1. Egalikano lya tseyika nawa lini tatu ka konakona ngashingeyi?

AANTU omamiliyona muuyuni auhe oya tseya nawa egalikano ndyoka oyendji hayi ithana Tate Yetu ngu u li megulu nenge Egalikano lyOmuwa Gwetu. Omautumbulilo ngoka otagu ulike kegalikano ndyoka lya tseyika nawa lya gandjwa li li oshiholelwa kuJesus Kristus mwene. Oli li egalikano tali ti sha noonkondo, nokukonakona omaindilo galyo gatatu gopetameko otaku ke ku kwathela u ilonge oshindji shi na ko nasha naashoka Ombiimbeli tayi ti naanaa.

2. Jesus okwa longo aalongwa ye ya galikane shi na ko nasha niinima itatu yini?

² Petameko lyoshiholelwa shegalikano ndyoka, Jesus okwa longo aapulakeni ye a ti: “One omu na [okugalikana] ngeyi: ‘Tate yetu, ngu u li megulu: Edhina lyoye nali yapulwe, [uukwaniilwa woye nau ye, KB]. Ehalo lyoye nali gwanithwe kombanda yevi wo ngaashi megulu.’” (Mateus 6:9-13) Mbela iinima iitatu mbyoka ya pulwa megalikano ndika otayi ti shike?

3. Oshike twa pumbwa okutseya shi na ko nasha nUukwaniilwa waKalunga?

³ Otwi ilonga nale oshindji shi na ko nasha nedhina lyaKalunga, Jehova. Notwa kundathana wo iinima yimwe yi na ko nasha nehalo lye, shoka a ningila nale aantu naashoka te ke ya ningila natango. Ihe Jesus okwa li tu ulike kushike sho e tu lombwele tu galikane tatu ti: “Uukwaniilwa woye nau ye”? Uukwaniilwa waKalunga oshike? Okuya kwawo otaku ka yapulitha  ngiini edhina lyaKalunga, nenge oku li ninga eyapuki? Nongiini okuya kUukwaniilwa ku na ekwatathano nokugwanithwa kwehalo lyaKalunga?

4. Uukwaniilwa waKalunga oshike, nolye Omukwaniilwa gwawo?

⁴ Uukwaniilwa waKalunga owo epangelo lya dhikwa po kuJehova Kalunga, li na Omukwaniilwa a hogololwa kuye. Olye Omukwaniilwa gwUukwaniilwa waKalunga? OJesus Kristus. Jesus e li Omukwaniilwa oku vule aapangeli ayehe yopantu nohi ithanwa “Omuwa gwaawa nOmukwaniilwa gwaakwaniilwa.” (Ehololo 17:14) Oku na oonkondo okulonga iilonga iiwanawa yi vule yomupangeli kehe gwopantu, e vule nokuli nomupangeli ngoka e li dhingi mokati kaapangeli ayehe.

5. Uukwaniilwa waKalunga otau ka pangela okuza peni notau ka pangela kombanda yashike?

⁵ Uukwaniilwa waKalunga otau ka pangela okuza peni? Mbela Jesus Kristus oku li peni? Oto dhimbulukwa nawa sho wi ilonga kutya okwa li a dhipagelwa komuti gwomahepeko, nopo nduno konima yethimbo okwa yumuka. Okathimbo okafupi konima yaashono, okwa londo a yi megulu. (Iilonga 2:33) Ano Uukwaniilwa waKalunga ou li megulu. Omolwaashono Ombiimbeli tayi u ithana ‘uukwaniilwa womegulu.’ (2 Timoteus 4:18, KB) Nonando Uukwaniilwa waKalunga ou li megulu, otau ka pangela kombanda yevi alihe.—Ehololo 11:15, KB.

6, 7. Omolwashike Jesus e li Omukwaniilwa a dhenga mbanda?

⁶ Omolwashike Jesus e li Omukwaniilwa a dhenga mbanda? Etompelo limwe olyo kutya ita ka sa we nandonando. Mokuyelekanitha Jesus naakwaniilwa yopantu, Ombiimbeli otayi mu popi kutya ye oku na ‘oonkondo dhomwenyo ihaagu yonwa po.’ (Aahebeli 7:16, KB) Shoka osha hala okutya iinima ayihe iiwanawa mbyoka Jesus ta ningi otayi ka kalelela. Nota ka longa shili iinima iikumithi niiwanawa.

