1. Peb yuav kawm txog zaj lus thov twg?

YEXUS KHETOS tau qhia kom nws cov thwjtim paub thov Vajtswv. Zaj lus thov uas nws qhia lawv ntawd muaj lub ntsiab tseem ceeb heev. Tsheej plhom leej thoob ntiajteb paub txog zaj lus thov ntawd. Cia peb kawm txog 3 yam uas Yexus hais kom lawv thov txog. Peb yam ntawd yuav pab kom koj paub ntxiv tias phau Vajlugkub qhia txog dabtsi tiag.

2. Yexus qhia kom nws cov thwjtim thov txog 3 yam dabtsi?

² Yexus qhia nws cov thwjtim tias: “Nej yuav tsum thov raws li no. ‘Peb leej Txiv uas nyob saum ntuj, thov sawvdaws hwm koj lub npe kom dawb huv. Thov cia koj lub tebchaws [Nceeg Vaj] los. Thov cia muaj raws li koj lub siab nyiam rau hauv ntiajteb ib yam li muaj saum ntuj ceeb tsheej.’” (Mathai 6:9-13) Ua li cas 3 yam uas Yexus hais kom lawv thov txog no ho tseem ceeb?

3. Peb yuav tsum paub dabtsi txog Vajtswv lub Nceeg Vaj?

³ Peb twb kawm ntau yam txog Vajtswv Yehauvas lub npe lawm. Thiab peb twb kawm mentsis lawm tias  Vajtswv xav kom lub ntiajteb no zoo li cas. Tsis tas li ntawd xwb, peb twb kawm txog tej uas nws tau ua yav tas los thiab tej uas nws tseem yuav ua rau noob neej. Zaum no cia peb ho kawm txog Yexus cov lus thov Vajtswv seb yog txhais li cas tiag. Thaum Yexus hais tias: “Thov cia koj lub tebchaws [Nceeg Vaj] los,” Yexus cov lus no yog txhais li cas tiag? Vajtswv lub Nceeg Vaj ntawd yog dabtsi? Lub Nceeg Vaj yuav ua kom Vajtswv lub npe dawb huv li cas? Lub Nceeg Vaj ntawd yuav ua kom muaj raws li Vajtswv lub siab nyiam li cas?

4. Vajtswv lub Nceeg Vaj yog dabtsi, thiab tus Vajntxwv uas kav lub Nceeg Vaj ntawd yog leejtwg?

⁴ Vajtswv lub Nceeg Vaj yog ib lub tseem fwv uas Vajtswv Yehauvas ua tus tsa. Vajtswv kuj yog tus xaiv tus vajntxwv uas kav lub nceeg vaj ntawd thiab. Leejtwg yog tus Vajntxwv uas kav Vajtswv lub Nceeg Vaj? Tus Vajntxwv ntawd yog Yexus Khetos. Yexus yog tus vajntxwv uas zoo tshaj tag nrho tibneeg tej nom tswv huvsi. Phau Vajlugkub muab Yexus hu ua “cov uas muaj hwjchim tus Tswv thiab yog ib tsoom vajntxwv tus Vajntxwv.” (Qhia Tshwm 17:14) Txawm tias tibneeg tej nom tswv ib txhia kav tau zoo los, tsis muaj ib tug yuav kav tau zoo npaum li Yexus. Rau qhov Yexus muaj hwjchim ua tau ntau tshaj li tag nrho tibneeg tej nom tswv huvsi.

5. Vajtswv lub Nceeg Vaj yuav nyob qhovtwg kav, thiab yuav kav dabtsi?

⁵ Vajtswv lub Nceeg Vaj yuav nyob qhovtwg kav? Koj sim xav seb Yexus nyob qhovtwg? Tom qab luag muab Yexus tua rau saum tus ncej ntoo, ua li cas rau nws lawd? Vajtswv tau tsa Yexus ciaj sawv rov qab los. Ces tsis ntev tom qab ntawd, Yexus rov mus saum ntuj ceeb tsheej lawm. (Tubtxib Tes Haujlwm 2:33) Yog li ntawd, Vajtswv  lub Nceeg Vaj los kuj nyob saum ntuj ceeb tsheej thiab. Twb yog vim li ntawd, phau Vajlugkub thiaj muab lub Nceeg Vaj ntawd hu ua “lub tebchaws [Nceeg Vaj] saum ntuj ceeb tsheej.” (2 Timaute 4:18) Txawm tias Vajtswv lub Nceeg Vaj nyob saum ntuj ceeb tsheej los, lub Nceeg Vaj ntawd yuav kav tuaj rau ntiajteb no.​—Nyeem Qhia Tshwm 11:15.

