1—3. Бисти кандыг дайзын истеп-сүрүп турарыл, база Библия биске кандыг оожургалды берип турар?

 КОРГУНЧУГ дайзындан дезип турар дижик сен. Ол сенден оранчок күштүг болгаш кашпагай. Ол дайзын кээргел чок деп билир сен, чүге дээрге сен көрүп туруңда-ла, ол элээн каш эштериңни өлүрген. Оон канчаар-даа кызып дезериңге, ол сенден чыда калбайн, чоокшулап кел-ле чыдар. Идегел чок ышкаш сагындырар. Ынчалзажок хенертен дайзындан оранчок күштүг камгалакчы тыптып келгеш, сеңээ дузалаарын аазаан. Кандыг кончуг чиик апарган чоор!

² Бир талазында сени херек кырында ындыг дайзын истеп-сүрүп турар. Ол кижи бүрүзүн сүрүп турар. Библияда өлүмнү дайзын кылдыр адаанын эрткен эгеден билип алдывыс. Кым-даа оон чайлап шыдавас база аңаа күш четпес. Ол дайзын кижи бүрүзүнүң эргим кижизиниң амы-тынынга четкен. Ынчалза-даа Иегова өлүмден оранчок күштүг. Ол ёзулуг Камгалакчы, ынчангаш ол каржы дайзынны тиилеп шыдаарын ол бадыткаан. Оон артык, өлүмнү кезээ-мөңгеде узуткап кааптар деп, ол аазап турар. Бодунуң Сөзүнде: «Узуткаттырып каар эң сөөлгү дайзын — өлүм» — деп, ол чугаалаан (1 Коринфичилерге 15:26). Кайы-хире кайгамчык аазаашкын чоор!

³ Чок апарган чоок киживистиң өлүмү сеткиливиске кандыг  минниишкиннерни оттурарын боданып көрээлем. Ол минниишкин оожургал эккээр кайгамчык идегелди үнелээринге дузалаар. Өлген улус дирлип кээр деп, Иегова аазаан болгай (Исаия 26:19). Олар амыдыралче катап эглип кээр. Ол чүүл диргизиишкинниң ачызында болдунар.

4. а) Иегованың өлүмге хамаарылгазын билип алырда, Иисустуң чижээн чүге сайгарып көөр бис? б Иисустуң чоок эштери кымнар турганыл?

⁴ Кажан-бир чоок кижиңни чидирген сен бе? Чидиригниң аарышкызы, ажыг-шүжүг болгаш ыы-сыы кижиге шыдажыр арга чок кылдыр сагындырар. Ындыг үелерде оожургалды Бурганның Сөзүнден алыры чугула (2 Коринфичилерге 1:3, 4). Библиядан Иегованың болгаш Иисус Христостуң өлүмге хамаарылгазын билип ап болур. Иисус Адазының бүдүжүн тергиини-биле илереткен, ынчангаш чоок кижиниң өлүмү кайы-хире аарышкы эккээрин ол билир турган (Иоанның 14:9). Иерусалимге баргаш, Иисус Вифания деп кожа суурда Лазарьның, Марияның болгаш Марфаның бажыңынга чаңгыс удаа эвес хонган. Олар ооң чоок эштери апарган. Библияда: «Иисус Марфага, ооң дуңмазынга база Лазарьга ынак турган» — деп бижээн (Иоанның 11:5). Ынчалзажок мурнунда эгеден Лазарь чок апарган деп билип алдывыс.

5, 6. а) Лазарьның төрелдериниң болгаш эштериниң качыгдалы Иисуска кандыг салдарлыг болган? б) Иисус чидиригниң аарышкызын миннип турганы, бисти чүге хөлчок оожургадып турарыл?

