1-3. Ngaibo lokasurup loerukitor oni kere, ido kanukinyo epedoria angic nuisisianakini Ebaibuli ainakin oni ainapakin?

KINOMA ber ijo aputo bala ijai ijo akerit kanejai lokasurup loededeng noi. Erai loegogong noi ido kotirono adepar ijo. Ijeni ijo ebe mam ngesi erai loitimono naarai iwanyunitor ijo ngesi eari ice kopaperokon. Karaida itam ijo nuipedori kere ailanya ngesi, iyatakit ngesi edudungikit ijo. Esubit do bala emamei amuno. Konye katipet, kotakanuni do ekayuaran kosiepukon. Egogong ngesi noi aitelekar lokasurup kon, ido isumunit ngesi aingarakin ijo. Ipupuni do teni ijo aiyalama naepol!

² Kabeit cut, kirukitor ijo lokasurup kwape kangol. Oni kere kirukitere. Kwape idaunitor oni aisisiaun kosula loatubor, enyarit Ebaibuli atwanare lokasurup. Emamei idiopet kaoni yen epedori ailanya karaida aipikor nges. Luipu kaoni, iwayunit loasurup lo eyari itunga luimina wok. Konye egogong noi Yawe adepar atwanare. Erai ngesi Ekayuaran loemina loadau aitodun ebe epedori ngesi aipikor lokasurup lo. Ido isumunit ngesi amudiar atwanare,loasurup lo, irwan tipet bon. Isisianakini Ebaibuli ebe: “Lokasurup lokawasia amudiario ŋes atwanare.” (1 Ikorinton 15:26) Eraas ngun akiro nukajokak!

 ³ Kaanyutu ber oni kaurianut epone loikijakinor oni nekisurokin oni lokasurup wok, atwanare. Aswam nu ingarakini oni aisialamikin ibore yen einakini oni alakar cut. Eebo, isumunit Yawe ebe ejarunete bobo lukatwaka. (Isaia 26:19) Ebunio ainyakun kesi toma aijar. Ngin ngesi amuno naka ajarun.

4. (a) Inyo isisianakina oni epone loabu Yesu kojaikinor neatwania lominatake nuikamunitos epone loepupio Yawe? (b) Anibo epaperone lo eumokina loabu Yesu koduk?

⁴ Itwaniaritor ijo yeniminat kon kotoma atwanare? Ibuni apupun apipilu noi, akudian, komamei agogong ka amuno kosubite bala mam ijo ipedori angirikin. Kapakio kwangun, ibusakinit oni aisiom Akirot naka Edeke kanuka aitalakario. (2 Ikorinton 1:3, 4) Ingarakinit oni Ebaibuli amisikin epone loepupioto Yawe ka Yesu kanuikamunitos atwanare. Yesu loabu kotupite Papake kadolit cut, ajeni apipilu nakatwaniar itunganan kotoma atwanare. (Yokana 14:9) Neajaar ngesi Yerusalem, atapit Yesu aipejonokin Lasaro nepepe ka ainacanake, Mariam ka Marita, lueboete ko Betaniya ere loayapiei Koyerusalem. Araasi ipapero luedicasi noi. Ebala Ebaibuli ebe: “Komina Yesu Marita ka inacike, ka Lasaro da.” (Yokana 11:5) Kwape isisiator oni kosula loatubor, abu Lasaro kotwana.

5, 6. (a) Epone ani abu Yesu kojaunor neajaar ngesi kede ekale ka ipapero luka Lasaro luamonyete? (b) Kanukinyo itogogongitor oni aimony naka Yesu?

⁵ Epone ani abu Yesu kopupunio akaulo natwania opaperoke? Nuiwadikatai ebalas ebe, abu Yesu kimorikikinos kede ipajan ka ipapero luka Lasaro aimony. Nakeanyunia Yesu kesi, abu “komulau eketau, kokadak.” Iyatakit akirot ebe: “Komony Yesu.” (Yokana 11:33, 35) Konye, etodunit kereka aimony naka Yesu ebe amameotor ngesi kede amuno? Mam cut. Abeit, ajeni Yesu cut ebe ebeit iciebore yen eumokina noi aiswamaun. (Yokana 11:3, 4) Konye, abu ngesi kopup apipilu naeyauni atwanare.

 ⁶ Itigogongit oni aimony naka Yesu. Isisianakini oni ebe Yesu ka Papake Yawe, elaitos atwanare. Konye epedori Edeke Yawe aitiji ka aipikor lokasurup ngol! Kaanyutu ber nuabu Edeke kisipedo Yesu aswam.

7, 8. Kanukinyo asubitor ejautene loka Lasaro bala loamamei amuno kotunga lueteete, konye inyo abu Yesu kiswama?

