1. Ongumbiro iṋe ndji tjiukwa ndji matu kakonḓonona?

OMANGETE wovandu mouparanga wouye ve tjiwa ongumbiro ndji Tate Yetu. Indji ongumbiro ndji tjiukwa nawa, Jesus Kristus omuini ndja yandja otja otjihorera. Oyo ongumbiro onanḓengu tjinene nu tji twa katara komaningiriro omatenga yetatu wongumbiro ndji maye tu vatere okurihonga ovingi kutja Ombeibela tjiri i honga tjike.

2. Oviṋa viṋe vitatu Jesus mbya tja ovahongewa ve ngave kumbire?

² Pomautiro wongumbiro ndji, Jesus wa honga ovandu mbaave mu puratene a tja: “Nopu mwa sokukumba nai: ‘Tate yetu ngu u ri momayuru: Ena roye ngari yapurwe; ouhona woye ngau ye; ombango yoye ngai tjitwe na kombanda yehi otja meyuru.’” (Mateus 6:9-13) Omaningiriro yetatu nga maye hee tjike?

3. Eṱe matu hepa okutjiwa tjike ohunga nOuhona waMukuru?

³ Eṱe twe rihonga ovingi rukuru ohunga nena raMukuru, Jehova. Nu twe rihonga kaṱiṱi ohunga nombango yaMukuru, imbi mbya tjitira ovandu na mbi ma katjita wina. Nu hapo Jesus aa hee tjike indu tja tja ngatu kumbe kutja: “Ouhona woye ngau ye”? Ouhona waMukuru otjikeṋa? Indu tji we ya mau yapura vi ena raMukuru? Nu wina mau yenenisa vi ombango yaMukuru?

4. Ouhona waMukuru otjikeṋa, nOmbara yawo owaṋi?

⁴ Ouhona waMukuru ohoromende ndja zikwa i Jehova Mukuru ndji nOmbara ndja toororwa i ye. Ombara yOuhona waMukuru owaṋi? OJesus Kristus. Jesus, ngu ri Ombara, omunene kombanda yovahonapare avehe vovandu nu u isanewa “Ombara yozombara noMuhona wovahona.” (1 Timoteus 6:15) Eye u nomasa wokutjita ouwa okukapita kangamwa omuhonapare womundu nandarire omusembasemba mu avehe.

5. Ouhona waMukuru mau honapara okuzira pi, nu okombanda yaye?

⁵ Ouhona waMukuru mau honapara okuza pi? Jesus u ri pi? Otja tji mo zemburuka twe rihonga kutja Jesus wa zeperwa komuti wondatumisire, tjazumba a pendurwa. Oruveze orusupi okuzambo eye wa ronda keyuru. (Oviungura 2:33) Okutja Ouhona waMukuru u ri ngo, meyuru. Ombeibela opu i zokutja owo ‘ouhona womayuru.’ (2 Timoteus 4:18) Nu nandarire kutja Ouhona waMukuru u ri meyuru, owo mau honapara kombanda yehi okuzira meyuru.—Omavandururiro 11:15.

6, 7. Omomuano uṋe Jesus mbwe ri Ombara yakatjoruhonga?

⁶ Omomuano uṋe Jesus mbwe ri Ombara yakatjoruhonga? Omena rokutja eye kamaa koka. Mokusasaneka Jesus ku novahona vovandu, Ombeibela i tja: “Eye erike ngwi ngu ha koka; Eye wa tura mondjerera ku ku ha vazewa.” (1 Timoteus 6:16) Ihi matji hee kutja oviṋa avihe oviwa Jesus mbi ma tjiti, mavi karerere. Nu matu tjiwa kutja eye ma tjitire ovandu oviṋa ovingi noviwa.

