1-3. Mmuena lukuna kayi udi utuipata? Bua tshinyi kulonga tshidi Bible ulongesha kudi kutupa disulakana ndambu?

ELABI meji ne: muluishi webe udi wenda ukuipata lubilu. Mmukupite ku bukole ne ku lubilu. Udi mumone mudiye mushipe bamue balunda bebe kayi ne luse to. Nansha muudi unyema bikole, udi wenda usemena pabuipi nebe. Kuena kabidi ne tshiudi mua kuenza to. Kadi udi umona diakamue munga muntu ulua bua kukusungila. Udi ne bukole bupite bua muena lukuna eu kule ne kule, ne udi ukuambila ne: mmulue bua kukupandisha. Neumvue bishi? Mioyo ya munda itukija, ki mmuomu anyi?

² Mu mushindu kampanda, muluishi kansanga udi utuipata tuetu bonso. Tudi balonge mu Nshapita 6 mudi Bible ubikila lufu ne: muluishi. Kakuena muntu udi mua kulupita bukole to. Ba bungi bakadi bamone muluishi eu ushipa bantu badibu banange. Kadi Yehowa mmupite lufu bukole kule ne kule. Yeye ke Mupandishi ukadi mumane kuleja ne: udi mua kutshimuna muena lukuna eu. Mmulaye bua kuenza muluishi eu tshia musangu umue. Bible udi ulongesha ne: ‘Muena lukuna wa ndekelu udiye ujimija ndufu.’ (1 Kolinto 15:26) Ki ndumu luimpe anyi?

 ³ Tuanji kumonayi mututu tumvua patu lufu lutukuata. Kuenza nanku nekutuambuluishe bua kumvua bimpe bualu kampanda buatusankisha. Yehowa mmulaye bua kupeshilula bafue muoyo. (Yeshaya 26:19) Bushuwa, bafue nebajuke ku lufu. Ke diteke mena didi Nzambi utupesha edi.

4. (a) Bua tshinyi tshilejilu tshia Yezu tshidi tshituleja mutu Yehowa umvua patu muntu ufua? (b) Yezu wakadia bulunda ne banganyi?

⁴ Ukadiku mufuishe muntu anyi? Dibungama, kanyinganyinga ne dipanga dia tshia kuenza bitu bitushikija muoyo wa munda. Dîba dia nunku, Dîyi dia Nzambi didi ditusamba. (2 Kolinto 1:3, 4) Bible udi utuambuluisha bua kumvua mudi Yehowa ne Yezu bumvua padi muntu ufua. Yezu mmufuanangane ne Tatuende bikole, uvua mumanye lutatu lutudi nalu patudi tufuisha. (Yone 14:9) Tshilejilu, pavua Yezu uya mu Yelushalema, uvua uya kutangila Lazalo ne bayayende Mariya ne Mata mu musoko wa Betania uvua pabuipi apu. Bakalua balunda bende banene. Bible udi wamba ne: “Yezu uvua munange Marta ne muanabu wa bakaji, ne Lazare kabidi.” (Yone 11:5, MMM) Kadi anu bu mutudi bamone mu Nshapita 6, Lazalo wakafua.

5, 6. (a) Pakamona Yezu bena dîku dia ba Lazalo ne balunda bende badila, wakenza tshinyi? (b) Dibungama dia Yezu didi ditukankamija munyi?

⁵ Mmunyi muakumvua Yezu pakafua mulunda wende eu? Bible udi wamba ne: Yezu wakaya mu musoko wa ba Lazalo, kusangana balela ne balunda badila. Biakamubungamija bikole. ‘Wakashikunka ne muadi, lungenyi luende kulubakana.’ Pashishe Bible udi wamba ne: “Yezu kudilaye.” (Yone 11:33, 35, MMM) Bu muvua Yezu mudile mbuena kuamba ne: kavua ne ditekemena anyi? Tòo, bualu uvua mumanye ne: kuvua tshishima tshikavua pa  kuenzeka. (Yone 11:3, 4) Nansha nanku, wakumvua dibungama ne kanyinganyinga katu lufu lukebesha.

⁶ Mu ngumvuilu kampanda, kanyinganyinga ka Yezu kadi katukolesha ku muoyo. Kadi katuleja ne: Yezu ne Tatuende Yehowa kabatu basue lufu to. Kadi Yehowa Nzambi udi mua kutshimuna muena lukuna eu! Tuanji kumona tshivua Nzambi muambuluishe Yezu bua kuenza.

7, 8. Bua tshinyi bantu kabavua kabidi ne tshia kuenza pakafua Lazalo? Kadi Yezu wakenza tshinyi?

