Kapetulu 8

Wangana waKalunga Chuma Muka?

Mbimbiliya yatulweza vyuma muka haWangana waKalunga?

Wangana waKalunga naukalinga vyuma muka?

Lwola muka Wangana naukalingisa mwaya muchima waKalunga vakalingemo hamavu?

1. Uno natukekesa hakulomba muka chize chaya fuma?

VATU vavavulu mukaye kosena vejiva kulomba chize vavuluka ngwavo, Kulomba chaMwata. Vulukiso kaneyi yikiko vazachisa hakuvuluka kulomba chakutalilaho alombele Yesu Kulishitu chize chafumakana chikuma. Mazu atwama mukulomba kanechi apwa amalemu, ngocho kukekesa vishina vyakulivanga vitatu vyatwamamo nachikukafwa utachikize vyuma vyavivulu yanangula Mbimbiliya.

2. Vyuma muka vitatu vize Yesu anangwile tumbaji twenyi ngwenyi valombenga?

² Kumaputukilo akulomba chenyi, Yesu alwezele vaka-kumwivwilila ngwenyi: “Shikaho enu lombenunga ngwenu, Ove Setu uli mwilu, vajilile lijina lyove. Wangana wove wize. Mwaya muchima wove vakalingemo hamavu nganomu veji kulingilangamo mwilu.” (Mateu 6:9-13) Evi vishina vitatu vyalumbunukila mulihi?

3. Vyuma muka twatela kwijiva haWangana waKalunga?

³ Tunalinangula lyehi vyavivulu halijina lyaKalunga, vavuluka ngwavo Yehova. Kaha nawa tunashimutwilako lyehi vimwe havyuma ajina Kalunga, vize nalingila vatu navize mwakavalingila kulutwe. Uno Yesu atalikishile mulihi hakutulweza tulombenga ngwetu: “Wangana wove wize”? Uno Wangana waKalunga chuma muka? Uno kwiza chawo nachikajilika ngachilihi  lijina lyaKalunga chipwe ngwetu kulitomesa? Kaha kwiza chaWangana chatambukila ngachilihi hamwe nakulinga mwaya muchima waKalunga?

MWALUMBUNUKILA WANGANA WAKALUNGA

4. Wangana waKalunga chuma muka, kaha iya vasakula kupwa Mwangana?

⁴ Wangana waKalunga wapwa hifulumende yaYehova Kalunga yize ikwechi Mwangana vasakula kuli Kalunga. Iya apwa Mwangana waWangana waKalunga? Yesu Kulishitu. Yesu hakupwa Mwangana, akwechi ngolo kuhambakana vamyangana vosena vahamavu, kaha vamuvuluka ngwavo “Mwangana wavava vali mumawangana, Mwata wavava vali namawata.” (WaChimoteu 1, 6:15) Yesu atwama nangolo jakulinga vyuma vyamwaza kuhambakana vamyangana vosena vahamavu.

5. Uno Wangana waKalunga naukayulila kulihi, kaha naukayulanga ika?

⁵ Uno Wangana waKalunga naukayulila kulihi? Hakusaka twijive kuchihela kana, twatela kulihulisa ngwetu: Uno Yesu ali kulihi? Nawanuka vyuma walinangwile vyakuvuluka nge Yesu vamujihile nakumupapalila hachitondo chakuyanjishila, kaha vamusangwile. Nakushimbula chiku, Yesu ayile mwilu. (Vilinga 2:33) Ngocho, mwilu mukiko mwatwama Wangana waKalunga. Shikaho kumana Mbimbiliya yavulukila Wangana kanou ngwayo ‘wangana wamwilu.’ (WaChimoteu 2, 4:18) Numba tuhu Wangana waKalunga watwama mwilu oloze naukayulanga hamavu.—Kusoloka 11:15.

6, 7. Vyuma muka vyalingisa Yesu kupwa Mwangana wakulipwila?

⁶ Vyuma muka vyalingisa Yesu kupwa hiMwangana wakulipwila? Yesu keshi kukafwako. Hakwesekesa Yesu navamyangana vahamavu, Mbimbiliya yamuvuluka ngwayo “Ikiye uka wenyi kaha keshi kuhasa kufwako, atwama mumusana vanahono kupandama.” (WaChimoteu 1, 6:16) Echi chalumbununa nge vyuma vyamwaza vyosena eji kulinganga Yesu navikelilanga. Tunejiva chikupu ngwetu Yesu mwakalinga vyuma vyamwaza vyavivulu chikuma.