⁷ Konakona ehunganeko ndika lyOmbiimbeli li na ko nasha naJesus tali ti: “Ombepo yOMUWA otayi mu lambele, ombepo yowino noyoondunge, ombepo yomayele noyoonkondo, ombepo yuunongo noyokutila OMUWA—oye nota ka  nyanyukilwa etilo okutila OMUWA. Iha pangula pakutala kwomeho, ye iha tokola pakuuva okandondo, ihe ohu uthile oonakuhepa nuuyuuki nota popile uuthemba woohepele moshilongo.” (Jesaja 11:2-4) Oohapu ndhoka otadhi ulike kutya Jesus ota ka kala Omukwaniilwa omuyuuki noku na olukeno sho ta pangele aantu kombanda yevi. Mbela owa hala okupangelwa komupangeli a tya ngawo?

8. Oolye taya ka pangela pamwe naJesus?

⁸ Uushili ulwe u na ko nasha nUukwaniilwa waKalunga owo kutya: Jesus ita ka pangela oye awike. Otapu ka kala yamwe mboka taya ka pangela pamwe naye. Pashiholelwa, omuyapostoli Paulus okwa lombwelele Timoteus a ti: “Ngele tatu tsikileni okwiidhidhimika, otatu ka pangeleni wo pamwe naye.” (2 Timoteus 2:12) Paulus naTimoteus nosho wo aadhiginini ooyakwawo mboka ya hogololwa kuKalunga otaya ka pangela pamwe naJesus mUukwaniilwa womegulu. Mbela aantu yangapi taya ka kala ye na uuthembahenda mboka?

9. Aantu yangapi taya ka pangela pamwe naJesus, nuunake Kalunga a tameke oku ya hogolola?

⁹ Ngaashi sha popiwa mOntopolwa onti-7 yembo ndika, omuyapostoli Johannes okwa li a pewa emoniko moka a mono “Onzigona [Jesus Kristus] a thikama kondundu yaSioni [ondondo ye yomegulu yopaukwaniilwa]. Pamwe nOnzigona [opwa] li aantu 144 000 mboka ya ndhindhilikwa edhina lye nolyaHe miipala yawo.” Oolye mboka ye li 144 000? Johannes okwe tu lombwele a ti: “Oyo ohaa landula Onzigona shaa mpoka ta yi. Oyo oya kulilwa mo maantu ooyakwawo noyo aatango okuyambelwa Kalunga nOnzigona.” (Ehololo 14:1, 4) Oyo aalanduli yaJesus Kristus aadhiginini ya hogololwa nelalakano lyoku ka pangela pamwe naye megulu. Konima ngele ya yumudhilwa omwenyo gwoku ka kala megulu okuza meso, otaya “ka pangela” pamwe naJesus mboka ye li kombanda yevi. (Ehololo 5:10) Okuza kethimbo lyaayapostoli, Kalunga okwa kala ta hogolola Aakriste aadhiginini opo ya gwanithe po omwaalu 144 000.

10. Omolwashike shi li elongekidho lyopahole sho Jesus nosho wo 144 000 taya ka pangela aantu?

¹⁰ Elongekidho ndyoka opo aantu ya pangelwe kuJesus nosho  wo kaantu 144 000 oli li oshinima shopahole. Shotango, Jesus okwa tseya kutya okukala omuntu kombanda yevi nokumona iihuna okwa tya ngiini. Paulus okwa ti kutya Jesus ‘ke shi ngoka kee uvitile uunkundi wetu olukeno, ihe oye ngoka a makelwa miinima ayihe ngashika tse, ihe ina yona.’ (Aahebeli 4:15; 5:8) Aapangeli pamwe naye nayo oya mono iihuna noyi idhidhimike ye li aantu kombanda yevi. Kakele kaashono, oya kondja nokwaagwanenena noyi idhidhimikile omikithi dhomaludhi agehe. Odhoshili kutya otaya ka kala ye uvite ko omaudhigu ngoka haga adha aantu.

