1-3. Әв чь дьжмьн ә кӧ пәй мә һʹәмуйа кʹәтийә, у чьрʹа созед жь Кʹьтеба Пироз дьле мә рʹьһʹәт дькә?

БЬДӘ бәр чʹәʹве хԝә, ԝәки тӧ жь дьжмьнәки хԝә дьрʹәви. Әԝ гәлә жь тә ԛәԝаттьр ә у жь тә зутьр дьрʹәвә. Тӧ зани кӧ әԝ мәрьвәки гәләк бехԝәде йә, чьмки әԝи бәр чʹәʹве тә чәнд һәвалед тә кӧштийә. Тӧ чьԛаси һе зу дьрʹәви, әԝ йәкә пәй тә дькʹәвә у һе незики тә дьбә. Ида тӧ дьшьрмиш дьби, кӧ һʹале тә гәләк хьраб ә, тʹӧ гӧман сәва тә тʹӧнә. Ле ньшкева тӧ пешийа хԝә мәрьвәки дьбини. Әԝ жь дьжмьне тә гәләк щар ԛәԝаттьр ә у әԝ соз дьдә тә, кӧ ԝе тә хьлаз кә. Ԝи чахи тӧйе чьԛас ша би, ӧса нинә?

² Иро рʹасти жи дьжмьнәки ӧса бехԝәде һәйә, йе кӧ пәй тә кʹәтийә. Әԝ пәй һʹәму мәрьва кʹәтийә. Ча әм пешда пеһʹәсийан, Кʹьтеба Пироз дьбежә кӧ әв дьжмьн һәйә мьрьн. Тʹӧ кәс жь мә нькарә жь ԝи бьрʹәвә, йан жи тʹәви ԝи шәрʹ бькә. Гәләк мәрийа жь бо ԝи дьжмьни, мәрьвед хԝәйә незик ӧнда кьрьнә. Ле Йаһоԝа жь ԝи дьжмьни гәләк ԛәԝаттьр ә. Әԝ һәйә хьлазкʹаре мә, у әԝи ида избат кьрийә кӧ дькарә мә жь мьрьне хьлаз кә. Йаһоԝа соз дьдә кӧ ԝе әви дьжмьни, демәк мьрьне бьдә һьлдане. Кʹьтеба Пироз ӧса дьбежә: «Дьжмьне хьлазийе кӧ ԝе кʹоке ле бинә, мьрьн хԝәха йә» (1 Корьнтʹи 15:26). Әва рʹасти жи мьзгиникә хер ә!

³ Ԝәрә әм ньһа һьнәки дьшьрмиш бьн, кӧ гава мәрьвәки мәйи незик дьмьрә әм чь ль сәр хԝә тʹәхмин дькьн. Бь сайа ве йәке әме бькарьбьн фәʹм бькьн, кӧ созе Йаһоԝа Хԝәде  чьԛас дькарә мә бәхтәԝар кә. Чьмки Йаһоԝа соз дьдә кӧ мьри ԝе бенә сахкьрьне (Ишайа 26:19). Әԝана ԝе диса жи бьжин. Әва созе Хԝәде, һәйә гӧман сәва мьрийа.

4. (а) Чьрʹа әԝ йәк кӧ Иса фәʹм дькьр еша мәрийа, нишан дькә мәрʹа кӧ Йаһоԝа чь ль сәр хԝә тʹәхмин дькә гава мәрьвәки мә дьмьрә? (б) Иса тʹәви кʹе һәвалти дькьр?

