1. En lamo mane mong’ere ahinya ma wabiro nono sani?

JI TARA gi tara e piny mangima ong’eyo lamo ma ji mang’eny luongo ni Lamo mar Wuoro, kata Lamo mar Ruoth. Nyinge ariyogo duto gin mag lamo mong’ere ahinya ma Yesu Kristo owuon ne ochiwo kaka ranyisi maber mar lamo. En lamo man kod puonj ahinya, kendo nono kwayo adek mokwongo manie lamono, biro konyi mondo ipuonjri gik mang’eny e wi gima Muma puonjo kuom adier.

2. Gik moko adek ma Yesu ne opuonjo jopuonjrene mondo okwa e lamo gin mage?

² E chakruok mar lamono, Yesu ne onyiso joma ne winje kama: “Un to lemuru kama eri: Wuonwa manie polo, nyingi mondo obed maler, pinyruodhi mondo obi, gi midwaro mondo otimre e piny kaka e polo.” (Mathayo 6:9-13) Tiend kwayo adekgo en ang’o?

3. Ang’o ma onego wang’e e wi Pinyruodh Nyasaye?

³ Wasepuonjore mang’eny e wi nying Nyasaye, ma en Jehova. Kendo wasewuoyo matin e wi dwaro mar Nyasaye—gik ma osetimo kod gik ma obiro timo ne dhano. Kata kamano, Yesu ne wuoyo e wi ang’o kane onyisowa ni mondo wakwa kama: “Pinyruodhi mondo obi”? Pinyruodh Nyasaye en ang’o? Biro mar Pinyruodhno biro miyo nying Nyasaye obed maler e yo mane? Kendo biro  mar Pinyruodhno nokony nade e miyo dwaro mar Nyasaye mondo otimre?

4. Pinyruodh Nyasaye en ang’o, kendo Ruodh Pinyruodhno en ng’a?

⁴ Pinyruodh Nyasaye en sirkal ma Jehova Nyasaye oketo, kendo Ruodh Pinyruodhno en ng’at ma oyier gi Nyasaye. Ruodh Pinyruodh Nyasaye en ng’a? En Yesu Kristo. Yesu en Ruoth maduong’ moloyo joloch duto mag dhano, kendo iluonge ni “Ruodh ruodhi.” (Fweny 17:14) En kod teko mar timo maber moloyo dhano moro amora manie loch, kata bed ni dhano manie lochno ber machalo nade.

5. Pinyruodh Nyasaye locho koa kanye, kendo enoloch e wi ang’o?

⁵ Pinyruodh Nyasaye biro locho koa kanye? Par ane, Yesu ni kanye gie sani? Inyalo paro kane ipuonjori ni ne onege e yadh sand, kendo bang’e ne ochiere. Ndalo matin bang’ mano, ne odhi malo e polo. (Tich Joote 2:33) Mano nyiso ni Pinyruodh Nyasaye ni e polo. Kendo mano e momiyo Muma luonge ni ‘pinyruoth me polo.’ (2 Timotheo 4:18) Kata obedo ni Pinyruodh Nyasaye ni e polo, pinyruodhno biro locho e wi pinyni.—Fweny 11:15.

6, 7. Yesu en Ruoth makende nikech ang’o?

⁶ Ang’o momiyo Yesu en Ruoth makende? Mokwongo, Yesu en Ruoth ma ok bi tho ngang’. Muma luongo Yesu ni jal ma nikod “ngima ma onge gi ma nyalo ketho,” kendo mano nyiso pogruok mantie e kind Yesu kod ruodhi mag dhano. (Jo Hibrania 7:16) Mani nyiso ni gik mabeyo duto ma Yesu notim biro siko. Kendo obiro timo gik madongo kendo mabeyo.

⁷ Non ane weche mokor ei Muma mawuoyo e wi Yesu kama: “Mi chuny Jehova nobed kuome, chuny makelo rieko, gi lony, chuny mang’ado ni ji rieko, mamiyo ji  teko, chuny mamiyo puonjruok kod luoro Jehova; kendo nomor kuom luoro Jehova: to ok anong’ad bura kogeno gi ma wang’e oneno, kata kwero ji kogeno gi ma ite owinjo: to nong’ad buch jochan gi tim makare, kendo nokwer ji ni jo mamuol me piny koluwo tim mowinjore.” (Isaiah 11:2-4) Wechego nyiso ni Yesu ne dhi bedo Ruoth makare, kendo manyiso ng’wono ne ji e piny ka. Be diher bedo gi jaloch machalo kamano?

