1-3. ʼYáni je kontra xi tjenngikaná ngatsʼiaa, kʼoa jóbʼé tokoán nga chotʼayajiaan jmeni xi bakóya Biblia.

TIKJAʼAITSJENLAI tsa jngo chjotakontrali xi nʼio tsʼen títokatjenngili, xi ngisa nʼio taja kʼoa ngisa nʼio toka tikʼoajinni ji. Jenkjín miyoli kisikʼien kʼoa jeʼyai nga tsín skoe̱mali kʼiatsa xóntsjali. Ninga nʼio tókai, sa chrian sa chrian tsjentjenngili. Likui tijña koa̱n kʼuínni. Tonga, toxijña tjín xi bichókʼasjentjaili. Kʼoa ngisa taja tikʼoajinni xi títokatjenngili. ¡Ñaki sa̱tésénjinli!

² Ji, jekʼoakjimatʼain, jngo kontra tjenngikali. Saʼnda tjenngikaná ngatsʼiaa. Tojosʼin jetsaʼyaa ya kjoaʼmiya xi jejaʼato, je Biblia kʼoatso nga kontraná ma je kjoabiya. Nijngojinla xi tjoʼale yaole kʼoa xi síkinjele, kʼoa ʼyañá josʼin fáʼaná xíngiaa xi tsjoachaa. Tonga Jeobá ngisa tse nganʼio tjínle tikʼoajinni kjoabiya. Jéní xi bʼasjentjainá. Kʼoa jetsakakó nga koa̱n sikinjele kʼoa kʼoatso nga tondiaa kjoaʼaxin je kjoabiya. Je Biblia kʼoatso: “Kʼoa je kontra [...] xi fetʼani xi kuixo̱ya, kui kjoabiya” (1 Corintios 15:26). ¡Jótondani nga tjóxin!

³ Si̱kjaʼaitsjenla jokji kjoaba síkatíojinná je kjoabiya  ánni nga ngisa nda koa̱njinsíniná jme xi tsjoa kʼoe tokoán. Je Jeobá kʼoatso nga sikjaʼáyanile je kʼien (Isaías 26:19). Tsjoánile kjoabijnachon, kui jebi kjoachoya xi tjínle xi je kʼien.

4. 1) Ánni nga ʼyasíñá jomale Jeobá kʼianga chotʼayajiaan jokoanle Jesús kʼianga kʼien jngo miyole. 2) ʼYáni xi nʼio miyole koan Jesús.

⁴ A jesa kʼien jngo xíngi kʼoa tsa jngo miyoli xi nʼio tsjoachai. Joxi tsín ska̱ná je kjoaʼaon kao kjoaba maná nga kui kjoa tiyojiaan, alikui tiʼyañá jonʼia. Kʼoa kʼiaa nga ngisasa machjénná je kjoanʼiotokon xi tsjoá je Énle Niná (tʼexkiai 2 Corintios 1:3, 4). Je Biblia bakóyaná jomale Jeobá kao Jesús xi tʼatsʼe kjoabiya. Bakóná jokji aon koanle Jesús kʼianga kʼien jngo xi nʼio tsjoake koan kʼoa ʼyañá nga ñaki kʼoasʼin tsakakó jokjoan je Nʼaile (Juan 14:9). Kʼianga fi ya Jerusalén yaa fikonntsjaile Lázaro kʼoa kao ndichja xi María kʼoa xi Marta tsakʼin, xi ya Betania tsakatio ya chrian Jerusalén. Nʼio miyo koanle xínkjín, je Biblia saʼnda kʼoatso nga “Jesús kjaínga tjaoke Marta kao ndichja kao Lázaro” (Juan 11:5). Tonga kʼien Lázaro, tojosʼin tsaʼyaa ya kjoaʼmiya jaon.

5, 6. 1) Jókoanle Jesús nga tsabe nga tjíokjiʼndá je xi xínkjín kʼoa kao xi miyole koan Lázaro. 2) Ánni nga tsjoánganʼiosíniná nga kʼoasikji aon koanle Jesús nga kʼien Lázaro.

