8-нҗи бап

Худайың Патышалыгы нәме?

Мукаддес Язгылар Худайың Патышалыгы барада нәме өвредйәр?

Худайың Патышалыгы нәме эдер?

Патышалык Худайың ислегини ер йүзүнде хачан амала ашырар?

1. Биз хәзир хайсы дога середерис?

ИСА Месих ер йүзүндекә шәгиртлерине дога этмеги өвретди. Оңа нусгалык дога дийилйәр. Бу доганың чуң манысы бар. Ондакы илкинҗи үч дилегден, Мукаддес Язгыларың нәме өвредйәндигине хас говы дүшүнерис.

2. Исаның нусгалык догасы нәхили үч дилег билен башланяр?

² Иса Месих нусгалык догасыны шейле сөзлер билен башлады: «Шейле дога эдиң: «Эй гөклердәки Атамыз! Адың мукаддес болсун, Патышалыгың гелсин; Гөкде хем ерде Сениң ислегиң амала ашсын» (Матта 6:9—13, ТД). Бу үч дилег нәмәни аңладяр?

3. Худайың Патышалыгы барада нәме билмели?

³ Биз Ехова Худайың ады барада эййәм көп затлары билдик. Шейле-де онуң ислеги барада өврендик, Худайың адамлара эден ве этҗек затларына середип гечдик. Иса: «Сениң Патышалыгың гелсин» диенде, нәмәни гөз өңүнде тутдука? Худайың Патышалыгы нәме? Ол Худайың адыны нәдип мукаддес эдер? Худайың ислегиниң ерине етмегиниң, Патышалыгың гелмеги билен нәхили багланышыгы бар?

 ХУДАЙЫҢ ПАТЫШАЛЫГЫ НӘМЕ?

4. Худайың Патышалыгы нәме ве онуң Патышасы ким?

⁴ Худайың Патышалыгы — Ехованың беркарар эден хөкүмети. Бу Патышалыга Патыша эдип Худай кими белледикә? Иса Месихи. Хич бир хөкүмдары Иса Месихе деңәп болмаз. Ол «реблериң Ребби, патышаларың Патышасыдыр» (Ылхам 17:14). Исаның ислендик говы хөкүмдарданам, көп ягшылык этмәге гүйҗи етйәр.

5. Худайың Патышалыгы ниреде ерлешйәр ве ол нәмәниң үстүнден хөкүм сүрер?

⁵ Худайың Патышалыгы ниреде ерлешйәр? Иса Месих хәзир ниредекә? Онуң пүрсде эҗир чекип өленден соң, дирелип гөге галаны, белки, сениң ядыңдадыр (Ресулларың ишлери 2:33). Диймек, Худайың Патышалыгы гөкде. Ине, шонуң үчинем оңа «гөкдәки Патышалык» дийилйәр (2 Тимотеос 4:18). Худайың Патышалыгы гөкде болса-да, ол ериң үстүнден хөкүм сүрер (Ылхам 11:15).

6, 7. Иса нәме үчин иң говы Патыша?

⁶ Иса нәме үчин иң говы Патыша? Онуң себәбиниң бири, ол хич хачан өлмез. Мукаддес Язгыларда ердәки хөкүмдарлардан тапавутлыкда, ол «хемише дири» дийилйәр (Еврейлер 7:24, 25). Диймек, онуң башлан ягшы ишлери эбеди галар. Шейле-де ол гелеҗекде көп ягшы ишлери эдер.

⁷ Иса барада Мукаддес Язгыларда айдылан пыгамберлиге үнс бер: «Онда Реббиң Рухы, акылдарлык ве дүшүнҗе рухы, маслахат ве кувват рухы, билим ве Еховадан горкы рухы болар; ве онда Еховадан горкы болар; Ол Өз гарайшы билен хөкүм чыкармаз, эшидиши боюнча иш кесмез. Ол гарыплара адыл хөкүм чыкарар ве ердәки хорлук чекйәнлериң ишини догры чөзер» (Ишая 11:2—4). Бу сөзлер Исаның адалатлы ве рехимдар  Патыша болҗагыны гөркезйәр. Онуң хөкүмдарлыгында сениң яшасың гелйәрми?