11. Omolwashike Uukwaniilwa waKalunga wa pumbiwa opo ku shilipalekwe kutya ehalo lyaKalunga otali gwanithwa megulu?

¹¹ Sho Jesus a popi kutya aalongwa ye oye na okugalikana Uukwaniilwa waKalunga u ye, okwa ti wo kutya oye na okugalikana opo ehalo lyaKalunga li gwanithwe ‘kombanda yevi ngaashi megulu.’ Kalunga okwa kala megulu, nehalo lye olya kala aluhe tali gwanithwa kaayengeli aadhiginini yomegulu. Ihe mOntopolwa onti-3 yembo ndika, otwi ilonga kutya omuyengeli gumwe omwiinayi okwe etha po okulonga ehalo lyaKalunga e ta ningitha Adam naEva ya yone. MOntopolwa onti-10, otatu ki ilonga oshindji shi na ko nasha naashoka Ombiimbeli tayi ti kombinga yomuyengeli ngoka omwiinayi, ngoka hi ithanwa Satana Ondiaboli. Satana niishitwa iikwawo yopambepo mbyoka ya hogolola oku mu landula, hayi ithanwa oompwidhuli, oya li ye ethiwa ya kale megulu uule wokathimbo. Onkee ano, pethimbo mpono haayehe mboka ya li megulu ya li taya longo ehalo lyaKalunga. Ihe sho Uukwaniilwa waKalunga wa tameke okupangela, inashi kala we shi li ngawo. Omukwaniilwa omupe ngoka a langekwa po, Jesus Kristus, okwa li a kondjitha Satana.—Ehololo 12:7-9.

12. Iiningwanima iyali ya simana yini ya hokololwa mEhololo 12:10?

¹² Oohapu dhopahunganeko tadhi landula otadhi hokolola shoka sha ningwa po, sho tadhi ti: “Ongame ondu uvu ewi enene megulu tali ti: ‘Ngashingeyi ehupitho lyaKalunga olye ya! Ngashingeyi Kalunga okwa holola oonkondo  dhuukwaniilwa we. Ngashingeyi Kristus okwa holola oonkondo dhe dhokupangela. Oshoka omutamaneki gwaamwatate [Satana], ngoka ha thikama koshipala shaKalunga omutenya nuusiku, oku umbwa mo megulu.’” (Ehololo 12:10) Mbela owa ndhindhilika iiningwanima iyali ya simana noonkondo mbyoka ya hokololwa kovelise ndjoka yOmbiimbeli? Shotango, Uukwaniilwa waKalunga owa tameke okupangela u na Jesus oye omupangeli. Oshitiyali, Satana oku umbwa mo megulu, u umbilwa kombanda yevi.

13. Sho Satana u umbwa mo megulu, oshizemo osha li shike?

¹³ Oshike mbela sha li oshizemo shiiningwanima mbyoka iyali? Shi na ko nasha naashoka sha ningwa po megulu, otatu lesha taku ti: “Onkee ano nyanyukweni, ne omagulu naantu amuhe mboka mu li mo!” (Ehololo 12:12) Eeno, aayengeli aadhiginini megulu oya nyanyukwa molwaashoka kehe gumwe megulu omudhiginini kuJehova Kalunga, nomolwaashoka Satana noompwidhuli dhe kaye mo we. Omu na ombili nuukumwe thiluthilu. Ngashingeyi ehalo lyaKalunga otali gwanithwa megulu.

14. Oshike sha ningwa po sho Satana u umbilwa kombanda yevi?

¹⁴ Ihe ongiini shi na ko nasha nevi? Ombiimbeli otayi ti: “[Yaye evi nefuta, OB-1954]! Oshoka omuhindadhi okwa kulukile kune u udha ondjahi, sho e shi shi kutya oku na ko ashike okathimbo okafupi kowala.” (Ehololo 12:12) Satana okwa geya molwaashoka u umbwa mo megulu nomolwaashoka e na ko owala okathimbo okafupi. Molwondjahi ye, ote etitha omaudhigu nenge ‘ooyaye’ kombanda yevi. Otatu ki ilonga oshindji shi na ko nasha ‘nooyaye’ ndhoka montopolwa tayi landula. Ihe mokudhiladhila kiinima ayihe mbyoka, otatu vulu okupula tatu ti: Ongiini Uukwaniilwa tau vulu okuningitha ehalo lyaKalunga li gwanithwe kombanda yevi?

15. Ehalo lyaKalunga li na ko nasha nevi olini?

¹⁵ Dhimbulukwa kutya ehalo lyaKalunga li na ko nasha nevi olini. Owe shi ilonga nale mOntopolwa onti-3. MuEden, Kalunga oku ulike kutya okwa li a hala evi ndika li kale oparadisa yu udha aantu aayuuki ihaaya si. Satana okwa ningitha Adam naEva ya yone, naashoka oshi imbi ehalo lyaKalunga li na ko nasha  nevi li gwanithwe, ihe inashi li lundulula. Elalakano lyaJehova opo ‘aayuuki ya ka thigulule evi e taa kala mo sigo aluhe’ opo li li natango. (Episalomi 37:29) Uukwaniilwa waKalunga otau ke li gwanitha. Omomukalo guni?

