1-3. Gini vura aboro duho, na tipagine pa wisigo ani gupai Ziazia Kekeapai ayugoho tipa zingabekpio aundo ti ni?

MO BINGO tiro mo nioro be baimi aboro. Ní na bakere ome susi ro. Mo ima inoho nga inapai tiní te mbiko mo ima bi ní ní niimi dungu abakureamo. Mo navura kaa ora wai vurũ, ní nambeda kindi na mo. Maabangirise ho tipa bata beni te. Ono tie, boro kini kuru ka batasaro. Gi boro re na ome susi gi baimi aboro re, na ní ki kidohe nga ní nika undoro aundo. Fuo duhe were, mo kini bi tiro nga mo bati.

² Ngba kura gene, kina gi bangisapai re du mo rogoho, na kura aboro a. A wa ani abihe rogo gu kapita du mbata fu gere, Ziazia Kekeapai nayamba kpio nga vurarani. Boro ho ka nehe watadu ka sovura kutini te. Na ani ima bi dungu aboro gi vurarani re naimi yo. Ono Yekova na bakere ome susi kpio. Ko nga gu batasi du na ome nga guko  naima yugoho nga ko rengbe arengba ka diabe gi vurarani re. Ko nakidohe nga ko nika nyasa riipa gi vurarani nga kpio re nyeanye kindi. Ziazia Kekeapai naya: ‘Yangara vurarani i nika gbarasaha nga kpio.’ (1 AKorindo 15:26) Si nga wene pangbanga nirengo!

³ Ani wisigingo pai tooni tipa wai gu vurarani nga kpio amanga rani ho gaani boro nikpi ni. Pa wisigo ani he nika sa rani ani yugu tambuahe tipa guhe nika sa rani ani du na ngbarago. Mo ini gupai nga Yekova nakido rani ya kpikpi aboro nika du adu ni ungayo berewe. (Yesaya 26:19) Ko nika zingisayo be kpio. Gere nga gu maabangirise Mbori afuhe furani.

4. (a) Wai Yekova na Yesu abi pakpio boro? (b) Gini ngbatunga bakure Yesu azihe?

⁴ Ya mo ga boro akpingo? Ho gupai nimangi ni re, si nidu wa ba hi gu gberãrago si niye na ni naadunga ti ni te. Ti ngbatunga agu aregbo re, si naida ani wisigi Ziazia Kekeapai tipa ka gbia wasa. (Mo gedi 2 AKorindo 1:3, 4.) Ziazia Kekeapai naundo rani ani ini gu bipai du Yekova gbiati Yesu na ni tipa kpio. Yesu nga gu boro nayugokpia Bako teketeke. Ko aima inopa gu gberãrago boro adu na ni ho gani boro akpi ni. (Yoane 14:9) Ho Yesu anidu ni Yerusarema yo, ko anaandu kaa bi Razaro na adawiriko nangia Maria na Marata naaraka Betania yo naadu mbembedi na Yerusarema. I ada ni bawene abakure.  Ziazia Kekeapai naya: “Yesu anakpi nyemu Marata akpi, na wirinari, na Razaro.” (Yoane 11:5) A wa ani abihe rogo gu kapita naye mbata fu gere, Razaro awoki ki kpi.

5, 6. (a) Ginipai Yesu amangi ho ko adu ni na agume Razaro gbiati abakureako? (b) Ginipai pa kpara Yesu Razaro angarasaro na ni?

⁵ Wai Yesu adu tipa kpio bakureako? Gu pangbanga re naya wẽ Yesu andu fuo agume Razaro na abakureako wa i aakparako. Fuo biko yo, “nunga ki zi ko toroko yo, ko ki nirungo a.” Fuo gure, “Yesu ki nikpari ni aume.” (Yoane 11:33, 35) Ya mo gi nunga nazi Yesu ko ki kpari re nayugo gupai nga ko aadunga na maabangirise te? Wagusa te. Yesu aima ino gupai nga ko nika manga wenepai amanga. (Yoane 11:3, 4) Wa si avura duwo, ko aima du na gberãrago nga gu kpio boro aye na ni.

⁶ Pa kpara Yesu ni aume nangarasa rani angarasa. Gi pangbanga re naundo rani ani ini gupai nga, Yesu na Bako nga Yekova, nasoga kpio asoga. Ono tie, Yekova Mbori na tandu tiko tipa ka nyasa riipa kpio. Ani bingo gupai Yekova asa Yesu ko mangihe.

7, 8. Tipagine aboro aadunga ti ni na maabangirise tipa Razaro ya, ono ginipai Yesu amangihe?

⁷ I aima kpisido Razaro rogo gu murã nangia siimbia, Yesu kini sanahe i di mbia ti ngbadimo murã. Marata aya ko nafũ afũ mbiko ko ima dia arame biama ku murã yo. (Yoane 11:39) Kuti gu  bipai nga ga aboro, maabangirise aadunga berewe tipa ko te.

