1. An bena delili juman lo lajɛ, mɔgɔ caaman be min lɔn?

DUNIƝA kɔnɔ mɔgɔ miliyɔn caaman be delili nin lɔn min be weele ko “An Faa min be sankolo la.” Yezu yɛrɛ lo y’o delili modɛli nin di. O delili nin kɔrɔ ka bon kosɔbɛ. Fɛɛn saba minw kofɔra a daminɛ na, n’i b’u lajɛ u bena i dɛmɛ ka koo wɛrɛw lɔn Bibulu ka kalan tigitigi koo la.

2. Yezu y’a fɔ a ka kalandenw ye ko u ka delili kɛ fɛɛn saba jumanw koo la?

² O delili daminɛ na, Yezu ye a lamɛnnikɛlaw kalan ko: “Aw ka kan ka Ala deli tan ko: ‘An Fa min bɛ sankolo la, i tɔgɔ ka saniya. I ka masaya ka na. I sago ka kɛ dugukolo kan i ko a bɛ kɛ sankolo la cogo min na.’ ” (Matiyo 6:9-13, ABM ). Koo saba minw kofɔra delili nin kɔnɔ u kɔrɔ ye mun ye?

3. An ka kan ka mun lo lɔn Ala ka Masaya koo la?

³ An ye koo caaman kalan ka ban Ala tɔgɔ koo la o min ye Jehova ye. An ye baro kɛ dɔɔni ka tɛmɛ Ala sago koo la: a ye min kɛ ka ban ani a bena na min kɛ adamadenw ye. Yezu kɛtɔ k’a fɔ ko an ka delili kɛ ko “I ka masaya ka na,” a tun be kumana mun lo koo la? Ala ka Masaya ye mun lo ye? Cogo juman na a nali bena Ala tɔgɔ saniya, o kɔrɔ, k’a kɛ tɔgɔ senuman ye? Ani, Ala ka Masaya nali n’a sago kɛli be taga ɲɔgɔn fɛ cogo di?

4. Ala ka Masaya ye mun lo ye, ani jɔn lo ye a Masacɛ ye?

⁴ Ala ka Masaya ye gofɛrɛnɛman ye Jehova Ala ye min sigi, ani a ye Masacɛ dɔ sugandi k’a sigi a kun na. O Masacɛ ye jɔn lo ye? Yezu Krista lo. Yezu ye Masaba ye min ɲɔgɔn tɛ yen adamadenw ka kuntigiw cɛma. A fana weelela ko “masaw ka Masa, matigiw ka Matigi.” (1 Timote 6:15). See b’a ye ka koo ɲuman kɛ ka tɛmɛ adamadenw ka kuntigiw bɛɛ la fisaman kan.

5. Ala ka Masaya bena to yɔrɔ juman na ka kuntigiya kɛ, ani a bena mun lo mara?

⁵ Ala ka Masaya bena to yɔrɔ juman na ka kuntigiya kɛ? Ayiwa, Yezu be yɔrɔ juman na? I hakili b’a la, an y’a kalan ko a fagara tɔɔrɔ yiri kan, ani o kɔ a suu kununa. Wagati dɔɔni o kɔ, a yɛlɛla sankolo la (Kɛwaliw 2:33). O la, Ala ka Masaya be o yɔrɔ lo la: sankolo la. O lo kama Bibulu b’a weele ko “sankolo masaya.” (2 Timote 4:18, ABM ). Hali k’a to Ala ka Masaya be sankolo la, a bena dugukolo kuru bɛɛ mara.—Yirali 11:15.

6, 7. Mun lo y’a to Yezu ye Masacɛ ye min ɲɔgɔn tɛ yen?

⁶ Mun lo y’a to Yezu ye Masacɛ ye min ɲɔgɔn tɛ yen? Fɔlɔ, a tɛna sa abada. Bibulu b’a yira ko Yezu ni adamadenw ka kuntigiw tɛ kelen ye sabu a b’a weele ko: “Ale kelen le te sa, a be kɛnɛ na mɔgɔ si te se ka gwɛrɛ min la.” (1 Timote 6:16). O kɔrɔ ko Yezu bena koo ɲuman minw bɛɛ kɛ, u nafa bena mɛn. A fana bena koo ɲumanw ni koobaw kɛ tiɲɛn na.