⁴ Гава мәрьвәки мә дьмьрә, ешәкә мәзьн дькʹәвә дьле мә у әԝ мәрʹа дьбә кӧл-дәрдәки мәзьн. Ле ԝәʹде ӧса әм дькарьн дьлбинийе жь Кʹьтеба Пироз бьстиньн. (Бьхунә 2 Корьнтʹи 1:3, 4.) Кʹьтеба Пироз али мә дькә әм пебьһʹәсьн, кӧ Йаһоԝа у Иса Мәсиһ дәрһәԛа мьрьне чь дьшьрмиш дьбьн. Исайе кӧ һʹәму алийава мина Баве хԝә йә, занә кӧ чахе мәрьвәки мәрийа дьмьрә, әв кʹәдәрәкә чьԛас мәзьн ә (Йуһʹәнна 14:9). Чахе Иса дь Оршәлимеда бу, әԝ гәлә щара дьчу гӧнде кʹеләке бь наве Бәйтанйа, сәва кӧ сәрики Лазар, Мәрйәме у Мәртʹайе хә. Пашԝәхтийе әԝана бунә достед ԝи. Кʹьтеба Пироз ӧса дьбежә: «Иса Мәртʹа, хушка ԝе у Лазаре бьре ԝан һʹьз дькьрьн» (Йуһʹәнна 11:5). Ле ча әм ида пешда пеһʹәсийан, паше ӧса ԛәԝьми кӧ Лазар мьр. Ле гәло Иса чь ль сәр хԝә тʹәхмин кьр, чахе пеһʹәсийа кӧ Лазар мьр?

5, 6. (а) Гава Иса дит кӧ бьра-пьсмам у достед Лазар ча шина Лазар дькьн, әв йәк ча ль сәр Иса һʹӧкӧм бу? (б) Әԝ йәк кӧ Иса жь бо мьрьна Лазар бәр хԝә кʹәт, ча мә дьлгәрм дькә?

⁵ Чахе Иса пеһʹәсийа кӧ Лазар мьр әԝ чу щәм хушкед ԝи у достед ԝи, йед кӧ шина Лазар дькьрьн. Гава Иса әԝана дитьн, гәләк бәр хԝә кʹәт, «кʹәсәра кʹур һате у дьле ԝи ешийа». Паше жи, чаԝа әм жь ве сәрһатийе педьһʹәсьн «Иса гьрийа» (Йуһʹәнна 11:33, 35). Ле гәло гьрийе Иса дьһатә һʹәсабе, кӧ гӧмана ԝи тʹӧнә бу? На. Бь рʹастийе Иса ида заньбу кӧ кʹәрәмәтәк ԝе бьԛәԝьмә (Йуһʹәнна 11:3, 4). Ле йәкә әԝ бәр хԝә кʹәт.

⁶ Гьри у бәрхԝәкʹәтьна Иса, мә дьлгәрьм дькә. Чьмки жь ве йәке әшкәрә те кʹьфше, кӧ мьрьн бәр чʹәʹве Иса у Йаһоԝа рʹәш ә. Ле ԛәԝата Йаһоԝа дьгьһиже шәрʹ бькә тʹәви мьрьне у ԝи бьдә һьлдане! Ԝәрә әм бьньһерʹьн бь сайа ԛәԝата Йаһоԝа, Иса чь карьбу бькьра?

7, 8. Чьрʹа бь ньһерʹандьна мәрийа, сәва Лазар тʹӧ чʹарә ида тʹӧнә бу, ле Иса чь кьр?

⁷ Чьмки Лазар дь шкәфтеда дәфьн кьрьбун, ләма жи Иса гот ԝәки кәвьре бәр дәре шкәфте ԝеда кьн. Ле Мәртʹа ԛайил нибу кӧ шкәфте вәкьн, чьмки Лазар ида чар рʹож бу кӧ мьрьбу у дьбәк бин жи кʹәтьбу бәдәна ԝи (Йуһʹәнна 11:39). Һьн жи, бь ньһерʹандьна мәрийа сәва мьрийа ида чь чʹар һәйә?

