1. Ano ang bantog nga pangamuyo nga tun-an naton?

SA BILOG nga kalibutan, minilyon ka tawo ang pamilyar sa pangamuyo nga ginatawag sang madamo nga Amay Namon, ukon Pangamuyo sang Ginuo. Ining duha ka pagtawag nagapatuhoy sa bantog nga pangamuyo nga gintudlo ni Jesucristo bilang modelo. Importante gid ini, kag kon usisaon mo ang una nga tatlo ka pangabay sa sini nga pangamuyo, mabuligan ka nga matun-an pa gid ang ginatudlo sang Biblia.

2. Ano ang tatlo ka butang nga gintudlo ni Jesus nga ipangamuyo sang iya mga disipulo?

² Sa umpisa sining modelo nga pangamuyo, gintudluan ni Jesus ang mga nagapamati sa iya: “Gani, mangamuyo kamo sing subong sini: ‘Amay namon nga yara sa langit, pakabalaanon ang imo ngalan. Magkari ang imo Ginharian. Matuman ang imo kabubut-on sa duta subong sang sa langit.’” (Mateo 6:9-13) Ano ang kahulugan sining tatlo ka pangabay?

3. Ano ang kinahanglan naton mabal-an parte sa Ginharian sang Dios?

³ Madamo na kita sing natun-an parte sa ngalan sang Dios, nga Jehova. Kag may natun-an naman kita  parte sa kabubut-on sang Dios—kon ano ang iya nahimo kag himuon pa para sa mga tawo. Pero ano ang ginapatuhuyan ni Jesus sang ginsilingan niya kita nga mangamuyo sing, “Magkari ang imo Ginharian”? Ano ang Ginharian sang Dios? Paano ang pagkari sini magapakabalaan sang ngalan sang Dios? Kag ano ang labot sang pagkari sang Ginharian sa paghimo sang kabubut-on sang Dios?

4. Ano ang Ginharian sang Dios, kag sin-o ang Hari sini?

⁴ Ang Ginharian sang Dios isa ka gobierno nga gintukod ni Jehova nga Dios kag may Hari ini nga ginpili Niya. Sin-o ang Hari sang Ginharian sang Dios? Si Jesucristo. Bilang Hari, mas labaw si Jesus sangsa tanan nga manuggahom nga tawo kag gintawag sia nga “Hari sang mga nagagahom subong mga hari kag Ginuo sang mga nagagahom subong mga ginuo.” (1 Timoteo 6:15) Paagi sa iya gahom, mas madamo nga kaayuhan ang iya mahimo sangsa bisan sin-o nga manuggahom nga tawo, bisan ang pinakamaayo pa sa ila.

5. Halin sa diin magagahom ang Ginharian sang Dios, kag ano ang gamhan sini?

⁵ Halin sa diin magagahom ang Ginharian sang Dios? Ti, diin bala si Jesus? Sigurado nga nadumduman mo nga ginpatay sia sa usok sang pag-antos, kag dayon ginbanhaw sia. Sang ulihi, nagkayab sia sa langit. (Binuhatan 2:33) Gani, sa langit ang Ginharian sang Dios. Amo nga gintawag ini sang Biblia nga “langitnon nga Ginharian.” (2 Timoteo 4:18) Bisan pa sa langit ang Ginharian sang Dios, gamhan sini ang bilog nga duta.—Basaha ang Bugna 11:15.

6, 7. Ngaa maayo gid nga Hari si Jesus?

 ⁶ Ngaa maayo gid nga Hari si Jesus? Una, indi gid sia mapatay. Kon ikumparar si Jesus sa mga tawo nga hari, gintawag sia sang Biblia nga “ang isa nga amo lamang ang indi mamalatyon, nga nagapuyo sa kapawa nga indi mapalapitan.” (1 Timoteo 6:16) Buot silingon, ang tanan nga kaayuhan nga himuon ni Jesus magapadayon asta san-o. Kag madamo pa sia sing himuon para sa kaayuhan sang mga tawo.