16, 17. Daniel 2:44 ote tu lombwele shike shi na ko nasha nUukwaniilwa waKalunga?

¹⁶ Konakona ehunganeko ndyoka tali adhika muDaniel 2:44 (KB). Otali lesha tali ti: “Pomasiku gaakwaniilwa mbeyaka Kalunga nguka komegulu ota ka dhika uukwaniilwa itaau ka teka po sigo aluhe, nepangelo lyawo itali ka gandjwa koshigwana shilwe. Ihe owo otau ka nyanyagula notau ka teyagula omaukwaniilwa agehe noku ga hulitha po, ihe wo wene tau ka kala sigo aluhe.” Mbela ovelise ndjoka otayi tu lombwele shike shi na ko nasha nUukwaniilwa waKalunga?

¹⁷ Shotango, otayi tu lombwele kutya Uukwaniilwa waKalunga owa li tau ka dhikwa po megulu “pomasiku gaakwaniilwa mbeyaka” nenge manga omaukwaniilwa galwe opo ge li natango. Oshitiyali, otayi tu lombwele kutya Uukwaniilwa otau ka kala po sigo aluhe. Itau ka sindwa noitau ka pingenwa po kepangelo lilwe lyi ili. Oshititatu, otu wete kutya otapu ka kala iita pokati kUukwaniilwa waKalunga nomaukwaniilwa guuyuni mbuka. Uukwaniilwa waKalunga otau ka sindana. Hugunina, owo awike tau ka kala tau pangele aantu. Opo nduno aantu otaya ka nyanyukilwa epangelo lya dhenga mbanda ndyoka inaaya mona nando onale.

18. Iita yahugunina mbyoka tayi ka kondjwa pokati kUukwaniilwa waKalunga nomapangelo guuyuni mbuka ohayi ithanwa ngiini?

¹⁸ Ombiimbeli otayi popi oshindji shi na ko nasha niita mbyoka yahugunina pokati kUukwaniilwa waKalunga nomapangelo guuyuni mbuka. Pashiholelwa, otayi ti kutya sho ehulilo tali hedha popepi, oombepo dhuuwinayi otadhi ka taandeleka iifundja opo dhi pukithe ‘aakwaniilwa yokombanda yevi alihe.’ Mbela onelalakano lyashike? ‘Okuhanganitha aakwaniilwa ya ka hinge iita mesiku enene lyaKalunga Omunankondoadhihe.’ Aakwaniilwa yokombanda yevi otaya ka gongelwa “pehala ndyoka hali ithanwa mOshihebeli Armagedon.” (Ehololo 16:14, 16) Osha yela okuza moovelise ndhoka mbali kutya olugodhi  lwahugunina ndoka talu ka kondjwa pokati komapangelo gaantu nUukwaniilwa waKalunga ohalu ithanwa iita yaArmagedon.

19, 20. Oshike tashi imbi ehalo lyaKalunga li gwanithwe kombanda yevi ngashingeyi?

¹⁹ Mbela Uukwaniilwa waKalunga otau ka gwanitha po shike okupitila miita yaArmagedon? Dhiladhila natango kombinga yehalo lyaKalunga li na ko nasha nevi. Elalakano lyaJehova Kalunga olyo kutya evi li udhithwe aantu aayuuki noya gwanenena taye mu longele mOparadisa. Mbela oshike tashi imbi shoka shi ningwe ngashingeyi? Shotango, otu li aalunde nohatu ehama nokusa. Ihe otwi ilonga mOntopolwa onti-5 kutya Jesus okwa sa molwetu opo tu vule okukala nomwenyo sigo aluhe. Otashi vulika to dhimbulukwa oohapu ndhoka dha nyolwa mEvaangeli lyaJohannes tadhi ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”—Johannes 3:16.