8. Иса билен кимлер хөкүм сүрер?

⁸ Йөне Исаның еке өзи хөкүмдарлык этмез. Онуң билен биле башга-да хөкүм сүрҗеклер бар. Ынха, Павлус ресулың Тимотеоса язан сөзлери: «Чыдасак, Онуң билен биле хөкүм сүрерис» (2 Тимотеос 2:12). Павлус, Тимотеос ве Худайың сайлан башга вепалы адамлары хем гөкдәки Патышалыкда Иса билен хөкүм сүрер. Нәче адам бу хормата мынасып болар?

9. Иса билен биле нәче адам хөкүм сүрер ве Худай олары хачан сайлап башлады?

⁹ 7-нҗи бапда айдылышы ялы, Яхя ресул гөрен гөрнүшини шейле беян этди: «Онсоң гөрсем, Гузы [Иса Месих] Сион дагының [онуң гөкдәки ёкары везипеси] үстүнде дурды. Онуң янында болса маңлайында Онуң ве Атасының ады язылгы йүз кырк дөрт мүң адам барды». Бу 144 000 адам ким? Яхя муны шейле дүшүндирйәр: «Булар Гузы нирә гитсе, Онуң ызына дүшйәндир. Гутуланларың илкинҗи мивеси хөкмүнде Худая ве Гуза ынсанлар арасындан сатын алнанлар булардыр» (Ылхам 14:1, 4). Гөршүмиз ялы, булар Иса Месих билен гөкде хөкүм сүрмәге сайланан вепалы шәгиртлери. Олар гөкдәки яшайыш үчин диреленде, Иса билен биле «дүнйәниң үстүнден хөкүм сүрер» (Ылхам 5:10). Иса Месих билен биле хөкүм сүрҗек вепалы месихчилери, Худай ресулларың дөврүнден бәри сайлаяр. Оларың җеми 144 000 болар.

10. Исаның ве 144 мүңлериң хөкүм сүрмеги, Худайың сөйгүсини нәдип гөркезйәр?

¹⁰ Иса Месихиң ве 144 мүңлериң адамзадың үстүнден хөкүм сүрмеги, Худайың сөйгүсини гөркезйәр. Исаның өзи ынсан болуп гөрди ве эҗир чекмегиң нәмедигини оңат билйәр. Павлус Исаның башга хөкүмдарлардан  тапавутлылыкда «бизиң эҗизликлеримизе гынанып билмейән дәл, эйсем хер затда бизиң ялы сыналып гүнә этмеди» дийди (Еврейлер 4:15; 5:8). Онуң билен хөкүм сүрҗеклерем ерде яшанда гөрги гөрүп, көп сынаглары башдан гечирдилер. Олар бикәмиллик ве дүрли кеселлер билен гөрешдилер. Шонуң үчин олар адамларың башдан гечирйән кынчылыкларына говы дүшүнер.

ХУДАЙЫҢ ПАТЫШАЛЫГЫ НӘМЕЛЕР ЭДЕР?

11. Иса Месих нәме үчин Худайың ислегиниң гөкде амала ашмагы барада диләң дийди?

¹¹ Иса Патышалыгың гелмеги барада дилег эдиң диенде, ол шәгиртлерине Худайың ислегиниң «гөкде хем ерде» амала ашмагы барада-да дилег эдиң дийди. Гөкде Худайың яшаян еринде, вепалы перишделер онуң ислегини хемише ерине етирйәрди. Йөне 3-нҗи бапдан билшимиз ялы, бир залым перишде Худая гулак асман, Адам ата билен Хов энә гүнә этдирди. Мукаддес Язгыларың бу залым перишде, ягны Шейтан Иблис барада нәме диййәнини 10-нҗы бапдан гиңишлейин билерис. Худай Шейтана ве онуң ызына эерен перишделере, ягны җынлара гөкде галмага ёл берди. Шондан соң Худайың ислегини гөкде хеммелер ерине етирмейәрди. Эмма бу затлар Худайың Патышалыгы хөкүм сүрүп башланда үйтгемели. Гелеҗекки Патыша Иса Месих Шейтан билен сөвешмели (Ылхам 12:7—9).