⁸ Гава кәвьр ԝеда кьрьн, Иса бь дәнгәки бьльнд кьрә гази: «Лазар, дәркʹәвә!» Зани ԝи чахи чь ԛәԝьми? «Йе мьри . . . дәркʹәтә дәрва» (Йуһʹәнна 11:43, 44). Дькари бьди бәр чʹәʹве хԝә шабуна мәрийед дор-бәр? Сәва һьнәка Лазар һәвал бу, сәва йед дьн жи бьра-пьсмам, у ԝана заньбу кӧ әԝ мьрийә. Ле ԝа әԝ бәр ԝан сәкьнийә, диса әԝ Лазар. Ԝана чʹәʹве хԝә баԝәр нәдькьрьн. Гәләк жь ԝан жь шабуне дьрʹәвьнә бәр Лазар ԝәки ԝи һʹәмез кьн. Жь вьр әм дьбиньн, ԝәки ԛәԝата Йаһоԝа рʹасти жи дьгьһиже, кӧ тʹәви мьрьне шәрʹ бькә у ԝи бьдә һьлдане!

9, 10. (а) Ча Иса нишан кьр, кӧ ԛәԝата сахкьрьне жь кʹе йә? (б) Жь хԝәндьна мәсәла дәрһәԛа сахбуне, кʹара мә чь йә?

⁹ Иса әшкәрә нишан кьр, кӧ әԝи әв кʹәрәмәт бь ԛәԝата хԝә нәкьр. Пешийа кӧ гази Лазар бькә, Иса Йаһоԝарʹа дӧа кьр у нишан кьр кӧ әв ԛәԝата сахкьрьне жь Йаһоԝа йә. (Бьхунә Йуһʹәнна 11:41, 42.) Йаһоԝа диса гәләк щар әв ԛәԝат дайә хәбате, хенщи Лазар дь Кʹьтеба Пирозда диса һʹәйшт мәсәлә һәнә дәрһәԛа сахкьрьна мьрийа. * Хԝәндьн у дьшьрмишбуна дәрһәԛа ван мәсәла, гәләк һʹәԝас ә. Жь ван мәсәла әм педьһʹәсьн, кӧ Йаһоԝа Хԝәде фьрԛийе накә ортʹа мәрийа. Жь ԝан сахкьрийа һәбунә щаһьл жи, кал-пир жи, мер жи, жьн жи, Исраели у нә Исраели жи. Ӧса жи жь ван мәсәла әм дьбиньн, кӧ мәрьв ча пʹьрʹ шадьбун. Мәсәлә, дькари бьди бәр чʹәʹве хԝә чахе Иса кәчʹька щаһьл сах  кьр, шабуна де-баве ԝе чьԛас мәзьн бу? (Марԛос 5:42). Бәле, Йаһоԝа сәва шабуне мәʹникә ӧса дабу ԝан, кӧ ԝана тʹӧ щар ԝе бирнәкьрана.

¹⁰ Фәʹмдари йә ԝәки мәрьвед кӧ Иса сах кьрьбун, ахьрийе диса мьрьн. Ле әв йәк те һʹәсабе, кӧ Иса бадиһәԝа ԝана сах кьр? На. Чьмки бь сайа ван кʹәрәмәта, әм дәрһәԛа мьрийа рʹастийе педьһʹәсьн, у гӧмане дьстиньн бона мьрийед хԝә.

11. Ча сәрһатийа дәрһәԛа Лазар избат дькә ԝан гьлийа, кʹижан кӧ дь Ԝаиз 9:5-да ньвисинә?

¹¹ Жь Кʹьтеба Пироз әм педьһʹәсьн кӧ «мьри тьштәки ньзаньн» (Ԝаиз 9:5). Сәрһатийа дәрһәԛа Лазар әве йәке рʹьнд избат дькә. Чахе Лазар жь мьрьне рʹабу, әԝи ԛәт гьли кьрийә сәва әʹмьре ль сәр әʹзмана? Йан жи ԛәт гьли кьрийә, кӧ мәри щики дьчәрчьрьн, йан жи щәʹньм һәйә? На. Дь Кʹьтеба Пирозда тʹӧнә щики ӧса, ԝәки Лазар дәрһәԛа тьштед ӧса гьли кьра. Һʹәта Лазар мьри бу, ван чар рʹожа әԝи «тьштәк ньзаньбу». Лазар, ча бежьн бь хәԝа мьрьне рʹаза бу (Йуһʹәнна 11:11).

