1. Ani ailipasit naejenara naibuni oni aingic?

IMILIONIN luka itunga kakwap kere ejenete ailip naenyaritos luipu kwape Ailipasit naka Papakosi, araibo Ailipasit naka Ejakait. Alimununeta ngun kere itodiaritos ailipasit naejenar noi naejaikinit Yesu Kristo elopet kwape aanyunet. Erai ailipasit na naejai apoul noi, ido aisisia akiro ke auni nuegeete epedorete aingarakin oni ajenun nuisisianakini cut Ebaibuli.

2. Inyoika iboro iuni kakiro luabu Yesu kisisianak ikesisiak ailipenen?

² Kageunet naka ailipasit kana, abu Yesu kicorak apupok ke ebe: “Aso kilipenenete yesi kwanata: ‘Papakosi loejai toma akuj, Ekonikiror kitalaunai. Akonijakanut kobu. Nuikoto kiswamai kakwapin, Kwape iswamare kotoma akuj.’” (Matayo 6:9-13) Anyoin apolou nuka akiro kanu auni?

3. Anyoika bo nuibusakinit oni ajenun nuikamunitos Ajakanut naka Edeke?

³ Idau oni aisisia nuipu nuikamunitos ekiror loka Edeke, Yawe. Ido da, idau oni aitetem ace nuikamunitos akote naka Edeke​—nuadau ngesi aswam ka nuebuni aswam kanuka itunga. Konye anyoika nualosikinit Yesu ne alimokina ngesi oni ailip: “Akonijakanut kobu”? Anyoin bo Ajakanut naka Edeke? Eipone bani italauna akebunore ekiror loka Edeke?  Ido epone bani erucokinar abunore naka Ajakanut ka nuekoto Edeke kiswamaunos?

4. Anyoin bo Ajakanut naka Edeke, ido ingaibo Ekabakake?

⁴ Ajakanut naka Edeke nges apugan naitemokinit Edeke Yawe kingarenikite Ekabaka loeseunit Edeke. Ingai bo Ekabaka loka Ajakanut naka Edeke? Erai Yesu Kristo. Yesu kwape Ekabaka, epol adepar epugak lukakwap, ido enyaritai ngesi “Ekabaka loka ikabakan, Ejakait da loka ijaka.” (1 Timoteo 6:15) Ejaatar ngesi kede apedor aswam nuejokuka adepar edio tuganan loipugai kakwap, karaida loejok noi kakesi.

5. Aibo ipuga Ajakanut naka Edeke, ido ebuni aipuga bo inyo?

⁵ Aibo ebunio Ajakanut naka Edeke aipuga? Komoom ber ijo nu, aibo ejai Yesu? Iitunit ijo aisisia ebe aponi koarai Yesu kaikajakin okitoi, ido aponi kitajarunai ngesi. Kakaulo naedit, abu kodoka toma akuj. (Aswamisio 2:33) Kanukangun, ngina nges ejai Ajakanut naka Edeke​—kuju. Ngun enyaritor Ebaibuli nges ‘ajakanut naka akuj.’ (2 Timoteo 4:18) Karaida ejai Ajakanut naka Edeke toma akuj, ebuni aipuga akwap kere.​—Apukokinio 11:15.

6, 7. Inyo einakinit Yesu erai Ekabaka loetengelikina?

⁶ Inyo einakinit Yesu erai Ekabaka loitengelikina? Kanu naarai mam ngesi etwani bobo cut. Aitirian Yesu kede ikabakan lukakwap, enyarit Ebaibuli ngesi “lobon ejai amamus atwanare, loiboie toma aica namam edolokinio.” (1 Timoteo 6:16) Akepolou ebe nuejokuka kere nuebuni Yesu aswam, mam anangete. Ebuni ngesi aswam iboro luepolok ido kojokuka da.

