1. Ngumuphi umthandazo lobalulekile lesitawucoca ngawo?

TIGIDZI tebantfu emhlabeni tetayelene nemthandazo labanyenti labawubita ngekutsi nguBabe Wetfu nobe nguMthandazo weNkhosi. Kokubili loku labakushoko, kumane nje kubhekisele emthandazweni losibonelo lodvumile lowashiwo nguJesu Khristu matfupha. Lokushiwo ngulomthandazo kubalulekile, futsi kufundza ngeticelo tawo letintsatfu tekucala kutakusita kwengeteke lokwatiko mayelana naloko lokufundziswa liBhayibheli.

2. Ngutiphi tintfo letintsatfu Jesu latsi balandzeli bakhe abatithandazele?

² Ekucaleni kwalomthandazo losibonelo, Jesu wafundzisa labebamlalele: “Nanithandazako nibotsi: ‘Babe wetfu losezulwini, alingcweliswe libito lakho. Umbuso wakho awute. Intsandvo yakho ayentiwe emhlabeni, njengobe yentiwa ezulwini.’” (Matewu 6:9-13) Tibaluleke ngani leticelo letintsatfu?

3. Yini lokufanele siyati ngeMbuso waNkulunkulu?

³ Kuze kube ngunyalo, sesifundze lokunyenti ngelibito laNkulunkulu lelitsi, Jehova. Sesicocile ngenjongo yaNkulunkulu—loko lakwentile naloko lasetakwentela bantfu. Kodvwa Jesu abesho kutsini nakatsi sithandaze sitsi: “Umbuso wakho awute”? Uyini uMbuso waNkulunkulu? Kuta kwawo  kutalingcwelisa njani libito laNkulunkulu? Kuta kweMbuso kuhlangene ngani nekwenta intsandvo yaNkulunkulu?

4. Uyini uMbuso waNkulunkulu, futsi ngubani iNkhosi yawo?

⁴ Umbuso waNkulunkulu nguhulumende lomiswe nguNkulunkulu Jehova loneNkhosi layikhetsile. Ngubani iNkhosi yeMbuso waNkulunkulu? NguJesu Khristu. Jesu njengeNkhosi mkhulu kwendlula bonkhe babusi lababantfu futsi ubitwa ngekutsi “INkhosi yemakhosi neMbusi webabusi.” (1 Thimothi 6:15) Unemandla ekwenta lokuhle kakhulu kwendlula nobe ngabe ngumuphi umbusi, ngisho nobe angaba ncono kanjani.

5. UMbuso waNkulunkulu utawubusa ukuphi, futsi ubuse etikwani?

⁵ Utawubusa ukuphi uMbuso waNkulunkulu? Kantsi Jesu vele yena ukuphi? Khumbula, wafundza ngekutsi wabulawa elugodvweni lekuhlushwa, kodvwa wavuswa. Ngemuva kwaloko, wenyukela ezulwini. (Imisebenti 2:33) Ngako-ke, ngulapho uMbuso waNkulunkulu ukhona khona. Kungako liBhayibheli liwubita ngekutsi ‘nguMbuso wasezulwini.’ (2 Thimothi 4:18) Nobe nje uMbuso waNkulunkulu usezulwini, utawubusa etikwemhlaba.—Sembulo 11:15.

6, 7. Yini leyenta Jesu abe yiNkhosi lekhetseke kakhulu?

⁶ Yini leyenta Jesu abe yiNkhosi lekhetseke kakhulu? Sizatfu sekucala kutsi angeke nanini aze afe. LiBhayibheli nalicatsanisa Jesu nebabusi lababantfu litsi “nguye yedvwa longabhubhi lohlala ekukhanyeni lekungasondzeleki kuko.” (1 Thimothi 6:16) Loko kusho kutsi konkhe lokuhle Jesu lakwentako kutawuba khona siphelane, futsi utawenta tintfo letinkhulu letinhle.