8. Jo mage mabiro locho gi Yesu?

⁸ Adiera machielo e wi Pinyruodh Nyasaye en ma: Yesu ok bi locho ka en kende. Nitie jomoko mabiro locho kode. Kuom ranyisi, jaote Paulo ne onyiso Timotheo niya: “Ka watimo kinda, wanaloch kode bende.” (2 Timotheo 2:12) Ee, Paulo, Timotheo, kod jomoko makare ma Nyasaye oseyiero, biro locho kaachiel gi Yesu e Pinyruoth manie polo. Gin ji adi mabiro yudo thuolo mar locho kod Yesu?

9. Ji adi mabiro locho gi Yesu, kendo Nyasaye ne ochako yierogi karang’o?

⁹ Mana kaka Sula mar 7 ei bugni nyiso, ne omi jaote Johana fweny manyiso “Nyarombo [Yesu Kristo] mochung’ e got Sayun [migawo mare kaka ruoth e polo], to ne en gi ji gana piero apar achiel gi gana piero ang’wen gang’wen, ma nying Nyarombo gi nying Wuon mare ondiki e lela wang’gi.” Ji 144,000 gin jo mage? Johana nyisowa owuon niya: “Gin e ma giluwo bang’ Nyarombo kuonde duto ma odhiye. Gin e jo mowar e kind ji duto kaka nyak mokwongo ni Nyasaye kod Nyarombo.” (Fweny 14:1, 4) Ee, gin jolup Yesu Kristo ma osechung’ motegno, kendo ma oyier mondo oloch kode e polo. Ka osechiergi ma giyudo ngima mar polo, “ginibed gi loch e piny” kaachiel gi Yesu. (Fweny 5:10) Chakre kinde mag joote, Nyasaye osebedo ka yiero Jokristo mochung’ motegno mondo omi kwan mar 144,000 ochop kare.

10. Ang’o momiyo chenro ma Nyasaye oketo mondo Yesu kod ji 144,000 obed gi loch e wi dhano en gi manyiso hera?

 ¹⁰ Chenro ma Nyasaye oketo mondo Yesu kod ji 144,000 obed gi loch e wi dhano en gima nyiso hera ahinya. Mokwongo, Yesu ong’eyo kaka bedo dhano chalo, kendo kaka chandruok chalo. Paulo ne owacho ni Yesu “nyalo bedo mang’won gi nyawowa, nikech en jal ma notem e weche duto, kaka wan bende itemowa, to ne oonge gi richo.” (Jo Hibrania 4:15; 5:8) Jo mabiro locho kodego bende oseneno chandruok, kendo gise nano kaka dhano. E wi mano, gise kedo gi richo ma onyuolgo dhano, kendo gise kedo gi tuoche mopogore opogore. Kuom adier, gibiro ng’eyo e yo maber chandruok ma dhano yudo!

11. Ang’o momiyo Yesu ne owacho ni jopuonjrene onego okwa e lamo ni dwaro mar Nyasaye otimre e polo?

¹¹ Kane Yesu owacho ni jopuonjrene onego okwa mondo Pinyruodh Nyasaye obi, ne owacho bende ni onego gilam mondo dwaro mar Nyasaye otimre “E piny kaka e polo.” Nyasaye ni e polo, kendo malaikene makare osebedo ka timo dwarone kuno kuom kinde duto. Kata kamano, e Sula mar 3 ei bugni, ne wapuonjore ni malaika moro marach ne oweyo timo dwaro mar Nyasaye, kendo ne omiyo Adam gi Hawa otimo richo. E Sula mar 10, wabiro medo puonjore gima Muma puonjo e wi malaika marachno, ma iluongo ni Satan kendo Jachien. Ne owe Satan kod chwech mamoko mag roho miluongo ni jochiende, mondo gidhi nyime gi dak e polo kuom kinde matin. Mano nyiso ni ok chwech duto ma ne ni e polo ne timo dwaro mar Nyasaye kindego. Mano ne dhi lokore ka Pinyruodh Nyasaye ne dhi chako locho. Yesu Kristo ma ne idhi keti mondo obed Ruoth, ne dhi kedo e lweny gi Satan.—Fweny 12:7-9.

12. Gin gik moko ariyo mage ma ondiki ni timore e Fweny 12:10?

 ¹² Wechegi ma ne okor nyiso gima ne dhi timore: “Nawinjo dwol maduong’ e polo, ka lando niya, ‘Koro warruok mar Nyasachwa gi tekone gi pinyruodhe osechopo, kendo loch en mar Kristone. Nikech osewit piny [Satan] Jahang owetewa, ma ne hangogi e nyim Nyasachwa odiechieng’ gotieno.’ ” (Fweny 12:10) Be inyalo neno gik moko ariyo ma ondiki ni timore e Ndikono? Mokwongo, Pinyruodh Nyasaye e bwo loch mar Yesu Kristo chako locho. Mar ariyo, Satan iwito a e polo nyaka e piny ka.