⁵ Jókoanle Jesús kʼianga jngo miyole kisicha. Je Biblia kʼoatso nga kikonle je xínkjín kʼoa kao xi miyole koan Lázaro, xi tjíokjiʼndá nga kʼoasʼin kʼien Lázaro. Kʼianga tsabe nga tjíokjiʼndá je chjota, “aon koanle Jesús, koanfáole” kʼoa “kiskiʼndá” (Juan 11:33, 35). Ánni nga kʼoasikji aon koansínile. A tsínle kjoachoya. Jaon, tjínle. Kʼoa saʼnda be jmeni kjoaxkón xi koa̱n (Juan 11:3, 4). Ninga kʼoalani, aon koanle Jesús kʼoa ba koanle nga tjín xi kʼienle.

 ⁶ Kʼianga kʼoasikji aon koanle Jesús sínʼio tokoán. Kui bakóyaná nga Jesús kʼoa kao Nʼaile jtike je kjoabiya. Xi ijngosani, je Jeobá tjínle nganʼio nga kjoaʼaxin kontra jebi. Kataʼyala je kjoaxkón xi kisʼin Jesús kʼianga kisichjén nganʼio xi kitsjoale Niná.

7, 8. Ánni kʼoabixónsíñá nga kʼoasʼin kisikjaʼaitsjen je chjota nga tsín tikjoaʼáyanile Lázaro, tonga jókisʼin Jesús.

⁷ Je Lázaro yaa kisʼeñe jngo ngijao kʼoa Jesús kʼoakitso nga katatjoxin je la̱jao̱ xi sénjchxo. Tonga je Marta kʼoakitso nga jeñole nichxin nga kisʼeñe kʼoa nga jechʼao nje̱ (Juan 11:39). Xi tonikjaʼaitsjenla, alijmejin xi tikoa̱n si̱kaoñá jngo chjota xi jeñole nichxin kasʼeñe.

⁸ Kʼianga jekichʼasjexin la̱jao̱, Jesús nʼio kinchja̱ kʼoa kitso: “Lázaro, nroai nditsinbi”. Kʼoa jókoan. “Je xi kijnakʼen jitjo.” (Juan 11:43, 44.) Li toʼi̱jin kji tsjoa koanle ngatsʼi chjota. Je ndichja, je xínkjín, je miyole kʼoa kao chjota ndaindʼiale bení nga kʼien Lázaro, tonga ijngokʼa ya tíjnakaongáni. Joxi to nijñájin tjíobʼaile koanjinle. Nʼiojin nkjín xi tsjoa koanle nga kiskoeya. ¡Kisicha kjoabiya!

9, 10. 1) Jósʼin tsakakó Jesús ʼyani xi kitsjoale nganʼio nga kisikjaʼáyale Lázaro. 2) Jósʼin basenkaoná nga bʼexkiaa kʼoa nga chotʼayajiaan je kjoafaʼáya xi bʼéyanajmí je Biblia.

⁹ Je Jesús alikui kʼoakitso tsa totsʼe nganʼio kisichjén nga kisikjaʼáyale Lázaro. Kʼianga kjesa síkjaʼáyajinle, jngo kjoabʼetsʼoa tsakʼéjna jñani kʼoakitso nga je Jeobá xi male síkjaʼáyale kʼien (tʼexkiai Juan 11:41, 42). Tonga ali tsa tokʼiajin nga kʼoasʼin kisichjén Jeobá nganʼiole. Je Énle Niná ñajan kjoafaʼáya bʼéyanajmí. * Tse kjoatsjoa  tjenkao nga bʼexkiaa kʼoa nga chotʼayajiaan. Bakóná nga tsín faʼájin chjota je Niná, nga kisikjaʼáyale xi xti kao xi chjotajchínga, xi xʼin kao xi yánchjín, xi israelita kʼoa kao xi xin naxinandále. ¡Nʼio tsjoa koanle xínkjín chjota jebi nga jaʼáyanile! Xi tojngola choa̱, kʼianga jngo tsotiʼndí kisikjaʼáyale Jesús, je xijchále ñaki “tokoanxkónle” (Marcos 5:42). Likuijinkʼia kichajinle kjoanda xi kitsjoale Jeobá.

¹⁰ Tonga je chjota xi kisikjaʼáyale Jesús kʼienni nga koanskanni. A kui xi tsonile nga toxitsjoani nga kinikjaʼáyale. Mai. Je kjoafaʼáya jebi nʼio chjíle kʼoa tsjoáná kjoachoya.

