1. Ni musabe wahi owasibwe owakendi yitheghereribwa?

OBUKEKULHU bw’abandu omwa kihugho kyosi basi ndeke omusabe ow’abangi bakahulha mw’owa Thatha Wethu, kutse Omusabe w’Omukama. Ebinywe bibiri ebi bikakanaya okwa musabe owahebawa na Yesu Kristo iyuwene-wene ng’eky’erireberyako. Ni musabe w’omubongo munene, kandi erighanirya okwa bindu bisathu ebya sabawa kikendi kuwathikya erigha bingi ebihambire okwa ebye Biblia yikakangiriraya.

2. Ebindu bisathu okwa ebya Yesu akangiriraya abigha biwe erisaba ni byahi?

² Okw’itsuka ly’omusabe ono ow’erireberyako, Yesu mwakangirirya abahulikiriri biwe athi: ‘Neryo ku musabe muthya, muthi, Thatha wethu oyuli elhubulha, erina lyawu libye libuyirire. Obwami bwawu bwase. Erisonda lyawu liyirawe, omwa kihugho ngokwa liri omwa lhubulha.’ (Matayo 6:9-13) Ebindu bisathu ebikasabawa ebi, bikamanyisaya ki?

3. Thutholere ithwaminya ki okw’Obwami bwa Nyamuhanga?

³ Thwabiri igha bingi ebihambire okwa lina lya Nyamuhanga, Yehova. Kandi thwanabirikania okw’isonda lya Nyamuhanga​—ebyabiri kolha n’ebya akisiya inyakolera abandu. Ibbwa kwesi, Yesu akanaya okuki omughulhu athubwira athi thusabe thuthi: “Obwami bwaw[u] bwase”? Obwami bwa Nyamuhanga niki? Eryasa lyabu likendi syayira lithi erina lya Nyamuhanga mwa libuyirire? Kandi eryasa ly’Obwami likahambangana lithi n’erikolha erisonda lya Nyamuhanga?

4. Obwami bwa Nyamuhanga niki, kandi Omwami wabu nindi?

⁴ Obwami bwa Nyamuhanga ni buthabale obuhirirweho na Nyamuhanga Yehova obuwithe Omwami oyusombwerwe na Nyamuhanga. Omwami w’Obwami bwa Nyamuhanga nindi? Ni Yesu Kristo. Yesu ng’Omwami alengire abathabali b’ekihugho kandi akahulhawa mwa “Mukama w’abakama, n’Omwami w’abami.” (Eribisulirwa 17:14) Awithe obuthoki obw’erikolha ebibuya kwilhaba omuthabali wosi-wosi w’ekihugho, nibya kwilhaba n’oyuwangabya mubuya omw’ibo.

5. Obwami bwa Nyamuhanga bukathabalira hayi, kandi bukathabalha ki?

⁵ Obwami bwa Nyamuhanga bukendi syathabalira hayi? Ibbwa, Yesu ikere hayi? Wuk’ibuka wuk’igha indi mw’ithibwa okwa muthi w’amalighe, neryo alhubukibwa. Enyuma waho, mwahethukira elhubulha. (Emibiri 2:33) Busana n’ekyo, Obwami bwa Nyamuhanga buli elhubulha. Kya kireka e Biblia iyabwahulha ‘mw’obwami bw’elhubulha.’ (2 Timoteo 4:18) Nomwakine indi Obwami bwa Nyamuhanga buli elhubulha, bukendi syathabalha ekihugho.​—Eribisulirwa 11:15.

6, 7. Ekikaleka Yesu inyabya Mwami oyulengethukire niki?

⁶ Ekikaleka Yesu inyabya Mwami oyulengethukire niki? Habw’ekindu kighuma, siendi syaholha. Erisosekania Yesu n’abathabali b’ekihugho, e Biblia yikamukanayako ng’oyuwithe obuthoki bw’engebe eyithendi syahwa. (Abaebrania 7:16) Eki kikamanyisaya kithi ebibuya byosi ebya Yesu akakolha bikendi syakotha. Asyakolha ebindu bingi kandi ebibuya.

