1. Us prea wi de kam tɔk bɔt?

BƆKU pipul dɛn na di wɔl sabi di Awa Fada prea. Na da prea de Jizɔs bin sho in disaypul dɛn we i bin de lan dɛn aw fɔ pre. Dis prea gɛt minin. Lɛ wi tɔk smɔl bɔt di fɔs tri tin dɛn we de insay dis prea. Dis go ɛp wi fɔ no mɔ bɔt wetin di Baybul de tich.

2. Us tri tin dɛn Jizɔs bin tɛl in disaypul dɛn fɔ pre fɔ?

² Di fɔs tin dɛn we Jizɔs tɔk na di prea na: “Mek a tɛl una aw una fɔ pre, una fɔ se: ‘Papa Gɔd we de na ɛvin . . . mek ɔlman pre to yu ɛn ɔna yu [“nem,” NW]; wi de pre mek yu rul wi; mek wetin yu want, bi na dis wɔl, lɛkɛ aw i de bi na ɛvin.’” (Matyu 6:​9-13) Wetin dɛn tri tin ya min?

3. Wetin wi de kam lan bɔt Gɔd in Kiŋdɔm?

³ Wi dɔn lan bɔku tin bɔt Gɔd in nem. Wi dɔn lan bak bɔt wetin Gɔd want fɔ mɔtalman. Bɔt wetin Jizɔs bin min we i tɛl wi fɔ pre se: “Mek yu rul wi” [“mek yu Kiŋdɔm kam,” NW]? Wetin na Gɔd in Kiŋdɔm? Aw i go mek Gɔd in nem oli? Ɛn aw i go mek wetin Gɔd want, bi?

4. Wetin na Gɔd in Kiŋdɔm? Udat na di Kiŋ?

⁴ Gɔd in Kiŋdɔm na wan gɔvmɛnt we Jiova mek na ɛvin ɛn na Jiova dɔn pik di Kiŋ we go rul in Kiŋdɔm. Na udat na di Kiŋ fɔ Gɔd in Kiŋdɔm? Na Jizɔs Krays. Jizɔs gɛt pawa fɔ rul fa fawe pas ɔl di pipul dɛn we de rul na di wɔl, ɛn na dat mek di Baybul se in na “di Kiŋ fɔ ɔl dɛn kiŋ, di Masta fɔ ɔl dɛn masta.” (Fɔs Lɛta To Timoti 6:​15) I gɛt di pawa fɔ du gud fa fawe pas ɛni mɔtalman we de rul.

5. Na usay Gɔd in Kiŋdɔm go de we i de rul? Udat dɛn i go rul?

⁵ Usay Gɔd in Kiŋdɔm go de we i de rul? Fɔ no di ansa, i go fayn fɔ lɛ wi no fɔs usay Jizɔs de. Yu mɛmba we wi tɔk bɔt di tɛm we dɛn kil Jizɔs, ɛn we Gɔd gi am layf bak? Wi bin lan se we i te smɔl, Jizɔs bin go bak na ɛvin. (Di Apɔsul Dɛn Wok [Akt] 2:​33) So, na ɛvin Gɔd in Kiŋdɔm de. Na dat mek di Baybul se, na ɛvin Jizɔs go de we i de rul. (Sɛkɛn Lɛta To Timoti 4:​18) Bɔt pan ɔl we na ɛvin Gɔd in Kiŋdɔm de, i go rul di pipul dɛn we de na di wɔl.—Rid Rɛvɛleshɔn 11:​15.

6, 7. Wetin mek na Jizɔs na di bɛst pɔsin fɔ bi Kiŋ fɔ Gɔd in Kiŋdɔm?

⁶ Wetin mek na Jizɔs na di bɛst pɔsin fɔ bi Kiŋ fɔ Gɔd in Kiŋdɔm? Wan rizin na bikɔs i nɔ go ɛva day. Di kayn layf we Jizɔs gɛt difrɛn frɔm di wan we mɔtalman gɛt; na dat mek di Baybul se “na in wangren nɔ de day, ɛn i de na layt we mɔtalman nɔ ebul kam klos.” (Fɔs Lɛta To Timoti 6:​16) Dis min se ɔl di gud tin dɛn we Jizɔs go du go de sote go. Ɛn i go mɔs du plɛnti fayn fayn tin dɛn tumara bambay.