11. Jósʼin bakó je kjoafaʼáyale Lázaro nga kʼoatjín jotso Eclesiastés 9:5.

¹¹ Je Biblia kʼoasʼin bakóya nga je kʼien “nijmejin xi tibeni”, xi tsonile, nga tsín tsa xin tjíokon (Eclesiastés 9:5). Kʼoasʼin bakó je kjoafaʼáyale Lázaro. Kʼianga jaʼáyanile a kui tsakʼéyanajmíle chjota jochon ya ngʼajmi, axo kui tsakakóyale nga tíjna jngo ʼnde jñani tífaʼájnga̱ lʼí. Mai. Je Biblia alikui kʼoatso. Je xi ño nichxin kisʼejnakʼien Lázaro “nijmejin xi ti[tsa]beni”. Kʼianga kisʼejnakʼien joxi totsakajnafení (Juan 11:11).

12. Ánni nga koa̱n koa̱nkjainsíniná nga ñaki jaʼáyale Lázaro.

¹² Nga kʼoasʼin jaʼáyale Lázaro kʼoati kui xi bakóyaná nga tsín tsa to énjin je kjoafaʼáya, ñaki kʼoatjín. Nkjín chjota tjíokotsen kʼianga kisikjaʼáyale Jesús je Lázaro. Kʼoa je chjotatítjonle relijión xi jtike koan Jesús saʼnda i kitso: “Jmé xi sʼiaan, nga nkjín choa̱ xi tsjoá je chjotabi” (Juan 11:47). Nkjín chjota kikotsenle Lázaro kʼoa koankjainle xi tʼatsʼe Jesús. Kʼoasʼin tsabeni nga Niná kisikasén Jesús. Ñaki tsaʼyale nga tʼatsʼe Niná jaʼaini kʼoa  kuinga tjíokʼasíni chjotatítjonle relijión xi tsakásjaile josʼin sikʼien Jesús kao Lázaro (Juan 11:53; 12:9-11).

13. Ánni nga ñaki makjainniná nga koa̱nle Jeobá sikjaʼáyale je kʼien.

¹³ A kui xi tsonile nga tomakjainsoaná tsa koa̱nkjainná xi tʼatsʼe kjoafaʼáya. Mai. Nga̱ Jesús kʼoakitso nga kuicho je nichxin “nga je ngatsʼi xi tjío ya nyʼoákʼen” kjoaʼáyanile (Juan 5:28). Makjoanni nga je Jeobá kisinda ngatsʼi xi tjíokon, a ñʼai koa̱nle nga sinda ijngokʼani. Kuijin xi tsonile jokji bʼéjintokon. A koaanle Jeobá sikjaʼaitsjen ngatsʼi xíngiaa xi jekʼien. Tikjaʼaitsjenlai jebi: ¡Je Niná be jaʼaínle nga jngó jngó niño xi tjín ya ngʼajmi ninga miyón mani! (Isaías 40:26). Jebi kui xi bakóná nga Jeobá koaanle sikjaʼaitsjen jokjoan koankjoan je xíngiaa xi jekʼien, xi ijngosani mele sikjaʼáyale.

14, 15. Tojo kitso je Job, jókji mandosinle Jeobá nga sikjaʼáyanile je kʼien.

¹⁴ Tonga jókji mandosinle Jeobá nga sikjaʼáyanile je kʼien. Je Biblia kʼoatso nga nʼio mele kʼoasʼin. Jngo choʼndakixile Niná xi Job tsakʼin i kitso: “Tsa jngo chjota kuiyá, a koaan kʼoéjnakon ijngokʼani”. Kui xi kitsonile je Job nga skóya saʼnda nga kjoaʼaítsjenle Niná nga sikjaʼáyale. Kuinga kʼoakitsosínile Jeobá: “Kuinókjoaní kʼoa kjuinrʼoele. Nʼio si̱metokuin jmeni xi kisinda ndsai” (Job 14:13-15).

¹⁵ Tikjaʼaitsjenlai én xi kitso Job: Je Jeobá nʼio mele nga katafaʼai nichxin nga tsjoánile kjoabijnachon je kʼien. Kʼianga ʼyaa jebi, a tsí kjoaixi nga nʼio tsjoánganʼioná. Tonga, jókoa̱n nga kjoaʼáyale kʼien nichxin xi nroaján. ʼYáni xi kjoaʼáyale kʼoa jñáni.