⁷ Yitheghereraye obuminyereri buno obwe Biblia obuhambire oku Yesu: ‘Omulimu w’Omwami Mukulhu asyamwikalhako, omulimu w’amenge n’eriminya, omulimu w’eriha n’ow’amaka, omulimu w’eriminya n’ow’eriubaha ly’Omwami Mukulhu. Nayu asyatsema omwa buba bw’Omwami Mukulhu, kandi siendi syatswera busana n’ebyo akalholhako omw’ameso wiwe kutse syalisoha busana n’ebyo akowa omwa mathwe wiwe; nikwa omwa lithunganene asyatswera abera, n’erisoha ekwenene busana n’abandu abakaghalhawa b’ekihugho.’ (Isaya 11:2-4) Ebinywe ebyo bikakanganaya bithi Yesu angabere Mwami oyuthunganene  kandi ow’olhukeri okw’abandu b’okwa kihugho. Wangananzire eribya n’omuthabali oyuli athya?

8. Abakendi syathabalha na Yesu ni bahi?

⁸ Eyindi nzumwa eyihambire okw’Obwami bwa Nyamuhanga y’eyi: Yesu siendi syathabalha iyuwene. Akendi syabya n’abandi. Ng’eky’erireberyako, omukwenda Paulo mwabwira Timoteo athi: ‘Thwama yiyinia thwa syathabalha nibya haghuma nayu.’ (2 Timoteo 2:12) Inga, Paulo, Timoteo, n’abandi bandu abathaleghulha abo Nyamuhanga ababiri sombolha, basyathabalha haghuma na Yesu omw’Obwami bw’elhubulha. Ni bangahi abasyabana olhusunzo olhwo?

9. Ni bangahi abakendi syathabalha na Yesu, kandi Nyamuhanga atsuka mughulhu wahi eribasombolha?

⁹ Ngokwa kikanganibwe omwa Sura 7 ey’ekitabu kino, omukwenda Yoane mwahebwa ekilhotho ekya alhangiriramu ‘Ekyana ky’Embuli kyabya kimene okwa Kithwa kye Sioni, kandi haghuma nayu habya abandu emithwalho ikumi n’ini n’esyankumi ini, abawithe erina ly’Ekyana ky’Embuli, n’erina lya Thatha wiwe, awasakire okwa mbumo syabu.’ Abandu 144,000 ni bahi? Yoane iyuwene-wene akabugha athi: ‘Bakakwama Ekyana ky’Embuli ehosi kikaya. Aba babirighulhwa omwa kathi-kathi k’abandu ng’ab’erimbere busana na Nyamuhanga n’Ekyana ky’Embuli.’ (Eribisulirwa 14:1, 4) Inga, bakakwama Yesu Kristo omwa buthaleghulha ng’abasombwerwe erithabalira elhubulha haghuma nayu. Bakendi syabya babiri lhubukira okwa ngebe y’elhubulha ‘basyathabalha ekihugho’ haghuma na Yesu. (Eribisulirwa 5:10) Erilhua omwa biro by’abakwenda, Nyamuhanga alhwe inyane musombolha Abakristayo abathaleghulha erighunzerera omughanzo we 144,000.

10. Busana naki ni ndegheka y’olhwanzo Yesu ne 144,000 erithabalha abandu?

¹⁰ Erithegheka Yesu ne 144,000 erithabalha abandu ni kikorwa ky’olhwanzo. Ahabw’ekindu kighuma, Yesu anasi ekya kikamanyisaya eribya mundu w’omubiri n’eriaghalhwa. Paulo mwabugha athi Yesu ‘si mundu oyuthethukwira obulighe omwa bolho-bolho bwethu, nikwa oyo walengawako omwa myatsi y’emisindo yosi eyikathulengako nethu, nikwa mwathakolha  ebibi.’ (Abaebrania 4:15; 5:8) Abakendi syathabalha haghuma nayu nabu babiri aghalhwa n’eriyiyinia ng’abandu b’omubiri. Eryongera okw’ekyo, babiri rwanisya obuthahikana n’eriyiyinirya amalhwere w’emiringo yosi. Kwenene, bakendisya yitheghererya ebitsibu ebya abandu bakabana!