6, 7. Ua li cas Yexus ho yog ib tug Vajntxwv zoo ua luaj li?

⁶ Ua li cas Yexus ho yog ib tug Vajntxwv zoo ua luaj li? Rau qhov nws yuav tsis txawj tuag li lawm. Phau Vajlugkub tau muab Yexus piv rau tibneeg tej vajntxwv li no: “[Yexus] muaj txojsia uas rhuav tsis tau.” (Henplais 7:16) Yog li ntawd, txhua yam zoo uas Yexus ua yuav nyob mus li. Thiab nws yeej yuav ua tej yam zoo kawg nkaus los pab noob neej.

⁷ Cia peb kawm txog ib zaj lus faj lem hauv phau Vajlugkub uas yog hais txog Yexus: “Tus ntawd yuav zoo siab hlo hwm thiab paub ntshai [Yehauvas]. Nws yuav tsis tu plaub raws li nws lub qhov muag pom, lossis tu raws li lub qhov ntsej tau hnov. Nws yuav tu plaub ncaj ncees rau cov pluag, thiab tu rau cov uas tsis muab hlob hauv lub ntiajteb raws li raug cai.” (Yaxaya 11:3, 4) Cov lus no qhia tias Yexus yuav yog ib tug vajntxwv uas ncaj ncees thiab muaj siab hlub tibneeg. Koj puas xav tau ib tug vajntxwv zoo li ntawd?

8. Leejtwg yuav tau nrog Yexus kav?

⁸ Puas yog Yexus ib leeg kav Vajtswv lub Nceeg Vaj xwb? Tsis yog. Yuav muaj ib co neeg nrog nws kav thiab. Tus tubtxib Povlauj thiaj hais li no rau Timaute: “Yog peb tiv thev, peb kuj yuav tau nrog nws kav.” (2 Timaute 2:12) Yog li ntawd, Povlauj, Timaute thiab lwm cov uas Vajtswv xaiv tseg, lawv puavleej yuav tau nrog Yexus kav lub Nceeg Vaj saum ntuj ceeb tsheej. Muaj pes tsawg leej yuav tau txoj koob hmoov no?

9. Muaj pes tsawg leej yuav nrog Yexus kav, thiab Vajtswv pib xaiv lawv thaum twg los lawm?

 ⁹ Zoo li peb twb kawm hauv Tshooj 7, tus tubtxib Yauhas tau ua yog toog pom “tus Menyuam Yaj [Yexus Khetos] sawv saum lub roob Xi-oo [nws tes haujlwm ua vajntxwv kav saum ntuj ceeb tsheej], thiab cov uas nrog nws ua ke muaj 144,000 leej uas muaj nws lub npe thiab muaj nws leej Txiv lub npe sau rau ntawm lawv hauv pliaj.” Leejtwg muaj feem nrog cov 144,000 leej? Yauhas qhia peb li no: “Cov neeg no yog cov uas . . . raws tus Menyuam Yaj qab mus rau txhua qhov. Lawv twb raug txhiv hauv neeg los ua thawj phaum uas muab xyeem rau Vajtswv thiab rau tus Menyuam Yaj.” (Qhia Tshwm 14:1, 4) Yog li ntawd, lawv yog cov neeg ncaj ncees uas raws Yexus qab. Tom qab lawv tuag thiab raug tsa sawv hauv qhov tuag rov qab los muaj txojsia nyob saum ntuj ceeb tsheej, lawv yuav tau nrog Yexus “kav lub ntiajteb.” (Qhia Tshwm 5:10) Txij xyoo 33 T.Q.Y. los, Vajtswv pib xaiv ib co Khixatia uas muab siab npuab Nws, los ua cov 144,000 leej ntawd.