⁷ Koany adwarasit naka Ebaibuli naikamunit Yesu: “Iboie emoyo loka EJAKAIT kaŋes, emoyo loka acoa ka ajenun, emoyo loka ainerun ka agogoŋ, emoyo loka aijen ka ayoŋit EJAKAIT; Isiyalamikinit ayoŋit EJAKAIT. Mam etubokini  kwape eanyuniata akekonye, Karaida aitoron kwape epupioto akeki: Konye etubokini lukican kadolit, Itoroni kaitenara luitasonos kakwap.” (Isaia 11:2-4) Itodunitos akiro ngun ebe eraun Yesu ekabaka loedolit ido kojaasi kaitim naepol mama ejaasi itunga luka akwap. Ikoto ijo epugan loikoni kwape kangol?

8. Lubo angai epote aipuga nepepe ka Yesu?

⁸ Ace abeit bobo na naikamunit Ajakanut naka Edeke: Mam Yesu ebuni aipuga bon. Ejaasi luipugaete kangesi. Kwape aanyunet, abu ekiyakia Paul kolimok Timoteo ebe: “Arai kititiŋikini, kirumi da nepepe kaŋes.” (2 Timoteo 2:12) Eebo, Paul, Timoteo, ka ice lumunon lueseunit Edeke, epote aipuga nepepe ka Yesu kotoma Ajakanut nakokuj. Imwasai bo ejaasi kede arereng ngin?

9. Imwasai bo ebunet aipuga nepepe ka Yesu, ido iwori ageunia Edeke aseunun kesi?

⁹ Kwape itodinunitere kosula 7 koitabo kalo, aponi kijaikinai ekiyakia Yokana aitapoet nabu ngesi koanyunia “Imerekek [Yesu Kristo] ebwoi komoru Sion [adoketait ke naebuses kotoma akuj], ka ituŋa ilukumin akwatat ka akaisaoŋon ka luoŋon nepepe kaŋes, luiwadikatai ekirorike, ka ekiror loka Papake oreetakec.” Lubo angai ngun 144,000? Elimokinit oni Yokana elopet ebe: “Ŋul kesi luetupito Imerekek kama elosi kere; ŋul kes lualakunio kotoma otuŋa araut araito nugeet nuka Edeke, ka nuka Imerekek.” (Apukokinio 14:1, 4) Eebo, eraas kesi atupitok lumunon luka Yesu Kristo lucut eseunitai aipuga ka ngesi kokuju. Akaulo naka aitajarun kesi kotoma atwanare adumun aijar naka okuju, epote kesi ‘aipuga kwape ikabakan kakwap.’ (Apukokinio 5:10) Ageun kapaarasia nuka ikiyakia, ajai Edeke aseununei Ikristayon lumunon kanu ailelebikin enaba loka itunga 144,000.

10. Kanukinyo eraar aitemokinet naka amina Yesu ka 144,000 aipuga itunga?

¹⁰ Aitemokin Yesu ka 144,000 aipuga itunga, erai amina  naepol noi. Nasodit, ejeni Yesu apolou naka araut etunganan ka aitor toma aiticinitoi. Ebala Paul ebe, Yesu mam erai “lomam epedori arieba nepepe kaoni akalanyanutuwok, konye lokecodunio kakiro kere ariaka kaoni, komam adiakar.” (Iburanian 4:15; 5:8) Luipugaete kangesi da apotu kiticanitos ido kongirikinitos kwape itunga. Aidokokin, autata kesi kede amamus adolit ido angirikisi adekasinei kere. Abeit, epote kesi amisikin atiokisio nuiterekina kaitunga!