11. Yesu mwabwira Abakristayo athi basabe ki okw’isonda lya Nyamuhanga?

¹¹ Omughulhu Yesu abugha athi thusabe Obwami bwa Nyamuhanga bwase, kandi mwabugha athi thusabe thuthi, erisonda lya Nyamuhanga “liyirawe om[wa] kihug[h]o.” Nyamuhanga ali elhubulha, kandi erisonda liwe line mukolhwa n’abamalaika abathaleghulha. Nomwakine, omwa Sura 3 ey’ekitabu kino, muthw’igha ngoku omumalaika mubi mwaleka erikolha erisonda lya Nyamuhanga n’erileka Adamu na Eva ibahalya. Omwa Sura 10, thukendi sy’igha bingi ebihambire okwa ebye Biblia yikakangiriraya okwa malaika mubi oyo, oyuthwasi nga Sitani Diabolo. Sitani n’abamalaika abathwamu erimukwama​—abakahulhawa mwa esyombinga​—mubalighirwa eribya elhubulha ahabw’akathambi. Busana n’ekyo, siba abosi elhubulha indi babya bakakolha erisonda lya Nyamuhanga okwa buthuku obwo. Ekyo kyanga hindukire omughulhu Obwami bwa Nyamuhanga bwanga tsukire erithabalha. Yesu Kristo, Omwami muhya-muhya oyuwasinga okwa kithumbi ky’obwami, anga rwanisirye Sitani.​—Eribisulirwa 12:7-9.

12. Ni myatsi yahi ibiri eyika soborerawa omwa Eribisulirwa 12:10?

¹² Ebinywe by’obuminyereri ebiri ahikwa hano bikasoborera ekyangabere: ‘Munowa omulenge munene omwa lhubulha athi: Lino erilhama lya Nyamuhanga wethu lyabirihika! Lino obuthoki, n’obwami bwa Nyamuhanga wethu, n’ehamuli ya Kristo wiwe byabirihika! Kusangwa omutsongeri w’abalikyethu [Sitani] abirighuswa ahisi, oyukahandikirira abalikyethu embere sya Nyamuhanga omwa musibo n’omwa kiro. ’ (Eribisulirwa 12:10) Wanamalhangira emyatsi ibiri ey’omubongo kutsibu eyikasoborerawa omwa mulhondo we Biblia oyu? Ow’erimbere, Obwami bwa Nyamuhanga ­obuli  ­omw’isi sya Yesu Kristo bukatsuka erithabalha. Owakabiri, Sitani akaghusawa okwa kihugho erilhua elhubulha.

13. Ekyabiri lhwiririra omw’ighuswa lya Sitani erilhua elhubulha niki?

¹³ Ebyabiri lhwiririra omwa myatsi ibiri eyo ni byahi? Erikwamana n’ekyabya elhubulha, thukasoma thuthi: ‘Neryo busana n’omwatsi oyu, inywe lhubulha mutseme, nenyu abikere omwa lhubulha!’ (Eribisulirwa 12:12) Inga, abamalaika abathaleghulha elhubulha bakatsema, kusangwa Sitani n’esyombinga siwe sibakiri elhubulha, buli mundu elhubulha ni muthaleghulha oku Nyamuhanga Yehova. Yiri obuholho n’erikolangana eritha thwika. Lino, erisonda lya Nyamuhanga line mukoleka elhubulha.

14. Ekyabiribya niki busana n’erighusa Sitani y’okwa kihugho?

¹⁴ Ibbwa, byangabere bithi okwa kihugho? E Biblia yikabugha yithi: ‘Obulighe okwa kihugho n’okwa ngetse! Kusangwa Satani yabiribandaghalirako inyanahithene kutsibu, kusangwa yasi kwa yiwithe kathambi kake buyira.’ (Eribisulirwa 12:12) Sitani ahithene busana n’erilhusibwa elhubulha kandi busana n’eribya n’akathambi kake buyira. Omw’ihithana liwe akaletha eriaghalhwa, kutse “obulig[h]e” okwa kihugho. Thukendi igha bingi ebihambire okwa “obulig[h]e” obwo omwa sura eyikendi kwamako. Aliriryo ebyo bikine aho, thwangana bulya thuthi, Obwami bwanga yira buthi erisonda lya Nyamuhanga erikolhwa okwa kihugho?

15. Erisonda lya Nyamuhanga busana n’ekihugho ni ryahi?

¹⁵ Wibuke erisonda lya Nyamuhanga busana n’ekihugho nga ni ryahi. Muw’igha kulyo omwa Sura 3. Omwa Edeni, Nyamuhanga mwakangania athi erisonda liwe busana n’ekihugho kino ly’eribya paradiso eyuswire mw’abandu abathunganene abathe holha. Sitani mwaleka Adamu na Eva ibahalya, neryo ekyo mukya kerererya eribererera ly’erisonda lya Nyamuhanga busana n’ekihugho, aliriryo mwatha hindulha lyo. Yehova akine n’ekighendererwa erilhangira athi ‘abathunganene basyikalha omwa kihugho mwa buholho, n’erisighalyakyo kera na kera.’ (Esyonyimbo 37:29) Kandi Obwami bwa Nyamuhanga bwa bukendi syaberererya ekyo. Omu nzira ki?

