1-3. ¿Alkye ajqʼoj lepchitz qiʼj, ex tiʼ in qnaʼn qa ma qo xnaqʼtzan tiʼjju in tzaj tqʼamaʼn Tyol Dios?

NAQPE ximinxa qa lepchitz jun ajqʼoj tiʼja aju at mas tipumal (tbʼalor), ex mas nim bʼet twitza. Qa ma tzyeta tuʼn, ojtzqiʼn tuʼna qa mlay tzaj qʼaqʼin tkʼuʼj tiʼja, quʼn o tzikʼxi twitza tiʼj qa nim (bʼampo) qe tamiwoya o che kubʼ tbʼiyoʼn. Jniʼxku ojqelana (riniye) okx kpol kanin tiʼja ex mlay tzaqpaja tuʼn. Pero, ¿tiʼ jaku tnaʼya qa ma kanin jun onil teya aju at mas tipumal twitz ajqʼoj lu? ¡Jakule tzalaja tuʼn!

² Chʼixme aju in nikʼ tiʼja jaʼlo (jaʼla), at jun ajqʼoj lepchitz tiʼja. Nya oʼkx lepchitz tiʼja ax ikx lepchitz qiʼj qkyaqil. Ik tzeʼn ma qo xnaqʼtzan tiʼj toj xnaqʼtzbʼil ma kyaj, in tzaj tyekʼun Tyol Dios qa aju kyimen jun ajqʼoj jlu. Mi aʼlx jun qe jaku tzaqpaj tuʼn ex mi aʼlx jun qe jaku kubʼ ajqʼoj lu tuʼn, chʼixmi qkyaqilx o tzikʼ qwitz tiʼj tzeʼn tten in nel tiʼn tchwinqlal (tanqʼibʼil) jun xjal aju kʼujlaʼnxix quʼn. Atzunte Jehová at mas tipumal twitz kamik. Atzen jun tbʼanelxix kolilju qiʼj. O kubʼxi tyekʼun Jehová qa jaku kubʼ ajqʼoj lu tuʼn, nya oʼkxju, ax ikx in tzaj tqʼamaʼn qa ok kbʼel tnajsaʼn te jun majx (juneleʼx). In tzaj tqʼamaʼn Tyol Dios jlu: «Aju mankbʼil [moqa último] ajqʼoj tuʼn tkubʼ xitj, ate kamik» (1 Corintios 15:26). ¡Tbʼanel in tzaj qʼamaʼn tzalu!

 ³ Qo ximin chʼin tiʼj chyon in tzaj qiʼj tuʼn ajqʼoj lu. Iktzun kʼelel qnikʼ ex qo tzalajel tiʼjju in tzaj ttziyen Jehová: aju qa ok che jawil anqʼin kyimni (Isaías 26:19). Ok kxel tqʼoʼn Dios juntl maj kychwinqlal qeju o che kyim. Atzen qʼuqbʼil qkʼuʼj jlu in tzaj tqʼoʼn Dios.

4. a) ¿Tiquʼn jaku tzʼok qojtzqiʼn aju in tnaʼn Jehová qa ma qo xnaqʼtzan tiʼjju tnaʼ Jesús tej tkyim jun tamiw? b) ¿Alkyeqe e ok te tbʼanel tamiw Jesús?

⁴ ¿O kyimxi teya jun toj tja moqa jun tamiwoya aju kʼujlaʼnxix tuʼna? Atle maj kwest tuʼn tikʼx bʼis quʼn, ex jaku tzaj bʼaj qkʼuʼj tuʼnju mitiʼx (tiloʼ) jun tiʼ jaku bʼant quʼn. Atzen ambʼil jlu tuʼn qxiʼ jyol onbʼil toj Tyol Dios (kjawil uʼjit 2 Corintios 1:3, 4). In qo tzaj tonin Tyol Dios tuʼn tok qojtzqiʼn tiʼ in tnaʼn Jehová ex tiʼ in tnaʼn Jesús qa ma kyim jun xjal. Aju tnaʼ Jesús tej tkyim jun xjal kʼujlaʼntaq tuʼn, in tzaj tyekʼun aju in tnaʼn Jehová, quʼn ikxix te Jesús ik tzeʼn tTat (Juan 14:9). Aj t-xiʼtaq Jesús toj Jerusalén, in nikʼtaq kyja Lázaro, María ex Marta aʼyeju in che najantaq toj Betania aju toktaq nqayin (qayni) ttxlaj Jerusalén. Puro tbʼanel amiwqetaq, tuʼntzunju, in tzaj tqʼamaʼn Tyol Dios qa «kʼujlaʼnxix Marta tuʼn Jesús, tukʼix titzʼin tukʼix Lázaro» (Juan 11:5). Naqtzen tuʼnj kyim Lázaro ik tzeʼnj o xnaqʼtzan tiʼj toj xnaqʼtzbʼil 6.