⁷ Lɛ wi tɔk bɔt sɔm pan di tin dɛn we di Baybul bin tɔk bɔt Jizɔs. I se: “PAPA GƆD in Spirit go sidɔm pan am, di spirit fɔ sɛns ɛn fɔ ɔndastand, di spirit fɔ gi advays ɛn  fɔ pawa, di spirit fɔ sabi tin ɛn fɔ fred PAPA GƆD. Ɛn di tin we i go lɛk pas ɔl, na fɔ fred PAPA GƆD. I nɔ go jɔj bay wetin in yay de si, ɔ disayd bay wetin in yes de yeri; bɔt na bay wetin rayt na PAPA GƆD in yay, i go jɔj di po man, ɛn [i] go disayd di sem we fɔ kwayɛt pipul na [di] wɔl.” (Ayzaya 11:​2-4) Ɔl dis de sho se Jizɔs go bi Kiŋ we de du wetin rayt ɛn we gɛt sɔri-at fɔ di pipul dɛn we de na di wɔl. Yu nɔ go want da kayn pɔsin de fɔ rul yu?

8. Udat dɛn go rul wit Jizɔs?

⁸ Wan ɔda tin bɔt Gɔd in Kiŋdɔm na dat nɔto Jizɔs in wangren go rul. Ɔda pipul dɛn go rul wit am. Di apɔsul Pɔl bin tɛl Timoti se: “If wi nɔ lɛf fɔ bia, wi go rul wit am.” (Sɛkɛn Lɛta To Timoti 2:​12) Dis sho se, sɔm pan di wan dɛn we Gɔd dɔn pik fɔ rul wit Jizɔs na ɛvin, na Pɔl, Timoti, ɛn ɔda pipul dɛn we fetful to Gɔd. Bɔt ɔmɔs pipul dɛn go rul wit Jizɔs?

9. Ɔmɔs pipul dɛn go rul wit Jizɔs? Ustɛm Gɔd bigin fɔ pik dɛn?

⁹ Wi bin lan na Chapta 7 se di apɔsul Jɔn bin gɛt wan vishɔn. Insay da vishɔn de, i “si di Ship [Jizɔs Krays] tinap pantap di ay il we dɛn kɔl Zayɔn [di ples we i de na ɛvin]. Wan ɔndrɛd ɛn fɔti-fo tawzin pipul bin tinap de wit am. Di Ship in nem ɛn in Papa in nem bin rayt pan dɛn fɔrɛd.” Udat na di 144,000 pipul dɛn? Jɔn insɛf sho wi di ansa. I se: “Dɛn bin de fala di Ship ɛni say i go. Na di Ship bin pik dɛn kɔmɔt to dɛn ɔda mɔtalman wɛn i bay dɛn, ɛn na dɛn fɔs i put wansay fɔ insɛf nɔmɔ ɛn fɔ Gɔd.” (Rɛvɛleshɔn 14:​1, 4) So, wi si se dɛn na fetful pipul dɛn we bin de fala Jizɔs Krays. Na Gɔd insɛf pik dɛn fɔ rul wit Jizɔs na ɛvin. Afta dɛn day, dɛn go gɛt layf bak ɛn go na ɛvin fɔ rul oba di wɔl wit Jizɔs. (Rɛvɛleshɔn 5:​10) Frɔm di tɛm we di apɔsul dɛn bin de, Gɔd bin dɔn de pik fetful Kristian dɛn fɔ ful-ɔp di 144,000 pipul dɛn we fɔ go na ɛvin.

10. Wetin mek i fayn we Jiova pik Jizɔs ɛn di 144,000 pipul dɛn fɔ rul oba mɔtalman?

 ¹⁰ Na fayn tin Jiova du fɔ mek Jizɔs ɛn di 144,000 pipul dɛn rul oba mɔtalman. Wan tin we mek dis fayn na bikɔs Jizɔs insɛf bin dɔn bi mɔtalman ɛn i no aw wi de sɔfa. Di apɔsul Pɔl bin se Jizɔs “insɛf na bin wan pan wi, ɛn ɔl wetin de mit wi fɔ tray wi bin dɔn mit am. Bɔt i nɔ sin wande.” (Di Ibru Pipul Dɛn 4:​15; 5:​8) Di pipul dɛn we go rul wit Jizɔs dɛnsɛf bin dɔn sɔfa we dɛn na bin mɔtalman. Pantap dat, dɛn no aw i nɔ izi fɔ du di rayt tin bikɔs dɛnsɛf bin de sin lɛk wi, ɛn dɛn bin gɛt difrɛn difrɛn kayn sik dɛn we bin de mɔna dɛn. So, Jizɔs ɛn di 144,000 pipul dɛn go no di prɔblɛm dɛn we de mit mɔtalman.

