1. ¿Tlenon teoyotl tikitaskej tlen melak kixmatstokej tlaltikpakchanejkej?

IPAN nochi tlaltikpaktli melak miyekej tlaltikpakchanejkej kixmatij teoyotl padrenuestro. Ika yejuin Jesucristo otemachti kenon nochiuas teoyotl, niman melak ueyi kijtosneki. Matikitakan yeyi tlen notlajtlani ipan yejuin teoyotl, niman ijkon kuajli tikasikamatis tlen yemelak temachtia Biblia.

2. Xkijto yeyi tlen notlajtlani ipan teoyotl tlen Jesús okinmachti inomachtijkauan.

² Kampa peua teoyotl tlen Jesús otemachti, okimijli akin kikaktoyaj: “Nemejuamej, ijkin nenkichiuaskej teoyotl: ‘ToTajtsin akin tinemi ne iluikak, machipaui motoka. Mauajla motekiuajyo. Manochiua nikan ipan tlaltikpaktli tlen tejua tikneki, ijkon ken nochiua ne iluikak’” (Mateo 6:9-13, TNM). ¿Tlenon kijtosneki yejuin yeyi tlen notlajtlani ipan teoyotl?

3. ¿Tlenon itech iTekiuajyo toTajtsin noneki matikixmatikan?

³ Yotomachtijkej miyek tlemach itech itoka toTajtsin, Jehová. Niman noijki yotitlajtokej itech tlen kineki toTajtsin, itech tlen yejua yokichiuj niman tlen kichiuas ipampa tlaltikpakchanejkej. San ika ¿tlenon kinekiya kijtos Jesús ijkuak okijto “Mauajla motekiuajyo”? ¿Tlenon kijtosneki iTekiuajyo toTajtsin? ¿Kenon ijkuak uajlas Tekiuajyotl kichipauas itoka toTajtsin? ¿Niman kenon Tekiuajyotl kichiuas tlen kineki toTajtsin ipan tlaltikpaktli?

4. ¿Tlenon kijtosneki iTekiuajyo toTajtsin, niman akinon tlayekanas?

⁴ ToTajtsin iTekiuajyo kijtosneki se tekiuajyotl tlen Jehová yokitlali. Niman yejua yokitlapejpeni akinon tlayekanas itech yejuin tekiuajyotl. ¿Akinon tlayekanas? Jesucristo. Yejua melak ueyixtika xijkon ken tekiuajkej akin nemij ipan tlaltikpaktli. Ika yejon, noijtoua ika “yejua Rey impan nochimej reyes niman inTeko impan nochimej on tetekouan” (1 Timoteo 6:15). Maski nemij kuajli tekiuajkej ipan tlaltikpaktli, Jesús kipiya kojtilistli tlen ika kichiuas miyek tlemach tlen kuajli xijkon ken yejuamej.

5. ¿Kanon uajtlanauatijtos iTekiuajyo toTajtsin, niman tlenon kiyekanas?

⁵ ¿Kanon uajtlanauatijtos iTekiuajyo toTajtsin? Matotlajtoltikan, ¿kanon nemi Jesús? Ijkon ken yotikitakej, ijkuak opanok cuarenta tonaltin ika yoyoliujka, Jesús oyaj iluikak (Hechos 2:33). Kuakon, iTekiuajyo toTajtsin onka iluikak. Ika yejon, Biblia noijki kijtoua ika “ne iluikak kampa Cristo” tlanauatia (2 Timoteo 4:18). San ika, maski nemi iluikak, kuajyekantos tlaltikpaktli (xpoua Apocalipsis [Revelación] 11:15).

6, 7. ¿Tleka Jesús melak kuajli Tekiuaj?

⁶ Jesús melak kuajli Tekiuaj. ¿Tleka ijkon tikijtouaj? Pampa yejua xkeman mikis. Biblia kijtoua ika yejua xijkon ken tekiuajkej ipan tlaltikpaktli, Jesús “san yejua xkeman mikis. Yejua nemi tlauilpan kampa xe yakaj ueli ajsi” (1 Timoteo 6:16). Kuakon, nochi tlemach tlen kuajli kichiuas, xkeman tlamis. Niman melak kichiuas miyek tlemach tlen kuajli.