5, 6. a) ¿Tiʼ tnaʼ Jesús tej tok tqʼoʼn twitz kyiʼj qeju in che oqʼtaq tiʼj Lázaro? b) ¿Tiquʼn in nok tqʼuqbʼaʼn qkʼuʼj aju tnaʼ Jesús tej tkyim Lázaro?

⁵ ¿Tiʼ tnaʼ Jesús tej tkyim tamiw? In tzaj tyekʼun Tyol Dios qa xiʼ Jesús atz jatumel ateʼtaq toj tja Lázaro ex qe tamiw, aqeju in che oqʼtaq tiʼj. Tej tok tqʼoʼn Jesús twitz kyiʼj, «tzaj taʼw tuj tanmi tuʼn tbʼis» ex «jawtzun oqʼ» (Juan 11:33, 35). ¿Tiquʼn tzaj nim tbʼis Jesús? ¿Bʼaqa mitiʼtaq qʼuqbʼil tkʼuʼj at? Attaq qʼuqbil tkʼuʼj. Axpe ikx bʼiʼntaq tuʼn qa attaq jun tbʼanel chʼixtaq tikʼ (Juan 11:3, 4). Pero tzajx tbʼis tuʼnju kʼixkʼej in tzaj kyiʼj xjal tuʼn kamik.

 ⁶ In tzaj tqʼuqbʼaʼn qkʼuʼj aju tnaʼ Jesús tej tkyim Lázaro. A jlu in tzaj tyekʼun qa in nel tikʼen Jesús ex Jehová aju kamik. Nya oʼkxju, axpe ikx at tipumal Jehová tuʼn tkubʼ ajqʼoj lu tuʼn. Qo xnaqʼtzan tiʼ bʼant tuʼn Jesús tukʼeju ipumalj tzaj tqʼoʼn Dios te.

7, 8. ¿Tiquʼn kubʼ kyximan nim xjal qa melaytaq jaw anqʼintl Lázaro, naqtzen tuʼnj, tiʼ bʼant tuʼn Jesús?

⁷ Tej otaq tzʼokx qʼoʼn Lázaro toj jun jul, xi tqʼamaʼn Jesús tuʼn tel qʼiʼn abʼj ttziʼ jul. Nyataq taj (tgan) Marta tuʼn tel iqʼin abʼaj ttzi jul, tuʼnju otaq tzikʼ kyaje qʼij tkyimlen Lázaro, ya chʼixtaqle tkubʼ qʼay t-xmilal (tchibʼjil) (Juan 11:39). Toj kywitz xjal, ya mlaytaq jaw anqʼintl Lázaro.

⁸ Tej tel kyiʼn xjal abʼj ttziʼ jul, jaw ẍchʼin Jesús tukʼe nim tqʼajqʼajel twiʼ: «Tetza, Lázaro». ¿Tiʼ bʼaj tej t-xi tqʼamaʼn Jesús jlu? «Etztzun aju otoq kyim.» (Juan 11:43, 44.) Qa ma kubʼ tena ximil tiʼj jlu, ¿tiʼtzulo kynaʼ kykyaqil xjal? Ojtzqiʼntaq kyuʼn tanabʼ, kyuʼn toj tja ex kyuʼn tamiw qa otaq kyim Lázaro; pero ¡o che tzalaj tej tjaw anqʼin juntl maj tuʼnju kʼujlaʼnxixtaq kyuʼn! Ikxix tzeʼn jun witzikʼ ela toj kywitz. Nimle xjal e ok ten chlelte tuʼnju in che tzalajtaq wen. A jlu in tzaj tyekʼun qa, ¡at tipumal Jehová tuʼn tel tiʼn kamik!

9, 10. a) ¿Alkye tten kubʼ tyekʼun Jesús qa Tuʼn Jehová jaw anqʼin Lázaro? b) Qa ma qo xnaqʼtzan kyiʼj txʼolbʼabʼil lu, ¿tzeʼn jaku che onin qiʼj?