²⁰ Uupyakadhi ulwe owo kutya aantu oyendji ohaya longo iilonga iiwinayi. Ohaya popi iifundja, ohaya kengelele nohaya hondele. Inaya hala okulonga ehalo lyaKalunga. Aantu mboka haya longo iilonga iiwinayi otaya ka hanagulwa po pethimbo lyiita yaKalunga yaArmagedon. (Episalomi 37:10) Ihe etompelo lilwe natango kutya omolwashike ehalo lyaKalunga itaali gwanithwa kombanda yevi olyo kutya omapangelo ihaga ladhipike aantu ye shi ninge. Omapangelo ogendji oga kala ga nkundipala mokupangela kwago, omakwanyanya noga yonuka. Ombiimbeli otayi popi shu ukilila tayi ti: “Omuntu ta pangele omukwawo noku mu pangelela oshiponga.”—Omuuvithi 8:9, OB-1954.

21. Uukwaniilwa otau ka ningitha ngiini ehalo lyaKalunga li gwanithwe kombanda yevi?

²¹ Konima yiita yaArmagedon, aantu otaya ka kala owala kohi yepangelo limwe alike, Uukwaniilwa waKalunga. Uukwaniilwa mboka otau ka gwanitha po ehalo lyaKalunga notau ke etela aantu omalaleko nuuyamba omakumithi. Pashiholelwa, kohi yepangelo lyUukwaniilwa Satana noompwidhuli dhe otaya ka mangwa. (Ehololo 20:1-3) Oonkondo dheyambo lyaJesus otadhi ka  tulwa miilonga opo aantu aadhiginini kaaya kale we taye ehama nokusa. Pehala lyaashono, kohi yepangelo lyUukwaniilwa otaya ka vula okukala nomwenyo sigo aluhe. (Ehololo 22:1-3) Evi otali ka ningwa oparadisa. Kungawo, Uukwaniilwa otau ka ningitha ehalo lyaKalunga li gwanithwe kombanda yevi notau ka yapulitha edhina lye. Mbela shoka otashi ti shike? Otashi ti kutya hugunina, kohi yUukwaniilwa waKalunga, kehe gumwe ngoka ta ka kala nomwenyo ota ka simaneka edhina lye.

22. Otu shi shi ngiini kutya Uukwaniilwa waKalunga kawa li we ya sho Jesus a li kombanda yevi nenge nziya konima sho a yumuka?

²² Sho Jesus a li a lombwele aalanduli ye ya galikane taya ti: “Uukwaniilwa woye nau ye,” osha li sha yela kutya Uukwaniilwa kawa li we ya pethimbo ndyono. Mbela owe ke ya sho Jesus a londo kegulu? Aawe, molwaashoka Petrus naPaulus oya popi kutya konima sho Jesus a yumudhwa, ehunganeko ndyoka li li mEpisalomi 110:1 olya li lye mu gwanithilwa, sho tali ti: “OMUWA [Jehova] okwa lombwele omuwa gwandje . . . : ‘Kuutumba mpaka kolulyo lwandje, sigo tandi tula aatondi yoye kohi yoompadhi dhoye.’” (Iilonga 2:32-35; Aahebeli 10:12, 13) Opwa li pu na okupita ethimbo.

23. (a) Uukwaniilwa waKalunga owa tameke okupangela uunake? (b) Oshike tashi ka kundathanwa montopolwa tayi landula?

²³ Opwa li pu na okupita ethimbo li thike peni? Methelemumvo eti-19, aakonakoni yOmbiimbeli yashili oya li ya yalula kutya ethimbo ndyoka olya li tali ka hula po mo 1914. (Shi na ko nasha nomumvo ngoka, tala Oshigwedhelwako pepandja 215-218.)  Iiningwanima yuuyuni mbyoka ya tameka mo 1914 otayi koleke kutya eyalulo lyaakonakoni yOmbiimbeli yashili mboka oli li mondjila. Egwanitho lyehunganeko lyOmbiimbeli otali ulike kutya mo 1914, Kristus okwa ningi Omukwaniilwa nUukwaniilwa waKalunga womegulu owa li wa tameke okupangela. Onkee ano, otu li ‘mokathimbo okafupi kowala’ hoka Satana e na ko natango. (Ehololo 12:12; Episalomi 110:2) Otatu vulu wo okupopya nuushili kutya masiku Uukwaniilwa waKalunga otau ka katuka onkatu okuningitha ehalo lye li gwanithwe kombanda yevi. Mbela ito zimine kutya shoka onkundana ombwanawa? Mbela owi itaala kutya shoka oshoshili? Ontopolwa tayi landula otayi ke ku kwathela u mone kutya Ombiimbeli otayi popi lela iinima mbika.