10. Vim li cas ho zoo rau Yexus thiab cov 144,000 leej kav noob neej?

¹⁰ Vajtswv yog tus uas tsa Yexus thiab cov 144,000 leej los kav noob neej. Nws ua li ntawd vim nws hlub tibneeg kawg nkaus li. Yehauvas paub tias Yexus twb ua neej nyob hauv ntiajteb thiab raug kev txom nyem li neeg ntiajteb los lawm. Povlauj hais li no txog Yexus: “Peb tsis yog muaj tus tuam pov thawj hlob uas tsis txawj mob siab qhov uas peb qaug zog tiamsis nws txeev raug kev sim siab txhua yam ib yam li peb.” (Henplais 4:15; 5:8) Cov uas nrog Yexus kav los kuj tau ua neej nyob hauv ntiajteb no lawm thiab. Lawv kuj raug ntau yam kev txom nyem, kev mob kev nkeeg los lawm. Lawv yeej paub tias tsis yoojyim rau tibneeg txhaum ua qhov zoo. Yog li ntawd, lawv yeej yuav to taub tej kev nyuaj siab uas tibneeg raug!

11. Vim li cas Yexus qhia nws cov thwjtim thov kom muaj raws li Vajtswv lub siab nyiam saum ntuj ceeb tsheej?

¹¹ Thaum Yexus qhia nws cov thwjtim tias lawv yuav tsum thov kom Vajtswv cia lub Nceeg Vaj los, Yexus kuj qhia kom lawv thov txog lwm yam thiab. Nws qhia tias lawv yuav tsum thov kom “muaj raws li [Vajtswv] lub siab nyiam rau hauv ntiajteb ib yam li muaj saum ntuj ceeb tsheej.” Vajtswv nyob saum ntuj ceeb tsheej. Tag nrho Vajtswv cov tubtxib saum ntuj uas ncaj ncees yeej ib txwm ua raws li Vajtswv lub siab nyiam. Tiamsis hauv Tshooj 3, peb twb kawm txog ib tug tubtxib saum ntuj limhiam uas tso Vajtswv tes haujlwm tseg thiab tau ntxias Adas thiab Eva poob kev txhaum. Tus ntawd hu ua Xatas uas yog Ntxwg Nyoog. Hauv Tshooj 10, peb tseem yuav kawm ntxiv txog tej uas phau Vajlugkub qhia txog tus tubtxib limhiam ntawd. Peb kuj yuav kawm txog cov tubtxib phem uas tuaj Xatas tog hu ua cov dab. Vajtswv cia Xatas thiab cov dab phem ntawd nyob ib ntus saum ntuj. Txij thaum ntawd los, tsis yog txhua tus uas nyob saum ntuj yuav ua raws li Vajtswv lub siab nyiam. Thaum Vajtswv lub Nceeg Vaj pib kav saum ntuj, ces Vajtswv thiaj tsis pub kom muaj li ntawd lawm. Thaum ntawd, Yexus Khetos uas yog tus Vajntxwv tshiab, nrog Xatas ua rog saum ntuj ceeb tsheej.​—Nyeem Qhia Tshwm 12:7-9.

12. Qhia Tshwm 12:10 qhia txog 2 yam tseem ceeb twg?

¹² Tau muaj li cas xwb? Phau Vajlugkub cov lus faj lem qhia li no: “Kuv hnov ib lub suab saum ntuj hais tias, ‘Nimno txojkev dim thiab hwjchim thiab Vajtswv lub tebchaws [Nceeg Vaj] thiab nws tus Khetos lub hwjchim los txog lawm, vim [Xatas] tus uas iab hiam peb cov kwvtij raug muab pov los lawm, yog tus uas iab hiam rau ntawm Vajtswv lub xubntiag nruab hnub hmo ntuj.’”  (Qhia Tshwm 12:10) Nqe Vajlugkub no qhia txog 2 yam tseem ceeb heev uas tau muaj tshwm sim: (1) Qhov uas Yexus Khetos pib kav Vajtswv lub Nceeg Vaj; (2) Qhov uas Xatas raug ntiab tawm saum ntuj los rau hauv ntiajteb.

13. Tom qab Xatas raug ntiab tawm saum ntuj ceeb tsheej, zoo li cas lawm xwb?

¹³ Tom qab 2 yam ntawd dhau lawm, tau muaj li cas? Phau Vajlugkub qhia tias tau muaj li no saum ntuj ceeb tsheej: “Vim li no, lub ntuj ceeb tsheej thiab sawvdaws uas nyob hauv’e, cia li zoo siab xyiv fab.” (Qhia Tshwm 12:12) Yog li ntawd, cov tubtxib saum ntuj uas muab siab npuab Vajtswv xyiv fab kawg li rau qhov Xatas thiab nws cov dab raug ntiab tawm saum ntuj. Zaum no txhua leej txhua tus uas nyob saum ntuj ceeb tsheej puavleej muab siab npuab Vajtswv Yehauvas lawm. Saum ntuj ceeb tsheej sawvdaws sib koom siab thiab nyob sib haum xeeb. Txhua yam saum ntuj ceeb tsheej muaj tiav raws li Vajtswv lub siab nyiam lawm.