⁹ Mitiʼ te Jesús tqʼama qa tuʼn otaq jaw anqʼin Lázaro. Tej naʼmxtaq t-xi t-ẍchʼiʼn Jesús Lázaro, tnejel ok ten naʼl Dios, iktzun tten kubʼ tyekʼun qa Tuʼn Jehová jaku che jaw anqʼin qe kyimni (kjawil uʼjit Juan 11:41, 42). Nya oʼkx maj jlu jaw anqʼin jun xjal tuʼn Jehová. In tzaj t-xnaqʼtzaʼn Tuʼjil Tyol qa e jaw anqʼin wajxaqtl xjal tuʼn. * Nim in qo tzalaj aj qxnaqʼtzan  kyiʼj qeju texto lu. Aqe texto lu, in tzaj kyyekʼun qa junx in qo ela qkyaqil toj twitz Dios, quʼn e jaw anqʼin qe xinaq (ichan) ex xuʼj tuʼn, te jteʼxku abʼqʼi iqʼintaq kyuʼn ex te alkyexku tnam qe. Aʼyeju txʼolbʼabʼil lu in tzaj kyyekʼun qa, ¡nimxix e tzalaj qeju xjal tuʼn jlu! Jun techel, aju tej tjaw anqʼin jun txin tuʼn Jesús, «nim e jaw labʼin [ttat] tej kykeʼyinte jlu» (Marcos 5:42). O che tzalajxix tuʼnju bʼent tuʼn Jehová, a jlu mlaytaq tzikʼ tnaʼl kyuʼn.

¹⁰ Tej tbʼet ambʼil e kyim juntl maj qeju xjal e jaw anqʼin tuʼn Jesús. ¿Jaku txi qqʼamaʼn qa mitiʼ tajbʼen aju bʼant tuʼn Jesús? At tajbʼen. Quʼn aqeju txʼolbʼabʼil lu, in tzaj kyyekʼun aju axix (bʼanax) xnaqʼtzbʼil tiʼj kyimen ex in tzaj kyqʼuqbʼaʼn qkʼuʼj.

11. ¿Tzeʼn in tzaj tyekʼun aju tej tjaw anqʼin Lázaro aju tkuʼx toj Eclesiastés 9:5?

¹¹ In tzaj tyekʼun Tyol Dios qa aʼyeju «xjal kyimni qe, mintiʼ bʼaʼn kyuʼn», toj juntl yol, mitiʼ o cheʼx anqʼil toj juntl plaj ex mitiʼtl in che ximen. Aju tej tjaw anqʼin Lázaro in tzaj tyekʼun qa ik in bʼajju. Tej tjaw anqʼin Lázaro, ¿xi tqʼamaʼn kye xjal qa otaq ten toj kyaʼj? Moqa ¿ok ten xobʼsal kye xjal qa otaq ten toj qʼaqʼ? Mitiʼ. Mitiʼ te Tyol Dios in yolin tiʼj jlu. Tej tten Lázaro kyaje qʼij kyimni ‹mintiʼtaqtl naʼn tuʼn› (Eclesiastés 9:5). Naq otaq tzikʼ jtan tuʼn kamik (Juan 11:11).

12. ¿Tiquʼn jaku tzʼok qʼuqeʼ qkʼuʼj qa jaw anqʼin Lázaro?

¹² Aju ikʼ tiʼj Lázaro nya naq jun txʼolbʼabʼil jlu, quʼn ikxix bʼajju. Jaw anqʼin Lázaro tuʼn Jesús kywitz nimku xjal. Nixqepe nejenel kye okslal (nimil) mitiʼ kubʼ kyewin jlu, ex ikʼentaqtzen twitz Jesús kyuʼn. Kyqʼamape jlu: «¿Alkye kbʼantel quʼn? Porque ate xjal lu nimku señ in bʼant tuʼn» (Juan 11:47). Nim xjal eʼx kaʼyil te Lázaro aju otaq jaw anqʼin ex tuʼn jlu ok qʼuqeʼ kykʼuʼj tiʼj Jesús. Tuʼnju jaw anqʼin Lázaro el  kynikʼ qa tuʼn Dios otaq tzaj samaʼn Jesús. Elxix kynikʼ xjal tiʼj jlu, tuʼntzen jlu e ok ten qeju nya bʼaʼn nejenel kye okslal jyol tumel tuʼn tkubʼ kybʼiyoʼn Jesús ex Lázaro (Juan 11:53; 12:9-11).

13. ¿Tiquʼn qʼuqli qkʼuʼj qa ok che jawil anqʼin juntl maj kyimni tuʼn Jehová?

