1-3. Omutondi guni te tu tidheni atuheni, nomolwashike okukonakona shoka Ombiimbeli tayi ti taku ke tu etela epepelelo?

DHILADHILA ando to fadhuka po omutondi a nika oshiponga. Omutondi ngoka oku na oonkondo nondapo e ku vule. Ou shi kutya ke na ohenda molwaashoka owe mu mona ta dhipaga yamwe yomookuume koye. Kashi na nduno mbudhi kutya oto kambadhala okufadhuka po wa mana mo shi thike peni, ote ende ta hedha popepi nangoye. Otashi monika pwa fa kaapu na etegameno. Ihe ohaluka, otapu ya gumwe opo e ku hupithe. Nakukekuhupitha ngoka oku na oonkondo oonenenene e vule omutondi gwoye notu uvaneke kutya ote ke ku kwathela. Itashi ku uvitha tuu wa pepelelwa!

² Muushili wo wene, ngoye oto tidhwa komutondi a tya ngaaka. Atuheni otatu tidhwa kuye. Ngaashi twi ilonga montopolwa ya tetekele, Ombiimbeli otayi ti kutya eso olyo omutondi. Kapu na gumwe gwomutse ta vulu oku li fadhuka po nenge oku li yanda. Oyendji yomutse otwa mona nkene omutondi ngoka ta dhipaga aaholike yetu. Ihe Jehova oku na oonkondo oonenenene e vulithe eso. Oku li Omuhupithi omunahole ngoka e shi ulika nale kutya ota vulu okusinda omutondi ngoka. Oku uvaneka kutya ota ka hanagula po thiluthilu omutondi ngoka, eso. Ombiimbeli otayi ti: “Omutondi gwahugunina e na okusindwa, oye eso.” (1 Aakorinto 15:26) Kayi shi tuu onkundana ombwanawa!

 ³ Natu taleni paufupi nkene omutondi ngoka eso he tu gumu ngele omuholike gwetu gumwe a si. Okuninga ngawo otaku ke tu kwathela tu uve ko oshinima shoka tashi ke tu nyanyudha. Jehova oku uvaneka kutya oonakusa otaya ka kala ishewe nomwenyo. (Jesaja 26:19) Ote ke ya ninga ishewe aanamwenyo. Onkee ano opu na etegameno lyeyumuko.

4. (a) Omolwashike einyengo lyaJesus keso lyakuume ke tali tu longo shi na ko nasha nomaiyuvo gaJehova? (b) Jesus okwa li a panga uukuume wi ikalekelwa noolye?

⁴ Mbela owa silwa nale gumwe gwomaaholike yoye? Uuwehame, oluhodhi nomaiyuvo gokukala u wete kuu na ekwatho lyasha, ohayi kala ya fa itaayi vulu okwiidhidhimikilwa. Pomathimbo ga tya ngaaka, otwa pumbwa okukonga ehekeleko mOohapu dhaKalunga. (2 Aakorinto 1:3, 4, KB) Ombiimbeli otayi tu kwathele tu uve ko nkene Jehova naJesus haya kala ye uvite shi na ko nasha neso. Jesus ngoka a li a fa He thiluthilu, okwa li a tseya uuwehame mboka hau etwa kokusilwa. (Johannes 14:9) Sho Jesus a li muJerusalem, okwa talelele po Lasarus naamwayina Maria naMarta, mboka ya li ya kala momukunda gu li popepi gwedhina Betania. Oya li ya panga uukuume wopothingo. Ombiimbeli otayi ti: “Jesus okwa li e hole Marta, Maria naLasarus.” (Johannes 11:5) Ihe ngaashi twi ilonga montopolwa ya tetekele, Lasarus okwa li a sa.

5, 6. (a) Jesus okwa li i inyenge ngiini sho a li naapambele nookuume kaLasarus mboka ya li ya nika oluhodhi? (b) Omolwashike okunika oluhodhi kwaJesus taku tu tsu omukumo?

