1. ¿Ima reqishqa oraciompitataq yachakushun?

WARANQA kuti waranqapitapis más nunakunam reqiyan tsë padrenuestro nishqan oracionta. Kë oraciontaqa kikin Jesusmi yachatsikorqan, y alläpa precïsom ima ninan kanqantapis musyanantsik. Yachakurishun kë oraciompa qallananchö kima mañakïkunata, y tsënömi más musyanki Biblia yachatsikonqanta.

2. ¿Mëqankunataq Jesus yachatsikonqan kima mañakïkuna?

² Kë qallanan oracionchömi Jesus nerqan wiyaqninkunata: “Qamkunaqa, Dyosta mañakuyanki keynow: Syelukunachow keykaq Teytalläkuna, jutiki santifikashqa katsun. Reynïki shamutsun. Muneyniki rurakätsun syeluchownow, tseynowlla patsachowpis” (Mateo 6:9-13, QKW). ¿Ima ninantaq kë kiman mañakïkuna?

3. ¿Imakunatataq alleq reqishwan kë Reinopita?

³ Jehová Diospa shutimpitaqa alleqnam yachakurerqontsik. Hina rikarqontsiknam Diospa voluntadnimpita, ruranqanta y shamoq tiempochö nunakunapaq ruramunantapis. Pero “Reynïki shamutsun” nerqa, ¿imapaqtaq Jesus parlëkarqan? ¿Imataq Diospa Reinon? Kë reino chämorqa, ¿imanöraq Diospa shutinta santificanqa? Tsë Reinopa shamïnenqa, ¿imanötaq paqtan Diosnintsikpa voluntadnin rurakänanman?

4. ¿Imataq Diospa Reinon, y pitaq Reyninqa?

⁴ Diospa Reinonqa, Jehová Dios ciëlochö churanqan gobiernom. Y kikinmi tsë gobiernochö gobernamunampaq Reytaqa akrashqa. ¿Pitaq tsë Reyqa? Jesucristum. Pëqa, kë Patsachö llapan gobernantekunapitaqa más poderyoqmi, tsëmi “reykunapa Reynin, i señorkunapa Señornin”, nin Bibliachöqa (1 Timoteu 6:15, QKW). Llapan gobiernokunapitapis masmi Jesuspaqa podernin kan, imëka allikunata ruramunampaqpis.

5. ¿Mëpita patsë, y mëmanraq Diospa Reinon gobernamonqa?

⁵ ¿Mëpita patsëraq Diospa Reinonqa gobernamonqa? ¿Mëchötaq Jesusqa këkan? Rikanqantsiknömi, huk qeruchö wanuratsiyanqampita kawariramur, ichik tiempollatana ciëlota kutirerqan (Hechos 2:33). Awmi, ciëlochömi këkan Diospa Reinonqa. Tsëmi Bibliachöqa ‘selestyal reynu’ nishpa parlan kë gobiernopaq (2 Timoteu 4:18, QKW). Pero ciëlochö këkarpis kë Patsamanmi gobernamonqa (leyi Apocalipsis 11:15).

6, 7. ¿Imanirtaq Jesusqa wakin reykunapitaqa hukläya?

⁶ Jesusnöqa manam huk Rey kantsu. ¿Imanirtaq tsëtaqa nintsik? Mana wanoq Rey kaptinmi. Manam nunakunanö wanoqtsu, tsëmi: “Pey japallanmi mana wanoq, i yachan mana chäna aktsichow” nishpa Bibliaqa nimantsik (1 Timoteu 6:16, QKW). Tsënöpam mana ushakaq kanqa llapan alli ruranqankuna. Awmi, atska allikunatam ruramonqa nunakunapaq.