12. Әм чьрʹа дькарьн баԝәр бькьн, кӧ Лазар рʹасти жи жь мьрьне рʹабу?

¹² Сәрһатийа дәрһәԛа Лазар ӧса жи нишан дькә, кӧ сахкьрьн рʹасти жи һәйә, әв чʹирʹок нинә. Шәʹдед ԝе йәке кӧ Иса Лазар жь мьрьне рʹакьр, гәләк мәри бун. Һәла һе сәркʹаред дине щьһуйа жи, кӧ Иса бәр чʹәʹве ԝан рʹәш бу, нькарьбун инкʹар кьрана кʹәрәмәта ԝи. Ԝана сәрда жи гьлийед ӧса готьн: «Әме чь бькьн? Әва мәрьва [Иса] гәләк нишана дькә?» (Йуһʹәнна 11:47). Гәләк мәрьв дьһатьн, ԝәки Лазаре сахбуйи бьбиньн. Паше, гәләк жь ԝана дәстпекьрьн жь Иса баԝәр кьн. Лазаре сахбуйи ԝанарʹа дьбу избаткьрьн, кӧ Иса рʹасти жи жь Йаһоԝа Хԝәдеда һатийә шандьне. Әва избаткьрьн һаԛаси ԛәԝи бу, кӧ сәркʹаред дине щьһуйа хԝәстьн һьн Иса, һьн жи Лазар бькӧжьн (Йуһʹәнна 11:53; 12:9-11).

13. Ль сәр чь һʹими әм дькарьн баԝәр кьн, кӧ Йаһоԝа дькарә мьрийа рʹакә?

 ¹³ Гәло бь аԛлайи йә баԝәр кьн кӧ мәрьв дькарә бе сахкьрьне? Бәле, чьмки Иса дьбежә кӧ ԝәхтәке бе, чахе «һʹәмуйед тʹьрбада ԝе дәнге ԝи бьбьһен» у ԝе рʹабьн (Йуһʹәнна 5:28). Йаһоԝа һәйә Әʹфьрандаре һʹәму тьшти. Чәтьн ә баԝәр бьки, ԝәки әԝ дькарә мәрьвәки тʹәзәда бьәʹфьринә? Вьра гәләк тьшт тʹәви бира Йаһоԝа гьредайи йә. Ле гәло әԝ дькарә мьрийед мә дь бира хԝәда хԝәй кә? Бьдьн һʹәсабе хԝә, кӧ дь әʹзменда милйард-милйарда стәйрк һәнә, у Йаһоԝа наве һәр йәке жь ԝана, занә! (Ишайа 40:26). Ләма жи әм дькарьн гӧман бьн, кӧ Йаһоԝа дькарә һʹәму тьшти, һур бь һур, дәрһәԛа мьрийед мә дь бира хԝәда хԝәй кә у һазьр ә ԝана тʹәзәда бьәʹфьринә.

14, 15. Чь жь гьлийед Ибо те кʹьфше, Йаһоԝа ча дьньһерʹә ль сәр рʹакьрьна мьрийа?

¹⁴ Ле гәло, Йаһоԝа ча дьньһерʹә сәр рʹакьрьна мьрийа? Дь Кʹьтеба Пирозда ньвисар ә, ԝәки Йаһоԝа гәлә дьхԝазә, кӧ мәрийа жь мьрьне рʹакә. Мәрики амьн бь наве Ибо, пьрсәкә ӧса дабу: «Һәгәр мәрьв бьмьрә, гәло дькарә диса бьжи?» Бь ве йәке Ибо дьхԝәст бьгота, ԝәки чахе әԝ бьмьрә, ԝе дь тʹьрбеда бә, һʹәта кӧ Йаһоԝа Хԝәде ԝи бира хԝә бинә. Әԝи готә Йаһоԝа: «Те гази мьн бьки, әзе жи щаба тә бьдьм. Те бира әʹфьрандьнед дәстед хԝә бьки» (Ибо 14:13-15, ДТʹ).