⁷ A filɛ Bibulu ka kiraya kuma nin fana be min fɔ Yezu koo la: “Masaba ka Nii bena to n’a ye, ale min be lɔnniya, ni koo faranfasili see di, ka koo ɲanabɔli see, ni fanga di, ka Masaba lɔnko n’a ɲasiranko see di. Ka siran Masaba ɲa, o le bena diya a ye. A tena kiti tigɛ ka kɛɲɛ n’a ɲaa ka yeta ye. A tena koo latigɛ  ka kɛɲɛ n’a tulo ka mɛnta ye. A bena dɛsɛbagatɔw ka kiti tigɛ tilenninya la. A bena jamana kɔnɔ fantanw ka koo latigɛ hɔrɔnya la.” (Ezayi 11:2-4). O kuma b’a yira ko Yezu tun bena kɛ Masacɛ tilennen ye ani a tun bena hinɛ mɔgɔw la dugukolo kan. Yala i tɛ o kuntigi ɲɔgɔn fɛ wa?

8. Yezu ni jɔn lo bena kuntigiya kɛ ɲɔgɔn fɛ?

⁸ Koo wɛrɛ filɛ nin ye Ala ka Masaya koo la: Yezu tɛna kuntigiya kɛ a kelen. Mɔgɔ wɛrɛw bena fara a kan. Ɲɛyirali fɛ, ciden Pol y’a fɔ Timote ye ko: “N’an jijara ka tɔɔrɔ muɲu n’a ye, an bena kuntigiya kɛ n’a ye.” (2 Timote 2:12). Tiɲɛn na, Pol, Timote ani Ala ye mɔgɔ kantigiman wɛrɛ minw sugandi, olu ni Yezu bena kuntigiya kɛ ɲɔgɔn fɛ sankolo Masaya la. Mɔgɔ joli lo bena o nɛɛma sɔrɔ?

9. Mɔgɔ joli lo bena kuntigiya kɛ ni Yezu ye, ani Ala y’a daminɛ k’u sugandi kabi tuma juman?

⁹ I ko gafe nin kalansen 7nan y’a yira an na cogo min na, ciden Zan ye yeli dɔ sɔrɔ min kɔnɔ a ye “Sagaden [ Yezu Krista] jɔlen ye Sion kulu kan [a lɔyɔrɔ i ko Masacɛ, sankolo la]. Mɔgɔ waa kɛmɛ ni binaani ni waa naani bɛ a fɛ. Sagaden tɔgɔ ni a Fa tɔgɔ sɛbɛnnen tun bɛ o mɔgɔw tenw na.” O mɔgɔ 144 000 ye jɔn lo ye? Zan yɛrɛ b’a fɔ ko: “Sagaden bɛ taa yɔrɔ o yɔrɔ, olu bɛ tugu a nɔfɛ. U kunmabɔra ka bɔ mɔgɔw cɛma. U ye Ala ni Sagaden ka fɛn fɔlɔw de ye.” ( Yirali 14:1, 4, ABM ). U ye Yezu Krista ka kalanden kantigimanw ye. A y’u sugandi dan na walisa u ka kuntigiya kɛ n’ale ye sankolo la. U lakununi kɔ ka taga sankolo la, u ka kan ka fara Yezu kan ka kɛ ‘masaw ye dugukolo kan.’ ( Yirali 5:10). Kabi Yezu ka cidenw wagati la, Ala y’a daminɛ ka kerecɛn kantigimanw sugandi walisa k’o mɔgɔ 144 000 hakɛ dafa.

10. Ala ye labɛn min kɛ walisa Yezu ni mɔgɔ 144 000 ka adamadenw mara, mun na o ye kanuya koo ye?

 ¹⁰ Ala ye labɛn min kɛ walisa Yezu ni mɔgɔ 144 000 ka adamadenw mara, o ye kanuya koo ye dɛ! Tiɲɛn na, Yezu b’a lɔn a kɔrɔ ye min ye ka kɛ adamaden ye ani ka tɔɔrɔ. Pol y’a fɔ ko see be Yezu ye “k’an faamu an ka dɛsɛyɔrɔ la. A ye kɔrɔbɔli sifa bɛɛ sɔrɔ i n’a fɔ anw, nga a ma hakɛ kɛ.” (Eburuw 4:15; 5:8). Tuma min na a ka marakɛɲɔgɔnw tun ye adamadenw ye, u fana tɔɔrɔla ani u ye koo caaman muɲu. Ka fara o kan, u ye bondori kɛ ka dafabaliya koow kɛlɛ ani ka bana sifaw bɛɛ muɲu. Siga si t’a la, u bena adamadenw ka kunkow faamu.

