1. Ki lapriyer bokou dimoun i konnen ki nou pe al egzaminen?

DIMOUN partou dan lemonn i konn sa lapriyer ki zot apel Notreper. Zezi Kri ki ti donn sa lapriyer konman en model pour nou swiv. I en lapriyer ki dir bokou. Egzamin sa trwa premye keksoz ki sa lapriyer i demande, pou fer ou konn plis sa ki Labib i vreman dir.

2. Ki sa trwa keksoz Zezi ti demann son bann disip pour priy lo la?

² Okonmansman sa model lapriyer, Zezi ti dir bann dimoun: “La ki mannyer zot devre priye: ‘Nou Papa ki dan lesyel ki ou non sen i ganny glorifye; ki ou Renny i ganny etabli; ki ou lavolonte i ganny akonpli lo later parey dan lesyel.’” (Matye 6:9-13) Ki sa i vedir?

3. Ki nou bezwen konnen lo Rwayonm Bondye?

³ Nou’n aprann en kantite deza lo non Bondye, Zeova. Nou’n osi diskit en pe lo lavolonte Bondye, sa ki i’n fer e pou fer pour bann imen. Me ki Zezi ti oule dir ler i ti demann nou pour priye: “Ki ou Renny [oubyen Rwayonm] i ganny etabli”? Kisisa Rwayonm Bondye? Ki mannyer i pou glorifye non sen Bondye? Ki mannyer i pou akonpli lavolonte Bondye ler i ganny etabli?

4. Kisisa Rwayonm Bondye, e lekel son Lerwa?

⁴ Rwayonm Bondye i en gouvernman ki Zeova in etabli. I’n swazir en Lerwa pour sa gouvernman. Lekel Lerwa Rwayonm Bondye? Zezi Kri. Zezi i en pli bon Lerwa ki tou dirizan lo later e i ganny apele “Lerwa bann lerwa ek Senyer bann senyer.” (1 Timote 6:15) I annan pouvwar pour akonpli bokou plis ki okenn dirizan lo later, menm sa pli bon dirizan ki annan.

5. Kote Rwayonm Bondye i ete, me ki i pou dirize?

⁵ Kote Rwayonm Bondye pou ete? Be kote Zezi i ete? Si ou rapel, Zezi ti ganny met amor lo en poto, e apre i ti resisite. Apre sa, i ti mont dan lesyel. (Akt 2:33) Rwayonm Bondye i laba menm, savedir dan lesyel. Se pour sa ki Labib i apel li “Rwayonm Lesyel.” (Matye 25:1) Me kantmenm Rwayonm Bondye i dan lesyel, i pou diriz later.—Revelasyon 11:15.

6, 7. Kwa ki fer Zezi en lerwa vreman remarkab?

⁶ Kwa ki fer Zezi en Lerwa vreman remarkab? Premyerman, i pa pou zanmen mor. Kontrerman avek bann lerwa lo later, Labib i dir Zezi i ‘imortel, i reste dan lalimyer ki pa posib pour okenn zonm aprose.’ (1 Timote 6:16) Savedir tou bon keksoz ki Zezi pou fer, pou reste pour touzour. Byensir nou konnen i pou fer bokou bon keksoz pour nou.

⁷ Annou vwar en profesi Labib ki koz lo Zezi: “Lespri Zeova i bezwen repoz lo li, lespri lasazes ek konprenezon, lespri konsey ek lafors, lespri konnesans ek lakrent pour Zeova. Son plezir pou dan lakrent pour Zeova. I pa pou ziz selman par laparans, i pa pou ni koriz dapre zis sa ki i’n tande dan son zorey. I pou ziz bann dernyen dimoun dan en fason zis, e i pou koriz  bann dimoun dous lo later dan en fason ki drwat.” (Izai 11:2-4) Sa i montre ki Zezi pou vin en Lerwa ki drwat e ki konpran bann dimoun lo later. Pa sanmenm sa kalite lerwa ki ou ti a kontan gannyen?