⁷ Tara Ombeibela mbi ya hunganeka ohunga na Jesus: “Ombepo yaMuhona mai ya kombanda Ye, Ombepo younongo noyozondunge, Ombepo yomavyuriro noyomasa, Ombepo yondjiviro noyondira ku Muhona. Eye ke nakupangura otja kombunikiro yomundu, notja komambo ngu ma zuu uriri nao. Nungwari Eye ma pangura ovasyona  nokuhinandoorora, nu ma karere kovanandjenda mousemba wawo.” (Jesaja 11:2-4) Omambo ngo maye raisa kutja Jesus ma rire Ombara yousemba nu ndji mai kaṱira ovandu ondjenda kombanda yehi. Ove otjo zera okukara nomunane otja ingo?

8. Oowaṋi mbu mave kahonapara pu na Jesus?

⁸ Tara kouatjiri warwe mbu mau tjama nOuhona waMukuru: Jesus ke nakuhonapara erike. Pe na varwe mbu mave honapara puna ye. Okutara kotjihorera, omuapostele Paulus wa raera Timoteus kutja: “Tji twa panḓere pokutjinda omihihamo, eṱe wina matu honapara puna Ye.” (2 Timoteus 2:12) Paulus na Timoteus na varwe ovaṱakame mba toororwa i Mukuru mave kahonapara puna Jesus mOuhona womayuru. Owo ivengapi?

9. Ovandu vengapi mbu mave kahonapara pu na Jesus, nu Mukuru wa uta ruṋe okuvetoorora?

⁹ Otja tji pa raisiwa mEkondwa 7 rembo ndi, omuapostele Johanes wa perwe otjirimunikise ma muna “Ondjona [Jesus Kristus] ndja kuramene kOndundu yaSion [otjihavero tje tjouhona meyuru]; nu pu yo pa ri ovandu omayovi esere nomirongo vine na vane, mba ri nena rayo noraihe nga tjangerwe kovipara vyawo.” Ovandu 144 000, ovangendu? Johanes omuini ma tja: “Owo ve kongorera Ondjona ngamwa akuhe ku mai i. Nowo ombe ri mba mba randerwe movandu, nombe ri ovatenga okuyapurirwa Ndjambi na indji Ondjona.” (Omavandururiro 14:1, 4) Owo ovakongorere vaJesus Kristus ovaṱakame mba toororwa momuano wapeke okukahonapara puna ye meyuru. Tji va zu nokupendurwa movakoke okukahupa meyuru, “mave honapara kombanda yehi” okuza meyuru pamwe na Jesus. (Omavandururiro 5:10) Okuza koruveze rwovaapostele, Mukuru otja uta okutoorora Ovakriste ovaṱakame okuurisa otjivaro hi 144 000.

10. Ongwaye tje ri otjiṋa otjiwa ovandu okuhonaparerwa i Jesus novandu mba 144 000?

¹⁰ Otjiṋa otjiwa tjiri ovandu okuhonaparerwa i Jesus novandu  mba 144 000. Orondu Jesus u tjiwa kutja okurira omundu nokumuna ouzeu otjiṋa otjizeu pupe ṱa pi. Paulus wa tja Jesus “kaye ngwi ngu ha sora okuṱondjenda nomaungundi wetu; Eye wa rorwa momuhingo ngamwa auhe otja eṱe, nungwari Eye ka tjitire ouvi.” (Ovaheberi 4:15; 5:8) Ovahonapare va puna ye wina va tjinda ouzeu otjovandu. Nu wina va kondja nouhahomonena nave tjindi omitjise pekepeke. Okutja owo tjiri mave ripurire komauzeu ovandu ngu ve muna!