⁷ Xkita tlen kijtoua Biblia itech Jesús: “Jehová iEspíritu onias itech [Jesús]; espíritu ika tlamachilistli, espíritu ika tlajtolpaleuilistli niman kojtilistli, espíritu ika tlaixmatilistli niman mojkaitalistli itech Jehová. Niman yejua kipaktis kimojkaitas Jehová. Niman yejua xtetlajtlakoltis san itech tlen kitas, nion san itech tlen tekakilia; yejua yes se Juez tlen kichiuas nochi ika melajkayotl inpampa akin tlajyouiyaj, niman ipan tlaltikpaktli kinyektlalis ika melajkayotl akin yolyemankej” (Isaías 11:2-4, Santa Biblia, Reina-Valera, 1977). Yejuin  tlajtoltin techititiaj ika Jesús kinyekanas tlaltikpakchanejkej ika melajkayotl niman kimiknelis. ¿Xtikuelitaskia tikpiyas se tekiuaj ijkon ken Jesús?

8. ¿Akinomej tlanauatiskej iuan Jesús?

⁸ Matikitakan okse tlemach itech iTekiuajyo toTajtsin: Jesús xtlayekanas san iselti, kichiuas iuan oksekimej tekiuajkej. Pablo okijli Timoteo: “Tla titlajyouiskej, no[ijki] tiueliskej titlamandaroskej iuan Cristo” (2 Timoteo 2:12). Kema, Pablo, Timoteo niman oksekimej tlaltikpakchanejkej yolmelaujkej akin yokintlapejpeni toTajtsin tlanauatiskej iuan Jesús ne iluikak. ¿Kechmej kiseliskej yejuin kualtsin tekitl?

9. ¿Kechmej tlaltikpakchanejkej tekiuajtiskej iuan Jesús, niman kemanon opeuj toTajtsin kintlapejpenia?

⁹ Ijkon ken otomachtijkej ipan capítulo 7 itech yejuin amoxtli, Juan okitak ipan se tlatlachalistli “Borreguito [Jesucristo] ijkatikatka ipan on tepetl itoka Sión [itekiyo kentla Tekiuaj ipan iluikak]. Iuan yejua nemiyaj 144,000 [...] yejuan ipan inixkuateu tlajkuilolnestikatka itokayo on Borreguito niman itokayo on iTajtsin”. ¿Akinomej yejuin 144,000? Juan noijki kijtoua: “Niman san kanon yau on Borreguito yejuamej ompa iuan yauij. Yejuamej okinkojkej [intlajkotian] on tlaltikpaktlakamej. Niman yejuamej nochiuaj achtoj ofrenda para Dios niman para on Borreguito” (Apocalipsis 14:1, 4). Kema, inomachtijkauan Jesucristo akin yolmelaujkej, okintlapejpenijkej tekiuajtiskej iuan yejua ne iluikak. Ijkuak mikiskej niman yoliuiskej iluikak, yejuamej ‘tlanauatiskej ipan tlaltikpaktliʼ iuan Jesús (Apocalipsis 5:10). Ijkuak nemiyaj itlatitlankauan Jesús ipan tlaltikpaktli, toTajtsin opeuj kinuajtlapejpenijtiuj tlaltikpakchanejkej yolmelaujkej akin kichiuaj ken Cristo, niman ijkon kajxiltis 144,000.

10. ¿Tleka melak techtlasojtla Jehová pampa okichiuj ika Jesús iuan 144,000 makinyekanakan tlaltikpakchanejkej?

¹⁰ Melak techtlasojtla Jehová pampa okichiuj ika Jesús niman 144,000 makinyekanakan tlaltikpakchanejkej. Jesús onen ken se tlaltikpakchane niman ika yejon kimatstika kenon tlajyouiya se tlaltikpakchane. Itech Jesús, Pablo okijto:  “Ueli techiknelia ijkuak xtikojtikej, pampa sa no yejua okijyouij miyek tetlatlatalistli [...]. Pero yejua xotlajtlakoj” (Hebreos 4:15; 5:8). Akin tekiuajtiskej iuan Jesús noijki yokixikojkej tlemach tlen tlaltikpakchanejkej kijyouiyaj. Niman noijki, otlajyouijkej itech tlajtlakojli niman kokolistin. Kuakon, yejuamej kasikamatiskej tlemach tlen kixnamikij tlaltikpakchanejkej.

11. ¿Tleka Jesús okijto ika inomachtijkauan kipiaya ika kitlajtlaniskej ika teoyotl manochiua tlen kineki toTajtsin ne iluikak?