⁷ Bu muvuabu bajiike Lazalo mu lubuebue, Yezu wakabambila bua bumushe dibue divuabu bajike ku mushiku. Mâta wakabenga bualu Lazalo ukavua mubole bu mukavuaye muenze matuku anayi. (Yone 11:39) Bua lungenyi lua buntu, kabavua kabidi ne tshia kuenza to.

⁸ Kadi kumushabu dibue, Yezu kuela dîyi dikole ne: ‘Lazalo, patuka!’ Tshiakenzeka ntshinyi? ‘Mufue wakapatuka.’ (Yone 11:43, 44) Elabi meji muvua bantu basanke! Bavua bamanye ne: muakunyabu, mulela wabu, mulunda wabu anyi muena mutumba nabu eu uvua mufue. Muntu uvuabu banange, nyeye eu kabidi ne muoyo! Tshivua bualu bua dikema! Kakuyi mpata, bantu ba bungi bakela Lazalo mu tshitupa. Nzambi wakatshimuna lufu bushuwa!

9, 10. (a) Mmunyi muakaleja Yezu kuvua bukole bua kujula Lazalo bufumine? (b) Tudi mua kupeta tshinyi patudi tubala malu aa mu Bible?

⁹ Kadi Yezu kakamba ne: yeye ke uvua muenze tshishima etshi to, bualu kumpala kua kubikilaye Lazalo, wakasambila uleja ne: Yehowa ke uvua ne bua kumujula. (Yone 11:41, 42) Yehowa kavua mujule muntu ku lufu anu musangu umue eu to. Bible udi wakula bua bantu tshitema tshijima batu Nzambi mujule ku lufu. * Kubala ne  kukonkonona bishima ebi nekutusankishe. Bidi bitujadikila ne: Nzambi kêna ne kansungasunga to, bualu ku bantu bavuaye mujule kuvua bakulumpe ne bana, balume ne bakaji, bena Isalele ne bena bisamba bikuabu. Miyuki eyi ivua ileja muakasanka bantu bikole. Tshilejilu, pakabisha Yezu muana wa bakaji kampanda, baledi ba muana ‘bakakema bikole.’ (Mâko 5:42) Bushuwa, Yehowa wakabenzela bualu buvuabu kabayi mua kupua muoyo to!

¹⁰ Eyowa, bantu bavua Yezu mujule ku lufu bakafua kabidi. Bidi biumvuija ne: kabivua bikengela kubajula anyi? Tòo. Bishima ebi bidi bishindika malongesha a mu Bible ne bitupesha ditekemena.

11. Mmunyi mudi dijuka dia Lazalo ku lufu dishindika bulelela budi mu Muambi 9:5?

¹¹ Bible udi ulongesha ne: bafue ‘kabena bamanye bualu nansha bumue to.’ Kabena ne muoyo ne kabena benza malu muaba kampanda nansha. Ke tshidi muyuki wa Lazalo uleja. Pakajuka Lazalo ku lufu, wakumvuija bantu mutu mu diulu anyi? Wakalonda mutu bantu bakenga mu mudilu wa inferno anyi? Tòo, Bible kêna wamba nanku to. Mu matuku onso anayi au, ‘kavua mumanye bualu nansha bumue to.’ (Muambi 9:5) Lazalo uvua mulale tshianana tulu tua lufu.​—Yone 11:11.

12. Bua tshinyi tudi tuamba ne: Lazalo wakajuka ku lufu?

¹² Bualu bua Lazalo budi kabidi butulongesha ne: dibika dia bafue mbualu bulelela. Bantu ba bungi bavuapu pavua Yezu mujule Lazalo. Nansha balombodi ba bitendelelu bavua bakine Yezu kabakavila tshishima etshi to. Bakafika too ne ku diamba ne: ‘Muntu eu udi wenza bishima bia bungi, netuenze tshinyi?’ (Yone 11:47) Bantu bavule bakaya bua kumona Lazalo. Ke bualu kayi bantu ba bungi bakitabuja Yezu. Pavuabu bamona Lazalo ne muoyo, bavua bitaba ne: Nzambi ke uvua mutume Yezu. Bua kuleja muvua bualu  ebu bunene, bamue balombodi ba bitendelelu ba muoyo mubi bakakeba bua kushipa Yezu ne Lazalo bonso babidi.​—Yone 11:53; 12:9-11.

