1. Xa hiittee egennantino huuccattore xiinxallineemmo?

ALAMETE aana miliyoonetenni kiirranni manni, Abbaataachchinote yinanni huuccatto egennino. Kuni qaali Yesuusi Kiristoosi umisi rosiisinotanna egennantino huuccatto xawisate horoonsiˈnanniho. Tini huuccatto bayira sokka amaddinote; tenne huuccattora umo noota sase kifile xiinxallakki, Qullaawu Maxaafi addinta mayyee rosiisannoro roorsite afatto gede kaaˈlitannohe.

2. Yesuusi rosaanosi huuccidhara rosiisino coyi giddo sasu hiikkonneeti?

² Yesuusi macciishshanni noosi manna tenne huuccattora hanafote togo yee hajajino: ‘Kiˈne togo yitine huuccidhe: “Iima heeˈratto Annanke, suˈmikki maassamo. Mangistekki daggo, fajjokki iima ikkitino gede, uullano ikkito.”’ (Maatewoosi 6:9-13) Tini sasenti huuccattote kifile mayi tiro afidhino?

3. Maganu Mangiste lainohunni afa hasiissannonke coyi maati?

³ Yihowa yinanniha Maganu suˈma lainohunni albaanni lowore ronsoommo. Qoleno Maganu alaama yaano isi mannu oosora konni albaanni assinorenna konni kaˈa assannore shiimu deerrinni ronsoommo. Ikkina Yesuusi, ‘Mangistekki daggo’ yine huucciˈneemmo gede kulinonkehu maa xawisateeti? Maganu Mangiste maati? Hatti Mangiste dagganno wote Maganu suˈmi maassamannohu woyi qullaawannohu  hiittoonniiti? Tenne Mangiste daa, Maganu fajjo woˈmaitnno gede assitannohu hiittoonniiti?

4. Maganu Mangiste maati? Tenne Mangiste Nugusi ayeeti?

⁴ Maganu Mangiste, Maganu Yihowa qixxeessino gashshooteeti; tenne mangiste Nugusino isi doorinoho. Maganu Mangiste Nugusi ayeeti? Yesuusi Kiristoosiiti. Yesuusi uullate gashshaano baalantenni rooranno; qoleno ‘nugussate Nugusanna mootoollete Mootichcha’ yaamamino. (1 Ximootewosi 6:15) Yesuusi uullate gashshaano woˈmanti assitanno danchummanni lowo geeshsha roorinoha dancha coye assanno wolqa noosi.

5. Maganu Mangiste gashshitannohu hiikko heedheeti? Tini mangiste maa gashshitanno?

⁵ Maganu Mangiste gashshitannohu hiikko heedheeti? Tenne afate, Yesuusi hiikko nooro afa danchate. Iso haqqaho sunte shinoonnitanna hakkiinnino reyotenni kainota konni albaanni ronsoommo. Reyotenni kaihunni shiima yanna gedensaanni, iimira haˈrino. (Soqqamaanote Looso 2:33) Konni daafira Maganu Mangiste noohu iimaati. Qullaawu Maxaafi ise “iimi mangiste” yaannohu iseraati. (2 Ximootewosi 4:18, NW) Maganu Mangiste noohu iima ikkirono, uulla gashshitanno.—Ajuu[j]a 11:15.

6, 7. Yesuusa baxxino Nugusa assannosihu maati?

⁶ Yesuusa baxxino Nugusa assannosihu maati? Umihunni, isi horonta direyanno. Qullaawu Maxaafi iso uullate gashshaano ledo heewisiise togo yaanno: “Reyannokkihu iso callaati; ayino gamba yaara dandaannokki xawaabbira heeˈranno.” (1 Ximootewosi 6:16) Togo yaa qolte, Yesuusi assannohu danchu coyi baalunku hegereho yaate. Addaho, isi mannisira danchanna horoomanno coye assanno.