¹¹ Jesús xsan okinnauati inomachtijkauan makichiuakan teoyotl niman ijkon mauajla iTekiuajyo toTajtsin; noijki okimijli ika makitlajtlanikan manochiua tlen kineki Jehová “ipan tlaltikpaktli, ijkon ken nochiua ne iluikak”. Ipan iluikak, kampa nemi toTajtsin, iluikaktekitkej yolmelaujkej nochipa kichiuaj tlen kineki toTajtsin. San ika, ipan capítulo 3 itech yejuin amoxtli otomachtijkej ika se xkuajli iluikaktekitketl xok okichiuj tlen kineki toTajtsin niman noijki okichiuj ika Adán iuan Eva matlajtlakokan. Ipan capítulo 10 tomachtiskej okseki itech tlen yemelak temachtia Biblia itech yejuin iluikaktekitketl, akin kitokayotiaj Satanás. ToTajtsin xouejkauj okinkauili manemikan iluikak Satanás iuan espíritus xkuakualtin noso demonios, akin iuan onosentlalijkej. Ika yejon, xnochimej akin nemiyaj ipan iluikak kichiujtoyaj tlen kineki toTajtsin. San ika, nochi peuaskia nopatlas ijkuak Jesucristo peuas tlayekanas niman kixnamikis Satanás (xpoua Apocalipsis 12:7-9).

12. ¿Tlen ome tlemach kijtoua Apocalipsis 12:10?

¹² Yejuin tlajtoltin tlen onoijtokej yeuejkaui, kijtoua tlen panoskia: “Ne iluikak onikak se chikauak tlajtojli yejuan okijtoj: ‘Yoyejkok on itemakixtilis niman ipoder toDios. Yejua yopeu tlamandaroua niman Cristo no yokiselij tekiuajyotl. Nochi in tikmatij ika melauak, pampa aman on yejuan nochipa ikan tonajli niman ikan yeuajli kinteixpanuiaya on tokniuan ixpan toDios yokuajtlajkalkej de ne iluikak’” (Apocalipsis 12: 10). ¿Otikitak ika ipan yejuin tlaxelojli pitentsin kijtoua ome tlemach tlen melak ueyi kijtosneki? Se: Jesucristo peua tlayekana ipan iTekiuajyo toTajtsin. Ome: Satanás okuajkixtijkej iluikak niman okuajtlakalkej ipan tlaltikpaktli.

13. ¿Tlenon opanok pampa Satanás okuajkixtijkej ne iluikak?

¹³ Ijkon ken tikitaskej ika tlayekapan, yejon ome tlemach tlen yonoijtoka panoskia yonochiujkej. Ipampa yejon, ¿tlenon opanok? Matikpouakan tlen opanok ne iluikak: “Ma onya pakilistli ne iluikak. Nemejuamej yejuan ompa nenchantij xpakikan” (Apocalipsis 12:12). Kema, pampa Satanás niman espíritus xkuakualtin okinuajkixtijkej iluikak, iluikaktekitkej yolmelaujkej pakij pampa aman nochimej espíritus tlen iluikak nemij, yolmelaujkanemij itech toTajtsin Jehová, niman nochimej nemij ika ueyi yolseuilistli. Kuakon, ipan iluikak yopeuj nochiua tlen kineki toTajtsin.

14. ¿Tlenon opanok pampa Satanás okuajtlakalkej ipan tlaltikpaktli?

¹⁴ ¿Tlenon uelis tikijtoskej itech tlaltikpaktli? Biblia kijtoua: “¡Lástima para nemejuamej yejuan nenchanejkej ipan tlaltikpaktli niman ipan mar! pampa on diablo nemotech yoyejkok. Yejua yotemok ikan temojtij itlauel pampa kimatstikaj ika xok uejkajtikaj kiselis icastigo” (Apocalipsis 12:12). Satanás melak kualani pampa okuajkixtijkej iluikak niman sa achijtsin tonaltin kipoloua. Pampa melak kualani, kichiujtika maonia tlauejli ipan tlaltikpaktli. Ipan okse capítulo tomachtiskej okseki tlemach tlen xkuajli kichiujtika Satanás. San ika, itech tlen yotikitakej, kanaj totlajtoltiaj: ¿kenon Tekiuajyotl kichiuas tlen kineki toTajtsin ipan tlaltikpaktli?

15. ¿Tlenon kineki toTajtsin manochiua ipan tlaltikpaktli?

¹⁵ Aman, xkilnamiki tlen kineki kichiuas toTajtsin ipan tlaltikpaktli. Ijkon ken otomachtijkej ipan capítulo 3, Jehová okiteititi ipan xochitlalpan Edén ika kineki yejuin tlaltikpaktli manokuepa melak tlakualtsinkan niman matemi ika tlaltikpakchanejkej yolmelaujkej akin xkeman mikiskej. Ijkuak Satanás okichiuj ika Adán niman Eva matlajtlakokan, xok ouel onochiuj tlen kinekiya toTajtsin ipan tlaltikpaktli, san  ika, Jehová xokipatlak tlen kineki kichiuas. Yejua ok kineki manochiuakan yejuin tlajtoltin: “Akin yolmelaujkej nemiskej ipan tlaltikpaktli, niman nochipa ipan chantiskej” (Salmo 37:29). Tlen nikan kijtoua, iTekiuajyo toTajtsin kichiuas. ¿Kenon kichiuas?