⁷ Edaikitai Lasaro abua, ido kicorak Yesu alemario naka amoru na arapit ates. Abu Marita kitepeg naarai akaulo naka apaarasia awongon ageunit akuan naka Lasaro aibos. (Yokana 11:39) Kanejaasi itunga, inyoin bodo amuno najai?

⁸ Kikokororai amoru awai, kosodi Yesu aiworor keporoto loepol ebe: “Lasaro, kolom!” Inyo abu kiswamaun? “Kolom lokatwan.” (Yokana 11:43, 44) Ipedori ijo aanyun ailel nakaitunga luajaasi nen? Arai kerai Lasaro onacekec, epajanakec, opaperokec, eidunyetekec, ajenete kesi ebe atwanit ngesi. Konye etunganan ngopongon loaminas kesi​—ebwoi kokiding kec bobo. Kesubitos ngun bala ti numam kepedoros. Komam abounokin, apotu luipu kotunutunata Lasaro kaiyalama naepol noi. Arai teni na aipikorio alopet naka atwanare!

9, 10. (a) Epone ani abu Yesu kitoduna alibunet naka akepedor naka aitajarun Lasaro? (b) Anyoin ameda naisiom akiro nuka Ebaibuli nuikamunitos ajarun?

⁹ Mam Yesu aomit ebe eswamai ngesi aumokinete na kangogong ke. Kotoma ailipike eroko ngesi kiworora Lasaro, abu ngesi kitacau ebe Yawe ainakin ngesi agogongo naitajarun. (Yokana 11:41, 42) Mam na erai apak bon naetosomator Yawe akepedor koipone kalo. Aitajaruno naka Lasaro nges adiopet kaumokinet nuka epone kalo akanyangon nuiwadikatai Akirot naka Edeke. * Aisiom ka aisisia akiro nu italakarete oni. Isisianakinete oni ebe mam Edeke etiakatiakai,  naarai luaponi kitijarunai emoriaritos idwe ka ipolok, ikiliok ka angor, Iyudayan ka Imo. Ido nuitetemitai kakiro kanu itodunitos ebe, adumunitos itunga alakara napol noi! Kwape aanyunet, netajaruna Yesu apese natwanit, ‘koumokis ikeuriak kaumokin naepol noi.’ (Marako 5:42) Kabeit, abu Yawe kiswamaik kesi akiro nuka aiyalam numam kesi apedoret aimurokin cut.

¹⁰ Karaida, apotu ngul luabu Yesu kitajarunite kotwakata bobo. Apolouke ebe, kamamei do ajokis aitajarun kesi? Mam cut. Itigogongitos akiro nu nuka Ebaibuli abeit naepol ido einakinitos oni amuno.

11. Epone ani ingarakina ajarun naka Lasaro aitogogong abeit naiwadikatai toma Ekalimonokinan 9:5?

¹¹ Isisiakini Ebaibuli ebe “mam ikatwak ejenete ibore.” Itigogongitos akiro nuka Lasaro abeit nakakiro kangun. Akaulo nakaitajaruno, abu kereka Lasaro kitatamanak itunga eipone loejar kuju? Arai bo abu kereka ngesi kitukurian itunga kede akiro nuikanunitos egeyana loenoki? Mam cut. Mam Ebaibuli ejaatar akiro kwangun kanejai Lasaro. Kapaarasia awongon nuatwanitor ngesi, ‘amamei ibore ajeni’ ngesi cut. (Ekalimonokinan 9:5) Ajotoi Lasaro kotoma atwanare.​—Yokana 11:11.

12. Kanukinyo ijenia oni ebe abu teni aitajaruno naka Lasaro kotakanunite?

¹² Isisianakinete bobo oni akiro nuikamunitos Lasaro ebe eraasi aisumuneta nuka ajarun nuka abeit cut, mere awaragan. Abu Yesu kitajaru Lasaro koingaren ekodet loka itunga luasesenete. Karaida engarenok luka idiinin luangarasi Yesu, acamunitos ebe abu teni aumokinet na kiswamaun. Konye, apotu kotemasi ebe: “Kikwaikini ai? Naarai iswamai etuŋanan ŋol [Yesu] aanyununeta nuipu.” (Yokana 11:47) Apotu itunga luipu kolototo aanyun Lasaro  loetajarutai. Kanukangun, apotu luipu kiyuutu Yesu. Apotu koanyutu kanejai Lasaro abeit ebe kerai teni Yesu loejukunit Edeke. Karai na aanyunet napol noi nabu koinak ice koingarenok luka ediini loka Iyudayan luaninik itauon noi, aitemonokin aiyar Yesu ka Lasaro da.​—Yokana 11:53; 12:9-11.