14. Thaum Xatas raug ntiab tawm saum ntuj ceeb tsheej, tau muaj li cas rau hauv ntiajteb?

¹⁴ Tiamsis ua li cas rau lub ntiajteb? Phau Vajlugkub hais tias:“Tiamsis lub ntiajteb thiab dej hiavtxwv’e, nej yuav raug txom nyem vim Ntxwg Nyoog twb nqes los rau hauv nej ua npau taws vog, rau qhov nws paub tias nws lub sijhawm tshuav tsis ntev lawm.” (Qhia Tshwm 12:12) Xatas npau taws heev rau qhov nws raug ntiab tawm saum ntuj los thiab nws yuav tsis tau nyob ntev lawm. Xatas npau taws kawg li, nws thiaj ua rau lub ntiajteb raug kev “txom nyem.” Hauv Tshooj 9, peb tseem yuav kawm ntxiv txog tej kev “txom nyem” ntawd. Tiamsis lub Nceeg Vaj yuav kho li cas kom lub ntiajteb thiaj zoo raws li Vajtswv lub siab nyiam?

15. Vajtswv lub ntsiab rau lub ntiajteb yog dabtsi?

¹⁵ Peb yuav tsum nco ntsoov Vajtswv lub ntsiab rau lub  ntiajteb. Koj twb kawm txog qhov no nyob rau Tshooj 3 lawm. Hauv lub vaj Edee, Vajtswv qhia tias nws xav kom lub ntiajteb no ua ib lub vaj kaj siab. Nws xav kom tibneeg coj ncaj thiab nyob puv ntia lub ntiajteb mus ib txhis. Tiamsis Adas thiab Eva raug Xatas ntxias poob kev txhaum lawm. Qhov ntawd tau cuam tshuam Yehauvas lub ntsiab rau lub ntiajteb, tiamsis Vajtswv lub ntsiab yeej tsis tau hloov. Yehauvas tseem npaj tseg kom “cov ncaj ncees yuav tau lub tebchaws [ntiajteb] ua lawv teej lawv tug, thiab tau nyob rau hauv mus ib txhis.” (Ntawv Nkauj 37:29) Vajtswv lub Nceeg Vaj yuav ua kom muaj tau li ntawd. Tiamsis yuav muaj tiav li cas?

16, 17. Daniyee 2:44 qhia li cas txog Vajtswv lub Nceeg Vaj?

¹⁶ Cia peb kawm txog zaj lus faj lem hauv Daniyee 2:44. Nqe ntawd hais tias: “Ncua sijhawm uas tej vajntxwv ntawd nyob Vajtswv ntuj yuav tsa dua ib lub tebchaws [nceeg vaj] uas tsis muaj ib hnub uas ua kom puam tsuaj li, lossis qhov uas kav lub tebchaws ntawd yuav tsis poob rau lwm haiv neeg. Lub tebchaws ntawd yuav ua rau tej tebchaws tawg ntsoog ntxaws ua tej dwb daim yaj tag, thiab lub tebchaws ntawd yuav nyob ruaj khov mus ib txhis.” Nqe no qhia peb li cas txog Vajtswv lub Nceeg Vaj?

¹⁷ Qhov 1, nqe ntawd qhia rau peb tias Vajtswv lub Nceeg Vaj yuav pib kav rau lub sijhawm uas “tej vajntxwv” nyob, lossis lub sijhawm uas tseem muaj lwm cov tseem fwv kav. Qhov 2, nqe ntawd qhia tias lub Nceeg Vaj yuav nyob mus ib txhis, tsis muaj hnub kawg. Tsis muaj lwm lub tseem fwv yuav kov yeej lossis hloov tau lub Nceeg Vaj ntawd chaw. Qhov 3, peb pom tias Vajtswv lub Nceeg Vaj yuav ua rog rau tej nceeg vaj hauv lub qab ntuj no. Vajtswv lub Nceeg Vaj yuav kov yeej tag nrho tej tseem fwv ntawd. Thaum kawg, tsuas muaj Vajtswv lub tseem fwv los kav noob neej lawm xwb. Thaum ntawd ces tibneeg yuav tau txojkev kav uas zoo tshaj plaws, tsis tau pom dua li.