⁷ Binagbinaga ini nga tagna sang Biblia parte kay Jesus: “Magakunsad sa iya ang espiritu ni Jehova, ang espiritu sang kaalam kag paghangop, ang espiritu sa paglaygay kag pagkagamhanan, ang espiritu sang ihibalo kag ang kahadlok kay Jehova. Magakalipay sia sa pagkahadlok kay Jehova. Indi sia maghukom suno lang sa makita niya, ukon magsabdong suno lang sa mabatian niya. Magahukom sia sing matarong sa mga kubos, kag sa pagkamatarong magasabdong sia para sa kaayuhan sang mga mahagop sa duta.” (Isaias 11:2-4) Ginapakita sini nga si Jesus mangin isa ka matarong kag maluluy-on nga Hari sang mga tawo sa duta. Indi bala nga gusto mo ang amo sini nga manuggahom?

8. Sin-o ang magagahom kaupod ni Jesus?

⁸ May isa pa ka kamatuoran parte sa Ginharian sang Dios: Indi lang si Jesus ang magagahom. May kaupod sia nga mga manuggahom. Halimbawa, ginsilingan ni apostol Pablo si Timoteo: “Kon padayon kita nga magbatas, magagahom man kita subong mga hari kaupod niya.” (2 Timoteo 2:12) Huo, si Pablo, si Timoteo, kag ang iban pa nga matutom nga ginpili sang Dios magagahom kaupod ni Jesus sa Ginharian sa langit. Pila ang hatagan sini nga pribilehiyo?

9. Pila ang magagahom kaupod ni Jesus, kag san-o nagsugod ang Dios sa pagpili sa ila?

 ⁹ Sa Kapitulo 7 sini nga libro, si apostol Juan ginhatagan sing palanan-awon diin nakita niya “ang Kordero [si Jesucristo] nga nagatindog sa Bukid Sion [ang iya palangakuan bilang Hari sa langit], kag kaupod niya ang 144,000 nga may ngalan niya kag ngalan sang iya Amay sa ila agtang.” Sin-o ining 144,000? Ginasugiran kita mismo ni Juan: “Padayon sila nga nagasunod sa Kordero bisan diin sia magkadto. Ginbakal sila halin sa katawhan subong una nga mga bunga sa Dios kag sa Kordero.” (Bugna 14:1, 4) Huo, sila ang matutom nga mga sumulunod ni Jesucristo nga ginpili para maggahom sa langit kaupod niya. Sa tapos sila mabanhaw pakadto sa kabuhi sa langit, “magagahom sila sa duta subong mga hari” kaupod ni Jesus. (Bugna 5:10) Halin sang panahon sang mga apostoles, nagsugod ang Dios sa pagpili sing matutom nga mga Cristiano para makompleto ang kadamuon nga 144,000.

10. Ngaa ang paggahom ni Jesus kag sang 144,000 mahigugmaon gid nga kahimusan?

¹⁰ Mahigugmaon gid nga kahimusan nga si Jesus kag ang 144,000 magagahom sa mga tawo. Una, si Jesus nangin tawo sadto kag naagyan niya kon paano nagaantos ang tawo. Parte kay Jesus, si Pablo nagsiling: “Kita may mataas nga saserdote nga makapakita sing kahanuklog sa aton mga kaluyahon, ang isa nga natilawan sa tanan nga paagi kaangay sa aton, apang wala sing sala.” (Hebreo 4:15; 5:8) Ang kaupod niya nga mga manuggahom mga tawo man anay nga nag-antos kag nagbatas. Naagyan man nila nga mangin indi perpekto kag naeksperiensiahan ang tanan nga klase sang  balatian. Sigurado gid nga naintiendihan nila ang mga problema nga ginaatubang sang mga tawo!