13. Ang’o ma osetimore nikech osewit Satan a e polo?

¹³ Ang’o ma osetimore nikech gik moko ariyogo? Wasomo kama e wi gik ma ne otimore e polo: “Omiyo, bed mamor in polo, kod un jo modak e iye.” (Fweny 12:12) Ee, malaike makare manie polo bedo gi mor nikech, ka koro Satan gi jochiendene onge e polo, ji duto modak e polo winjo Jehova Nyasaye. Nitie kuwe kod winjruok maber ahinya kuro. Koro dwaro mar Nyasaye timore e polo.

14. Ang’o ma osetimore bang’ wito Satan e piny ka?

¹⁴ To ang’o ma osetimore e piny? Muma wacho ni: “Yaye! nobed malit ni piny gi nam; nikech Satan oselornu ka en gi mirima maduong’, kong’eyo ni ndalone tin.” (Fweny 12:12) Satan nigi mirima nikech osewite a e polo, kendo ni odong’ mana gi ndalo matin. Nikech mirimbeno, okelo kuyo kata “lit” e piny ka. Wabiro medo puonjore e wi ‘litno’ e Sula maluwo mae. To ka podi wan gi wachno e paro, wanyalo penjo niya, Pinyruodhno nyalo miyo dwaro mar Nyasaye otimre e piny ka e yo mane?

15. Dwaro mar Nyasaye ne piny en ang’o?

¹⁵ Par ane ni dwaro mar Nyasaye ne piny en ang’o. Ne ipuonjori mano e Sula mar 3. E puodho mar Eden, Nyasaye ne onyiso ni ne odwaro mondo pinyni obed paradis, ka ma dhano makare dakie ma onge tho. Satan ne omiyo Adam gi Hawa otimo richo, kendo mano ne  omiyo dwaro mar Nyasaye ne piny ok notimore gi kanyo, kata kamano ok ne oloko dwarono. Podi en dwaro mar Jehova ni “Jo matir ginicham piny, mi ginidagie nyaka chieng’.” (Zaburi 37:29) Kendo Pinyruodh Nyasaye biro miyo mano timre. E yo mane?

16, 17. Daniel 2:44 nyisowa ang’o e wi Pinyruodh Nyasaye?

¹⁶ Ng’i ane weche mokor mayudore e Daniel 2:44. Wasomo kanyo ni: “E ndalo ma ruodhigo nobedie, Nyasaye manie polo nochung piny ruoth moro ma ok norum nyaka chieng’, onge oganda moro ma nobedi gi loch kuom piny ruodhno; to enong’iny pinje ruodhigi duto, mi notiekgi, kendo nobedie nyaka chieng’.” Mano nyisowa ang’o e wi Pinyruodh Nyasaye?

¹⁷ Mokwongo, onyisowa ni Pinyruodh Nyasaye ne idhi chungi “e ndalo ma ruodhigo nobedie,” kata e kinde ma pinjeruodhi moko podi ni e loch. Mar ariyo, onyisowa ni Pinyruodhno biro siko nyaka chieng’. Onge sirkal moro ma biro gole kata kawo kare. Mar adek, waneno ni lweny biro betie e kind Pinyruodh Nyasaye kod pinjeruodhi mag pinyni. Pinyruodh Nyasaye biro loyo lwenyno. Gikone, Pinyruodhno kende ema biro bedo sirkal ma locho e wi dhano. Bang’e, dhano biro bedo mamor nikech loch maber ahinya ma pok ne gineno nyaka nene.

18. Lweny mogik e kind Pinyruodh Nyasaye kod sirkande mag pinyni iluongo nang’o?

¹⁸ Muma oting’o weche mang’eny e wi lwenyno ma nobedie e kind Pinyruodh Nyasaye gi sirkande mag pinyni. Kuom ranyisi, Muma puonjo ni kaka giko kayo machiegni, e kaka jochiende biro lando weche mag miriambo mondo giwuond “ruodhi duto mag piny mangima.” Nikech ang’o? ‘Mondo gichok ruodhigo duto e lweny mar chieng’ maduong’no mar Nyasaye Manyalo Duto.’ Ruodhi mag piny ibiro chok “e ka miluongo gi dho Hibrania ni Har-Magedon.” (Fweny 16:14, 16)  Nikech gik ma owachi e ndiko ariyogo, lweny mogik e kind sirkande mag dhano kod Pinyruodh Nyasaye iluongo ni Har-Magedon, kata Armagedon.

19, 20. Ang’o momiyo dwaro mar Nyasaye ok timre e piny gie sani?