16, 17. Danieli 2:44 akathubwira ki okwa Obwami bwa Nyamuhanga?

 ¹⁶ Thalengekania okwa buminyereri obukabanika omu Danieli 2:44. Thukasoma thuthi: ‘N’okwa biro by’abami abo, Nyamuhanga w’elhubulha asyahangania obwami obuthendisyaheribwa na kera; kutse erithabalha lyabo siryendi syasighirwa abandi bandu. Nikwa bwasyathulhanga mwa bihandi-bihandi, n’eribugha amami wosi aya; nabo bwasyahangana kera na kera.’ Eki kikathubwira ki okwa Bwami bwa Nyamuhanga?

¹⁷ Eky’erimbere, kikathubwira kithi Obwami bwa Nyamuhanga bwangabere ibukasinga “okwa biro by’abami abo,” kutse omughulhu awandi mami angabere inyakina thabalha. Ekyakabiri, kikathubwira kithi Obwami bukendi syabyaho kera na kera. Sibwendi sya kindwa kutse obundi bwami erisuba omwa mwanya wabu. Ekyakasathu, thukalhangira ngoku hakendi syabya amalhwa ahakathi-kathi k’Obwami bwa Nyamuhanga n’amami w’ekihugho kino. Obwami bwa Nyamuhanga bukendi syasingura. Erighunzerera, bwa bukendi syabya buthabali busa obukathabalha abandu. Neryo abandu basyabya n’obuthabali bubuyanga obwa bathe bathabana.

18. Olhuhi lhw’erighunzerera ahakathi-kathi k’amathabali w’ekihugho kino n’Obwami bwa Nyamuhanga lhuka hulhawa lhuthi?

¹⁸ E Biblia yiwithe bingi eby’erikania ebihambire okwa lhuhi lhw’erighunzerera olhwo ahakathi-kathi k’Obwami bwa Nyamuhanga n’amathabali w’ekihugho kino. Ng’ekyerireberyako, yikakangiriraya yithi enduli yikaseghera hakuhi, ebirimu bibi bikendisya tsatsanga amabehi eritheba “[a]bami b’ekihug[h]o kyosi.” Ahabwa kighendererwa ki? ‘Erihindaniabo omw’amalhwa w’ekiro kinene kya Nyamuhanga Omuthoki w’Ebyosi.’ Abami b’ekihugho bakendisya hindanibwa haghuma ‘ahakahulhawa omwa Kihebrania mwa Harmagedoni.’ (Eribisulirwa 16:14, 16) Busana n’ebikabughawa omwa milhondo ibiri eyo, amalhwa w’erighunzerera ahakathi-kathi k’amathabali w’ekihugho n’Obwami bwa Nyamuhanga akahulhawa mw’amalhwa wa Harmagedoni.

19, 20. Ekikaleka erisonda lya Nyamuhanga irithakoleka okwa kihugho munabwire niki?

¹⁹ Obwami bwa Nyamuhanga bukendi syaberererya ki  erilhabira omwa Harmagedoni? Thasyalengekanaya okw’isonda lya Nyamuhanga busana n’ekihugho. Nyamuhanga Yehova aby’anzire athi ekihugho kyusule mw’abandu abahikene ibane mumukolera omwa Paradiso. Ekikaleka eki ikyathabya lino niki? Eky’erimbere, thuli bakolha-nabi, kandi thukalhwalha n’eriholha. Aliriryo omwa Sura 5, muthw’igha thuthi Yesu mwathuholera nuku thwanga syabyaho kera na kera. Obundi wangan’ibuka ebinywe ebisakangire omwa Njiri ya Yoane: ‘Nyamuhanga mwanza ekihugho ky’athya, kyaleka inyaha Mughalha wiwe, Ekyusa kiwe, neryo oyuka ­mw’ikiriraya syahere, nikwa abye n’engebe y’erikotha.’​—Yoane 3:16.