⁵ Jesus okwa li e uvite ngiini sho a li a silwa kuume ke? Ehokololo otali tu lombwele kutya Jesus okwa yile kaapambele nokookuume kaLasarus, omanga ya li taya lili oosa dhaLasarus. Sho e ya mono taya lili, osha li she mu gumu noonkondo. Okwa “hendwa komutima noku uvite uudhigu meni lye.” Opo nduno ehokololo otali ti: “Jesus okwa lili.” (Johannes 11:33, 35) Mbela okunika oluhodhi kwaJesus okwa li taku ulike kutya ke na etegameno? Hasho nando. Jesus okwa tseya kutya opwa li tapu ka ningwa oshinima oshikumithi. (Johannes 11:3, 4) Ihe nonando ongaaka, okwa li e uvite uuwehame noluhodhi mbyoka hayi etithwa kokusilwa.

 ⁶ Okunika oluhodhi kwaJesus otaku tu tsu omukumo momukalo gwontumba. Otaku tu longo kutya Jesus naHe, Jehova, oye tonde eso. Ihe Jehova Kalunga ota vulu okukondjitha omutondi ngoka noku mu sinda. Natu taleni shoka Kalunga a li a vulitha Jesus a ninge.

7, 8. Omolwashike mboka ya li po taya tala ya li ye wete kaapu na etegameno okumona ishewe Lasarus, ihe Jesus okwa li a ningi po shike?

⁷ Lasarus okwa li a fumvikwa mekololo, ihe Jesus okwa pula opo emanya ndyoka lya li lya siikila ko li kuthwe ko. Marta okwa li e shi tindi molwaashoka konima yomasiku gane, olutu lwaLasarus olwa li lwa tameke okwoola. (Johannes 11:39) Pataloko lyopantu, etegameno lini lya li po?

⁸ Emanya olya li lya kuthwa po, Jesus e ti igidha newi lyomuule a ti: “Lasarus, za mo!” Mbela oshike sha li sha ningwa po? “Lasarus, ngoka a li a sa, okwa zi mo.” (Johannes 11:43, 44) Dhiladhila owala kutya aantu mboka ya li po oya li ya nyanyukwa shi thike peni. Kutya nduno Lasarus okwa li omumwayinamati gwawo, omupambele gwawo, kuume kawo nenge omushiinda shawo, oya li ye shi kutya okwa li a sa. Ihe ngashingeyi omuholike gwawo nakuume kawo ngoka okwa li a thikama ishewe mokati kawo. Shoka osha li oshinima oshikumithi noonkondo. Kapu na omalimbililo kutya oyendji oya li ya papatele Lasarus nenyanyu. Eso kalya li tuu lya sindwa!

9, 10. (a) Jesus oku ulike ngiini kutya oonkondo dhe dhokuyumudha Lasarus okwe dhi pewa kuJehova? (b) Omauwanawa gamwe geni taga monika mokulesha omahokololo gOmbiimbeli ge na ko nasha neyumuko?

⁹ Jesus ka li a popya kutya ota ka longa oshikumithalonga shoka koonkondo dhe mwene. Ihe manga ini ithana mo Lasarus mombila, okwa li e shi yelitha nawa megalikano kutya Jehova oye a li e mu pe oonkondo dhoku mu yumudha. (Johannes 11:41, 42) Ndjoka hayo awike ompito Jehova a li a longitha oonkondo dhe komukalo ngoka. Eyumuko lyaLasarus oli li owala limwe lyomiikumithalonga omugoyi yeyumuko mbyoka ya nyolwa mOohapu dhaKalunga. * Okulesha nokukonakona omahokololo ngoka  otashi nyanyudha. Otage tu longo kutya Kalunga ke na okatongotongo, molwaashoka mboka ya li ya yumudhwa oya li ya kwatela mo aagundjuka naakulupe, aalumentu naakiintu, Aaisraeli nosho wo mboka kaaye shi Aaisraeli. Aantu mboka taya hokololwa mOmanyolo ngoka kaya li tuu ya nyanyukwa! Pashiholelwa, sho Jesus a li a yumudha okakadhona okagundjuka kuusi, osha yela kutya aavali yako oya li ya nyanyukwa noonkondo. (Markus 5:22-24, 38-42) Eeno, Jehova okwa li e ye etele enyanyu ndyoka lya li itaaye ke li dhimbwa nando.

¹⁰ Odhoshili kutya mboka ya li ya yumudhwa kuJesus lwahugunina oya ka sa ishewe. Mbela shono osha hala okutya okuyumudhwa kwawo kakwa li ku na ekwatho lyasha? Hasho nandonando. Omahokololo ngoka gOmbiimbeli otaga koleke oshili ya simana notage tu pe etegameno.