⁵ Эргим өңнүүн чидиргеш, Иисус чүнү миннип турганыл? Иисус Лазарьның качыгдаан төрелдерин болгаш эштерин оожургадыр дээш келген деп Библияда чугаалаан. Долгандыр ынча хөй качыгдаан улусту көргеш, Иисус аажок муңгарай берген. Ол боду сеткилинден кажыыдап, хөлзей берген. Иисустуң карааның чажы безин төктү берген (Иоанның 11:33, 35). Ынчалза-даа ооң идегели чок турган деп, ол чүүл көргүскен бе? Чок, Лазарь катап дирлип кээр деп, Иисус билип турган болгай (Иоанның 11:3, 4). Ынчанмыже чидиригниң аарышкызын ол миннип турган.

 ⁶ Иисустуң чоок эжи чок апаарга, ооң качыгдап, ыглап турганы бисти хөлчок оожургадып турар. Чүге дээрге Иисус биле ооң Адазы, Иегова, өлүмнү көөр хөңнү чок деп, ол чүүл көргүзүп турар. Бурган ол каржы дайзынны тиилеп шыдаар! Ынчаарга Иисуска Иегова кандыг күш бергенил, көрүп көрээлем.

7, 8. Чүге Лазарьга канчап-даа дузалаары болдунмас ышкаш болган, ынчалза-даа Иисус чүнү кылганыл?

⁷ Лазарьны куй иштинге орнукшудуп каан турган, ынчангаш Иисус куйнуң аксын дуглап турар дашты чайладыр чууптарын дилээн. Ынчалзажок Марфа ынаваан, чүге дээрге Лазарьның өлгенинден бээр дөрт хонук эрткен. Ооң мага-боду ирип-чыдып эгелээн чадавас (Иоанның 11:39). Ынчаарга өлген кижиге дузалап болур бе?

⁸ Дашты чайладыр чууптарга, Иисус ыыткыр үн-биле алгырган: «Лазарь, куй иштинден үнүп кел!» Хенертен «холдарын болгаш буттарын орнукшудулга шывыглары-биле ораап каан өлген кижи үнүп келген» (Иоанның 11:43, 44). Кижилер кайы-хире амырааныл, чүгле бодап көр даан! Ооң угбалары, төрелдери, өңнүктери болгаш кожалары Лазарьны эгидери болдунмас деп бүзүреп турган. Ынчалза-даа оларның эргим кижизи чанында, дириг болгаш кадык-чаагай. Ол кайгап ханмас чүве-дир! Улус аажок өөрүп, Лазарьны куспактаарынче далашкан чадавас. Шынап-ла, өлүм тиилеттирген!

9, 10. а) Иисуска Лазарьны диргизер күштү кым берген база ону кайыын билир бис? б) Библейжи болуушкуннар биске кандыг оожургалды берип турар, база олар чүнү бадыткап турарыл?

⁹ Иисус бодун алдаржытпайн турган. Лазарьны кыйгырарының бетинде, диргизиишкин кылыр күштү аңаа Иегова берип турарын Иисус мөргүп тургаш, тода көргүскен (Иоанның 11:41, 42). Ынчалза-даа Иегова ол хире кайгамчыктыг арга-биле бодунуң күжүн көргүскени чүгле ол эвес. Бурганның Сөзүнде диргизиишкинниң дугайында тос болуушкун  бижиттинген a. Ол библейжи таварылгаларны номчууру болгаш шинчилээри кайы-хире оожургалдыг деп! Бурган улусту аңгылай көрбес деп, ол болуушкуннар бисти өөредип турар, чүге дизе Бурганның диргискен кижилерниң аразында кандыг-даа назылыг болгаш янзы-бүрү язы-сөөктүг кижилер турган. Ол чугаалар кандыг кончуг өөрүшкү-биле долган чоор! Чижээ, кажан Иисус бичии уругну диргизиптерге, ооң ада-иези «аажок кайгап-хараан» деп Библияда чугаалаан (Марктың 5:42). Оларга Иегованың кылган чүүлү уттундурбас бооп артып калган.

¹⁰ Иисустуң диргискен кижилери чоорту катап өлүп калган. Оларны хейде-ле диргискен дээни ол бе? Чок, болбайн канчаар. Ол библейжи чугаалар чугула алыс шынны бадыткап, биске идегел берип турар.