11. Mun na Yezu y’a fɔ ko a ka kalandenw ka delili kɛ walisa Ala sago ka kɛ sankolo la?

¹¹ Tuma min na Yezu y’a fɔ ko a ka kalandenw ka delili kɛ walisa Ala ka Masaya ka na, a y’a fɔ fana ko u ka delili kɛ walisa Ala sago ka kɛ “dugukolo kan i ko a be kɛ sankolo la cogo min na.” Ala be sankolo la ani a ka mɛlɛkɛ kantigimanw b’a sago kɛ sanga ni wagati bɛɛ. Gafe nin kalansen 3nan na, an y’a kalan ko mɛlɛkɛ jugu dɔ ye Ala sago kɛli dabila ani a ye Adama ni Awa lasun ka jurumu kɛ. Gafe nin kalansen 10nan na, an bena koo wɛrɛ kalan o mɛlɛkɛ jugu nin koo la min be weele ko Sutana Naafigi. Mɛlɛkɛ dɔw y’a latigɛ ka tugu a kɔ, u be weele ko jinaw. Ala tun y’a to u ka kɛ sankolo la wagati dɔ kɔnɔ. O wagati la, bɛɛ tun tɛ Ala sago kɛra sankolo la. Nka, koow tun bena yɛlɛma tuma min na Ala ka Masaya tun bena a daminɛ ka kuntigiya kɛ. Yezu Krista tun mana sigi masaya la dɔrɔn, a tun bena wuli ka Sutana kɛlɛ.—Yirali 12:7-9.

12. Yirali 12:10 be koo kɔrɔtalenba fila jumanw lakali?

¹² Kiraya kuma nunu b’a ɲɛfɔ koo minw tun bena  kɛ: “O kɔ, ne ye kumakanba mɛn ka bɔ sankolo la ko: ‘An ka Ala ka kisili ni a ka sebaaya ni a ka masaya sera sisan, ani a ka Krisita ka kuntigiya, katuguni an balimaw sendonbaa [Sutana] kerunna dugukolo kan, o min tun bɛ Ala ɲɛ kɔrɔ ka u sendon su fara tile kan.” ( Yirali 12:10, ABM ). I y’a kɔrɔsi o vɛrise be koo kɔrɔtalenba fila minw kofɔ wa? Fɔlɔ, Ala ka Masaya y’a daminɛ ka kuntigiya kɛ ni Yezu ye a kun na. Filanan, Sutana gwɛnna ka bɔ sankolo la ka jigi dugukolo kan.

13. Sutana gwɛnna ka bɔ sankolo la, mun sɔrɔla o la?

¹³ O koo fila nana ni mun lo ye? Koo min kɛra sankolo la, Bibulu b’o lakali ten: “O de kosɔn, sankolow ani u kɔnɔ fɛnw, aw ka ɲagali.” ( Yirali 12:12, ABM ). Tiɲɛn na, mɛlɛkɛ kantigimanw be ɲagali sabu Sutana n’a ka jinaw tɛ yen tugun sankolo la minkɛ, bɛɛ be kantigiya kɛ Jehova Ala ye. U bɛɛ be hɛɛrɛ ni bɛɛn na kudayi. Ala sago be kɛra sankolo la.

14. Sutana gwɛnna ka jigi dugukolo kan minkɛ, o nana ni mun lo ye?

¹⁴ Nka, mun lo kɛra dugukolo kan? Bibulu b’a fɔ ko: “Bɔnɛ ye aw diɲɛ mɔgɔw ni kɔgɔji kɔnɔ fɛɛnw ta ye, bari Sutana dimininba jigira aw fɛ. A b’a lɔn ko a halakilon tɔɔ man jan tugu.” ( Yirali 12:12). Sutana diminenba lo sabu a gwɛnna ka bɔ sankolo la ani a ka wagati tɔɔ man jan tugun. A diminenba be tɔɔrɔ, wala “bɔnɛ” lase dugukolo kan. Kalansen nata la an bena koo wɛrɛw lɔn o “bɔnɛ” koo la. Nka, ka o to an hakili la, an be se k’an yɛrɛ ɲininga ko: Ala ka Masaya bena Ala sago kɛ dugukolo kan cogo di?

15. Ala sago ye mun lo ye dugukolo koo la?

¹⁵ Ala sago ye min ye dugukolo koo la, yala i hakili b’o la wa? I ye o kalan kalansen 3nan kɔnɔ. Edɛn nankɔ la, Ala tun y’a yira ko a b’a fɛ dugukolo nin ka kɛ alijɛnɛ ye, a falen adamaden tilennenw na minw tun tɛna sa.  Sutana ye Adama ni Awa lasun ka jurumu kɛ, o lo y’a to Ala sagonata ma dafa fɔlɔ dugukolo ta fan fɛ. Nka, o sagonata ma yɛlɛma. Jehova b’a fɛ hali bi ko “dugukolo na kɛ mɔgɔ tilennenw ciyɛn ye. U na sigi a kan badaa.” (Zaburuw 37:29, ABM ). Ala ka Masaya bena o kumaw dafa. Cogo di do?