¹⁵ Жь вьр әм дьбиньн, кӧ Йаһоԝа дьхԝазә у гәләк һивийа ԝе рʹоже йә, чахе мьри ԝе сах бьн. Әв йәк мә гәләк дьлгәрьм дькә, ӧса нинә? Ле гәло, кʹи ԝе бе сахкьрьне, у әԝана кʹидәре ԝе бьжин?

16. Гава мәри бенә сахкьрьне, әʹмьре ԝан ль сәр әʹрде ԝе чь щурʹәйи бә?

¹⁶ Сәрһати дәрһәԛа сахкьрьна мьрийа, йед кӧ дь Кʹьтеба Пирозда ньвисар ьн, али мә дькьн фәʹм бькьн, ԝәки ль ахьрийе Йаһоԝа Хԝәде сәва мәрийа ԝе чь бькә. Жь ван сәрһатийа ӧса жи те кʹьфше, ԝәки әԝ мьрийед кӧ һатьбун сахкьрьне, диса жи ль сәр әʹрде тʹәви бьра-пьсмамед хԝә  дьжитьн. Демәк дь ахьрийеда жи, гава мьри бенә сахкьрьне, әԝана ԝе ль сәр әʹрде бьжин, ле һьнге жийин ԝе һе хԝәш бә. Ча әм ида жь сәре 3 пеһʹәсийан, нет-ԛьрара Хԝәде әԝ ә, ԝәки әʹрд бь тʹәмамийе бьбә щьнәт. Ләма жи мәрьвед мәйә незик, гава бенә сахкьрьне ԝе ль щьнәте сәр әʹрде бьжин, кʹидәре ида шәрʹ, зӧлми у нәхԝәши ԝе тʹӧнә бьн. Ль вьр сәр әʹрде, әԝана ԝе бькарьбьн һʹәта-һʹәтайе бьжин, у бь рʹастийе жи бәхтәԝар бьн.

17. Кʹижан мәри ԝе бенә сахкьрьне?

¹⁷ Ле гәло, кʹи ԝе бе сахкьрьне? Дь Кʹьтеба Пирозда ӧса ньвисар ә: «Һʹәмуйед тʹьрбада ԝе дәнге ԝи [Иса] бьбьһен» у «ԝе . . . рʹабьн» (Йуһʹәнна 5:28, 29). Дь Кʹьтеба Әʹйанти 20:13-да жи те гьликьрьне: «Бәʹре мьрийед хԝә дан, Мьрьне у Дийаре Мьрийа жи мьрийед хԝә дан». Бь ве йәке әм фәʹм дькьн, кӧ һʹәчʹи зәʹф жь мьрийа ԝе рʹабьн. (Зедә әʹламәти дәрһәԛа «Дийаре Мьрийа» бьньһерʹә ль сәр рʹупʹела 212-213.) Демәк мәзәле һʹәму мьрийа ԝе бенә валакьрьне. Һʹәму мәри, йед кӧ мьрьнә, диса вәгәрʹьн жийине. Паԝлосе шанди дәрһәԛа ве йәке гот: «Һʹәму һәԛ у нәһәԛе жь мьрьне рʹабьн» (Кʹаред Шандийа 24:15). Ле әв йәк чь те һʹәсабе?

18. Кʹи нә мәрьвед «һәԛ», йед кӧ бенә сахкьрьне, у әв гӧмана сахкьрьне жь чь тә аза дькә?

¹⁸ Мәрьвед «һәԛ», әв һәнә мәрийед рʹаст, дәрһәԛа кʹижана әм дь Кʹьтеба Пирозда пеһʹәсийан, йед кӧ пешийа буйина Иса Мәсиһ дьман. Һәла дьшьрмиш бә дәрһәԛа Нӧһ, Бьраһим, Сара, Муса, Рʹутʹ, Әстәр у диса гәләк мәрьвед дьн. Дәрһәԛа һьнә жь ван мәрийед амьн, дь кʹьтеба Ибрани сәре 11-да те гьликьрьне. Мәрьвед «һәԛ», ӧса жи тенә һʹәсабе әԝ ԛӧльхкʹаред Йаһоԝа, йед кӧ ида дь ԝәʹде мәда мьрьнә. Бь сайа гӧмана сахкьрьне, тьрса мә бәр мьрьне тʹьнә (Ибрани 2:15).

