IXEF WIS TMANYA
D acu i ţ-ţagelda n Ṛebbi?
-
D acu i d-yeqqar Wedlis Iqedsen ɣef Tgelda n Ṛebbi?
-
Acu ara texdem Tgelda n Ṛebbi?
-
Melmi ara d-iḍru lebɣi n Ṛebbi di lqaɛa s lemɛawna n Tgelda?
1. Anta taẓallit yesɛan lmeɛna tameqrant ara nessenqed?
ƐISA LMASIḤ yesseḥfeḍ i inelmaden-is amek ara ţẓallan. Taẓallit-agi i d-iǧǧa d lemtel tesɛa lmeɛna ţ-ţameqrant. M’ara tessenqdeḍ tlata leḥwayeǧ timezwura yellan di tẓallit-agi, aţ-ţissineḍ akteṛ ɣef wayen yesselmad s ṣṣeḥ Wedlis Iqedsen.
2. Acu-tent tlata leḥwayeǧ iɣef i gweṣṣa Ɛisa inelmaden-is ad ţẓallan?
2 Ɛisa yesselmed i wid i s-d-iţḥessisen amek ara beddun taẓallit-agi, yenna-yasen: “Atan ihi wamek ara teţẓallam, kwenwi: ‘A Baba-tneɣ yellan deg igenwan, isem-ik ad iţwaqeddes, Tagelda-k a d-tas, lebɣi-k a d-iḍru di lqaɛa akken yeḍra deg igenwan.’” (Matta 6:9-13) Acu i d lmeɛna n tlata leḥwayeǧ-agi?
3. Acu i neḥwaǧ a t-nissin ɣef Tgelda n Ṛebbi?
3 Nelmed-ed yakan aṭas ɣef yisem n Ṛebbi, Yahwa. Nehdeṛ-ed daɣen cwiyya ɣef lebɣi-ines, yeɛni ɣef wayen i gexdem d wayen ara yexdem ɣef lǧal n lɛibad. Lameɛna, acu i d-iqsed Ɛisa mi d-yenna: “Tagelda-k a d-tas”? D acu i ţ-ţagelda n Ṛebbi? M’ara d-tas, amek ara tqeddes isem n Ṛebbi, yeɛni ara t-terr yeṣfa? Yerna, acu n lɛalaqa yellan ger tisin n Tgelda akk-d lebɣi n Ṛebbi ara yeḍrun?
D ACU I Ţ-ŢAGELDA N ṚEBBI?
4. D acu i ţ-ţagelda n Ṛebbi, yerna d anwa i d Agellid-is?
4 Tagelda n Ṛebbi d lḥukuma i gesbedd Yahwa Ṛebbi, yerna yextaṛ-as Agellid ara ţ-iseddun. Menhu-t Ugellid-agi? D Ɛisa Lmasiḥ. Agellid-agi yeɣleb lḥekkam akk n ddunit; yeţţusemma: “Agellid n igelliden, Ssid n ssyadi.” (1 Timutawus 6:15) Yesɛa tazmert akken ad yexdem lxiṛ akteṛ n win ifazen akk ger lḥekkam n ddunit.
5. Ansi ara d-teḥkem Tgelda n Ṛebbi, yerna ɣef wacu?
5 Ansi ara d-teḥkem Tgelda n Ṛebbi? A nxemmem cwiyya. Anda yella Ɛisa? Ahat tecfiḍ belli nɣan-t ɣef wejgu (tgejdit) n leɛtab yerna yeḥya-d mbeɛd. Mi gɛedda kra n lweqt, yuli s igenni. (1 Buṭrus 3:22) Ihi, deg igenni i tella Tgelda n Ṛebbi. Ɣef wayagi i teţţusemma deg Wedlis Iqedsen ‘Tagelda n igenwan.’ (2 Timutawus 4:18) Tagelda-yagi aţ-ţeḥkem ɣef lqaɛa ɣas ma deg igenni i tella.—Ɣer-ed Aweḥḥi 11:15.