16, 17. Daniyɛli 2:44 b’an kalan mun lo la Ala ka Masaya koo la?

¹⁶ Kiraya kuma nin filɛ Daniyɛli 2:44 kɔnɔ. O yɔrɔ la an b’a kalan ko: “Ayiwa, o masa nunu ka tile la, sankolotigi Ala ben’a kɛ masacɛ wɛrɛ be wili min ka masaya tena nagasi abada, a ka masaya tena bɔ a bolo ka di siya wɛrɛ ma. Ale bena masa tɔ nunu bɛɛ ka koo nagasi ka ban pewu. Ale bena to a ka masaya la tuma bɛɛ.” O b’an kalan mun lo la Ala ka Masaya koo la?

¹⁷ A fɔlɔ, o b’an kalan ko Ala ka Masaya tun bena sigi “o masa nunu ka tile la,” o kɔrɔ, tuma min na masaya wɛrɛw tun bena kɛ yen hali bi. A filanan, o b’an kalan fana ko Ala ka Masaya bena mɛn kudayi. Mɔgɔ si tɛna se k’a minɛ ani ka gofɛrɛnɛman dɔ wɛrɛ sigi a nɔɔ na. A sabanan, an b’a faamu ko kɛlɛ bena kɛ Ala ka Masaya ni duniɲa ka masayaw cɛ. Ala ka Masaya lo bena see sɔrɔ u bɛɛ kan. A laban, o Masaya kelenpe lo bena adamadenw mara. O la, a bena kɛ adamadenw fɛ kuntigiyaw bɛɛ la fisaman ye min ɲɔgɔn ma sɔrɔ ka ye.

18. Kɛlɛ laban min bena kɛ adamadenw ka gofɛrɛnɛmanw ni Ala ka Masaya cɛ, o be weele cogo di?

¹⁸ Kɛlɛ laban min bena kɛ Ala ka Masaya ni duniɲa nin ka masayaw cɛ, Bibulu be koo caaman fɔ o koo la. Ɲɛyirali fɛ, a b’a fɔ ko ni laban be surunyana, mɛlɛkɛ juguw bena ngalon jɛnsɛn walisa ka “dugukolo kan masakɛw bɛɛ” lafili. Mun kama do? Walisa k’u “lajɛ Ala Sebaayabɛɛtigi ka donba kɛlɛ kama.” Duniɲa ka masaw bena lajɛn ɲɔgɔn kan “yɔrɔ min na, o tɔgɔ ko  Harmagedɔn heburukan na.” ( Yirali 16:14, 16, ABM ). Ka kɛɲɛ n’o vɛrise fila ka fɔta ye, kɛlɛ laban min bena kɛ adamadenw ka gofɛrɛnɛmanw ni Ala ka Masaya cɛ, o be weele ko Harmagedɔn wala Arimagedɔn kɛlɛ.

19, 20. Mun lo be Ala sago bali a ka kɛ sisan yɛrɛ dugukolo kan?

¹⁹ Ala ka Masaya bena mun lo kɛ ka dafa Arimagedɔn sababu la? Ala sago ye min ye dugukolo ta fan fɛ, i ka miiri tugun o la. Jehova Ala tun b’a fɛ adamaden tilennen dafalenw ka dugukolo fa ani u ka baara kɛ ale ye alijɛnɛ kɔnɔ. Mun lo be o koo bali a ka kɛ sisan yɛrɛ? A fɔlɔ, an ye jurumutɔw ye, ani o kosɔn an be bana ani an be sa. Nka, an y’a ye kalansen 5nan kɔnɔ ko Yezu sara an kosɔn walisa an ka ɲɛnamaya banbali sɔrɔ. N’a sɔrɔ i hakili be nin kumaw la minw fɔra Zan ka Kibaro duman kɔnɔ ko: “Ala ye diɲɛ kanu haali, fo a ye a Denkɛ kelenpe di, walisa mɔgɔ o mɔgɔ dara a Denkɛ la, o kana halaki, nka o ka ɲɛnamaya banbali sɔrɔ.”—Zan 3:16, ABM.