11. Ongiini ehokololo lyokuyumudhwa kwaLasarus lya kwathele mokukoleka oshili ndjoka ya nyolwa mOmuuvithi 9:5?

¹¹ Ombiimbeli otayi ti kutya ‘aasi inaya tseya sha nando.’ Kaye na omwenyo nokaye na mpo ye li ye na shoka ye shi. Ehokololo lyaLasarus otali koleke oshili ndjika. Sho Lasarus a yumuka, mbela okwa li ta hokololele aantu a nyanyukwa shi na ko nasha nomegulu? Nenge mbela okwa li e ya tilitha nomahokololo omatilithi ge na ko nasha nokupya moheli? Aawe. MOmbiimbeli kamu na nando oohapu dha tya ngaaka dha popiwa kuLasarus. Uule womasiku gane ngoka a li a sa, ka li a “tseya sha nando.” (Omuuvithi 9:5) Lasarus okwa li owala a kotha meso.—Johannes 11:11.

12. Omolwashike tatu vulu okukala nuushili kutya Lasarus okwa yumudhwa shili?

¹² Ehokololo lyaLasarus otali tu lombwele wo kutya eyumuko kali shi owala ongano, ihe oli li oshinima sholela. Jesus okwa li a yumudha Lasarus montaneho yongundu yaantu mboka ya li po taya tala. Nokuli naakwatelikomeho yomalongelokalunga mboka ya li ye tonde Jesus kaya li ya pataneke oshikumithalonga shoka. Pehala lyaashono oya ti: “Otu na okuninga ngiini? Oshoka omulumentu nguka [Jesus] ota longo unene iikumithalonga  oyindji.” (Johannes 11:47) Aantu oyendji oya yile ya ka tale omuyumudhwa Lasarus. Oshizemo, nokuli oyendji yomuyo oya li yi itaale Jesus. Sho ya mono Lasarus ngoka omuyumudhwa, osha li uunzapo kuyo kutya Jesus okwa li a tumwa kuKalunga. Molwaashono uunzapo mboka owa li wa kola, yamwe yomaakwatelikomeho yelongelokalunga lyOshijuda yomitima omikukutu oya li ya pangele ompangela okudhipaga Jesus naLasarus.—Johannes 11:53; 12:9-11.

13. Etompelo lini tali tu itaalitha kutya Jehova ota vulu okuyumudha shili oonakusa?

¹³ Mbela oshi li pandunge okwiitaala kutya oku na eyumuko? Eeno, molwaashoka Jesus okwa ti kutya monakuyiwa “ayehe mboka ye li moombila” otaa ka yumudhwa. (Johannes 5:28) Jehova oye Omushiti gwaayihe yi na omwenyo. Mbela oshidhigu okwiitaala kutya ota vulu okuyumudha mboka ya sa? Oshoshili kutya oshindji oshi ikolelela kedhimbuluko lyaJehova. Mbela ota vulu ngaa okudhimbulukwa oonakusa yetu aaholike? Egulu oli na oonyothi odhindji itaadhi vulu okuyalulwa, ihe Kalunga kehe yimwe ohe yi ithana kedhina lyayo. (Jesaja 40:26) Onkee ano, Jehova Kalunga ota vulu okudhimbulukwa okanima kehe ke na ko nasha noonakusa yetu aaholike nota vulu oku ya yumudha.

14, 15. Ngaashi shu ulikwa kwaashono Job a popi, Jehova oku uvite ngiini shi na ko nasha nokuyumudha oonakusa?

¹⁴ Ihe mbela Jehova oku uvite ngiini shi na ko nasha nokuyumudha oonakusa? Ombiimbeli otayi ti kutya okwa halelela okuyumudha oonakusa. Omulumentu omudhiginini Job okwa pulile a ti: “Omuntu ngele okwa si, ota kala ishewe e na omwenyo?” Job okwa li ta popi shi na ko nasha nokutegelela mombila sigo ethimbo lyaKalunga lyoku mu dhimbulukwa tali thiki. Okwa lombwele Jehova a ti: “Oto ka ithana ndje notandi ku itaale; oto ka yuulukwa omushitwa gwoye.”—Job 14:13-15.

¹⁵ Dhiladhila owala kwaashono! Jehova okwa yuulukwa shili okuyumudha oonakusa. Mbela itashi nyanyudha omutima gwoye okutseya kutya Jehova osho e uvite ngawo? Ihe ongiini shi na ko nasha neyumuko ndyoka lyomonakuyiwa? Oolye taya ka yumuka, notaya ka yumudhilwa peni?