12. Ылхам 12:10-да хайсы ики саны ваҗып вака барада айдыляр?

¹² Бу барада Мукаддес Язгылар шейле пыгамберлик эдйәр: «Онсоң мен гөкден бир батлы сес эшитдим. Ол шейле дийди: «Худайымызың гутарышы, гүйҗи, патышалыгы ве Онуң Месихиниң гудраты инди амала ашды. Чүнки доганларымызың айыплайҗысы [Шейтан], олары Худайымызың өңүнде гиҗе-гүндиз айыплаян ашак зыңылды» (Ылхам 12:10).  Бу аятда ики саны ваҗып вака барада айдылянына үнс бердиңми? Биринҗиден, Иса Месихиң баштутанлыгында Худайың Патышалыгы хөкүм сүрүп башлаяр. Икинҗиден, Шейтан гөкден ере зыңылды.

13. Шейтан ере зыңланда, гөкде нәме болды?

¹³ Бу вакалар нәмә элтди? Мукаддес Язгылар шейле диййәр: «Эй гөклер ве гөклерде яшаянлар, мунуң үчин бегениң!» (Ылхам 12:12). Вепалы перишделер бегендилер, себәби Шейтан ве онуң җынлары ере зыңланда, гөкде Ехова Худайың диңе вепалы гуллукчылары галды. Ол ерде парахатлык хем-де агзыбирлик хөкүм сүрйәр. Инди гөкде Худайың ислеги амала ашяр.

14. Шейтан ере зыңланда нәме болды?

¹⁴ Эйсем, ерде нәме болды? Мукаддес Язгылар: «Ер ве деңиз, вай сизиң халыңыза! Чүнки Иблис вагтының азлыгыны билип, гахар-газаба мүнүп, сизиң үстүңизе гелди» диййәр (Ылхам 12:12). Шейтан гөкден ере зыңланы ве вагтының аз галаны үчин, «гахар-газаба» мүнди. Ол гахардан яңа, адамлара бетбагтчылык гетирйәр. Бу барада индики бапдан гиңишлейин билерис. Эмма Худайың Патышалыгы онуң ислегини нәдип ерине етиреркә?

15. Худай Ери нәме максат билен яратды?

¹⁵ Худай Ери нәме максат билен яраданыны ядыңа сал. Бу барада 3-нҗи бапдан билипдик. Худай ер йүзүни Җеннете өвүрмекчидигини хениз Эрем багында гөркезипди. Ол ер йүзүнде диңе догры адамларың эбеди яшамагыны иследи. Шейтан Адам ата билен Хов энә гүнә этдирди, бу болса Худайың ислегиниң ерине етмегине вагтлайынча пәсгел берди. Йөне Худай максадыны үйтгетмеди. Онуң: «Догры адамлар ери мирас алып, онда эбеди яшар» диен вадасы хөкман ерине етер (Зебур 37:29). Ол Худайың Патышалыгы аркалы болар. Нәдип?

16, 17. Худайың Патышалыгы барада Даниел 2:44-ден нәме билдик?

 ¹⁶ Гел, Даниел 2:44-дәки пыгамберлиге середели. Онда шейле дийилйәр: «Шол патышалыкларың дөврүнде гөкдәки Худай патышалык беркарар эдер, ол хич хачан ёк болмаз ве бу патышалык башга халка гечмез; ол патышалыкларың әхлисини юмруп ёк эдер, өзи болса эбеди дурар». Бу аятдан Худайың Патышалыгы барада нәме билйәрис?