11. Лазарь дугайында чугаа Екклесиаст 9:5-те бижээн чүүлдү канчаар бадыткап турар?

¹¹ Библия өлген кижилер «чүнү-даа билбес» деп өөредип турар. Оларның угаан-медерели чок. Өлген улус өске оранче чорбайн турар. Лазарьның дугайында чугаа ону бадыткаан. Боданып көрем: Лазарь дирлип келгеш, улустарга дээрде амыр-чыргалдыг амыдырал дугайында чугаалап турган бе? Азы алдыы оранның дугайында коргунчуг төөгүлер-биле оларны коргуткан бе? Чок. Библияда ол дугайында чугаалавайн турар. Лазарь дөрт хүн иштинде өлүг турган: ол медерел чок байдалда бооп, «чүнү-даа билбес» турган (Екклесиаст 9:5). Лазарь анаа өлүмнүң уйгузу-биле удаан турган (Иоанның 11:11).

12. Лазарьның дугайында медээ шынап болган деп, чүге бүзүреп болур бис?

¹² Оон аңгыда, Лазарьның дугайында медээ диргизиишкин шынап болган деп бадыткап турар. Иисус Лазарьны хөй  улус көрүп турда, чуртталгаже эгиткен. Иисусту көөр хөңнү чок шажын башкарыкчылары безин ону хуулгаазын кылган деп чөпшээрежип турган. Харын-даа олар мынча дээннер: «Канчапса экил? Ол кижи [Иисус] хөй-ле кайгамчык чүүлдер кылгаш туруп берди» (Иоанның 11:47). Хөй кижилер дирлип келген Лазарьны көөр дээш, кээп турган. Ынчангаш оларның аразындан хөй кижилер Иисуска бүзүрелди илередип эгелээн. Лазарьны көргеш, Иисусту Бурган чоруткан деп, олар шынзыгып турган. Ол бадыткал болза-даа маргыш чок боорга, чамдык иудей шажын башкарыкчылары Иисус биле Лазарьны өлүрерин безин шиитпирлээн (Иоанның 11:53; 12:9—11).

13. Иегова чок апарган кижилерни катап диргизип шыдаар деп, кайыын билир бис?

¹³ Ынчалза-даа диргизиишкинге бүзүрээри шын бе? Ынчанмайн канчаар, «чевеглерде чыдар бүгү улусту» катап диргизер үе чедип кээр деп, Иисус өөредип турган болгай (Иоанның 5:28). Иегова — бүгү амылыг чүүлдүң Чаяакчызы. Бодунуң чаяалгаларының амы-тынын катап эгидери аңаа таанда берге боор деп бе? Дыка хөй чүүл Иегованың сактып алганындан хамааржыр. Бистиң чок апарган чоок кижилеривисти ол сактып шыдаар бе? Бодап көр даан: Октаргайда санап четпес хөй сылдыстар бар, ынчалза-даа Бурган сылдыс бүрүзүнүң адын безин билир! (Исаия 40:26). Ынчангаш Иеговага бистиң чок апарган чоок улустарывыстың аажы-чаңының онзагай талаларын сактып алыры берге эвес. Ол бистиң эргим кижилеривисти чуртталгаже катап эгидип шыдаар.

14, 15. Иовтуң сөстеринден алырга, Иегованың диргизиишкинге хамаарылгазы кандыгыл?

¹⁴ Ынчалза-даа Иегова чок апарган кижилерни диргизерин күзээр бе? Ынчанмайн канчаар, ол дугайында Библияда чугаалаан. Чөп-шынныг Иов Бургандан бир катап айтырган: «Кажан кижи өлүп каарга, ол катап чурттаар бе?» Ол сөстер-биле Иов: „Бир эвес өлүп каар болзумза, Бурганның сактып кээрин манап, чевегге чыдар мен“ — дээн. Оон Иов Иеговага чугаалаан: «Сен кыйгырарыңга, мен сеңээ харыылаар мен. Холуң-биле кылган чаяалгаңны чоктай бээр болгай сен» (Иов 14:13—15).