16, 17. ¿Tlenon kijtoua Daniel 2:44 itech iTekiuajyo toTajtsin?

¹⁶ Ipan Daniel 2:44 tiknextiaj yejuin teotlajtojli tlen onoijto: “Ipan itonaluan yejon tekiuajkej toTajtsin iluikakchane kitlalis se tekiuajyotl tlen xkeman kipopoloskej. Niman yejuin tekiuajyotl xpanos imak okse kalpan. Kinkuechos niman kinpopolos nochi tekiuajyomej, niman san yejua nochipa nemis”. ¿Tlenon techijlia yejuin teotlajtojli itech iTekiuajyo toTajtsin?

¹⁷ Kachtopa: kijtoua ika yejuin tekiuajyotl peuaskia “ipan itonaluan yejon tekiuajkej”, kijtosneki, ijkuak ok nentoskej oksekimej tekiuajkej, noso tlanauatijkej. Ika ome: kijtoua ika Tekiuajyotl xkeman tlamis, noso nochipa onias. Xonias okse tekiuajyotl tlen kipatlas. Niman ika yeyi: kijtoua ika noixnamikiskej ipan se guerra iTekiuajyo toTajtsin niman tekiuajyomej akin nemij ipan tlaltikpaktli, niman iTekiuajyo toTajtsin yejua akin tetlanis. Ijkon, tlaltikpakchanejkej kipiyaskej san se tekiuajyotl niman xok onias okse melak kuajli ijkon ken yejuin tekiuajyotl.

18. ¿Kenon itoka yejon guerra kampa iTekiuajyo toTajtsin kimixnamikis tekiuajyomej ipan tlaltikpaktli?

¹⁸ Biblia techijlia miyek itech yejon guerra ijkuak iTekiuajyo toTajtsin kimixnamikis tekiuajyomej ipan tlaltikpaktli. Se neskayotl, kijtoua ika ijkuak sa achijtsin poliuis ika tlapopolos, espíritus xkuakualtin kisemoyauaskej tlen xmelauak niman ijkon kinkajkayauaskej “nochimej on reyes ipan on tlaltikpaktli”. ¿Tleka ijkon kichiuaskej? “Kinsentlaliskej [...] ipan on iueyitonal Dios yejuan nochi ueli.” Tekiuajkej kinsentlaliskej “kampa ikan tlajtojli hebreo itoka Armagedón” (Apocalipsis 16:14, 16). Ika tlen kijtoua yejuin ome tlaxeloltin pitentsitsintin, yejon guerra ijkuak iTekiuajyo toTajtsin kimixnamikis tekiuajyomej ipan tlaltikpaktli, itoka Armagedón.

19, 20. Ipan yejuin tonaltin, ¿tlenon xkikauilia ipan tlaltikpaktli manochiua tlen kineki toTajtsin?

 ¹⁹ ¿Tlenon kichiuas iTekiuajyo toTajtsin ijkuak panos guerra itoka Armagedón? Matiknemilikan oksejpa itech tlen Jehová kineki kichiuas ipan tlaltikpaktli: manokuepa se xochitlalpan niman matemi ika tlaltikpakchanejkej yolmelaujkej niman makitekichiuilikan. ¿Tleka xnochiujtika tlen kineki toTajtsin ipan yejuin tonajli? Kachtopa, pampa titlajtlakolejkej, niman ika yejon tikualoj niman timikij. San ika, ipan capítulo 5 otomachtijkej ika Jesús omik topampa niman ijkon uelis tinemiskej nochipa. Kanaj tikilnamiki yejuin tlajtojli tlen Juan okijkuilo: “Dios sanoyej okintlajsojtlak on tlaltikpaktlakamej hasta okitemakak isenteKonetsin para nochi on akin kineltokas xpoliuis, yej kipias yenkuik nemilistli para nochipa” (Juan 3:16).