8. Lekel ki pou diriz ansanm avek Zezi?

⁸ Zezi pa pou diriz li tousel dan Rwayonm Bondye. I pou annan lezot ki pou diriz avek li. Par egzanp, zapot Pol ti dir Timote: “Si nou persevere, avek li, nou pou rennyen.” (2 Timote 2:12) Pol, Timote, ek lezot Kretyen fidel in ganny swazir par Bondye pour renny ansanm avek Zezi dan Rwayonm lesyel. Ki kantite ki pou ganny sa loportinite spesyal?

9. Ki kantite pou renny ansanm avek Zezi, e kan Bondye ti konmans swazir zot?

⁹ Parey nou ti vwar dan Sapit 7 sa liv, zapot Zan ti ganny en vizyon kot i ti vwar “Lanyo [Zezi Kri] pe debout lo montanny Siyon [son pozisyon konman Lerwa dan lesyel] e avek li 144,000 dimoun, ki ti port son non ek non son Papa ekri lo zot fron.” Lekel sa 144,000 dimoun? Zan li menm i dir nou lekel zot: “Zot swiv Lanyo partou kot i ale. Zot in ganny sove parmi bann zonm pour ganny ofer konman bann premye fri devan Bondye e devan Lanyo.” (Revelasyon 14:1, 4) Wi, zot bann disip fidel Zezi Kri, ki’n spesyalman ganny swazir pour renny ansanm avek li dan lesyel. Apre ki zot resisite pour al dan lesyel, “zot pou rennyen lo later” ansanm avek Zezi. (Revelasyon 5:10) Depi lepok bann zapot, Bondye ti konmans swazir bann Kretyen fidel pour konplet sa sif 144,000 dimoun.

10. Akoz i en bon laranzman pour fer Zezi ek sa 144,000 dimoun diriz bann imen?

¹⁰ Sa laranzman pour fer Zezi ek sa 144,000 dimoun  diriz bann imen i en bon laranzman. Sa akoz Zezi li menm ti en imen e i ti konnen ki savedir soufer. Pol ti dir Zezi “pa enn ki pa kapab senpatiz avek nou febles, me enn ki’n ganny tante dan tou keksoz, parey nou, pourtan san fer pese.” (Ebre 4:15; 5:8) Bann ki pou diriz avek li, zot osi zot in soufer konman en imen e persevere. Deplis, zot in lite avek zot prop lenperfeksyon e zot in siport tou kalite maladi. Alors zot pou konpran problenm ki bann imen i rankontre!

11. Akoz Zezi ti dir son bann disip priye pour lavolonte Bondye akonpli dan lesyel?

¹¹ Kan Zezi ti dir son bann disip priye pour Rwayonm Bondye etabli, i ti osi dir zot priye pour lavolonte Bondye akonpli “lo later parey dan lesyel.” Bondye i dan lesyel, e son lavolonte i toultan ganny fer dan lesyel par bann lanz fidel. Me dan Sapit 3, nou ti vwar ki en move lanz ti aret fer lavolonte Bondye e i ti fer Adan ek Ev fer pese. Dan Sapit 10, nou pou aprann plis lo sa ki Labib i dir konsernan sa move lanz, ki apel Satan oubyen Dyab. Zeova ti les Satan ek lezot move lanz ki ti swiv li, bann demon, reste dan lesyel pour en pe letan. Alors, pa tou ki ti pe fer lavolonte Bondye dan lesyel. Me sa ti sanze dek ki Rwayonm Bondye ti konmans dirize. Sa nouvo Lerwa, Zezi Kri, ti lager avek Satan.—Revelasyon 12:7-9.

12. Ki sa de levennman enportan ki Revelasyon 12:10 i dekrir?

¹² Sa profesi i dekrir ki ti pou arive: “Mon ti tann en lavwa for dan lesyel ki ti dir: ‘Aprezan, delivrans, pisans, rwayonm nou Bondye, ek lotorite son Kris in ganny etabli parski lakizater nou bann frer [savedir  Satan] devan Bondye lizour konman aswar, in ganny zet ater.’” (Revelasyon 12:10) Eski ou remark de levennman byen enportan ki sa verse Labib pe dekrir? Premyerman, Rwayonm Bondye anba direksyon Zezi Kri i konmans dirize. Dezyenmman, Satan i ganny tire dan lesyel e zete lo later.