¹³ ¿Jaku tzʼok qʼuqeʼ qkʼuʼj qa ok che jawil anqʼin juntl maj kyimni? Jaku, quʼn tqʼama Jesús qa «kykyaqil xjal maquʼn» che jawitz anqʼin toj muqbʼil (Juan 5:28). Quʼn a Jehová kubʼ Bʼinchante tkyaqil chwinqlal, ¿jaku kubʼ qximin qa kwest tuʼn t-xi tqʼoʼn juntl maj kychwinqlal xjal? A jlu at toklen tukʼeju tnabʼil Jehová. ¿Jakupetzele che tzaj tnaʼn Jehová qeju toj qja o che kyim? Ximana tiʼj jlu: ¡tojtzqiʼn Dios kybʼi kykyaqil cheʼw aʼyeju melayx bʼant kyajlet ex teyelex te junjun tok tbʼi tuʼn! (Isaías 40:26.) Jaku tzaj tnaʼn Jehová tzeʼn qe xjal o che kyim, ax ikx tajbʼil (tgan) tuʼn t-xi tqʼoʼn juntl maj kychwinqlal.

14, 15. ¿Alkye yekʼbʼil at qa tajbʼil Jehová tuʼn kyjaw anqʼin juntl maj kyimni ik tzeʼnj tqʼama Job?

¹⁴ In tzaj tqʼamaʼn Xjan Uʼj (Biblia) qa tajxix Jehová tuʼn kyjaw anqʼin juntl maj kyimni tuʼn. ¿Tzeʼn jaku tzʼok qʼuqeʼ qkʼuʼj tiʼj jlu? Jun ajbʼel te Jehová aju Job tbʼi, tqʼama jlu: «Qa ma kyim jun xjal, ¿kʼanqʼilpelo juntl maj?». In yolintaq Job qa oktaq kbʼel tayoʼn toj muqbʼil tzmaxi ajtaq ttzaj naʼn tuʼn Dios. Tuʼntzun jlu xi tqʼamaʼn Job te Jehová: «Jakulo chin txkete tuʼna ex jakulo txi ntzaqʼweʼne, ex jakulo chin tzaj t-xtalina, porque taqʼunbʼenx tqʼabʼa qine» (Job 14:13-15).

¹⁵ Ximana tiʼj jlu: tajbʼil Jehová tuʼn kyjaw anqʼin juntl maj kyinmi tuʼn. A jlu in tzajxix tqʼuqbʼaʼn qkʼuʼj. Pero, ¿alkye tten che jawil anqʼin kyimni toj ambʼil tzul? ¿Alkyeqe che jawitz anqʼin, ex jatumel?

16. ¿Tzeʼn kyanqʼibʼil xjal ktel aj kyjaw anqʼin juntl maj?

¹⁶ Qa ma qo xnaqʼtzan kyiʼj txʼolbʼabʼil ateʼkuʼx toj Tyol  Dios, aʼyeju in che yolin kyiʼj qeju xjal e jaw anqʼin ojtxe, in nok qojtzqiʼn tiʼ kbʼajel toj ambʼil tzul. Aqeju xjal e jaw anqʼin, e ten juntl maj kyukʼe toj kyja tzalu twitz Txʼotxʼ. Chʼixmi ik kbʼajelju aj kyjaw anqʼin kyimni toj ambʼil tzul, naqtzen tuʼnj mas tbʼanel. Ik tzeʼn o xnaqʼtzan tiʼj toj xnaqʼtzbʼil 3, ok kbʼel tbʼinchen Dios Txʼotxʼ te jun tbʼanel najbʼil. Tuʼntzun jlu, ya melay tentl nimaq qʼoj, bʼiybʼel ex yabʼil aj kyjaw anqʼin juntl maj kyimni. Oktzen che tzalajel ex ok ktel mujbʼabʼil kyxol te jun majx tzalu twitz Txʼotxʼ.

17. ¿Jniʼ xjal che jawil anqʼin juntl maj?

¹⁷ ¿Alkyeqe che jawitz anqʼin? Tqʼama Jesús qa «kykyaqil xjal maquʼn [...] che jawitz anqʼin tuj muqbʼil» (Juan 5:28, 29). Ax ikx in tzaj tqʼamaʼn Apocalipsis 20:13 kyjalu: «Ex xi tqʼoʼn mar qe kyimni ateʼ tuj; ex ju kamik tukʼix ju kynajbʼil kyimni [háides toj yol griego] xi kyqʼoʼn qe kyimni ateʼ kyuj». (Bʼaʼn tuʼn tkux tjyoʼna chʼintl xnaqʼtzbʼil tok tbʼi: «¿Tiʼ kyxilen qeju yol Seol ex Hades?».) Aj kyjaw anqʼin nimxix xjal aʼyeju in che ajlan toj Hades, ok kjel mitiʼtl toj. Tqʼama apóstol Pablo jlu: «Ok che jawil anqʼin qe kyimni, tzaʼnx qeju tzʼaqlxix, ax ikx qeju mya tzʼaqlxix» (Hechos 24:15). ¿Tiʼ kyxilen qeju yol lu?