⁷ Jesuspaq Biblia nenqanta rikë: “Jehovapa espïritunqa pëchömi kanqa, musyëyoq kanampaq, willapäkoq kanampaq, kallpayoq kanampaq, yachëyoq kanampaq, y Jehovata respetanampaq. Y kushikïnenqa kanqa Jehovata mantsëchömi. Manam ni wiyanqanllapitatsu ni hanampa rikanqanllapitatsu juzganqa tsëpa rantenqa, waktsakunataqa justiciawanmi juzganqa, y patsachö manshukunapaqqa llapampaqpis igualmi kanqa” (Isaías 11:2-4). Kënö nerqa  kuyakïwan, y justiciawan Jesus gobernamunantam rikätsimantsik. ¿Tsënö gobernantiki kananta munankimantsuraq?

8. ¿Pikunaraq Jesuswan gobernayämonqa?

⁸ Hinamampis Jesusqa manam hapallantsu gobernamonqa, más reykunapis yanapayanqam. Pablu, Timoteuta nenqanta rikärishun: “Sitsun sufrimientucunata pasensiacur pasashun; pewan juntum mandacushun” (2 Timoteu 2:12). Awmi, Jesucristuwanmi, Pablu, Timoteu y wakinpis Dios akrashqankuna, gobernayämonqa ciëlopita patsë. ¿Ëkaqraq tsënö gobernamoqpaqqa kayan?

9. ¿Ëka nunakunataq Jesuswan gobernayämonqa, y imëtaq Dios Yaya akrar qallëkorqan?

⁹ Kë libropa capítulo 7 nishqanchö rikanqantsiknömi huk visionchö apóstol Juan rikarqan “‘Sion’ [ciëlochö Reynö gobernamunan sitiom] nishqan jirca janancho Achcas [Jesucristu] shëcaqta. Pewan juntum quecayarqan juc pachac chuscu chunca chuscu waranqa (144.000) nunacuna. Tse nunacunapa urcuncunachomi Achcaspa y Papänin Dios Yayapa jutincuna escribirëcarqan”. ¿Pikunataq tsë 144.000 kayan? “Pecunaqa mecho tsechopis Achcastam qatiyarqan. Puntatam salbasiontapis chasquiriyashqa cayarqan. Tsemi imeca murucushqantsicpa punta wawan cuenta Diospaq y Achcaspaq cayarqan” (Apocalipsis 14:1, 4). Këkunaqa Jesucristupa fiel qateqninkuna, y ciëlopita patsë gobernayämunampaq akrashqam kayan. Wanurir y kawariramurllam, Jesuswan junto “patsacho nunacunata” gobernayämonqa (Apocalipsis 5:10). Apostolkuna kawayanqan tiempopita patsëmi, Dios Yayaqa akrar qallëkorqan kë fiel cristianokunata pachak chusku chunka chusku waranqaman (144.000) tinkonqanyaq.

10. ¿Imanirtaq Jesusta y 144.000 nunakunata gobernayämunampaq akrarnin, Jehová alläpa kuyakoq kanqanta rikätsimarqontsik?

¹⁰ Jesusta y 144.000 nunakunata gobernayänampaq akrarqa, alläpa kuyakoq kanqantam Jehová rikätsimarqontsik.  Musyarinapaq, Jesusqa nunam karqan, tsëmi imanö hipana kanqanta musyan. Tsëmi Pabluqa nerqan: “mas mandacoq sacerdotintsic Jesucristuta noqantsictanolla shonquncho jipatsir diablu tenteta munarqan. Tseno quecaptinpis, pëqa manam jutsaman ishquerqantsu. Tsemi debil quenintsicta musyar, ancupäcoq [llakipäkoq] car, yanapamantsic jutsaman mana ishquinapaq”, nishpa (Hebreus 4:15; 5:8). Y pëwan gobernayämunampaq kaqkunapis nunakunapa hipakïninkunatam aguantayashqa. Hinamampis tukïläya qeshyakunata, y hutsasapa këtapis aguantayashqam. Tsëkunata pasashqa karmi llapan nunakunapa kawëninkunachö hipakïninkunata musyayanqa.

11. ¿Imanirtaq qateqninkunata Jesus nerqan, Dios Yayapa voluntadnin ciëlochö rurakëkutsun nishpa mañakuyänampaq?