⁸ I adi mbia kusayo, Yesu ki poi kuari ki ya, “Razaro, mo kúru.” Ginipai namangi? ‘Gu kumba nakpi akuru.’ (Yoane 11:43, 44) Mo makianga pa gu ngbarago aboro adu na ni! Singia Razaro angia gumeyo, bakureayo, watadu gayo murakporo, gupai i ainihe nga ko aima kpi. Ono tie, kina gu bangisa kumba re naru berewe dagbayo. Si adu bangiriyo wa pa musumo. Zanga kapa, badungu aboro aima dungo Razaro ni bakere ngbarago. Gupai namangi re angia diabe kpio nirengo!

9, 10. (a) Wai Yesu ayugupa gu boro nafu tandu fuko ko zingisi Razaro be kpio? (b) Gini aundo duho ti geda agu apangbanga du rogo Ziazia Kekeapai tipa zingabekpio?

⁹ Yesu aayanga wẽ ko amangi gi iiriwopai re ni gako tandu te. Rogo gu kpee ko akparihe mbata fu ko zingisi Razaro, ko ayuguhe gbaiga nga Yekova nafu gu tandu re fuko. (Mo gedi Yoane 11:41, 42.) Anga kina gu regbo re sa Yekova amangisunge na gako tandu ngba gi gene re te. Ziazia Kekeapai gumbapa aboro ribua nazingi be kpio, du Razaro dagbayo. * Pa geda ani agi apangbanga re kini wisigihe nafu ngbarago afu nirengo. Si nayugo gupai furani nga Mbori akparakanga aboro te, mbiko agu aboro i azingisiyo  angia paranga aboro, sosono aboro, akumba na adee, aYisaraere, na agu aboro nangianga aYisaraere ya. Gipai re aima fu bakere ngbarago gbe! Ni kpiapai, ho Yesu azingisi paranga degude ni be kpio, si ‘airiwo airiwo bakere gbe’ ti avunguri. (Marako 5:42) Nirengo, Yekova aima fu bakere ngbarago fuyo nga gu bangiriyo aagonga ti ni ya.

¹⁰ Si nirengo nga agu aboro Yesu azingisiyo aima kpi berewe. Ya mo pa kpiko yo berewe nayugo gupai nga sunge aadunga ti zingisayo te? Wagusa te. Agu apangbanga re nayugo nyanyakipa rengo na kini fu maabangirise furani.

11. Wai gu pangbanga du tipa zinga Razaro be kpio ayugo gupai nga, rengo du Batungusipai 9:5 apehe?

¹¹ Ziazia Kekeapai naya wẽ “kpikpi aboro aina nga pai te.” (Batungusipai 9:5) I ni ungayo te, na i rogo kura ba naberã aberã a te. Gu pangbanga du tipa Razaro nayugo gipai re. Ho i azingisi Razaro ni be kpio, ya mo ko apeke pa agu apai naadu ngbangbaturũ yo fu aboro? Watadu ka peka pa wai igirã we iferno yo? Oó. Pangbanga wa gure rogo Ziazia Kekeapai Razaro apehe te. Vuru agu arame ko adihe ku murã yo, ko “aina nga pai te.” Ko aara ara gbua rogo kpio yo.—Yoane 11:11.

12. Ginipai nayugo gupai nzunzu nga Razaro aima zingabe­kpio?

¹² Gu pangbanga du tipa Razaro nayugo gupai  berewe furani nga, zingabekpio nga gupai nika manga amanga. Yesu azingisi Razaro ku bangiri aboro i nibihe. Zavura agu abarumbatayo rogo pambori nanaasoga Yesu, i aatinga kango gi iiriwopai Yesu amangi re te. Kuba gure, i aya: “Ani amánga wãi? Bambiko gi kumba [nga Yesu re] namanga dungu agu apai i aina pai ti ni.” (Yoane 11:47) Dungu aboro andu ka bi gu kumba i azingisiko re. Fuo biyo gupai nga Razaro ima zinga be kpio, dunguyo aidipa Yesu. Ho i abi Razaro ni ni ungako berewe, si ayugu gupai fuyo ziazia nga Mbori du nakedi Yesu. Gi gopai re adu gbaiga, si ki sa agu aYudo nangia abarumbatayo i taburo ka imo Yesu gbiati Razaro a.—Yoane 11:53; 12:9-11.