⁷ Achitale omu wahanjika ou upolofweto wamuMbimbiliya  hali Yesu, ngwawo: “Shipilitu wajila mwakatwamanga hali Ikiye, shipilitu wamangana wakunangakana, shipilitu wapunga waundume, shipilitu wachinyingi wawoma waYehova. Kaha kuwaha chenyi mwakachivwanga kuwoma waYehova, keshi kukayula mwakumona nameso enyiko, chipwe kuhanjikila vatu nge kutesa nomu nevu mumatwitwi enyiko, oloze mwakayulanga mwakwoloka hali vaka-kuhutwa, kaha mwakahakulanga mwakusungama hali vavavwovu vahamavu.” (Isaya 11:2-4) Mazu kana asolola nge Yesu mwakapwa Mwangana wakwoloka kaha nawa muka-kutetela vatu. Kutala musaka kupwa natwamina wamuyachou nyi?

8. Veya navakayulanga naYesu?

⁸ Mujimbu ukwavo nawa wahanjika haWangana waKalunga shina uno: Yesu keshi kukayula uka wenyiko. Mwakapwa navatu vaze mwakayulanga navo. Kaposetolo Paulu alwezele Chimoteu ngwenyi: “Kachi nge natukakachilanga, kaha natukatwamanga nenyi muwangana nawa.” (WaChimoteu 2, 2:12) Enga, Paulu, naChimoteu, navakwavo veka vakushishika vaze vasakula kuli Kalunga navakayulanga hamwe naYesu muWangana wamwilu. Uno vaze navakayulanga naYesu navakapwa vangahi?

9. Vatu vangahi navakayulanga hamwe naYesu, kaha Kalunga aputukile kuvasakula shimbu muka?

⁹ Nge muze vanavuluka muKapetulu 7 mumukanda uno, kaposetolo Yowano vamumwenesele “Mwanamukoko [Yesu Kulishitu] . . . nemana hapili Zeyone [halitanda lyenyi lwawangana mwilu]. Hamwe naIkiye hapwile vatu chihita chimwe natununu tuwana namakombakaji awana, vapwile nalijina lyenyi nalijina lyaIse lyakusoneka kujiholo javo.” Uno ava va 144,000 vakivo veya? Ivene Yowano atulweza ngwenyi: “Ava vakivo vaze veji kumukavangizanga Mwanamukoko kweshokwo mwaya. Ava vavasokwele muli vatu, vapwenga mbuto jakulivanga jaKalunga naMwanamukoko.” (Kusoloka 14:1, 4) Enga, vatu kana vapwa hivaka-kumukavangiza Yesu Kulishitu vakushishika vaze vasakula mangana vakayule nenyi hamwe mwilu. Hanyima yakufwa nakusangukila kukuyoya chamwilu, ‘veji kuyulanga mwavamyangana’ hamwe naYesu. (Kusoloka 5:10) Kufuma vene kumakumbi avaposetolo, Kalunga napunga nakusakula  vaka-Kulishitu vakushishika mangana vazalise seteko yavava 144,000.

10. Mwomwo ika chapwila chamwaza hakutongola Yesu navaze 144,000, vakatuyulenga hano hamavu?

¹⁰ Yehova atuzanga hakutongola Yesu navaze 144,000, mangana vakatuyulenga hano hamavu. Yesu ejiva kanawa omu chapwa chiyoyelo chavatu nakuyanda chavo. Paulu ambile ngwenyi Yesu keshi “kuhona kwivwila nayetu hamwe mukuhehela chetuko. Oloze vamwesekele mwosena mwakufwana nge etu, oloze kapwile nashiliko.” (WavaHepeleu 4:15; 5:8) Vaze mwakayula navo Yesu navakivo vapwa hivatu vaze vanamononga lamba nakukakachila muluyando. Kaha nawa vanalipikinga natutenga twavo nakuhita mumisongo yayivulu. Chikupu vene, navakevwishisa ukalu veji kumonanga vatu.

WANGANA WAKALUNGA NAUKALINGA IKA?

11. Mwomwo ika Yesu alwezelele tumbaji twenyi valombenga ngwavo mwaya muchima waKalunga vakalingengamo nganomu veji kulingilangamo mwilu?