6, 7. Acuɣer Ɛisa d Agellid ifazen?
6 Ayɣer Ɛisa d Agellid ifazen? Tamezwarut, axaṭer ur yeţmeţţat ara maḍi. Imi gxulef igelliden n ddunit, Adlis Iqedsen yenna-d fell-as: “Neţţa kan ur neţmeţţat ara, i gzedɣen tafat ur ibbwiḍ yiwen.” (1 Timutawus 6:16) A d-nefhem seg wannect-a belli ayen akk yelhan ara yexdem ad idum. Ţ-ţideţ, ad yexdem leḥwayeǧ timeqranin yerna cebḥent.
7 Xemmem daɣen ɣer licaṛa-yagi n Wedlis Iqedsen yeɛnan Ɛisa: “Ṛṛuḥ n [Yahwa] a d-yers fell-as: D Ṛṛuḥ n lekyasa akw-d lefhama, d Ṛṛuḥ n nndaṛa akw-d ẓẓwara, d Ṛṛuḥ n tmusni akw-d tugwdi n [Yahwa], a t-iţţawi di ṭṭaɛa n [Yahwa]. Ur iḥekkem ara s wudmawen, ur ţ-igez̧z̧em ara di ṛṛay ɣef lsas n wayen i gsell. A d-isbeggen lḥeqq n igellilen, ur iṭṭellim ara imeɣban n ddunit.” (Icɛaya 11:2-4) Ɛlaḥsab n imeslayen-agi, Ɛisa ad yili d Agellid aḥeqqi yerna a t-ţɣiḍen imezdaɣ n lqaɛa. Ur tebɣiḍ ara aţ-ţiliḍ ddaw n leɛnaya n lḥakem am wagi?
8. Menhu ara iḥekmen d Ɛisa?
8 Aţţan lḥaǧa nniḍen yeɛnan Tagelda n Ṛebbi: Ɛisa ur iḥekkem ara weḥd-es. Ad ilin wid ara iḥekmen yid-es. Ɣef lemtel, amceggeɛ Bulus yenna i Timutawus: “Ma neɛteb yid-es, an-neḥkem daɣen yid-es.” (2 Timutawus 2:12) Bulus d Timutawus akk-d yemdanen nniḍen unṣiḥen, i gextaṛ Ṛebbi, ad ḥekmen akk-d Ɛisa di Tgelda n igenwan. Acḥal ara yesɛun lemzeyya-yagi?
9. Acḥal n yemdanen ara iḥekmen akk-d Ɛisa? Melmi i gebda Ṛebbi yeţţextiṛi-ten?
9 Akken i t-id-issefhem yixef wis 7 n tektabt-agi, yeţţunefk-as-d i wemceggeɛ Yuḥenna yiwen n uweḥḥi. Yuḥenna yenna-d: “Walaɣ izimer nni [Ɛisa Lmasiḥ] ibedd ɣef wedrar n Ṣiyun [d Agellid deg igenni], llan yid-es meyya uṛebɛa uṛebɛin alef nni yesɛan isem-is akw-d yisem n Baba-s uran ɣef yenyiren-nsen.” Anwi-ten 144 000 iɣef i d-iheddeṛ dagi? D wid iɣef i d-yenna Yuḥenna: “Anda yedda izimer ad ddun. Ţţucafɛen-d si ger yemdanen, d imenza i Yillu akw-d izimer.” (Aweḥḥi 14:1, 4) Ihi, wigi d inelmaden unṣiḥen n Ɛisa Lmasiḥ i geţwaxtaṛen akken ad ḥekmen yid-es deg igenni. Mbeɛd mi d-kkren si ger lmeggtin akken ad ɛicen deg igenni, “ad ḥekmen ddunit” ɣer tama n Ɛisa. (Aweḥḥi 5:10) Si zzman n yemceggɛen, Ṛebbi yeţţextiṛi imasiḥiyen unṣiḥen bac ad yaweḍ leḥsab-nsen 144 000.