11. Kanukinyo abalar Yesu ebe ibusakinit ekesisiak ailipenen ebe kiswamaun akote naka Edeke kokuju?

¹¹ Neabalar Yesu ebe ibusakinit ekesisiak ailipenen Ajakanut naka Edeke abunere, abu bobo ngesi kiyatakinite ebe, akot kesi ailip akote naka Edeke “kiswamai kakwapin, kwape iswamaere kotoma akuj.” Ejai Edeke kuju, ido iswamaenenete duc imalaikan lumunon akoteke kangina. Konye kwape apotu oni kesisiatar Kosula 3 koitabo kalo, abu emalaika lokaronon kojalak aswam akote naka Edeke kosodi ainakin Adam ka Keba adiakar. Kotoma Osula 10, ibuni oni aisisia nuipu nuisisianakini Ebaibuli nuikamunitos emalaika ngol lokaronon, loijeni oni kwape Satan Ekejodijodon. Satan ka imalaikan luapotu koseutu atupakin ngesi​—luenyaritai ajokin​—aponi kocamakinai aiboi kokuju apak naedit. Ageun kapakangin, mam lueboete kokuju kere eswamaete akote naka Edeke. Abeit ngun aijulakin neageuna Ajakanut naka Edeke aipuga. Ekabaka loitetet loaponi kisiboikinai oicolong, Yesu Kristo, abeit aitiji Satan.​—Apukokinio 12:7-9.

12. Inyoika iboro iarei luepolok luitetemitai kotoma Apukokinio 12:10?

¹² Akiro nuadwaritai nuetupakinete, itodunitos nuepote atakanun: “Kapup eporoto loepol kotoma akuj,loabala ebe, ‘Adol kwana aitajar, ka apedor, ka ajakanut naka Edekewok,  ka apolou naka Kristoke, naarai acakar loirupei iinacanawok [Satan], loirupei kes kakonyen nuka Edekewok, paaran ka akuare da.’” (Apukokinio 12:10) Iwanyunit ijo iboro iarei luepolok luitetemit ekokoro ngol loka Ebaibuli? Nasodit, Ajakanut naka Edeke naingarenikit Yesu Kristo ngesi ageu aipuga. Nakiyaret, aponi kocakunai Satan kokuju kiton kwap.

13. Anyoika nuapotu kotakanutu akaulo nacakunere Satan kokuju?

¹³ Anyoika nuapotu kotakanutu kanuka akiro angun aarei? Nuikamunitos nuapotu kotakanutu kokuju, isiomi oni ebe: “Kanuka ŋun, kolel, ijo akuj, ka yes da luiboiete kotomake!” (Apukokinio 12:12) Eebo, elelete imalaikan kere lumunon lukokuju naarai, aponi kocakunai Satan ka akejokin, ido luejaasi kuju kere emunokina Edeke Yawe. Ejai kwana ainapakina naepol ka aimorikikina namam edaun ngina. Iswama do kwana akote naka Edeke kokuju.

14. Anyoika nueswamaunos naarai acakun Satan toma akwap?

¹⁴ Ido bodo akwap? Ebala Ebaibuli ebe: “Itukwi akwap ka aŋolol, naarai ejesun ekejodijodon mamakus, ejai kanyunyura naepol, naarai ejeni ebe edit akepak!” (Apukokinio 12:12) Enyunyura Satan noi kanu acakunere ngesi kokuju, ka ajaut kapak naedit. Kotoma anyunyurake, ayau ngesi ‘aiticanitoi naepol’ toma akwap. Ibuni oni aisisia nuipu nuikamunitos ‘aiticanitoi’ ngin kosula loetupakini. Akaulo najenun ngun, ipedori do oni aingit, epone ani einakina Ajakanut akote naka Edeke aiswamaun kotoma akwap?

15. Anyoin bo akote naka Edeke kanuka akwap?

¹⁵ Eebo, kiitu anyoin bo akote naka Edeke kanuka akwap. Abu ijo kisisiaunite ngun Kosula 3. Kotoma Eden, abu Edeke kitodunite ebe akoteke nges akwap na araun aparadais nailelebitos itunga luedolitos komam etwakete. Abu Satan koinak Adam ka Keba adiakar, ido abu ngin kisiyap aitodolikinio naka akote naka Edeke kanuka akwap, konye mam abu kijulak akote ngin. Eroko Yawe elosikinit ebe: “Irumete  ikadolitok akwap, ebusete kotoma ikar kere.” (Isabulin 37:29) Ido ebuni Ajakanut naka Edeke aitodolikin ngun. Koipone kani?