 ¹⁵ Чүгле бодап көр даан, Иегова өлген улустарны чуртталгаже эгидерин күзеп турар. Кандыг кончуг оожургалдыг чоор! Ынчаарга Бурган кымны диргизер база дирилген улус каяа чурттаарыл?

16. Дирлип келген кижилер кандыг байдалга чурттаарыл?

¹⁶ Диргизиишкинниң библейжи болуушкуннары ол чүүл келир үеде канчаар болурун билип алырынга дузалыг. Ол болуушкуннарда чок апарган кижилерни катап черге диргискенин база олар чоок улузу-биле ужуражы бергенин чугаалаан. Келир үеде шак-ла ындыг чүүл болур, ынчалза-даа оон-даа артык кайгамчык. Бүгү чер дываажаң апаарын Бурган күзеп турар деп, 3-кү эгеден билип алган бис. Ынчангаш дирлип келген кижилер дайын, кем-херек үүлгедиишкини болгаш аарыг-аржык чок делегейге чурттаар. Олар аас-кежиктиг бооп, черге кайгамчык эки байдалга мөңге чурттаар.

17. Кымнар дирлип кээрил?

¹⁷ Кымнар дирлип кээрил? «Чевеглерде чыдар бүгү улус Ооң үнүн дыңнааш, чевеглерден туруп кээр» — деп, Иисус чугаалаан (Иоанның 5:28, 29). Ооң-биле дөмей, Ажыдыышкын 20:13-те: «Далай аңаа чораан өлүг улусту үндүр чалгыпкан. Өлүм болгаш тамы боттарының өлүг улузун берипкен» — деп чугаалаан. Тамы — шупту кижилерниң чыдар ниити хөөрү-дүр («Шеол биле гадес деп чүл?» Капсырылгадан көр). Ол хөөр куруглап каар. Ында чыдар миллиард-миллиард өлген улус катап дирлип кээр. Павел элчин чугаалаан: «Бурган... шынчы-даа, шынчы эвес-даа улусту катап диргизер» (Ажыл-чорудулга 24:15). Ол чүү дээни ол?

18. Дирлип кээр «шынчы» кижилерге кым хамааржып турарыл, база диргизиишкин болурунга идегел сеңээ кайы-хире дээштиг-дир?

¹⁸ Христостуң мурнунда-ла чурттап чораан, Библияда бижиттинген хөй кижилер «шынчы» кижилерге хамааржыр. Ной, Авраам, Руфь, Есфирь дээш оон-даа өске шынчы эр болгаш херээжен кижилерни дораан сактып кээр боор сен. Оларның чамдыызының дугайында Еврейлерге чагаада, 11-ги эгеде бижээн. «Шынчы» кижилерге бистиң үевисте чок апарган Иегованың бараалгакчылары база хамааржыр.  Шынап-ла, диргизиишкин болур деп идегел өлүрүнүң коргужундан бисти хостап турар (Еврейлерге 2:15).

19. «Шынчы эвес» кижилер дээрге кымнарыл, база Иегова оларга кандыг арганы бээр?

¹⁹ Иегованың дугайында чүнү-даа билбес чораан база аңаа бараалгавайн турган улус-биле чүү болурул? Бурган миллиард-миллиард «шынчы эвес» кижилерни утпас. Ол оларны база диргизер. Бурганның дугайында алыс шынны билип ап, ооң өңнүктери апаар кылдыр, ол оларга үени бээр. Муң чыл дургузунда өлген улусту черге чуртталгаже диргизиптерге, Иеговага шынчы бараалгап турар кижилерге олар каттыжыптар. Ол үе кайы-хире магаданчыг болур-дур! Библияда ол үени Шииткел хүнү деп адаан b.

20. Геенна деп чүл база ынаар кым кирип турар?