10. Acimi i nezmer a d-nini belli Ṛebbi ibeggen-ed leḥmala tameqrant imi yextaṛ Ɛisa akk-d 144 000 akken ad ḥekmen ɣef yemdanen?
10 Ṛebbi ibeggen-ed leḥmala tameqrant imi yextaṛ Ɛisa akk-d 144 000 akken ad ḥekmen ɣef yemdanen! D ṣṣeḥ, Ɛisa ijeṛṛeb d acu i d liḥala n wemdan, ijeṛṛeb leɛtab. Ɣef wayen yeɛnan Ɛisa, Bulus yenna-d belli: “Ur nesɛi ara Iɛebṛaniyen 4:15; 5:8) Ula d wid ara iḥekmen yid-es nneɛtaben yerna ṣebren i lmeḥna asmi llan d lɛibad. Zzyada ɣef wannect-a, qublen ddnubat-nsen yerna iɛedda fell-asen lehlak si mkul d ṣṣenf. Mebla ccekk ad izmiren ad fehmen cceddat n lɛibad.
lmuqeddem ameqwran ur nezmir ara ad ifhem ḍɛafat-nneɣ; iţţujeṛṛeb di kullec am nekwni, lameɛna ur idnib ara.” (ACU ARA TEXDEM TGELDA N ṚEBBI?
11. Ayɣer i gweṣṣa Ɛisa inelmaden-is ad ţẓallan iwakken a d-iḍru lebɣi n Ṛebbi deg igenni?
11 Asmi i genna Ɛisa i inelmaden-is ad ţẓallan iwakken a d-tas Tgelda n Ṛebbi, iweṣṣa-ten daɣen ad ţɛennin bac a d-iḍru lebɣi n Ṛebbi “di lqaɛa akken yeḍra deg igenwan.” Ṛebbi deg igenni i gella; dinna, lmuluk unṣiḥen llan xeddmen dima lebɣi-s. Meɛna deg yixef wis 3, nwala-d belli yiwen lmelk amcum yeḥbes ur ixeddem ara lebɣi n Ṛebbi, yerna idemmer Adam d Ḥewwa ad denben. Deg yixef wis 10, a nẓer akteṛ seg wayen yesselmad Wedlis Iqedsen ɣef lmelk-agi amcum, i geţwassnen s yisem n Cciṭan Iblis. Cciṭan akk-d lmuluk yextaṛen ad ddun yid-es (iwumi neqqar leǧnun) yeţţunefk-asen ţţesriḥ ad qqimen kra n lweqt deg igenni. Ihi, di lweqt-nni, lebɣi n Ṛebbi ur yeḍri ara deg igenni, imi wid yeţɛicin dinna ur llin ara xeddmen meṛṛa lebɣi-ines. Asm’ara tebdu Tgelda n Ṛebbi leḥkem, annect-a meṛṛa ad ibeddel. Ɛisa Lmasiḥ, Agellid-agi ajdid, ad issker lgirra d Cciṭan.—Ɣer-ed Aweḥḥi 12:7-9.
12. Acu-tent snat n tedyanin yesɛan azal iɣef i d-iheddeṛ Uweḥḥi 12:10?
12 Licaṛa-yagi yellan deg Uweḥḥi 12:10 tessefham-ed ayen ara d-iḍrun: “Sliɣ i yiwet n taɣect deg igenni, teǧhed, teqqar: ‘Tura, d lawan n leslak, n tezmert, n tgeldit n Yillu-nneɣ akw-d lḥekma n Lmasiḥ-is; axaṭer yeţwanefḍ-ed win yeţcetkin ɣef watmaten-nneɣ [Cciṭan], win akken yeţcetkin fell-asen ɣer Yillu-nneɣ iḍ d wass.’” Tfaqeḍ d acu-tent snat n tedyanin yesɛan azal iɣef i d-iheddeṛ wafir-agi? Tamezwarut, Tagelda n Ṛebbi, i gesselḥay Ɛisa Lmasiḥ, tebda leḥkem. Tis snat, Cciṭan yeţţuḍegger-ed seg igenni ɣer lqaɛa.