13. Ler Satan ti ganny tire dan lesyel, ki rezilta sa in anmennen?

¹³ Ki rezilta sa de levennman in anmennen? Annou lir ki ti arive dan lesyel: “Pour sa rezon, alor, rezoui lesyel.” (Revelasyon 12:12) Vi ki Satan ek son bann demon nepli dan lesyel, bann lanz fidel i kontan akoz aprezan tou sa ki dan lesyel i fidel avek Zeova. Lape ek larmoni total pe rennyen dan lesyel. Aprezan lavolonte Bondye pe ganny fer dan lesyel.

14. Ki’n arive akoz Satan in ganny zete lo later?

¹⁴ Me ki mannyer later in ganny afekte? Labib i dir: “Maler, later ek lanmer, parski dyab in desann kot zot avek en gran lakoler, akoz i konnen ki i reste li ankor zis en pti pe letan.” (Revelasyon 12:12) Satan i ankoler akoz in ganny tire dan lesyel e i reste li zis en pti gin letan. Son lakoler i fer li anmenn problenm oubyen “maler” lo later. Nou pou aprann plis lo sa “maler” dan lot sapit. Me avek sa antet, nou kapab demande, Ki mannyer sa Rwayonm i kapab akonpli lavolonte Bondye lo later?

15. Ki lavolonte Bondye pour later?

¹⁵ Ou rapel sa ki Bondye ti oule pour later? Ou ti aprann sa dan Sapit 3. Bondye ti montre ki i anvi sa later vin en paradi avek bann dimoun drwat ki viv pour touzour. Satan ti fer Adan ek Ev fer pese, e sa ti retard lakonplisman lavolonte Bondye pour later. Me son lavolonte pour later pa’n sanze. Zeova i ankor anvi ‘bann  dimoun drwat posed later, e reste lo la pour touzour.’ (Psonm 37:29) Rwayonm Bondye pou fer sa arive. Ki mannyer?

16, 17. Ki Danyel 2:44 i dir nou konsernan Rwayonm Bondye?

¹⁶ Annou vwar sa profesi dan Danyel 2:44. I dir: “Dan bann zour sa bann lerwa, Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm, e li menm i pou dire pour en letan endefini.” Ki sa i dir nou lo Rwayonm Bondye?

¹⁷ Premyerman, i dir nou Rwayonm Bondye pou ganny etabli “dan bann zour sa bann lerwa,” oubyen letan lezot rwayonm i ankor la. Dezyenmman, i dir nou Rwayonm Bondye pou la pour touzour. Okenn lezot gouvernman pa pou defet e ranplas li. Trwazyenmman, nou vwar ki pou annan lager ant Rwayonm Bondye ek bann rwayonm sa lemonn. Rwayonm Bondye pou ranport laviktwar. Finalman, i pou sa sel gouvernman ki pou diriz limanite. Alor bann imen pou benefisye avek sa pli bon gouvernman ki zot in deza konnen.

18. Ki mannyer sa lager final ant Rwayonm Bondye ek gouvernman sa lemonn i apele?

¹⁸ Labib i annan bokou pour dir konsernan sa dernyen lager ant Rwayonm Bondye ek bann gouvernman sa lemonn. Par egzanp, i dir ki anmezir lafen i aprose, bann lespri demon pou fann bann mansonz pour anbet “bann lerwa lo later an antye.” Avek ki bi? “Pour rasanble zot [bann lerwa] pour konbat kan sa gran zour Bondye Toupisan pou arive.” Bann lerwa lo later pou ganny rasanble dan en “landrwa ki apel  Armagedon dan langaz Ebre.” (Revelasyon 16:14, 16) Akoz sa ki sa de verse i dir, lager final ant gouvernman imen ek Rwayonm Bondye i apel Armagedon.

19, 20. Kwa ki’n anpes lavolonte Bondye akonpli lo later ziska prezan?