16. Oonakusa otaya ka yumudhwa ya kale moonkalo dha tya ngiini?

¹⁶ Omahokololo gOmbiimbeli ge na ko nasha nokuyumudha otage tu longo oshindji kombinga yeyumuko lyomonakuyiwa. Aantu mboka ya li ya yumudhilwa kombanda yevi oya li ya hangana ishewe naaholike yawo. Eyumuko lyomonakuyiwa nalyo osho tali ka kala ngawo, ihe otali ka kala lya dhenga mbanda noonkondo. Ngaashi twi ilonga mOntopolwa onti-3, Kalunga okwa hala evi alihe li ninge oparadisa. Onkee ano, oonakusa itaya ka yumudhwa ya kale nomwenyo muuyuni wu udha iita, omuyonena nosho wo omikithi. Otaya ka kala ye na ompito okukala nomwenyo sigo aluhe kombanda yevi monkalo yombili noyinyanyudha.

17. Mbela aantu ye thike peni taya ka yumudhwa?

¹⁷ Oolye taya ka yumudhwa? Jesus okwa ti kutya ‘ayehe mboka ye li moombila otaye ku uva ewi lye. Oyo notaa ka za mo.’ (Johannes 5:28, 29) Sha faathana, Ehololo 20:13 otali ti: “Efuta olya gandja aasi mboka ya sile mulyo. Eso noshaasi oya gandja wo aasi mboka ya li mo.” ‘Oshaasi’ otashi ulike kehala lyopathaneko moka hamu yi aasi oyendji. (Tala Oshigwedhelwako pepandja 212-213.) Ehala ndyoka otali ka kala owala. Aantu omamiliyona omayovi ayehe mboka taya vululukwa moka, otaya ka kala ishewe nomwenyo. Omuyapostoli Paulus okwa ti: “Kalunga ota ka yumudha aantu ayehe kuusi, naawanawa naawinayi.” (Iilonga 24:15) Mbela shoka osha hala okutya ngiini?

18. Oolye ya kwatelwa ‘maawanawa’ mboka taya ka yumuka, netegameno ndyoka olye ku guma ngiini pauhandimwe?

¹⁸ ‘Aawanawa’ oya kwatela mo aantu oyendji mboka taya popiwa mOmbiimbeli, mboka ya li ko manga Jesus a li inee ya kombanda yevi. Otashi vulika u dhiladhile kombinga yaNoowa, Abraham, Sara, Moses, Rut, Ester nosho wo ooyakwawo oyendji. Yamwe yomaalumentu naakiintu mbaka ye na eitaalo oya popiwa montopolwa onti-11 yAahebeli. Ihe ‘aawanawa’ oya kwatela mo wo aapiya yaJehova mboka taya si pethimbo lyetu. Omolwetegameno lyeyumuko, otatu vulu okukala twa manguluka kuumbanda wokutila eso.—Aahebeli 2:15.

19. ‘Aawinayi’ mboka taya popiwa kOmbiimbeli oyo oolye, na Jehova pahole ye ote ke ya pa ompito ya ninge shike?

 ¹⁹ Ongiini kombinga yaantu ayehe mboka inaaya longela Jehova nenge inaaya vulika kuye molwaashoka inaaye mu tseya nando onale? Aantu mboka ‘aawinayi’ omamiliyona omayovi itaya ka dhimbiwa. Nayo otaya ka yumudhwa nokupewa ompito yi ilonge kombinga yaKalunga kashili noku mu longela. Pethimbo lyoomvula eyuvi, oonakusa otaya ka yumuka nokupewa ompito ya longele Jehova pamwe naantu aadhiginini kombanda yevi. Otashi ka kala ethimbo linyanyudha. Ethimbo ndyoka otali popiwa kOmbiimbeli li li Esiku lyEpangulo. *