¹¹ Jesusqa manam Diospa Reinon shamunampaq mañakuyänanllapaqtsu yachatserqan qateqninkunata, sinöqa “syeluchownow” “patsachowpis” Diospa voluntadnin rurakänampaqwan mañakuyänampaqmi nerqan. Diosnintsik këkanqan ciëlochöqa imëpis angelninkunaqa voluntadninta rurëkayashqallam. Tsënö kaptimpis huk angelmi chiki tikrakurerqan capítulo 3 nenqanchö yachakonqantsiknö, y tsënöpam Adantawan Evata hutsaman ishkiratserqan. Capítulo 10 nenqanchömi yachakushun más kë Satanás nishqan angelpitaqa. Diosmi permiterqan kë chiki ángel y qateqninkuna —demonio nishqankuna — ciëlochö huk tiempo kayänampaq. Tsëmi Jesuspa tiemponchöqa, llapan angelkunatsu Diospa voluntadninta rurëkäyarqan. Pero tsëtaqa, Satanasta vencirirmi Jesus altsanan karqan Diospa Reinonchö gobernar qallëkamurnin (leyi Apocalipsis 12:7-9).

12. ¿Ima ishkë rurëkunatataq Apocalipsis 12:10 rikätsimantsik?

¹² Kë qellqarëkaq profecïakunam rikätsimantsik imanö pasanantapis: “Tsepitanam wiyecorqä sielupita fuertipa queno nimoqta: ‘Diosman creyicoqcunata paqasta junaqta  shimpipaq diabluta cananqa weqaparcuyashqanam. Tsemi poderninwan Dios mandacunan öra y nunacunata salbanan öra chäramushqana. Cananpitaqa Dios Acrashqanpa mandaquininllachonam llapanpis cayanqa’” (Apocalipsis 12:10). ¿Tantearerqonkiku kë textochö ishkë rurëkuna kanqanta? Puntatam, Jesucristu, Dios Yayapa Reinonchö gobernar qallëkun. Tsëpitanam, ciëlopita Satanasta Patsaman qarqarayämun.

13. ¿Imataq pasarqan ciëlopita Satanasta qarqarayämuptin?

¹³ Tsëpitanam rikäshun kë ishkan importante rurëkunaqa cumplikashqana kanqanta. Tsëpitaqa, ¿imakunayanraq pasashqa? Ciëlochö pasanqanta leishun: “Tseyreykur kushikuyey, syelukuna, i tseychow yachaqkuna” (Apocalipsis 12:12, QKW). Tsëmi, ciëlochö angelkunaqa alläpa kushïkuyarqan, Satanasta ciëlopita qarqarayämuptin, tsëpita patsëqa Jehová Diosllatanam serviyan kushishqa llapan tsëchö quedaq angelkuna y allillanam kakuyan. Tsënöpam ciëlochöqa Diosnintsikpa voluntadnin rurakëkanna.

14. ¿Imataq kë Patsachö pasashqa Satanasta qarqayämonqampita patsë?

¹⁴ ¿Ima nishwanraq Patsapaqqa? Bibliachömi kënö willamantsik: “¡Allaw patsachow i lamarchow yachaqkuna! Qamkunamanmi dyablu urämushqa alläpa piñakiywan, ichikllana tyempun kanqanta musyar”, nishpa (Apocalipsis 12:12, QKW). Satanasqa alläpa piñashqam këkan, ciëlopita qarqayämushqa kaptin y ushakänampaq ichikllana tiempo pishenqanta musyar. Tsënö alläpa piñashqa karmi kë Patsachö imëka mana allikunatapis rurëkan. Qateqnin capïtulochömi yachakushun más kë mana allikuna ruranqampita. Tsënö kaptenqa, ¿imanötaq kë Reinoqa, Diospa voluntadninta ruramonqa kë Patsachö?

15. ¿Imanö kë Patsa kanantataq Dios munan?