16. Jósʼin koatio je xi kjoaʼáyanile.

¹⁶ Kʼianga bʼexkiaa je kjoafaʼáya xi nroatʼa Biblia xi koan ngasʼa, nʼio tse xi bakóyaná xi koa̱n nichxin xi nroaján.  Je chjota xi jaʼáyanile tsabeni xínkjín. Kʼoakjoánti koa̱n nichxin xi nroaján, tonga ngisa naskánakoa̱n. Tojosʼin tsaʼyaa ya kjoaʼmiya jan, je Niná kʼoasʼin tjínndajinle nga ʼndenaxó sikao i̱ Sonʼnde. Kʼianga kjoaʼáyale je kʼien alikui tiʼi̱ koa̱nchonni Sonʼnde jochon tsa ndʼai nga kjoajchán tjín, nga chʼin tjín kʼoa nga faʼatone kjoatéxoma chjota. Koaan tsjoa sa̱tío kon kʼoa nyʼán koatio tokʼia saʼndani i̱ Sonʼnde.

17. Jótjín chjota kjoaʼáyanile.

¹⁷ ʼYáni xi kjoaʼáyale. Jesús kʼoakitso “nga je ngatsʼi xi tjío ya nyʼoákʼen kjuinrʼoéle jta̱le. Kʼoa kuitjoni ngatsʼi” (Juan 5:28, 29). Kʼoa Apocalipsis 20:13 kʼoati tso: “Je ndáchikon kitsjoa je xi kʼen xi ya tjíojin. Kʼoa je kjoabiya kao ya ʼnde jña nga tjío xi kʼen (Tsjó) kitsjoa je xi ya tjíojin”. (Chótʼajin ya jñani tso: “Jméni xi Seol kʼoa Hades ʼmi”.) Je ʼnde jebi sʼe̱tianí kʼianga kjoaʼáyanile je chjota xi miyón mani xi ya tjíosíkjáya ndʼaibi. Je pastro Pablo kitso: “Kjoaʼáyale xi kʼen, nda tsa kao chjota xi tjínle kjoakixi, kao chjotatsʼen” (Hechos 24:15). Jósʼin tsoyanile én jebi.

18. ʼYáni je “chjota xi tjínle kjoakixi” xi kjoaʼáyanile, kʼoa jósʼin basenkaoli ji kjoachoya jebi.

¹⁸ Je “chjota xi tjínle kjoakixi” tsole Biblia jéní xi kʼia tsakatio nga kjesa faʼaijin Jesús i̱ Sonʼnde, jolani tsa Noé, Abraham, Sara, Moisés, Rut, Ester kʼoa kao xi ngikʼa. Ya Hebreos kapítulo 11 síkʼaxki kʼa je chjota jebi xi kisʼele kjoamakjain. Tonga kʼoati ya maxki̱kao je choʼndale Jeobá xi tjíobiya ndʼaibi. Kʼianga tjínná kjoachoya xi tsʼe kjoafaʼáya alikui tinokjonnilee je kjoabiya (Hebreos 2:15).

19. ʼYáni xi “chjotatsʼen” ʼmile, kʼoa jméni xi tsjoáʼndele Jeobá.

¹⁹ Nʼio nkjín jmi miyón chjota xi saʼnda tsín tsabe tʼatsʼe Jeobá, kuinga tsín kʼoakisʼinni josʼin mele Niná. Jókoa̱nni chjota jebi. “Chjotatsʼen” jebi alikui tojchajin.  Je Niná xi kixi kʼoati sikjaʼáyale kʼoa tsjoále nichxin nga katabe kʼoa nga katasíxále. Xi jngo jmi nó, kjoaʼáyanile je kʼien kʼoa koaan ya koatiojinle je chjotakixi xi sixále Jeobá i̱ Sonʼnde. Nʼio naskákoa̱n nichxin xotjín kʼoa je Biblia nichxin nga sʼe̱ndajin tsole. *