18. ¿Alkyeqe che jawil anqʼin kyxol qeju «tzʼaqlxix», ex tzeʼn jaku tzʼonin jlu qiʼj?

¹⁸ Kyxol qeju xjal «tzʼaqlxix» ateʼ qeju nimxix xjal e ajbʼen te Dios ojtxe, aʼyeju e anqʼin tej naʼmxtaq tul Jesús tzalu twitz Txʼotxʼ, ik tzeʼn Noé, Abrahán, Sara, Moisés, Rut, Ester ex txqantl. In yolin Hebreos capítulo 11 kyiʼj junjun xjal lu, aʼyeju ok qʼuqeʼ kykʼuʼj tiʼj Dios. Ax ikx kyxol qeju xjal «tzʼaqlxix» ateʼ qeju tmajen Jehová in che kyim toj qqʼij jaʼlo. Mitiʼ in qo xobʼ tuʼn kamik, tuʼnju qʼuqli qkʼuʼj qa ok che jawil anqʼin juntl maj kyimni (Hebreos 2:15).

19. ¿Alkye qeju xjal «mya tzʼaqlxix» ex alkye ambʼil kxel tqʼoʼn Jehová kye?

¹⁹ Nimxix xjal mitiʼ ok kyojtzqiʼn Jehová, tuʼntzen jlu mitiʼ  e ajbʼen te ex mitiʼ kubʼ kybʼinchaʼn tajbʼil. ¿Tiʼ kbʼajel kyiʼj? Aʼyeqe «mya tzʼaqlxix» xjal lu, melay che el naj tiʼj tkʼuʼj Jehová. Ax ikx che jawil anqʼin juntl maj tuʼn, ex kxel tqʼoʼn ambʼil kye tuʼn tok ojtzqiʼn kyuʼn ex tuʼn kyajbʼen te. Toj mil abʼqʼi, ok che jawitz anqʼin kyimni ex ok che tel junx kyukʼe qeju tbʼanel xjal che ajbʼel te Jehová twitz Txʼotxʼ. ¡Tbʼanelxix ambʼil jlu!, aju in nok tqʼoʼn Tyol Dios tbʼi te Tqʼij Juicio. *

20. ¿Tiʼ t-xilen aju Gehena ex alkyeqe xjal in cheʼx toj?

²⁰ ¿Kykyaqil xjal ok che jawil anqʼin juntl maj? Nya kykyaqil. In tzaj tyekʼun Tyol Dios qa ateʼ junjun toj Gehena, aju in kubʼ qʼoʼn te «infierni» toj Aju Xjan Tuʼjil Tyol Dios (Lucas 12:5). Aju bʼibʼaj Gehena atz tzajni tiʼj jun tembʼil jatumel in kuxtaq xoʼn tzʼis, aju attaq tiʼjxi tnam Jerusalén, atztaq in kubʼ patin (poqen) tzʼis ex qeju xjal otaq che kyim. ¿Alkyeqe kyimni in che kuxtaq xoʼn toj? Oʼkxqetaq nya bʼaʼn xjal aʼyeju mitiʼtaq in che kux muquʼn ex mlay che jaw anqʼin juntl maj. A jlu in tzaj tyekʼun qa aju Gehena naq jun techel in kubʼ qʼoʼn tiʼjju najsbʼil te jumajx. Ok kʼonil Jesús kyiʼj qeju xjal che jawil anqʼin tuʼn kyok toj malbʼil, pero a Jehová Tnejel jwes (Hechos 10:42). Melayx che jaw anqʼin nya bʼaʼn xjal tuʼn Dios, aʼyeju nya kyaj tuʼn tkubʼ kychʼixpuʼn kymod.

21, 22. a) ¿Jatumel che tel qeju juntl kʼloj xjal che jawil anqʼin? b) ¿Alkye tnejel xjal jaw anqʼin tuʼn t-xiʼ toj kyaʼj?