13. Gini nduapai duho nayugo gupai nga Yekova nika zingisa gu gaani aboro azingisa nakpiki?

¹³ Ya mo si ni pa mungo boro idi kuti gupai nga aboro nika zinga azinga be kpio? Oó, mbiko Yesu aya wẽ ‘aguyo dunduko du rogo amurã yo,’ i nika zingisayo azingisa. (Yoane 5:28) Yekova nga Bakusiahe dũ watadu Bafu unga fu ahe dunduko. Ya mo si ni mbumbupai ka ida gupai nga ko rengbe arengba ka karaga boro kubani berewe? Ya mo ko rengbe ka tingidapa gu gaani aboro dunduko nakpiki? Dungu abirioni akerekuru du ngbangbaturũ yo, ono Mbori ima ino ra dunduko ni basasa ti arimora. (Yesaya 40:26) Sidu tie, Yekova Mbori rengbe arengba ka tingidapa gu gaani aboro dunduko nakpiki na agu  apai du tipa yo dunduko, na ko nika karaga gayo unga akaraga fuyo.

14, 15. Nibi gupai Eyobo agumbaha, ga Mbori bipai nga gine tipa kpikpi aboro?

¹⁴ Ono wai tie Yekova abi pa zingisa aboro be kpio? Ziazia Kekeapai nayugo gupai nga ko na nyemu ka zingisa kpikpi aboro. Gu ruru kumba nangia Eyobo asanahe ki ya: “Ka boro kpi, ni adú ni ungani berewe?” Eyobo afura tipa pido Mbori murã yo daho regbo nika da ni fuko ko tingidi pako. Ko aya fu Mbori wẽ: ‘Mo ayambahe, mi ki karagapai foro; mo akpinyemu guhe bero amangi.’—Eyobo 14:13-15.

¹⁵ Mo berẽnga kurii gipai re! Yekova na bakere nyemu zingisa kpikpi aboro be kpio. Ko nasungudo gu regbo nyanyaki ko nika zingisayo ti ni. Ya mo ino gipai re afunga ngbarago foro te? Ono ho rago zingabekpio nika da ni, ada i nika zingisayo, na wari du zingabekpio nika manga ni?

16. Agu aboro i nika zingisayo nika raka gini ngbatunga raka?

¹⁶ Agu apangbanga du rogo Ziazia Kekeapai tipa zingabekpio nayugo dungu apai furani tipa gu zingabekpio du ku mbatayo. Agu aboro i azingisiyo be kpio auru kpotosende ane abi tiyo na gayo aboro berewe. Gu zingabekpio du ku mbatayo nika du kinawo, ono ni bakerehe gbe. A wa duhe rogo kapita 3, ga Mbori ringbisapai nga ka sa kpotosende dunduko ni paradizo. Sidu tie,  i azingisanga aboro ku rogo gi zegino hi be vura, gbegberẽ mangapai, na kaza re te. Aboro nika du na gu momu nga ga raka auru kpotosende rogo zereda na ngbarago.

17. Ada i nika zingisayo?

¹⁷ Ada i nika zingisayo? Yesu aya wẽ ‘aguyo dunduko du rogo amurã yo nika gia fugoko ki kuru.’ (Yoane 5:28, 29) Wakina gure a, Yugoti 20:13 naya: “Baime ki gasi agu akangba nadu rogo ho, kpio na Adisi ki gasi agu akangba nadu rogo ho.” (Yugoti 20:13) “Adisi” nga ba kpikpi aboro. (Mo bi Kura Apai ti kpewaraga 243-244.) I nika kusa agu aboro dunduko nakpiki du rogo gi ba kpikpi aboro re tipa i naaraka berewe. Gu mokedi nangia Pauro akepai tipa gipai re ki ya: “Ruru aboro azinga [azinga] be kpio na iraira yo a.” (Amokedi 24:15) Rogo gipai yo re nga gine?

18. Ada du dagba gu “ruru aboro” i nika zingisayo, na gi maabangirise re naundo rani wai?

¹⁸ Gu “ruru aboro” re nakoda gu dungu aboro ani naageda payo rogo Ziazia Kekeapai nga aguyo naraki mbata fu Yesu ye ku auru kpotosende no. Mo rengbe ka berãpa aboro wa Noa, Abarayama, Sara, Moize, Ruta, Esetere, na dungu aguyo. I fura tipa agi akumba na adee nangia aboro idapase re rogo kapita 11 nga ga gu waraga Pauro akehe fu aEbere. Gi “ruru aboro” re nakoda gu ga Yekova amoyambu akoda nakpi ti gi gaani regbo re a. Gu maabangirise du tipa zingabekpio nasa rani ka ani gundenga be kpio ya.—AEbere 2:15.