¹⁵ Yarpankiku imanö kë Patsa kanantaraq Dios Yaya munarqan. Capítulo 3 nishqanchö yachakonqantsiknöpis, tsë shumaq Edén huertata rurarninmi Jehová rikätsikorqan, kë  llapan Patsa huk shumaq paraïsoman tikrananta, y mana wanushpa alli nunakuna tärayänanta. Pero Satanás, Adantawan Evata hutsaman ishkiratsiptinnam, Diosnintsikpa munënenqa mana rurakarqannatsu, pero Dios Yaya munanqanqa manam ushakashqatsu. Jehová Diosqa munëkanllam, tsëmi kë palabranchö: “Alli kaqkunam patsata chaskiyanqa, y tsëchömi mana wanushpa tärayänqa”, nenqan cumplikänanta munan (Salmo 37:29). Y këtaqa ruramonqa Diospa Reinonmi. ¿Imanö?

16, 17. ¿Imataq nimantsik Daniel 2:44 Diospa Reinompaq?

¹⁶ Daniel 2:44 nenqanchömi tarintsik kë profecïata: “Kë reykunapa tiemponchömi, ciëlochö Dios mana ushakaq reinota churamonqa. Ke reinopa rantenqa mananam hukqa yëkonqanatsu. Y chipyëpam ushakätsenqa patsachö gobiernokunata, y kikinmi imëyaqpis mana ushakashpa kanqa”. ¿Ima nimantsikmi kë profecía Diospa Reinompaq?

¹⁷ Kë textopa qallananchöqa, Dios Yayapa Reinonqa patsakanqa “kë reykunapa tiemponchömi” ninmi, këqa kë Patsachö gobiernokuna o reinokuna këkaptinllaran ninanmi. Tsëpitanam, kë Reinoqa imëyaqpis kanqam nimantsik. Manam ni ima gobiernopis ushakätsenqatsu, ni rantin yëkonqatsu. Hina tsëpitapis, Diospa Reinon kë Patsachö gobiernokunawan guerrachö kanantam nimantsik, y këchö venceqqa Diospa Reinonmi kanqa. Tsëpitanam, huk gobiernolla kanqa llapan nunakunapaq.

18. ¿Imataq Diospa Reinonwan, kë Patsachö gobiernokuna peleayanqan guerrapa shutin?

¹⁸ Bibliaqa atska kutim willamantsik, Diospa Reinonwan, Patsachö gobiernokunaqa guerrachö kayänanta. Awmi, kë tiempo ushakëninman chaptenqa, mana alli espïritukunam “jinantin nacioncho reycunata” ulipäyanqa o llullapäyanqa. ¿Imapaq? “Dia del juisiucho puedeq Diospa contran pelyayänampaq”. Kë llapan gobiernokunam ëllukashqa kayanqa “hebreu idiomacho Harmagedon” nishqan sitioman (Apocalipsis 16:14, 16). Tsë ishkan versículo rikätsimanqantsiknömi  Diospa Reinonwan nunapa gobiernon peleayanqantaqa Har–Magedón, o Armagedón nishpa shutitsin.

19, 20. ¿Imanirtaq Dios Yayapa munënin kë Patsachö rurakëkantsu?

¹⁹ ¿Imataraq Diospa Reinon apamonqa Armagedonwan? Pensarishun yapë Dios Yayantsik munanqankunaman: Pëqa kë Patsa huk shumaq paraïsoman tikrananta, y alli nunakuna pëllata servir kawayänantam munan. ¿Imanirtaq Diosnintsikpa munënin kanan tiempo rurakëkäntsu? Huk problëmaqa, hutsasapa kënintsikmi, tsëmi qeshyantsik y wanuntsik. Pero capítulo 5 nishqanchömi yachakorqontsik, mana wanushpa kawanapaqqa Jesucristu wanïninwan salvamanqantsikta. Itsapis yarpankiman Juan qellqanqanchö nenqanta: “‘Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänampaq sinoqa wiñepa cawayänanpaq’” (Juan 3:16).