20. Jméni xi Gehena ʼmi kʼoa ʼyáni xi ya fi.

²⁰ A kui xi tsonile nga kjoaʼáyanile ngatsʼi chjota xi jekʼien. Mai. Je Biblia kʼoatso nga tjínkʼa xi ya tjío ya “Gehena” (Lucas 12:5, TNM). Je xi Gehena ʼmi jngoní ʼnde xi ya kisʼejna nditsinle Jerusalén jñani kisaka je kʼien kʼoa kao tjé. Tonga ʼyá kʼienni xi ya kisikʼatsaojin je chjota judío. Tojéní chjota xi kʼoasʼin tsabekon nga tsín bakinle nga nda sʼe̱ñe kʼoa nga kjoaʼáyanile. Je én xi Gehena tso kui tsoyanile nga tondiaa jchajin je chjota. Je Jesús kʼoati kʼoendajin xi tʼatsʼe je kʼien, tonga jé Jeobá xi kuitsoni ʼyani xi kjoaʼáyale, nga̱ jé xi Jues títjon ma (Hechos 10:42). Je Niná bení jokjoan chjotatsʼen xi tsín kʼoantjaiya kʼoa likuikʼia sikjaʼáyale.

21, 22. 1) Jñásanile kjoafaʼáya xi tjín. 2) ʼYáni xi jo espíritu sʼin jaʼáya títjonle.

²¹ Je Biblia ijngosa kjoafaʼáya síkʼaxki̱. Je xi ya ngʼajmi koatio, xi espíritu koa̱n. Je Énle Niná tojngokjoán chjota síkʼaxki̱ xi kui kjoafaʼáya kisʼele: Jé Jesucristo.

²² Je Jesús kinikʼien, tonga Jeobá alikui toya kisichajin je ʼNdíle ya tsjó (Salmo 16:10; Hechos 13:34, 35). Alikui tijo chjota sʼin jaʼáyanile. Je pastro Pedro kʼoatso nga “kʼen jokjoan yaole, tonga kinikʼéjnakon jokjoan espíritu” (1 Pedro 3:18). ¡Ñaki tomaxkónná! Jo espíritu sʼin tsakʼejna ijngokʼani Jesús (tʼexkiai 1 Corintios 15:3-6).  Jé títjon xi kʼoasʼin jaʼáyale, tonga alikui toje xi kui kjoafaʼáya kʼoaile (Juan 3:13).

23, 24. ʼYáni “xi tochoa mani xi tiyojtíon” kitsole Jesús, kʼoa jótjín mani.

²³ Kʼianga tojeme koaini ya ngʼajmi je Jesús i kitsole chjotale: “Kjuí sindachonno ʼnde xi tʼatsaon” (Juan 14:2). Je xi ya koai ngʼajmi isʼin kitsole: “Jon xi tochoa mani xi tiyojtíon” (Lucas 12:32). Jótjín mani chjota jebi. Ya Apocalipsis 14:1 itso én xi kiski pastro Juan: “Kiskotsen, koeni je Barré [Jesucristo] ya tíjnason nindo xi Sión ʼmi, kʼoa tjíokao nga je jngo siento kao ñachanño jmi xi tjínle jaʼaínle Barré kao jaʼaínle Nʼaile. Tjíotʼa ya tjen”.

²⁴ Je chjotale Cristo xi jngo siento kao ñachanño jmi mani, xi ya maxki̱kao pastrole Jesús, yaa sikjaʼáyale Niná ya ngʼajmi. Kʼiáni. Je pastro Pablo kʼoakitso nga kʼia sʼe̱jna kjoafaʼáya jebi nichxin nga jetíjna Cristo (1 Corintios 15:23). Kʼoa jekui nichxin tiyoaa ndʼaibi tojosʼin jchaa ya kjoaʼmiya ñajan. Kʼoa jetochoasa tjío i̱ Sonʼnde je xi jngo siento kao ñachanño jmi mani. Kʼianga jngo biya, tiʼa yaa faʼáyanile ngʼajmi (1 Corintios 15:51-55). Tonga je kjoachoya xi tjínle ngatsʼi chjota xi ngikʼa kuinga i̱ Sonʼnde kjoaʼáyanile kʼianga je naskánakoa̱nchon.

25. Jméni xi chótʼayá ya kjoaʼmiya xi fini.

²⁵ Ñaki kʼoatʼai tokuin nga Jeobá sikinjele je kontraná je kjoabiya kʼoa ñaki tondiaa kjoaʼaxin (tʼexkiai Isaías 25:8). * Tonga tsakui nichxin i̱sí: “Jméni xi sʼin ya ngʼajmi je chjota xi ya kjoaʼáyale”. Je xá xi sʼe̱le kuinga koatexoma. Yaa kjoaʼmiya xi fini chótʼayasaa josʼin koatexoma.