1-3. 1) ¿Ajkia nopa tokualankaitaka katli kineki techmiktis? 2) ¿Kenke techyolchikaua tlen Biblia kiijtoua?

XIMOILJUI timochololtijtinemi tlen se mokualankaitaka katli tlauel mosisinia, tlauel tetik uan tlauel chikauak motlaloua. Ta tijmati tlaj mitsasiti mitsmiktiti pampa tikitstok kinmiktijtok miakej. Maske chikauak timotlalojtias, ika yolik mitsasitias. Uan kema nesi ayokmo uelis timomanauis, tikita uala se akajya tlen kineki mitspaleuis. Ya kipia miak chikaualistli, amo kej mokualankaitaka. ¡Ni tlauel mitsyolchikaua!

² Ipan ni tonali, kejuak timochololtijtinemij tlen se tokualankaitaka. Ipan tlamachtili chikuasej timomachtijkej Biblia kiijtoua nopa mikilistli kejuak se tokualankaitaka. Amo aka uelis momanauis yon amo aka uelis kitlamiltis, uan tikitstokej kinmiktijtok katli tikinikneliaj. Jehová kena kipia miak chikaualistli, amo kej mikilistli. Ya toTlamakixtijka katli techiknelia uan kinextijtok kena uelis kitsontlamiltis mikilistli. Yeka Biblia kiijtoua teipa ayokmo mikisej maseualmej (1 Corintios 15:26). ¡Nelnelia tlauel techyolchikaua!

³ Tlaj timoyoliljuisej kenijkatsa techyolkokoua kema se  akajya miki, techpaleuis ma tijpatiitakaj kema Jehová kiijtoua sampa itstosej katli miktokej, uan ni kichiuas ma tiyolpakikaj (Isaías 26:19). Uajka Jehová kichiuas sampa ma itstokaj kema kinyolkuis.

4. 1) ¿Kenke uelis tijmatisej tlake kiyolmati Jehová kema timomachtiaj tlen Jesús kiyolmatki kema mijki se iuampo? 2) ¿Ajkia ininuaya kuali mouikak Jesús?

⁴ ¿Miktok se tlen mochampoyouaj o se mouampo? Uelis tlauel titlaijiyouik uan tlauel timokuesok pampa amo tleno uelki tijchijki. Kema techpano nopa, tlauel moneki ma techyolchikaua tlen kiijtoua Biblia (xijpoua 2 Corintios 1:3 uan 4). Nopaya techmachtia tlen kiyolmatij Jehová uan Jesús kema se akajya miki. Kiijtoua Jesús tlauel kiyolkokok kema mijki iuampo uan ika nopa kinextik tlen iTata kiyolmati (Juan 14:9). Kema Jesús yauiyaya Jerusalén, nochipa kinpaxalojtikisayaya Lázaro uan iikniuaj María uan Marta katli itstoyaj nechka Jerusalén ipan pilaltepetsi Betania. Tlauel kuali mouikayaya ininuaya, yeka Biblia kiijtoua: “Jesús nelia kiniknelik Lázaro, María uan Marta” (Juan 11:5). Uan ipan tlamachtili chikuasej tikitakej Lázaro mijki.

5, 6. 1) ¿Kenijkatsa kiyolmatki Jesús kema kiitak kichokiliyayaj Lázaro? 2) ¿Kenke techyolchikaua kema tijmatij Jesús nojkia moyolkokok?

⁵ ¿Kenijkatsa kiyolmatki Jesús kema mijki iuampo? Biblia kiijtoua Jesús kinpaxaloto Lázaro ichampoyouaj uan iuampoyouaj. Kema kinitak kichokiliyayaj tlauel kiyolkokok, yeka “moyolpitsauilik uan mokuesok” uan teipa “chokak” (Juan 11:33, 35). ¿Kenke tlauel motekipachok? ¿Moiljuiyaya ayokmo kema kiitaskia? ¡Amo! Jesús kimatiyaya tlake panoskia (Juan 11:3, 4). Maske kimajtoya ni, Jesús kiyolmatki kenijkatsa motekipachoua se kema miki se akajya.

 ⁶ Kema tijmatij Jesús nojkia moyolkokok techyolchikaua. Uan ni kinextia Jehová uan Jesús kikualankaitaj mikilistli. Jehová uelis kitsontlamiltis tokualankaitaka pampa ya kipia miak chikaualistli. Ma tikitakaj tlake ueyi tlamantli kichijki Jesús ika toTeotsij itetikayo.

7, 8. ¿Kenke moiljuiyayaj Lázaro ayokmo moyolkuiskia, uan tlake kichijki Jesús?