⁷ Yesuusire kultannota aante noo masaalo wodanchi: “Isi aana Yihowa ayyaani galanno; hayyotenna wodanchate ayyaani, amaaletenna wolqate ayyaani, hattono egennotenna Yihowa waajjate ayyaani galannosi; qoleno Yihowa waajjatenni tashshi yaannosi. Illesi laˈu gede difaradanno; maccasi  macciishshitu gede diborooranno. Mishantinorira xalalletenni faradanno; uullate rambaootirano taashshe faradanno.” (Isayyaasi 11:2-4) Tini xiqise Yesuusi uullate noo mannira keeraanchonna shaqqado Nugusa ikkannota xawissanno. Togoo nugusi gashshannoheta baxatto?

8. Yesuusi ledo gashshitannori ayeooti?

⁸ Maganu Mangiste lainohunni xaano wolu halaale ikkinori no: Yesuusi gashshannohu dicallasiiti. Ledosi gashshitannorino no. Lawishshaho, hawaariya Phaawuloosi Ximootewosi togo yiino: “Cincine kaajjinummoro, qollenni isi ledo moonkeemmo.” (2 Ximootewosi 2:12) Phaawuloosi, Ximootewosinna Maganu doorinori wolootu ammanantinori Yesuusi ledo iimi Mangistera mookkanno. Tenne baxxitino kaayyo afidhannori meˈˈe mannaati?

9. Yesuusi ledo moohanno manni meˈˈeho? Maganu insa doora jammarinohu mamarooti?

⁹ Konni maxaafira fooliishsho 7 aana xawinsoonninte gede, hawaariya Yohaannisi mitte ajuujasira “Maganu Geˈrechchi Yesuusi [Kiristoosi] Tsiyooni ilaali aana uurre [iima nugusimmate bayichchosi adhe] heeˈreenna” laino; qoleno ‘suˈmasinna Annisi suˈma albinsara borreessinoonniri xibbunna shoyilliina shoolu kumi manni [Yesuusi] ledo noota’ laino. Kuri 144,000 manni ayeooti? Yohaannisi umisi togo yee kulannonke: ‘Insa Geˈrechcho ikkinohu Yesuusi haˈrannowa baalawa hoodesi hadhannoreeti. Maganohonna Geˈrechchisira bayiradda ikkitanno gede mannu giddonni wodantinoreeti.’ (Ajuu[j]a 14:1, 4) Kuri ammanantinori Yesuusi Kiristoosi harunsaano, iima isi ledo gashshitara bande doorroonnireeti. Reyotenni kaˈe iimira hadhu gedensaanni, ‘uullate aana [nugussa ikkite Yesuusi ledo] mookkanno.’ (Ajuu[j]a 5:10) Maganu 144,000 manni kiiro wonshate, hawaariyaatete yannanni jammare ammanamino Kiristaana dooranni keeshshino.

10. Yesuusanna 144,000 manna mannu ooso gashshitara doora Yihowa baxille leellishshanno yineemmohu mayiraati?

¹⁰ Yihowa Yesuusanna 144,000 manna mannu ooso gashshitanno  gede assinohu ninke lowo geeshsha baxannonkehuraati. Umihunni, Yesuusi manna ikkanna qarrama yaa hiittootiro afino. Phaawuloosi Yesuusire coyiˈranni togo yiino: ‘Isi daafurinke yannara mararannonkehonna ninkente gede duuchchunku coyinni fattanaminoho; ikkollana mitto cubbono diloosino.’ (Ibiraawuyaani 4:15; 5:8) Isi ledo gashshitannorino manna ikkite heedhino waro lowo qarri iilleennansa cincite saˈinoreeti. Qoleno, guuntete xeˈnenni mitiiˈmitinoreeti; hattono duuchchu dani xiwani ledo sharrantinoreeti. Konni daafira mannu oosora iillanno qarra seekkite huwattanno!