18. Ntsuj rog zaum kawg ntawm Vajtswv lub Nceeg Vaj thiab tej tseem fwv hauv lub qab ntuj no hu li cas?

 ¹⁸ Phau Vajlugkub qhia ntau yam txog ntsuj rog zaum kawg ntawm Vajtswv lub Nceeg Vaj thiab tej tseem fwv hauv lub qab ntuj no. Phau Vajlugkub qhia tias thaum hnub kawg los ze lawd, cov dab yuav dag ntxias “tej vajntxwv thoob ntiajteb.” Vim li cas? Lawv ua li ntawd vim lawv “yuav sau zog tej vajntxwv ntawd mus ua rog rau hnub loj kawg uas Vajtswv uas muaj hwjchim loj kawg nkaus teem cia.” Cov vajntxwv hauv ntiajteb no yuav sib sau ua ke rau qhov chaw “uas hu raws li lus Henplais hais tias Amakedoo.” (Qhia Tshwm 16:14, 16) Raws li ob nqe Vajlugkub no, ntsuj rog zaum kawg ntawm Vajtswv lub Nceeg Vaj thiab tibneeg tej tseem fwv hu ua Amakedoo.

19, 20. Vim li cas niaj hnub no tsis muaj raws li Vajtswv lub siab nyiam hauv lub ntiajteb no lawm?

¹⁹ Ntsuj rog Amakedoo yuav qheb kev rau dabtsi? Xav txog Vajtswv lub ntsiab rau lub ntiajteb no seb. Vajtswv Yehauvas lub ntsiab yog kom cov neeg ncaj ncees thiab zoo kawg nkaus nyob thoob plaws lub ntiajteb. Nws kuj xav kom lawv teev tiam nws hauv lub Vaj Kaj Siab. Vim li cas niaj hnub no ho tsis muaj li ntawd lawm? Vim peb yog neeg muaj txim, thiab peb txawj mob, txawj laus, txawj tuag. Peb twb kawm hauv Tshooj 5 tias, Yexus tuag rau peb kom peb thiaj muaj txojsia nyob mus ib txhis. Tej zaum koj yuav nco tau Yauhas cov lus hauv phau Vajlugkub. Yauhas sau tias: “Vajtswv hlub ntiajteb kawg li nws thiaj pub nws tib leej Tub los kom txhua tus uas ntseeg leej Tub ntawd thiaj tsis puam tsuaj tiamsis yuav tau txojsia ib txhis tsis kawg.”​—Yauhas 3:16.

²⁰ Ib qho teeb meem ntxiv yog qhov uas tibneeg ua ntau yam kev phem limhiam. Lawv dag ntxias thiab ua phem ua qias. Lawv tsis xav ua raws li Vajtswv lub siab nyiam. Cov tibneeg uas ua phem limhiam yuav raug rhuav tshem, thaum txog Vajtswv ntsuj rog Amakedoo.  (Nyeem Ntawv Nkauj 37:10.) Ib qho teeb meem ntxiv yog qhov uas tej tseem fwv tsis txhawb kom tibneeg ua raws li Vajtswv lub siab nyiam. Ntau lub tseem fwv tsis muaj hwjchim tswjhwm, lossis lawv kav limhiam thiab tsis ncaj kiag li. Phau Vajlugkub qhia ncaj li no txog tej tseem fwv ntawd: “Ib tug muaj hwjchim kav ib tug, ua rau nws raug txom nyem.”​—Laj Lim Tswvyim 8:9.