⁷ Kema Lázaro itlakayo kitlalijtoyaj kampa tlakoyontoya, Jesús kiniljuik ma kiijkuinikaj tlen ika kitsaktoyaj. Marta amo kinkauayaya pampa ya kipixtoya naui tonali miktoya, uan uelis itlakayo ayokmo kuali eltoya (Juan 11:39). Nochi moiljuiyayaj Lázaro ayokmo moyolkuiskia.

⁸ Kema kiijkuinijkej nopa tetl, Jesús chikauak kiijtok: “Lázaro, xikisa”. ¿Uan tlake panok? ‘Lázaro kiski.’ (Juan 11:43, 44.) ¡Ximoiljui kenijkatsa tlauel yolpajkej nochi! Lázaro isiuaikniuaj, iuampoyouaj, ichampoyouaj uan ikalnechkauaj kimatiyayaj miktoya, yeka tlauel yolpajkej kema Lázaro moyolkuik. Amo moiljuiyayaj tlaj panoskia nopa. Uelis miakej kinajnauajkej kema kiitakej pampa tlauel yolpakiyayaj. ¡Jehová nelia uelis kitlamiltis mikilistli!

9, 10. 1) ¿Ajkia kipaleuik Jesús kema kiyolkuik Lázaro? 2) ¿Kenijkatsa techpaleuis tlaj tijpouasej ipan Biblia kampa kiijtoua tlen kinpanok katli moyolkuikej?

⁹ Jesús amo kiijtok tlaj iselti kiyolkuik Lázaro. Kema ayamo kiyolkuitoya momaijtok uan kiijtok Jehová yaya teyolkui (xijpoua Juan 11:41 uan 42). Ipan Biblia kiijtoua Jehová amo san ipan nopa tonali kiyolkuik se akajya, nojkia kinyolkuik chikueyij maseualmej. * Kema  tijpouasej nopa tlauel techpaktis, pampa techmachtia toTeotsij amo kintlapejpenia katli kinyolkui. Ya kinyolkuik telpokamej, ueuentsitsij, tlakamej, siuamej, israeleuanij uan sekinok. ¡Nochi tlauel yolpajkej kema kinyolkuikej! Kema Jesús kiyolkuik se siuapil, itatauaj tlauel yolpajkej (Marcos 5:42, TNM). Kej ni Jehová kichijki tlauel ma yolpakikaj uan ni amo kema kiilkauaskiaj.

¹⁰ Tlaj katli moyolkuikej sampa mijkej, ¿kiijtosneki san tlapik kinyolkuikej? Amo, pampa techpaleuia ma tijkuamachilikaj tlen Biblia tlamachtia uan ma timotemachikaj ipan tlen kiijtoua.

11. ¿Kenijkatsa kema kiyolkuikej Lázaro kinextia nelia tlen kiijtoua ipan Eclesiastés 9:5?

¹¹ Ipan Biblia kiijtoua katli miktokej “ayok tleno kimatij” (Eclesiastés 9:5). Ni kiijtosneki amo kana itstokej yon amo tlalnamikij. Tlen kipanok Lázaro kej nopa kinextia, pampa kema moyolkuik amo kiijtok kenijkatsa eliyaya iluikaktli, o tlaj katli miktokej kintlaijiyouiltiaj ika tlitl. Biblia amo ya nopa tlamachtia. Kema Lázaro miktoya naui tonali, ‘amo tleno kimatki’. Lázaro kejuak kochtoya kema miktoya (Juan 11:11).

12. ¿Kenke tijmatij nelnelia moyolkuik Lázaro?

¹² Kema kiyolkuikej Lázaro techmachtia katli miktokej nelnelia moyolkuisej. Miakej kiitakej kema panok nopa. Katli tlayakanayayaj ipan religiones uan kikualankaitayayaj Jesús, amo kiijtojkej tlaj amo moyolkuitoya Lázaro. Yeka kiijtojkej: “¿Tlake tijchiuasej? Pampa ni tlakatl Jesús kichiua miak tlaneskayotl” (Juan 11:47). Miakej katli kiitatoj Lázaro tlaneltokakej ipan Jesús pampa kiitakej nelia kititlantoya toTeotsij. Yeka katli tlayakanayayaj ipan religiones  kitemolijkej kenijkatsa kinmiktiskiaj Jesús uan Lázaro (Juan 11:53; 12:9-11).

13. ¿Kenke tijmatij Jehová kena kinyolkuis katli miktokej?