11. Maganu Mangiste, Maganu fajjo iima ikkitanno gede assa hasiissinosehu mayiraati?

¹¹ Yesuusi Maganu Mangiste dagganno gede huucciˈra hasiissannonsata rosaanosira kuli wote, Maganu fajjo ‘iima ikkitinonte gede uullano ikkitanno’ gede huucciˈra hasiissannonsatano coyiˈrino. Maganu noohu iimaati; qoleno ammanantino sokkaanosi iima isi fajjo assitanni no. Ikkollana konni maxaafira sayikki fooliishshora ronsummonte gede, mittu bushu sokkaanchi Maganu fajjo assa agure Addaaminna Heewani soˈrisiisino. Sheexaane Daawuloosi yinanniha konne busha sokkaancho lainohunni Qullaawu Maxaafi rosiisannore albaange fooliishsho 10 aana halashshine ronseemmo. Sheexaanunna agaanintete yinanniri iso harunsitinori busha sokkaasine shiima yanna iima heedhara agurroonni. Konni daafira iima noohu baalu hakkawaro Maganu fajjo assanni no yaa diˈˈikkino. Maganu Mangiste gashsha jammartanno yannara kuni coyi soorramanno. Hatte yannara haaru Nugusi Yesuusi Kiristoosi, Sheexaanu ledo olamanno.—Ajuu[j]a 12:7-9.

12. Ajuu[j]a 12:10 aana xawinsoonnihu lamu qaru coyi maati?

¹² Aane noohu masaalote qaali mayi ikkannoro kulanno: ‘Lowo huuro iiminni togo yitanna macciishshummo: “Kuneeti gatisanna wolqa, gashshootuno Maganunniha ikkino!  Silxaaneno Maganu buurinohunnita Kiristoosita ikkitino! Korkaatuno roduuwanke Maganu albaanni barranna hashsha kassasannohu roduuwinke kassasaanchi tugaminona.”’ (Ajuu[j]a 12:10) Tenne Qullaawu Maxaafi xiqisera qummi assinoonniha lame qara coye wodanchitto? Umihunni, Yesuusi Kiristoosi Nugusa ikkinoti Maganu Mangiste gashsha jammartanno. Layinkihunni, Sheexaanu iiminni uullara tugamanno.

13. Sheexaanu iiminni tugamino daafira mayi maikkino?

¹³ Kuni lamu coyi mayi maikkanno gede assino? Qullaawu Maxaafi iima ikkinore kulanni togo yaanno: ‘Konnira iimanna giddosi heedhinanniri baalunku hagiidhe!’ (Ajuu[j]a 12:12) Addaho iima nooti ammanantino sokkaano lowo geeshsha hagiidhitino; korkaatuno Sheexaanunna agaaninte layinkita iima heedhannokki daafira iima noohu baalu Maganinke Yihowara ammanaminoha ikkanno. Xaate iima woˈmu keerinna sumuu yaa heedhanno. Konni garinni xa Maganu fajjo iima ikkitanni no.

14. Sheexaanu uullara tugamasi maa abbitino?

¹⁴ Uullate aana mayi ikkiyya? Qullaawu Maxaafi togo yaanno: ‘Uullatenna baaraho kayinni bayisibao! Korkaatuno Sheexaanu shiima yanna gattinosita afe lowo hanqinni kiˈnewa dirrinona.’ (Ajuu[j]a 12:12) Sheexaanu iimini tugaminohuranna shiima yanna calla gattinosihura hanqino. Hanqino daafirano uullate aana qarra woyi ‘bayisibao’ abbino. Tenne ‘bayisibao’ lainohunni aantanno fooliishshora lende ronseemmo. Sheexaanu uullara tugame qarra naqino daafira, ‘Maganu Mangiste Maganu fajjo uullate aana ikkitanno gede assitannohu hiittoonniiti?’ yine xaˈminammora dandiineemmo.

15. Maganoho uullate noosi alaami maati?

¹⁵ Tenne buuxate, Maganoho uullate noosi alaami maatiro qaagi. Fooliishsho sasete konne coye ronsoommo. Maganu, uulla reyannokkihunna keeraano ikkino manni woˈmino gannate ikkitara alaamasi ikkinota Edenete xawisino. Sheexaanu Addaaminna Heewani cubbo loossanno gede assinohura,  Maganoho uullate noosi alaami woˈmikki keeshshino; ikkeennano kuni alaami disoorramino. ‘Keeraano uulla ragidhanno gedenna ise aanano hegerera heedhanno’ gede, Yihowara xaano alaamasiiti. (Faarso 37:29) Maganu Mangiste kuni alaami woˈmanno gede assitanno. Hiissite?