11. Ongwaye Jesus tja raera ovahongewa ve kutja ngave kumbire ombango yaMukuru i tjitwe meyuru?

¹¹ Indu Jesus tja tja ovahongewa ve ngave kumbire Ouhona waMukuru kutja u ye, eye wina wa tja ngave kumbire ombango yaMukuru i tjitwe “na kombanda yehi otja meyuru.” Mukuru u ri meyuru nu ombango ye ngo, aruhe aai tjitwa i ovaengeli ve ovaṱakame. MEkondwa 3 rembo ndi, eṱe twe rihonga kutja omuengeli omurunde wa isa okutjita ombango yaMukuru na tjiti kutja Adam na Eva ve katuke oveta yaMukuru. MEkondwa 10 matu kerihonga ovingi kutja Ombeibela i honga tjike ohunga nomuengeli omurunde ngo, ngu isanewa Satan Omudiaboli. Satan novaengeli mbe rikuta kuna ye, mbe isanewa ozondemone, va yandjererwe okukara meyuru oruveze orusupi. Okutja kaviutwa avihe meyuru mbyaavi tjiti ombango yaMukuru. Nungwari ihi atja tji runduruka indu Ouhona waMukuru tji wa utu okuhonapara. Ombara ombe ndja zikwa, Jesus Kristus, aa sokurwisa Satan.—Omavandururiro 12:7-9.

12. Ovitjitwa viṋe vivari ovinanḓengu mbya handjuṋunwa mOmavandururiro 12:10?

¹² Omambo omahunganekwa ngu maye kongorere mba maye handjuṋuna imbi mbya tja vi tjitwa: “Ami arire tji mba zuu eraka enene meyuru amari tja: ‘Nambano Ndjambi wetu wa eta ondjamo! Nambano Ndjambi  wa raisa omasa we otja ngu ri ombara! Nambano Omutwirisiwa we wa raisa ouvara we! Orondu ingwi ngu kurama komurungu waNdjambi nu ngu rondora ovakambure ovakwetu omutenya nouṱuku [Satan], wa rambwa meyuru.’” (Omavandururiro 12:10) Ove wa munu kutja pe novitjitwa vivari ovinanḓengu mbya tamunwa mezeva ndo? Otjitenga, Ouhona waMukuru kehi yaJesus Kristus wa utu okuhonapara. Otjitjavari, Satan wa nakaurirwa kombanda yehi okuza meyuru.

13. Indu Satan tja rambwa meyuru, okwo kwa kongorera tjike?

¹³ Ovikeṋa mbya kongorera kovitjitwa vivari mbyo? Ohunga na imbi mbya tjitwa meyuru, matu lese nai: “Notji mwa sokuyoroka, eṋe mayuru na eṋe amuhe mbu mu tura mu wo!” (Omavandururiro 12:12) Ovaengeli ovaṱakame va ri nondjoroka nu avehe meyuru va ri ovaṱakame ku Jehova Mukuru orondu Satan nozondemone ze kava ri ko rukwao. Ku nohange noruwano ndu hi nomaandero. Nambano ombango yaMukuru i tjitwa meyuru.

14. Ovikwaye mbya tjitwa kombanda yehi indu Satan tja rambwa meyuru?

¹⁴ Nu kwa tjitwa tjike kombanda yehi? Ombeibela mai tja: “Nungwari owee ku eṋe, mahi nokuvare! Orondu Omudiaboli wa rauka, me ya ku eṋe, neye u nomazenge omanene, tjinga ama tjiwa kutja u noruveze orusupi uriri.” (Omavandururiro 12:12) Satan wa ṱomazenge mena rokutja wa rambwa meyuru nu wa sewa nokaruveze okasupi uriri. Mena romazenge we, eye u eta ozombamisiro noruhoze kombanda yehi. Matu kerihonga ovingi ohunga nozombamisiro nḓo mekondwa ndi mari kongorere ko. Nu indu Satan tja yumbwa kombanda yehi nu tje eta oruhoze nai, imbwi Ouhona waMukuru mau yenenisa vi ombango ye kombanda yehi?