¹³ ¿Nelnelia moyolkuisej katli miktokej? Kena. Jesús kiijtok se tonali “nochi tlakamej tlen miktokej” moyolkuisej (Juan 5:28). ¿Timoiljuia Jehová kimatis ouij kinyolkuis? Amo, pampa yaya kichijtok nochi uan techmakatok tonemilis. ¿Timoiljuia Jehová kinilnamiktok katli miktokej? Ya amo tleno kiilkaua. San ximoiljui, ¡ya kimati kenijkatsa inintoka nochi nopa miakej sitlalimej tlen onka iluikak! (Isaías 40:26.) Uajka, Jehová kinilnamiki nochi katli miktokej uan nojkia mosentlalijtok kinyolkuis.

14, 15. ¿Kenijkatsa tlen kiijtok Job kinextia Jehová nelnelia kineki kinyolkuis katli miktokej?

¹⁴ ¿Nelia kineki kinyolkuis Jehová katli miktokej? Biblia kiijtoua kena. Uan Job kitlajtlanik toTeotsij: “Tlaj se tlakatl [...] mikis, ¿uelis moyolkuis?”. Job kiijtok tlaj se tonali mikiskia kichiaskia kema toTeotsij sampa kiilnamikiskia. Yeka kiiljuik: “Ta tinechnojnotsas, uan na nimitsnankilis. Tlauel tijnekiskia tinechitas pampa ta tinechchijki” (Job 14:13-15, TNM).

¹⁵ Jehová tlauel kineki kinyolkuis katli miktokej. ¡Nelia tlauel techyolchikaua nopa! ¿Kenijkatsa kichiuas? ¿Ajkia inijuantij moyolkuisej uan kanke itstosej?

16. ¿Kenijkatsa itstosej katli moyolkuisej?

¹⁶ Kema tijpouaj ipan Biblia kenijkatsa kinyolkuikej katli miktoyaj technextilia teipa nojkia kinyolkuisej. Katli kinyolkuikej sampa itstoyaj ininuaya ininchampoyouaj, uan teipa nojkia kej nopa panos. Ipan tlamachtili eyi tikitakej toTeotsij kineki nochi Tlaltipaktli  ma mochiua se xochimili. Katli moyolkuisej ayokmo itstosej kampa onka tlauilankayotl, kokolistli uan tlen amo kuali. Inijuantij yolpakisej uan itstosej nochipa ika tlayolseuilistli ipan Tlaltipaktli.

17. ¿Keskij maseualmej moyolkuisej?

¹⁷ ¿Ajkia inijuantij moyolkuisej? Jesús kiijtok: “Nochi tlakamej tlen miktokej uan tlen kintlalpachojtokej, nechkakisej uan pankisasej” (Juan 5:28, 29). Ipan Traducción del Nuevo Mundo, Revelación (o Apocalipsis) 20:13 nojkia kiijtoua: “Katli miktoyaj ipan ueyi atl kiskej, uan nojkia kiskej katli kintlalpachojtoyaj”. (Xikita ipan sekinok tlamachtili “¿Tlake kiijtosneki Seol uan Hades?”.) Kema moyolkuisej katli miktokej mokauas kaktok kampa kintlalpachojtokej. Nopa apóstol Pablo kiijtok: “ToTeko kinyolitia tlakamej tlen ya miktokej, tlen kuajkualmej uan tlen axkuajkualmej” (Hechos 24:15). ¿Tlake kiijtosneki ni?

18. ¿Ajkia inijuantij “tlen kuajkualmej” moyolkuisej, uan kenijkatsa mitspaleuia pampa timotemachia moyolkuisej katli miktokej?

¹⁸ Kema Biblia kiijtoua moyolkuisej “tlen kuajkualmej” kiijtosneki moyolkuisej katli itstoyaj kema Jesús ayamo ualajtoya ipan Tlaltipaktli, kej Noé, Abraham, Sara, Moisés, Rut, Ester uan sekinok. Ipan Hebreos 11 techpouilia tlake kichijkej ni tlakamej uan siuamej katli kitekipanojkej toTeotsij. Uan itekipanojkauaj tlen miktiauij ipan ni tonali nojkia kiniljuiaj “tlen kuajkualmej”. Tlaj timotemachiaj nelia moyolkuisej katli miktokej, amo timajmauisej timikisej (Hebreos 2:15).

19. ¿Ajkia inijuantij “tlen axkuajkualmej”, uan tlake kikauas Jehová ma kichiuakaj?