⁷ Ase ucabange nganasi siphrofetho seliBhayibheli lesimayelana naJesu: ‘Umoya waSimakadze [Jehova] uyawubasetikwakhe, umoya wekuhlakanipha newekucondza, umoya wekweluleka newemandla, umoya welwati newekwesaba Simakadze, uyawutijabulisa ekwesabeni Simakadze. Angeke  ehlulele ngalakubona ngemehlo akhe, nome ente sincumo ngalakuve ngetindlebe takhe; kodvwa labeswele uyawubehlulela ngekwemtsetfocotfo, labamphofu belive abehlulele ngekungakhetsi.’ (Isaya 11:2-4) Lamavi akhombisa kutsi Jesu abetawuba yiNkhosi lelungile futsi leneluvelo kubantfu. Ungatsandza yini kutsi ube nembusi lonjengaJesu?

8. Bobani labatawubusa naJesu?

⁸ Nali lelinye liciniso ngeMbuso waNkulunkulu: Jesu angeke abuse yedvwa, utawubusa kanye nalabanye. Sibonelo saloku kutsi umphostoli Pawula watjela Thimothi: “Nasicinisela, siyawubusa kanye naye.” (2 Thimothi 2:12) BoPawula naThimothi, kanye nalabanye labetsembekile labakhetfwa nguNkulunkulu batawubusa naJesu eMbusweni wasezulwini. Bangakhi labatawutfola lelo lungelo?

9. Bangakhi labatawubusa naJesu, futsi Nkulunkulu wacala nini kubakhetsa?

⁹ Njengobe kuvetiwe eSehlukweni 7 salencwadzi, umphostoli Johane waniketwa umbono, kuwo wabona ‘liWundlu [Jesu Khristu] eNtsabeni yaseSiyoni [indzawo yakhe yebukhosi ezulwini] lime nebantfu labangu-144 000, babenelibito lalo, neleYise libhalwe emabuntini abo.’ Babobani laba labangu-144 000? Johane ngekwakhe uyasichazela: “Ngibo laba labalandzela liWundlu nome kukuphi lapho liya khona. Kubo bonkhe bantfu ngibo labahlengiwe, balulibo lwaNkulunkulu nelweliWundlu.” (Sembulo 14:1, 4) Babalandzeli labetsembekile nalabakhetsekile baJesu Khristu labakhetfwe kutsi bayewubusa naye ezulwini. Ngemva kwekuvuselwa ekuphileni kwasezulwini, “baba ngemakhosi nebaphristi . . . etikwemhlaba wonkhe” kanye naJesu. (Sembulo 5:10) Kusukela esikhatsini sebaphostoli, Nkulunkulu abesolo akhetsa emaKhristu letsembekile kute atewuphelelisa lenombolo lengu-144 000.

10. Kungani kulilungiselelo lelutsandvo kutsi Jesu kanye nalabangu-144 000 babuse bantfu?

¹⁰ Lilungiselelo lekutsi Jesu kanye nalabangu-144 000 babuse  bantfu, libonisa lutsandvo lwaNkulunkulu. Jesu wativela kutsi kunjani kuba ngumuntfu kanye nekuhlupheka emhlabeni. Pawula watsi Jesu “akasiye lowehluleka kuvumelana natsi ebutsakatsakeni betfu, kodvwa walingwa ngayo yonkhe indlela njengatsi, noko akazange one.” (Hebheru 4:15; 5:8) Labo labatawubusa naye nabo bahlupheka futsi bacinisela. Ngetulu kwaloko, balwisana nekungapheleli futsi babeketelela tonkhe tinhlobo tekugula. Bataticondza sibili tinkinga bantfu lababa nato.