²⁰ Huk kaq problëmanam, nunakunapa mana alli comportakïnin. Ulikuyan o llullakuyan, warmipis, ollqupis lluta purikuyan. Diospa voluntadnintaqa rurëta munayantsu. Pero kë mana allita ruraq nunakunaqa ushakäyanqa Armagedón nishqan Diospa guerranchömi (leyi Salmo 37:10). Hinamampis gobiernokunaqa manam nunakuna allita rurayänampaq yanapayantsu, tsëpis manam yanapakuntsu Diospa munënin kë Patsachö mana rurakëkänampaq. Tsë gobiernokunaqa unëpitapis mana allillatam rurayashqa, y manam allikuna rurëta puëdeyantsu. Tsëmi alleq claro Bibliaqa willakun: “Nunaqa, nuna mayinta dominashqa hipatsinanllapaqmi”, nishpa (Eclesiastés 8:9).

21. ¿Imanötaq kë Reinoqa Diospa munëninta ruramonqa?

²¹ Tsë Armagedón pasariptenqa, Dios Yayapa Reinonllam gobernanqa llapan nunakunata. Kë Gobiernoqa, Diospa munënintam ruramonqa y atska bendicionkunatam apamonqa. Satanasta y demonionkunatapis limpum ushakätsenqa (Apocalipsis 20:1-3). Jesuspa wanïnenqa  alläpa valoryoqmi, tsërëkurmi nunakuna qeshyayanqanatsu ni wanuyanqanatsu, awmi, mana wanushpam kawayanqa (leyi Apocalipsis 22:1-3). Hinamampis kë Patsatam huk paraïsoman tikratsenqa. Tsënöpam tsë Reinoqa, Dios Yayapa shutinta santificanqa y pëpa munëninta kë Patsachö ruramonqa. ¿Ima ninantaq tsëqa? Llapan nunam Jehová Diospa shutinta respetanqa y honranqa ninanmi.

22. ¿Imanötaq musyantsik Diospa Reinon, Jesus Patsachö këkaptin, o kawarirenqanllachö mana chämonqanta?

²² Jesus qateqninkunata “Reinïki shamutsun” nishpa mañakuyänampaq nenqanqa, clärom këkarqan tsë tiempochö Diospa Reinon manaraq reinar qallanqan. ¿Jesus ciëlota kutiriptinllaku chämorqan tsë reino? Manam, Salmo 110:1 nishqanchömi willamantsik: “Jehová Diosmi Señornïta nerqan: ‘Derecha kaq lädoman täkaramï, chikishoqnikikunata chakiki harunanman churamonqäyaq’”, nishpa. Kë profecïaqa Jesus kawariramuptinraq pëchö cumplikanqantam niyarqan Pedruwan Pablu (Hechos 2:32-35; Hebreus 10:12, 13). Awmi huk tiemporan Jesusqa reinota chaskinampaq shuyaränan karqan.

23. a) ¿Imëtaq gobernar qallashqa Diospa Reinon? b) ¿Imatataq yachakushun qateqnin capïtulochö?

²³ ¿Ëka tiemporaq shuyaränan karqan? 1800 ushanan y 1900 qallanan watakunachömi, wallkaqlla Bibliata estudiaq nunakuna, musyariyarqan Jesus shuyaranqan tiempoqa  1914 watachö ushanqanta (1914 watapaq mas musyanëkipaqqa “Profecïakunachö alläpa importante 1914 wata” nishqan apendicichö këkaq yachatsikïta rikäri.) 1914 watapita patsachö llapan pasakonqankunam rikätsimantsik Biblia estudiaqkuna entendiyanqan rasumpa kanqanta. Y Bibliachö profecïakuna cumplikanqanmi, rikätsimantsik 1914 watachö Jehová, Reytanö Cristuta churanqanta y tsëpita gobernar qallamonqanta. Tsëmi kawëkantsik Satanaspa “ichikllana tiempon” ushakänampaq pishikanqanchö (Apocalipsis 12:12; Salmo 110:2). Hina nishwanmi, Diosnintsikpa munënin kë Patsachö rurakänampaqqa ichikllana pishikanqanta. ¿Alli noticiatsuraq këqa? ¿Rasumpatsuraq cumplikanqa? Qateqnin capïtulochömi rikäshun, kë cumplikänampaq Biblia yachatsikonqanta.