¹⁹ Ki Rwayonm Bondye pou akonpli par sa lager Armagedon? Mazin ankor ki Bondye i anvi pour later. Zeova ti anvi later vin en Paradi, avek bann dimoun ki drwat, ki parfe, e ki servi li. Kwa ki’n anpes sa arive ziska prezan? Premyerman, nou fer pese, nou malad e mor. Me dan Sapit 5, nou ti vwar ki Zezi ti mor pour nou pour ki nou kapab viv pour touzour. Petet ou rapel sa parol dan Levanzil Zan: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”—Zan 3:16.

²⁰ En lot problenm i ki bokou dimoun i fer sa ki mal. Zot koz manti, trik lezot, e viv en lavi dezord. Zot pa anvi fer lavolonte Bondye. Bann dimoun ki fer sa ki mal pou ganny detrir pandan lager Bondye, Armagedon. (Psonm 37:10) En lot rezon akoz lavolonte Bondye pa ankor akonpli lo later i ki bann gouvernman pa ankouraz dimoun pour fer li. I annan bokou gouvernman ki swa tro toleran, swa kriyel, ouswa koronpi. Labib i dir fransman: “Zonm in domin zonm e sa in fer ditor zot menm.”—Eklezyast 8:9.

21. Ki mannyer Rwayonm Bondye pou akonpli son lavolonte lo later?

²¹ Apre Armagedon, tou bann imen pou tonm anba zis en gouvernman, Rwayonm Bondye. Sa Rwayonm pou fer lavolonte Bondye e anmenn bann gran benediksyon. Par egzanp, i pou tir Satan ek son bann demon. (Revelasyon 20:1-3) Nou pou vwar sa ki  sakrifis Zezi i kapab fer. Bann dimoun fidel pa pou malad ankor e zot pa pou mor. Zot pou viv pour touzour anba Rwayonm Bondye. (Revelasyon 22:1-3) Later pou vin en paradi. Dan sa fason, Rwayonm Bondye pou akonpli lavolonte Bondye lo later, e i pou glorifye son non sen. Ki sa i vedir? Savedir avek letan tou dimoun pou onor non Zeova anba Rwayonm Bondye.

22. Ki mannyer nou konnen Rwayonm Bondye pa ti ankor etabli ler Zezi ti lo later oubyen dek ki Zezi ti resisite?

²² Kan Zezi ti dir son bann disip priye, “Ki ou Renny i ganny etabli,” i ti kler ki Rwayonm Bondye pa ti ankor etabli sa letan. Eski i ti ganny etabli ler Zezi ti mont dan lesyel? Non, akoz Pyer ek Pol, zot tou le de zot ti dir ki apre ki Zezi ti resisite, i ti akonpli sa profesi dan Psonm 110:1: “Zeova i dir avek mon Senyer: ‘Asiz lo mon kote drwat ziska ki mon fer ou bann lennmi vin en marspye pour ou lipye.’” (Akt 2:32-34; Ebre 10:12, 13) Savedir Zezi ti esper en pe letan.

23. (a) Kan Rwayonm Bondye ti konmans dirize? (b) Ki nou pou diskite dan lot sapit?

²³ Konbyen letan ti pou bezwen espere? Pandan diznevyenm syek, bann etidyan Labib senser ti kalkil sa  kantite letan e ariv lo 1914. (Konsernan sa dat, vwar “1914—en Lannen tre enportan dan Profesi Labib” anba Lezot lenformasyon.) Bann levennman ki’n arive dan lemonn an 1914, i konfirmen ki kalkilasyon sa bann etidyan Labib ti korek. Lakonplisman bann profesi Labib i montre ki an 1914, Kris ti vin Lerwa e Rwayonm Bondye dan lesyel ti konmans dirize. Alors, nou pe viv dan sa “pti pe letan” ki reste Satan. (Revelasyon 12:12; Psonm 110:2) Nou kapab dir osi avek lasirans ki byento Rwayonm Bondye pou pran aksyon e akonpli lavolonte Bondye lo later. Pa sa i en bon nouvel? Eski ou krwar sa i vre? Lot sapit pou ed ou vwar ki Labib i vreman dir sa.