11. Ngaa nagsiling si Jesus nga dapat ipangamuyo sang iya mga disipulo nga matuman ang kabubut-on sang Dios sa langit?

¹¹ Sang nagsiling si Jesus nga dapat ipangamuyo sang iya mga disipulo nga magkari ang Ginharian sang Dios, nagsiling man sia nga dapat ipangamuyo nila nga matuman ang kabubut-on sang Dios “sa duta subong sang sa langit.” Ang Dios ara sa langit, kag ang iya kabubut-on padayon nga ginahimo didto sang matutom nga mga anghel. Pero sa Kapitulo 3 sini nga libro, natun-an naton nga ang isa ka malaut nga anghel nag-untat sa paghimo sang kabubut-on sang Dios kag ginsulay niya nga magpakasala si Adan kag si Eva. Sa Kapitulo 10, matun-an pa gid naton ang ginatudlo sang Biblia parte sa sining malaut nga anghel, nga gintawag nga Satanas nga Yawa. Si Satanas kag ang mga anghel nga nagdesisyon nga magsunod sa iya—nga gintawag mga demonyo—ginpasugtan nga magpabilin sing makadali sa langit. Gani sadto nga tion, indi tanan sa langit nagahimo sang kabubut-on sang Dios. Magabag-o ini kon maggahom na ang Ginharian sang Dios. Ang bag-o nga Hari, si Jesucristo, magapakig-away kay Satanas.—Basaha ang Bugna 12:7-9.

12. Ano ang duha ka importante nga hitabo nga mabasa sa Bugna 12:10?

¹² Ginasaysay sang masunod nga tagna kon ano ang matabo: “Nabatian ko ang mabaskog nga tingog sa langit nga nagasiling: ‘Karon nag-abot na ang kaluwasan kag ang gahom kag ang Ginharian sang aton Dios  kag ang awtoridad sang iya Cristo, bangod ang manugsumbong sang aton mga kauturan [si Satanas] sa atubangan sang aton Dios sa adlaw kag gab-i gintagbong na!’” (Bugna 12:10) Natalupangdan mo bala ang duha ka importante nga hitabo nga ginasugid sa sini nga bersikulo sa Biblia? Una, ang Ginharian sang Dios nga si Jesucristo ang Hari nagsugod sa paggahom. Ikaduha, si Satanas gintabog sa langit kag gintagbong sa duta.

13. Ano ang resulta sang pagtabog kay Satanas sa langit?

¹³ Ano ang resulta sining duha ka hitabo? Parte sa langit, aton mabasa: “Bangod sini magkalipay kamo nga mga langit kag kamo nga nagaistar sa sini!” (Bugna 12:12) Huo, nagakalipay ang matutom nga mga anghel sa langit kay sang wala na si Satanas kag ang iya mga demonyo, ang tanan nga nabilin sa langit matutom kay Jehova nga Dios. Nagaluntad na ang indi mabungkag nga paghidait kag paghiusa didto. Ang kabubut-on sang Dios ginahimo na sa langit.

14. Ano ang natabo bangod gintagbong si Satanas sa duta?

¹⁴ Kamusta naman sa duta? Ang Biblia nagasiling: “Makaluluoy ang duta kag ang dagat, bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.” (Bugna 12:12) Naakig gid si Satanas sa pagtabog sa iya sa langit kag sa iya malip-ot na lang nga tion. Bangod sang iya kaakig, nag-antos ukon nangin “makaluluoy” ang duta. Matun-an pa gid naton ang parte sa sining “makaluluoy” nga kahimtangan sa masunod nga kapitulo. Pero kon amo sini ang sitwasyon, makapamangkot kita, Paano tumanon sang Ginharian ang kabubut-on sang Dios sa duta?

15. Ano ang kabubut-on sang Dios para sa duta?

 ¹⁵ Dumduma kon ano ang kabubut-on sang Dios para sa duta. Natun-an mo ang parte sini sa Kapitulo 3. Sa Eden, ginpakita sang Dios nga kabubut-on niya nga mangin paraiso ini nga duta nga istaran sang wala nagakapatay kag matarong nga mga tawo. Ginsulay ni Satanas si Adan kag si Eva para magpakasala. Bisan pa naapektuhan sini ang katumanan sang kabubut-on sang Dios para sa duta, ini nga kabubut-on wala nagbag-o. Katuyuan gihapon ni Jehova nga “ang mga matarong magapanubli sang duta, kag magapuyo sila sa sini sa wala sing katubtuban.” (Salmo 37:29) Kag tumanon ini sang Ginharian sang Dios. Paano?