²⁰ Gwɛlɛya wɛrɛ ye ko mɔgɔ caaman be koo jugu kɛ. U be ngalon tigɛ, ka nanbara kɛ ani ka kakalaya kɛ. U t’a fɛ ka Ala sago kɛ. Mɔgɔ minw be koo juguw kɛ olu bena halaki Ala ka kɛlɛ la o min ye Arimagedɔn ye (Zaburuw 37:10). Ayiwa, koo wɛrɛ min kama Ala sago tɛ kɛra dugukolo kan, o ye ko gofɛrɛnɛmanw tɛ mɔgɔw jija k’a kɛ. See tɛ gofɛrɛnɛman caaman ye, u ka jugu ani u be nanbarakow kɛ. Bibulu b’a fɔ ka gwɛ ko: “Adamaden le be kuntigiya kɛ a tɔɲɔgɔn kan k’a tɔɔrɔ.”—Waajulikɛla 8:9.

21. Cogo di Ala sago bena kɛ dugukolo kan a ka Masaya sababu fɛ?

²¹ Arimagedɔn tɛmɛnen kɔ, adamadenw bena kɛ gofɛrɛnɛman kelen dɔrɔn lo ka mara kɔnɔ: Ala ka Masaya. O Masaya bena Ala sago dafa ani a bena kɛ duga kabakomanw sababu ye. Ɲɛyirali fɛ, a bena Sutana n’a ka jinaw halaki ( Yirali 20:1-3). Yezu ka saraka nafa bena kɛ adamaden kantigimanw kan walisa u kana bana ani u  kana sa tugun. U bena ɲɛnamaya kɛ kudayi o Masaya ka mara kɔnɔ ( Yirali 22:1-3). Dugukolo bena yɛlɛma ka kɛ alijɛnɛ ye. O cogo la, o Masaya sababu fɛ, Ala sago bena kɛ dugukolo kan ani a tɔgɔ bena saniya. O kɔrɔ ko di? O kɔrɔ ko a laban na, mɔgɔ minw bena kɛ Ala ka Masaya fanga kɔrɔ, u bɛɛ kelen-kelen bena Jehova tɔgɔ bonya.

22. An b’a lɔn cogo di ko Ala ka Masaya ma na tuma min na Yezu tun be dugukolo kan wala a suu kununni kɔ dɔrɔn?

²² Tuma min na Yezu y’a fɔ a ka kalandenw ye ko u ka delili kɛ ko “i ka masaya ka na,” a gwɛnen lo k’o Masaya tun ma na fɔlɔ o wagati la. Yala a tun nana tuma min na Yezu yɛlɛla ka taga sankolo la wa? Ayi, sabu Yezu suu kununni kɔ, Piyɛri ni Pol y’a fɔ ko Zaburu 110:1 ka kiraya kuma dafara Yezu koo la: “Masa Ala y’a fɔ ne Matigi ye ko: ‘Sigi ne kinibolo fɛ fɔɔ ne k’i juguw cɔnkɔn i seen kɔrɔ.’ ” (Kɛwaliw 2:32-35; Eburuw 10:12, 13). Yezu tun ka kan ka kɔnɔni kɛ wagati dɔ la.

23. (a) Ala ka Masaya y’a daminɛ ka kuntigiya kɛ tuma juman? (b) An bena baro kɛ mun lo kan kalansen nata la?

²³ A ye kɔnɔni kɛ fɔɔ wagati juman? Saan kɛmɛkulu 19nan ani 20nan wagati la, Bibulu kalanden sɔbɛ dɔw y’a faamu dɔɔni-dɔɔni k’o wagati tun bena ban saan 1914 la. (Gafe nin ɲɛɛ 215-218 be kunnafoni dɔw di o  saan 1914 koo la.) Koo minw kɛra duniɲa kuru bɛɛ kɔnɔ saan 1914 la, u b’a yira k’u ka faamuyali tun ye tiɲɛn ye. Bibulu ka kiraya kuma dafali b’a yira ko saan 1914 la, Krista sigira Masaya la ani ko Ala ka sankolola Masaya y’a daminɛ ka kuntigiya kɛ. O kama, Sutana ka wagati “tɔɔ man jan tugu” ani an be o wagati le la ( Yirali 12:12; Zaburuw 110:2). Siga t’a la, an be se k’a fɔ ko yanni dɔɔni, Ala ka Masaya bena wuli a juguw kama walisa Ala sago ka kɛ dugukolo kan. Yala e fɛ, nin tɛ kibaro duman daan ye wa? E lanen b’a la ko tiɲɛn koo lo wa? Kalansen nata bena i dɛmɛ k’a faamu ko Bibulu be o lo fɔ tiɲɛn-tiɲɛn na.