¹¹ Omu Yesu alwezele tumbaji twenyi ngwenyi valombenga vyakwiza chaWangana waKalunga, avalwezele nawa valombenga ngwavo, mwaya muchima waKalunga vakalingengamo “hamavu nganomu veji kulingilangamo mwilu.” Kalunga atwama mwilu, kaha vangelo vakushishika vanapunga nakulinga mwaya muchima waKalunga shimbu yosena. Oloze twalinangwile muKapetulu 3 mumukanda uno nge, kangelo wakuhuka alitwaminyine kulinga mwaya muchima waKalunga nakuhungumwisa vaAlama naEve vavulumune mulonga washili. MuKapetulu 10 natukalinangula vyuma vyavivulu yanangula Mbimbiliya hali uze kangelo wakuhuka vavuluka ngwavo Satana Liyavolo. Satana navangelo vaze vamukavangijile, vaze vavuluka ngwavo vandemone, vavetavishile kutwama mwilu hakatando kakandende. Halwola kanelu, keshi nge vangelo vosena mwilu valingilenga mwayile muchima waKalungako. Oloze vyuma vyejile nakwalumuka omu waputukile kuyula Wangana waKalunga. Mwangana wamuhya, Yesu Kulishitu, alwile jita naSatana.—Kusoloka 12:7-9.

12. Vyuma muka vivali vavuluka hali Kusoloka 12:10 vize vyasolokele?

 ¹² Upolofweto unakavangizaho walumbununa vyuma vyasolokele ngwawo: “Ngwevwile lizu lyakukanguka mwilu hakwamba ngwenyi, Jino kuneza kulwila nangolo nawangana vyaKalunga ketu, nawata waKulishitu yenyi, mwomwo [Satana] uze muka-kuvahanahana vandumbwetu milonga vanamumbili lyehi hamavu, uze avahanyinenga milonga namusana naufuku kumeso aKalunga ketu.” (Kusoloka 12:10) Unamono vyuma vivali vyavilemu vanavuluka muvesi kaneyi yamuMbimbiliya nyi? Chakulivanga, Wangana waKalunga uze vayula kuli Yesu Kulishitu waputukile jino kuyula. Chamuchivali, Satana vamufumishile mwilu nakumumbila hamavu.

13. Uno vyuma muka vyasolokele hakuhanga Satana mwilu?

¹³ Uno evi vyuma vivali vyasolokele vyaneha ika? Mwilu mwasolokele vyuma vize tweji kutanganga ngwavo: “Shikaho enu melu, sehelelenu, nayenu mwatwamamo nawa.” (Kusoloka 12:12) Eyo, vangelo vakushishika vamwilu vawahilila mwomwo hakufumisa Satana navandemone jenyi mwilu, vaze vasalamo vosena veji kwononoka Yehova Kalunga. Mwilu muli jino kuunda nakulinunga, ngocho mwaya muchima waKalunga vali nakulingamo.

14. Uno vyuma muka vyasoloka hakumbila Satana hano hamavu?

¹⁴ Nyi hamavu hasoloka vyuma muka? Mbimbiliya ngwayo: “Mama lelo hamavu nahakalungalwiji! mwomwo liyavolo nahete lyehi kuli enu, ali namatoto amanene, mwomwo natachikiza ngwenyi, ali nakashimbu kakandende kaha, shikaho.” (Kusoloka 12:12) Satana apihilila hakumuhanga mwilu kaha ali nawa nakashimbu kakandende. Ngocho hakupwa namatoto eji kunehanga lamba hamavu. Mukapetulu nakavangizaho natulinangula vyavivulu halamba kana. Hakwijiva jino vyuma kanevi, tunahase kuhulisa ngwetu, Uno Wangana naulingisa ngachilihi mwaya muchima waKalunga valingemo hano hamavu?

15. Vyuma muka ajinyine Kalunga hakutenga mavu?

¹⁵ Anuka vyuma walinangwile muKapetulu 3 vize ajinyine Kalunga hakutenga mavu. MuEtene, Kalunga ajinyine ano mavu apwenga palachise yakuzala navatu vakwoloka, vakuzeneka kufwa. Satana ahungumwishile vaAlama naEve vavulumune mulonga  washili, ngocho achelewesele vyuma ajinyine Kalunga hakutenga mavu, numba tuhu ahonene kuvyalumuna. Chipwe ngocho, Yehova ajina lika ngwenyi “vaka-kwoloka navakaswana lifuchi, navakatwamangamo haya myaka yosena.” (Samu 37:29) Wangana waKalunga ukiko naukatesamo chuma kanechi. Mujila muka?

16, 17. Mukanda waNdanyele 2:44 watulweza ika haWangana waKalunga?