¹⁷ Биринҗиден, бу аятда Патышалык «шол патышалыкларың дөврүнде», ягны энтек башга патышалыклар барка беркарар эдилҗеги айдыляр. Икинҗиден, Патышалыгың эбеди дурҗагыны билйәрис. Оны хич ким хич хачан табын этдирип билмез ве онуң ерине башга хөкүмет гечмез. Үчүнҗиден, пыгамберликде Худайың Патышалыгы билен бу дүнйәниң патышалыкларының арасында сөвеш болҗагы айдыляр. Эмма Худайың Патышалыгы еңер. Шонда бүтин ериң үстүнден иң говы ве иң адалатлы еке-тәк хөкүмет болар.

18. Худайың Патышалыгы билен бу дүнйәниң хөкүметлериниң арасындакы сөвеше нәме дийилйәр?

¹⁸ Мукаддес Язгыларда Худайың Патышалыгы билен бу дүнйәниң хөкүметлериниң арасында болҗак айгытлы сөвеш барада айдыляр. Меселем, шол айгытлы сөвеш голайлашдыгыча, залым рухлар «бүтин дүнйәниң патышаларыны» алдава салмак үчин ялан яйрадып башларлар. Нәме үчин? Себәби олар «әхли зада гүйҗи етйән Худайың улы гүнүнде болҗак сөвеш үчин бүтин дүнйәниң патышаларыны үйшүрйәр». Дүнйәниң патышалары «Армагеддон диен ерде» үйшерлер (Ылхам 16:14, 16). Шу ики аятдан гөрнүши ялы, адамзат хөкүметлери билен Худайың Патышалыгының арасындакы айгытлы сөвеше Армагеддон дийилйәр.

19, 20. Шу гүнлер Худайың ислеги нәме үчин ерине етенок?

 ¹⁹ Худайың Патышалыгы Армагеддон аркалы нәме эдер? Гелиң, Худайың Ери нәме максат билен яраданыны ене-де яда салалың. Ехова Худай ер йүзүндәки Җеннетде шатлык билен гуллук этҗек, догры адамларың яшамагыны ислейәр. Онда нәме үчин хәзир ер йүзи Җеннет дәл? Онуң бир себәби, әхли адамлар гүнәли, олар өлйәрлер ве кеселлейәрлер. Эмма 5-нҗи бапдан билшимиз ялы, эбеди яшамагымыз үчин, Иса җаныны гурбан этди. Инҗилдәки Яхяның сөзлери ядыңда болса герек: «Чүнки Худай дүнйәни көп сөййәнлиги үчин Оглуна иман эденлериң хич бири хеләк болман, эбеди яшайша говушсын дийип, Өзүниң екеҗе Оглуны берди» (Яхя 3:16).

²⁰ Ене бир себәби, көп адамлар эрбет иш эдйәрлер. Олар ялана, кеззаплыга ве ахлаксызлыга батып, Худая гулак асмагам ислемейәрлер. Йөне Худай Армагеддонда эрбет адамлары ёк эдер (Зебур 37:10). Мундан башга-да, бу дүнйәниң хөкүметлери өз раятларына Худайың ислегини ерине етирмәге хөвеслендирмейәр. Хөкүметлериң көпүси башарныксыз, залым ве парахор. Мукаддес Язгылар: «Адамың үстүнден адамың агалык этмеги онуң зыянынадыр» дийип, догры айдяр (Вагызчы 8:9).

21. Худайың Патышалыгы ер йүзүнде онуң ислегини нәдип ерине етирер?