16, 17. Anyoika bo nu elimokinit oni Daniel 2:44 nuikamunitos Ajakanut naka Edeke?

¹⁶ Koany adwarasit naejai Daniel 2:44. Esioma kwanata: “Kapaarasia nuka ikabakan ŋul edakakini Edeke loka akuj ajakanut namam emudiario ikar kere, karaida airumuke ajalakinio ituŋa ice; konye ebilibilei emudiari da ajakanuto ŋun kere, ido kojaenena ikar kere.” Anyoika bo nu elimokitos nu oni kanu ikamunitos Ajakanut naka Edeke?

¹⁷ Nasodit, elimokitos oni ebe, egeuni Ajakanut naka Edeke aipuga “kapaarasia nuka ikabakan ngul” araibo eringa ajakanuto ace ipugaete. Nakiyaret, elimokitos oni ebe ebuni Ajakanut naka Edeke ajaenena ikar kere. Mam apugan ace ebuni aikamar araibo aburokin ngesi. Nauniet, iwanyuni oni ebe ejaun ejie kiding Ajakanut naka Edeke kede ajakanuto nuka akwap kana. Ebuni Ajakanut naka Edeke aipikor ajakanuto ace kere. Kawasia, nges bon erauni apugan naipugai itunga kere. Epote do itunga alelakin epugae lomam lem kes eanyunitotor.

18. Enyoin ekiror enyaritai ejie lokawasia kiding Ajakanut naka Edeke kede ajakanuto nuka akwap?

¹⁸ Ipu akiro nuinera Ebaibuli nuikamunitos ejie lokawasia kiding Ajakanut naka Edeke kede ajakanuto nuka akwap kana. Kwape aanyunet, isisianakini ebe naeyapuna awasia, epote imoyon lukaronok aisiarakin aingal kanu aingalingal “ikabakan luka akwapin kere.” Inyoin bo alosikinet kec? “Atukonokin kes [ikabakan] ojie loka apaaran nakapolon naka Edeke Lokapedor kere.” Etukonokinio ikabakan luka akwap nepepe “aibois naenyaritai kAburanian Arumagedon.” (Apukokinio 16:14, 16) Kanu ineritai kotoma okokoron lu iarei, enyaritai ejie lokawasia kiding Ajakanut naka Edeke kede ajakanuto nuka itunga, ejie loka Arumagedon.

19, 20. Kanukinyo mam akote naka Edeke iswamaar kwana kotoma akwap?

 ¹⁹ Anyoika nuebuni Ajakanut naka Edeke aitodolikin kotoma ojie loka Arumagedon? Kiitu ber bobo ijo nuikamunitos akote naka Edeke kanu akwap? Alosikinit Edeke Yawe ti akwap kere araun eparadais kirumitos itunga luedolitos luijanakinete ngesi. Kanukinyo mam ngun iswamatar kwana? Nasodit, irai oni lukadiakanarak, idekanakin katwakete da. Konye kwape kisisiator oni Kosula 5, abu Yesu kotwanik oni tetere oni ipedori adumun aijar naka ikar kere. Aticepak iitunit ijo akiro nuiwadikatai Ojiri loka Yokana: “Komina Edeke akwapin kwanata, abu koinak Okokuke loteluna, tetere ŋinituŋanan yeniyuuni ŋes kinye aolior, konye kojaas kaijar naka ikar kere.”​—Yokana 3:16.