¹⁹ Ang’o ma Pinyruodh Nyasaye biro timo kokalo kuom lweny mar Har-Magedon? Par ane kendo gimomiyo Nyasaye nochweyo piny. Jehova Nyasaye nochweyo piny mondo piny opong’ gi dhano ma nigi ngima makare chuth, ka gitiyone e Paradis. Ang’o momiyo mano ok timre gie sani? Mokwongo, wan joricho, wabedo matuwo ma kendo watho. Kata kamano, ne wapuonjore e Sula mar 5 ni Yesu ne othonwa mondo omi wadag nyaka chieng’. Nyalo bedo ni inyalo paro weche mondik e Injili mar Johana: “Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.”—Johana 3:16.

²⁰ Wach machielo en ni ji mang’eny timo gik maricho. Giriambo, kendo gidonjo e timbe mag anjawo. Ok gidwar timo dwach Nyasaye. Jo matimo gik maricho ibiro kethi e lweny mar Nyasaye mar Har-Magedon. (Zaburi 37:10) Wach moro kendo mamiyo dwaro mar Nyasaye ok timre e piny kae, en ni sirkande ok jiw ji mondo otim dwarono. Sirkande mang’eny osebedo ma onge gi nyalo, gisando ji, kendo gi pong’ kod mibadhi. Muma wacho ratiro ni dhano “obedo gi teko kuom machielo mondo ohime.”—Eklesiastes 8:9.

21. Pinyruoth biro miyo dwaro mar Nyasaye otimre e piny e yo mane?

²¹ Bang’ Har-Magedon, dhano biro dak e bwo loch mar sirkal achiel, Pinyruodh Nyasaye. Pinyruodhno biro timo dwaro mar Nyasaye, kendo obiro kelo gweth mang’eny. Kuom ranyisi, obiro golo Satan kod jochiende mage. (Fweny 20:1-3) Ibiro tiyo kod teko mar misango ma Yesu ne ochiwo, mondo dhano makare kik bed matuwo,  kendo kik tho. Kar gik ma kamago, e bwo loch mar Pinyruodhno, gibiro dak nyaka chieng’. (Fweny 22:1-3) Piny ibiro losi mondo obed paradis. Kuom mano, Pinyruodhno biro miyo dwaro mar Nyasaye otimre e piny, kendo Pinyruodhno biro miyo nying Nyasaye obed maler. Mano tiende nang’o? Tiende en ni, e bwo loch mar Pinyruodh Nyasaye, ji duto mangima biro miyo nying Jehova luor.

22. Wang’eyo nade ni Pinyruodh Nyasaye ne ok obiro e kinde ma Yesu ne ni e piny kae, kata mapiyo nono bang’ chierne?

²² Kane Yesu onyiso jolupne ni mondo gilam ni, “Pinyruodhi mondo obi,” mano ne nyiso maler ni Pinyruodhno ne podi ok obiro e kindeno. Be Pinyruodhno ne obiro kinde ma Yesu ne odhi malo e polo? Ooyo, nikech Petro gi Paulo ne owacho ni bang’ chier mar Yesu, weche mokor e Zaburi 110:1 ne otimore kuom Yesu: “Jehova noluwo ni ruodha ni, Bed piny e bada korachwich, nyaka atim wasiki raten tiendi.” (Tich Joote 2:32-35; Jo Hibrania 10:12, 13) Ne nitie kinde mag rito.

23. (a) Pinyruodh Nyasaye ne ochako locho karang’o? (b) Ang’o ma wabiro puonjore e Sula maluwo mae?

²³ Ritono ne dhi kawo kinde maromo nade? E kinde ma higini mag 1800 ne dhi rumo, jopuonjre mogen mag Muma, ne ogoyo kwan ma giyudo ni kinde mag rito ne dhi rumo e higa mar 1914. (Mondo iyud weche mamoko  e wi higano, som Apendiks ite mag 215-218.) Gik ma ne ochako timore e piny chakre 1914 nyiso ni kwano ma jopuonjre Muma-go ne ogoyo ne ni kare. Weche ma ne okor ei Muma ma sani timore nyiso ni Kristo ne obedo Ruoth e higa mar 1914, kendo Pinyruodh Nyasaye ma ochung e polo ne ochako locho. Mano nyiso ni, wadak e ‘ndalo matin’ ma odong’ ne Satan. (Fweny 12:12; Zaburi 110:2) Wanyalo wacho ka wan gi yie motegno bende ni machiegni, Pinyruodh Nyasaye biro miyo dwaro mar Nyasaye otimre e piny ka. Be ineno mano kaka wach maber ahinya? Bende iyie ni mano en adier? Sula maluwo mae biro konyi neno ni kare Muma puonjo wechegi kuom adier.