20. Gehenna oshike, noolye haya yi mo?

²⁰ Mbela shoka osha hala okutya omuntu kehe ngoka a li ko nale ota ka yumudhwa? Aawe. Ombiimbeli otayi ti kutya oonakusa yamwe oye li muGehenna, shoka sha tolokwa ‘oheli’ mOmbiimbeli yOshindonga. (Lukas 12:5) Oshitya Gehenna osha yela kutya osha za kedhina lyehala lyiiyagaya ndyoka lya li kondje yaJerusalem shonale. Olya li ehala lyokufikila omidhimba dhoonakusa nosho wo iiyagaya. Oonakusa mboka ya li hayu umbilwa mo oya li ya talika ko kAajuda kutya inaya gwana okufumvikwa nokuyumudhwa. Onkee ano, Gehenna oshi li endhindhiliko lye eleka lyehanagulo lyaaluhe. Nonando Jesus oye ta ka kala e na oshinakugwanithwa shokupangula aanamwenyo naasi, Jehova oye Omupanguli omunenenene. (Iilonga 10:42) Ita ka yumudha nando mboka a tala ko ye li aakolokoshi noinaya hala okulundulula omikalo dhawo.

21, 22. (a) Oku na eyumuko lilwe lini? (b) Olye a li a yumudhilwa tango omwenyo gwopambepo?

²¹ Ombiimbeli otayi popi wo eyumuko lilwe lyi ili moka aantu yamwe taya ka yumukila oku ka kala nomwenyo megulu ye li iishitwa yopambepo. Oshiholelwa owala shimwe sheyumuko ndyoka sha nyolwa mOmbiimbeli, osho eyumuko lyaJesus Kristus.

²² Sho Jesus a li a dhipagwa e li omuntu gwokombanda yevi,  Jehova ine etha Omwana omudhiginini a kale mombila. (Episalomi 16:10; Iilonga 13:34, 35) Kalunga okwa yumudha Jesus, ihe ine mu yumudha e li omuntu gwokombanda yevi. Omuyapostoli Petrus okwa yelitha kutya Kristus “okwa dhipagwa palutu nokwa tulwa omwenyo pambepo.” (1 Petrus 3:18) Shoka osha li lela oshikumithalonga oshinene. Jesus okwa ningi ishewe omwenyo e li omuntu omunankondo gwopambepo. (1 Aakorinto 15:3-6) Jesus oye a li gwotango ngoka a yumudhwa eyumudho ndyoka ekumithi. (Johannes 3:13) Ihe ka li ta ka kala gwahugunina.

23, 24. Oolye ye li “oshigunda oshishona” shaJesus, noye li yangapi?

²³ Molwaashoka Jesus okwa li a tseya kutya ota ka shuna nziya megulu, okwa li a lombwele aalanduli ye aadhiginini kutya ote ke ya “longekidhila ehala.” (Johannes 14:2) Jesus okwi ithana mboka taya yi megulu “oshigunda oshishona.” (Lukas 12:32) Aantu yangapi taya ka kala moshigunda shono oshishona shAakriste aadhiginini? PaHololo 14:1, omuyapostoli Johannes okwa ti: “Onda mono ko Onzigona [Jesus Kristus] a thikama kondundu yaSioni. Pamwe nOnzigona okwa li aantu 144 000 mboka ya ndhindhilikwa edhina lye nolyaHe miipala yawo.”

²⁴ Aakriste mboka 144 000, mwa kwatelwa aayapostoli yaJesus aadhiginini, ohaya yumudhilwa omwenyo gwomegulu. Eyumudho lyawo olya li tali ka tameka okuningwa uunake? Omuyapostoli Paulus okwa nyola kutya otali ka ningwa pethimbo lyokukala po kwaKristus. (1 Aakorinto 15:23) Ngaashi to ki ilonga mOntopolwa onti-9, otu li pethimbo ndyoka ngashingeyi. Onkee ano, oshihupe oshishona shaantu 144 000 mboka taya si pethimbo lyetu ohaya yumudhilwa omwenyo gwomegulu mepathimo lyeho. (1 Aakorinto 15:51-55) Ihe aantu oyendji oye na etegameno lyoku ka yumudhilwa omwenyo monakuyiwa mOparadisa kombanda yevi.

25. Oshike tashi ka kundathanwa montopolwa tayi landula?

²⁵ Eeno, Jehova ota ka sinda shili omutondi gwetu eso note ke li hulitha po sigo aluhe. (Jesaja 25:8) Ihe otashi vulika u ipule to ti: ‘Mboka taya ka yumudhwa ya ka kale megulu, otaya ka ninga mo shike?’ Otaya ka kala ye li oshitopolwa shepangelo lyUukwaniilwa uukumithi womegulu. Otatu ki ilonga oshindji shi na ko nasha nepangelo ndyoka montopolwa tayi landula.