²⁰ Acetionis nges na ebe, ipu itunga luiswamaete iboro lukarokok. Ingalaete, ekokoete, ido eyelosi. Mam kesi ekotosi aswam akote naka Edeke. Emudiaro itunga luiswamaete iboro lukarokok kotoma ojie loka Edeke loka Arumagedon. (Isabulin 37:10) Acekirot bobo namam akote naka Edeke iswamaar kwana kotoma kakwap nges na ebe mam ajakanuto isinyikonitos itunga aswam ngun. Ajakanuto luipu mam ipugaete ejok, eyarete itunga, ido komam emunoko da. Ebala Ebaibuli cut ebe: “Naeyaitor etuŋanan ediopet loce aiswamaikin ŋes aronis.”​—Ekalimonokinan 8:9.

21. Eipone bani einakina Ajakanut naka Edeke akoteke aiswamaun kotoma akwap?

²¹ Akaulo naka Arumagedon, epote itunga kere ajaun kwap naka apugan adiopet, Ajakanut naka Edeke. Ebuni Ajakanut ngin aswam akote naka Edeke ka ayaun arerengusio nueumokina. Kwape aanyunet, ebuni alemar Satan ka ajokin ke. (Apukokino 20:1-3) Ebunio aitosom apedor naka alucet naka Yesu tetere itunga lumunon mam bobo edekanakinos ka atwanare. Konye, kotoma apugan naka Ajakanut, epote do kesi aijar ikar kere. (Apukokinio 22:1-3) Eraun akwap kere eparadais. Eebo, ebuni Ajakanut  ainakin akote naka Edeke aiswamaun kotoma akwap ido ebuni aitalaun ekiror loka Edeke. Anyoin apolou kanu? Erai apoloukec ebe kokwap naka Ajakanut naka Edeke, nginitunganan kere yen ejari ebuni aiyogite ekiror loka Yawe.

22. Eipone bani ijenia oni ebe mam Ajakanut naka Edeke abunit neajaar Yesu akwap, araibo atipet kakaulo naka ajarun ke?

²² Nealimokina Yesu aketupitok ailip, “Akonijakanut kobu,” edelelei ebe mam ajakanut abunit kapak kangin. Biai, abu kobu neadokara Yesu toma akuj? Mam, naarai apotu Petero ka Paul kotemasi akaulo naetajarunere Yesu ebe, abu adwarasit naka Isabulin 110:1 kitodolikin kamakeng: “Abu EJAKAIT [Yawe] kotema ekajakait [Yesu] ebe: ‘Kiboikin akanika nakoteten aitodol naebwaikinia lukasurupokon kwap kakejenekon.’” (Aswamisio 2:32-35; Iburanian 10:12, 13) Kajai ber ti apak naka aidar.

23. (a) Iwori bo ageuna Ajakanut naka Edeke aipuga? (b) Anyoika akiro nuebunio aitetem kosula loetupakini?

²³ Adaun apak naetia ai? Kotoma okaru luka 1800 kiton ageunet naka ikaru 1900, apotu esisiak Ebaibuli luayinakina kojenutu ebe apak naka aidar ebuni anangakin okaru loka 1914. (Kanu ajenun ace nuikamunitos apaaran ngin, koany nuiyatakinitai apapulai 215-18.) Akiro nuapotu kotakanutu  kokaru 1914 kotoma akwap, itigogongitos ebe adolit teni aimar naka eisisiak Ebaibuli luayinakina. Aitodolikinio naka adwarasia nuka Ebaibuli itodunitos ebe kokaru 1914, abu Kristo koraun Ekabaka ido abu Ajakanut naka Edeke nakokuju kogea aipuga. Kanukangun, iboie oni kwana kotoma ‘apak naedit’ naideikina Satan. (Apukokinio 12:12; Isabulin 110:2) Ipedori bobo oni alimun komamei abuonokin ebe eyapie Ajakanut naka Edeke ageun aipuga, ainakin akote naka Edeke aiswamaun kotoma akwap. Mam lu teni eraasi iyemuto luejokak? Iyuunit ijo ebe eraasi nu nukabeit? Esula loetupakini ebuni aingarakin ijo aanyun ebe isisianakini teni Ebaibuli akiro nu.