13. Asmi i d-iţţuḍegger Cciṭan seg igenni, s wacu i d-igla wayenni?
13 S wacu i d-glant snat n tedyanin-agi? Ɣef wayen yeḍran deg igenni, nezmer a nɣer: “Ɣef wayagi, feṛḥet, ay igenwan, a kwenwi yesbedden aqiḍun-nwen deg-sen!” (Aweḥḥi 12:12) Ţ-ţideţ, lmuluk unṣiḥen feṛḥen axaṭer, segmi d-iţţuḍegger Cciṭan akk-d leǧnun-is, wid akk izedɣen igenni d unṣiḥen i Yahwa Ṛebbi. Seg yimiren, tella dinna lehna ţ-ţdukli ikemlen, ur neţfakka. Lebɣi n Ṛebbi iḍerru deg igenni.
Asmi d-iţţuḍegger Cciṭan d leǧnun-is seg igenni, tawaɣit teɣli-d ɣef lqaɛa. Tawaɣit-agi qrib aţ-ţfakk.
14. D acu yeḍran imi d-iţţuḍegger Cciṭan ɣer lqaɛa?
14 Meɛna, acu ara d-nini ɣef lqaɛa? Adlis Iqedsen yenna-d: “A tawaɣit-nwen, a lqaɛa akw-d lebḥeṛ! Cciṭan iṣubb-ed ɣur-wen, yerfa mliḥ, axaṭer iẓra belli drus n lweqt i s-d-iqqimen.” (Aweḥḥi 12:12) Imi i d-iţţuḍegger seg igenni yerna drus n lweqt i s-d-yegran, Cciṭan yerfa (yezɛef). Di zzɛaf-is, isseɣli-d xilla n lemḥayen, yeɛni “tawaɣit”, ɣef lqaɛa. Deg yixef i d-iteddun, a d-nissin akteṛ n leḥwayeǧ ɣef ‘twaɣit-agi’. Tura, nezmer a nesteqsi iman-nneɣ: amek ara d-iḍru lebɣi n Ṛebbi di lqaɛa s lemɛawna n Tgelda?
15. Acu i gebɣa Ṛebbi i lqaɛa?
15 Tecfiḍ d acu i gebɣa Ṛebbi i lqaɛa? Tlemdeḍ-ed ayagi deg yixef wis 3. Di Ɛidin, Ṛebbi ibeggen-ed belli yebɣa aţ-ţuɣal lqaɛa d lǧennet iɛemṛen s lɛibad iḥeqqiyen yerna ur neţmeţţat ara. Lebɣi n Ṛebbi yeɛnan lqaɛa ur yeḍri ara axaṭer Cciṭan idemmer Adam d Ḥewwa ad denben, lameɛna lebɣi-yagi ur ibeddel ara. Yahwa mazal-it ar ass-a yebɣa-yasen i ‘iḥeqqiyen ad weṛten lqaɛa w’a ţ-zedɣen i lebda.’ (Ahellil 37:29) Tagelda n Ṛebbi aţ-ţesseḍru imeslayen-agi. Amek?
16, 17. Acu i d-nelmed si Danyil 2:44 ɣef Tgelda n Ṛebbi?
16 Wali licaṛa yellan di Danyil 2:44. Yura deg-s: “Di zzman n igelliden agi, Illu n igenwan a d-issker yiwet n tgelda ur nɣelli ara, i dayem; tageldit-is ur teţţuɣal ara i wegdud nniḍen. Aţ-ţemḥeq, aţ-ţessenger tigeldiwin agi meṛṛa, ma d neţţat aţ-ţdum i dayem.” D acu i ɣ-yesselmad waya ɣef Tgelda n Ṛebbi?