19. Кʹи нә «нәһәԛ» у Йаһоԝа бь рʹәʹмтийа хԝә чь мәщале дьдә ԝан?

¹⁹ Ле пьрсәк пешда те: әԝ мәрьвед кӧ Хԝәдерʹа ԛӧльх нәкьрьнә у мьрьнә, ле һʹале ԝан ԝе ча бә? Әв милйарда мәрьвед «нәһәԛ» жь алийе Йаһоԝа Хԝәдеда ԝе нәйнә бир кьрьне. Әԝана жи ԝе бенә сахкьрьне у мәщале бьстиньн, ԝәки һин бьн дәрһәԛа Хԝәде у ԝирʹа ԛӧльх кьн. Нава һʹәзар  сала әв һʹәму мьри ԝе бенә сахкьрьне у бькарьбьн бь шабуне тʹәви мәрьвед дьн, амьн Йаһоԝарʹа ԛӧльх кьн. Әв рʹасти жи ԝе зәманәки хԝәш бә. Әв ԝәʹдә дь Кʹьтеба Пирозда те навкьрьне «Рʹожа Ахрәте». *

20. Чь йә «гәәнна», у кʹи дькʹәвә ль гәәннайе?

²⁰ Ле әв йәк те һʹәсабе, ԝәки һәр кәс жь мәрийа йед кӧ ль сәр әʹрде дьман, ԝе бенә сахкьрьне? На. Дь Кʹьтеба Пирозда ньвисар ә, ԝәки һьнә жь мьрийа, дь «щәʹньмеда» ньн (Луԛа 12:5). Дь һьнә ԝәлгәрʹандьнед Кʹьтеба Пирозда хәбәра Ибрани «гәәнна», йан жи бь зьмане Йунани «гәәнна», һатийә тʹәрщьмәкьрьне «щәʹньм». Мәсәлә бәре, гәәна наве щийе гәмаре бу, йе кӧ пьшт диԝаре Оршәлиме бу. Ль ԝьр щьнйаз у щурʹә-щурʹә бәрмайи дьшәԝьтандьн. Ле тʹәне щьнйазе ԝан мәрьва давитьнә гәәннайе, йед кӧ нә һежайи дәфьнкьрьне бун у нә жи сахкьрьне. Ләма жи хәбәра гәәнна бь симболике те һʹәсабе ԛьркьрьна һʹәта-һʹәтайе. Рʹаст ә Иса Мәсиһ ԝе диԝана мәрьвед сах у мьри бькә, ле һʹакьме һәри жорьн дьминә Йаһоԝа (Кʹаред Шандийа 10:42). Йаһоԝа тʹӧщар сах накә ԝан мәрьва, йед кӧ зӧлм у хьраб ьн, у нахԝазьн хԝә бьгӧһезьн.

21, 22. (а) Чь те һʹәсабе «рʹабуна мьрийайә пешьн»? (б) Кʹи бу йе пешьн, кӧ ча кәсе рʹӧһʹани һатә сахкьрьне?

²¹ Дь Кʹьтеба Пирозда ӧса жи те гьликьрьне дәрһәԛа сахкьрьна мәрийа, йед кӧ ль сәр әʹзмана ԝе бьжин ча кәсед рʹӧһʹани (Әʹйанти 20:6). Дәрһәԛа сахкьрьна ӧса дь Кʹьтеба Пирозда тʹәне мәсәләк һәйә, әв һәйә мәсәлә Иса Мәсиһ.