13. Anyoin abwoetait nakijaar oni kanu aiyuun ebe epedori cut Yawe aitajarun itunga luetwakitos?

¹³ Konye erai kereka aisumunet naka ajarun naka abeit? Eebo, naarai abu Yesu kisisianak ebe, adiopepak ngul “kere luejaas toma atesin” ejarunete. (Yokana 5:28) Yawe ngesi Lokasuban aijar kere. Etiono kereka do acamun ebe epedori bobo ngesi aisub aijar? Kanu bobo lukatwak abongun toma aijar, elomun koipone loiitunio Yawe kesi. Konye epedori kereka ngesi aiitun luminan wok luetwakitos? Ejaasi imilionin ka imilionin nuka aicer numam imarasi kuju, konye emaanakinit Edeke nginidiopet kakesi ekiror! (Isaia 40:26) Kanuka ngun, epedori Edeke Yawe aiitun luminan wok luetwakitos kaidules, ido ekapakina ngesi ainyakun kesi toma aijar.

14, 15. Kwape itodunitotor akiro nuabu Yob kolim, eipone ani epupia Yawe kanu ainyakun lukatwak toma aijar?

¹⁴ Konye epone ani epupio Yawe kanu aitajarun lukatwak? Isisianakini Ebaibuli ebe ekapakina ngesi aitajarun lukatwak. Abu Yob etunganan loadolit kingit ebe: ‘Arai ketwana ituŋanan ejarun kereka bobo ngesi?’ Enera Yob nuikamunitos aidareun kotoma ates kiton ne edoluna apak na Edeke aiitun ngesi. Abu kolimok Yawe ebe: “Tikinyarau, eoŋ da eii: tiimiela aswam naka akaninikon.”​—Yob 14:13-15.

¹⁵ Komoom ber ijo! Ebe imiela cut Yawe ainyakun lukatwak toma aijar. Mam kereka nu eraasi nuitalakarete, ajenun ebe ipuda Yawe aitajarun lukatwak? Idobodo ajarun naisumunitai nakoingaren? Ingaibo itajarunio, ido aibo?

16. Itajaruno lukatwak toma ojautene loka eipone ani?

¹⁶ Isisianakinete oni akiro nuka ajarun nuejaasi Obaibuli nuipu nuikamunitos ajarun nakoingaren. Itunga luetajaruno kane akwap, apotu kimorikikinos bobo kaluminan kec. Ajarun nakoingaren da ejaun kwape kwangin​—konye korai naitelekarit. Kwape kisisiator oni Kosula 3, erai alosikinet naka Edeke aitaraun akwap kere eparadais. Aso, mam itajaruno lukatwak toma akwap naileleba ejie, amengeranut, ka adeka. Edumunete kesi arereng naijar ikar kere kotoma akwap kana kojautene loinapakina ka aiyalama.

17. Lubo angai ebeit aitijarun?

¹⁷ Ingai bo itajaruno? Abala Yesu ebe ‘ngul kere luejaas toma atesin nuiitunitai, iirarete ekeporoto [Yesu], elomunete da.’ (Yokana 5:28, 29) Kwape kwangin, ebala Apukokinio 20:13 ebe: “Kijaik aŋolol lukatwak lukejaas tomakeŋ, Atwanare da ka Okatwak kijaikis lukatwak lukejaas tomakec.” “Okatwak” nges ates naitunga kalu etwakito. (Koany nuiyatakinitai apapulai 212-13.) Mam lukatwak esalakinete atesin. Ejarunete bobo ibilionin kere luajaas toma atesin. Abala ekiyakia Paul ebe: “Ejaun ajarun naka luedolito ka lumam edolito da.” (Aswamisio 24:15) Inyo apolou kakiro kangun?

18. Lubo angai imoriaritos “luedolito” luebunio aitajarun, ido epone ani kitiroritor ijo amuno na?

¹⁸ “Luedolito” imoriatos itunga luipu luisiomi oni kotoma Obaibuli luejaasi eroko Yesu kebuno toma akwap. Ipedori ijo aiitun itunga kwape nat luka Noa, Aburam, Sara, Musa, Rusi, Esita, ka ice da luipu. Ice kotoma otunga kalu, itetemitai kosula lo 11 loka Iburanian. Konye “luedolito” imoriaritos bobo da ejanakinak luka Yawe luetwakete apaarasia nu. Epolo oni alakara kanuka amuno naka ajarun, naarai elemarit kanei ijai oni akuriau naka atwanare.​—Iburanian 2:15.