11. Wetin mek Jizɔs tɛl in disaypul dɛn fɔ pre mek wetin Gɔd want, bi na ɛvin?

¹¹ We Jizɔs bin tɛl in disaypul dɛn fɔ pre mek Gɔd in Kiŋdɔm kam, i bin tɛl dɛn bak fɔ pre mek wetin Gɔd want, “bi na dis wɔl, lɛkɛ aw i de bi na ɛvin.” Na ɛvin Gɔd de, ɛn ɔltɛm in fetful enjɛl dɛn dɔn de du wetin i want. Insay Chapta 3, wi bin lan se wan wikɛd enjɛl bin lɛf fɔ du wetin Gɔd want ɛn mek Adam ɛn Iv sin. Na Chapta 10, wi go lan ɔda tin dɛn we di Baybul tɔk bɔt da enjɛl de we na Setan. Gɔd bin alaw Setan ɛn di wikɛd enjɛl dɛn we bin de biɛn am, fɔ de na ɛvin fɔ sɔm tɛm. So, nɔto ɔlman na ɛvin bin de du wetin Gɔd want da tɛm de. Bɔt dat bin lɛf fɔ apin we Gɔd in Kiŋdɔm bigin rul. Wetin na di fɔs tin we Jizɔs Krays du afta i bi Kiŋ? I fɛt Setan.—Rid Rɛvɛleshɔn 12:​7-9.

12. Us tu impɔtant tin dɛn we Rɛvɛleshɔn 12:​10 tɔk bɔt?

¹² Di Baybul bin sho wetin apin na ɛvin. I se: “A yɛri lawd vɔys de tɔk na ɛvin se, ‘Di tɛm we Gɔd go sev  in pipul dɛn, dɔn kam! Gɔd dɔn sho in pawa naw lɛkɛ king! Krays we i sɛn kam na [di] wɔl dɔn sho in pawa! Di wan [Setan] we bin tinap bifo Gɔd de tɔk de ɛn nɛt se wi kɔmpin Kristiɛn dɛn du bad, dɔn kɔmɔt na ɛvin, dɛn dɔn ib am na do.’” (Rɛvɛleshɔn 12:​10) Yu si di tu impɔtant tin dɛn we di Baybul se apin? Fɔs, i se Jizɔs bigin rul Gɔd in Kiŋdɔm. Sɛkɔn, i se Jizɔs pul Setan kɔmɔt na ɛvin ɛn ib am na di wɔl.

13. Wetin apin afta dɛn pul Setan kɔmɔt na ɛvin?

¹³ Wetin apin na ɛvin afta dɛn tu tin ya apin? Di Baybul tɛl wi se: “So mek gladi de na ɛvin, mek ɔl dɛn wan we lib de gladi!” (Rɛvɛleshɔn 12:​12) Wi si se di fetful enjɛl dɛn we de na ɛvin bin gladi bikɔs Setan ɛn in dɛbul dɛn nɔ de de igen. So ɔlman naw we de na ɛvin fetful to Jiova Gɔd. Naw, dɛn ɔl dɔn gɛt kolat ɛn wanwɔd fɔ du wetin Gɔd want. Wi si se wetin Gɔd want rili de bi naw na ɛvin.

14. Wetin dɔn apin na di wɔl we dɛn pul Setan kɔmɔt na ɛvin?

¹⁴ Ɛnitin bin apin na di wɔl? Di Baybul tɔk se: “Bad bad tin dɔn fɔdɔm pan di grɔn ɛn di wata bikɔs di Dɛbul dɔn kam dɔng to una ɛn i vɛks bad bikɔs i no se na smɔl tɛm nɔmɔ lɛf fɔ am.” (Rɛvɛleshɔn 12:​12) Setan vɛks bad bikɔs dɛn dɔn pul am kɔmɔt na ɛvin ɛn bikɔs i nɔ gɛt bɛtɛ tɛm igen. So, na dat mek i de mek ‘bad bad tin dɛn’ de apin na di wɔl. Wi go lan mɔ bɔt dɛn “bad bad tin” ya na Chapta 9. Bɔt aw Gɔd in Kiŋdɔm go mek wetin Gɔd want, bi na di wɔl?

