taa. Ɛlɛ, ɖa-alɩwaatʋ taa Yehowa sɛyaa mba pasɩba yɔ, pɛkɛ “ɛyaa kʋtʋʋzaa” ɖɔɖɔ. Sɔɔndʋ ɛɛkpaɣ-ɖʋ nɛ sɩm mbʋ pʋyɔɔ yɔ, ɖɩwɛnɩ lidaʋ se pakaɣ sɩɖaa fezuu.—Ebree 2:15.

19. Mba payaɣ se “ɛyaa kɩtɩtʋʋzɩŋ”? Nɛ waɖɛ nɖɩ Yehowa kaɣ-wɛ haʋ?

 ¹⁹ Ɛyaa sakɩyɛ mba patɩsɛɛ Ɛsɔ yaa patɩɖɔ ɛ-paɣtʋ yɔɔ, mbʋ pʋyɔɔ yɔ patɩnɩɩ ɛ-tɔm wiɖiyi kaaʋ yɔ, ɛbɛ pɩtɛŋnɩ-wɛ? Paasɔʋ “kɩtɩtʋʋzɩŋ” ɛnɩ ɩ-yɔɔ. Pefeziɣ-wɛ ɖɔɖɔ nɛ paha-wɛ alɩwaatʋ se pɛkpɛlɩkɩ nɛ patɩlɩ Ɛsɔ toovenim tʋ nɛ pɛsɛɛ-ɩ. Pahaɣ ɛyaa mba waɖɛ pɩnzɩ kudoku taa se pa nɛ ɛyaa siɣsiɣ mba mba pɛwɛ tɛtʋ yɔɔ yɔ, pɛsɛɛ Yehowa. Pɩkɛɣnɩ alɩwaatʋ kɩbandʋ kpem. Alɩwaatʋ ndʋ Bibl yaɣ se Tɔm Hʋʋ Kɩyakʋ. *

20. Ɛbɛ payaɣ se Geheena? Nɛ awoki kɩ-taa?

²⁰ Pʋ-tɔbʋʋ lɛ se pakaɣ ɛyaa tɩŋa fezuu na? Aayɩ. Bibl tɔŋ se ɛyaa mba pasɩba yɔ, pa-taa nabɛyɛ wɛ “Miŋ sɔsɔŋ” yaa “Geheena, NW” taa. (Luka 12:5) Lone nɖɩ ɖɩɩwɛ caanaʋ taa Yerusalɛm kolonzi wayɩ nɛ pañaɣzɩɣ ñɩtʋ nɛ sɩɖaa miŋ peeɖe yɔ, nɖɩ payaɣ se Geheena. Ye pɛpɛɖɩ sɩɖʋ nɔɔyʋ peeɖe yɔ, pɩwɩlɩɣ se Yuda mba maɣzɩɣ se ɛtɩmʋna se pefezi-i. Ye mbʋ Geheena sɩŋnɩ tam tam ɖezuu. Toovenim Yesu kɔŋ labʋ tʋmɩyɛ naɖɩyɛ tɔm hʋʋ taa, ɛlɛ Yehowa kɛnɩnɩ tɔm hʋyʋ sɔsɔ. (Tʋma Labʋ 10:42) Mba Yehowa nawa se paakaɣ lɛɣzʋʋ kpa yɔ, eefeziɣ-wɛ.

21, 22. (a) Femtu ndʋ tɔm ɖɔɖɔ Bibl yɔɔdʋʋ? (b) Anɩ pacalɩ fezuu nɛ fezuu tomnaɣ?

²¹ Bibl tɔŋ se pakaɣ fezuu ɛyaa nabɛyɛ nɛ paha-wɛ feziŋ tomnaɣ nɛ pakpa ɛsɔdaa. Ɛyʋ kʋyʋm yeke Bibl tɔm se pefezi mbʋ, ɛnʋ lɛ Yesu Krɩstʋ.