19. Lubo angai “lumam edolitos,” ido anyoin arereng naijaikinit Yawe kesi kasianut ke?

¹⁹ Dobodo itunga kere lumam apotu kijaanakitos araibo  korimaritos Yawe naarai mam ajenete nuekamunitos ngesi? Mam imurokinio ibilionin lu luka itunga “lumam edolito.” Itajaruno kesi da kosodete aijaikin arereng naisisia abeit naikamunit Edeke lokabeit kaijaanakin ngesi. Kotoma apak na ikar elukumit, itajaruno lukatwak kosodete aijaikin kesi arereng naka aima Yawe nepepe kaluedolito. Eraun teni na apak naeumokina noi. Na ngesi apak na enyarit Ebaibuli kwape Apaaran naka Etube. *

20. Inyoin bo Egeena, ido itunga luepone bo ani elosete toma ke?

²⁰ Konye erai kereka apolou kana ebe ebunio aitajarun nginitunganan kere yen iboitor kakwap? Mam. Ebala Ebaibuli ebe ice kalukatwak ejaasi toma “ogeena.” (Luka 12:5) Abu egeena kodum ekekiror kotoma aiboisit na acakio agasia najai kinga naka ere Yerusalem nakolo. Iboro luatwak ka agasia kesi ecweenono kanen. Itunga lukatwak lu acakanakino nen, ayangaritar kwape lumam ebusakinit aida ka ajarun. Kanukangun, erai Egeena aitupuset naka amudiario naka ikar kere. Karaida ejaatar Yesu kede apedor naka atubokin lukajarak ka lukatwak, Yawe ngesi Ekatubon lokawasi. (Aswamisio 10:42) Mam cut ngesi itajaruni ngul luadau ngesi atubokin kwape lukaronok ido komam ekotosi aijulakin.

21, 22. (a) Anyoin bobo ace ajarun naebeit ajaikin? (b) Ingai bo losodit kakere aige aitajaruno toma aijar naka emoyo?

²¹ Itetemit bobo Ebaibuli ajarun ace, aitajaruno toma aijar naka emoyo kokuju. (Apukokinio 20:6) Ajarun adiopet bon naka epone kalo nges ijai toma Obaibuli, ngin naka Yesu Kristo.

²² Akaulo nayarere Yesu kwape etunganan, mam Yawe abu kocamac Okokuke lomunot apaikin toma ates. (Isabulin 16:10; Aswamisio 13:34, 35) Abu Edeke kitajaru Yesu, konye mere kwape etunganan. Itetemit ekiyakia Petero ebe Yesu  “nakearere akuanake . . . koinakinai aijar kotoma omoyo.” (1 Petero 3:18) Arai na cut kabeit aumokinet naepol. Kobong do bobo Yesu aijar kwape etunganan lomoyo lokapedor! (1 Ikorinton 15:3-6) Arai Yesu losodit kakere aige aitajaruno koipone kalo loabuses. (Yokana 3:13) Konye mam ngesi abu koraun lokawasia.

23, 24. Lubo angai iswamaunitos “esipan loedit” loka Yesu, ido eraasi kesi kere imwasai?

²³ Kwape ajenia ngesi ebe ayapiei abongor toma akuju, abu Yesu kolimok aketupitok lumunon ebe, alosi “aitemokin yes aibois” ngina. (Yokana 14:2) Anyarit Yesu ngul luelosete kuju kwape “esipan loedit.” (Luka 12:32) Itunga bo imwasai ejaunos toma osipan loedit lo loka Ikristayon lumunon? Kotoma Apukokinio 14:1, ebala ekiyakia Yokana ebe: “Kasodi kaany, ido koany, kobwoi Imerekek [Yesu Kristo] komoru Sion, ka ituŋa ilukumin akwatat ka akaisaoŋon ka luoŋon nepepe kaŋes, luiwadikatai ekirorike, ka ekiror loka Papake oretekec.”

²⁴ Ikristayon lu 144,000, aimoriaritos ikiyakia lumunon luka Yesu, lu ebunio aitajarun alosit kuju. Iwori bo ejaunor aitajarunokec? Abu ekiyakia Paul kiwadik ebe epote ngun aiswamaun kapak naebunio Yesu. (1 Ikorinton 15:23) Kwape ibunio ijo aisisiaun Kosula 9, iboie oni kwana kotoma apak kangin. Idis luideuna kotoma 144,000 luetwakete apaarasia wok nu, erasakino aitajarun toma aijar nakalosit kuju. (1 Ikorinton 15:51-55) Konye ekodet loka itunga loepol noi kesi ejaasi kede amuno naka ajarun koingaren toma aijar naeboi kotoma aparadais kakwap.

25. Anyoika nuibuni oni aisisia kosula loetupakini?

²⁵ Eebo, ebuni Yawe cut aipikor atwanare lokasurup wok, ido emameun cut ikar kere! (Isaia 25:8) Konye, aticepak ipedori ijo abuonokin ebe, ‘inyoin bo epote ngul luitajaruno alosit aswam kuju?’ Epote kesi adukun Ajakanut naeumokina kotoma akuju. Ibuni oni aisisia nuipu nuikamunitos Ajakanut ngin kosula loetupakini.