15. Aw Gɔd bin want di wɔl fɔ de?

¹⁵ Yu mɛmba aw Gɔd bin want di wɔl fɔ de di tɛm we i mek am? Wi bin lan bɔt dat na Chapta 3. We Gɔd bin mek Adam ɛn Iv ɛn put dɛn na di gadin we bin de na Idɛn, i bin want mek di wan ol wɔl bi Paradays ɛn mek pipul dɛn we de du wetin i want, de de sote go.  Bɔt Setan bin mek Adam ɛn Iv sin, ɛn dat bin mek wetin Gɔd want fɔ di wɔl nɔ bin apin wantɛm wantɛm. Bɔt dat nɔ bin chenj wetin Gɔd want fɔ di wɔl. Jiova se i go stil mek di wan dɛn we ‘de du wetin rayt gɛt di land, ɛn dɛn go de de sote go.’ (Sam 37:​29) Gɔd in Kiŋdɔm go mɔs du dat. Bɔt aw i go du am?

16, 17. Wetin Daniɛl 2:​44 tɔk bɔt Gɔd in Kiŋdɔm?

¹⁶ Lɛ wi tɔk smɔl bɔt wetin de na Daniɛl 2:​44. Insay de di Baybul se: “We di kiŋ dɛn go de rul, PAPA GƆD na ɛvin go briŋ in yɔn kindɔm we nɔ go ɛva fɔdɔm, ɛn in pawa nɔ go go na ɔda pipul an; ɛn i go brok ɔl dɛn kindɔm we bin dɔn de bifo am pyɛt pyɛt, ɛn dɔn dɛn kpatakpata wan; in go tinap sote go.” Wetin wi lan bɔt Gɔd in Kiŋdɔm?

¹⁷ Fɔs, wi lan se Gɔd go mek in Kiŋdɔm di tɛm “we di kiŋ dɛn go de rul.” Sɛkɔn, wi lan se Gɔd in Kiŋdɔm go de sote go. No ɔda kiŋdɔm nɔ go pul am kɔmɔt. Tɔd, wi lan se Gɔd in Kiŋdɔm go fɛt di kiŋdɔm dɛn we de na di wɔl. Na Gɔd in Kiŋdɔm go win. Afta di fɛt, na Gɔd in Kiŋdɔm nɔmɔ go de fɔ rul mɔtalman. Na in go bi di bɛst gɔvmɛnt we go rul mɔtalman.

18. Aw di Baybul kɔl di wɔ we Gɔd in Kiŋdɔm go fɛt mɔtalman gɔvmɛnt dɛn?

¹⁸ Di Baybul tɔk bɔt di wɔ we Gɔd in Kiŋdɔm go fɛt di gɔvmɛnt dɛn na di wɔl. I se we di tɛm fɔ di fɛt dɔn nia, Setan in dɛbul dɛn go lay pan “dɛn wan we de rul na di wɔl.” Wetin mek? Di Baybul se: “Fɔ kam gɛda ɛn rɛdi fɔ di wa we go bi da big de we Gɔd, we gɛt pawa pas ɔl, go sho in pawa.” Di kiŋ dɛn na di wɔl go gɛda na wan “ples we dɛn kɔl ‘Amagɛdɔn’ na Ibru.” (Rɛvɛleshɔn 16:​14, 16) Dɛn tu vas ya de sho se dɛn kɔl di wɔ we Gɔd in Kiŋdɔm go fɛt mɔtalman gɔvmɛnt dɛn, Amagɛdɔn.

19, 20. Wetin mek di wɔl nɔ de lɛk aw Gɔd bin want am?

 ¹⁹ Wetin Gɔd in Kiŋdɔm go du we i kam fɛt Amagɛdɔn? Yu stil mɛmba wetin Gɔd bin want fɔ di wɔl? Jiova Gɔd bin want lɛ di wɔl bi Paradays ɛn mek pipul dɛn we de du wetin rayt, de de. Wetin mek dat nɔ de apin rayt naw? Di fɔs rizin na bikɔs wi de sin, ɛn wi de sik ɛn day. Bɔt insay Chapta 5, wi bin lan se Jizɔs bin kam day fɔ wi so dat wi go ebul gɛt layf we go de sote go. Di apɔsul Jɔn bin rayt se: “Gɔd so lɛk mɔtalman dat i gi in wan gren Pikin we i lɛk; so dat ɛnibɔdi we biliv pan am nɔ go day, bɔt i go gɛt layf we go de sote go.”—Jɔn 3:​16.