15. Ombango yaMukuru kehi ooiṋe?

¹⁵ Zemburuka kutja ombango yaMukuru kehi ooiṋe. Ove we rihonga ohunga nayo mEkondwa 3. Motjikunino tjaEden,  Mukuru wa raisa kutja u vanga ehi ndi ri rire oparadisa ndje ura ovandu ovasemba nu mbe hi nakukoka. Satan wa tjita kutja Adam na Eva ve katuke, nu ihi tja tjita kutja ombango yaMukuru kehi ai ha tjitwa. Nungwari oyo kai ya runduruka. Jehova ingee u vanga kutja ‘ovasemba ve rumate ehi, nu ve ture mu ro nga aruhe.’ (Epsalme 37:29) Ouhona waMukuru mau yenenisa ombango ndjo. Omomuano uṋe?

16, 17. Daniel 2:44 mari tu hongo tjike ohunga nOuhona waMukuru?

¹⁶ Tara komaprofetero nge ri mu Daniel 2:44. Owo maye tja: “Moruveze ndwi ovanane mbo ngunda amave honapara, Ndjambi weyuru ma ziki ouhona mbu hi na indu maau yanda ko. Owo kamaau haverwa ko, nungwari mau nyono omauhona aehe ngo, nu tjazumba owo au karerere nga aruhe.” Ihi matji tu hongo tjike ohunga nOuhona waMukuru?

¹⁷ Rutenga, matji tu hongo kutja Ouhona waMukuru mau zikwa “moruveze ndwi ovanane mbo ngunda amave honapara,” poo omauhona warwe ngunda aye ri ko. Epu oritjavari, matu hongwa kutja Ouhona mbo mau karerere nga aruhe. Owo kamaau haverwa ko nu kau nakupingenwa i ohoromende yarwe. Epu oritjatatu, matu munu kutja maku kara ovita pokati kOuhona waMukuru nomauhona wouye mbwi. Ouhona waMukuru mau toṋa. Korusenina, ombu mau rire ohoromende aiyerike ndji mai honaparere ovandu. Okuzambo ovandu mave yorokere ouhonapare ousembasemba mbu ve hina ve u tjivirwe.

18. Yandja ena rovita ovisenina pokati kOuhona waMukuru nozohoromende zovandu.

¹⁸ Ombeibela mai tu raere ovingi ohunga novita ovisenina pokati kOuhona waMukuru nozohoromende zouye mbwi. Okutara kotjihorera, oyo i honga kutja omaandero wouye tji ya tumbuka, ozombepo ozombi maze handjaura ovizeze okupukisa ‘ozombara azehe zouye.’ Nondando iṋe? “Okukezeworonganisira ovita mEyuva enene raNdjambi, Omunamasaaehe.” Ozombara zouye nḓa maze  woronganisirwa “poṋa pu ku za Armagedon mOtjiheberi.” (Omavandururiro 16:14, 16) Otja komazeva yevari ngo, ovita ovisenina pokati kozohoromende zovandu nOuhona waMukuru vi isanewa ovita vyaArmagedon.

19, 20. Ovikeṋa mbi tjaera ombango yaMukuru kutja ai ha tjitwa nai kombanda yehi?

¹⁹ Ouhona waMukuru mau kayenenisa tjike okupitira movita vyaArmagedon? Ripura rukwao kutja ombango yaMukuru kehi oyatjike. Jehova Mukuru u vanga kutja ehi ri ure novandu ovasemba nohomonena mbu mave mu karere mOparadisa. Ongwaye imbyo tji vi ha tjitwa nai? Kotjirutenga eṱe oweṱe ovanandjo, tu vera nu tu koka. Nungwari mEkondwa 5, twe rihonga kutja Jesus wa ṱira eṱe kokutja tu hupe nga aruhe. Ove mape ya mo zemburuka omambo nga tjangwa mEvangeli raJohanes ngu maye tja: “Orondu Ndjambi wa suverere ouye tjinene nai nga tja yandja Omuna we omukwatwaerike, kokutja auhe ngu ma kambura mu Ye a ha pandjara, nungwari a kare nomuinyo waaruhe.”—Johanes 3:16.