²² Гава Иса Мәсиһ мьр, Йаһоԝа нәһишт, ԝәки Кӧрʹе ԝи дь Тʹьрбеда бьминә (Зәбур 16:10; Кʹаред Шандийа 13:34, 35). Йаһоԝа жь мьрьне Иса рʹакьр, ле әԝ ида ча мәрьв нибу. Пәтрусе шанди әве йәке шьровәдькә: «Әԝ алийе бәдәнида һатә кӧштьне, ле алийе рʹӧһʹанида жийинерʹа һатә вәгәрʹандьне» (1 Пәтрус 3:18). Бь рʹастийе жи әв кʹәрәмәтәкә  мәзьн бу. Иса пашда вәгәрʹийа ль жийине, ле ида ча кәсе рʹӧһʹани у ԛәԝат! (Бьхунә 1 Корьнтʹи 15:3-6.) Иса йе пешьн ә жь ԝан, кʹижани ԛәдрәки ӧса стандьнә, демәк ви щурʹәйи һатьнә сахкьрьне. Чьмки хенщи Иса диса кәсед ӧса һәбун, йед кӧ ԛәдрәки ӧса гәрәке бьстандана (Йуһʹәнна 3:13).

23, 24. Кʹи дькʹәвә нава кʹома «кәрийе пези бьчʹук», у һʹәсабе ԝан чьԛас ә?

²³ Иса заньбу, кӧ паши рʹабуна жь мьрьне, әԝе зутьрәке вәгәрʹә ль әʹзмана. Ләма жи пешийа мьрьна хԝә әԝи готә шагьртед хԝә, кӧ әԝ дьчә ԝанарʹа «щи һазьр» кә (Йуһʹәнна 14:2). Мәри йед кӧ бьчуна ль әʹзмен, Иса ԝана нав дькә ча «кәрийе пези бьчʹук» (Луԛа 12:32). Ле гәло, чьԛас ьн йед дькәʹвьнә нава ве кʹӧма бьчʹукә мәсиһийед амьн? Йуһʹәннайе шанди әве йәке дь кʹьтеба Әʹйанти 14:1-да ԝа шьровәдькә: «Паше мьн дина хԝә дайе, ва Бәрх [Иса Мәсиһ] ль сәре чʹийайе Сийоне сәкьни бу у сәд чьл чар һʹәзар мәрьв тʹәви ԝи бун, кӧ ль сәр әʹнийа ԝан наве ԝи у наве Баве ԝи ньвисар бун».

²⁴ Әв 144 000 мәсиһийед амьн ԝе бенә сахкьрьне сәва кӧ ль әʹзмана бьжин. Дь нав ԝанда ӧса жи шагьртед Исайә пешьн һәнә, йед кӧ шанди тенә навкьрьне. Ле әв сахкьрьн ԝе кʹәнге дәстпебә? Паԝлосе шанди гот, ԝәки әв йәк ԝе бьԛәԝьмә рʹожа һатьна Иса Мәсиһ (1 Корьнтʹи 15:23). Һатьна Иса, әв те һʹәсабе ԝәʹдә чахе Иса ԝе дәстпекә сәрԝертийе бькә. Әм ида дь ԝәʹде һатьна Иса Мәсиһда дьминьн. Дәрһәԛа ве йәке әме дь сәре 9-да һур бь һур пебьһʹәсьн. Ләма жи рʹожа иройин жь ԝан 144 000 мәрьва, кʹи кӧ дьмьрә, перʹа-перʹа те сахкьрьне сәва жийина ль әʹзмана (1 Корьнтʹи 15:51-55). Ле әʹлаләтәкә мәзьн ԝе бенә сахкьрьне, сәва кӧ ль щьнәте сәр әʹрде бьжин.

25. Дь сәре майинда әме дәрһәԛа чь хәбәр дьн?

²⁵ Бәле, Йаһоԝа бь рʹастийе жи дьжмьне мә, демәк мьрьне, ԝе бьдә һьлдане! (Бьхунә Ишайа 25:8.) Ле ньһа дьбәк жи пьрсәк бал тә пешда те: ‹Сәва чь һьнәк жь мәрьва, гәрәке ль әʹзмана бьжин?› Сәва кӧ жь әʹзмана пʹадшатийе бькьн. Дәрһәԛа ве йәке, һе зедә әме дь сәре майинда пебьһʹәсьн.