²⁰ Мырыңай кижи бүрүзүн диргизер дээни ол бе? Чок. Чамдык чок апарган улус гееннада чыдар деп Библияда чугаалаан. Библияның тыва очулгазында ол сөстү «тамы» кылдыр очулдурган (Луканың 12:5). Бурунгу Иерусалимниң ханаларының артында бок төгер черни геенна деп адап турган. Аңаа өлген кижилерниң мага-бодун болгаш янзы-бүрү бок өрттедип турган. Иудейлер орнукшударынга болгаш катап диргизеринге төлеп чок деп санап турган кижилерниң мага-бодун ынаар октап турган. Ынчангаш геенна — бүрүнү-биле узуткаашкынның таарымчалыг демдээ-дир. Дириглерни болгаш өлүглерни Иисус шиидер-даа болза, Дээди Шииткекчи Иегова хевээр артып каар (Ажыл-чорудулга 10:42). Каржы болгаш дыңнангыр эвес деп санаар кижилерни ол кажан-даа диргиспес.

21, 22. а) Библияда оон өске кандыг диргизиишкин дугайында чугаалааныл? б) Дээрге чуртталгаже кымны бир дугаар диргискенил?

²¹ Библияда Дээрге чуртталга деп оон өске диргизиишкин дугайында чугаалаан. Ында чүгле чаңгыс ындыг диргизиишкинниң чижээ бар — Иисус Христостуң.

 ²² Иисус өлүп каарга, Иегова шынчы Оглун чевегге артып каарын чөпшээревээн (Ырлар 15:10; Ажыл-чорудулга 13:34, 35). Бурган ону диргизипкен, ынчалза-даа кижи кылдыр эвес. Христостуң «мага-бодун өлүрүп кагза-даа, Сүлдези-биле Ол тынгарлып келген» деп, Пётр элчин тайылбырлаан (1 Пётрнуң 3:18). Ол болуп көрбээн кайгамчыктыг чүүл болган! Иисус күчү-күштүг көзүлбес мага-боттуг чаяалга кылдыр дирлип келген (1 Коринфичилерге 15:3—6). Ындыг алдар-хүндүнү бир дугаар ол алган (Иоанның 3:13). Ынчалза-даа ындыг алдарны Иисус чааскаан албаан.

23, 24. Иисустуң «бичежек коданынче» кым кирип турар база оларның саны чежел?

²³ Удавас дээрже эглип кээрин Иисус билип турган, ынчангаш шынчы өөреникчилеринге турар чер белеткээр дээш, чоруурун ол чугаалаан (Иоанның 14:2). Дээрже баар улусту Иисус «бичежек кодан» деп адаан (Луканың 12:32). Бо эвээш санныг шынчы христианнарның бөлүүнче каш кижи кирип турарыл? Иоанн элчин тайылбырлаан: «Мен оон көөрүмге, Сион даанда Хураган [Иисус Христос] турду. Оон Бодунуң болгаш Адазының адын хавактарында бижип демдектээн чүс дөртен дөрт муң кижи Хураган-биле кады турар болду» (Ажыдыышкын 14:1).

²⁴ Ол 144000 христианнарны, а ынаар Иисустуң шынчы элчиннери база кирип турар, дээрде чуртталгаже диргизер. Ол диргизиишкин кажан эгелээрил? Ол Христостуң катап келириниң үезинде болур деп, Павел элчин бижээн (1 Коринфичилерге 15:23). Ол үе эгелээн деп, 9-ку эгеден билип алыр бис. Ынчангаш бо хүннерде 144000-дан арткан кижилер өлгеш, ол-ла дораан дээрге чуртталгаже дирлип турар (1 Коринфичилерге 15:51—55). Ынчалзажок кижилерниң хөй кезии келир үеде, черге дываажаңга дирлип келир.

25. Дараазында эгеде чүнү сайгарар бис?

²⁵ Иегова өлүм деп каржы дайзынны кезээ-мөңгеде узуткап кааптары кайы-хире кайгамчыктыг-дыр! (Исаия 25:8). Чамдык кижилер дээрге чуртталгаже чүү дээш дирлип кээриниң дугайында билип алыры сеңээ солун боор чадавас. Олар дээрниң чөптүг чагыргазының тургузуунче кирер. Ооң дугайында дараазында эгеден билип алыр бис.