¹⁶ Achishinganyeke upolofweto wahali Ndanyele 2:44. Tweji kutangaho ngwavo: “Hamakumbi avamyangana vaze Kalunga wamwilu mwakakatula wangana, ukiko kaweshi kukeza kukanongako haya myaka yosena, wangana kana kaveshi kukavaselawo vatu vekako, oloze naukachikachika mawanganosenawa nakuwakumisa, kaha ukiko naukelilanga haya myaka yosena.” Uno mazu kana ali nakutulweza ika haWangana waKalunga?

¹⁷ Chatete, ali nakutulweza ngwawo Wangana waKalunga naukaputuka kuyula “hamakumbi avamyangana vaze,” chipwe ngwetu halwola nawakayulanga mawangana eka. Chamuchivali, ali nakutulweza ngwawo Wangana kana naukapwako haya myaka yosena. Kaveshi kukaufungulula chipwe kukaushisa kufulumende yekako. Chamuchitatu, ou Wangana waKalunga naukalwa jita namawangana ahamavu. Oloze Wangana waKalunga naukafungulula. Kaha ukiko kaha naukapwanga hifulumende yize nayikayulanga vatu. Ngocho vatu navakalivwisa kuwaha kuvayula kufulumende kaneyi yamwaza chikuma.

18. Jita yamakumishilo yize nayikapwa mukachi kaWangana waKalunga najifulumende jahano hamavu vayivuluka ngwavo ika?

¹⁸ Mbimbiliya yahanjika vyuma vyavivulu hajita yamakumishilo yize nayikapwa mukachi kaWangana waKalunga najifulumende jahamavu. Chakutalilaho, yanangula ngwayo omu kukuma chili nakupandama, vandemone navambululanga makuli mangana vahungumwise “vamyangana vahamavu hosena.” Mwomwo ika? “Mangana vavakungulwile kujita yahalikumbi lyalinene lize lyaKalunga Ukwechi ngolo josena.” Vamyangana vahamavu navakavakungulwila “kuze kuma vavuluka mulilimi lyavaHepeleu ngwavo, KuHala-Mangetone.” (Kusoloka 16:14, 16) Vyuma vanavuluka mujivesi kaneji jivali  vikiko vyalingisa jita yamakumishilo yize nayikapwa mukachi kaWangana waKalunga najifulumende javatu vayivuluke ngwavo jita yaHala-Mangetone, chipwe ngwetu Alamangetone.

19, 20. Uno vyuma muka vyalingisa numba vahone kulinga mwaya muchima waKalunga hano hamavu oholyapwa?

¹⁹ Uno Wangana waKalunga naukatesamo vyuma muka hakulwa jita yaAlamangetone? Achishinganyeke cheka havyuma Kalunga atengelele mavu. Yehova Kalunga ajinyine ngwenyi hamavu hakatwamenga vatu vakwoloka, vakukupuka mwosena vakamuzachilenga muPalachise. Uno ika yinahonesa chuma kana kulingiwa oholyapwa? Chatete, twapwa tuvaka-shili kaha tweji kuvizanga nakufwa. Oloze muKapetulu 5 twalinangwile nge Yesu atufwilile mangana tukayoye haya myaka yosena. Anuka mazu atwama muMukanda waMujimbu Wamwaza waYowano akwamba ngwavo: “Mukiko vene mwavazangilile Kalunga vaka-mavu, kuvahanyina Mwanenyi umwe kaha lyamunwe, mangana ngwenyi, wose mwamwitavila akazeneke kunonga, oloze ngwenyi, atwamenga nakuyoya chahaya myaka yosena.”—Yowano 3:16.

²⁰ Ukalu ukwavo nawa shina wavatu vavavulu vaze veji kulinganga vyuma vyavipi. Veji kuhanjikanga makuli, nakumbembejeka vakwavo, nakulinga ujila. Kavasaka kulinga mwaya muchima waKalungako. Ngocho vatu vaze veji kulinganga vyuma vyavipi navakavanongesa hajita yaKalunga yaAlamangetone. (Samu 37:10) Chuma chikwavo nawa chalingisa numba vahone kulinga mwaya muchima waKalunga hano hamavu shina jifulumende jize kajeshi kukundwiza vatu kulinga ngochoko. Jifulumende jajivulu jinapunga jakuzeya, nakuyula vatu naukenya. Mbimbiliya yahanjika hatoma ngwayo: ‘Mutu ali nangolo hali mutu mukwavo amupihise.’—Muka-kwambulula 8:9.