²⁰ Ekindi kitsibu kiri kithi abandu bangi bakakolha ebindu bibi. Bakathulha amabehi, ibiba, n’erikolha obutswatswa. Sibali anza erikolha erisonda lya Nyamuhanga. Abandu abakakolha ebindu bibi bakendi syathoghothibwa omwa lhuhi lhwa Nyamuhanga olhwa Harmagedoni. (Esyonyimbo 37:10) Kandi n’eyindi nzumwa eyikaleka erisonda lya Nyamuhanga irithakoleka okwa kihugho yiri yithi amathabali syali hira omw’abandu mw’omuhwa w’erikolha lyo. Amathabali mangi abiribya isyawithe kaghalha, ini mabi, kutse malibathangania. E Biblia yikabugha ndeke-ndeke yithi: ‘Omundu awithe obuthoki endatha okwa wundi erimuhuthalya.’​—Omugambuli 8:9.

21. Obwami bukendi syaleka buthi erisonda lya Nyamuhanga irya koleka okwa kihugho?

²¹ Enyuma we Harmagedoni, abandu bakendi syabya omw’isi sy’obuthabali bughuma, Obwami bwa Nyamuhanga. Obwami obwo bukendi syakolha erisonda lya Nyamuhanga n’eriletha emighisa y’eriswekya. Ng’ekyerireberyako, bukendi syalhusyaho Sitani n’esyombinga siwe. (Eribisulirwa 20:1-3) Akaghalha k’ekihongwa kya Yesu kakendi syakolesibwa nuku abandu abathaleghulha bangasya lekeraho erilhwalha n’eriholha. Aliriryo, omw’ithabalha ly’Obwami bakendi syathoka eribyaho kera na kera. (Eribisulirwa 22:1-3) Ekihugho kikendi syakolhwa mwa paradiso. Busana n’ekyo, Obwami bwasyaleka erisonda lya Nyamuhanga irya koleka okwa kihugho n’eriyira erina liwe mwa libuyirire. Eki kikamanyisaya ki? Kikamanyisaya kithi, erighunzerera omw’isi sy’Obwami bwa  Nyamuhanga obuli mundu wosi oyuliho asyasikya erina lya Yehova.

22. Ekikaleka ithwaminya thuthi Obwami bwa Nyamuhanga mubuthasa omughulhu Yesu abya okwa kihugho kutse ana biri lhubuka niki?

²² Omughulhu Yesu abwira abigha biwe athi basabe bathi, “Obwami bwaw[u] bwase,” kyabya kilhangirikire ndeke-ndeke indi Obwami sibuli bwasa okwa buthuku obwo. Mbwino mubwasa Yesu ahethukira elhubulha? Eyihi, kusangwa Petero na Paulo mubabugha bathi Yesu abere abilhubukibwa obuminyereri obukabanika omwa Esyonyimbo 110:1 mubwa mubererera ko: ‘Omwami Mukulhu mwabwira omukama waghe athi, W’ikale okwa lhuhandi lhwaghe lhw’amalya, erihika aho nasyahirira esyonzighu syawu omwa kithumbi ky’ebisando byawu.’ (Emibiri 2:32-34; Abaebrania 10:12, 13) Habya obuthuku bw’erilindirira.

23. (a) Obwami bwa Nyamuhanga bwatsuka erithabalha mughulhu wahi? (b) Ekikendi syakanibwako omwa sura eyikwamireko ni ki?

²³ Ahabwa mughulhu mungahi? Omwa kighonye 19, abigha be Biblia ab’ekwenene muba baririra bathi obuthuku bw’erilindirira bwanga hwere omu 1914. (Erisighikira n’omwaka oyu, lebaya Enyongezyo, “1914​​—⁠Omwaka Omukulhu Omwa Buminyereri bwe Biblia.”) Ebikabya omwa kihugho ebyatsuka 1914 bikaghumaya bithi eribaririra ly’abigha  be Biblia ab’ekwenene lyabya lihikire. Eribererera ly’amaminyereri we Biblia likakanganaya lithi omu 1914, Kristo mwabya Mwami, n’Obwami bwa Nyamuhanga obw’elhubulha mubwa tsuka erithabalha. Busana n’ekyo thuli omwa “kat[h]ambi kake buyira” aka Sitani asighere nako. (Eribisulirwa 12:12; Esyonyimbo 110:2) Kandi thwangana bugha butsira erithika-thika thuthi Obwami bwa Nyamuhanga bukisiya ibwa letha erisonda lya Nyamuhanga ly’okwa kihugho. Wunalhangire eyi mwa ngulhu mbuya? Wun’ikirirye wuthi ni kwenene? Esura eyikwamireko yikendi kuwathikya erilhangira indi kwenene e Biblia yikakangiriraya emyatsi eyi.