²¹ Ax ikx in tzaj t-xnaqʼtzaʼn Tyol Dios qa at juntl kʼloj xjal ok che jawil anqʼin tuʼn kyxiʼ toj kyaʼj. Aʼye xjal lu ok che okel te xewbʼaj tuʼn kyanqʼin toj kyaʼj. In tzaj tqʼamaʼn Tyol Dios qa oʼkx Jesucristo o jaw anqʼin ik tzeʼn jlu.

²² Kubʼ bʼiyoʼn Jesús tej xjaltaq; pero mitiʼ kyaj tqʼoʼn Jehová tKʼwaʼl toj jul (Salmo 16:10; Hechos 13:34, 35). Mitiʼ jaw  itzʼj Jesús ik tzeʼn jun xjal te twitz txʼotxʼ. In tzaj tqʼamaʼn apóstol Pablo qa ‹kux muqet t-xmilal Jesús te twitz txʼotxʼ› ex qa ‹jatz anqʼin tukʼe t-ximlal te tuj kyaʼj› (1 Corintios 15:42-50). ¡Tbʼanelxix jlu! Ok Jesús juntl maj te xewbʼaj aju nim tipumal (kjawil uʼjit 1 Corintios 15:3-6). A Jesús tnejel xjal jaw anqʼin tuʼn t-xiʼ toj kyaʼj, pero nya oʼkxtaq te kjawel anqʼin tuʼn t-xiʼ toj kyaʼj (Juan 3:13).

23, 24. ¿Alkye qeju ‹nya nim kybʼet t-ẍneʼl Jesús›, ex jteʼ kybʼaj jlu?

²³ Ojtzqiʼntaq tuʼn Jesús qa chʼixtaq tmeltzʼaj toj kyaʼj, xi tqʼamaʼn kye qeju lepchiqeʼktaq tiʼj qa ok kxeltaq bʼinchal jun «[ky]najbʼil» (Juan 14:2). Ok tqʼoʼn Jesús kybʼi qeju che xel toj kyaʼj te ‹ẍneʼl, moqa rit, nya nim kybʼet› (Lucas 12:32). ¿Jteʼ kybʼet qeju okslal che xel toj kyaʼj? In tzaj tqʼamaʼn apóstol Juan toj Apocalipsis 14:1 kyjalu: «Ax ikx o wile [moqa o nlome] jun Tal Ẍneʼl [a Jesucristo] waʼltoq twi witz Sión; ex at jun syent mil tukʼ 44 mil xjal tukʼil, tok tbʼi Tal Ẍneʼl tibʼaj kywitz tukʼix tbʼi Tman».

²⁴ Ok che jawil anqʼin qeju 144.000 okslal tuʼn Dios, kyxol qe jlu ateʼ t-apóstol Jesús, tuʼn kyanqʼin toj kyaʼj. ¿Jtoj che jaw anqʼin okslal lu? Kubʼ ttzʼibʼin apóstol Pablo qa ok kbʼajel jlu toj jun ambʼil aju ok tul juntl maj Cristo (1 Corintios 15:23). Tej tajbʼen yol «ok tul juntl maj» Cristo tuʼn Pablo toj yol griego, in yolintaq tiʼj ambʼil aj tkawintaq Jesús. In qo anqʼin toj ambʼil lu, ik tzeʼn ok qo xnaqʼtzal tiʼj toj xnaqʼtzbʼil 9. Nya nimtl kybʼet qeju 144.000 in che anqʼin kyoj qʼij jaʼlo. Aj kykyim, bʼiʼx in che jaw anqʼintl tuʼn kyxiʼ anqʼil toj kyaʼj (1 Corintios 15:51-55). Aʼyetzun txqantl xjal, ok che jawil anqʼin tuʼn kynajan twitz Txʼotxʼ aj tok te jun tbʼanel najbʼil.

25. ¿Tiʼ kbʼel qxnaqʼtzan toj juntl xnaqʼtzbʼil?

²⁵ Jaku tzʼok qʼuqeʼ tkʼuʼja qa ok kbʼel tiʼj kamik tuʼn Jehová, aju ajqʼoj qiʼj, ex kbʼel tnajsaʼn te jumajx (kjawil uʼjit Isaías 25:8). Jakulo kubʼ t-ximana jlu: «¿Tiʼ kbʼantel kyuʼn qeju xjal che xel toj kyaʼj?». Ok che kawil toj tKawbʼil Dios toj kyaʼj. Toj juntl xnaqʼtzbʼil ok qo xnaqʼtzal mastl tiʼj kawbʼil lu.