16, 17. Ano ang ginasugid sa aton sang Daniel 2:44 parte sa Ginharian sang Dios?

¹⁶ Binagbinaga ang tagna nga makita sa Daniel 2:44. Aton mabasa: “Sa panahon sini nga mga hari, ang Dios sang langit magatukod sing isa ka ginharian nga indi gid malaglag. Ini nga ginharian indi pag-ihatag kay bisan sin-o nga tawo. Dugmukon sini kag laglagon ining tanan nga ginharian, kag ini lamang ang magapabilin sing dayon.” Ano ang ginasugid sini sa aton parte sa Ginharian sang Dios?

¹⁷ Una, ginasugid sini nga ang Ginharian sang Dios tukuron “sa panahon sini nga mga hari,” ukon samtang nagagahom pa ang iban nga ginharian ukon gobierno. Ikaduha, ginasugid sini nga ang Ginharian magapabilin sing dayon. Indi ini madaug kag indi pagbuslan sang iban nga gobierno. Ikatlo, ang mga gobierno sa kalibutan magapakig-away batok sa Ginharian sang Dios. Magadaug ang Ginharian sang Dios. Sa ulihi, amo lamang ini ang gobierno nga magagahom sa mga tawo. Maeksperiensiahan na sang  mga tawo ang paggahom sang pinakamaayo nga gobierno.

18. Ano ang tawag sa katapusan nga inaway sa tunga sang Ginharian sang Dios kag sang mga gobierno sini nga kalibutan?

¹⁸ Madamo ang ginasugid sang Biblia parte sining katapusan nga inaway sa tunga sang Ginharian sang Dios kag sang mga gobierno sini nga kalibutan. Halimbawa, ginatudlo sini nga samtang nagapalapit ang katapusan, ang malaut nga mga espiritu magapalapnag sing kabutigan para patalangon ang “mga hari sa bug-os nga duta.” Ngaa? “Agod tipunon ang mga hari sa inaway nga mahanabo sa daku nga adlaw sang Dios nga Labing Gamhanan.” Ang mga hari sang duta tipunon “sa lugar nga ginatawag sa Hebreo nga Armageddon.” (Bugna 16:14, 16) Base sa sining duha ka bersikulo, ang katapusan nga inaway sa tunga sang mga gobierno sang tawo kag sang Ginharian sang Dios ginatawag nga inaway sang Armageddon.

19, 20. Ngaa wala natuman ang kabubut-on sang Dios sa duta subong?

¹⁹ Ano ang himuon sang Ginharian sang Dios paagi sa inaway sang Armageddon? Hunahunaa liwat kon ano kabubut-on sang Dios para sa duta. Katuyuan ni Jehova nga Dios nga ang duta istaran sang matarong kag perpekto nga mga tawo nga nagaalagad sa iya sa Paraiso. Pero ngaa wala ini natuman subong? Una, makasasala kita, nagabalatian, kag nagakapatay. Pero natun-an naton sa Kapitulo 5 nga si Jesus napatay para sa aton agod mabuhi kita asta san-o. Ayhan nadumduman mo ang ginasiling sa Ebanghelyo ni Juan: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi  makatigayon sang kabuhi nga wala sing katapusan.”—Juan 3:16.