13. Bua tshinyi tudi tuitaba ne: Yehowa neajule bafue?

¹³ Kuitaba ne: bafue nebajuke nkupanga lungenyi anyi? Tòo, bualu Yezu wakalongesha ne: dimue dituku, ‘bonso badi mu nkita ya tshivulukilu’ nebajuke. (Yone 5:28, NW) Yehowa ke udi mufuke bintu bionso bidi ne muoyo. Mbikole bua kuitaba ne: udi mua kupeshilula muntu muoyo kabidi anyi? Kadi bionso nebienzeke bilondeshile tshidiye mulame mu lungenyi. Nzambi udi mua kuvuluka bantu batudi bafuishe anyi? Ela meji ne: nansha mudi mitoto bungi tshianana, Nzambi mmupeshe mutoto wonso dîna! (Yeshaya 40:26) Nunku, Yehowa udi mua kuvuluka ne mu katoba bantu batudi bafuishe, ne udi mua kubapingaja ku muoyo.

14, 15. Anu bu mudi mêyi a Yobo aleja, Yehowa utu ujinga kujula bafue anyi?

¹⁴ Kadi Yehowa utu musue bua kujula bantu ku lufu anyi? Bible udi wamba ne: mmusue kujula bafue. Yobo muntu wa Nzambi wakebeja ne: ‘Biafua muntu, udi mua kupingana ne muoyo tshiakabidi anyi?’ Yobo uvua wakula bua mushindu uvuaye mua kuindila mu lukita too ne dîba divua Nzambi mua kumuvuluka. Wakambila Yehowa ne: ‘Wewe neumbikile ne meme nengitabe kuudi; wewe neunjinge, meme mudimu wa bianza biebe.’​—Yobo 14:13-15.

¹⁵ Anji elabi meji! Yehowa udi ujinga bua kupingaja bafue ku muoyo! Patudi tumanya bualu ebu kabienaku bitusankisha bikole anyi? Kadi mbanganyi babishabu, ne nebikale penyi?

16. Pajulabu bafue, nekuikale nsombelu kayi pa buloba?

¹⁶ Miyuki ya bantu bavuabu bajule idi Bible ulonda idi ituambila malu a bungi bua tshienzekela bafue kumpala  eku. Bantu bakajulabu ku lufu bakapetangana ne balela ne balunda babu. Dibika dia bafue didi kumpala eku nedikale anu mushindu umue, kadi diodi nditambe buimpe. Anu bu mutuvua bamone mu Nshapita 3, Nzambi mmusue ne: buloba bujima bulue mparadizu. Nunku bafue nebabike pa buloba kapayi mvita, bilumbu ne masama. Nebasombe bua kashidi mu ditalala ne mu masanka pa buloba apa.

17. Mbantu bungi kayi bajuka ku lufu?

¹⁷ Nebajule banganyi? Yezu wakamba ne: ‘Bonso badi mu nkita ya tshivulukilu nebumvue dîyi dia Yezu, nebapatuke.’ (Yone 5:28, 29, NW) Buakabuluibua 20:13 udi pende wamba ne: ‘Mâyi manene kabidi, akapatula bafue bavuamu, ne lufu ne Muaba wa Bafue biakapatula bafue bavuamu.’ “Muaba wa Bafue” anyi Hades ke lukita lua bukua-bantu. (Tangila Tshisakidila “Muaba wa bafue ntshinyi?”) Lukita elu nelushale munda mutupu. Miliyare ne miliyare ya badimu nebapatuke. Muposotolo Paulo wakamba ne: ‘Dibika dia bafue nedikaleku, ne dia bakane ne dia badi kabayi bakane.’ (Bienzedi 24:15) Bidi biumvuija tshinyi?

18. “Bakane” bikale mua kujuka ku lufu mbanganyi? Mmunyi mudi kumanya ne: bafue nebabike kukuambuluisha?

¹⁸ Munkatshi mua “bakane” aba Bible udi utela kabidi bantu bavua ne muoyo kumpala kua Yezu kulua pa buloba bu mudi: Noa, Abalahama, Sala, Mose, Luta, Esetê ne bakuabu bavule. Ebelu nshapita wa 11 udi wakula bua bamue ba ku bantu bavua ne ditabuja dikole. Kadi basadidi ba Yehowa badi bafua lelu’eu badi pabu munkatshi mua “bakane” aba. Wewe witaba ne: bafue nebabike, kuakutshina lufu to.​—Ebelu 2:15.

19. “Badi kabayi bakane” mbanganyi? Mpunga kayi udi Yehowa ubapesha ne dinanga dionso?