11. Kungani Jesu atsi bafundzi bakhe bathandazele kutsi intsandvo yaNkulunkulu yentiwe emhlabeni njengasezulwini?

¹¹ Ngesikhatsi Jesu atsi kubafundzi bakhe kufanele bathandazele kutsi uMbuso waNkulunkulu ufike, waphindze watsi kufanele bathandazele nekutsi intsandvo yaNkulunkulu yentiwe “emhlabeni, njengobe yentiwa ezulwini.” Nkulunkulu usezulwini, futsi tingilosi letetsembekile tiyayenta intsandvo yakhe ezulwini. ESehlukweni 3 salencwadzi, sifundze kutsi ingilosi lembi yayekela kwenta intsandvo yaNkulunkulu futsi yabangela bo-Adamu na-Eva kutsi bone. ESehlukweni 10 sitawufundza kabanti ngekutsi lifundzisani liBhayibheli ngalengilosi lembi, lesiyati ngekutsi nguSathane Develi. Sathane netingilosi letakhetsa kumlandzela—letibitwa ngekutsi ngemadimoni—bavunyelwa kutsi bahlale ezulwini sikhashana. Ngaloko-ke, akusibo bonkhe ezulwini labebenta intsandvo yaNkulunkulu. Loko bekutawushintja nasekucale kubusa uMbuso waNkulunkulu. INkhosi lesandza kubekwa, Jesu Khristu, beyitawususa imphi yayo, ilwe naSathane.—Sembulo 12:7-9.

12. Ngutiphi tentakalo letimbili letibalulekile letichazwe kuSembulo 12:10?

¹² Lamavi lasiprofetho lalandzelako achaza lokwakutakwenteka: “Ngeva livi lelikhulu ezulwini litsi: ‘Nyalo insindziso, nemandla, nebukhosi sekwaNkulunkulu wetfu, neligunya  selaKhristu wakhe; ngobe sewulahlelwe phansi ummangaleli [Sathane] lomangalela bazalwane betfu kuNkulunkulu, imini nebusuku.’” (Sembulo 12:10) Utinakile yini tentakalo letimbili letibalulekile letichazwe kulelivesi? Sekucala, uMbuso waNkulunkulu loholwa nguJesu Khristu ucala kubusa. Sesibili, Sathane uyacoshwa ezulwini futsi ulahlelwa phansi emhlabeni.

13. Waba yini umphumela wekucoshwa kwaSathane ezulwini?

¹³ Waba yini umphumela waletentakalo letimbili? Ngalokuphatselene nalokwenteka ezulwini, siyafundza: “Tfokotani-ke, nine mazulu, nani lenihlala kuwo!” (Sembulo 12:12) Yebo, tingilosi letetsembekile ezulwini tiyatfokota, tonkhe letisele tetsembekile kuNkulunkulu Jehova njengobe Sathane nemadimoni akhe bangasekho. Kunekuthula lokukhulu kanye nebunye lobuphelele. Intsandvo yaNkulunkulu iyenteka ezulwini.

14. Yini lebangelwe kulahlelwa kwaSathane emhlabeni?

¹⁴ Kutsiwani-ke ngemhlaba? LiBhayibheli litsi: “Maye kuwe, mhlaba nelwandle, ngobe Mhlebi [“Develi,” NW] sewehlele kini ngentfukutselo lenkhulu, ngobe uyati kutsi sikhatsi sakhe sifishane!” (Sembulo 12:12) Sathane utfukutsele uyabila njengobe acoshiwe ezulwini futsi asalelwe sikhatsi lesincane. Ngentfukutselo yakhe ubangela lusizi nobe “maye” emhlabeni. Sitawufundza kabanti ‘ngalomaye’ esehlukweni lesilandzelako. Kodvwa sinaloko engcondvweni, singahle sitibute kutsi, LoMbuso utakwenta njani kutsi intsandvo yaNkulunkulu yentiwe emhlabeni?