²¹ Армагеддондан соң бүтин ер йүзүнде еке-тәк бир хөкүмет, ягны Худайың Патышалыгы болар. Бу Патышалык Худайың ислегини ерине етирип, адамлара көп берекет берер. Шейтан ве онуң җынлары гайдып болмаз (Ылхам 20:1—3). Иса Месихиң төлег гурбаны аркалы адамлар өлмез ве кеселлемез. Шол Патышалыкда олар эбеди яшап билер (Ылхам 22:1—3). Бүтин ер йүзи Җеннете өврүлер. Патышалык ер йүзүнде Худайың  ислегини ерине етирер ве онуң адыны мукаддес эдер. Бу болса әхли адамларың Ехованың адыны шөхратландырҗакдыгыны аңладяр.

ХУДАЙЫҢ ПАТЫШАЛЫГЫ ХАЧАН ХӨКҮМ СҮРҮП БАШЛАР?

22. Иса Месих ердекә хем-де диреленден соң, Худайың Патышалыгының хөкүм сүрүп башламандыгыны ниреден билйәрис?

²² Иса ердекә Патышалык хөкүм сүрүп башламанды, чүнки ол шәгиртлерине: «Патышалыгың гелсин» дийип, дога этмеги өвредипди. Онда Патышалык Иса Месих гөге галанда, беркарар болдумы? Ёк, себәби Петрус билен Павлус: «Реб мениң Реббиме дийди: душманларыңы аякларыңа басганчак эдйәнчәм, сагымда отур» дийилйән Зебур 110:1-дәки сөзлериң, Иса диреленден соң, ерине етендигини айтдылар (Ресулларың ишлери 2:32—35; Еврейлер 10:12, 13). Гөршүмиз ялы, Патышалык беркарар болянча вагт гечмелиди.

23. а) Худайың Патышалыгы хачан хөкүм сүрүп башлады? б) Индики бапдан нәме билерис?

²³ Ене нәче вагт гарашмалыды? XIX асырда Мукаддес Язгылары үнс билен өвренйән адамлар, гарашылян вагтың 1914-нҗи йылда гутармалыдыгыны хасаплап билдилер (Шол сене барада 215—218-нҗи сахыпалардакы Гошмача маглуматда гиңишлейин айдыляр). 1914-нҗи йылдан бәри болян вакалар, шол хасабың  догрудыгыны тассыклаяр. Мукаддес Язгылардакы пыгамберликлериң ерине етмеги, 1914-нҗи йылда Иса Месихиң Патыша боландыгына ве шол йылда Худайың Патышалыгының хөкүм сүрүп башландыгына гүвә гечйәр. Диймек, биз Шейтаның «вагтының аз» галан дөврүнде яшаярыс (Ылхам 12:12; Зебур 110:2). Худайың Патышалыгы ер йүзүнде Худайың ислегини тизден амала ашырар дийип, биз ынам билен айдып билерис. Сен бу шатлыклы хабара бегенйәңми? Сен бу хакыката ынаняңмы? Якын гелеҗекде тәсин өзгеришлериң болҗакдыгыны индики бапдан билерсиң.

МУКАДДЕС ЯЗГЫЛАР НӘМЕ ӨВРЕДЙӘР?

▪ Худайың Патышалыгы — Иса Месихиң баштутанлыгындакы гөкдәки хөкүмет; Иса Месих билен ерден сайланан 144 000 адам хөкүм сүрер (Ылхам 14:1, 4).

▪ Патышалык 1914-нҗи йылда хөкүм сүрүп башлады ве шонда Шейтан гөкден Ере зыңылды (Ылхам 12:9).

▪ Худайың Патышалыгы тизден бу дүнйәниң хөкүметлерини ёк эдер ве бүтин ер йүзи Җеннете өврүлер (Ылхам 16:14, 16).

[Макаланың сораглары]

 [83 Сахыпадакы сурат

Шейтаның ве онуң җынларының гөкден ере зыңылмагы ер йүзүне бетбагтчылык гетирди. Эмма басым хорлук болмаз

[84, 85-нҗи сахыпадакы суратлар]

Патышалыгың хөкүм сүрмеги билен Худайың ислеги гөкде хем ерде ерине етер