17 Tamezwarut, aya yesselmad-aɣ belli Ṛebbi ad isbedd Tagelda-s “di zzman n igelliden agi”, yeɛni deg yiwen n lweqt ideg i mazal llant tgeldiwin nniḍen. Tis snat, annect-a isbeggen-ed belli Tagelda-ya aţ-ţeqqim i lebda. Ur teţţili ara lḥukuma nniḍen ara ţ-isteɛmṛen neɣ ara yuɣalen deg wemkan-is. Tis tlata, nefhem-ed belli aţ-ţekker lgirra ger Tgelda n Ṛebbi akk-d tgeldiwin n ddunit-agi n tura. Tagelda n Ṛebbi aţ-ţerbeḥ di lgirra-ya. Ɣer taggara, d lḥukuma-yagi kan ara iseddun lɛibad. Imiren a ten-id-iṣaḥ leḥkem werǧin nelli.
18. Amek i teţţusemma lgirra n taggara ara yilin ger Tgelda n Ṛebbi akk-d lḥukumat n ddunit?
18 Adlis Iqedsen iheddeṛ-ed aṭas ɣef lgirra (ṭṭrad) n taggara ara yilin ger Tgelda n Ṛebbi akk-d lḥukumat n ddunit. Di lemtel, yesselmad-aɣ belli m’ara d-teqreb taggara, leǧnun ad zerɛen lekdubat iwakken ad sseɣlḍen “igelliden n ddunit meṛṛa.” Iwacu? “Iwakken a ten-id-snejmaɛen [igelliden-agi] i ṭṭrad n wass ameqwran n Yillu Anezmar.” Igelliden n lqaɛa a d-nnejmaɛen “deg yiwen n wemkan yeţţusemman s tɛibṛanit Harmagidun.” (Aweḥḥi 16:14, 16) Akken i t-nwala deg wafir-agi, lgirra n taggara ara yilin ger lḥukumat n ddunit akk-d Tgelda n Ṛebbi teţţusemma ṭṭrad n Harmagidun.
19, 20. Acuɣer ur d-iḍri ara lebɣi n Ṛebbi ass-a ɣef lqaɛa?
19 Acu ara tesseḍru Tgelda n Ṛebbi s lgirra n Harmagidun? Xemmem tikkelt nniḍen ɣer wayen yebɣa Ṛebbi i lqaɛa. Yahwa Ṛebbi yebɣa aţ-ţeɛmeṛ s yemdanen iḥeqqiyen yerna ikemlen ara t-iɛebden di Lǧennet. Acuɣer ur d-iḍri ara wayagi ass-a? Ssebba tamezwarut, d imednuben i nella; nhellek yerna neţmeţţat. Acu kan, nwala-d deg yixef wis 5 belli Ɛisa yemmut ɣef lǧal-nneɣ iwakken a nɛic i lebda. Tecfiḍ ahat ɣef imeslayen-agi yellan di Linǧil n Yuḥenna: “Seg wakken Illu iḥemmel aṭas ddunit, ifka Mmi-s awḥid, iwakken kra n win yumnen yis ur inegger ara, lameɛna ad isɛu tudert n dayem.”—Yuḥenna 3:16.
20 Ssebba tis snat: qwan medden i gxeddmen cceṛ. Skiddiben, ţɣurrun yerna xeddmen lɛaṛ. Ur bɣin ara ad xedmen lebɣi n Ṛebbi. Imdanen i gxeddmen cceṛ ad negren di lgirra n Harmagidun. (Ɣer-ed Ahellil 37:10.) Aţţan ssebba nniḍen iɣef ur yeţwaxdem ara lebɣi n Ṛebbi ɣef lqaɛa: Lḥukumat ur ţweṣṣint ara cceɛb-nsent ad xedmen lebɣi-yagi. Xilla n lḥukumat ur sɛint ara tazmert, ţ-ţuqsiḥin yerna fesdent. Adlis Iqedsen yeqqar-ed ɛinani: “Amdan irkeḍ gma-s, isseɣli-d fell-as ddel.”—Amusnaw 8:9.