15. Iyini injongo yaNkulunkulu ngemhlaba?

¹⁵ Khumbula kutsi iyini injongo yaNkulunkulu ngemhlaba. Ufundzile ngayo eSehlukweni 3. E-Edeni, Nkulunkulu wabonisa kutsi injongo yakhe kutsi lomhlaba ube lipharadisi leligcwele bantfu labangafi nalabalungile. Sathane wenta kutsi bo-Adamu na-Eva bone, futsi loko kwatsikameta kugcwaliseka kwenjongo yaNkulunkulu, kodvwa akuzange kuyishintje.  Jehova solo uhlose kutsi ‘labalungile badle lifa lemhlaba, bahlale kuwo kuze kube phakadze.’ (Tihlabelelo 37:29) UMbuso waNkulunkulu utakwenta loko. Njani?

16, 17. Danyela 2:44 usitjelani ngeMbuso waNkulunkulu?

¹⁶ Cabanga ngaloko lokushiwo siphrofetho lesitfolakala kuDanyela 2:44. Siyafundza: “Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.” Kusitjelani loku ngeMbuso waNkulunkulu?

¹⁷ Kwekucala, kusitjela kutsi uMbuso waNkulunkulu wawutawumiswa “ngesikhatsi salawo makhosi,” nobe nakusabusa leminye imibuso. Kwesibili, kusitjela kutsi loMbuso utawuhlala phakadze. Angeke ubhujiswe lutfo futsi angeke utsatselwe sikhundla ngulomunye hulumende. Kwesitsatfu, siyabona kutsi kutawuba nemphi emkhatsini weMbuso waNkulunkulu nemibuso yalelive. UMbuso waNkulunkulu utawuncoba. Ekugcineni, kutawuba ngiwo wodvwa hulumende lobusa bantfu. Ngako-ke, bantfu batawujabulela kubuswa lokuhle labangazange sebakubone.

18. Ibitwa ngekutsi yini lemphi yekugcina lesekhatsi kweMbuso waNkulunkulu nabohulumende balelive?

¹⁸ Kunyenti lokushiwo liBhayibheli ngemphi lesekhatsi kweMbuso waNkulunkulu nabohulumende belive. Nasi sibonelo: LiBhayibheli lifundzisa kutsi njengobe kuphela kusondzela, imimoya yemadimoni itawusakata emanga kute iyenge “emakhosi emhlaba wonkhe.” Ngayiphi injongo? ‘Kute iwalungiselele imphi yelilanga lelikhulu laNkulunkulu, Somandla.’ Emakhosi emhlaba ayawubutselwa ndzawonye “endzaweni lekutsiwa yi-Amagedoni ngesiHebheru.” (Sembulo 16:14, 16) Ngalokushiwo ngulamavesi lamabili, imphi yekugcina emkhatsini wabohulumende bebantfu neMbuso waNkulunkulu ibitwa ngekutsi yi-Amagedoni.

19, 20. Yini levimbela intsandvo yaNkulunkulu kutsi yenteke emhlabeni nyalo?

 ¹⁹ Yini uMbuso waNkulunkulu loyoyiphumelelisa nge-Amagedoni? Khumbula futsi kutsi iyini injongo yaNkulunkulu ngemhlaba. Nkulunkulu Jehova uhlose kutsi umhlaba ube liPharadisi ugcwale bantfu labalungile, labaphelele nalabakhonta yena. Yini levimbela loko kutsi kwenteke nyalo? Kwekucala, sinesono, siyagula futsi siyafa. Nobe kunjalo, sifundzile eSehlukweni 5 kutsi Jesu wasifela kute sitfole kuphila lokuphakadze. Kungenteka kutsi uyawakhumbula emavi labhalwe eVangelini laJohane: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.”—Johane 3:16.

²⁰ Lenye inkinga kutsi bantfu benta tintfo letimbi. Bacala emanga, bayakhohlisa futsi bayisebentisa kabi imitimba yabo. Abafuni kwenta intsandvo yaNkulunkulu. Bantfu labenta tintfo letimbi batawubhujiswa emphini yaNkulunkulu i-Amagedoni. (Tihlabelelo 37:10) Lesinye sizatfu lesenta kutsi intsandvo yaNkulunkulu ingentiwa emhlabeni, kutsi bohulumende ababakhutsati bantfu kutsi bayente. Bohulumende labanyenti abanawo emandla ekwenta lokuhle, banelunya futsi bakhohlakele. LiBhayibheli likhuluma licondze: “Umuntfu usuke atihlisibete etikwalabanye kantsi utilimata yena.”—Umshumayeli 8:9.