16, 17. Daanieeli 2:44, Maganu Mangistere maa kultannonke?

¹⁶ Daanieeli 2:44 aana noo masaalo lai. Togo yitanno: “Hattee nugussa yannara, iimi Magani horonta diigantannokki mangiste uurrisanno. Hatti mangiste wole dagara diuyinannite. Tini mangiste kuri mangistubba baala daakkanno hattono huntanno; ise kayinni hegerera uurritanno.” Tini xiqise Maganu Mangistere maa kultannonke?

¹⁷ Umihunni, Maganu Mangiste “hattee nugussa yannara” yaano wole mangistubba heedheenna uurritannota kultannonke. Layinkihunni, tini Mangiste hegerera heedhannota kultannonke. Yaano wolu gashshooti tenne mangiste diqeelanno; woyi ise bayichcho amadanno gashshooti diheeˈranno. Sayikkihunni, Maganu Mangistenna tenne alame mangistubba mereero olu heeˈrannota buunxeemmo. Konni oli yannara qeelle Maganu Mangisteta ikkitanno. Goofimarchoho, mannu ooso gashshitannoti ise calla ikkitanno. Hakkiinnino mannu ooso konni albaanni affe egentinokkihu woyyino gashshooti hunda hagiidhitanni heedhanno.

18. Maganu Mangistenna alamete gashshooti mereero kaˈˈannoha goofimarchu ola mayinanni?

¹⁸ Maganu Mangistenna alamete gashshooti mereero kaˈˈannoha goofimarchu ola lainohunni, Qullaawu Maxaafi lowore kulanno. Lawishshaho, goofimarchu shiqanno wote busha ayyaanna “uulla woˈmate nugussa” soˈrisiisate kaphphu totao bayichcho baala tuqissannota rosiisanno. Konne assitannohu mayiraati? Korkaatuno, ‘Duuchchanka Dandaanno Maganiha bayira barra ikkanno olira insa [yaano nugussa] gamba assateeti.’ Hakkawote uullate nugussa, “Ibiraayisxete afiinni Harmagedooni yinanni bayichcho” gamba yitanno. (Ajuu[j]a 16:14, 16, NW) Tenne lame xiqisenni huwanteemmonte gede, mannu gashshootinna  Maganu Mangiste mereero kaˈˈannoha goofimarchu ola Harmagedooni woyi Armagedooni yinanni.

19, 20. Maganu alaami uullate aana xa woˈmannokki gede assinohu maati?

¹⁹ Maganu Mangiste Armagedooni olinni maa qineessitanno? Hanni xaano Maganoho uullate noosi alaami maatiro hedi. Maganu Yihowa, keeraanonna guuta mannu ooso uulla woˈmite Gannatete isira soqqantara alaamu noosi. Kuni alaami xa woˈminokkihu mayiraati? Umihunni, ninke cubbaataammaho, xiwammeemmoreeti qoleno reyineemmoreeti. Ikkollana ontikki fooliishshora, hegerera heeˈneemmo faro fanankera Yesuusi reyinonketa ronsoommo. Aante noota Yohaannisi Wongeeli xiqise qaagittokki digatootto: ‘Isinni ammanannohu duuchchu hegere heeshsho afiˈranno gede ikkinnina, baˈˈannokki gede, Maganu mitto Beettosi reyote sayise aa geeshsha [alame] baxinona.’—Yohaannisi 3:16.