21. Tagelda aţ-ţexdem lebɣi n Ṛebbi ɣef lqaɛa. Amek?
21 Mbeɛd Harmagidun, lɛibad a ten-tesseddu yiwet kan n lḥukuma: Tagelda n Ṛebbi. Tagelda-yagi aţ-ţexdem lebɣi n Ṛebbi w’a d-tawi lbaṛakat timeqranin. Aţţan yiwet n lbaṛaka: aţ-ţemḥu Cciṭan akk-d leǧnun-is. (Aweḥḥi 20:1-3) Lɛibad ad stenfɛen seg wesfel n Ɛisa; ur ţţuɣalen ara ad helken neɣ ad mmten. Ddaw n leḥkem n Tgelda, ad ɛicen i lebda. (Ɣer-ed Aweḥḥi 22:1-3.) Lqaɛa aţ-ţuɣal d lǧennet. Akka, s Tgelda, a d-iḍru lebɣi n Ṛebbi ɣef lqaɛa yerna isem n Ṛebbi ad iţwaqeddes. Acu i d lmeɛna n wayagi? Lmeɛna-s, ɣer taggara, ddaw n leḥkem n Tgelda, wid akk yeddren ad fken lɛezz i yisem n Yahwa.
MELMI ARA D-TGER AFUS-IS TGELDA?
22. Amek i nefhem belli Tagelda n Ṛebbi ur d-tusi ara asmi yella Ɛisa ɣef lqaɛa neɣ akken kan i d-yeḥya si lmut?
22 Di lweqt-nni ideg yesselmed Ɛisa i inelmaden-is ad qqaren di tẓallit: “Tagelda-k a d-tas”, iban belli Tagelda-yagi mazal ur d-tusi ara. Tusa-d asmi i guli Ɛisa s igenni? Ala, axaṭer Buṭrus d Bulus nnan-d belli mbeɛd ḥeggu-ines teḍra-d fell-as licaṛa n Uhellil 110:1 i d-yeqqaren: “Atan wayen i d-inna [Yahwa] i Sidi: Qqim-ed ɣer tama-w tayeffust, alamma rriɣ aɛdaw-ik ţ-ţarkabt i iḍarren-ik.” (Lecɣal 2:32-35; Iɛebṛaniyen 10:12, 13) Ilaq ihi ad iɛeddi kra n lweqt.
Ddaw n leḥkem n Tgelda, lebɣi n Ṛebbi ad yeḍru di lqaɛa akken yeḍra deg igenni.
23. a) Melmi i tebda Tgelda n Ṛebbi leḥkem? b) Ɣef wacu ara d-ihdeṛ yixef ara d-itebɛen?
23 Acḥal n lweqt i gɛeddan? Di lqern wis 19 d wis 20, kra n inelmaden yeqqaren Adlis Iqedsen seg wul, fehmen cwiṭ cwiṭ belli lweqt-agi ad ifakk deg useggas 1914. (Ɣef wayen yeɛnan aseggas-agi n 1914, ẓer timerna yeţţusemman: “1914, d aseggas yesɛan lqima di licaṛat n Wedlis Iqedsen.”) Ayen yeḍran di ddunit mbeɛd 1914 yefka-d ţţeḥqiq belli ayen akka i d-fehmen iṣeḥḥa. Licaṛat n Wedlis Iqedsen i d-iḍran beggnent-ed belli Lmasiḥ yuɣal d Agellid di 1914 yerna Tagelda n igenwan n Ṛebbi tebda leḥkem. Neţɛic ihi di ‘drus n lweqt-nni’ i s-d-yegran i Cciṭan. (Aweḥḥi 12:12; Ahellil 110:2) Nezmer daɣen a d-nini s ṭṭmana belli ur teţɛeṭṭil ara Tgelda aţ-ţexdem ayen iwulmen iwakken ad yeḍru lebɣi n Ṛebbi ɣef lqaɛa. Ayagi d lexbaṛ yetɛeddan, neɣ ala? Tumneḍ yis? Ixef ara d-itebɛen a k-iɛiwen aţ-ţeẓreḍ belli Adlis Iqedsen yesselmad s ṣṣeḥ leḥwayeǧ-a.