²⁰ Ang isa pa ka problema amo nga madamo nga tawo ang nagahimo sing malaut. Nagabinutig sila, nagapangdaya, kag nagahimo sing imoral. Indi nila gusto himuon ang kabubut-on sang Dios. Ang mga tawo nga nagahimo sing malaut laglagon sa inaway sang Dios nga Armageddon. (Basaha ang Salmo 37:10.) Pero ang isa pa ka rason kon ngaa ang kabubut-on sang Dios wala pa matuman sa duta amo nga wala ginasugo sang mga gobierno ang mga tawo nga himuon ini. Madamo nga gobierno ang nangin mahuyang, mapintas, ukon korap. Ang Biblia prangka nga nagasiling: “Ginagamhan sang tawo ang iya isigkatawo sa iya kahalitan.”—Manugwali 8:9.

21. Paano tumanon sang Ginharian ang kabubut-on sang Dios sa duta?

²¹ Pagkatapos sang Armageddon, ang mga tawo pagagamhan sang isa na lang ka gobierno, ang Ginharian sang Dios. Tumanon sini nga Ginharian ang kabubut-on sang Dios kag magadala ini sing dalayawon nga mga pagpakamaayo sa mga tawo. Halimbawa, dulaon sini si Satanas kag ang iya mga demonyo. (Bugna 20:1-3) Ang balor sang halad ni Jesus ipadapat agod ang matutom nga mga tawo indi na magbalatian kag mapatay. Sa paggahom sang Ginharian, magakabuhi na sila asta san-o. (Basaha ang Bugna 22:1-3.) Ang duta himuon nga paraiso. Gani, tumanon sang Ginharian ang kabubut-on sang Dios sa duta kag pakabalaanon sini ang ngalan sang Dios. Ano ang buot silingon sini? Buot silingon, sa ulihi sa idalom sang paggahom sang Ginharian sang Dios, ang tanan nga nagakabuhi magahatag sing kadungganan sa ngalan ni Jehova.

22. Ngaa nabal-an naton nga ang Ginharian sang Dios wala pa nagkari sang ari si Jesus sa duta ukon sang tapos sia mabanhaw?

²² Sang ginhambalan ni Jesus ang iya mga sumulunod nga mangamuyo sing, “Magkari ang imo Ginharian,” maathag nga sina nga tion wala pa nagkari ang Ginharian. Nagkari bala ini sang nagkayab si Jesus sa langit? Wala, bangod si Pedro kag si Pablo nagsiling nga sa tapos ginbanhaw si Jesus, natuman sa iya ang tagna sa Salmo 110:1: “Si Jehova nagsiling sa akon Ginuo: ‘Pungko ka sa akon tuo tubtob mahimo ko ang imo mga kaaway nga palatungan sang imo mga tiil.’” (Binuhatan 2:32-35; Hebreo 10:12, 13) Ginapakita sini nga naghulat sia anay.

23. (a) San-o nagsugod sa paggahom ang Ginharian sang Dios? (b) Ano ang tun-an sa masunod nga kapitulo?

²³ Daw ano kadugay ang paghulat? Sang ika-19 kag ika-20 nga siglo, amat-amat nga naintiendihan sang sinsero nga mga nagatuon sa Biblia nga ini nga paghulat matapos sa tuig 1914. (Parte sini nga petsa, tan-awa ang artikulo sa Apendise nga “1914—Isa Ka Importante nga Tuig sa Tagna sang Biblia.”) Ang mga hitabo sugod sang 1914 ebidensia nga husto ang paghangop sining sinsero nga mga nagatuon sa Biblia. Ang katumanan sang mga tagna sa Biblia nagapakita nga sang 1914,  ang Cristo nangin Hari kag ang Ginharian sang Dios sa langit nagsugod na sa paggahom. Gani, nagakabuhi na kita sa ‘malip-ot na lamang nga tion’ nga nabilin kay Satanas. (Bugna 12:12; Salmo 110:2) Masiguro man naton nga sa indi madugay magahulag ang Ginharian sang Dios sa pagtuman sang kabubut-on sang Dios sa duta. Nagustuhan mo bala ini nga balita? Nagapati ka bala nga matuod ini? Ipakita sa imo sang masunod nga kapitulo nga ginatudlo gid sang Biblia ini nga mga butang.