21. Uno Wangana naukalingisa ngachilihi mwaya muchima waKalunga vakalingemo hamavu?

²¹ Hanyima yaAlamangetone, vatu navakavayulanga kufulumende yimwe kaha yaWangana waKalunga. Wangana kana naukalinga mwaya muchima waKalunga nakuneha vyuma vyamwaza. Chakutalilaho, Wangana kana naukafumisako Satana navandemone jenyi. (Kusoloka 20:1-3) Ndando  yakusokola yaYesu nayikazata nakulingisa vatu vakushishika vakazenekenga cheka nawa kuviza nakufwa. Oloze navakayoyanga haya myaka yosena muchiyulo chaWangana. (Kusoloka 22:1-3) Mavu navakawalumuna kupwa palachise. Ngocho Wangana naukalingisa mwaya muchima waKalunga vakalingemo hamavu nakujilika lijina lyaKalunga. Echi chalumbununa ika? Chalumbununa nge vosena vaze navakapwa muWangana waKalunga navakalemesanga lijina lyaYehova.

LWOLA MUKA WANGANA NAUKALINGISA MWAYA MUCHIMA WAKALUNGA VAKALINGEMO HAMAVU?

22. Twejiva ngachilihi ngwetu Wangana waKalunga kawejile omu Yesu apwile hano hamavu chipwe kufuma hakusanguka chenyiko?

²² Yesu hakulweza vaka-kumukavangiza valombenga ngwavo, “Wangana wove wize,” chasolwele nge halwola kana Wangana kawapwilekoko. Kutala Wangana kana wejile omu Yesu ayile mwilu nyi? Nduma, mwomwo Petulu naPaulu vambile ngwavo omu Yesu asangukile nakuya mwilu, ateselemo upolofweto wahali Samu 110:1 wakwamba ngwavo: “Yehova nambe kuli Mwata wami ngwenyi, Twamanga kulivoko lyami lyachilyo palanga nomu nangukalingisa vaka-kole jove kupwa chitwamo chamahinji ove.” (Vilinga 2:32-34; WavaHepeleu 10:12, 13) Enga, atelelele kuvandamina.

23. (a) Wangana waKalunga waputukile kuyula mumwaka uka? (b) Natushimutwila ika mukapetulu nakavangizaho?

²³ Uno atelelele kuvandamina palanga nakumwaka uka? Mulikulukaji lyamyaka lyakusokesa 19, vaka-kulinangula Mbimbiliya valavile myaka nakuwana nge lwola lwakuvandamina nalukakuma mu 1914. (Tala Vihande Vyakuhakilako hamafwo  215-218 umone omu valava mwaka kanou.) Vyuma vize vyaputukile kusoloka mukaye mu 1914 vyasolola nge ava vaka-kulinangula Mbimbiliya vakushishika valavile myaka mujila yakwoloka. Kutesamo chaupolofweto wamuMbimbiliya chasolola nge Kulishitu vamutongwele kupwa Mwangana mu 1914, kaha mumwaka vene uze Wangana waKalunga wamwilu waputukile kuyula. Ngocho tuli nakuyoyela ‘mukashimbu kakandende’ kaze nasale nako Satana. (Kusoloka 12:12; Samu 110:2) Tunahase kwitavila nawa ngwetu, Wangana waKalunga kalinwomu utesemo mwaya muchima waKalunga hano hamavu. Kutala mujimbu kanou unakwivwisa kuwaha nyi? Unawitavila ngwove wamuchano nyi? Kapetulu nakavangizaho mwakukafwa umone chikupu ngwove Mbimbiliya yanangula vyuma kanevi.

VYUMA YANANGULA MBIMBILIYA

▪ Wangana waKalunga wapwa hifulumende yamwilu yize navakayula kuli Yesu Kulishitu kupwa Mwangana, hohamwe navaze 144,000 valanda hamavu.—Kusoloka 14:1, 4.

▪ Wangana waputukile kuyula mu 1914, kaha kufuma vene haze, Satana vamufumishile mwilu nakumumbila hano hamavu. —Kusoloka 12:9.

▪ Wangana waKalunga kalinwomu unongese jifulumende javatu, nakulingisa mavu kupwa palachise.—Kusoloka 16:14, 16.

[Vihula vyaChilongesa]

 [[Mivwimbimbi halifwo 83]

Satana navandemone jenyi vaze vahanga mwilu vaneha lamba hano hamavu. Oloze lamba kaneli kalinwomu likume

[Muvwimbimbi halifwo 84, 85]

Omu naukayula Wangana, mwaya muchima waKalunga navakalingamo hamavu nganomu vali nakulingamo mwilu