¹⁹ Kadi ntshinyi tshienzekela bantu bavua kabayi benzele Yehowa mudimu anu bualu kabavua bamumanye? Nzambi kakupua miliyare ya bantu “badi kabayi bakane” aba  muoyo to. Bobu pabu nebabike bua kulonga bua kumanya Nzambi mulelela ne kumukuatshila mudimu. Munkatshi mua bidimu tshinunu, bafue nebabike, nebapetangane ne bena lulamatu badi pa buloba bua kuenzelabu Yehowa mudimu bonso pamue. Netshikale tshikondo tshimpe be! Ke tshikondo tshitu Bible ubikila ne: Dituku dia Dilumbuluisha. *

20. Ngena ntshinyi, ne mbanganyi badi bayamu?

²⁰ Mbuena kuamba ne: Nzambi neabishe muntu yonso anyi? Tòo. Bible udi wamba ne: bamue bafue badi mu “Ngena.” (Luka 12:5) Bavua babikila diala dinene divua pambelu pa Yelushalema kale ne: Ngena. Bavua bimanshamu bitalu ne butshiafu. Bitalu bivuabu bimansha mu Ngena eu bivua bia bantu babi bavua bena Yuda bamona se: kabavua bakumbanyine kubajiika ne kubabisha ku lufu to. Ke bualu kayi Ngena mmukumbanyine kuikala tshimfuanyi tshia kabutu ka tshiendelele. Kadi nansha mudi Yezu muikale ne mudimu kampanda mu dilumbuluisha ba muoyo ne bafue, Yehowa ke Mulumbuluishi udi ne dîyi dia ndekelu. (Bienzedi 10:42) Yehowa kêna mua kubisha bantu badiye umona ne: mbantu babi, kabayi mua kushintuluka to.

21, 22. (a) Ndibika kayi dikuabu didiku? (b) Nnganyi wa kumpala wakabishabu ne mubidi wa nyuma?

²¹ Bible udi kabidi wakula bua dibika dia ku lufu dia mushindu mukuabu, bua kulua ne mubidi wa nyuma mu diulu. Bible udi wakula amu bua muntu umue utu mujuke mu dibika edi, muntu au ke Yezu Kristo.

²² Pakashipabu Yezu, Yehowa kakamulekela mu lukita to. (Musambu 16:10; Bienzedi 13:34, 35) Yehowa wakamujula ku lufu, kadi ki mbu muntu wa mashi ne mâyi kabidi to.  Mupostolo Petelo udi wamba ne: Kristo ‘wakashipibua mu mubidi wende, kadi wakavuijibua ne muoyo mu nyuma.’ (1 Petelo 3:18) Tshivua tshishima tshinene bulelela! Yezu uvua ne muoyo kabidi bu muntu wa mubidi wa nyuma wa makanda a bungi! (1 Kolinto 15:3-6) Yezu ke muntu wa kumpala wakabishabu ne butumbi nunku. (Yone 3:13) Kadi kavua wa ndekelu to.

23, 24. “Kasumbu kakese” ka Yezu nkenza ne banganyi, ne nebikale banga?

²³ Yezu wakambila bayidi bende ba lulamatu kumpala kua kufuaye ne: ndi mpingana mu diulu bua “kunulongoluela muaba.” (Yone 14:2) Wakabikila bavua baya mu diulu aba ne: ‘kasumbu kakese.’ (Luka 12:32) Kasumbu aka nkenza ne bena Kristo ba lulamatu banga? Mupostolo Yone udi wandamuna mu Buakabuluibua 14:1 ne: ‘Ngakatangila, ne mona, Muana wa Mukoko muimane pa Mukuna wa Siona, ne bantu binunu lukama ne makumi anayi ne binayi bavua nende, bikale ne dîna diende ne dîna dia Tatu wende mafunda pa mpala pabu.’

²⁴ Mu bena Kristo 144 000 aba badi babika bua kuya mu diulu mudi bapostolo ba Yezu ba lulamatu. Bavua ne bua kutuadija kubika ku lufu dîba kayi? Mupostolo Paulo wakafunda ne: bavua ne bua kujuka tshikondo tshia dikalaku dia Kristo. (1 Kolinto 15:23) Nshapita wa 9 nealeje ne: tudi mu tshikondo atshi. Nunku, bashadile bakese ba ku bantu 144 000 badi bafua lelu badi babika diakamue bua kuya mu diulu. (1 Kolinto 15:51-55) Kadi bantu ba bungi nebabike bua kuikala ne muoyo mu Mparadizu pa buloba.

25. Netumone tshinyi mu nshapita udi ulonda eu?

²⁵ Bushuwa, Yehowa neajimije muluishi wetu lufu bua kashidi! (Yeshaya 25:8) Kadi udi mua kudiebeja ne: ‘Badi baya mu diulu nebaye kuenzamu tshinyi?’ Nebenze mbulamatadi wa Bukalenge bua mu diulu. Nshapita udi ulonda eu udi wakula bua mbulamatadi eu.