¹⁹ ¿Moyolkuisej katli amo kiixmatkej Jehová, amo kitekipanojkej yon amo kichijkej tlen ya kineki? Biblia kiijtoua Jehová amo kinilkauas “tlen axkuajkualmej”.  ToTeotsij kinyolkuis, kikauas ma kiixmatikaj uan ma kitekipanokaj. Ipan nopa mil xiuitl, katli miktokej moyolkuisej uan uelis kitekipanosej Jehová ininuaya sekinok toTeotsij itekipanojkauaj ipan Tlaltipaktli. ¡Tlauel kuali tlen mochiuas! Biblia kitokaxtia Tonali kema toTeotsij tetlajtolsenkauas. *

20. ¿Tlake kiijtosneki Gehena, uan ajkia inijuantij kinkauaj nopaya?

²⁰ ¿Uajka moyolkuisej nochi? Amo. Biblia kiijtoua sekij itstokej kampa “Gehena”. Ipan sekij Biblias nopa tlajtoli Gehena kitlajtolkueptokej kej “miktla” (Lucas 12:5). Uejkajkia, ne Jerusalén, kampa tlasoltlatiyayaj uan kintlatiyayaj mijkatsitsij katli amo kinamikiyaya kintlalpachosej yon moyolkuisej kiiljuiyayaj Gehena. Uajka Gehena san kiixnextia ayokmo kema itstosej katli kintsontlamiltisej. Jehová kintlajtolsenkauas katli moyolkuisej uan Jesús kipaleuis (Hechos 10:42). ToTeotsij amo kema kinyolkuis katli san tlemach tlachiuaj uan amo kinekij kipatlasej ininnemilis.

21, 22. 1) ¿Kanke itstosej nopa sekinok katli nojkia moyolkuisej? 2) ¿Ajkia achtoui moyolkuik kej se iluikaejketl?

²¹ Biblia kiijtoua sekinok katli nojkia moyolkuisej itstosej iluikak, uan nojkia kiijtoua san Jesucristo moyolkuitok kej se iluikaejketl.

²² Maske Jesús kimiktijkej kema eliyaya se tlakatl, Jehová amo kikajki ma mikto (Salmo 16:10; Hechos 13:34, 35). Ya kiyolkuik kej se iluikaejketl. Uan nopa apóstol Pablo kiijtok maske Cristo kipixtoya “itlakayo”  moyolkuik kej “se tonaltsi” (1 Corintios 15:42-50). ¡Tlauel kuali tlen kichijki toTeotsij! ¡Sampa kiyolkuik Jesús kej se iluikaejketl! (Xijpoua 1 Corintios 15:3-6.) Yaya achtoui kiyolkuikej kej se iluikaejketl, uan amo san ya kej nopa kiyolkuiskiaj (Juan 3:13).

23, 24. ¿Ajkia inijuantij eliskiaj nopa ‘axmiakej’, uan keskij eliskiaj?

²³ Kema Jesús nechka yaskia iluikak, kiniljuik itokilijkauaj: “Nias nepa niinmechchijchiuiliti [...] kampa initstosej” (Juan 14:2). Jesús kiijtok ‘axmiakej’ yaskiaj iluikak (Lucas 12:32). ¿Keskij eliskiaj nopa ‘axmiakej’? Ipan Apocalipsis 14:1 apóstol Juan kiijtok: “Nijtlachilik uan nikitak nopa Pilborregojtsi [o Jesucristo] moketsayaya ipan tepetl Sión uan iuaya moketsayayaj ciento cuarenta y cuatro mil tlakamej tlen kipixtoyaj itoka nopa Pilborregojtsi uan itoka iTata ijkuilijtok ipan ininkuaixpa”.

²⁴ ToTeotsij kinyolkuis Cristo itokilijkauaj uan apóstoles. Inijuantij itstosej iluikak uan elisej 144,000. ¿Kema moyolkuisej? Apóstol Pablo kiijtok kema mokuepaskia Cristo o kema peuaskia tekichiuas ne iluikak (1 Corintios 15:23). Ipan tlamachtili chiknaui tikitasej nama tiitstokej ipan nopa tonali kampa nojua itstokej se keskij tlen nopa 144,000. Kema mikisej nima moyolkuisej uan itstotij ne iluikak (1 Corintios 15:51-55). Uan nopa sekinok katli moyolkuisej itstosej ipan Xochimili.

25. ¿Tlake tikitasej ipan nopa seyok tlamachtili?

²⁵ Jehová temachtli kitlamiltis mikilistli, yeka ayokmo aka mikis (xijpoua Isaías 25:8). Uelis timotlajtlania ni: “¿Tlake kichiuasej katli moyolkuisej uan yasej iluikak?”. Inijuantij nojkia tekichiuasej ne iluikak ipan toTeotsij iTlanauatijkayo. Ipan nopa seyok tlamachtili tikitasej tlake kichiuas.