²⁰ Di ɔda tin we mek di wɔl nɔ de lɛk aw Gɔd bin want, na bikɔs bɔku pipul dɛn de du bad bad tin dɛn. Dɛn de lay, tif, ɛn ledɔm wit pɔsin we dɛn nɔ mared. Dɛn nɔ want fɔ du wetin Gɔd want. Di wan dɛn we de du bad bad tin dɛn go day we Gɔd go kam fɛt Amagɛdɔn. (Rid Sam 37:​10.) Bɔt wan ɔda tin bak we mek wetin Gɔd want nɔ bi na di wɔl yet, na bikɔs gɔvmɛnt dɛn nɔ de mek pipul dɛn du wetin Gɔd want. Bɔku gɔvmɛnt dɛn nɔ ebul fɔ kɔntrol di pipul dɛn, dɛn de trit di pipul dɛn bad, ɛn dɛn nɔ de du di rayt tin. Na dat mek di Baybul tɛl wi klia wan se: “Pipul we gɛt pawa de sɔprɛs di wan we i gɛt pawa pas te dɛn ambɔg dɛnsɛf.”—Ɛkliziastis 8:​9.

21. Aw Gɔd in Kiŋdɔm go mek wetin Gɔd want, bi na di wɔl?

²¹ Afta Amagɛdɔn, na Gɔd in Kiŋdɔm nɔmɔ go de fɔ rul mɔtalman. Da Kiŋdɔm de go du wetin Gɔd want, ɛn i go mek mɔtalman ɛnjɔy plɛnti gud tin dɛn. Fɔ ɛgzampul, i go pul Setan ɛn in dɛbul dɛn. (Rid Rɛvɛleshɔn 20:​1-3.) Bikɔs Jizɔs bin dɔn kam day fɔ wi, Gɔd in Kiŋdɔm go mek sik ɛn day nɔ de igen. Da tɛm de, mɔtalman go ebul de sote go. (Rɛvɛleshɔn  22:​1-3) Di wan ol wɔl go bi Paradays. Na da tɛm de Gɔd in Kiŋdɔm go mek wetin Gɔd want, bi na di wɔl ɛn i go pul di badnem we pipul dɛn de put pan Gɔd. Wetin dat min? I min se we Gɔd in Kiŋdɔm go dɔn bigin rul mɔtalman, ɔlman go de rɛspɛkt Jiova in nem.

22. Aw wi no se Gɔd in Kiŋdɔm nɔ bigin fɔ rul we Jizɔs: (a) bin de na di wɔl? (b) jɔs go na ɛvin?

²² We Jizɔs bin tɛl in disaypul dɛn fɔ pre mek Gɔd in Kiŋdɔm kam, sho se di Kiŋdɔm nɔ bin dɔn bigin rul yet. Na we Jizɔs jɔs go na ɛvin i bigin rul? Nɔ, nɔto da tɛm de. Wi no dat bikɔs di apɔsul Pita ɛn Pɔl bin tɔk se we Jizɔs go na ɛvin, di tin we dɛn rayt na Sam 110:​1 go apin to am. Dɛn bin rayt de se: “PAPA GƆD tɔk to di Kiŋ. I se, ‘Kam sidɔm na mi raytan say, usay pɔsin we gɛt ɔna fɔ de, te a put yu ɛnimi dɛn ɔnda yu fut.’” (Di Apɔsul Dɛn Wok [Akt] 2:​32-35; Di Ibru Pipul Dɛn 10:​12, 13) So Jizɔs bin wet fɔs bifo i bigin rul.

23. (a) Ustɛm Gɔd in Kiŋdɔm bigin rul? (b) Wetin wi go tɔk bɔt na di ɔda chapta?

²³ Aw lɔng Jizɔs bin wet? Insay dɛn 1870, sɔm pipul dɛn we bin de stɔdi di Baybul bin ebul fɔ ɔndastand se Jizɔs bin wet te di ia 1914. (If yu want fɔ no mɔ bɔt di ia 1914, na fɔ rid pej 215 to pej 218.) Di tin dɛn we  bin apin na di wɔl insay 1914 sho se na tru dɛn pipul ya bin tɔk. Di Baybul bin tɔk bɔt sɔm tin dɛn we go apin na di wɔl. We dɛn tin ya bin apin, sho se na insay 1914 Jizɔs bi Kiŋ ɛn na da sem ia de Gɔd in Kiŋdɔm bigin rul. Di Baybul se na “smɔl tɛm nɔmɔ lɛf” fɔ Setan. Na insay da tɛm de wi de naw. (Rɛvɛleshɔn 12:​12; Sam 110:​2) Wi biliv se i nɔ go te igen, Gɔd in Kiŋdɔm go mek wetin Gɔd want, bi na di wɔl. Yu nɔ fil se dis na gud nyus? Yu biliv se i go bi? Di ɔda chapta go ɛp yu fɔ ɔndastand se i nɔ go te igen dat go apin.