²⁰ Otjiṋa tjarwe, ovandu ve tjita oviṋa ovivi. Ve kora ovizeze, ve novineya, nu ve tjita oruvakiro. Owo kave vanga okutjita ombango yaMukuru. Ovandu mbe tjita oviṋa ovivi mbi mave yandekwa movita vyaArmagedon. (Epsalme 37:10) Epu rarwe ndi tjita kutja ombango yaMukuru ai ha tjitwa kombanda yehi, omena rokutja ozohoromende kaze tunduza ovandu okutjita nao. Ozohoromende ozengi kaze nomasa, ozonḓepe nu za zunḓaka. Ombeibela nokuhinakuhoreka i tja: “Omundu umwe rumwe u honaparera omukwao nga tji ma humapara.”—Omuzuvarise 8:9.

21. Ouhona waMukuru mau yenenisa vi ombango ye kombanda yehi?

²¹ Kombunda yaArmagedon, ovandu mave kara kehi yohoromende imwe uriri, Ouhona waMukuru. Ouhona mbo mau tjiti ombango yaMukuru nu mau eta ozondaya ozohimise. Owo mau isapo Satan nozondemone ze. (Omavandururiro 20:1-3) Omasa wombunguhiro yaJesus maye  ungurisiwa kokutja ovandu ovaṱakame ave ha vere nokukoka rukwao. Okutja owo mave yenene okuhupa nga aruhe kehi youhonapare wOuhona waMukuru. (Omavandururiro 22:1-3) Ehi mari rire oparadisa. Okutja Ouhona mbwi mau yenenisa ombango yaMukuru kombanda yehi nau yapura ena re. Ihi matji hee tjike? Matji hee kutja korusenina auhe kehi yOuhona waMukuru ma yozike ena raJehova.

22. Eṱe matu tjiwa vi kutja Ouhona waMukuru kau ere indu Jesus tja ri kombanda yehi poo tjimanga eye tja za nokupendurwa?

²² Indu Jesus tja tja ovahongewa ve ngave kumbe kutja, “ouhona woye ngau ye,” oukahu kutja oruveze ndo owo tjandje kau ye ya. Owo we ya indu Jesus tja ronda keyuru po? Kako, mena rokutja Petrus na Paulus va tja Jesus tja za nokupendurwa, eye wa ‘kakara pehi kokunene kwaNdjambi na undjire ngo nga Ndjambi tja twa ovanavita na ye kehi yozombaze ze.’ (Oviungura 2:32-35; Ovaheberi 10:12, 13) Okutja pa ri oruveze eye ndwaa sokuundja.

23. (a) Ouhona waMukuru wa uta ruṋe okuhonapara? (b) Mekondwa ndi mari kongorere ko matu kerihonga tjike?

²³ Oruveze ndu ṱa pi? Meserewondo oritja-19 noritja-20, ovahongwa vOmbeibela ovanambango va nongonona kutja omaundjiro ngo ya yanda mo-1914. (Ohunga nombura ndji, tara kOviweziwako porupa ndwi “1914—ombura onanḓengu momahunganekero wOmbeibela.”) Ovitjitwa mouye  mbya uta mo-1914 vi raisa kutja omanongononeno wovahongwa vOmbeibela mba, ya ri mondja. Omayenenisiro womaprofetero wOmbeibela ye raisa kutja mo-1914, Kristus otja rira Ombara, nu Ouhona waMukuru womeyuru wa uta okuhonapara. Okutja eṱe tu hupa ‘moruveze orusupi’ Satan ndwa sewa na ro. (Omavandururiro 12:12; Epsalme 110:2) Eṱe wina matu yenene okuhungira nongamburiro kutja, tjimanga Ouhona waMukuru mau toora omikambo okuyenenisa ombango ye kombanda yehi. Indji kambuze ombwa kove? Mo kambura kutja ouatjiri? Ekondwa ndi mari kongorere ko mari tu vatere okumuna kutja Ombeibela tjiri i honga oviṋa mbi.