²⁰ Noijki xnochiua tlen kineki toTajtsin pampa nemij miyekej tlaltikpakchanejkej akin kichiuaj tlen xkuajli. Xkijtouaj tlen melauak, tekajkayauaj niman kichiuaj tlen tsokuiltik ipan innemilis. Xkinekij kichiuaskej tlen kineki toTajtsin. San ika, akin kichiuaj tlen xkuajli popoliuiskej ipan Armagedón, iguerra toTajtsin (xpoua Salmo 37:10). Onka okse tlen ika xnochiujtika tlen kineki toTajtsin ipan tlaltikpaktli pampa tlanauatijkej xkimijliaj tlaltikpakchanejkej makichiuakan tlen kineki toTajtsin. Miyekej tekiuajkej xkimatij kenon tlayekanaskej niman kichiuaj tlen xkuajli ika tomin. Melauak tlen kijtoua Biblia: “Tlaltikpakchane kintlajyouiltia akin kinyekana” (Eclesiastés 8:9).

21. ¿Kenon Tekiuajyotl kichiuas tlen kineki toTajtsin ipan tlaltikpaktli?

²¹ Sakin tla yopanok Armagedón, san se tekiuajyotl onias tlen kinyekanas tlaltikpakchanejkej, iTekiuajyo toTajtsin. Yejuin Tekiuajyotl kichiuas tlen kineki toTajtsin niman kuajkuis miyek tlateochiualistin. Se neskayotl, Satanás niman espíritus xkuakualtin kintsakuaskej mil xiuitl (xpoua Apocalipsis 20:1-3). Nochiuas tlen ika omikiko Jesús, tlaltikpakchanejkej xok kualoskej nion xok mikiskej, pampa uelis nemiskej nochipa (Apocalipsis 22:1-3). Niman noijki tlaltikpaktli nokuepas se  xochitlalpan. Ijkon, Tekiuajyotl kichiuas tlen kineki toTajtsin niman kichipauas itoka. ¿Tlenon kijtosneki yejon? Ika yejuin Tekiuajyotl, nochimej tlaltikpakchanejkej kitlakaitaskej niman kiueyichiuaskej itokatsin Jehová.

22. ¿Kenon tikmatstokej ika iTekiuajyo toTajtsin xouajla ijkuak Jesús onen ipan tlaltikpaktli nion sakin ijkuak yoyoliujka?

²² Ijkuak Jesús okimijli inomachtijkauan ika makitlajtlanilikan toTajtsin “Mauajla motekiuajyo”, kuajli nasikamati ika ipan yejon tonaltin Tekiuajyotl ok xiuajlaya. ¿Ouajla ijkuak Jesús oyaj iluikak? Ka, pampa ijkuak Jesús yoyoliujka, onochiuj ijkon ken ipan Salmo 110:1 yokijtoka, niman Pedro iuan Pablo otlajtokej itech yejuin. Ipan Hechos 2:34, 35 Pedro okijto: “On toTajtsin Dios okijlij toTeko: ‘Xmotlali nikan [...] noyekmakopa hasta ma nimitstlali tetlanki intech on yejuan motlauelikniuan’” (Hebreos 10:12, 13). Kema, Jesucristo ok kichiaskia.

23. a) ¿Kemanon opeuj tlanauatia iTekiuajyo toTajtsin? b) ¿Tlenon tikitaskej ipan okse capítulo?

²³ ¿Kech uejkauiskia tlamachiaskia? Cuarenta xiuitl ika tlakuitlapan itech 1914, se grupo akin kuajli nomachtiayaj itech tlen kijtoua Biblia, yolik okasikamatkej ika Jesucristo tlamiskia kichiaskia ipan 1914. (Tla tikneki okseki tikmatis itech yejuin fecha, xkita tlen kijtoua apéndice, “¿Tleka xiuitl 1914 melak ueyi kijtosneki ipan tlen yokijtoka Biblia?”.) Nochi tlen opeuj panoua ipan nochiuiyan tlaltikpaktli ipan 1914, teititia ika tlen okasikamatkej akin  nomachtiayaj itech Biblia yemelak katka. Pampa yonochiuj tlen Biblia yokijtoka panoskia, techititia ika ipan 1914 Jehová okitlali Jesús ken Tekiuaj niman iTekiuajyo toTajtsin opeuj tlanauatia. Kuakon, tinentokej ipan “xok uejkajtikaj” tonaltin tlen kipoloua Satanás (Apocalipsis 12:12; Salmo 110:2). Noijki uelis tikijtoskej ika Tekiuajyotl sa achijtsin poliui ijkuak kichiuas tlen kineki toTajtsin ipan tlaltikpaktli. ¿Tikuelkaki tlen tijkaki? ¿Tiknemilia ika yemelak ijkon nochiuas? Ipan okse capítulo tikitas tlen Biblia yemelak temachtia itech yejuin tlemach.