21. Yini uMbuso loyoyenta kute intsandvo yaNkulunkulu yentiwe emhlabeni?

²¹ Ngemuva kwe-Amagedoni, bantfu batawubuswa nguhulumende munye, uMbuso waNkulunkulu. LoMbuso lowo utakwenta intsandvo yaNkulunkulu futsi uletse tibusiso letimangalisako. Nasi sibonelo: Utawususa Sathane nemadimoni akhe. (Sembulo 20:1-3) Emandla emhlatjelo waJesu wesihlengo atawusetjentiswa kute bantfu labetsembekile bangaphindze bagule futsi bafe. Kunaloko, nasekubusa lowoMbuso bayokwati kuphila phakadze. (Sembulo 22:1-3) Umhlaba  utawuba lipharadisi. Ngemva kwaloko loMbuso utakwenta kutsi intsandvo yaNkulunkulu yentiwe emhlabeni uphindze ungcwelise libito laNkulunkulu. Kusho kutsini loko? Kusho kutsi ekugcineni nakubusa uMbuso waNkulunkulu, wonkhe umuntfu lophilako uyodvumisa libito laJehova.

22. Sati njani kutsi uMbuso waNkulunkulu awucalanga kubusa ngalesikhatsi Jesu alapha emhlabeni nobe ngemuva nje kwekufika kwakhe ezulwini?

²² Ngalesikhatsi Jesu atjela balandzeli bakhe kutsi bathandaze batsi, “UMbuso wakho awute,” kwaba sebaleni kutsi uMbuso wawungakefiki ngaleso sikhatsi. Wefika yini ngalesikhatsi Jesu abuyela ezulwini? Cha, ngobe boPhetro naPawula batsi, ngemuva kwekuvuswa kwaJesu, siphrofetho lesisencwadzini yeTihlabelelo 110:1 sasigcwaliseke kuye: “Simakadze watsi enkhosini yami: ‘Hlala lapha ngesekudla sami, ngize ngifake titsa takho ngaphansi kwetinyawo takho.’” (Imisebenti 2:32-35; Hebheru 10:12, 13) Loku kwakhombisa kutsi kwakuyodzingeka alindze sikhatsi lesitsite.

23. (a) Wacala nini kubusa uMbuso waNkulunkulu? (b) Sitawufundza ngani esehlukweni lesilandzelako?

²³ Abetawulindza sikhatsi lesingakanani? Ngelikhulu lesi-19 nelesi-20 leminyaka, bafundzi beliBhayibheli labetsembekile batfola kutsi abeyolindza kuze kube ngu-1914. (Kute utfole lwati lolunyenti ngalokuphatselene nalomnyaka, fundza Sandzisanchazo emakhasini 215-18.) Lokwenteka kusukela nga-1914 kwafakazela kutsi labafundzi labetsembekile  beliBhayibheli bakucondza kahle loko kwakuyowenteka. Kugcwaliseka kwetiphrofetho teliBhayibheli, kukhombisa kutsi nga-1914, Khristu waba yiNkhosi futsi uMbuso waNkulunkulu wasezulwini wacala kubusa. Kulesikhatsi lesiphila kuso, Sathane usalelwe ‘sikhatsi lesifishane.’ (Sembulo 12:12; Tihlabelelo 110:2) Singasho sicinise kutsi madvutane nje uMbuso waNkulunkulu utawubangela kutsi intsandvo yakhe yentiwe emhlabeni. Uyatijabulela yini letindzaba? Uyatikholwa yini kutsi tiliciniso? Sehluko lesilandzelako sitakusita ubone kutsi liBhayibheli vele liyafundzisa ngaloku.