²⁰ Maganu alaami xa woˈminokkihu wolu korkaati, batinynyu manni bunshe assannoha ikkansaati. Duuchchu manni kaphphanno, coye wiranno, qoleno amanynyootu xeino coye assanno. Kuni manni Maganu fajjo assate dihasiˈranno. Bunshe assanno manni Maganu olinni yaano Armagedoonninni baˈˈanno. (Faarso 37:10) Wolu qarri kayinni, alamete mangiste mannu Maganu fajjo assanno gede jawaachchisha hoogansaati. Duuchcha mangiste xaa geeshsha mannu danchare assanno gede kakkayisa didandiitino; qoleno coqqontannorenna amanynyootu xeinore ikkite keeshshitino. Qullaawu Maxaafi xawise, “Mannu manna gashshinohu gawajjateeti” yaanno.—Mekibibi 8:9.

21. Maganu Mangiste alaamasi uullate aana wonshitannohu hiittoonniiti?

²¹ Armagedooni gedensaanni, mannu ooso gashshannohu mitto gashshoote calla ikkanno; hattino Maganu Mangisteeti. Tini Mangiste Maganu alaama wonshitanno; qoleno hagiirsiisanno atoote abbitanno. Lawishshaho, Sheexaanenna agaanintesi huntanno. (Ajuu[j]a 20:1-3) Yesuusi kakkalo afidhino wolqa hakkawote loossanno daafira, ammanantinori mannu ooso dixiwantanno; hattono direyitanno. Isinni hatte  Mangiste hunda mannu ooso hegerera heedhanno. (Ajuu[j]a 22:1-3) Uulla gannate ikkitanno. Konni daafira tini Mangiste Maganu alaami uullate aana woˈmanno gede assitanno; hattono Maganu suˈmi qullaawanno gede assitanno. Togo yaa mayyaate? Gedensaanni Maganu Mangiste hunda, lubbote noohu baalu Yihowa suˈma ayirrisanno yaate.

22. Yesuusi uulla noo waro ikko isi iimira haˈranni heeˈreennanni Maganu Mangiste dagginokkita mayinni anfeemmo?

²² Yesuusi harunsaanosira, ‘Mangistekki daggo’ yite huuccidhara kuli wote, hatti Mangiste dagginokkiti leeltanni no. Yesuusi iimira haˈri wote dagginoyyani? Didaggino; korkaatuno Pheexiroosinna Phaawuloosi, Faarso 110:1 aana noo masaalo Yesuusi reyotenni kai gedensaanni isi aana woˈmitinota coyidhino: “Yihowa Mootichchaˈya togo yii: ‘Diinnakki lekkakkira woroonni qolammo geeshsha, qiniiteˈyaanni ofolli.’” (Soqqamaanote Looso 2:32-35; Ibiraawuyaani 10:12, 13) Konni daafira Yesuusi shiima geeshsha agadha hasiissinosi.

23. (a) Maganu Mangiste gashsha jammartinohu mamooteeti? (b) Aante noo fooliishshora maa ronseemmo?

²³ Mageeshshi yanna agadhannoyya? Tonaa honsikkinna lemiikki sanira, wodana suwaddu Qullaawu Maxaafi rosaano Yesuusi agadhannohu 1914 geeshsha ikkinota buuxxino. (Konne diro lainohunni, qoola 215-218 aana noo Guwuursha lai.) Alamete aana 1914⁠nni jammarte noo ikkito, kuri Qullaawu  Maxaafi rosaano buuxxino coyi gara ikkinota buuxissanno. Qullaawu Maxaafi masaalo woˈmase, 1914⁠nni Kiristoosi Nugusa ikkinotanna Maganunniti iimi Mangiste gashsha jammartinota leellishshanno. Konni daafira xa heeˈnoommohu, Sheexaaneho gatte nootera ‘shiima yanna’ giddooti. (Ajuu[j]a 12:12; Faarso 110:2) Qoleno muli yanna giddo, mitte huluullo nookkiha Maganu Mangiste Maganu alaami uullate aana woˈmanno gede assitanno. Kuni hagiirsiisanno duduwo diˈˈikkino? Kuni halaale ikkinota ammanatto? Aante noo fooliishshora Qullaawu Maxaafi addinta konne coye rosiisannota huwatatto.