²² Yesu sɩba ɛzɩ ɛyaa tɩŋa sɩkʋʋ yɔ. Ɛlɛ, Yehowa tiyele ɛ-Pɩyalʋ kʋsɔɔlʋ se ɛtɛŋɛlɩ pɩlaʋ taa. (Keɣa 15:10; Tʋma Labʋ 13:34, 35) Ɛsɔ fezi Yesu ɛlɛ, etifezi-i nɛ ɛyʋ tomnaɣ. Apostoloo  Pɔɔlɩ kaatɔm se: ‘Poɖu’ Krɩstʋ tomnaɣ taa nɛ ‘efe fezuu tomnaɣ’ taa (1 Kɔrɛntɩ 15:42-50) Pɩɩkɛ maamaaci lakasɩ kpem. Yesu ɖaɣnɩ pɩsʋʋ Ɛsɔ tiyiyu ɖoŋ tʋ. (Kalɩ 1 Kɔrɛntɩ 15:3-6.) Yesu kɛnɩ kajalaɣ tʋ weyi pefezi-i nɛ fezuu tomnaɣ yɔ. (Yohanɛɛsɩ 3:13) Ɛlɛ, ɛtɩkɛ kɛdɛzaɣ tʋ.

23, 24. Mba Yesu yawa se “ewiɖe cikpeɖe”? Nɛ pɛkpɛndɩ ɛyaa ɛzɩma?

²³ Yesu nawa se pɩkazɩ pazɩ se ɛpɩsɩ ɛsɔdaa lɛ, eheyi ɛ-wayɩ tɩŋɩyaa siɣsiɣ mba se: “Mowoki mɔñɔɔzɩ-mɩ ɖɩjaɣyɛ.” (Yohanɛɛsɩ 14:2) Mba Yesu yɔɔdaɣ pɔ-tɔm se ewoki-wɛ ñɔɔzʋʋ ɖɩjaɣyɛ ɛsɔdaa yɔ, ɛya-wɛ se “mba mɩ ɩtɩɖɔɔ yɔ [yaa ewiɖe cikpeɖe].” (Luka 12:32, ABT) Krɩstʋ ñɩma mba pɛwɛ ewiɖe cikpeɖe taa yɔ, pɛkpɛndɩ ɛzɩma? Natʋ takayaɣ 14:1 taa, apostoloo Yohanɛɛsɩ tɔm se: “Heɣa nakɛyɛ lɩ ɛ-ɛzɩdaa; kasɩŋ Siyɔŋ Pʋʋ yɔɔ, ka nɛ ɛyaa kiɖeɖema akpaba [kudokiŋ] mɩnʋʋ nɛ nɩɩnaza nɛ naanza, pama pe-kila taa Heɣa hɩɖɛ nɛ ka-Caa hɩɖɛ.”

²⁴ Yesu apostoloowaa wɛ ɛyaa 144 000 waa mba pa-taa. Pefeziɣ-wɛ se pakpa ɛsɔdaa. Ɛzɩmtaa pe-fezuu paɣzaa? Apostoloo Pɔɔlɩ mawa se pe-fezuu paɣzɩɣ Krɩstʋ ɖɩkɔnɛ wiye. (1 Kɔrɛntɩ 15:23) Ðɩkɔŋ naʋ ñʋʋ 9 taa se alɩwaatʋ ndʋ, tɩ-taa ɖɩwɛ lɛɛlɛɛyɔ. Pʋ-tɔbʋʋ lɛ se ɛyaa 144 000 waa taa mba pasɩkɩ ɖa-alɩwaatʋ taa yɔ, pefeziɣ-wɛ kpaagbaa. (1 Kɔrɛntɩ 15:51-55) Ɛlɛ, ɛyaa sakɩyɛ wɛnɩ lidaʋ se pakaɣ-wɛ fezuu nɛ pacaɣ wezuu maatɛŋ Paradisuu taa tɛtʋ yɔɔ.

25. Ɛbɛ ɖɩkaɣ naʋ ñʋʋ ŋgʋ kɩkɔŋ yɔ, kɩ-taa?

²⁵ Pɩtʋʋ fɛyɩ se Yehowa kaɣ wabʋ sɩm. Sɩm ɛɛtasɩɣ wɛʋ! (Kalɩ Izaayii 25:8.) Ɛlɛ, pɩtɩla ŋpɔzʋʋ ña-tɩ se ‘Mba pefeziɣ se pakpa ɛsɔdaa yɔ, tʋmɩyɛ nɖɩ pakaɣ labʋ peeɖe?’ Powoki wɛʋ Kewiyaɣ kɩbaŋa nakɛyɛ taa peeɖe. Ðɩkɔŋ naʋ mbʋ kewiyaɣ ŋga kɛkɛnaa yɔ, ñʋʋ ŋgʋ kɩkɔŋ yɔ, kɩ-taa.