19. Ada Ziazia Kekeapai ayambayo nga “iraira aboro,” na gini momu Yekova nafuhe fuyo?

 ¹⁹ Ginipai du tipa agu aboro naairisongo Yekova ya mbiko i ainongo wiripai tipa ko te? I nga aguyo Ziazia Kekeapai ayambayo nga “iraira aboro.” Bangirise agonga ti agi abirioni aboro re te. I nika zingisayo azingisa ki mbu regbo fuyo i wirikipai tipa Mbori na kini irisiko. Vuru agarã kutu, i nika zingisa kpikpi aboro ki fu momu fuyo i koditiyo na ruru aboro auru kpotosende kaa iriso Yekova. Gi regbo re nika ngia bawene regbo. Ziazia Kekeapai nayamba gi regbo re nga Rago Sapangbanga. *

20. Gine nga Geyena, na ada du yo?

²⁰ Ya mo gipai re nayugo gupai nga, agu aboro dunduko naakpiki i nika zingisayo azingisa? Oó. Ziazia Kekeapai naya wẽ kura kpikpi aboro gudu “Geyena” yo. (Ruka 12:5) Geyena angia gu ba i anaaba gugudo ku rogoho pati Yerusarema yo. I anaazo kangba anya na kangba aboro gbiati gugudo rogo gi ba re. Agu aboro i anaaba kangbayo koyo, i angia agu aboro aYudo anaabiyo nga i arẽnga tipa i kpisidiyo te, na i arẽnga tipa zingabekpio a te. Sidu, Geyena nga wene fugo tipa ringbisapa nyenye gbarasahe. Wa vura duhe nga Yesu nika sarangbanga unga aboro na kangbayo, Yekova nga gu boro du na yangara fugo sapangbanga ngbani. (Amokedi 10:42) Ko  azingisanga gbegberẽ aboro nga aguyo aidanga ka saberãyo ya te.

21, 22. (a) Gini ngbatunga zingabekpio duho berewe? (b) Da nangia gu bambata boro i azingisi ni ni toro?

²¹ Ziazia Kekeapai nafura tipa gu kura zingabekpio berewe, nga ka zingisa boro ni toro ní ga ku ngbangbaturũ yo. Ziazia Kekeapai fura tipa boro gbua sa nga Yesu Kristo nazingi ki ga ku ngbangbaturũ yo.

²² Fuo kpi Yesu, Yekova aambunga ko ku murã yo te. (Atambuahe 16:10; Amokedi 13:34, 35) Mbori azingisi Yesu ono angianga ni boro ya. Gu mokedi nangia Petero asakirogo gipai re ki ya wẽ ‘i aimi Yesu rogo boroboro ono i azingisiko rogo toro.’ (1 Petero 3:18) Si angia iiriwopai nirengo, nga Yesu du berewe niungako ni toro! (Mo gedi 1 AKorindo 15:3-6.) Yesu nga gu bambata boro Mbori azingisini ní ki ga ku ngbangbaturũ yo, ono ko nga gu yangara ní te.—Yoane 3:13.

23, 24. Ada nga “umba rika aboro,” na bangeyo wai?

²³ Fuo ino Yesu gupai nga ko nika ga aga ku ngbangbaturũ yo, ko ape gupai fu apefuoko nga ko ‘nandu ka mbakada ba fuyo’ yo. (Yoane 14:2) Yesu afura tipa agu aboro nandu ku ngbangbaturũ yo ya i nga “umba rika aboro.” (Ruka 12:32) Bangeyo wai? Ringbisihe kuti Yugoti 14:1, Yoane aya: “Mi ki bi Wiri Kandoro, ko ru ri gu bagangara nga Siona, agu yo ki du na ko 144,000, nga  agu yo du na rimoko ni keke he ti ngbanda kpakpuyo, na rimo Bako a.”

²⁴ Agi aKristano du bangeyo nga 144,000 kodihe na amokedi re, i nazingisayo ku ngbangbaturũ  yo. Gini regbo gi zingabekpio re nika tona? Gu mokedi nangia Pauro aya tipa gi zingabekpio re wẽ si nika tona ti rago Kristo. (1 AKorindo 15:23) A wa mo nika wirikaha rogo kapita 9, ani naraka ti gu rago Kristo re. Sidu, gu yangara mbedimbedi aKristano nakpi ti gi gaani regbo re, i nazingisayo nibasa ti kina gu regbo i akpi kini di yo ku ngbangbaturũ yo. (1 AKorindo 15:51-55) Gu bakere rimbasa aboro du auru kpotosende tigayo, i na gu maabangirise nga ga zingabekpio ku rogo paradizo auru kpotosende.

25. Ginipai ani ka wirikapai tipaha rogo gu kapita naye fuo gere?

²⁵ Nirengo, Yekova nika dia adia be gu vurarani nga kpio nyeanye kindi! (Mo gedi Yesaya 25:8.) Mo rengbe ka sanahe nga: ‘Gine agu aboro i azingisayo i ga ku ngbangbaturũ yo andu ka mangaha yo?’ I nandu ka zogarago ni abakindo. Ani ka wirikapai tipa gu zogarago re rogo gu kapita naye fuo gere.