21. Lub Nceeg Vaj yuav ua kom ib puas tsav yam hauv ntiajteb no muaj tiav raws li Vajtswv lub siab nyiam li cas?

²¹ Tom qab Amakedoo, tsuas muaj ib lub tseem fwv, uas yog Vajtswv lub Nceeg Vaj, kav noob neej lawm xwb. Lub Nceeg Vaj ntawd yuav ua kom ib puas tsav yam muaj raws li Vajtswv lub siab nyiam, thiab yuav foom koob hmoov zoo kawg nkaus rau noob neej. Tej koob hmoov zoo li cas? Lub Nceeg Vaj ntawd yuav muab Xatas thiab nws cov dab rho tawm. (Qhia Tshwm 20:1-3) Thaum lub Nceeg Vaj kav, qhov uas Yexus tuag txhiv noob neej yuav pab kom cov neeg ncaj ncees tsis muaj mob muaj nkeeg thiab tsis muaj kev ploj kev tuag lawm. Tibneeg yuav tau txojsia nyob mus ib txhis. (Nyeem Qhia Tshwm 22:1-3.) Lub Nceeg Vaj yuav muab lub ntiajteb no kho ua ib lub vaj kaj siab. Yog li ntawd, lub Nceeg Vaj yuav ua kom ib puas tsav yam hauv lub ntiajteb no muaj tiav raws li Vajtswv lub siab nyiam thiab yuav ua kom Vajtswv lub npe dawb huv. Qhov ntawd yog li cas tiag? Qhov ntawd qhia tias thaum kawg txhua leej txhua tus uas nyob hauv Vajtswv lub Nceeg Vaj yuav hwm Yehauvas lub npe.

22. Vim li cas peb thiaj paub tias Vajtswv lub Nceeg Vaj tsis tau los rau thaum Yexus tseem nyob hauv ntiajteb, thiab thaum Yexus ciaj sawv rov los?

²² Vim li cas Yexus ho qhia nws cov thwjtim thov kom Vajtswv “lub tebchaws [Nceeg Vaj] los”? Rau qhov lub  Nceeg Vaj tsis tau los rau lub sijhawm uas Yexus nyob ntawd. Ua li lub Nceeg Vaj puas tau los rau thaum Yexus mus saum ntuj ceeb tsheej? Tsis tau los thaum ntawd thiab. Twb yog li ntawd, Petus thiab Povlauj thiaj hais tias tom qab Yexus ciaj sawv rov los, zaj lus faj lem ntawm Ntawv Nkauj 110:1 tau muaj tiav rau Yexus. Zaj lus faj lem ntawd hais li no: “[Yehauvas] hais rau kuv tus tswv tias, ‘Cia li zaum ntawm kuv sab xis, mus txog thaum kuv muab koj cov yeeb ncuab ua koj lub rooj tiag taw.’” (Tubtxib Tes Haujlwm 2:32-35; Henplais 10:12, 13) Yog li ntawd, yuav tsum ncua sijhawm, lub Nceeg Vaj mam li pib kav.

23. (1) Vajtswv lub Nceeg Vaj pib kav thaum twg? (2) Peb yuav kawm txog dabtsi hauv Tshooj 9?

²³ Yuav ncua sijhawm ntev li cas? Yuav ncua mus txog rau xyoo 1914. Plaub caug xyoo ua ntej ntawd, ib co tub kawm Vajlugkub twb tshawb nrhiav pom zuj zus tias yuav muaj li ntawd. (Yog tias xav kawm ntxiv txog xyoo 1914, mus nyeem zaj hu ua “Xyoo 1914 Tseem Ceeb Kawg Li” hauv Cov Lus Qhia Ntxiv.) Tej uas lawv tshawb nrhiav pom puas muaj tseeb tiag? Tej xwm txheej uas muaj tshwm sim hauv ntiajteb no txij xyoo 1914 los, qhia tias yeej muaj tseeb tiag. Qhov uas tej lus faj lem hauv phau Vajlugkub muaj tiav, qhia tias Khetos tau sawv ua Vajntxwv thiab Vajtswv lub Nceeg Vaj saum ntuj yeej pib kav rau xyoo 1914 lawm tiag.  Yog li ntawd, peb nyob rau lub “sijhawm [uas] tshuav tsis ntev” rau Xatas lawm. (Qhia Tshwm 12:12; Ntawv Nkauj 110:2) Peb kuj hais tau tias tsis ntev tom ntej no Vajtswv lub Nceeg Vaj yeej yuav ua kom ib puas tsav yam hauv ntiajteb no muaj tiav raws li Vajtswv lub siab nyiam tiag. Qhov no zoo kawg li puas yog? Koj puas ntseeg tias tej no yuav muaj tiag? Peb tseem yuav kawm hauv Tshooj 9 tias phau Vajlugkub yeej qhia txog tej no tiag.